4537. කදාස්සු මං ගොණරථා සන්නද්ධා උස්සිතද්ධජා, දීපා අථොපි වෙය්යග්ඝා සබ්බාලඞ්කාරභූසිතා.
4538. ආරූළ්හා ගාමණීයෙහි චාපහත්ථෙහි වම්මිහි, යන්තං මං නානුයිස්සන්ති තං කදාස්සු භවිස්සති.
4539. කදාස්සු මං අජරථා සන්නද්ධා උස්සිතද්ධජා, දීපා අථොපි වෙය්යග්ඝා සබ්බාලඞ්කාරභූසිතා.
4540. ආරූළ්හා ගාමණීයෙහි චාපහත්ථෙහි වම්මිහි, යන්තං මං නානුයිස්සන්ති තං කදාස්සු භවිස්සති.
4541. කදාස්සු මං මෙණ්ඩරථා සන්නද්ධා උස්සිතද්ධජා, දීපා අථොපි වෙය්යග්ඝා සබ්බාලඞ්කාරභූසිතා.
4542. ආරූළ්හා ගාමණීයෙහි චාපහත්ථෙහි වම්මිහි, යන්තං මං නානුයිස්සන්ති තං කදාස්සු භවිස්සති.
4543. කදාස්සු මං මිගරථා සන්නද්ධා උස්සිතද්ධජා, දීපා අථොපි වෙය්යග්ඝා සබ්බාලඞ්කාරභූසිතා.
4544. ආරූළ්හා ගාමණීයෙහි චාපහත්ථෙහි වම්මිහි, යන්තං මං නානුයිස්සන්ති තං කදාස්සු භවිස්සති.
4545. කදාස්සු මං හත්ථාරූහා සබ්බාලඞ්කාරභූසිතා, නීලවම්මධරා සූරා තොමරඞ්කුසපාණිනො; යන්තං මං නානුයිස්සන්ති තං කදාස්සු භවිස්සති.
4546. කදාස්සු මං අස්සාරූහා සබ්බාලඞ්කාරභූසිතා, නීලවම්මධරා සූරා ඉල්ලියා{1}චාපධාරිනො; යන්තං මං නානුයිස්සන්ති තං කදාස්සු භවිස්සති.
4547. කදාස්සු මං රථාරූහා සබ්බාලඞ්කාරභූසිතා, නීලවම්මධරා සූරා චාපහත්ථා කලාපිනො; යන්තං මං නානුයිස්සන්ති තං කදාස්සු භවිස්සති.
4548. කදාස්සු මං ධනුග්ගහා සබ්බාලඞ්කාරභූසිතා, නීලවම්මධරා සූරා චාපහත්ථා කලාපිනො; යන්තං මං නානුයිස්සන්ති තං කදාස්සු භවිස්සති.
4549. කදාස්සු මං රාජපුත්තා සබ්බාලඞ්කාරභූසිතා, චිත්තවම්මධරා සූරා කඤ්චනාවෙඨධාරිනො; යන්තං මං නානුයිස්සන්ති තං කදාස්සු{1} භවිස්සති.
4550. කදාස්සු මං අරියගණා වත්ථවන්තා අලඞ්කතා, හරිචන්දනලිත්තඞ්ගා කාසිකුත්තමධාරිනො; යන්තං මං නානුයිස්සන්ති තං කදාස්සු භවිස්සති.
4551. කදාස්සු මං අමච්චගණා සබ්බාලඞ්කාරභූසිතා, පිතවම්මධරා සූරා පුරතො ගච්ඡමාලිනී; යන්තං මං නානුයිස්සන්ති තං කදාස්සු භවිස්සති.
4552. කදාස්සු මං සත්තසතා භරියා සබ්බාලඞ්කාරභූසිතා, යන්තං මං නානුයිස්සන්ති තං කදාස්සු භවිස්සති.
4553. කදාස්සු මං සත්තසතා භරියා සුසඤ්ඤා තනුමජ්ඣිමා, යන්තං මං නානුයිස්සන්ති තං කදාස්සු භවිස්සති.
4554. කදාස්සු මං සන්නතා භරියා අස්සවා පියභාණිනී, යන්තං මං නානුයිස්සන්ති තං කදාස්සු භවිස්සති.
4555. කදාහං පත්තං ගහෙත්වාන මුණ්ඩො සඞ්ඝාටිපාරුතො, පිණ්ඩිකාය චරිස්සාමි තං කදාස්සු භවිස්සති.
4556. කදාහං පංසුකූලානං උජ්ඣිතානං මහාපථෙ, සඞ්ඝාටිං ධාරයිස්සාමි තං කදාස්සු භවිස්සති.
4557. කදාහං සත්තාහං මෙඝෙ{2} ඔවට්ඨො{3} අල්ලචීවරො, පිණ්ඩිකායා චරිස්සාමි තං කදාස්සු භවිස්සති.
4558. කදාහං සබ්බහං{4} ඨානං රුක්ඛා රුක්ඛා වනා වනං, අනපෙක්ඛො විහරිස්සාමි{5} තං කදාස්සු භවිස්සති.
4559. කදාහං ගිරිදුග්ගෙසු පහීනභයභෙරවො, අදුතියො විහරිස්සාමි{6} තං කදාස්සු භවිස්සති.
4560. කදා වීණංව රුජකො සත්තතන්තිං මනොරමං, චිත්තං උජුං කරිස්සාමි තං කදාස්සු භවිස්සති.
4561. කදාහං රථකාරොව පරිකන්තං උපාහනං, කාමසංයොජනෙ ඡෙවඡං{1} යෙ දිබ්බෙ යෙ ච මානුසෙ.
4562. තා ච සත්තසතා භරියා සබ්බාලඞ්කාරභූසිතා, බාහා පග්ගය්හ පක්කන්දුං කස්මා නො විජහිස්සසි.
4563. තා ච සත්තසතා භරියා සුසඤ්ඤා තනුමජ්ඣිමා, බාහා පග්ගය්හ පක්කන්දුං කස්මා නො විජහිස්සසි.
4564. තා ච සත්තසතා භරියා අස්සවා පියභාණිනී, බාහා පග්ගය්හ පක්කන්දුං කස්මා නො විජහිස්සසි.
4565. තා ච සත්තසතා භරියා සබ්බාලඞ්කාරභූසිතා, හිත්වා සම්පද්දයී{2} රාජා පබ්බජ්ජාය පුරක්ඛතො.
4566. තා ච සත්තසතා භරියා සුසඤ්ඤා තනුමජ්ඣිමා, හිත්වා සම්පද්දයී රාජා පබ්බජ්ජාය පුරක්ඛතො.
4567. තා ච සත්තසතා භරියා අස්සවා පියභාණිනී, හිත්වා සම්පද්දයී රාජා පබ්බජ්ජාය පුරක්ඛතො.
4568. හිත්වා සතඵලං{3} කංසං සොවණ්ණං සතරාජිකං, අග්ගහි මත්තිකාපත්තං{4} තං දුතියාභිසෙචනං.
4569. වෙස්මා අග්ගිස්මා ජාලා කොසා{5} ඩය්හන්ති භාගසො, රජතං ජාතරූපඤ්ච මුත්තා වෙළුරියා බහුං.
4570. මරණයො සඞ්ඛමුත්තා ච වත්ථිකං{6} හරිචන්දනං, අජිනං දන්තභණ්ඩඤ්ච ලොහං කාළායසං බහූ; එහි රාජ නිවත්තස්සු මා තෙ තං විනසා{7} ධනං.
4571. සුසුඛං වත ජිවාම යෙසං නො නත්ථි කිඤ්චනං, මිථිලාය{1} ඩය්හමානාය න මෙ කිඤ්චි අඩය්හථ.
4572. අටවියො සමුප්පන්නා රට්ඨං විද්ධංසයන්ති තං, එහි රාජ නිවත්තස්සු මා රට්ඨං විනසා ඉදං.
4573. සුසුඛං වත ජිවාම යෙසං නො නත්ථි කිඤ්චනං, රට්ඨෙ විලුම්පමානම්හි න මෙ කිඤ්චි අජීරථ.{2}
4574. සුසුඛං වත ජිවාම යෙසං නො නත්ථි කිඤ්චනං, පීතිභක්ඛා භවිස්සාම දෙව ආභස්සරා යථා.
4575. කිම්භෙසො මහතො ඝොසො කා නු ගාමෙ කිලීලියා,{3} සමණඤ්ඤෙව{4} පුච්ඡාම කත්ථෙසො අභිසටො{5} ජනො.
4576. මමං ඔහාය ගච්ඡන්තං එත්ථෙසො අභිසටො ජනො, සීමාතික්කමනං යන්තං මුනීමොනස්ස පත්තියා; මිස්සං නන්දීහි ගච්ඡන්තං කිං ජානමනුපුච්ඡසි.
4577. මාස්සු තිණ්ණො අමඤ්ඤිත්ථො{6} සරීරං ධාරයං ඉමං, අතීරණෙය්යමිදං{7} කම්මං බහූ හි පරිපන්ථයො.
4578. කො නු මෙ පරිපන්ථස්ස මම එවං විහාරිනො, යො නෙවදිට්ඨෙ නාදිට්ඨෙ කාමානමභිපත්ථයෙ.
4579. නිද්දා තන්දී විජම්භිකා අරතී භත්තසම්මදො, ආවසන්ති සරීරට්ඨා බහූහි පරිපන්ථයො{8}.
4580. කල්යාණං වත මං භවං බ්රාහ්මණමනුසාසසි, බ්රාහ්මණං යෙව{9} පුච්ඡාමි කොනු ත්වමසි මාරිස.
4581. නාරදො ඉති මෙ නාමං{1} කස්සපො ඉති මං විදූ, භොතො සකාසෙ ආගඤ්ඡිං සාධු සබ්භි සමාගමො.
4582. තස්ස තෙ සබ්බො ආනන්දො විහාරො උපවත්තතු, යදූනං තං පරිපූරෙහි ඛන්තියා උපසමෙන ච.
4583. පසාරය සන්නත්තඤ්ච උන්නත්තඤ්ච පසාරය, කම්මං විජ්ජඤ්ච ධම්මඤ්ච සක්කත්වාන පරිබ්බජ.
4584. බහූහත්ථි ච අස්සෙ ච නගරෙ ජනපදානි ච, හිත්වා ජනක පබ්බජිතො කපල්ලෙ රතිමජ්ඣගා.
4585. කච්චින්නු තෙ ජානපදා{2} මිත්තා මච්චා ච ඤාතකමා, දුභිං අකංසු{3} ජනක කස්මා චෙතං{4} අරුච්චථ.
4586. න මිගාජින ජාතුච්ච{5} අහං කඤ්චි කුදාචනං, අධම්මෙන ජිනෙ ඤාතිං න චාපි ඤාතයො මමං.
4587. දිස්වාන ලොකවත්තන්තං ඛජ්ජන්තං කද්දමිකතං, හඤ්ඤරෙ බජ්ඣරෙ චෙත්ථ යත්ථ සත්තො පුථුජ්ජනො; එතාහං උපමං කත්වා භික්ඛකොස්මි මිගාජින.
4588. කොනු තෙ භගවා සත්ථා කස්සෙතං වචනං සුචි නහි කප්පං වා විජ්ජං වා පච්චක්ඛාය රථෙසභ: සමණං ආහු වත්තන්තං යථා දුක්ඛස්සතික්කමො.
4589. න මිගාජින ජාතුච්ච අහං කඤ්චි කුදාචනං, සමණං බ්රාහ්මණං වාපි සක්කත්වා අනුපාවිසිං.
4590. මහතා චානුභාවෙන ගච්ඡන්තො සිරියාජලං, ගීයමානෙසු ගීතෙසු වජ්ජමානෙසු වග්ගුසු; තුරියතාළිතසංඝුට්ඨෙ සම්මතාලසමාහිතෙ.
4591. සමිගාජින මද්දක්ඛිං ඵලං{1} අම්බං තිරොච්ඡදං, තුජ්ජමානං{2} මනුස්සෙහි ඵලකාමෙහි{3} ජන්තුහි.
4592. සො ඛො හන්තං සිරිං හිත්වා ඔරොහිත්වා මිගාජින, මූලං අම්බස්සුපාගඤ්ඡිං ඵලිනො නිප්ඵලිතස්ස ච.
4593. ඵලං අම්බං හතං දිස්වා විද්ධසතං{4} විනලීකතං, අථෙතං ඉතරං අම්බං නීලොභාසං මනොරමං.
4594. එවමෙව නූනම්හෙපි ඉස්සරෙ බහුකණ්ටකෙ, අමිත්තා නො වධිස්සන්ති යථා අම්බො ඵලී හතො.
4595. අජිනම්හි හඤ්ඤතෙ දීපි නාගො දන්තෙහි හඤ්ඤතෙ, ධනම්හි ධනිනො හන්ති අනිකෙතමසන්ථවං; ඵලී අම්බො අඵලො ච තෙ සත්ථාරො උභො මම.
4596. සබ්බො ජනො පව්යධිතො රාජා පබ්බජිතො ඉති, හත්ථාරොහා අනීකට්ඨා රථිකා පත්තිකාරිකා.
4597. අස්සාසයිත්වා ජනතං ඨපයිත්වා පටිච්ඡදං, පුත්තං රජ්ජෙ ඨපෙත්වා අථ පච්ඡා පබ්බජිස්සසි.
4598. වත්තා මයා ජානපදා මිත්තාමච්චා ච ඤාතකා, සන්ති පුත්තා විදෙහානං දීඝාවු රට්ඨවඩ්ඪනො; තෙ රජ්ජං කාරයිස්සන්ති මිථිලායං පජාපති.
4599. එහි තං අනුසික්ඛාමි යං වාක්යං මම රුච්චති, රජ්ජං තුවං කාරයන්ති පාපං දුච්චරිතං බහුං: කායෙන වාචා මනසා යෙන ගඤ්ඡිසි දුග්ගතිං.
4600. පරදින්නකෙන පරනිට්ඨිතෙන, පිණ්ඩෙන යාපෙහි සධීරධම්මො.
4601. යොපි චතුත්ථෙ භත්තකාලෙ න භුඤ්ජෙ අජද්ධුමාරිව{1} ඛුදාය මීයෙ, න ත්වෙව පිණ්ඩං ලුලිතං අනරියං කුලපුත්තරූපො සප්පුරිසො න සෙවෙ තයිදං න සාධු තයිදං න සුට්ඨු සුනඛුච්ඡිට්ඨකං භුඤ්ජසෙ ත්වං.
4602. න චා පි මෙ සීවලි සො අභක්ඛො යං හොති චත්තං ගිහිනො සුනඛස්ස වා, යෙ කෙචි භොගා ඉධ ධම්මලද්ධා සබ්බො සො භක්ඛො අනවජ්ජාති{2} වුත්තො.
4603. කුමාරිකෙ{3} උපසෙනියෙ නිච්චං නිගළ{4} මණ්ඩිතෙ, කස්මා තෙ එකො භුජො ජනති එකො තෙ න ජනති භුජො,
4604. ඉමස්මිං මෙ සමණ හත්ථෙ පටිමුක්කා දුනීධුරා,{5} සඞ්ඝාතා ජායතෙ සද්දො දුතියස්සෙව සා ගති.
4605. ඉමස්මිං මෙ සමණා හත්ථෙ පටිමුක්කො එකනීධුරො,{6} සො අදුතියො න ජනති මුනිභූතොව තිට්ඨති.
4606. විවාදප්පත්තො දුතියො කෙනෙකො විවදිස්සති, තස්ස තෙ සග්ගකාමස්ස එකත්තමුපරොචතං.
4607. සුණසි{7} සීවලී ගාථා කුමාරියා පවෙදිතා, පෙස්සියා මං ගරහිත්ථො දුතියස්සෙව සා ගති.
4608. අයං ද්වෙධා පථො භද්දෙ අනුචිණ්ණො පථාවිහි, තෙසං ත්වං එකං ගණ්හාහි අහමෙකං පුනාපරං.
4609. නෙව මං ත්වං “පතී මෙ”ති මාහං “භරියා” ති වා පුන, ඉමමෙව කථං කථයන්තා ථූණං නගරුපාගමුං.
4610. කොට්ඨකෙ උසුකාරස්ස භත්තකාලෙ උපට්ඨිතෙ, තත්ර ච සො උසුකාරො (එකං දණ්ඩං උජුං කතං;) එකඤ්ච චක්ඛුං නිග්ගය්හ ජිම්හමෙකෙන පෙක්ඛති.
4611. එවං නො සාධු පස්සසි උසුකාර සුණොහි මෙ, යදෙකං චක්ඛුං නිග්ගය්හ ජිභම්මෙකෙන පෙක්ඛසි.
4612. ද්වීහි සමණ චක්ඛූහි විසාලං විය ඛායති, අසම්පත්වා පරං{1} ලිඞ්ගං නුජජුභාවාය කප්පති.
4613. එකඤ්ච චක්ඛුං නිග්ගය්හ ජිම්භමෙකෙන පෙක්ඛතො, සම්පත්වා පරමං ලිඞ්ගං උජුභාවාය කප්පති.
4614. විවාදප්පත්තො දුතියො කෙනෙකො විවදිස්සති, තස්ස තෙ සග්ගකාමස්ස එකත්තමුපරොවතං.
4615. සුණසි සීවලි ගාථා උසුකාරෙණ පවෙදිතා, පෙස්සියා{2} මං ගරහිත්ථො දුතියස්සෙව සා ගති.
4616. අයං ද්වෙධා පථො භද්දෙ අනුචිණ්ණා පථාවිහි, තෙසං ත්වං එකං ගණ්හාහි අහමෙතං පුනාපරං.
4617. නෙව මං ත්වං “පති මෙ”ති මාහං “භරියා” ති වා පුන, මුඤ්ජාවිසිකා{3} පවාළ්හා එකා විහර සීවලී ති.
මහාජනකජාතකං දුතියං.
3. සාමජාතකං
4618. කො නු මං උසුනා විජ්ඣි පත්තං උදහාරකං,{1} ඛත්තියො බ්රාහ්මණො වෙස්සො කො මං විද්ධා නිලීයසි.{2}
4619. න මෙ මංසානි ඛජ්ජානි චම්මෙනත්ථො න විජ්ජති, අථ කෙන නු වණ්ණෙන විද්ධෙය්යං මං අමඤ්ඤථ.
4620. කො වා ත්වං කස්ස වා පුත්තෙ කථං ජානෙමු තං මයං, පුට්ඨො මෙ සම්ම අක්ඛාහි කිං මං විද්ධා නිලීයසි.
4621. රාජාහමස්මි කාසීනං පිලියක්ඛොති මං විදූ, ලොභා රට්ඨං පහත්වාන{3} මිගමෙසං{4} චරාමහං.
4622. ඉස්සත්ථෙචස්මි කුසලො දළ්හධම්මොති විස්සුතො, නාගොපි මෙ න මුඤ්චෙය්ය ආගතො උසුපාතනං.
4623. ත්වඤ්ච තස්ස වා පුත්තොසි කථං ජානෙමු තං මයං, පිතුනො අත්තනො චාපි නාමගොත්තං පවෙදය.
4624. නෙසාදපුත්තො භද්දන්තෙ සාමො ඉති මං ඤාතයො, ආමන්තයිංසු ජීවන්තං ස්වාජ්ජෙවාහං{5} ගතො සයෙ.
4625. විද්ධොස්මි පුථුසල්ලෙන සවිසෙන යථා මිගො, සකම්හි ලොහිතෙ රාජ පස්ස සෙමි පරිප්ලුතො.
4626. පටිචම්ම{6}ගතං සල්ලං පස්ස විහාමි{7} ලොහිතං, ආතුරො ත්යානු පුච්ඡාමි කිං මං විද්ධා නිලීයසි.
4627. අජිනම්හි හඤ්ඤතෙ දීපි නාගො අන්තෙහි හඤ්ඤතෙ, අථ කෙන නු වණ්ණෙන විද්ධෙය්යං මං අමඤ්ඤථ.
4628. මිගො උපට්ඨිතො ආසි ආගතො උසුපාතනං, තං දිස්වා උබ්බිජ්ජි සාම{1} තෙන කොධො මමාවිසි.
4629. යථො සරාමි අත්තානං යතො පත්තොස්මි විඤ්ඤුතං, න මං මිගා උත්තසන්ති{2} අරඤ්ඤෙ සාපදානිපි.
4630. යතො නිධිං පරිහරිං යතො පත්තොස්මි යොබ්බනං, න මං මිගා උත්තසන්ති අරඤ්ඤෙ සාපදානිපි.
4631. භීරූ කිම්පුරිසා රාජ පබ්බතෙ ගන්ධමාදනෙ, සම්මොදමානා ගච්ඡාම පබ්බතානි වනානි ච; අථ කෙන නු වණ්ණෙන උත්ත්රසෙ සො මිගො මමං.
4632. න තද්දසා{3} මිගො සාම කින්තාහං අලිකං{4} භණෙ, කොධලොභාභිභූතොහං උසුං තෙ තං අවස්සජිං.
4633. කුතො නු සම්ම ආගම්ම කස්ස වා පහිතො තුවං, උදහාරො නදිං ගච්ඡ ආගතො මිගසම්මතං.
4634. අන්ධා මාතා පිතා මය්හං තෙ භරාමි බ්රහාවනෙ, තෙසාහං උදහාරකො{5} ආගතො මිගසම්මතං.