4439. සායමෙකෙ න දිස්සන්ති{3} පාතො දිට්ඨා බහුජ්ජනා, පාතො එකෙ න දිස්සන්ති සායං දිට්ඨා බහුජ්ජනා.
4440. අජ්ජෙව කිච්චං ආතප්පං{4} කො ජඤ්ඤා මරණං සුවෙ, නහි නො සඞ්ගරං තෙන මහාසෙනෙන මච්චුනා.
4441. චොරා ධනස්ස පත්ථෙන්ති රාජා මුත්තොස්මි බන්ධනා, එහි රාජ නිවත්තස්සු නාහං රජ්ජෙනමත්ථිකොති.
මූගපක්ඛජාතකං පඨමං.
2. මහාජනකජාතකං
4442. කොයං මජ්ඣෙ සමුද්දස්මිං අපස්සං තීරමායුහෙ, කං{1} ත්වං අත්ථවසං ඤත්වා එවං වායමසෙ භුසං.
4443. නිසම්ම වත්තං ලොකස්ස වායාමස්ස ච දෙවතෙ, තස්මා මජ්ඣෙ සමුද්දස්මිං අපස්සං තීරමායුහෙ.
4444. ගම්භීරෙ අප්පමෙය්යස්මිං තීරං යස්ස න දිස්සති, මොඝො තෙ පුරිස වායාමො අප්පත්වාව මරිස්සසි.
4445. අනණො ඤාතීනං හොති දෙවානං පිතුනො{2} ච සො, කරං පුරිසකිච්චානි න ච පච්ඡානුතප්පති.
4446. අපාරනෙය්යං යං කම්මං අඵලං කිලමථුද්දයං, තත්ථ කො වායමෙනත්ථො මච්චු යස්සාභිනිප්පතං.{3}
4447. අපාරනෙය්යං අච්චන්තං යො විදිත්වාන දෙවතෙ, න රක්ඛෙ අත්තනො පාණං ජඤ්ඤා සො යදි{4} හාපයෙ.
4448. අධිප්පාය ඵලං එකෙ අස්මිං ලොකස්මි දෙවතෙ, පයොජයන්ති කම්මානි තානි ඉජ්ඣන්ති වා න වා.
4449. සන්දිට්ඨිකං කම්මඵලං නනු පස්සසි දෙවතෙ, සන්නා අඤ්ඤෙ තරාමහං තඤ්ච පස්සාමි සන්තිකෙ.
4450. සො අහං වායමිස්සාමි යථාසත්තිං යථාබලං, ගච්ඡං පාරං සමුද්දස්ස කාසං{5} පුරිසකාරියං.
4451. යො ත්වං එවං ගතෙ ඔඝෙ අප්පමෙය්යෙ මහණ්ණවෙ, ධම්මවායාමසම්පන්නො කම්මනා{6} නාවසීදසි, සො ත්වං තත්ථෙව ගච්ඡාහි යත්ථ තෙ{7} නිරතො මනො.
4452. සුරියුග්ගමනෙ නිධි අථො ඔග්ගමනෙ නිධි, අන්තො නිධි බහි නිධි න අන්තො න බහි නිධි.
4453. ආරොහනෙ මහානිධි අථො ඔරොහනෙ නිධි, චතුරො ච මහාසාලා සමන්තා යොජනෙ නිධි.
4454. දන්තග්ගෙසු මහානිධි වාලග්ගෙසු ච කෙබුකෙ, රුක්ඛග්ගෙසු මහානිධි සොළසෙතෙ මහානිධි සහස්සත්ථාමො පල්ලඞ්කො සීවලාරාධනෙන ච.
4455. ආසිංසෙථෙව පුරිසො{1} න නිබ්බින්දෙය්ය පණ්ඩිතො, පස්සාමි වොහං අත්තානං යථා ඉච්ඡිං තථා අහු.
4456. ආසිංසෙථෙව පුරිසො න නිබ්බින්දෙය්ය පණ්ඩිතො, පස්සාමි වොහං අත්තානං උදකා ථලමුබ්භතං.
4457. වායමෙථෙව පුරිසො න නිබ්බින්දෙය්ය පණ්ඩිතො, පස්සාමි වොහං අත්තානං යථා ඉච්ඡිං තථා අහු.
4458. වායමෙථෙව පුරිසො න නිබ්බින්දෙය්ය පණ්ඩිතො, පස්සාමි වොහං අත්තානං උදකා ථලමුබ්භතං.
4459. දුක්ඛූපනීතොපි නරො සපඤ්ඤො ආසං න ඡින්දෙය්ය සුඛාගමාය, බහූ හි ඵස්සා අහිතා හිතා ච අවිතක්කිතා මච්චුමුපබ්බජන්ති.{2}
4460. අචින්තිතම්පි භවති චිත්තිතම්පි විනස්සති, න හි චින්තාමයා භොගා ඉත්ථියා පුරිසස්ස වා.
4461. අපුරාණං{3} වත භො රාජා සබ්බභුම්මො දිසම්පති, නාජ්ජ නච්චෙ නිසාමෙති න ගීතෙ කුරුතෙ මනො.
4462. න මිගෙ නපි උය්යානෙ නපි හංසෙ උදික්ඛති, මූගොව තුණ්හිමාසීනො න අත්ථමනුසාසති.
4463. සුඛකාමා රහොසීලා වධබන්ධා උපාරතා,{1} කෙසන්නු{2} අජ්ජ ආරාමෙ දහරා වුද්ධා ච අච්ඡරෙ.
4464. අතික්කන්තවනථා ධීරා නමො තෙසං මහෙසිනං, යෙ උස්සුකම්භි ලොකම්හි විහරන්ති අනුස්සුකා.
4465. තෙ ඡෙත්වා මච්චුනො ජාලං තං තං මායාවිනො දළ්හං, ඡින්තාලයත්තා{3} ගච්ඡන්ති කො තෙසං ගතිමාපයෙ.
4466. කදාහං මිථිලං ඵීතං විසාලං සබ්බතොපභං,{4} පහාය පබ්බජිස්සාමි තං කදාස්සු{5} භවිස්සති.
4467. කදාහං මිථිලං ඵීතං විභත්තං භාගසො මිතං, පහාය පබ්බජිස්සාමි තං කදාස්සු භවිස්සති.
4468. කදාහං මිථිලං ඵීතං බහුපාකාරතොරණං,{*} පහාය පබ්බජිස්සාමි තං කදාස්සු භවිස්සති.
4469. කදාහං මිථිලං ඵීතං දළ්හමට්ටාලකොට්ඨකං, පහාය පබ්බජිස්සාමි තං කදාස්සු භවිස්සති.
4470. කදාහං මිථිලං ඵීතං සුවිභත්තං මහාපථං, පහාය පබ්බජිස්සාමි තං කදාස්සු භවිස්සති.
4471. කදාහං මිථිලං ඵීතං සුවිභත්තන්තරාපණං, පහාය පබ්බජිස්සාමි තං කදාස්සු භවිස්සති.
4472. කදාහං මිථිලං ඵීතං ගවාස්සරථපීළිතං, පහාය පබ්බජිස්සාමි තං කදාස්සු භවිස්සති.
4473. කදාහං මිථිලං ඵීතං ආරාමවනමාලිනිං, පහාය පබ්බජිස්සාමි තං කදාස්සු භවිස්සති.
4474. කදාහං මිථිලං ඵීතං උය්යානවනමාලිනිං, පහාය පබ්බජිස්සාමි තං කදාස්සු{1} භවිස්සති.
4475. කදාහං මිථිලං ඵීතං පාසාදවනමාලිනිං, පහාය පබ්බජිස්සාමි තං කදාස්සු භවිස්සති.
4476. කදාහං මිථිලං ඵීතං තිපුරං{2} රාජබන්ධුනිං, මාපිතං සොමනස්සෙන වෙදෙහෙන යසස්සිනා පහාය පබ්බජිස්සාමි තං කදාස්සු භවිස්සති.
4477. කදාහං වෙදෙහෙ{3} ඵීතෙ නිචිතෙ ධම්මරක්ඛිතෙ, පහාය පබ්බජිස්සාමි තං කදාස්සු භවිස්සති.
4478. කදාහං වෙදෙහෙ ඵීතෙ අජෙය්යෙ ධම්මරක්ඛිතෙ, පහාය පබ්බජිස්සාමි තං කදාස්සු භවිස්සති.
4479. කදාහං අන්තෙපුරං රම්මං විභත්තං භාගසො මිතං, පහාය පබ්බජිස්සාමි තං කදාස්සු භවිස්සති.
4480. කදාහං අන්තෙපුරං රම්මං සුධාමත්තිකලෙපනං, පහාය පබ්බජිස්සාමි තං කදාස්සු භවිස්සති.
4481. කදාහං අන්තෙපුරං රම්මං සුචිගන්ධං මනොරමං, පහාය පබ්බජිස්සාමි තං කදාස්සු භවිස්සති.
4482. කදාහං කූටාගාරෙ විභත්තෙ භාගසො මිතෙ, පහාය පබ්බජිස්සාමි තං කදාස්සු භවිස්සති.
4483. කදාහං කූටාගාරෙ ච සුධාමත්තිකලෙපනෙ, පහාය පබ්බජිස්සාමි තං කදාස්සු භවිස්සති.
4484. කදාහං කූටාගාරෙ ච සුචිගන්ධෙ මනොරමෙ, පහාය පබ්බජිස්සාමි තං කදාස්සු භවිස්සති.
4485. කදාහං කූටාගාරෙ ච ලිත්තෙ චන්දනඵොසිතෙ,{4} පහාය පබ්බජිස්සාමි තං කදාස්සු භවිස්සති.
4486. කදාහං සුවණ්ණපල්ලඞ්කෙ ගොණකෙ චිත්තසන්ථතෙ, පහාය පබ්බජිස්සාමි තං කදාස්සු භවිස්සති.
4487. කදාහං මණිපල්ලඞ්කෙ ගොණකෙ චිත්තසන්ථතෙ, පහාය පබ්බජිස්සාමි තං කදාස්සු භවිස්සති.
4488. කදාහං කප්පාසකොසෙය්යං ඛොමකොටුම්බරානි ච, පහාය පබ්බජිස්සාමි තං කදාස්සු භවිස්සති.
4489. කදාහං පොක්ඛරණියො රම්මා චක්කවාකූපකූජිතා,{1} මන්දාලකෙහි සඤ්ඡන්නා පදුමුප්පලකෙහි ච පහාය පබ්බජිස්සාමි තං කදාස්සු{2} භවිස්සති.
4490. කදාහං හත්ථිගුම්බෙ සබ්බාලඞ්කාරභූසිතෙ, සුවණ්ණකච්ඡෙ මාතඞ්ගෙ හෙමකප්පනවාසසෙ.{3}
4491. ආරූළ්හෙ ගාමණීයෙහි තොමරඞ්කුසපාණිහි, පහාය පබ්බජිස්සාමි තං කදාස්සු භවිස්සති.
4492. කදාහං අස්සගුම්බෙ සබ්බාලඞ්කාරභූසිතෙ, ආජානිය්යෙ ච ජාතියා සින්ධවෙ සීඝවාහනෙ.
4493. ආරූළ්හෙ ගාමණීයෙහි ඉල්ලියාචාපධාරිහි, පහාය පබ්බජිස්සාමි තං කදාස්සු භවිස්සති.
4494. කදාහං රථසෙණියො සන්නද්ධෙ උස්සිතද්ධජෙ, දීපෙ අථොපි වෙය්යග්ඝෙ සබ්බාලඞ්කාරභූසිතෙ.
4495. ආරූළ්හෙ ගාමණීයෙහි චාපහත්ථෙහි වම්මිහි, පහාය පබ්බජිස්සාමි තං කදාස්සු භවිස්සති.
4496. කදාහං සොවණ්ණරථෙ සන්නද්ධෙ උස්සිතද්ධජෙ, දීපෙ අථොපි වෙය්යග්ඝෙ සබ්බාලඞ්කාරභූසිතෙ.
4497. ආරූළ්හෙ ගාමිණීයෙහි චාපහත්ථෙහි වම්මිහි, පහාය පබ්බජිස්සාමි තං කදාස්සු භවිස්සති.
4498. කදාහං සජ්ඣුරථෙ සන්නද්ධෙ උස්සිතද්ධජෙ, දීපෙ අථොපි වෙය්යග්ඝෙ සබ්බාලඞ්කාරභූසිතෙ.
4499. ආරූළ්හෙ ගාමිණීයෙහි චාපහත්ථෙහි වම්මිහි, පහාය පබ්බජිස්සාමි තං කදාස්සු භවිස්සති.
4500. කදාහං අස්සරථෙ සන්නද්ධෙ උස්සිතද්ධජෙ, දීපෙ අථොපි වෙය්යග්ඝෙ සබ්බාලඞ්කාරභූසිතෙ.
4501. ආරූළ්හෙ ගාමණීයෙහි චාපහත්ථෙහි වම්මිහි, පහාය පබ්බජිස්සාමි තං කදාස්සු භවිස්සති.
4502. කදාහං ඔට්ඨරථෙ සන්නද්ධෙ උස්සිතද්ධජෙ, දීපෙ අථොපි වෙය්යග්ඝෙ සබ්බාලඞ්කාරභූසිතෙ.
4503. ආරූළ්හෙ ගාමණීයෙහි චාපහත්ථෙහි වම්මිහි, පහාය පබ්බජිස්සාමි තං කදාස්සු භවිස්සති.
4504. කදාහං ගොණරථෙ සන්නද්ධෙ උස්සිතද්ධජෙ, දීපෙ අථොපි වෙය්යග්ඝෙ සබ්බාලඞ්කාරභූසිතෙ.
4505. ආරූළ්හෙ ගාමණීයෙහි චාපහත්ථෙහි වම්මිහි, පහාය පබ්බජිස්සාමි තං කදාස්සු භවිස්සති.
4506. කදාහං අජරථෙ සන්නද්ධෙ උස්සිතද්ධජෙ, දීපෙ අථොපි වෙය්යග්ඝෙ සබ්බාලඞ්කාරභූසිතෙ.
4507. ආරූළ්හෙ ගාමණීයෙහි චාපහත්ථෙහි වම්මිහි, පහාය පබ්බජිස්සාමි තං කදාස්සු භවිස්සති.
4508. කදාහං මෙණ්ඩරථෙ සන්නද්ධෙ උස්සිතද්ධජෙ, දීපෙ අථොපි වෙය්යග්ඝෙ සබ්බාලඞ්කාරභූසිතෙ.
4509. ආරූළ්හෙ ගාමණීයෙහි චාපහත්ථෙහි වම්මිහි, පහාය පබ්බජිස්සාමි තං කදාස්සු භවිස්සති.
4510. කදාහං මිගරථෙ{1} සන්නද්ධෙ උස්සිතද්ධජෙ, දීපෙ අථොපි වෙය්යග්ඝෙ සබ්බාලඞ්කාරභූසිතෙ.
4511. ආරූළ්හෙ ගාමණීයෙහි චාපහත්ථෙහි වම්මිහි, පහාය පබ්බජිස්සාමි තං කදාස්සු භවිස්සති.
4512. කදාහං හත්ථාරූහෙ{2} සබ්බාලඞ්කාරභූසිතෙ, නීලවම්මධරෙ{3} සූරෙ තොමරඞ්කුස පාණිනෙ; පහාය පබ්බජිස්සාමි තං කදාස්සු භවිස්සති.
4513. කදාහං අස්සාරූහෙ{1} සබ්බාලඞ්කාරභූසිතෙ, නීලවම්මධරෙ සූරෙ ඉල්ලියාචාපධාරිනෙ පහාය පබ්බජිස්සාමි තං කදාස්සු භවිස්සති.
4514. කදාහං රථාරූහෙ{2} සබ්බාලඞ්කාරභූසිතෙ, නීලවම්මධරෙ සූරෙ චාපහත්ථෙ කලාපිනෙ{3} පහාය පබ්බජිස්සාමි තං කදාස්සු භවිස්සති.
4515. කදාහං ධනුග්ගහෙ සබ්බාලඞ්කාරභූසිතෙ, නීලවම්මධරෙ සූරෙ චාපහත්ථෙ{4} කලාපිනෙ පහාය පබ්බජිස්සාමි තං කදාස්සු භවිස්සති.
4516. කදාහං රාජපුත්තෙ{5} සබ්බාලඞ්කාරභූසිතෙ, චිත්තවම්මධරෙ සූරෙ කඤ්චනාවෙළධාරිනෙ; පහාය පබ්බජිස්සාමි තං කදාස්සු භවිස්සති.
4517. කදාහං අරියගණෙ වත්ථවන්තෙ{6} අලඞ්කතෙ, හරිචන්දනලිත්තඞ්ගෙ කාසිකුත්තමධාරිනෙ; පහාය පබ්බජිස්සාමි තං කදාස්සු භවිස්සති.
4518. කදාහං අමච්චගණෙ සබ්බාලඞ්කාරභූසිතෙ, පීතවම්මධරෙ සූරෙ පුරතො ගච්ඡමාලිනෙ; පහාය පබ්බජිස්සාමි තං කදාස්සු භවිස්සති.
4519. කදා සත්තසතා භරියා සබ්බාලඞ්කාරභූසිතා, පහාය පබ්බජිස්සාමි තං කදාස්සු භවිස්සති.
4520. කදා සත්තසතා භරියා සුසඤ්ඤා තනුමජ්ඣිමා, පහාය පබ්බජිස්සාමි තං කදාස්සු භවිස්සති.
4521. කදා සත්තසතා භරියා අස්සවා පියභාණිනී, පහාය පබ්බජිස්සාමි තං කදාස්සු භවිස්සති.
4522. කදා සතඵලං කංසං සොවණ්ණං සතරාජිකං, පහාය පබ්බජිස්සාමි තං කදාස්සු භවිස්සති.
4523. කදාස්සු මං හත්ථගුම්බා සබ්බාලඞ්කාරභූසිතා, සුවණ්ණකච්ඡා මාතඞ්ගා හෙමකප්පනවාසසා.
4524. ආරූළ්හා ගාමණීයෙහි තොමරංකුසපාණිහි, යන්තං මං නානුයිස්සන්ති තං කදාස්සු භවිස්සති.
4525. කදාස්සු මං අස්සගුම්බා සබ්බාලඞ්කාරභූසිතා, ආජානීයා ච ජාතියා සින්ධවා සීඝවාහනා.
4526. ආරූළ්හා ගාමණීයෙහි ඉල්ලියාචාපධාරිහි, යන්තං මං නානුයිස්සන්ති තං කදාස්සු භවිස්සති.
4527. කදාස්සු මං රථසෙණියො සන්නද්ධා උස්සිතද්ධජා, දීපා අථොපි වෙය්යග්ඝා සබ්බාලඞ්කාරභූසිතා.
4528. ආරූළ්හා ගාමණීයෙහි චාපහත්ථෙහි වම්මිහි, යන්තං මං නානුයිස්සන්ති තං කදාස්සු භවිස්සති.
4529. කදාස්සු මං සොණ්ණරථා සන්නද්ධා උස්සිතද්ධජා, දීපා අථොපි වෙය්යග්ඝා සබ්බාලඞ්කාරභූසිතා
4530. ආරූළ්හා ගාමණීයෙහි චාපහත්ථෙහි වම්මිහි, යන්තං මං නානුයිස්සන්ති තං කදාස්සු භවිස්සති.
4531. කදාස්සු මං සජ්ඣුරථා සන්නද්ධා උස්සිතද්ධජා, දීපා අථොපි වෙය්යග්ඝා සබ්බාලඞ්කාරභූසිතා
4532. ආරූළ්හා ගාමණීයෙහි චාපහත්ථෙහි වම්මිහි, යන්තං මං නානුයිස්සන්ති තං කදාස්සු භවිස්සති.
4533. කදාස්සු මං අස්සරථා සන්නද්ධා උස්සිතද්ධජා, දීපා අථොපි වෙය්යග්ඝා සබ්බාලඞ්කාරභූසිතා.
4534. ආරූළ්හා ගාමණීයෙහි චාපහත්ථෙහි වම්මිහි, යන්තං මං නානුයිස්සන්ති තං කදාස්සු භවිස්සති.
4535. කදාස්සු මං ඔට්ඨරථා සන්නද්ධා උස්සිතද්ධජා, දීපා අථොපි වෙය්යග්ඝා සබ්බාලඞ්කාරභූසිතා.
4536. ආරූළ්හා ගාමණීයෙහි චාපහත්ථෙහි වම්මිහි, යන්තං මං නානුයිස්සන්ති තං කදාස්සු භවිස්සති.