4339. දරිතො පබ්බතාතො{2} වා රුක්ඛාතො{3} පතිතො නරො, චුතො පතිට්ඨං ලභති යො මිත්තානං න දූභති.
4340. විරූළ්හමූලසන්තානං නිග්රොධමිව මාලුතො, අමිත්තා නප්පසහන්ති යො මිත්තානං න දූභති.
4341. එහි තං පටිනෙස්සාමි රාජපුත්ත සකං ඝරං, රජ්ජං කාරෙහි භද්දන්තෙ කිං අරඤ්ඤෙ කරිස්සසි.
4342. අලං මෙ තෙන රජ්ජෙන ඤාතකෙහි{4} ධනෙන වා, යං මෙ අධම්මචරියාය රජ්ජං ලබ්භෙථ{5} සාරථි.
4343. පුණ්ණපත්තං පලබ්භෙහි{6} රාජපුත්ත ඉතො ගතො, පිතා මාතා ච මෙ දජ්ජුං රාජපුත්ත තයී ගතෙ.
4344. ඔරොධා ච කුමාරා ච වෙසියානා ච බ්රාහ්මණා, තෙපි අත්තමනා දජ්ජුං රාජපුත්ත තයී ගතෙ.
4345. හත්ථාරූහා{7} අනීකට්ඨා රථිකා පත්තිකාරකා, තෙපි දජ්ජුං පතීතා මෙ රාජපුත්ත තයී ගතෙ
4346. බහූ{8} ජානපදා චඤ්ඤෙ නෙගමා ච සමාගතා, උපායනානි මෙ දජ්ජුං රාජපුත්ත තයී ගතෙ.
4347. පිතුමාතු චහං චත්තො රට්ඨස්ස නිගමස්ස ච, අථො සක්යකුමාරානං නත්ථි මය්හං සකං ඝරං.
4348. අනුඤ්ඤාතො අහං මත්යා සඤ්චත්තො පිතරා අහං, එකො අරඤ්ඤෙ පබ්බජිතො න කාමෙ අභිපත්ථයෙ.
4349. අපි අතරමානානං ඵලාසාව සමිජ්ඣති, විපක්කබ්රහ්මචරියොස්මි එවං ජානාහි සාරථි.
4350. අපි අතරමානානං සම්මදත්ථා විපච්චති. විපක්කබ්රහ්මචරියොස්මි නික්ඛන්තො අකුතොභයො.
4351. එවං වග්ගුකථො{1} සන්තො විස්සට්ඨච්චනො චසි,{2} කස්මා{3} පිතුච්ච මාතුච්ච සන්තිකෙ න භණී තදා.
4352. නාහං අසත්ථිතා{4} පක්ඛො න බධිරො අසොතතා, නාහං අජිව්හතා{5} මූගො මා මං මූගමධාරයි.
4353. පුරිමං සරාමහං ජාතිං යත්ථ රජ්ජමකාරයිං, කාරයිත්වා තහිං රජ්ජං පාපත්ථං නිරයං භුසං.
4354. වීසතිඤ්චෙව වස්සානි තහිං රජ්ජමකාරයිං, අසීතිවස්සසහස්සානි නිරයම්හි අපච්චිසං.{6}
4355. තස්ස රජ්ජස්සහං භීතො මා මං රජ්ජාභිසෙචයුං, තස්මා පිතුච්ච{7} මාතුච්ච සන්තිකෙ න භණිං තදා.
4356. උච්ඡඞ්ගෙ මං නිසීදෙත්වා පිතා අත්ථානුසාසති, එකං හනථ බන්ධථ එකං ඛාරාපතච්ඡිකං{8} එකං සූලස්මිං අප්පෙථ{9} ඉච්චස්සමනුසාසති.
4357. තස්සාහං{10} ඵරුසං සුත්වා වාචායො සමුදීරිතා, අමූගො මූගවණ්ණෙන අපක්ඛො{11} පක්ඛසම්මතො සකෙ මුත්තකරීසස්මිං අච්ඡාහං සම්පරිපලුතො.
4358. කසිරඤ්ච පරිත්තඤ්ච තඤ්ච දුක්ඛෙන සංයුතං, කො තං ජීවිතමාගම්ම වෙරං කයිරාථ කෙනචි.
4359. පඤ්ඤාය ච අලාභෙන ධම්මස්ස ච අදස්සනා, කො තං ජීවිතමාගම්ම වෙරං කයිරාථ කෙනචි.
4360. අපි අතරමානානං ඵලාසාව සමිජ්ඣති, විපක්කබ්රහ්මචරියොස්මි එවං ජානාහි සාරථි.
4361. අපි අතරමානානං සම්මදත්ථො විපච්චති, විපක්කබ්රහ්මමචරියොස්මි නික්ඛන්තො අකුතොභයො.
4362. අහම්පි පබ්බජිස්සාමි රාජපුත්ත තවන්තිකෙ, අව්හයස්සු මං භද්දනෙත පබ්බජ්ජා මම රුච්චති.
4363. රථං නීය්යාදයිත්වාන අනණො එහි සාරථි, අනණස්ස හි පබ්බජ්ජා එතං ඉසීහි වණ්ණිතං.
4364. යදෙව ත්යාහං වචනං අකරං භද්දමත්ථු තෙ, තදෙව මෙ ත්වං වචනං යාචිතො කත්තුමරහසි.
4365. ඉධෙව තාව අච්ඡස්සු යාව රාජානමානයෙ, අප්පෙව තෙ පිතා දිස්වා පතීතො සුමනො සියා.
4366. කරොමි තෙ තං වචනං යං මං භණසි සාරථි, අහම්පි දට්ඨුකාමොස්මි පිතරං මෙ ඉධාගතං.
4367. එහි සම්ම නිවත්තස්සු කුසලං වජ්ජාසි ඤාතිනං, මාතරං පිතරං මය්හං වුත්තො වජ්ජාසි වන්දනං.
4368. තස්ස පාදෙ ගහෙත්වාන කත්වා ච නං පදක්ඛිණං, සාරථි රථමාරුය්හ රාජද්වාරං උපාගමි.
4369. සුඤ්ඤං මාතා රථං දිස්වා එකං සාරථිමාගතං, අස්සුපුණ්ණෙහි නෙත්තෙහි රොදන්ති නං උදික්ඛති.
4370. අයං සො සාරථී එති නිහන්ත්වාන මමත්රජං, නිහතො නූන මෙ පුත්තො පථව්යා භූමිවද්ධනො.
4371. අමිත්තා නූන නන්දන්ති පතීතා නූන වෙරිනො, ආගතං සාරථිං දිස්වා නිහන්ත්වාන{1} මමත්රජං.
4372. සුඤ්ඤං මාතා රථං දිස්වා එකං සාරථිමාගතං, අස්සුපුණ්ණෙහි නෙත්තෙහි රොදන්ති පරිපුච්ඡති.{2}
4373. කින්නු මූගො කින්නු පක්ඛො කින්නු සො විලපී තදා, නිහඤ්ඤමානො භූමියා තං මෙ අක්ඛාහි සාරථි.
4374. කථං හත්ථෙහි පාදෙහි මූගො පක්ඛො විවජ්ජයි, නිහඤ්ඤමානො භූමියා තං මෙ අක්ඛාහි පුච්ඡිතො.
4375. අක්ඛිස්සං තෙ{1} අහං අය්යෙ දජ්ජාසි අභයං මම, යං මෙ සුතං වා දිට්ඨං වා රාජපුත්තස්ස සන්තිකෙ.
4376. අභයං සම්ම තෙ දම්මි අභීතො භණ සාරථි, යං තෙ සුතං වා දිට්ඨං වා රාජපුත්තස්ස සන්තිකෙ.
4377. න සො මූගො න සො පක්කො විස්සට්ඨ{2}චචනොව සො රජ්ජස්ස කිර සො භීතො අකරී{3} ආලයෙ බහු.
4378. පුරිමං සරති සො ජාතිං යත්ථ රජ්ජමකාරයි, කාරයිත්වා තහිං රජ්ජං පාපත්ථ නිරයං භුසං.
4379. වීසතිඤ්චෙ ච වස්සානි තහිං රජ්ජමකාරයි, අසීති වස්ස සහස්සානි නිරයම්හි අපච්චි සො.{4}
4380. තස්ස රාජස්ස සො භීතො මා මං රජ්ජාභිසෙචයුං,{5} තස්මා පිතුච්ච මාතුච්ච{6} සන්තිකෙ න භණි{7} තදා.
4381. අඞ්ගපච්චඞ්ග සම්පන්නො ආරොහපරිණාහවා, විස්සට්ඨවචනො පඤ්ඤො මග්ගෙ සග්ගස්ස තිට්ඨති.
4382. සචෙ ත්වං දට්ඨුකාමාසි{8} රාජපුත්ති{9} තවත්රජං, එහි තං පාපයිස්සාමි යත්ථ සම්මති තෙමියො
4383. යොජයන්තු රථෙ අස්සෙ කච්ඡං නාගාන{10} බන්ධථ, උදීරයන්තු සඞ්ඛපණවා වදන්තු{11} එකපොක්ඛරා.
4384. නදන්තු භෙරි සන්නද්ධා වග්ගුං වදතු දුන්දුභි, නෙගමා ච මං අන්වෙන්තු ගච්ඡං පුත්තනිවෙදකො.{12}
4385. ඔරොධා ච කුමාරා ච වෙසියානා ච බ්රාහ්මණා, ඛිප්පං යානානි යොජෙන්තු ගච්ඡං පුත්තනිවෙදකො.
4386. හත්ථාරොහා අනීකට්ඨා රථිකා පත්තිකාරාකා, ඛිප්පං යානානි යොජෙන්තු ගච්ඡං පුත්තනිවෙදකො.
4387. සමාගතා ජානපදා නෙගමා ච සමාගතා, ඛිප්පං යානානි යොජෙන්තු ගච්ඡං පුත්තනිවෙදකො.
4388. අස්සෙ ච සාරථි යුත්තෙ සින්ධවෙ සීඝවාහනෙ, රාජද්වාරං උපාගඤ්ඡුං යුත්තා දෙව ඉමෙ භයා.
4389. ථූලා ජවෙන භායන්ති කිසා භායන්ති ථාමුනා,{1} කිසෙ ථූලෙ විවජ්ජෙත්වා සංසට්ඨා යොජිතා භයා.
4390. තතො රාජා තරමානො යුත්තමාරුය්හ සන්දනං, ඉත්ථාගාරං අජ්ඣභාසි{2} සබ්බාව අනුයාථ මං.
4391. වාළවීජනිමුණ්හීසං ඛග්ගං ඡත්තං ච පණ්ඩරං, උපාදිරථමාරුය්හ සුවණ්ණෙන{3} අලඞ්කතො.{4}
4392. තතො ච රාජා පායාසි පුරක්ඛත්වාන{5} සාරථිං, ඛිප්පමෙව උපාගඤඡි යත්ථ සම්මති තෙමියො.
4393. තඤ්ච දිස්වාන ආයන්තං ජලන්තමිව තෙජසා, ඛත්තසඞ්ඝපරිබ්බූළ්හං{6} තෙමියො එතදබ්රවි.
4394. කච්චින්නු{7} තාත කුසලං කච්චි තාත අනාමයං, කච්චින්නු රාජකඤ්ඤායො අරොගා මය්හ මාතරො.
4395. කුසලඤ්චෙව මෙ පුත්ත අථො පුත්ත අනාමයං, සබ්බාව{8} රාජකඤ්ඤායො අරොගා තුය්හ මාතරො.
4396. කච්චිස්ස මජ්ජපො{9} තාත කච්චි තෙ සුරමප්පියං, කච්චි සච්චෙ ච ධම්මෙ ච දානෙ තෙ රමතී මනො.
4397. අමජ්ජපො අහං පුත්තං අථො මෙ සුරමප්පියං, අථො සච්චෙ ච ධම්මෙ ච දානෙ මෙ රමතී මනො.
4398. කච්චි අරොගං යොග්ගං තෙ කච්චි වහති{1} වාහනං, කච්චි තෙ ව්යාධයො නත්ථි සරීරස්සුපතාපනා.
4399. අථො අරොගං යොග්ගං මෙ අතො වහති වාහනං, අථො මෙ ව්යාධයො නත්ථි සරීරස්සුපතාපනා.{2}
4400. කච්චි අන්තා ච තෙ ඵිතා මජ්ඣෙ ච බහලා තව, කොට්ඨාගාරඤ්ච කොසඤ්ච කච්චි තෙ පටිසන්ථතං.{3}
4401. අථො අන්තා ච තෙ ඵිතා මජ්ඣෙ ච බහලා මම, කොට්ඨාගාරඤ්ච කොසඤ්ඤච සබ්බං මෙ පටිසන්ථතං.
4402. ස්වාගතං තෙ මහාරාජ අථො තෙ අදුරාගතං, පතිට්ඨාපෙන්තු පල්ලඞ්කං යත්ථ රාජා නිසක්කති.
4403. ඉධෙව තෙ නිසින්නස්ස නියතෙ පණ්ණසන්ථතෙ,{4} එත්තො උදකමාදාය පාදෙ පක්ඛාලයන්තු තෙ.
4404. ඉදම්පි පණ්ණකං මය්හං රන්ධං රාජ අලොණකං. පරිභුඤ්ජ මහාරාජ පාහුනො මෙසි ආගතො.
4405. න චාහං{5} පණ්ණං භුඤ්ජාමි න හෙතං මය්හ භොජනං, සාලීනං ඔදනං භුඤෙජ සුචිං{6} මංසූපසෙචනං.
4406. අච්ඡෙරකං මං පටිභාති එකකම්පි රහොගතං, එදිසං භුඤ්ජමානානං කෙන වණ්ණො පසීදති.
4407. එකො රාජ නිපජ්ජාමි නීයතෙ පණ්ණසන්ථතෙ, තාය මෙ එකසෙය්යාය රාජ වණ්ණො පසීදති.
4408. න චෙ{7} නෙත්තිංසබද්ධා මෙ රාජරක්ඛා උපට්ඨිතා, තාය මෙ සුඛාසෙය්යාය රාජ වණ්ණො පසීදති.
4409. අතීතං නානුසොචාමි නප්පජප්පමනාගතං, පච්චුප්පන්නෙන යාපෙමි තෙන වණ්ණො පසීදති.
4410. අනාගතප්පජප්පාය අතීතස්සානුසොචනා, එතෙන බාලා සුස්සන්ති නළොව භරිතො ලුතො.
4411. හත්ථාණීකං රථාණීකං අස්සෙ පත්තී ච වම්මිනො, නිවෙසනානි රම්මානි අහං පුත්ත දදාමි තෙ.
4412. ඉත්ථාගාරම්පි තෙ දම්මි සබ්බාලඞ්කරා භූසිතං, තා පුත්ත පටිපජ්ජස්සු ත්වං නො රාජා භවිස්සසි.
4413. කුසලා නච්චගීතස්ස සික්ඛිතා චතුරිත්ථියො, කාමෙ තං රමයිස්සන්ති කිං අරඤ්ඤෙ කරිස්සසි.
4414. පටිරාජූහි තෙ කඤ්ඤා ආනයිස්සං අලඞ්කතා, තාසු පුත්තෙ ජනෙත්වාන අථ පච්ඡා පබ්බජිස්සසි.
4415. යුවා ච දහරො චාසි පඨමුප්පත්තිතො සුසු, රජ්ජං කාරෙහි භද්දන්තෙ කිං අරඤ්ඤෙ කරිස්සසි.
4416. යුවා චරෙ බ්රහ්මචරියං බ්රහ්මචාරී යුවා සියා, දහරස්ස හි පබ්බජ්ජා එතං ඉසීහි වණ්ණිතං.
4417. යුවා චරෙ බ්රහ්මචරියං බ්රහ්මචාරි යුවා සියා, බ්රහ්මචරියං චරිස්සාමි නාහං රජ්ජෙනමත්ථිකො.
4418. පස්සාමි වොහං දහරං අම්ම තාත වදං නරං,{1} කිච්ඡා ලද්ධං පියං පුත්තං අප්පත්වාන ජරං මතං.
4419. පස්සාමි වොහං දහරිං කුමාරිං චාරු දස්සනං, නළවංසකළීරංව පලුග්ගං ජීවිතක්ඛයෙ.
4420. දහරාපි හි මීයන්ති නරා ච අථ නාරියො, තත්ථ කො විස්සසෙ පොසො දහරොම්හීති ජීවිතෙ,
4421. යස්ස රත්යා විවසනෙ ආයුං අප්පතරං සියා, අප්පොදකෙව මච්ඡානං කින්නු කොමාරකං තහිං.
4422. නිච්චමබ්භාහතො ලොකො නිච්චඤ්ච පරිවාරිතො, අමොඝාසු වජන්තීසු කිං මං රජ්ජෙන සිඤ්චසි.
4423. කෙනමබ්භාහතො ලොකො කෙන ච පරිවාරිතො, කායො අමොඝා ගච්ඡන්ති තං මෙ අක්ඛාහි පුච්ඡිතො.
4424. මච්චුනාබ්භාහතො ලොකො ජරාය පරිවාරිතො, රත්යො අමොඝා ගච්ඡන්ති එවං ජානාහි ඛත්තිය.
4425. යථාපි තන්තෙ විතතෙ{1} යං යදෙවූපවීයති, අප්පකං හොති වෙතබ්බං එවං මච්චාන ජීවිතං.
4426. යථා වාරිවහො පූරො ගච්ඡන්නුපනිවත්ති,{2} එවමායු මනුස්සානං ගච්ඡන්නුපනිවත්තති.
4427. යථා වාරිවහො පූරො වහෙ රුක්ඛූපකූලජෙ,{3} එවං ජරාය මරණෙන වුය්හන්තෙ වත පාණිනො.{4}
4428. හත්ථාණීකං රථාණීකං අස්සෙ පත්තී ච වම්මිනො, නිවෙසනානි රම්මානි අහං පුත්ත දදාමි තෙ.
4429. ඉත්ථාගාරම්පි තෙ දම්මි සබ්බාලඞ්කාරභූසිතං, තා පුත්ත පටිපජ්ජස්සු ත්වං නො රාජා භවිස්සසි.
4430. කුසලා නච්චගීතස්ස සික්ඛිතා චතුරිත්ථියො, කාමෙ තං රමයිස්සන්ති කිං අරඤ්ඤෙ කරිස්සසි.
4431. පටිරාජූහි තෙ කඤ්ඤා ආනයිස්සං අලඞ්කතා, තාසු පුත්තෙ ජනෙත්වාන අථ පච්ඡා පබ්බජිස්සසි.
4432. යුවා ච දහරො චාසි පඨමුප්පත්තිතො සුසූ, රජ්ජං කාරෙහි භද්දන්තෙ කිං අරඤ්ඤෙ කරිස්සසි.
4433. කොට්ඨාගාරඤ්ච කොසඤ්ච වාහනානි බලානි ච, නිවෙසනානි රම්මානි අහං පුත්ත දදාමි තෙ.
4434. ගොමණ්ඩලපරිබ්බූළ්හො දාසිසඞ්ඝපුරක්ඛතො, රජ්ජං කාරෙහි භද්දන්තෙ කිං අරඤ්ඤෙ කරිස්සසි.
4435. කිං ධනෙන යං ජීයෙථ කිං භරියායය මරිස්සති, කිං යොබ්බනෙන චිණ්ණෙන යං ජරා අභිහෙස්සති.{1}
4436. තත්ථ කා වන්දි කා ඛිඩ්ඩා කා රතී කා ධනෙසනා,{2} කිං මෙ පුත්තෙහි දාරෙහි රාජ මුත්තොස්මි බන්ධනා.
4437. සොහං එවං පජානාමි මච්චු මෙ නප්පමජ්ජති, අන්තකෙනාධිපන්නස්ස කා රතී කා ධනෙසනා.
4438. ඵලානමිව පක්කානං නිච්චං පතනතො භයං, එවං ජාතානමච්චානං නිච්චං මරණතො භයං.