4250. න හායතෙ ඛාදිතුං{8} මය්හං පච්ඡා චිතකා අයං තාව සධූමිකා ච, නිද්ධූමකො පචිතං සාධු පක්කං සුණාමි ගාථායො සතාරහායො.
4251. අධම්මිකො ත්වං පොරිසාදකාසි{1} රට්ඨා ච භට්ඨො උදරස්ස හෙතු, ධම්මඤ්චිමා අභිවදන්ති ගාථා ධම්මො අධම්මො ච කුහිං සමෙති.
4252. අධම්මිකස්ස ලුද්දස්ස නිච්චං ලොහිතපාණිනො, නත්ථි සච්චං කුතො ධම්මො කිං සුතෙන කරිස්සසි.
4253. යො මංසභෙතු මිගවං චරෙය්ය යො වා හනෙ පුරිසං අත්තහෙතු, උභොපි තෙ පෙච්ච සමා භවන්ති කස්මා නො{2} අධම්මිකං බ්රූහි මං ත්වං{3}.
4254. පඤ්ච පඤ්ච නඛා භක්ඛා ඛත්තියෙන පජානතා, අභක්ඛං{4} රාජ භක්ඛෙසි තස්මා අධම්මිකො තුවං.
4255. පුත්තො තුවං පොරිසාදස්ස හත්ථා ගන්ත්වා සකං මන්දිරං කාමකාමී, අමිත්තහත්ථං පුනරාගතොසි න ඛත්තධම්මෙ{5} කුසලොසි රාජ.
4256. යෙ ඛත්තධම්මෙ කුසලා භවන්ති පායෙන තෙ නෙරයිකා භවන්ති, තස්මා අහං ඛත්තධම්මං{5} පහාය සච්චානුරක්ඛි පුනරාගතොස්මි යජස්සු යඤ්ඤං ඛාද මං පොරිසාද.
4257. පාසාදවාසා පඨවීගවාස්සං කාමිත්ථියො කාසිකචන්දනඤ්ච, සබ්බං තහිං ලභසි සාමිතාය සච්චෙන කිං පස්සසි ආනිසංසං.
4258. යෙ කෙචි මෙ අත්ථි රසා පථව්යා{6} සච්චං තෙසං සාදුතරං රසානං, සච්චෙ ඨිතා සමණබ්රාහ්මණා ච තරන්ති ජාති{7}මරණස්ස පාරං.
4259. මුත්තො තුවං පොරිසාදස්ස හත්ථා ගන්ත්වා සකං මන්දිරං කාමකාමී, අමිත්තහත්ථං පුනරාගතොසි නහා නූන තෙ මරණභයං ජනින්ද අලීනචිත්තො චසි{1} සච්චවාදී.
4260. කතා මෙ කල්යාණා අනෙකරූපා යඤ්ඤා යිට්ඨා යෙ විපුලා පසත්ථා, විසොධිතො පරලොකස්ස මග්ගො ධම්මෙ ඨිතො කො මරණස්ස භායෙ.
4261. කතා මෙ කල්යාණා අනෙකරූපා යඤ්ඤා යිට්ඨා සෙ විපුලා පසත්ථා, අනානුතප්පං පරලොකං ගමිස්සං යජස්සු යඤ්ඤං ඛාද{2} මං පොරිසාද.
4262. පිතා ච මාතා ච උපට්ඨිතා මෙ ධම්මෙන මෙ ඉස්සරියං පසත්ථං, විසොධිතො පරලොකස්ස මග්ගො ධම්මෙ ඨිතො කො මරණස්ස භායෙ.
4263. පිතා ච මාතා ච උපට්ඨිතා මෙ ධම්මෙන මෙ ඉස්සරියං පසත්ථං, අනානුතප්පං පරලොකං ගමිස්සං යජස්සු යඤ්ඤං ඛාද මං පොරිසාද.
4264. ඤාතීසු මිත්තෙසු කතා මෙ කාරා ධම්මෙන මෙ ඉස්සරිං පසත්ථං, විසොධිතො පරලොකස්ස මග්ගො ධම්මෙ ඨිතො කො මරණස්ස භායෙ.
4265. ඤාතීසු මිත්තෙසු කතා{3} මෙ කාරා ධම්මෙන මෙ ඉස්සරිං පසත්ථං, අනානුතප්පං පරලොකං ගමිස්සං යජස්සු යඤ්ඤං ඛාද මං පොරිසාද.
4266. දින්නං මෙ දානං බහුධා බහුන්නං{4} සන්තප්පිතා සමණබ්රාහ්මණා ච, විසාධිතො පරලොකස්ස මග්ගො ධම්මෙ ඨිතො කො මරණස්ස භායෙ.
4267. දින්නං මෙ දානං බහුධා බහුන්නං සන්තප්පිතා සමණබ්රාහ්මණා ච, අනානුතප්පං පරලොකං ගමිස්සං යජස්සු යඤ්ඤං ඛාද මං පොරිසාද.
4268. විසං පජානං පුරිසො අදෙය්ය ආසීවිසං ජලිතං උග්ගතෙජං, මුද්ධාපි තස්ස විපතෙය්ය{1} සත්තධා යො තාදිසං සච්චාදිං අදෙය්ය.
4269. සුත්වා ධම්මං විජානන්ති නරා කල්යාණපාපකං, අපි ගාථා සුණිත්වාන ධමෙම මෙ රමතී{2} මනො.
4270. සකිදෙව සුතසොම{3} සබ්භි හොති සමාගමො, සා නං සඞ්ගති පාලෙති නාසබ්භි බහු සඞ්ගමො.
4271. සබ්භිරෙව සමාසෙථ සබ්භි කුබ්බෙථ සන්ථවං{4}, සතං සද්ධම්මමඤ්ඤාය සෙය්යො හොති න පාපියො.
4272. ජීරන්ති වෙ රාජරථා සුචිත්තා අථො සරීරම්පි ජරං උපෙති, සතඤ්ච ධම්මො න ජරං උපෙති සන්තො භවෙ සබ්භි පවෙදයන්ති.
4273. නභඤ්ච දූරෙ පඨවී{5} ච දූරෙ පාරං සමුද්දස්ස තදාහු දූරෙ, තතො හවෙ දූරතරං වදන්ති සතඤ්ච ධම්මං අසතඤ්ච රාජ.
4274. ගාථා ඉමා අත්ථවතී සුව්යඤ්ජනා{6} සුභාසිතා තුය්හං ජනින්ද සුත්වා, ආනන්දි චිත්තො සුමනො පතීතො චත්තාරි තෙ සම්ම වරෙ දදාමි.
4275. යො නත්තනො මරණං බුජ්ඣසි ත්වං හිතාහිතං විනිපාතඤ්ච සග්ගං, ගිද්ධො රසෙ දුච්චරිතෙ නිවිට්ඨො කිං ත්වං වරං දස්සසි පාපධම්ම{7}.
4276. අහඤ්ච තං දෙහි වරන්ති වජ්ජං ත්වඤ්චාපි දත්වාන අවාකරෙය්ය, සන්දිට්ඨිකං කලහමිමං විවාදං කො පණ්ඩිතො ජානමුපබ්බජෙය්ය.
4277. න තං වරං අරහති ජන්තු දාතුං යං වාපි දත්වාන අවාකරෙය්ය, වරස්සු සම්ම අවිකම්පමානො පාණං චජිත්වානපි දස්සමෙව.
4278. අරියස්ස අරියෙ සමෙති සක්ඛි{1} පඤ්ඤස්ස පඤ්ඤාණවතා සමෙති, පස්සෙය්ය තං වස්සසතං අරොගං{2} එතං වරානං පඨමං වරාමි.
4279. අරියස්ස අරියෙ සමෙති සක්ඛි{3} පඤ්ඤස්ස පඤ්ඤාණවතා සමෙති, පස්සපි{4} මං වස්සසතං අරොගං එතං වරානං පඨමං දදාමි.
4280. යෙ ඛත්තියාසෙ ඉධ භූමිපාලා මුද්ධාභිසිත්තා කතනාමධෙය්යා, න තාදිසෙ භූමිපතී අදෙසි එතං වරානං දුතියං වරාමි.
4281. යෙ ඛත්තියාසෙ ඉධ භූමිපාලා මුද්ධාභිසිත්තා කතනාමධෙය්යා, න තාදිසෙ භූමිපතී අදෙමි එතං වරානං දුතියං දදාමි.
4282. පරොසතං ඛත්තියා තෙ ගහීතා තලාවුතා අස්සුමුඛා රුදන්තා, සකෙ තෙ රට්ඨෙ පටිපාදයාහි එතං වරානං තතියං වරාමි.
4283. පරොසතං ඛත්තියා තෙ ගහීතා තලාවුතා අස්සුමුඛා රුදන්තා, සකෙන{5} රට්ඨෙන පටිපාදයාමි තෙ එතං වරානං තතියං දදාමි.
4284. ඡිද්දන්තෙ රට්ඨං බ්යාධිතං භයාහි පුථූ නරා ලෙණමනුප්පවිට්ඨා, මනුස්සමංසං විරමෙහි රාජ. එතං වරානං චතුත්ථං වරාමි.
4285. අද්ධා හි සො භක්ඛො මමං මනාපො එතස්ස හෙතුම්හි වනං පවිට්ඨො, සොහං කථං එත්තො උපාරමෙය්යං අඤ්ඤං වරානං චතුත්ථං වරස්සු.
4286. න චෙ පියං මෙති ජනින්ද තාදිසො අත්තං නිරංකත්වා පියානි සෙවති, අත්තාව සෙය්යො පරමාව සෙය්යො ලබ්භා පියා ඔචිතත්ථෙන පච්ඡා.
4287. පියං මෙ මානුසං මංසං සුතසොම විජානහි, නම්හි{1} සක්කො නිවාරෙතුං අඤ්ඤං තුවං සම්ම වරං වරස්සු.
4288. යො වෙ පියං මෙති පියානුකඞ්ඛි{2} අත්තං නිරං කත්වා පියානි සෙවති සොණ්ඩාව පීත්වාන විසස්ස{3} ථාලං තෙනෙව සො හොති දුඛී{4} පරත්ථ.
4289. යො චීධ සඞ්ඛාය පියානි හිත්වා කිච්ඡෙනපි සෙවති අරියධම්මං{5}, දුක්ඛිතොව පීත්වාන යථොසධානි තෙනෙව සො හොති සුඛී පරත්ථ.
4290. ඔහායහං පිතරං මාතරඤ්ච මනාපිකෙ{6} කාමගුණෙ ච පඤ්ච, එතස්ස හෙතුම්භි වනං පවිට්ඨො තන්තෙ වරං කින්ති මහං දදාමි.
4291. න පණ්ඩිතා ද්විගුණං අහු වාක්යං සච්චප්පටිඤ්ඤාව භවන්ති සන්තො, වරස්සු සම්ම ඉති මං අවොච ඉච්චබ්රවී ත්වං න හි තෙ සමෙති.
4292. අපුඤ්ඤලාභං අයසං අකිත්තිං පාපං බහුං දුච්චරිතං කිලෙසං, මනුස්සමංසස්ස කතෙ{7} උපාගා තන්තෙ වරං කින්තිමහං දදෙය්යං.
4293. න තං වරං අරහති ජන්තු දාතුං යං වාපි දත්වාන අවාකරෙය්ය, වරස්සු සම්ම අවිකම්පමානො පාණං චජිත්වානපි දස්සමෙව.
4294. පාණං චජන්ති සන්තො නාපි ධම්මං. සච්චප්පටිඤ්ඤා ච භවන්ති සන්තො, දත්වා වරං ඛිප්පමවාකරොහි එතෙන සම්පජ්ජ සුරාජසෙට්ඨ.
4295. ධනං චජෙ{1} යො පන අඞ්ගහෙතු අඞ්ගං චජෙ ජීවිතං රක්ඛමානො, අඞ්ගං ධනං ජීවිතං චාපි සබ්බං චජෙ නරො ධම්මමනුස්සරන්තො.
4296. යස්සා හි ධම්මං පුරිසො විජඤ්ඤා යෙ චස්ස කඞ්ඛං විනයන්ති සන්තො, තං හිස්ස දීපඤ්ච පරායණඤ්ච න තෙන මිත්තිං ජරයෙථ{2} පඤ්ඤො.
4297. අද්ධා හි සො භක්ඛො මමං{3} මනාපො එතස්ස හෙතුම්භි වනං පවිට්ඨො, සචෙව මං යාචසි එතමත්ථං එතම්පි තෙ සම්ම වරං දදාමි.
4298. සත්ථා ච මෙ හොසි සඛා ච මෙසි වචනම්පි තෙ සම්ම අහං අකාසිං, තුවම්පි මෙ සම්ම කරොහි වාක්යං උභොපි ගන්ත්වාන පමොචයාම.
4299. සත්ථා ච තෙ හොමි සඛා ච ත්යම්හි වචනම්පි මෙ සම්ම අහං අකාසි, අහම්පි තෙ සම්ම කරොමි වාක්යං උභොපි ගන්ත්වාන පමොචයාම.
4300. කම්මාසපාදෙන විහෙඨිතත්ථ{4} තලාවුතා අස්සුමුඛා රුදන්තා, න ජාතු දුබ්භෙථ ඉමස්ස රඤ්ඤො සච්චප්පටිඤ්ඤං මෙ පටිස්සුණාථ.
4301. කම්මාසපාදෙන විහෙඨිතම්භා තලාවුතා අස්සුමුඛා රුදන්තා, න ජාතු දුබ්භෙම ඉමස්ස රඤ්ඤො සච්චප්පටිඤ්ඤන්තෙ පටිස්සුණාම.
4302. යථා පිතා වා අථවාපි මාතා අනුකම්පකා අත්ථකාමා පජානං, එවමෙව වො හොතු අයඤ්ච රාජා තුම්හෙ ච වො හොථ යථෙව පුත්තා.
4303. යථා පිතා වා අථවාපි මාතා අනුකම්පකා අත්ථකාමා පජානං, එවමෙව නො හොතු අයඤ්ච රාජා මයම්පි හෙස්සාම යථෙව පුත්තා.
4304. චතුප්පදං සකුණඤ්චාපි මංසං සූදෙහි රන්ධං සුකතං සුනිට්ඨිතං, සුධංව ඉන්දො පරිභුඤ්ජියාන හිත්වා කථෙකො රමසී අරඤ්ඤෙ.
4305. තා ඛත්තියා චෙලලි{1}විලාකමජ්ඣා අලඞ්කතා සම්පරිවාරයිත්වා, ඉන්දංව දෙවෙසු පමොදයිංසු හිත්වා කථෙකො රමසී අරඤ්ඤෙ
4306. තම්බූපධානෙ බහුගොණකම්භි සුචිම්භි සබ්බස්සයනම්භි සඤ්ඤතෙ,{2} සයනස්ස{3} මජ්ඣම්භී සුඛං සයිත්වා හිත්වා කථෙකො රමසී අරඤ්ඤෙ.
4307. පාණිස්සරං කුම්භථූනං නිසීථෙ{4} අථොපි වෙ නිප්පුරිසම්පි තුරියං, බහුං සුගීතඤ්ච සුවාදිතඤ්ච හිත්වා කථෙකො රමසී අරඤ්ඤෙ.
4308. උය්යානසම්පන්නං පහූතමාල්යං{5} මිගාවිරූපෙන{6} පුරං සුරම්මං, හයෙහි නාගෙහි රථෙහුපෙතං හිත්වා කථෙකො රමසී අරඤ්ඤෙ.
4309. කාළපක්ඛෙ යථා චන්දො හායතෙව සුවෙ සුවෙ, කාළපක්ඛූපමො රාජ අසතං හොති සමාගමො.
4310. යථා රසකමාගම්ම සූදකං පුරිසාධමං, අකාසිං පාපකං කම්මං යෙන ගච්ඡාමි දුග්ගතිං.
4311. සුක්කපක්ඛෙ යථා චන්දො වඩ්ඪතෙව සුවෙ සුවෙ, සුක්කපක්ඛූපමො රාජ සතං හොති සමාගමො.
4312. යථාහං තව මාගම්ම සුතසොම විජානහි, කාහාමි කුසලං කම්මං යෙන ගච්ඡාමි සුග්ගතිං.
4313. ථලෙ යථා වාරි ජනින්ද වට්ටං{1} අනද්ධ{2}නෙය්යං අචිරට්ඨිතිකං, එවම්පි චෙ හොති අසතං සමාගමො අනද්ධනෙය්යො උදකං ථලෙව.
4314. සරෙ යථා වාරි ජිනින්ද වට්ටං චිරට්ඨිතිකං නරවිරිය{3}සෙට්ඨ, එවම්පි වෙ හොති සතං සමාගමො චිරට්ඨිතීකො{4} උදකං සරෙව.
4315. අව්යායිකො හොති සතං සමාගමො යාවම්පි තිට්ඨෙය්ය තථෙව හොති, ඛිප්පං හි වෙති අසතං සමාගමො තස්මා සතං ධම්මො අසබ්භි ආරකා.
4316. න සො රාජා යො{5} අජෙය්යං ජිනාති න සො සඛා යො සඛාරං ජිනාති, න සා භරියා යා පතිතො විභෙති න තෙ පුත්තා යෙ{6} න භරන්ති ජිණ්ණං.
4317. න සා සභා යත්ථ න සන්ති සන්තො සන්තො න තෙ යෙ න භනන්ති ධම්මං, රාගඤ්ච දොසඤ්ච පහාය මොහං ධම්මං භණන්තොව භනන්ති සන්තො.
4318. න භාසමානං{1} ජානන්ති මිස්සං බාලෙහි පණ්ඩිතං, භාසමානඤ්ච ජානන්ති දෙසෙන්තං අමතං පදං,
4319. භාසයෙ ජොතයෙ ධම්මං පග්ගණ්හෙ ඉසිනං ධජං, සුභාසිතද්ධජා{2} ඉසයො ධම්මො හි ඉසිනං ධජොති.
මහාසුතසොමජාතකං.
අසීතිනිපාතො නිට්ඨිතො.
තස්සුද්දානං:
සුමුඛො පන හංසවරො ච මහා සුධාභොජනිකො ච පරො පවරො, සකුණාලදිජාධිපතිව්හයනො සුතසොම වරුත්තම සව්හයනො’ති.
සුත්තන්තපිටකෙ
ඛුද්දකනිකායෙ
ජාතකපාළි
(තතියො භාගො)
නමො තස්ස භගවතො අරහතො සම්මා සම්බුද්ධස්ස.
මහානිපාතො
1. මූගපක්ඛජාතකං
4320. මා පණ්ඩිතියං{1} විභාවය බාලමතො භව සබ්බපාණිනං, සබ්බො ජනො{2} තං ඔචිනායතු එවං තව අත්ථො භවිස්සති.
4321. කරොමි තෙ තං වචනං යං මං භණසි දෙවතෙ, අත්ථකාමාසි මෙ අම්ම හිතකාමාසි දෙවතෙ.
4322. කින්නුසන්තරමානොව කාසුං ඛණසි සාරථි, පුට්ඨො මෙ සම්ම අක්ඛාහි කිං කාසුයා කරිස්සසි.
4323. රඤ්ඤො මූගො ච පක්ඛො ච පුත්තො ජාතො අචෙතසො, සොම්හි රඤ්ඤා සමජ්ඣිට්ඨො{3} පුත්තං මෙ නිඛණං{4} වනෙ.
4324. න බධිරො න මූගොස්මි න පක්ඛො නපි පඞ්ගුලො,{5} අධම්මං සාරථි කයිරා මඤ්චෙ ත්වං නිඛණං වනෙ.
4325. ඌරූ බාහූ ච මෙ පස්ස භාසිතඤ්ච සුණොහි මෙ, අධම්මං සාරථි කයිරා මඤ්චෙ ත්වං නිඛණං වනෙ.
4326. දෙවතානුසි ගන්ධබ්බො ආදු{6} සක්කො පුරින්දදො, කො වා ත්වං කස්ස වා පුත්තො කථං ජානෙමු තං මයං.
4327. නම්හි දෙවො න ගන්ධබ්බො නපි{7} සක්කො පුරින්දදො, කාසිරඤ්ඤො අහං පුත්තො යං කාසුයා නිඝඤ්ඤසි.
4328. තස්ස රඤ්ඤො අහං පුත්තො යං ත්වං සමුපජීවසි,{1} අධම්මං සාරථි කයිරා මං වෙ ත්වං නිඛණං වනෙ.
4329. යස්ස රුක්ඛස්ස ඡායාය නිසීදෙය්ය සයෙය්ය වා, න තස්ස සාඛං භඤ්ජෙය්ය මිත්තදූභො{2} හි පාපකො.
4330. යථා රුක්ඛො තථා රාජා යථා සාඛා තථා අහං. යථා ඡායූපගො පොසො එවං ත්වමසි සාරථි; අධම්මං සාරථි කයිරා මඤ්චෙ ත්වං නිඛණං{3} වනෙ.
4331. පහුතභක්ඛො{4} භවති විප්පවුත්ථො{5} සකාඝරා,{6} බහූ නං උපජීවන්ති යො මිත්තානං න දූභති{7}
4332. යං යං ජනපදං යාති නිගමෙ රාජධානියො,{8} සබ්බත්ථ පූජිතො හොති යො මිත්තානං න දූභති.
4333. නාස්ස චොරා පසහන්ති නාතිමඤ්ඤෙති{9} ඛත්තියො, සබ්බෙ අමිත්තෙ තරති යො මිත්තානං න දූභති.
4334. අක්කුද්ධො{10} සඝරං එති සභාය{11} පටිනන්දිතො, ඤාතීනං උත්තමො හොති යො මිත්තානං න දූභති.
4335. සක්කත්වා සක්කතො හොති ගරු හොති සගාරවො,{12} වණ්ණකිත්තිභතො හොති යො මිත්තානං න දූභති.
4336. පූජකො ලභතෙ පූජං වන්දකො පටිවන්දනං, යසො කිත්තිඤ්ච පප්පොති යො මිත්තානං න දූභති.
4337. අග්ගි යථා පජ්ජලති දෙවතාව විරොචති, සිරියා අජහිතො හොති යො මිත්තානං න දූභති.
4338. ගාවො තස්ස පජායන්ති ඛෙත්තෙ වුත්තං විරූහති, වුත්තානං ඵලමස්නාති{1} යො මිත්තානං න දූභති.