4154. න විස්සසෙ සාඛපුරාණසන්ථතං න විස්සසෙ මිත්තපුරාණචොරං, න විස්සසෙ රාජා{1} සඛා මමන්ති න විස්සසෙ ඉත්ථි දසන්නමාතරං.
4155. න විස්සසෙ රාමකරාසු නාරිසු අච්චන්තසීලාසු අසඤ්ඤතාසු, අච්චන්තපෙමානුගතස්ස භරියා න විස්සසෙ තිත්ථසමා හි නාරියො.
4156. හනෙය්යු{2} ඡින්දෙය්යුම්පි ඡෙදයෙය්යුං කණ්ඨම්පි ඡෙත්වා රුධිරං පිබෙය්යුං, මා දීනකාමාසු අසඤ්ඤතාසු භාවං කරෙ ගඞ්ගතිත්ථුපමාසු.
4157. මුසා තාසං යථා සච්චං සච්චං තාසං{3} යථා මුසා, ගාවො බහි තිණස්සෙව ඔමසන්ති වරං වරං.
4158. ගතෙනෙතා පලොභෙන්ති පෙක්ඛිතෙන{4} මිහිතෙන ච, අථොපි දුන්නිවත්ථෙන මඤ්ජුනා භණිතෙන ච.
4159. චොරියො කඨිනා{5}භෙතා වාළා ච ලපසක්ඛරා, න තා කිඤ්චි න ජානන්ති යං මනුස්සෙසු වඤ්චනං.
4160. අසා ලොකිත්ථියො නාම වෙලා තාසං න විජ්ජති, සාරත්තා ච පගබ්භා ච{6} සිඛී සබ්බඝසො යථා
4161. නත්ථිත්ථිනං පියො නාම අප්පියොපි{7} න විජ්ජති, සෙවන්ති හෙතා පියමප්පියඤ්ච නාවා යථා ඔරකූලංපරඤ්ච.
4162. නත්ථිත්ථිනං පියො නාම අප්පියොපි න විජ්ජති, ධනත්තා පතිවෙල්ලන්ති{8} ලතාව දුමනිස්සිතා
4163. හත්ථිබන්ධං අස්සබන්ධං ගොපුරිසඤ්ච චණ්ඩාලං,{9} ඡවඩාහකං පුප්ඵඡඩ්ඩකං සධනමනුපතන්ති නාරියො.
4164. කුලපුත්තම්පි ජහන්ති අකිඤ්චනං ඡවකසමසදිසම්පි, අනුගච්ඡන්ති අනුපතන්ති ධනහෙතු හි නාරියොති.
අථ ඛලු භො නාරදො දෙවබ්රාහ්මණො ආනන්දස්ස ගිජ්ඣරාජස්ස ආදිමජ්ඣකථා{1}පරියොසානං විදිත්වා තායං වෙලායං ඉමා ගාථායො අභාසි.
4165. චත්තාරො මෙ න පූරෙන්ති තෙ මෙ සුණාථ භාසතො{2}, සමුද්දො බ්රාහ්මණො රාජා ඉත්ථි චාපි දිජම්පති.
4166. සරිතා සාගරං යන්ති යා කාචි පඨවිංසිතා{3}, තා සමුද්දං න පූරෙන්ති ඌනත්තා{4} හි න පූරති.
4167. බ්රාහ්මණො ච අධීයාන වෙදමක්ඛානපඤ්චමං, භිය්යොපි සුතමිච්ඡෙය්ය ඌනත්තා හි න පූරති.
4168. රාජා ච පඨවිං{5} සබ්බං සසමුද්දං සපබ්බතං, අජ්ඣාවසං{6} විජිනිත්වා අනන්තරතනොචිතං පාරං සමුද්දං පත්ථෙති ඌනත්තා හි න පූරති.
4169. එවමෙකාය ඉත්ථියා අට්ඨට්ඨ පතිනො සියා, සුරා ච බලවන්තා ච සබ්බකාමරසාහරා කාරෙය්ය නවමෙ ඡන්දං ඌනත්තා හි න පූරති.
4170. සබ්බිත්ථියො සිඛිරිව සබ්බභක්ඛා සබ්බිත්ථියො නදීරිව සබ්බවාහිනී{7}, සබ්බිත්ථියො කණ්ටකානං ව සාඛා සබ්බිත්ථියො ධනහෙතු වජන්ති.
4171. වාතඤ්ච ජාලෙන නරො පරාමසෙ ඔසිඤ්චියා සාගරමෙකපාණිනා, සකෙන හත්ථෙන හනෙය්ය ඝොසං යො සබ්බභාවං පමදාසු ඔස්සජෙ.
4172. චොරීනං බහුබුද්ධිනං යාසු සච්චං සුදුල්ලභං, ථිනං භාවෙ දුරාජානො මච්ඡස්සෙවොදකෙ ගතං.
4173. අනලා මුදුසම්භාසා දුප්පූරා තා නදීසමා, සීදන්ති නං විදිත්වාන ආරකා පරිවජ්ජයෙ.
4174. ආවට්ටනී මහාමායා බ්රහ්මචරියවිකොපනා, සීදන්ති නං විදිත්වාන ආරකා පරිවජ්ජයෙ.
4175. යඤ්චෙතා{1} උපසෙවන්ති ඡන්දසා වා ධනෙන වා, ජාතවෙදොව සණඨානං ඛිප්පං අනුදහන්ති නන්ති.
අථ ඛලු භො කුණාලො සකුණො නාරදස්ස දෙවබ්රාහ්මණස්ස ආදිමජ්ඣ{2}කථාපරියොසානං විදිත්වා තායං වෙලායං ඉමා ගාථායො අභාසි.
4176. සල්ලපෙ නිසිත{3}බග්ගපාණිනා පණ්ඩිතො අපි පිසාචදොසිනා, උග්ගතෙජඋරගම්පි ආසිදෙ එකො එකාය පමදාය නාලපෙ.
4177. ලොකචිත්තමථනා හි නාරියො නච්චගීතභණිතම්භිතාවුධා, බාධයන්ති අනුපට්ඨිතස්සතිං දීප{4}රක්ඛසිගණාව වාණිජෙ.
4178. නත්ථි තාසං විනයො න සංවරො මජ්ජමංසනිරතා අසඤ්ඤතා, තා ගිලන්ති පුරිසස්ස පාභතං සාගරෙව මකරං තිමිඞ්ගලො{5}
4179. පඤ්චකාම ගුණසාතගොචරා උද්ධතා අනියතා අසඤ්ඤතා, ඔසරන්ති පමදා පමාදිනං ලොණතොයවතියංව ආපගා{6}.
4180. යං නරං උපරමන්ති{7} නාරියො චන්දසාව රතියා ධනෙනවා, ජාතවෙදසදිසම්පි තාදිසං රාගදොසවතියො{8} ඩහන්ති{9} නං.
4181. අඩ්ඪං ඤත්වා පුරිසං මහද්ධනං ඔසරන්ති සධනා සහන්තනා, රත්තචිත්තං අතිවෙඨයන්ති නං සාලං මාලුවලතාව කානනෙ.
4182. තා උපෙන්ති විවිධෙන ඡන්දසා චිත්රබිම්බමුඛියො අලඞ්කතා, ඌහසන්ති පහසන්ති නාරියො, සම්බරොව සතමායකොවිදා.
4183. ජාතරූපමණිමුත්තභුසිතා සක්කතා පතිකුලෙසු නාරියො, රක්ඛිතා අතිවරන්ති සාමිකං දානවංව හදයන්තරස්සිතා{1}.
4184. තෙජවාපි හි නරො විචක්ඛණො සක්කතො බහුජනස්ස පූජිතො, නාරීනං වසගතො න භාසති රාහුනා උපගතොව{2} චන්දිමා.
4185. යං කරෙය්ය කුපිතො දිසො දිසං දුට්ඨචිත්තො වසමාගතං අරි තෙන භිය්යො ව්යසනං නිගච්ඡති නාරීනං වසගතො අපෙක්ඛවා.
4186. කෙසලූනනඛඡින්නතජ්ජිතා පාදපාණිකසදණ්ඩතාළිතා, හිතමෙව උපගතා හි නාරියො තා රමන්ති කුණපෙව මක්ඛිකා.
4187. තා කුලෙසු විසිඛන්තරෙසු වා රාජධානිනිගමෙසු{3} වා පුන, ඔඩ්ඩිතං නමුචිපාසවාකරං{4} චක්ඛුමා පරිවජ්ජයෙ{5} සුඛත්ථිකො.
4188. ඔස්සජිත්ව{1} කුසලං තපොගුණං යො අනරියචරිතානිමාචරි, දෙවතාහි නිරයං නිමිස්සති{2} ඡෙදගාමි මණියං ව වාණිජො.
4189. සො ඉධ ගරහිතො පරත්ථ ච දුම්මතී උපගතො{3} සකම්මුනා, ගච්ඡති අනියතො ගලාගලං දුට්ඨගද්රභරතොව උප්පථෙ.
4190. සො උපෙති නිරයං පතාපනං සත්තිසිම්බලිවනඤ්ච ආයසං{4} ආවසිත්වා තිරච්ඡානයොනියං{5} පෙතරාජවිසයං න මුඤ්චති.
4191. දිබ්බඛිඩ්ඩරතියො න නන්දනෙ චක්කවත්තිචරිතඤ්ච මානුසෙ, නාසයන්ති පමදා පමාදිනං දුග්ගතිඤ්ච පටිපාදයන්ති නං.
4192. දිබ්බඛිඩ්ඩරතියො න දුල්ලභා චක්කවත්තිචරිතඤ්ච මානුසෙ, සොණ්ණ{6}ව්යම්භනිලයා ච අච්ඡරා යෙ චරන්ති පමදාහනත්ථිකා.
4193. කාමධාතුසමතික්කමා ගති රූපධාතුයා{7} භවො න දුල්ලභො, වීතරාගවිසයූපපත්තියා යෙ චරන්ති පමදාහනත්ථිකා.
4194. සබ්බදුක්ඛසමතික්කමං සිවං අච්චන්තං අචලිතං අසඞ්ඛතං, නිබ්බුතෙහි සුචිහී න දුල්ලභං යෙ චරන්ති පමදාහනත්ථිකා.
4195. කුණාලො හං තදා ආසිං උදායී ඵුස්සකොකිලො, ආනන්දො ගිජ්ඣරාජාසි සාරිපුත්තො ච නාරදො පරිසා බුද්ධපරිසා එවං ධාරෙථ ජාතකන්ති.
කුණාලජාතකං.
5. මහාසුතසොමජාතකං
4196. කස්මා තුවං රසක එදිසානි කරොසි කම්මානි සුදාරුණානි, හනාසි ඉත්ථි පුරිසෙ ච මූළ්හො මංසස්ස හෙතු ආදු{1} ධනස්ස කාරණා
4197. න අත්තහෙතු න ධනස්ස කාරණා න පුත්තදාරස්ස සහායඤාතිනං, භත්තා ච මෙ භගවා භූමිපාලො සො ඛාදතී මංසං භදන්තෙ එදිසං.
4198. සචෙ තුවං භත්තුරත්ථෙ පයුත්තො කරොසි කම්මානි සුදාරුණානි, පාතො ච අන්තෙපුරං පාපුණිත්වා ලපෙය්යාසි මෙ රාජිනො සම්මුඛෙ තං.
4199. තථා කරිස්සාමි අහං භදන්තෙ යමෙව ත්වං භාසසි කාළහත්ථි, පාතො ව අන්තෙපුරං පාපුණිත්වා වක්ඛාමි තෙ රාජිනො සම්මුඛෙ තං.
4200. තතො රත්යා විවසනෙ සුරියස්සුග්ගමනං පති, කාළො රසකමාදාය රාජානං උපසඞ්කමි උපසඞ්කමිත්වා රාජානං ඉදං වචනමබ්රුවී.
4201. සච්චං කිර මහාරාජ රසකො පෙසිතො තයා, හනාති{2} ඉත්ථි පුරිසෙ තුවං මංසානි ඛාදසි.
4202. එවමෙවං තථා කාළ රසකො පෙසිතො මයා, මම අත්ථං කරොන්තස්ස කිමෙතං පරිභාසසි.
4203. ආනන්දො සබ්බමච්ඡානං ඛාදිත්වා රසගිද්ධිමා, පරික්ඛීණාය පරිසාය අත්තානං ඛාදියා මතො.
4204. එවං පමත්තො රසගාරවෙ රතො බලො යදි ආයතිං නාවබුජ්ඣති, විධම්ම පුත්තො චජි{3} ඤාතකෙ ච පරිවත්තිය අත්තානමෙව ඛාදති.
4205. ඉදං තෙ සුත්වාන විහෙතු ඡන්දො මා භක්ඛසි රාජ මනුස්සමංසං, මා ත්වං ඉමං කෙවලං වාරිජොව දිපදාධිප සුඤ්ඤමකාසි රට්ඨං.
4206. සුජාතො නාම නාමෙන ඔරසො තස්ස අත්රජො, ජම්බුපෙසිං අලද්ධාන මතො සො තස්ස සඞ්ඛයෙ.
4207. එවමෙව අහං කාළ භුත්වා භක්ඛං රසුත්තතමං, අලද්ධා මානුසං මංසං මඤ්ඤෙ හෙස්සාමි ජීවිතං.
4208. මාණව අභිරූපොසි කුලෙ ජාතොසි සොත්ථියෙ, න ත්වං අරහසි තාත අභක්ඛං භක්ඛයෙතවෙ.
4209. රසානමඤ්ඤතරං එතං යස්මා{1} මං ත්වං නිවාරයෙ, සොහං තත්ථ ගමිස්සාමි යත්ථ ලච්ඡාමි එදිසං.
4210. සො වාහං නිප්පතිස්සාමි න තෙ වච්ඡාමි සන්තිකෙ, යස්ස මෙ දස්සනෙන ත්වං නාභිනන්දසි බ්රාහ්මණ.
4211. අද්ධා අඤ්ඤෙපි දායාදෙ පුත්තෙ ලච්ඡාම මාණව, ත්වඤ්ච ජම්ම විනස්සස්සු යත්ථ පත්තං න තං සුණෙ.
4212. එවමෙව තුවං රාජ දිපදින්ද සුණොහි මෙ, පබ්බාජෙස්සන්ති තං රට්ඨා සොණ්ඩං මාණවකං යථා.
4213. සුජාතො නාම නාමෙන භාවීතත්තාන සාවකො, අච්ඡරං කාමයන්තොව න සො භුඤ්ජි න සො පිවි.
4214. කුසග්ගෙ උදකමාදාය සමුද්දෙ උදකං මිනෙ, එවං මානුසකා කාමා දිබ්බකාමාන සන්තිකෙ.
4215. එවමෙව අහං කාළ භුත්වා භක්ඛං රසුත්තතමං, අලද්ධා මානුසං මංසං මඤ්ඤෙ හෙස්සාමි ජීවිතං.
4216. යථාපි තෙ ධතරට්ඨා හංසා වෙහාසයං ගමා, අවුත්ති{2}පරිභොගෙන සබ්බෙ අබ්භත්ථතං ගතා.
4217. එවමෙව තුවං රාජ දිපදින්ද සුණොහි මෙ, අභක්ඛං රාජ භක්ඛෙසි තස්මා පබ්බාජයන්ති තං.
4218. තිට්ඨාහීති මයා වුතෙතා සො ත්වං ගච්ඡසි පම්මුඛො{1}, අට්ඨිතො ත්වං ඨිතොම්හීති ලපසි බ්රහ්මචාරිනී ඉදං තෙ සමණ අයුත්තං අසිඤ්ච මෙ මඤ්ඤසි කඞ්කපත්තං.
4219. ඨිතොහමස්මි සධම්මෙසු{2} රාජ න නාමගොත්තං පරිවත්තයාමි, චොරඤ්ච ලොකෙ අට්ඨිතං වදන්ති ආපායිකං නෙරයිකං ඉතො චුතං.
4220. සචෙ තුවං සද්දහසි රාජ සුතං ගණ්හාහි ඛත්තිය, තෙන යඤ්ඤං යජිත්වාන එවං සග්ගං ගමිස්සසි.
4221. කස්මිං නු රට්ඨෙ තව ජාතභූමි අථ කෙන අත්ථෙන ඉධානුපත්තො, අක්ඛාහි මෙ බ්රාහ්මණ එතමත්ථං කිමච්ඡසි දෙමි තයජ්ජ පත්ථිතං.
4222. ගාථා චතස්සො ධරණීමහිස්සර සුගම්භිරත්ථා වරසාගරූපමා, තවෙව අත්ථාය ඉධාගතොස්මි සුණොහි ගාථා පරමත්ථසංහිතා.
4223. න වෙ රුදන්ති මතිමන්තො සපඤ්ඤා බහුස්සුතා යෙ බහුඨානචින්තිනො, දීපං හි එතං පරමං නරානං යං පණ්ඩිතා සොකනුදා භවන්ති.
4224. අත්තානං ඤාතී උද පුත්තදාරං ධඤ්ඤං ධනං රජතං ජාතරූපං, කිමොනු ත්වං සුතසොමානුතප්පෙ කොරව්යසෙට්ඨ වචනං සුණොම තෙ{3}.
4225. නෙවාහමත්තානමනුත්ථුනාමි න පුත්තදාරං න ධනං න රට්ඨං, සතඤ්ච ධම්මො චරිතො පුරාණො තං සඞ්ගරං බ්රාහ්මණස්සානුතප්පෙ.
4226. කතො මයා සඞ්ගරො බ්රාහ්මණෙන රට්ඨෙ සකෙ ඉස්සරියෙ ඨිතෙන, තං සඞ්ගාරං බ්රාහ්මණස්සප්පදාය සච්චානුරක්ඛි පුනරාවජිස්සං.
4227. නෙවාහමෙතං අභිසද්දහාමි සුඛී නරො මච්චුමුඛා පමුත්තො, අමිත්තහත්ථං පුනරාවජෙය්ය කොරව්යසෙට්ඨ නහි මං උපෙසීති.
4228. මුත්තො තුවං පොරිසාදස්ස හථො ගන්ත්වා සකං මන්දිරං කාමකාමී, මධුරම්පියං ජීවිතං ලද්ධ රාජ කුතො තුවං එහිසි මෙ සකාසං.
4229. මතං වරෙය්ය පරිසුද්ධසීලො න හි ජීවිතං ගරහිතො පාපධම්මො, න හි තං නරං තායතෙ{1} දුග්ගතීහි යස්සාපි හෙතු අලිකං භණෙය්ය.
4230. සචෙපි වාතො ගිරිමාවහෙය්ය චන්දො ච සුරියො ච ඡමාපතෙය්යුං, සබ්බාව නජ්ජො පටිසොතං{2} වජෙය්යුං නත්වෙවහං රාජ මුසා භණෙය්යං.
4231. නභං ඵලෙය්ය උදධී විසුස්සෙ සංවත්තෙය්ය භූතධරා වසුන්ධරා, සිලුච්චයො නෙරු සමූලමුප්පතෙ නත්වෙවහං රාජ මුසා භණෙය්යං.
4232. අසිඤ්ච සත්තිඤ්ච පරාමසාමි සපථම්පි තෙ සම්ම අහං කරොමි, තයා පමුත්තො අනණො භවිත්වා සච්චානුරක්ඛි පුනරාවජිස්සං.
4233. යො තෙ කතො සඞ්ගරො බ්රාහ්මණෙන රට්ඨෙ සකෙ ඉස්සරියෙ ඨිතෙන, තං සඞ්ගරං බ්රාහ්මණස්සප්පදාය සච්චානුරක්ඛි පුනරාවජස්සු.
4234. යො තෙ කතො සඞ්ගරො බ්රාහ්මණෙන රට්ඨෙ සකෙ ඉස්සරියෙ ඨිතෙන, තං සඞ්ගරං බ්රාහ්මණස්සප්පදාය සච්චානුරක්ඛි පුනරාවජිස්සං.
4235. මුත්තො ච සො පොරිසාදස්ස හත්ථා ගන්ත්වාන තං බ්රාහ්මණං එතදවොච, සුණොමි ගාථායො සතාරහායො යා මෙ සුතා අස්සු හිතාය බ්රහ්මෙ.
4236. සකිදෙව{1} සුතසොම සබ්භි හොති සමාගමො, සා නං සඞ්ගති පාලෙති නාසබ්භි බහුසඞ්ගමො.
4237. සබ්භිරෙව සමාසෙථ සබ්භි කුබ්බෙථ සන්ථවං{2}, සතං සද්ධම්මමඤ්ඤාය සෙය්යො හොති න පාපියො.
4238. ජීරන්ති වෙ රාජරථා සුචිත්තා අථො සරීරම්පි ජරං උපෙති, සතඤ්ච ධම්මො න ජරං උපෙති සන්තො භවෙ සබ්භි පවෙදයන්ති.
4239. නභඤ්ච දූරෙ පඨවී ච දූරෙ පාරං සමුද්දස්ස තදාහු දූරෙ, තතො භවෙ දූරතරං වදන්ති සතඤ්ච ධම්මං{3} අසතඤ්ච රාජ.
4240. සහස්සියො{4} ඉමා ගාථා න ඉමා ගාථා සතාරහා, චත්තාරි ත්වං සහස්සානි ඛිප්පං ගණ්හාහි බ්රාහ්මණ.
4241. ආසීතියා නාවුතියා ච ගාථා සතාරහා චාපි භවෙය්යු ගාථා පච්චත්තමෙව සුතසොම ජානහි{5} සහස්සියො{6} නාම කුධත්ථි{7} ගාථා.
4242. ඉච්ඡාමි වොහං සුතවුද්ධිමත්තනො සන්තො{8} ච මං සප්පුරිසා භජෙය්යුං, අහං සවන්තීහි මහොදධීව නහි තාත තප්පාමි සුභාසිතෙන.
4243. අග්ගි යථා තිණකට්ඨං ඩහන්තො{1} න තප්පතී සාගරො වා නදීහි, එවම්පි තෙ පණ්ඩිතා රාජසෙට්ඨ සුත්වා න තප්පන්ති සුභාසිතෙන.
4244. සකස්ස දාසස්ස යදා සුණොමි ගාථා{2} අහං අත්ථවතී ජනින්ද, තමෙව සක්කච්ච නිසාමයාමි නහි තාත ධම්මෙසු මමත්ථි තිත්ති.
4245. ඉදන්තෙ රට්ඨං සධනං සයොග්ගං සකායුරං සබ්බකාමූපපන්නං, කිං කාමහෙතු පරිභාසසෙ{3} මං ගච්ඡාමහං පොරිසාදස්ස{4} කන්තෙ.
4246. අත්තානුරක්ඛාය භවන්ති හෙතෙ හත්ථාරොහා රථිකා පත්තිකා ව, අස්සාරෙහා{5} යෙ ච ධනුග්ගහාසෙ සෙනං පයුඤ්ජාම හනාම සත්තුං.
4247. සුදුක්කරං පොරිසාදො අකාසි ජීවං ගහෙත්වාන අවිස්සජී මං, තං තාදිසං පුබ්බකිච්චං සරන්තො දුබ්භෙ{6} අහං තස්ස කථං ජනින්ද.
4248. වන්දිත්වා සො පිතරං මාතරඤ්ච අනුසාසිත්වා නෙගමඤ්ච බලඤ්ච, සච්චවාදී සච්චානුරක්ඛමානො අගමාසි සො යෙන සො පොරිසාදො{7}.
4249. කතො මයා සඞ්ගරො බ්රාහ්මණෙන රට්ඨෙ සකෙ ඉස්සරියෙ ඨිතෙන, තං සඞ්ගරං බ්රාහ්මණස්සප්පදාය සච්චානුරක්ඛී පුනරාගතොස්මි යජස්සු යඤ්ඤං ඛාද මං පොරිසාද.