4075. දානං දමං චාගමථොපි සංයමං ආදාය සද්ධාය කරොන්ති හෙකදා, ථෙය්යං මුසාකූටමථොපි පෙසුනං කරොන්ති හෙකෙ පුන විච්චුතා තාය.
4076. භරියාසු පොසො සදිසීසු පෙක්ඛවා සීලූපපන්නාසු පතිබ්බතාසුපි, විනෙත්වා ඡන්දං කුලධීතියාසුපි කරොති සද්ධං පන{9} කුම්භදාසියා.
4077. ත්වමෙව සද්ධෙ පරදාරසෙවිනී පාපං කරොසි කුසලම්පි රිඤ්චසි, න තාදිසි අරහසි ආසනූදකං කුතො සුධා ගච්ඡ න මය්හ රුච්චසි.
4078. ජිඝඤ්ඤරත්තිං අරුණස්මිමූහතෙ යා දිස්සතී උත්තමරූපවණ්ණිනී, තථූපමා මං පටිභාසි දෙවතෙ ආචික්ඛ මෙ ත්වං කතමාසි අච්ඡරා.
4079. කාළා නිදාඝෙරිව අග්ගජාතිව අනිලෙරිතා ලොහිතපත්තමාලිනී, කා තිට්ඨසි මන්දමිවාවලොකයං භාසෙසමානාව ගිරං න මුඤ්චසි.
4080. හිරාහං දෙවී{1} මනුජෙසු පූජිතා අපාපසත්තූපනිසෙවිනී සදා. සුධා විවාදෙන තවන්තිමාගතා සා තං න සක්කොමි සුධම්පි යාචිතුං කොපිනරූපා විය යාචනත්ථියා.
4081. ධම්මෙන ඤායෙන සුගත්තෙ ලච්ඡසි එසො හි ධම්මො නහි යාචනා සුධා, තං තං අයාචන්තිමහං නිමන්තයෙ සුධාය යම්පිච්ඡසි තම්පි දම්මි තෙ.
4082. සා ත්වං මයා අජ්ජ සකම්හි අස්සමෙ නිමන්තිතා කඤ්චනවෙල්ලි{2}විග්ගහෙ තුවං හි මෙ සබ්බරසෙහි පූජියා තං පූජයිත්වාන සුධම්පි අස්මියෙ.
4083. සා කොසියෙනානුමතා ජුතීමතා අද්ධා හිරි රම්මං පාවිසියස්සමං, උදඤ්ඤචන්තං ඵලමරියපූජිතං අපාපසත්තූපනිසෙවිතං සදා.
4084. රුක්ඛග්ගහණා බහුතෙත්ථ පුප්ඵිතා අම්බා පියාලා පනසා ච කිංසුකා, සොභඤ්ජනා ලොද්දමථොපි පද්මකා කෙකා ච භඞ්ගා තිලකා ච පුප්ඵිතා.
4085. සාලා කරෙරි බහුකෙත්ථ ජම්බුයො අස්සත්ථ නිග්රොධ මධුකා ච චෙතසා, උද්දාලකා පාටලිසින්ධුවාරිකා මනුඤ්ඤගන්ධා මුචලින්දකෙතකා.
4086. හරෙණුනා වෙළුකා වෙණුතින්දුකා{1} සාමාක නීවාරමථොපි චීනකා, මොචා කදලී බහුකෙත්ථසාලියො පවීහයො ආභුජිනො ච තණ්ඩුලා.
4087. තස්ස ච උත්තරෙ පස්සෙ{2} ජාතා පොක්ඛරණී සිවා, අකක්කසා අපබ්භාරා{3} සාධු අප්පටිගන්ධියා.
4088. තත්ථ මච්ඡා{4} සන්තිරතා ඛෙමිනො බහුභොජනා, සිඞ්ගු සවඞ්කා සකුලා{5} සතවඞ්කා ච රොහිතා ආලිගග්ගරකාකිණ්ණා පාඨීනා කාකමච්ඡකා.
4089. තත්ථ පක්ඛී සන්තිරතා ඛෙමිනො බහුභොජනා, හංසා කොඤ්චා මයූරා ච චක්කවාකා ච කුක්කුභා කුණාලකා බහුචිත්රා සිඛණ්ඩී ජීවංජිවකා.
4090. තත්ථ පානායමායන්ති නානාමිගගණා බහු, සීහා ව්යග්ඝා වරාහා ච අච්ඡකොකතරච්ඡයො.
4091. පලාසාදා ච ගවජා මහිසා රොහිතා රුරූ, එණෙය්යා ච වරාහා ච ගණිනො නිඞ්කසූකරා{6}.
4092. කදලිමිගා බහූ චෙත්ථ{7} බිළාරා සසකණ්ණකා ඡමාගිරි පුප්ඵවිචිත්ර සන්ථතා දිජාභිඝුට්ඨා දිජසඞ්ඝසෙවිතා.
4093. සා සුත්තවා නීලදුමාභිලම්බිතා විජ්ජු මහාමෙඝරිවානුපජ්ජථ, තස්සා සුසම්බන්ධ සිරං{8} කුසාමයං සුචිං සුගන්ධං අජිනූපසෙවිතං අත්රිච්ඡකොච්ඡං හිරිමෙතදබ්රවි නිසීද කල්යාණි සුඛයිදමාසනං.
4094. තස්සා තදා කොච්ඡගතාය කොසියො යදිච්ඡමානාය ජටාජිනං ධරො, නවෙහි පත්තෙහි සයං සහූදකං සුධාභිහාසී තුරිතො මහාමුනි.
4095. සා තං පග්ගය්හ{1} උභොගි පාණිහි ඉච්චබ්රවී අත්තමනා ජටාධරං, හන්දාහං එතරහි පූජිතා තයා ගච්ඡෙය්ය බ්රහ්මෙ තිදිවං ජිතාවිනී.
4096. සා කොසියානුමතා ජුතීමතා උදීරිතා{2} වණ්ණමදෙන මත්තා, සකාසෙ{3} ගන්ත්වාන සහස්සචක්ඛුනො අයං සුධා වාසව දෙහි මෙ ජයං.
4097. තමෙන සක්කොපි තදා අපූජයි සහින්දා ච දෙවා සුර{4}කඤ්ඤමුත්තමං, සා පඤ්ජලී දෙවමනුස්සපූජිතා නවම්හි කොච්ඡම්හි යදා උපාවිසි.
4098. තමෙව සංසී පුනරෙව මාතලී සහස්සනෙත්තො තිදසානමින්දො, ගන්ත්වාන වාක්යං මම බ්රූහි කොසියං ආසාය සද්ධා සිරියා ච කොසිය හිරී සුධං කෙන මලත්ථ හෙතුනා.
4099. තං සුපලවත්ථං උදතාරයී රථං දද්දල්ලමානං උපකිරිය{5} සාදිසං, ජම්බොනදීසං තපනෙය්ය සන්නිභං අලඞ්කතං කඤ්චනචිත්තසන්තිකං.
4100. සුවණ්ණචන්දෙත්ථ බහූ නිපාතිතා හත්ථි ගවස්සා කිකිව්යග්ඝදීපියො{6}, එණෙය්යකා{7} ලඞ්ඝිමයෙත්ථ පක්ඛියො මිගෙත්ථ වෙළුරියමයා යුධායුතා{8}.
4101. තත්ථස්සරාජහරයො{1} අයොජයුං දසසතානි සුසුනාගසාදිසෙ, අලඞ්කතෙ{2} කඤ්චනජාලුරච්ඡදෙ ආවෙළිකෙ සද්දගමෙ අසඞ්ගිතෙ.
4102. තං යානසෙට්ඨං අභිරුය්හ මාතලී දසාදිසා ඉමා අභිනාදයිත්ථ, නභඤ්ච සෙලඤ්ච වනස්පතීනි{3} ච සසාගරං පව්යථයිත්ථ මෙදිනිං{4}.
4103. ස ඛිප්පමෙව උපගම්ම අස්සමං පාවාරමෙකංසකතො කතඤ්ජලී, බහුස්සුතං වද්ධං{5} විනීතවන්තං{6} ඉච්චබ්රවි මාතලි දෙවබ්රාහ්මණං.
4104. ඉන්දස්ස වාක්යං නිසාමෙහි කොසිය දූතො අහං පුච්ඡති තං පුරින්දදො, ආසාය සද්ධා සිරියා ච කොසිය හිරී සුධං කෙන මලත්ථ හෙතුනා.
4105. අන්ධා සිරී මං පටිභාති මාතලී සද්ධා අනිච්චා පන දෙව සාරථි, ආසා විසංවාදිකසම්මතා හි මෙ හිරී ච අරියම්භි ගුණෙ පතිට්ඨිතා.
4106. කුමාරියො යාචිමා ගොත්තරක්ඛිතා ජිණ්ණා ච යා යා ච සභත්තුඉත්ථියො, තා ඡන්දරාගං පුරිසෙසු උග්ගතං හිරියා නිවාරෙන්ති සචිත්තමත්තනො.
4107. සඞ්ගාමසීසෙ සරසත්තිසංයුතෙ පරාජිතානං පතතං පලායිනං, හිරියා නිවත්තන්ති ජහිත්ව ජීවිතං තෙ සංපටිච්ඡන්ති පුනා හිරීමනා.
4108. වෙලා යථා සාගරවෙගචාරිණි හිරායං හි පාපජනං නිවාරණී, තං සබ්බලොකෙ හිරිමරියපූජිතං ඉන්දස්ස{7} නං වෙදය දෙවසාරථි.
4109. කො තෙ ඉමං කොසිය දිට්ඨිමොදහි බ්රහ්මා මහින්දො අථවා පජාපති, හිරායං දෙවෙසු හි සෙට්ඨසම්මතා ධීතා මහින්දස්ස මහෙසි ජායථ.
4110. හන්දෙහිදානි තිදිවං සමක්කම{1} රථං සමාරුය්හ මමායිතං ඉමං, ඉන්දො ච තං ඉන්දසගොත්ත කඞ්ඛති අජ්ජෙව ත්වං ඉන්දසහව්යතං වජ.
4111. එවං සමිජ්ඣන්ති අපාපකම්මිනො අථො සුචිණ්ණස්ස ඵලං න නස්සති, යෙ කෙචි මද්දක්ඛු සුධාය භොජනං සබ්බෙව තෙ ඉන්දසහව්යතං ගතාති.
4112. හිරී උප්පලවණ්ණාසි කොසියො දානපති භික්ඛු, අනුරුද්ධො පඤ්චසිඛො ආනන්දො ආසි මාතලී.
4113. සුරියො කස්සපො භික්ඛු මොග්ගල්ලානොසි චන්දිමා, නාරදො සාරිපුත්තොසි සම්බුද්ධො ආසි වාසවොති.
සුධාභොජනජාතකං.
4. කුණාලජාතකං.
එවමක්ඛායති, එවමනුසූයති; සබ්බොසධධරණීධරෙ{2} නෙකපුප්ඵමාල්යචිත්තෙ{3} ගජගවජමහිසරුරුචමරපසදඛග්ග{4}ගොකණ්ණසීහව්යග්ඝදීපිඅච්ඡකොකතරච්ඡඋද්දාරකකදලිමිගබිළාරසසකණ්ණකානුචරිතෙ ආකිණ්ණනෙලමණ්ඩලමහාවරාහනාගකුලකණෙරුසඞ්ඝාධිවුත්ථෙ ඉස්සමිගසාඛමිගසරභමිගඵණිමිග වාතමිගපසදමිගපුරිසලලුකිම්පුරිසයක්ඛරක්ඛස නිසෙවිතෙ අමජ්ජමඤ්ජරීධරබ්රහට්ඨ{5}පුප්පපුප්ඵිතග්ගනෙකපාදපගණවිතතෙ{6} කුරරචකොරවාරණමයුර{7}පරාභූත{8}ජීවඤ්ජීවක{9}චෙලාවක
භිඞ්කාරකරවීකමත්තවිහඞ්ගසතසම්පඝුට්ඨෙ අඤ්ජනමනොසිලාහරිතාල හිඞ්ගුලකහෙමරජතකනකානෙකධාතුසතවිනද්ධපතිමණ්ඩිතප්පදෙසෙ එවරූපෙ ඛලු භො රම්මෙ වනසණ්ඩෙ කුණාලො නාම සකුණො පටිවසති අතිවිය චිත්තො අතිවිය චිත්තපත්තච්ඡදනො. තස්සෙව ඛලු භො කුණාලස්ස සකුණස්ස අඩ්ඪුඩ්ඪානි ඉත්ථිසහස්සානි පරිචාරිකා දිජකඤ්ඤායො. අථ ඛලු භො ද්වෙ දිජකඤ්ඤායො කට්ඨං මුඛෙන ඩසිත්වා{1} තං කුණාලං සකුණං මජ්ඣෙ නිසීදාපෙත්වා උඩ්ඩෙන්ති{2} මා නං කුණාලං සකුණං අද්ධානපරියායපථෙ කිලමථො උබ්බාහෙය්යාති. පඤ්චසතා දිජකඤ්ඤායො හෙට්ඨතො හෙට්ඨතො ඩෙන්ති සචායං කුණාලො සකුණො ආසනා පරිපටිස්සති මයං තං පක්ඛෙහි පටිග්ගහෙස්සාමාති. පඤ්චසතා දිජකඤ්ඤායො උපරූපරි ඩෙන්ති මා නං කුණාලං සකුණං ආතපො පරිතාපීති{3}. පඤ්චසතා දිජකඤ්ඤායො උභතො පස්සෙන ඩෙන්ති මා නං කුණාලං සකුණං සීතං වා උණ්හං වා තිණං වා රජො වා වාතො වා උස්සාවො වා උපප්ඵුසීති. පඤ්චසතා දිජකඤ්ඤායො පුරතො පුරතො ඩෙන්ති මා නං කුණාලං සකුණං ගොපාලකා වා පසුපාලකා වා තිණහාරකා වා කට්ඨහාරකා වා වනකම්මිකා වා කට්ඨෙන වා කඨලාය වා{4} පාණිනා වා (පාසාණෙන වා) ලෙඩ්ඩුනා වා දණ්ඩෙන වා සත්ථෙන වා සක්ඛරාය වා පහාරං අදංසු. මායං කුණාලො සකුණො ගච්ඡෙහි වා ලතාහි වා රුක්ඛෙහි වා සාඛාහි වා ථම්භෙහි වා පාසාණෙහි වා බලවන්තෙහි වා පක්ඛීහි සඞ්ගා මෙසීති. පඤ්චසතා දිජකඤ්ඤායො පච්ඡතො පච්ඡතො ඩෙන්ති සණ්හාහි සඛිලාහි මඤ්ජූහි මධුරාහි වාචාහි සමුදාචරන්තියො මායං කුණාලො සකුණො ආසනෙ පරියුක්කණ්ඨිති. පඤ්චසතා දිජකඤ්ඤායො දිසො දිසං ඩෙන්ති නෙකරුක්ඛවිවිධවිකතිඵලමාහරන්තියො මායං කුණාලො සකුණො ඛුදාය පරිකිලමිත්ථාති. අථ ඛලු භො තා දිජකඤ්ඤායො තං කුණාලං සකුණං ආරාමෙනෙව ආරාමං උය්යානෙනෙව උය්යානං නදීතිත්ථෙනෙව නදීතිත්ථං පබ්බතසිඛරෙනෙව පබ්බතසිඛරං අම්බවනෙනෙව අම්බවනං ජම්බූවනෙනෙව ජම්බූවනං ලබුජවනෙනෙව ලබුජවනං නාළිකෙරසඤ්චාරියෙනෙව නාළිකෙරසඤ්චාරියං ඛිප්පමෙව අභිසම්භොන්ති රතත්ථාය. අථ ඛලු භො කුණාලො සකුණො තාහි දිජකඤ්ඤාහි දිවසං පරිබ්බූළ්හො එවං අපසාදෙති, නස්සථ තුම්හෙ වසලියො විනස්සථ තුම්හෙ වසලියො චොරියො ධුත්තියො අසතියො ලහුචිත්තායො කතස්ස අප්පතිකාරිකායො අනිලො විය යෙන කාමඞ්ගමායොති.
තස්සෙව ඛලු භො හිමවතො පබ්බතරාජස්ස පුරත්ථිමදිසාභාගෙ සුසුඛුමසුනිපුණගිරිප්පභවා හරිතූපයන්තියො උප්පලකුමුදපදුමනලිනසතපත්තසොගන්ධිකමන්දාලවසම්පතිවිරූළ්හසුචිගන්ධම- නුඤ්ඤපාවකප්පදෙසෙ කුරවක{1}මුචලින්දකෙතකවෙතසවඤ්ජුලපුන්නාගවකුලතිලකපියකහසනසලසාළල චම්පකාසොකනාගරුක්ඛතිරීටභුජපත්තලොද්දචන්දනොඝවනෙ, කාළාගළුපදමකපියඞ්ගුදෙවදාරුකචොචගහණෙකකුධකුටජඅඞ්කොලකච්චිකාරකණිකාරකණ්ණකාරකණවෙර කොරණ්ඩකොවි ළා රකිංසුකයොධිනවමල්ලිකමනඞ්ගණමනවජ්ජභණ්ඩිසුරුචිරභගිනිමාලාදිමාල්යධරෙ ජාතිසුමනමධුගන්ධිකධනුකාරිතාළීසතගරඋසීරකොට්ඨකච්ඡවිතතෙ, අතිමුත්තකසඞ්කුසුමිතලතාවිතතපතිමණ්ඩිතප්පදෙසෙ, හංසපිලවකාදාම්බකාරණ්ඩවාභිනදිතෙ, විජ්ජාධරසිද්ධසමණතාපසගණාධිවුත්ථෙ වරදෙවයක්ඛරක්ඛසදානවගන්ධබ්බකින්නරමහොරගානුචිණ්ණප්පදෙසෙ එවරූපෙ ඛලු භො රම්මෙ වනසණ්ඩෙ පුණ්ණමුඛො නාම ඵුස්සකොකිලො පටිවසති අතිවිය මධුරගිරො විලසිතනයනමත්තක්ඛො.
තස්සෙව ඛලු භො පුණ්ණමුඛස්ස ඵුස්සකොකිලස්ස අඩ්ඪුඩ්ඪානි ඉත්ථිසතානි පරිචාරිකා දිජකඤ්ඤායො. අථ ඛලු භො ද්වෙ දිජකඤ්ඤායො කට්ඨං මුඛෙන ඩසිත්වා තං පුණ්ණමුඛං ඵුස්සකොකිලං මජ්ඣෙ නිසීදාපෙත්වා උඩ්ඩෙන්ති, මා නං පුණ්ණමුඛං ඵුස්සකොකිලං අද්ධානපරියායපථෙ කිලමථො උබ්බහෙත්ථාති. පඤ්ඤාස දිජකඤ්ඤායො හෙට්ඨතො හෙට්ඨතො ඩෙන්ති, සචායං පුණ්ණමුඛො ඵුස්සකොකිලො ආසනා පරිපතිස්සති මයං තං පක්ඛෙහි පටිග්ගහෙස්සාමාති. පඤ්ඤාය දිජ කඤ්ඤායො උපරූපරි ඩෙන්ති, මා නං පුණ්ණමුඛං ඵුස්සකොකිලං ආතපො පරිතාපීති. පඤ්ඤාස දිජකඤ්ඤායො උභතො පස්සෙන ඩෙන්ති, මා නං පුණ්ණමුඛං ඵුස්සකොකිලං සීතං වා උණ්හං වා තිණං වා රජො වා වාතො වා උස්සාවො වා උපප්ඵුසීති. පඤ්ඤාස දිජකඤ්ඤායො පුරතො පුරතො ඩෙන්ති, මා නං පුණ්ණමුඛං ඵුස්සකොකිලං ගොපාලකා වා පසුපාලකා වා තිණහාරකා වා කට්ඨහාරකා වා වනකම්මිකා වා කට්ඨෙන වා කඨලාය වා පාණිනා වා (පාසාණෙන වා) ලෙඩ්ඩුනා වා දණ්ඩෙන වා සත්ථෙන වා සක්ඛරාහි වා
පහාරං අදංසු. මායං පුණ්ණමුඛො ඵුස්සකොකිලො ගච්ඡෙහි වා ලතාහි වා රුක්ඛෙහි වා සාඛාහි වා ථම්භෙහි වා පාසාණෙහි වා බලවන්තෙහි වා පක්ඛීහි සංගාමෙසීති. පඤ්ඤාස දිජකඤ්ඤායො පච්ඡතො පච්ඡතො ඩෙන්ති සණ්හාහි සඛිලාහි මඤ්ජූහි මධුරාහි වාචාහි සමුදාචරන්තියො, මායං පුණ්ණමුඛො ඵුස්සකොකිලං ආසනෙ පරියුක්කණ්ඨිති. පඤ්ඤාස දිජකඤ්ඤායො දිසොදිසං ඩෙන්ති, නෙකරුක්ඛවිවිධවිකතිඵලමාහරහන්තියො මායං පුණ්ණමුඛො ඵුස්සකොකිලො ඛුදාය පරිකිලමිත්ථාති. අථ ඛලු භො තා දිජකඤ්ඤායො තං පුණ්ණමුඛං ඵුස්සකොකිලං ආරාමෙනෙව අරාමං උය්යානෙනෙව උය්යානං නදීතිත්ථෙනෙව නදීතිත්ථං පබ්බතසිඛරෙනෙව පබ්බතසිඛරං අම්බවනෙනෙව අම්බවනං ජම්බූවනෙනෙව ජම්බූවනං ලබුජවනෙනෙව ලබුජවනං නාළිකෙරසඤ්චාරීයෙනෙව නාළිකෙරසඤ්චාරියං ඛිප්පමෙව අභිසම්භොන්ති රතත්ථාය. අථ ඛලු භො පුණ්ණමුඛො ඵුස්සකොකිලො තාහි දිජකඤ්ඤාහි දිවසං පරිබ්බූළ්හො එවං පසංසති සාධු සාධු භගිනියො එථ ඛො භගිනියො තුම්හාකං පතිරූපං කුලධීතානං යං තුම්හෙ භත්තාරං පරිචරෙය්යාථාති.
අථ ඛලු භො පුණ්ණමුඛො ඵුස්සකොකිලෙ යෙන කුණාලො සකුණො තෙනුපසඞ්කමි. අද්දසංසු ඛො කුණාලස්ස සකුණස්ස පරිචාරිකා දිජකඤ්ඤායො තං පුණ්ණමුඛං ඵුස්සකොකිලං දූරතොව ආගච්ඡන්තං, දිස්වාන යෙන පුණ්ණමුඛො ඵුස්සකොකිලො තෙනුපසඞ්කමිංසු. උපසඞ්කමිත්වා තං පුණ්ණමුඛං ඵුස්සකොකිලං එතදවොචුං. අයං සම්ම පුණ්ණමුඛ, කුණාලො සකුණො අතිවිය ඵරුසො අතිතිවියඵරුසවාචො අප්පෙවනාම ත්වම්පි ආගම්ම පියවාචං ලභෙය්යාමාති. අප්පෙවනාම භගිනියොති වත්වා යෙන කුණාලො සකුණො තෙනුපසඞ්කමි. උපසඞ්කමිත්වා කුණාලෙන සකුණෙන සද්ධිං පටිසම්මොදිත්වා එකමන්තං නිසීදි. එකමන්තං නිසින්නො ඛො පුණ්ණමුඛො ඵුස්සකොකිලො තං කුණාලං සකුණං එතදවොච: කිස්ස ත්වං සම්ම කුණාල, ඉත්ථීනං සුජාතානං කුලධීතානං සම්මා පටිපන්නානං මිච්ඡා පටිපන්නොසි. අමනාපභාණීනම්පි කිර සම්ම කුණාල, ඉත්ථීනං මනාපභාණිනා භවිතබ්බං කිමඞ්ගං පන මනාපභාණීනන්ති. එවං වුත්තෙ කුණාලො සකුණො තං පුණ්ණමුඛං ඵුස්සකොකිලං එවං අපසාදෙසි. තස්ස ත්වං සම්ම ජම්ම වසල, විනස්ස ත්වං සම්ම ජම්ම වසල කොනු තයා වියත්තො ජායාජිනෙනාති. එවං අපසාදිතො ච පන පුණ්ණමුඛො ඵුස්සකොකිලො තතො හෙව පටිනිවත්ති.
අථ ඛලු භො පුණ්ණමුඛස්ස ඵුස්සකොකිලස්ස අපරෙන සමයෙන න චිරස්සෙව (අච්චයෙන) ඛරො ආබාධො උප්පජ්ජ, ලොහිතපක්ඛන්දිකා බාළ්හා වෙදනා වත්තන්ති මාරණන්තිකා. අථ ඛලු භො පුණ්ණමුඛස්ස, ඵුස්සකොකිලස්ස පරිචාරිකානං දිජකඤ්ඤානං එතදහොසි. ආබාධිකො ඛො අයං පුණ්ණමුඛො ඵුස්සකොකිලො අප්පෙවනාම ඉමම්හා ආබාධා වුට්ඨභෙය්යාති. තං එකකං අදුතියං ඔහාය යෙන කුණාලො සකුණො තෙනුපසඞ්කමිංසු. අද්දසා ඛො කුණාලො සකුණො තා දිජකඤ්ඤායො දූරතොව ආගච්ඡන්තියො, දිස්වාන තා දිජකඤ්ඤායො එතදවොච: කහං පන තුම්හං වසලියො භත්තාති. ආබාධිකො ඛො සම්ම කුණාල පුණ්ණමුඛො ඵුස්සකොකිලො, අප්පෙවනාම තම්හා ආබාධා වුට්ඨහෙය්යාති. එවං වුත්තෙ කුණාලො සකුණො තා දිජකඤ්ඤායො එවං අපසාදෙසි. නස්සථ තුම්හෙ වසලියො, විනස්සථ තුමෙභ වසලියො, චොරියො ධුත්තියො අසතියො ලහුවිත්තායො කතස්ස අප්පටිකාරිකායො අනිලො විය යෙන කාමඞ්ගමායොති. වත්වා යෙන පුණ්ණමුඛො ඵුස්සකොකිලො තෙනුපසඞ්කමි උපසඞ්කමිත්වා ත පුණ්ණමුඛං ඵුස්සකොකිලං එතදවොච: හං සම්ම පුණ්ණමුඛාති, හං සම්ම කුණාලාති, අථ ඛලු භො කුණාලො සකුණො තං පුණ්ණමුඛං ඵුස්සකොකිලං පක්ඛෙහි ච මුඛතුණ්ඩෙන ච පරිග්ගහෙත්වා වුට්ඨාපෙත්වා නානාභෙසජ්ජානි පායාපෙසි. අථ ඛලු භො පුණ්ණමුඛස්ස ඵුස්සකොකිලස්ස සො අබාධො පටිප්පස්සම්භිති.
අථ ඛලු භො කුණාලො සකුණො තං පුණ්ණමුඛං ඵුස්සකොකිලං ගිලානා වුට්ඨිතං අචිරවුට්ඨිතං ගෙලඤ්ඤා එතදවොච. දිට්ඨා මයා සම්ම පුණ්ණමුඛ කණ්හා ද්වෙ{1}පිතිකා පඤ්චපතිකාය ඡට්ඨෙ පුරිසෙ චිත්තං පටිබද්ධන්තියා යදිදං කවන්ධෙ පීඨසප්පිම්භීති. භවති ච පනු{2}ත්තරෙත්ථ වාක්යං.
4114. අථජ්ජුනො නකුලො භීමසෙනො යුධිට්ඨිලො සහ{3}දෙවොච රාජා, එතෙ පතී{4} පඤ්චමතීච්ච නාරී අකාසී ඛුජ්ජවාමනකෙන පාපන්ති.
දිට්ඨා මයා සම්ම පුණ්ණමුඛ සච්චත{5}පාවී නාම සමණී සුසාන මජ්ඣෙ වසන්තී චතුත්ථභත්තං පරිණාමයමානා තුලාපුත්තකෙන{6} පාපමකාසි.
දිට්ඨා මයා සම්මා පුණ්ණමුඛ කාකාතී නාම දෙවී සමුද්දමජ්ඣෙ වසන්තී භරියා වෙනතෙය්යස්ස නටකුවෙරෙන පාපමකාසි. දිට්ඨා මයා සම්ම පුණ්ණමුඛ කුරුඞ්ගදෙවී නාම ලොමසුන්දරී එළකමාරකං කාමයමානා ඡළඞ්ගකුමාරධනන්තෙවාසිනා පාපමකාසි.
4115. එවං හෙතං මයා ඤාතං බ්රහ්මදත්තස්ස මාතරං, ඔහාය කොසලරාජං පඤ්චාලචණ්ඩෙන පාපමකාසි.
4116. එතා ච අඤ්ඤා ච අකංසු පාපං තස්මාහං ඉත්ථීනං න විස්සසෙ නප්පසංසෙ, මහී යථා ජගති{1} සමානරත්තා වසුන්ධරා ඉතරීතරා පතිට්ඨා සබ්බංසහා අඵන්දනා අකුප්පා තථිත්ථියො තායො න විස්සසෙ නරො.
4117. සීහො යථා ලොහිතමංසභොජනො වාළමිගො පඤ්චහත්ථො{2} සුරුද්දො{3}, පසය්හ ඛාදී පරහිංසනෙ රතො තථිත්ථියො තයො න විස්සසෙ නරො.
න ඛලු භො සම්ම පුණ්ණමුඛ වෙසියො නාරියො ගමනියො, නහෙතාව බන්ධකියො නාම වධිකායො නාම එතායො, යදිදං වෙසියො නාරියො ගමනියොති. චොරා විය වෙණිකතා මදිරා{4} විය දිද්ධා වාණිජා විය වාචාසන්ථුතියො ඉස්සසිඞ්ගමිව විපරිවත්තායො උරගමිව දුජිව්හායො සොබ්බමිව පටිච්ඡන්නා පාතාලමිව දුප්පූරා රක්ඛසී විය දුත්තොසා යමොචෙකන්තභාරියෙ සිඛිරිව සබ්බභක්ඛා නදීරිව සබ්බවාහිනී අනිලො විය යෙන කාමඤ්චරා නෙරුවිය අවිසෙසකරා විසරුක්ඛො විය නිච්චඵලිතායොති. භවති ච පනුත්තරෙත්ථ වාක්යං.
4118. යථා චොරො යථා දිද්ධො{1} වාණිජොව විකත්ථනී, ඉස්සසිඞ්ගමිවාවට්ටා{2} දුජිව්හා උරගො යථා{3}.
4119. සොබ්භමිව පටිච්ඡන්නා පාතාගමිව දුප්පූරා, රක්ඛසී විය දුත්තොසා යමොවෙකන්තහාරියො යථා සිඛී නදී වාහො {*}අනිලො කාමචාරවා{4}.
4120. නෙරූව අවිසෙසා ච විසරුක්ඛො විය නිච්චඵලා, නාසයන්ති ඝරෙ භොගං රතනානන්තකරිත්ථියොති.
චත්තාරිමානි සම්ම පුණ්ණමුඛ යානි පරකුලෙ න වාසෙතබ්බානි. ගොණං ධෙනුං යානං භරියං, චත්තාරි එතානි පණ්ඩිතො යානි ඝරා න විප්පවාසයෙ.
4121. ගොණං ධෙනුඤ්ච යානඤ්ච භරියං ඤාතිකුලෙ න වාසයෙ, භුඤ්ජන්ති{5} රථං අයානකා අතිවාහෙන හනන්ති පුඞ්ගවං දොහෙන හනන්ති වච්ඡකං භරියා ඤාතිකුලෙසු දුස්සතීති.
ඡ ඉමානි සම්ම පුණ්ණමුඛ යානි වත්ථූනි කිච්චෙ ජාතෙ අනත්ථාචරානි භවන්ති.
4122. අගුණං ධනු ඤාතිකුලෙ ච භරියා පාරං නාවා අක්ඛභග්ගඤ්ච යානං, දූරෙ මිත්තො පාපසහායකො ච කිචෙච ජාතෙ අනත්ථචාරිනී භවන්ති{6}.
අට්ඨහි ඛලු සම්ම පුණ්ණමුඛ ඨානෙහි ඉත්ථි සාමිකං අවජානාති: දළිද්දතා ආතුරතා ජිණ්ණතා සුරාසොණ්ඩතා මුද්ධතා පමත්තතා සබ්බකිච්චෙසු අනුවත්තිතා සබ්බධනමනුප්පදානෙන, ඉමෙහි ඛලු සම්ම පුණ්ණමුඛ අඅට්ටහි ඨානෙහි ඉත්ථි සාමිකං අවජානාති. භවති ච පනුත්තරෙත්ථ වාක්යං.
4123. දළිද්දං ආතුරඤ්චාපි ජිණ්ණං සුරාසොණ්ඩකං, පමත්තං මුද්ධපත්තඤ්ච රත්තං{1} කිච්චෙසු හාපනං සබ්බකාමප්පදානෙන අවජානන්ති සාමිකන්ති.
නවහි ඛලු සම්ම පුණ්ණමුඛ ඨානෙහි ඉත්ථි පදොසමාහරති. ආරාමගමනසීලා ච හොති උය්යානගමනසීලා ච හොති නදීතිත්ථගමනසීලා ච හොති ඤාතිකුලගමනසීලා ච හොති පරකුලගමනසීලා ච හොති ආදාසදුස්සමණ්ඩනානුයොගමනුයුත්තසීලා ච හොති මජ්ජපායිනි ච හොති නිල්ලොකනසීලා ච හොති පද්වාරට්ඨායිනී{2} ච හොති. ඉමෙහි ඛලු සම්ම පුණ්ණමුඛ නවහි ඨානෙහි ඉත්ථි පදොසමාහරතීති. භවති ච පනුත්තරෙත්ථ වාක්යං.
4124. ආරාමසීලා ච උය්යානං නදී ඤාතිපරකුලං, දුස්සමණ්ඩනමනුයුත්තා{3} යාචිත්ථි මජ්ජපායිනි.
4125. යා ච නිල්ලොකනසීලා යා{4} ච පද්වාරට්ඨායිනී, නවහෙතෙහි ඨානෙහි පදොසමාහරන්තිත්ථියොති.
චත්තාළීසාය ඛලු සම්ම පුණ්ණමුඛ ඨානෙහි ඉත්ථි පුරිසං අච්චාවදති{5}. විජම්භති විනමති විලාසති විලිඛති විලජ්ජති නඛෙන නඛං ඝට්ටෙති පාදෙන පාදං අක්කමති කට්ඨෙන පඨවිං ලිඛති{6} දාරකං උල්ලංඝෙති ඔලංඝාපෙති කීළති කීළාපෙති චුම්බති චුම්බාපෙති භුඤ්ජති භුඤ්ජාපෙති දදති ආයාචති කතමනුකරොති උච්චං භාසති නීචං භාසති අවිවිච්චං භාසති විවිච්චං භාසති නච්චෙන ගීතෙන වාදිතෙන රොදිතෙන{7} විලසිතෙන විභූසිතෙන ජග්ඝති පෙක්ඛති කටිං චාලෙති ගුය්හභණ්ඩකං සඤ්චාලෙති ඌරුං විවරති ඌරුං පිදහති ථනං දස්සෙති කච්ඡං දස්සෙති නාභිං දස්සෙති අක්ඛිං නිඛණති භමුකං උක්ඛිපති ඔට්ඨං පලිඛති ජිව්හං නිල්ලාලෙති දුස්සං මුඤ්චති දුස්සං පටිබන්දති සිරසං මුඤ්චති සිරසං බන්ධති ඉමෙහි ඛලු සම්ම පුණ්ණමුඛ චත්තාළීසාය ඨානෙහි ඉත්ථි පුරිසං අච්චාවදති.
පඤ්චවීසාය ඛලු සම්ම පුණ්ණමුඛ ඨානෙහි ඉත්ථි පදුට්ඨා වෙදිතබ්බා භවති. සාමිකස්ස පවාසං වණ්ණෙති පවුත්ථං{1} න සරති ආගතං නාභිනන්දති අවණ්ණං තස්ස භණති වණ්ණං තස්ස න භණති අනත්ථං තස්ස චරති අත්ථං තස්ස න චරති අකිච්චං තස්ස කරොති කිච්චං තස්ස න කරොති පරිදහිත්වා සයති පරම්මුඛි නිපජ්ජති පරාවත්තකජාතා{2} ඛො පන හොති කුඞ්කුමියජාතා දීඝං අස්සසති{3} දුක්ඛං වෙදයති උච්චාරපස්සාවං අභිණ්හං ගච්ඡති විලොමං ආචරති පරපුරිසසද්දං සුත්වා කණ්ණසොතවිවරමොදහති නිහතභොගා ඛො පන හොති පටිවිස්සකෙහි සන්ථවං කරොති නික්ඛන්තපාදා ඛො පන හොති විසිඛානුචාරිනී අතිචාරිනී ඛො පන හොති සාමිකෙ අගාරවා පදුට්ඨමනසඞ්කප්පා අභිණ්හං ද්වාරෙ තිට්ඨති කච්ඡානි අඞ්ගානි ථනානි දස්සෙති දිසොදිසං ගන්ත්වා පෙක්ඛති. ඉමෙහි ඛලු සම්ම පුණ්ණමුඛ පඤ්චවීසාය ඨානෙහි ඉත්ථි පදුට්ඨා වෙදිතබ්බා භවති.
භවති ච පනුත්තරෙත්ථ වාක්යං.
4126. පවාසමස්ස වණ්ණෙති ගතං නානුසොචති,{4} දිස්වා පතිං ආගතං නාභිනන්දති භත්තාරවණ්ණං න කදාචි භාසති එතෙ පදුට්ඨාය භවන්ති ලක්ඛණා.
4127. අනත්ථං තස්ස චරති අසඤ්ඤතා අත්ථඤ්ච හාපෙති අකිච්චකාරිණී, පරිදහිත්වා සයති පරම්මුඛී එතෙ පදුට්ඨාය භවන්ති ලක්ඛණා.
4128. පරාවත්තජාතා{5} ච භවති කුඞ්කුමී දීඝඤ්ච අස්සසති දුක්ඛවෙදිනී, උච්චාරපස්සාවමභිණ්හගච්ඡති එතෙ පදුට්ඨාය භවන්ති ලක්ඛණා.
4129. විලොමමාචරති අකිච්චකාරිණී සද්දං නිසාමෙති පරස්ස භාසතො, හතභොගා ච කරොති සන්ථවං{6} එතෙ පදුට්ඨාය භවන්ති ලක්ඛණා.
4130. කිච්ඡෙන ලද්ධං කසිරෙනාභතං{1} ධනං විත්තං විනාසෙති දුකෙඛන සම්භතං, පටිවිස්සකෙහි ච කරොති සන්ථවං එතෙ පදුට්ඨාය භවන්ති ලක්ඛණා.
4131. නික්ඛන්තපාදි විසිඛානුචාරිනී නිච්චං ස සාමිම්භි පදුට්ඨමානසා, අතිචාරිනී හොති තථෙව{2}ගාරවා එතෙ පදුට්ඨා භවන්ති ලක්ඛණා.
4132. අභික්ඛණං තිට්ඨති ද්වාරමූලෙ ථනානි කච්ඡානි ච දස්සයන්ති, දිසොදිසං පෙක්ඛති භන්තවිත්තා එතෙ පදුට්ඨාය භවන්ති ලක්ඛණා.
4133. සබ්බා නදී වඞ්කගතී{3} සබ්බෙ කට්ඨමයා වනා, සබ්බිත්ථියො කරෙ පාපං ලභමානෙ{4} නිවාතකෙ.
4134. සචෙ ලභෙථ ඛණං වා රහො වා නිවාතකං චාපි ලභෙථ තාදිසං, සබ්බාව ඉත්ථි කරෙය්යු{5} නො පාපං අඤ්ඤං අලත්ථ පීඨසප්පිනාපි සද්ධිං.
4135. නරානමාරාමකරාසු නාරිසු අනෙකචිත්තාසු අනිග්ගහාසු ච, සබ්බත්තනාපීතිකරාපි චෙ සියා{6} න විස්සසෙ තිත්ථසමා හි නාරියො.
4136. යං වෙ දිස්වා කණ්ඩරීකින්තරානං{7} සබ්බිත්ථියො න රමන්ති අගාරෙ, තං තාදිසං මච්චං චජිත්වා භරියා අඤ්ඤං දිස්වා පුරිසං පීඨසප්පිං.
4137. බකස්ස ච පාවාරිකස්ස{8} රඤ්ඤො අච්චන්තකාමානුගතස්ස භරියා, අචාචරි බද්ධවසානුගස්ස{9} කං වාපි ඉත්ථි නාතිචරෙ තදඤ්ඤං.
4138. පිඞ්ගියානී සබ්බලොකිස්සරස්ස රඤ්ඤො පියා බ්රහ්මදත්තස්ස භරියා, අවාචරී බද්ධවසානුගස්ස තං වාපි සා නාජ්ඣගා කාමකාමිනී.
4139. ඛුද්දානං{1} ලහුචිත්තානං අකතඤ්ඤුන දූභිනං{2}, නාදෙවසත්තො පුරිසො ථිනං සද්ධාතුමරහති.
4140. න තා පජානන්ති කතං න කිච්චං න මාතරං පිතරං භාතරං වා, අනරියා සමතික්කන්තධම්මා සස්සෙව චිත්තස්ස වසං වජන්ති.
4141. චිරානුවුත්ථම්පි පියං මනාපං අනුකම්පකං පාණසමම්පි සන්තං{3}, ආවාසු{4} කිච්චෙසු ච නං ජහන්ති තස්මානං ඉත්ථීනං න විස්සසාමි.
4142. ථිනං හි චිත්තං යථා වානරස්ස කන්තප්පකන්තං යථා රුක්ඛඡායා, චලාවලං හදයං ඉත්ථියානං චක්කස්ස නෙමි විය පරිවතත්ති.
4143. යදා තා පස්සන්ති සමෙක්ඛමානා ආදෙය්යරූපං පුරිසස්ස විත්තං, සණ්හාහි වාචාහි නයන්ති මෙතං කම්බොජකා ජලජෙනෙව අස්සං.
4144. යදා න පස්සන්ති සමෙක්ඛමානා ආදෙය්යරූපං පුරිසස්ස විත්තං, සමන්තතො තං පරිවජ්ජයන්ති තිණ්ණො නදීපාරගතොව කුල්ලං.
4145. සිලෙසූපමා සිඛීරිව සබ්බභක්ඛා තික්ඛමායා නදීරිව සීඝසොතා, සෙවන්ති හෙතා පියමප්පියඤ්ච නාවා යථා ඔරකුලං පරඤ්ච
4146. න තා එකස්ස න ද්වින්නං ආපණොව පසාරිතො, යො තා මය්හන්ති මඤ්ඤෙය්ය වාතං ජාලෙන බාධයෙ{1}
4147. යථා නදී ච පත්ථො ච පානාගාරං සභා පපා, එවං ලොකිත්ථියො නාම වෙලා තාසං න විජ්ජති.
4148. ඝතාසනසමාහෙතා කණ්හසප්පසිරූපමා, ගාවො බහි තිණස්සෙව ඔමසන්ති වරං වරං.
4149. ඝතාසනං කුඤ්ජරං කණ්හසප්පං මුද්ධාභිසිත්තං පමදා ච සබ්බා, එතෙ නාරො නිච්චයත්තො භජෙථ තෙසං භවෙ දුබ්බිදූ සච්චභාවො{2}.
4150. නාච්චන්තවණ්ණා{3} න බහූනි කන්තා න දක්ඛිණා පමදා සෙවිතබ්බා, න පරස්ස භරියා න ධනස්ස හෙතු එතිත්ථියො පඤ්ච න සෙවිතබ්බා.
අථ ඛලු භො ආනන්දො ගිජ්ඣරාජා කුණාලස්ස සකුණස්ස ආදිමජ්ඣකථාපරියොසානං විදිත්වා තායං වොලායං ඉමා ගාථායො අභාසි.
4151. පුණ්ණම්පි චෙමං පඨවිං ධනෙන දජ්ජත්ථියා පුරිසො සම්මතාය, ලද්ධා ඛණං අතිමඤ්ඤෙය්ය තම්පි තාසං වසං අසතීනං න ගච්ඡෙ.
4152. උට්ඨාහකඤ්චෙපි අලීනවුත්තිං කොමාරභත්තාරං පියං මනාපං, ආවාසු කිච්චෙසු ච නං ජහන්ති තස්මා හි ඉත්ථීනං න විස්සසාමි.
4153. න විස්සසෙ ඉච්ඡති මන්ති පොසො න විස්සසෙ රොදති මෙ සකාසෙ, සෙවන්ති හෙතා පියමප්පියඤ්ච නාවා යථා ඔරකුලං පරඤ්ච.