3977. යො ච අරියරුදං භාසෙ අනරියධම්මමවස්සිතො, උභො සො ධංසතෙ ලොකා ඉධචෙව පරත්ථ ච.
3978. න මජ්ජෙථ යසං පත්තො න ව්යථෙ{5} පත්තසංසයං, වායමෙථෙව කිච්චෙසු සංවරෙ විවරානි ච.
3979. යෙ වද්ධා{6} අබ්භතික්කන්තා සම්පත්තා කාලපරියායං, ඉධ ධම්මං චරිත්වාන එවෙතෙ{7} තිදිවං ගතා.
3980. ඉදං සුත්වා කාසිපති ධම්මමත්තනි පාලය, ධතරට්ඨඤ්ච මුඤ්චාහි හංසානං පවරුත්තමං,
3981. ආහරන්තූදකං පජ්ජං ආසනඤ්ච මහාරහං, පඤ්ජරතො පමොක්ඛාමි ධතරට්ඨං යසස්සිනං.
3982. තඤ්ච සෙනාපතිං ධීරං නිපුණං අත්ථචින්තකං, යො සුඛො සුඛිතො රඤ්ඤො දුක්ඛිතෙ හොති දුක්ඛිතො.
3983. එතාදිසා{1} ඛො අරහන්ති පිණ්ඩමස්නාතු භත්තුනො, යථායං සුමුඛො රඤ්ඤො පාණසාධාරණො සඛා.
3984. පීඨඤ්ච සබ්බසොවණ්ණං අට්ඨපාදං මනොරමං, මට්ඨං කාසිකපත්ථින්නං{2} ධතරට්ඨො උපාවිසි.
3985. කොච්ඡඤ්ච සබ්බසොවණ්ණං වෙය්යග්ඝපරිසිබ්බිතං, සුමුඛො අජ්ඣුපාවෙක්ඛි ධතරට්ඨස්ස අනන්තරං.
3986. තෙසං කඤ්චනපත්තෙහි පුථු ආදාය කාසියො, හංසානං අභිහාරෙසුං අග්ගං රඤ්ඤො පවාසිතං.
3987. දිස්වා අභිහටං අග්ගං කාසිරාජෙන පෙසිතං, කුසලො ඛත්තධම්මානං තතො පුච්ඡි අනන්තරා.
3988. කච්චි භොතො කුසලං කච්චි භොතො අනාමයං, කච්චි රට්ඨමිදං ඵීතං ධම්මෙනමනුසිස්සති.
3989. කුසලඤ්චෙව මෙ හංස අථො හංස අනාමයං, අථො රට්ඨමිදං ඵීතං ධම්මෙනමනුසිස්සති.
3990. කච්චි භොතො අමච්චෙසු දොසො කොචි න විජ්ජති, කච්චින්නු තෙ තවත්ථෙසු නාවකඞ්ඛන්ති ජීවිතං.
3991. අථො පි මෙ අමච්චෙසු දොසො කොචි න විජ්ජති, අථො පි තෙ මමත්ථෙසු නාවකඞ්ඛන්ති ජීවිතං.
3992. කච්චි තෙ සාදිසී භරියා අස්සවා පියභාණිනී, පුත්තරූපයසූපෙතා මම ඡන්දවසානුගා.
3993. අථො මෙ සාදිසී භරියා අස්සවා පියභාණිනී, පුත්තරූපයසූපෙතා මම ඡන්දවසානුගා.
3994. කච්චි රට්ඨං අනුප්පීළං අකුතොචි උපද්දවං, අසාහසෙන ධම්මෙන සමෙන මනුසිස්සති{3}.
3995. අථො රට්ඨං අනුප්පීළං අකුතොචි උපදද්වං, අසාහසෙන ධම්මෙන සමෙන මනුසිස්සති{1}.
3996. කච්චි සන්තො අපචිතා අසන්තො පරිවජ්ජිතා, නො චෙ ධම්මං නිරඞ්කත්වා අධම්මමනුවත්තසි.{2}
3997. සන්තො ච මෙ අපචිතා අසන්තො පරිවජ්ජිතා, ධම්මමෙවානුවත්තාමි අධම්මො මෙ නිරඞ්කතො.
3998. කච්චි නානාගතං දීඝං සමවෙක්ඛසි ඛත්තිය, කච්චි න මත්තො මදනීයෙ පරලොකං න සන්තසි.
3999. නාහං අනාගතං දීඝං සමවෙක්ඛාමි පක්ඛිම, ඨිතො දසසු ධම්මෙසු පරලොකං න සන්තසෙ.
4000. දානං සීලං පරිච්චාගං අජ්ජවං මද්දවං තපං, අක්කොධං{3} අවිහිංසඤ්ච ඛන්තිඤ්ච අවිරොධනං.
4001. ඉච්චෙතෙ කුසලෙ ධම්මෙ ඨිතෙ පස්සාමි අත්තනි, තතො{4} මෙ ජායතෙ පීති සොමනස්සඤ්ඤචනප්පකං.
4002. සුමුඛො ච අචින්තෙත්වා විස්සජි ඵරුසං ගිරං, භාවදොසමනඤ්ඤාය අස්මාකායං විහඞ්ගමො.
4003. සො කුද්ධො ඵරුසං වාචං නිච්ඡාරෙසි අයොනිසො, යානස්මාසු{5} න විජ්ජන්ති න ඉදං පඤ්ඤවතාමිව.
4004. අත්ථි මෙතං අතිසාරං වෙගෙන මනුජාධිප, ධතරට්ඨෙ ච බද්ධස්මිං දුක්ඛං මෙ විපුලං අහු.
4005. ත්වං නො පිතාව පුත්තානං භූතානං ධරණීරිව, අස්මාකං අධිපන්නානං ඛමස්සු රාජකුඤ්ජර.
4006. එතං තෙ අනුමොදාම යං භාවං න නිගූහසි, ඛීලං පභින්දසී පක්ඛී උජුකොසි විහඞ්ගම.
4007. යං කිඤ්චි රතනං අත්ථි කාසිරාජනිවෙසනෙ, රජතං ජාතරූපඤ්ච මුත්තා වෙළුරියා බහු.
4008. මණයො සඞ්ඛමුත්තඤ්ච වත්ථකං හරිචන්දනං, අජිනං දන්තභණ්ඩඤ්ච ලොහං කාලායසං බහුං, එතං දදාමි වො විත්තං ඉස්සෙරං විස්සජාමි වො.
4009. අද්ධා අපචිතා ත්යම්හා සක්කතා ච රථෙසභ, ධම්මෙසු වත්තමානානං ත්වං නො ආචරියො භව.
4010. ආචරියසමනුඤ්ඤාතා තයා අනුමතා මයං, තං පදක්ඛිණතො කත්වා ඤාතී පස්සෙමරින්දම.
4011. සබ්බරත්තිං චින්තයිත්වා මන්තයිත්වා යථා තථං, කාසිරාජා අනුඤ්ඤාසි හංසානං පවරුත්තමං.
4012. තතො රත්යා විවසනෙ සුරියස්සුග්ගමනං{1} පති, පෙක්ඛතො කාසිරාජස්ස භවනා{2} තෙ විගාහිසුං.
4013. තෙ අරොගෙ අනුප්පත්තෙ දිස්වාන පරමෙ දිජෙ, කෙ කෙති මකරුං හංසා පුථුසද්දො අජායථ.
4014. තෙ පතීතා පමුත්තෙන භත්තුනා භත්තුගාරවා, සමන්තා පරිකරිංසු අණ්ඩජා ලද්ධපච්චයා.
4015. එවං මිත්තවතං අත්ථා සබ්බෙ හොන්ති පදක්ඛිණා, හංසා යථා ධතරට්ඨා ඤාතිසඞ්ඝමුපාගමුන්ති.
මහාහංසජාතක යි.
3. සුධාභොජනජාතකං.
4016. {*}නෙව කිණාමි නපි වික්කිණාමි න චාපි මෙ සන්නිචයො ච අත්ථි, සුකිච්ඡරූපං වතිදං පරිත්තං පත්ථොදනො නාලමයං දුවින්නං.
4017. අප්පම්භා අප්පකං දජ්ජා අනුමජ්ඣතො මජ්ඣකං, බහුම්භා බහුකං දජ්ජා අදානං නූපපජ්ජති.
4018. තං තං වදාමි කොසිය දෙහි දානානි භුඤ්ජ ච, අරියං මග්ගං සමාරූහ නෙකාසී ලභතෙ සුඛං.
4019. මොඝඤ්චස්ස හුතං හොති මොඝඤ්චාපි සමීහිතං, අතිථිස්මිං යො නිසින්නස්මිං එකො භුඤ්ජති භොජනං.
4020. තං තං වදාමි කොසිය දෙහි දානානි භුඤ්ජ ච, අරියං මග්ගං සමාරූහ නෙකාසී ලභතෙ සුඛං.
4021. සච්චං තස්ස හුතං හොති සච්චඤ්චාපි සමීහිතං, අතිථිස්මිං යො නිසින්නස්මිං නෙකො භුඤ්ජති භොජනං.
4022. තං තං වදාමි කොසිය දෙහි දානානි භුඤ්ජ ච, අරියං මග්ගං සමාරූහ නෙකාසී ලභතෙ සුඛං.
4023. සරඤ්ච ජුහති යො සො බහුකාය ගයාය ච, දොණෙ තිම්බරුතිත්ථස්මිං සීඝසොතෙ මහාවහෙ.
4024. අත්රචස්ස හුතං හොති අත්රචස්ස සමීහිතං අතිථිස්මිං යො නිසින්නස්මිං නෙකො භුඤ්ජති භොජනං.
4025. තං තං වදාමි කොසිය දෙහි දානානි භුඤ්ජ ච, අරියං මග්ගං සමාරූහ නෙකාසී ලභතෙ සුඛං.
4026. බලිසං හි සො නිග්ගිලති දීඝසුත්තං සබන්ධනං, අතිථිස්මිං යො නිසින්නස්මිං එකො භුඤ්ජති භොජනං.
4027. තං තං වදාමි කොසිය දෙහි දානානි භුඤ්ජ ච, අරියං මග්ගං සමාරූහ නෙකාසී ලභතෙ සුඛං.
4028. උළාරවණ්ණා වත බ්රාහ්මණා ඉමෙ අයඤ්ච වො සුනඛො කිස්ස හෙතු, උච්චාවචං වණ්ණනිභං විකුබ්බති අක්ඛාථ නො බ්රාහ්මණා කෙනු තුම්හෙ.
4029. චන්දො ච සුරියො ච උභො ඉධාගතා අයං පන මාතලි දෙවසාරථි, සක්කොහමස්මි තිදසානමින්දො එසො ච ඛො පඤ්චසිඛොති වුච්චති.
4030. පාණිස්සරා මුතිඞ්ගා ච මුරජාළම්බරානි ච, සුත්තමෙනං පබොධෙන්ති පටිබුද්ධො ච නන්දති.
4031. යෙ කෙචිමෙ මච්ඡරිනො කදරියා පරිභාසකා සමණබ්රාහ්මණානං, ඉධෙව නික්ඛිප්ප සරීරදෙහං කායස්ස භෙදා නිරයං වජන්ති.
4032. යෙ කෙචිමෙ සුග්ගතිමාසසානා ධම්මෙ ඨිතා සංයමෙ සංවිභාගෙ, ඉධෙව නික්ඛිප්ප සරීරදෙහං කායස්ස භෙදා සුගතිං වජන්ති.
4033. ත්වං නො ඤාති පුරිමාසු ජාතිසු සො මච්ඡරී රොසකො පාපධම්මො, තවෙව අත්ථාය ඉධාගතම්භා මා පාපධම්මො නිරයං අපත්ථ.
4034. අද්ධා හි මං වො හිතකාමා යං මං සමනුසාසථ, සොහං තථා කරිස්සාමි සබ්බං වුත්තං හිතෙසිහි.
4035. එසාහමජ්ජෙව උපාරමාමි න චාපහං කිඤ්චි කරෙය්ය පාපං, න චාපි මෙ කිඤ්චි අදෙය්යමත්ථි න චාපි දත්වා උදකම්පහං පිබෙ.
4036. එවඤ්ච මෙ දදතො සබ්බකාලං භොගා ඉමෙ වාසව ඛීයිස්සන්ති, තතො අහං පබ්බජිස්සාමි සක්ක හිත්වාන කාමානි යථොධිකානීති.
4037. නගුත්තමෙ ගිරිවරෙ ගන්ධමාදනෙ මොදන්ති තා දෙවවරාභිපාලිතා, අථාගමා ඉසිවරො සබ්බලොකගූ සුපුප්ඵිතං දූමවරසාඛමාදිය.
4038. සුචිං සුගන්ධං තිදසෙහි සක්කතං පුප්ඵුත්තමං අමරවරෙහි සෙවිතං, අලද්ධ මච්චෙහි වා දානවෙහි වා අඤ්ඤත්ර දෙවෙහි තදාරහං හිදං.
4039. තතො චතස්සො කනකත්තචූපමා උට්ඨාය නාරීයො පමදාධිපා මුනිං, ආසා ච සද්ධා ච තතො සිරී හිරි ඉච්චබ්රවුං නාරද දෙවබ්රාහ්මණං.
4040. සචෙ අනුද්දිට්ඨං තයා මහාමුනි පුප්ඵං ඉමං පාරිඡත්තස්ස බ්රහ්මෙ, දදාහි නො සබ්බගති තෙ ඉජ්ඣතු ත්වම්පි නො හොහි යථෙව වාසවො.
4041. තං යාචමානාභිසමෙක්ඛ නාරදො ඉච්චබ්රවී සඞ්කලහං උදීරයි, න මය්හමත්ථත්ථි ඉමෙහි කොචිනං යා යෙව වො සෙය්යසී සා පිළය්හථ{1}.
4042. ත්වං නොත්තමොවාභිසමෙක්ඛ නාරද, යස්සිච්ඡසි තස්සං අනුප්පචෙච්ඡසු, යස්සා හි නො නාරද ත්වං පදස්සසි සා යෙව නො හොහිති සෙට්ඨසම්මතා.
4043. අකල්ලමෙතං වචනං සුගත්තෙ කො බ්රාහ්මණො කො කලහං උදීරයෙ, ගන්ත්වාන භූතාධිපමෙව පුච්ඡථ සචෙ න ජානාථ ඉධුත්තමාධමං.
4044. තා නාරදෙන පරමප්පකොපිතා උදීරිතා වණ්ණමදෙන මත්තා, සකාසෙ{2} ගන්ත්වාන සහස්සචක්ඛුනො පුච්ඡිංසු භූතාධිපං කානු සෙය්යසී.
4045. තා දිස්වා ආයත්තමනා පුරින්දදො ඉච්චබ්රවී දෙවවරො කතඤ්ජලී, සබ්බාව වො හොථ සුගත්තෙ සාදිසී කො නෙව භද්දෙ කලහං උදීරයි.
4046. යො සබ්බලොකං චරකො මහාමුනි ධම්මෙ ඨිතො නාරදො සච්චනික්කමො, සො නො බ්රවී ගිරිවරෙ ගන්ධමාදනෙ ගන්ත්වාන භූතාධිපමෙව පුච්ඡථ සචෙ න ජානාථ ඉධුත්තමාධමං.
4047. අසු බ්රහාරඤ්ඤචරො මහාමුනී නාදත්වා භත්තං වරගත්තෙ භුඤ්ජති, විචෙය්ය දානානි දදාති කොසියො යස්සා හි සො දස්සති සාව සෙය්යසී.
4048. අසූහි යො සම්මති දක්ඛිණං දිසං ගඞ්ගාය තීරෙ හිමවන්තපස්මනී, ස කොසියො දුල්ලභපානභොජනො තස්ස සුධං පාපය දෙවසාරථි.
4049. ස මාතලී දෙවවරෙන පෙසිතො සහස්සයුත්තං අභිරුය්හ සන්දනං, ස ඛිප්පමෙව උපගම්ම අස්සමං අදිස්සමානො මුනිනො සුධං අදා{1}.
4050. උදග්ගිහුත්තං උපතිට්ඨාතො හි මෙ පභඞ්කරං ලොකතමොනුදුත්තමං, සබ්බානි භූතානි අතිච්ච වාසවො කො නෙව මෙ පාණිසු කිං සුධොදහි.
4051. සංඛූපමං සෙතමතුල්යදස්සනං සුචිං සුගන්ධං පියරූපමබ්භුතං, අදිට්ඨපුබ්බං මම ජාත{2}චක්ඛුහි කා දෙවතා පාණිසු කිං සුධොදහි.
4052. අහං මහින්දෙන මහෙසි පෙසිතො සුධාභිහාසිං තුරිතො මහාමුනි, ජානාසි මං මාතලි දෙව සාරථි භුඤ්ජස්සු භත්තුත්තමං මා විචාරයි{3}.
4053. භුත්තා ච සා ද්වාදස හන්ති පාපකෙ ඛුදං පිපාසං අරතිං දරක්ලමං{4}, කොධූපනාහඤ්ච විවාදපෙසුනං සීතුණ්හතන්දිඤ්ච රසුත්තමං ඉදං.
4054. න කප්පති මාතලි මය්හ භුඤ්ජිතුං පුබ්බෙ අදත්වා ඉති මෙ වතුත්තමං, න චාපි එකාසනමරියපූජිතං අසංවිභාගී ච සුඛං න වින්දති.
4055. ථිඝාතකා යෙචිමෙ පාරදාරිකා මිත්තද්දුනො යෙච සපන්ති සුබ්බතෙ, සබ්බෙව තෙ මච්ඡරීපඤ්චමාධමා තස්මා අදත්වා උදකම්පි නාස්මියෙ.
4056. යො හිත්ථියා චා පුරිසස්ස වා පන දස්සාමි දානං විදුසම්පවණ්ණිතං, සද්ධා වදඤ්ඤූ ඉධ වීතමච්ඡරා භවන්ති හෙතෙ සුචිසම්මසම්මතා{1}.
4057. අතො මුතා{2} දෙවවරෙන පෙසිතා කඤ්ඤා චතස්සො කනකත්තචූපමා, ආසා ච සද්ධා ච සිරී තතො භිරි තං අස්සමං ආගමුං යත්ථ කොසියො.
4058. තා දිස්වා සබ්බො පරමප්පමොදිතො සුභෙන වණ්ණෙන සිඛාරිවග්ගිනො, කඤ්ඤා චතස්සො චතුරො චතුද්දිසා ඉච්චබ්රවී මාතලිනො ච සම්මුඛා.
4059. පුරිමං දිසං කා ත්වං පභාසි දෙවතෙ අලඞ්කතා තාරවරාව ඔසධී, පුච්ඡාමි තං කඤ්චනවෙල්ලිවිග්ගහෙ ආචික්ඛ මෙ ත්වං කතමාසි දෙවතා{3}.
4060. සිරාහං දෙවී{4} මනුජෙසු පූජිතා අපාපසත්තූපනිසෙවිනී සදා, සුධාවිවාදෙන තවන්තිමාගතා තං මං සුධාය වරපඤ්ඤ භාජය.
4061. යස්සාහමිච්ඡාමි සුධං මහාමුනි ස{5} සබ්බකාමෙහි නාරො පමොදති, සිරීති{6} මං ජානහි ජූහතුත්තම තං මං සුධාය වරපඤ්ඤ භාජය.
4062. සිප්පෙන විජ්ජාචරණෙන බුද්ධියා නරා උපෙතා පගුණා සකම්මුනා, තයා විහීනා න ලභන්ති කිඤ්චනං තයිදං න සාධු යදිදං තයා කතං.
4063. පස්සාමි පොසං අලසං මහග්ඝසං සුදුක්කුලීනම්පි අරූපිමං නරං, තයානුගුත්තො සිරි ජාතිමං අපි පෙසෙති දාසං විය භොගවා සුඛී.
4064. තං තං අසච්චං අවිභජ්ජසෙවිනිං ජානාමි මූළ්හං විදුරානුපාතිනිං, න තාදිසී අරහති ආසනූදකං කුතො සුධා ගච්ඡ න මය්හ රුච්චසි.
4065. කා සුක්කදාඨා පටිමුත්ත{1}කුණ්ඩලා චිත්තඞ්ගදා කම්බුවිමට්ඨධාරිනී, ඔසිත්තවණ්ණං පරිදය්හ සොභසි කුසග්ගිරත්තං අපිළය්හ මචජරිං.
4066. මිගීව භන්තා සරචාපධාරිනා විරදිතා මන්දමිව උදික්ඛසි, කො තෙ දුතියො ඉධ මන්දලොචනෙ න භායසි එකිකා කානනෙ වනෙ.
4067. න මෙ දුතියො ඉධමත්ථි කොසිය මසක්කසාරප්පභවම්භි දෙවතා, ආසා සූධාසාය තවන්තිමාගතා තං මං සුධාය වරපඤ්ඤ භාජය.
4068. ආසාය යන්ති වාණිජා ධනෙසිනො නාවං සමාරුය්හ පරෙන්ති අණ්ණවෙ, තෙ තත්ථ සීදන්ති අථොපි එකදා ජීනාධනා එන්ති විනට්ඨපාභතා.
4069. ආසාය ඛෙත්තානි කසන්ති කස්සකා වපන්ති බීජානි කරොන්තුපායසො, ඊතීනිපාතෙන අවුට්ඨිතාය වා න කිඤ්චි වින්දන්ති තතො ඵලාගමං.
4070. අථත්තකාරානි කරොන්ති භත්තුසු ආසං පුරක්ඛත්වා නරා සුඛෙසිනො, තෙ භත්තුරත්ථා අතිගාළ්භිතා පුන දිසා පනස්සන්ති අලද්ධ කිඤ්චනං.
4071. ජහිත්ව{1} ධඤ්ඤඤ්ච ධනඤ්ච ඤාතකෙ ආසාය සග්ගාධිමනා සුඛෙසිනො, තපන්ති ලූඛම්පි තපං චිරන්තරං කුම්මග්ග{2}මාරුය්හ පරෙන්ති දුග්ගතිං.
4072. ආසා විසංවාදිකසම්මතා{3} ඉමෙ අසෙ සුධාසං{4} විනයස්සු අත්තනි, න තාදිසී අරහති ආසනූදකං{5} කුතො සුධා ගච්ඡ න මය්හ රුච්චසි.
4073. දද්දල්ලමානා යසසා යසස්සිනී ඡිඝඤ්ඤ{6}නාමව්හයනං දිසං පති, පුච්ඡාමි තං කඤ්චනවෙල්ලිවිග්ගහෙ ආචික්ඛ මෙ ත්වං කතමාසි දෙවතා{7}
4074. සද්ධාහං දෙවී{8} මනුජෙසු පූජිතා අපාපසත්තූපනිසෙවිනී සදා, සුධාවිවාදෙන තවන්තිමාගතා තං මං සුධාය වරපඤ්ඤ භාජය.