3687. න මෙ අකාසි වචනං අත්ථකාමාය පුත්තිකෙ, සාජ්ජ ලොහිතසඤ්ඡන්නා ගඤ්ඡිසි{7} යමසාධනං.
3688. එවමාපජ්ජතී පොසො පාපියඤ්ච නිගච්ඡති, යො වෙ හිතානං වචනං න කරං අත්ථදස්සිනං.
3689. සචෙ ත්වං අම්ම ධාරෙසි{8} කුමාරං චාරුදස්සනං, කුසෙන ජාතං ඛත්තියං සුවණ්ණමණිමෙඛලං පූජිතං ඤාතිසඞ්ඝෙහි න ගඤ්ඡිසි යමක්ඛයං.
3690. යත්ථස්සු භෙරී නදති කුඤ්ජරො පටිකුජ්ජති,{9} ඛත්තියානං කුලෙ භද්දෙ කින්නු සුඛතරං තතො.
3691. අස්සො හසිසති ද්වාරෙ කුමාරො උපරොදති, ඛත්තියානං කුලෙ භද්දෙ කින්නු සුඛතරං තතො.
3692. මයූරකොඤ්චාහිරුදෙ කොකිලාභිනිකූජිතෙ, ඛත්තියානං කුලෙ භද්දෙ කින්නු සුඛතරං තතො.
3693. කහං නුඛො සත්තුමද්දනො පරරට්ඨප්පමද්දනො, කුසො සොළාරපඤ්ඤාණො සො නො දුක්ඛා පමොචයෙ.
3694. ඉධෙව සො සත්තුමද්දනො{1} පරරට්ඨප්පමද්දනො, කුසො සොළාරපඤ්ඤාණො යො නො දුක්ඛා{2} පමොචයෙ.
3695. උම්මත්තිකා නු භණසි ආදු බාලාව{3} භාසසි, කුසො චෙ ආගතො අස්ස කිං න ජානෙමු තං මයං.
3696. එසො ආළාරිකො පොසො කුමාරීපුරමන්තරෙ, දළ්හං කත්වාන සංවෙල්ලිං{4} කුම්භිං ධොවති ඔනතො
3697. වෙණි ත්වමසි චණ්ඩාලී ආදූසි කුලගන්ධිනී, කථං මද්දකුලෙ ජාතා දාසං කයිරාසි කාමුකං.
3698. නම්හි වෙණි න වණ්ඩාලි න චම්හි කුලගන්ධිනී, ඔක්කාකපුත්තො භද්දන්තෙ ත්වන්නු දාසොති මඤ්ඤසි.
3699. යො බ්රාහ්මණසහස්සානි සදා භොජෙති වීසතිං, ඔක්කාකපුත්තො භද්දන්තෙ ත්වන්නු දාසොති මඤ්ඤසි.
3700. යස්ස නාගසහස්සානි සදා භොජෙන්ති වීසතිං, ඔක්කාකපුත්තො භද්දන්තෙ ත්වන්නු දාසොති මඤ්ඤසි.
3701. යස්ස අස්සසහස්සානි සදා භොජෙන්ති වීසතිං, ඔක්කාකපුත්තො භද්දන්තෙ ත්වන්නු දාසොති මඤ්ඤසි.
3702. යස්ස රථසහස්සානි සදා යොජෙන්ති වීසතිං, ඔක්කාකපුත්තො භද්දන්තෙ ත්වන්නු දාසොති මඤ්ඤසි.
3703. යස්ස උසභසසහස්සානි සදා යොජෙන්ති වීසතිං, ඔක්කාකපුත්තො භද්දන්තෙ ත්වන්නු දාසොති මඤ්ඤසි.
3704. යස්ස ධෙනුසහස්සානි සදා දුය්හන්ති{1} වීසතිං, ඔක්කාකපුත්තො භද්දන්තෙ ත්වන්නු දාසොති මඤ්ඤසි.
3705. තග්ඝ තෙ දුක්කටං බාලෙ යං ඛත්තියං මහබ්බලං, නාගං මණ්ඩුකවණ්ණෙන න තං අක්ඛාසි ආගතං.{2}
3706. අපරාධං මහාරාජ ත්වං නො ඛම රථෙසභ, යං තං අඤ්ඤාතවෙසෙන නඤ්ඤාසිම්භා ඉධාගතං.
3707. මාදිසස්ස න තං ඡන්නං යොහං අළාරිකො භවෙ, ත්වඤ්ඤෙව මෙ පසීදස්සු නත්ථි තෙ දෙව දුක්කටං.
3708. ගච්ඡ බලෙ ඛමාපෙහි කුසරාජං මහබ්බලං, ඛමාපිතො කුසරාජා සො තෙ දස්සති ජීවිතං.
3709. පිතුස්ස වචනං සුත්වා දෙවවණ්ණී පභාවතී, සිරසා අග්ගහී පාදෙ කුසරාජං මහබ්බලං.
3710. යා ඉමා රත්යො අතික්කන්තා තා ඉමා දෙව තයා විනා. වන්දෙ තෙ සිරසා පාදෙ මා මෙ කුජ්ඣ රථෙසභ.
3711. සච්චං තෙ{3} පටිජානාමි මහාරාජ සුණොහි මෙ, න චාපි අප්පියං{4} තුය්හං කරෙය්යාමි අහං පුන.
3712. එවඤ්චෙ යාචමානාය වචනං මෙ න කාහසි, ඉදානි මං තාතො හන්ත්වා ඛත්තියානං පදස්සති.
3713. එවන්තෙ යාචමානාය කිං න කාහාමි තෙ වචො, විකුද්ධො ත්යස්මි කල්යාණි මා ත්වං භායි පභාවති.
3714. සච්චන්තෙ පටිජානාමි රාජපුත්ති සුණොහි මෙ, න චාපි අප්පියං තුය්හං කරෙය්යාමි අහං පුන.
3715. තච කාමා හි සුස්සොණි බහුං දුක්ඛං තිතික්ඛිසං, පහු මද්දකුලං ගන්ත්වා නයිතුං තං පභාවති.
3716. යොජයන්තු රථෙ අස්සෙ නානාචිත්තෙ සමාහිතෙ, අථ දක්ඛථ මෙ වෙගං විධමෙන්තස්ස සත්තවො.
3717. තඤ්ච තත්ථ උදික්ඛිංසු රඤ්ඤො මද්දස්ස ථිපුරෙ,{1} විජම්භමානං සීහංව පොථෙන්තං දිගුණං භුජං.
3718. හත්ථක්ඛන්ධඤ්ච ආරුය්හ ආරොපෙත්වා පභාවතිං, සඞ්ගාමං ඔතරිත්වාන සීහනාදං නදී කුසො.
3719. තස්ස තං නදතො සුත්වා සීහස්සෙවිතරෙ මිගා, ඛත්තියා විපලායිංසු කුසද්දසභයට්ටිතා.
3720. හත්ථාරොහා අනීකට්ඨා රථිකා පත්තිකාරකා, අඤ්ඤමඤ්ඤස්ස ඡින්දන්ති කුසසද්දභයට්ටිතා.
3721. තස්මිං සඞ්ඝාමසීසස්මිං පස්සිත්වා තුට්ඨමානසො,{2} කුසස්ස රඤ්ඤො දෙවින්දො අදා වෙරොචනං මණි.
3722. සො තං විජිත්වා සඞ්ගාමං ලද්ධා වෙරොචනං මණිං, හත්ථික්ඛන්ධගතො රාජා පාවෙක්ඛි නගරං පුරං.
3723. ජීවගාහං{3} ගහෙත්වාන බන්ධිත්වා සත්ත ඛත්තියෙ, සසුරස්සුපනාමෙසි ඉමෙ තෙ දෙව සත්තවො.
3724. සබ්බෙව තෙ වසඞ්ගතා අමිත්තා විහතා තව, කාමං කරොහි තෙ තයා මුඤ්ච වා තෙ හනස්සු වා.
3725. තුම්හෙව{1} සත්තවො එතෙ නහි තෙ මය්හ සත්තවො, ත්වඤ්ඤෙව නො මහාරාජ මුඤ්ච වා තෙ හනස්සු වා.
3726. ඉමා තෙ ධීතරො සත්ත දෙවකඤ්ඤූපමා සුභා, දදාහි නෙසං එකෙකං හොන්තු ජාමාතරො තව.
3727. අම්හාකඤ්චෙව තාසඤ්ච ත්වං නො සබ්බෙසමිස්සරො, ත්වඤ්ඤෙව නො මහාරාජ දෙහි නෙසං යදිච්ඡසි.
3728. එකමෙකස්ස එකෙකං අදා සීහස්සරො කුසො, ඛත්තියානං තදා නෙසං රඤ්ඤො මද්දස්ස ධීතරො.
3729. පීණිතා{2} තෙන ලාභෙන තුට්ඨා සීහස්සරෙ කුසෙ, සකරට්ඨානි පායිංසු ඛත්තියා සත්ත තාවදෙ.
3730. පභාවතිඤ්ච ආදාය මණිං වෙරොචනං සුභං, කුසාවතිං කුසො රාජා අගමාසි මහබ්බලො.
3731. ත්යස්සු එකරථෙ යන්තා පවිසන්තා කුසාවතිං, සමානා වණ්ණරූපෙන නාඤ්ඤමඤ්ඤමතිරොචයුං.{3}
3732. මාතා පුත්තෙන සඞ්ගඤ්ඡි උභයො ච ජයම්පතී, සමග්ගා තෙ තදා ආසුං ඵීතං ධරණිමාවසුන්ති.
කුසජාතකං.
2. සොණනන්දජාතකං.
3733. දෙවතානුසි ගන්ධබ්බො ආදු සක්කො පුරින්දදො, මනුස්සභූතො ඉද්ධිමා කථං ජානෙමු තං මයං.
3734. නම්හි දෙවො න ගන්ධබ්බො නම්හි සක්කො පුරින්දදො, මනුස්සභූතො ඉද්ධිමා එවං ජානාහි භාරත.{1}
3735. කතරූපමිදං භොතා{2} වෙය්යාවච්චං අනප්පකං, දෙවම්භි වස්සමානම්හි අනොවස්සං භවං අකා.
3736. තතො වාතාතපෙ ඝොරෙ සීතච්ඡායං භවං අකා, තතො අමිත්තමජ්ඣෙ{3} ච සරතාණං භවං අකා.
3737. තතො ඵීතානි රට්ඨානි වසිනො තෙ භවං අකා, තතො එකසතං ඛත්යෙ අනුයන්තෙ භවං අකා.
3738. පතීතාස්සු{4} මයං භොතො වර තං භඤ්ඤමිච්ඡසි,{5} හත්ථියානං අස්සරථං නාරියො ච අලඞ්කතා නිවෙසනානි රම්මානි මයං භොතො දදාමසෙ.
3739. අථ වා අඞ්ගෙ වා මගධෙ{6} මයං භොතො දදාමසෙ, අථ වා අස්සකාවන්තිං සුමනා දම්ම තෙ මයං
3740. උපඩ්ඪං වාපි රජ්ජස්ස මයං භොතො දදාමසෙ, සචෙ තෙ අත්ථො රජ්ජෙන අනුසාස යදිච්ඡසි.
3741. න මෙ අත්ථොපි රජ්ජෙන නගරෙන ධනෙන වා, අථොපි ජනපදෙන අත්ථො මය්හං න විජ්ජති.
3742. භොතොව රට්ඨෙ විජිතෙ අරඤ්ඤෙ අත්ථි අස්සමො, පිතා මය්හං ජනෙත්තී ච උභො සම්මන්ති අස්සමෙ.
3743. තෙසාහං පුබ්බාචරියෙසු පුඤ්ඤං න ලභාමි{7} කාතවෙ, භවන්තං අජ්ඣාචරං කත්වා සොණං යාචාමු{8} සංවරං.
3744. කරොමි තෙ තං වචනං යං මං භණසි බ්රාහ්මණ, එතඤ්ච ඛො නො අක්ඛාහි කීවන්තො හොන්තු යාචකා.
3745. පරොසතං ජානපදා{1} මහාසාලා ච බ්රාහ්මණා ඉමෙ ච ඛත්තියා සබ්බෙ අභිජාතා යසස්සිනො භවඤ්ච රාජා මනොජො අලං හෙස්සන්ති යාචකා.
3746. හත්ථි අස්සෙ ච යොජෙන්තු රථං සන්තය්හ සාරථි, ආබන්ධනානි ගණ්හථ පාදෙසුස්සාරයං ධජෙ අස්සමං තං ගමිස්සාමි යත්ථ සම්මති කොසියො.
3747. තතො ච රාජා පායාසි සෙනාය චතුරඞ්ගිනී, අගමාසි{2} අස්සමං රම්මං යත්ථ සම්මති කොසියො.
3748. කස්ස කාදම්බයො{3} කාජො වෙහාසං චතුරඞ්ගුලං, අංසං අසම්ඵුසං එති උදහාරස්ස ගච්ඡතො.
3749. අහං සොණො මහාරාජ, තාපසො සහිතබ්බතො, භරාමි මාතාපිතරො රත්තින්දිවමතන්දිතො.
3750. වනෙ ඵලඤ්ච මූලඤ්ච ආහරිත්වා දිසම්පති, පොසෙමි මාතාපිතරො පුබ්බෙකතමනුස්සරං.
3751. ඉච්ඡාමි අස්සමං ගන්තුං යත්ථ සම්මති කොසියො, මග්ගං නො සොණ අක්ඛාහි යෙන ගච්ඡෙමු අස්සමං.
3752. අයං එකපදී රාජ යෙනෙතං මෙඝසන්නිහං. කොවිළාරෙහි සඤ්ඡන්නං එත්ථ සම්මති කොසියො.
3753. ඉදං වත්වාන පක්කාමි තරමානො මහාඉසි, වෙහාසෙ අන්තලික්ඛස්මිං අනුසාසිත්වාන ඛත්තියෙ.
3754. අස්සමං පරිමජ්ජිත්වා පඤ්ඤාපෙත්වාන ආසනං, පණ්ණසාලං පවිසිත්වා පිතරං පටිබොධයි.
3755. ඉමෙ ආයන්ති රාජානො අභිජාතා යසස්සිනො, අස්සමා නික්ඛමිත්වාන නිසීදාහි{1} මහාඉසි.
3756. තස්ස තං වචනං සුත්වා තරමානො මහාඉසි, අස්සමා නික්ඛමිත්වාන පද්වාරම්භි උපාවිසි.
3757. තඤ්ච දිස්වාන ආයන්තං ජලන්තරිව තෙජසා, ඛත්ත{2} සඞ්ඝපරිබ්බූළ්හං කොසියො එතදබ්රවි.
3758. කස්ස භෙරී මුදිඞ්ගා ච සඞ්ඛා පණවදෙණ්ඩිමා,{3} පුරතො පටිපන්නානි හාසයන්තා රථෙසභං.
3759. කස්ස කඤ්චනපට්ටෙන පුථුනා විජ්ජුවණ්ණිනා, යුවා කලාපසන්නද්ධො කො එති සිරියා ජලං.
3760. උක්කා මුඛෙ{4} පහට්ඨංව ඛදිරඞ්ගාරසන්නිභං, මුඛඤ්ච රුචිරං භාති කො එති සිරියා ජලං.
3761. තස්ස පග්ගහිතං ඡත්තං සසලාකං මනොරමං, ආදිච්චරංසාවරණං{5} කො එති සිරියා ජලං.
3762. කස්ස අඞ්ගං පරිග්ගය්හ වාලවීජනිමුත්තමා, චරන්ති වරපඤ්ඤස්ස{6} හත්ථික්ඛන්ධෙන ආයතො.
3763. කස්ස සෙතානි ඡත්තානි ආජානීයා ච වම්මිතා,{7} සමන්තා පරිකීරන්ති කො එති සිරියා ජලං.
3764. කස්ස එකසතං ඛත්යා අනුයන්තා යසස්සිනො, සමන්තා අනුපරියන්ති කො එති සිරියා ජලං.
3765. හත්ථි අස්සා රථා පත්ති සෙනාය චතුරඞ්ගිනී, සමන්තා අනුපරියන්ති කො එති සිරියා ජලං.
3766. කස්සෙසා මහතී සෙනා පිට්ඨිතො අනුවතත්තී, අක්ඛොභනී අපරියන්තා සාගරස්සෙව ඌමියො.
3767. රාජාභිරාජා මනොජො ඉන්දෙව ජයතං පති, නන්දස්සජ්ඣාවරං එති අස්සමං බ්රහ්මචාරිනං
3768. තස්සෙසා මහතී සෙනා පිට්ඨිතො අනුවත්තතී, අක්ඛොභනී අපරියන්තා සාගරස්සෙව ඌමියො.
3769. අනුලිත්තා චන්දනෙන කාසිකුත්තමධාරිනො, සබ්බෙ පඤ්ජලිකා හුත්වා ඉසිනං අජ්ඣුපාගමුං.
3770. කච්චි නු භොතො කුසලං කච්චි භොතො අනාමයං, කච්චි උඤ්ඡෙන යාපෙථ කච්චි මූලඵලා බහූ.
3771. කච්චි ඩංසා ච මකසා අප්පමෙව සිරිංසපා, වනෙ වාලමිගාකිණ්ණෙ කච්චි හිංසා න විජ්ජති.
3772. කුසලඤ්චෙව නො රාජ අථො රාජ අනාමයං, අථො උඤ්ඡෙන යාපෙම අථො මූලඵලා බහූ.
3773. අථො ඩංසා ච මකසා අප්පමෙව සිරිංසපා,{1} වනෙ වාලමිගාකිණ්ණෙ හිංසා අම්හං{2} න විජ්ජති.
3774. බහූනි වස්සපූගානි අස්සමෙ වසතො{3} ඉධ. නාභිජානාමි උප්පන්නං ආබාධං අමනොරමං.
3775. ස්වාගතන්තෙ මහාරාජ අථො තෙ අදුරාගතං, ඉස්සරොසි අනුප්පත්තො යං ඉධත්ථි පවෙදය.{4}
3776. තින්දුකානි{5} පියාලානි මධුකෙ කාස{6} මාරියො, ඵලානි ඛුද්දකප්පානි භුඤ්ජ රාජ වරං වරං.
3777. ඉදම්පි පානීයං සීතං ආභතං ගිරිගබ්භරා, තතො පිව මහාරාජ සචෙ ත්වං අභිකඞ්ඛසි.
3778. පටිග්ගහීතං යං දින්නං සබ්බස්ස අග්ඝියං කතං, නන්දස්සාපි නිසාමෙථ වචනං යං{7} පවක්ඛති.
3779. අජ්ඣවරම්භා නන්දස්ස භොතො සන්තිකමාගතා, සුණාතු මෙ භවං වචනං නන්දස්ස පරිසාය ච.
3780. පරොසතං ජානපදා මහාසාලා ච බ්රාහ්මණා, ඉමෙ ච ඛත්තියා සබ්බෙ අභිජාතා යසස්සිනො භවඤ්ච රාජා මනොජො අනුමඤ්ඤන්තු මෙ වචො.
3781. යෙ වසන්ති සමීතාරො යක්ඛානි ඉධ අස්සමෙ, අරඤ්ඤෙ භූතභව්යානි සුණන්තු වචනං මම.
3782. නමො කත්වාන භූතානං ඉසිං වක්ඛාමි සුබ්බතං, සො ත්යාහං දක්ඛිණො{1} බාහු තව කොසිය සම්මතො.
3783. පිතරං මෙ ජනෙත්තිඤ්ච භත්තුකාමස්ස මෙ සතො, වීර පුඤ්ඤමිදං ඨානං මා මං කොසිය වාරය.
3784. සබ්භිහෙතං උපඤ්ඤාතං මමෙතං උපනිස්සජ, උට්ඨානපාරිචරියාය දීඝරත්තං තයා කතං. මාතාපිතුසු පුඤ්ඤානි මම ලොකදදො භව.