3403. තුවඤ්හි මාතා ච පිතා ච මය්හං භත්තා පතී පොසකො දෙවතා ච, දාසො අහං තුය්හ සපුත්තදාරො යථා සුඛං සිබ්බ කරොහි කාමං.
3404. යො ඉස්සරොම්භීති කාරොති පාපං. කත්වා ච සො නුත්තපතෙ{1} පරෙසං, න තෙන සො ජීවති දීඝමායුං දෙවාපි පාපෙන සමෙක්ඛරෙ නං.
3405. අඤ්ඤාතකං සාමිකෙහී පදින්නං ධම්මෙ ඨිතා යෙ පටිච්ඡන්ති දානං, පටිච්ඡකා දායකා චාපි තත්ථ සුඛප්පඵලඤ්ඤෙව කරොන්ති කම්මං.
3406. අඤ්ඤො නු තෙ කොචි නරො පඨබ්යා සද්දහෙය්ය{2} ලොකස්මිං න මෙ පියාති, භුසො ච ත්යස්ස මනසො විඝාතො දත්වා පියං උම්මදන්තිං අදිට්ඨා.{3}
3407. අද්ධා පියා මය්හ ජනින්ද එසා න සා මම{4} අප්පියා භූමිපාල, යන්තෙ මයා උම්මදන්තී පදින්නා භුසෙහි රාජා වනථං සජාහි.
3408. යො අත්තදුක්ඛෙන පරස්ස දුක්ඛං සුඛෙන වා අත්තසුඛං දහාති, යථෙවිදං මය්හ තථා පරෙසං යො එවං ජානාති සවෙදි ධම්මං.
3409. අඤ්ඤො නු තෙ කොචි නරො පඨබ්යා සද්දහෙය්ය ලොකස්මිං න මෙ පියාති, භුසො ච ත්යස්ස මනසො විඝාතො දත්වා පියං උම්මදන්තිං අදිට්ඨා.
3410. ජනින්ද ජානාසි පියා මමෙසා න සා මමං අප්පියා භූමිපාල, පියෙන තෙ දම්මි පියං ජනින්ද පියදායිනො දෙව පියං ලභන්ති.
3411. සො නූනාහං වධිස්සාමි අත්තානං කාමහෙතුකං, නහි ධම්මං අධම්මෙන අහං විධිතුමුස්සහෙ.
3412. සචෙ තුවං මය්හ සතිං ජනින්ද න කාමයාසි නරවීරසෙට්ඨ, චජාමි නං සබ්බජනස්ස සිබ්බ මයා පමුතතං තතො අව්හයෙසි නං.
3413. අදූසියං චෙ අහිපාරක ත්වං චජාසි කත්තෙ අහිතාය ත්යස්ස, මහා{1} ච තෙ උපවාදොපි අස්ස න චාපි ත්යස්ස නගරම්හි පක්ඛො.
3414. අහං සභිස්සං උපවාදමෙතං නින්දං පසංසං ගරහඤ්ච සබ්බං, මමෙතමාගච්ඡතු භූමිපාල යථා සුඛං සිබ්බ{2} කරොහි කාමං.
3415. යො නෙව නින්දං න පුනප්පසංසං{3} ආදීයති ගරහං නොපි පූජං, සිරී ච ලක්ඛී ච අපෙති තම්හා ආපො සුවුට්ඨිව යථා ථලම්භා.
3416. යං කිඤ්චි දුක්ඛං ච සුඛඤ්ච එත්තො ධම්මාතිසාරඤ්ච මනොවිඝාතං, උරසා අහං පටිච්ඡිස්සාමි සබ්බං පඨවී යථා ථාවරානං තසානං.
3417. ධම්මාතිසාරඤ්ච මනොවිඝාතං දුක්ඛං ච නිච්ඡාමි අහං පරෙසං, එකොපිමං තාරයිස්සාමි භාරං ධම්මෙ ඨිතො කඤ්චි අහාපයන්තො.
3418. සග්ගූපගං පුඤ්ඤකම්මං ජනින්ද මා මෙ තුවං අන්තරායං අකාසි, දදාමි තෙ උම්මදන්තිං පසන්නො රාජාව යඤ්ඤං{1} ධනං බ්රාහ්මණානං.
3419. අද්ධා තුවං කතෙන හිතොසි මය්හං සඛා මම උම්මදන්තී තුවඤ්ච, නින්දෙය්යු දෙවා පිතරො ච සබ්බෙ පාපඤ්ච පස්සං අභිසම්පරායං.
3420. නහෙතං ධම්මං සිවිරාජ වජ්ජුං සනෙගමා ජානපදා ච සබ්බෙ, යන්තෙ මයා උම්මදන්තී පදින්නා භුසෙහි රාජා වනථං සජාහි.
3421. අද්ධා තුවං කත්තෙ හිතොසි මය්හං සඛා මම උම්මදන්තී තුවඤ්ච, සතඤ්ච ධම්මානි සුකිත්තිතානි සමුද්දවෙලාව දුරච්චයානි.
3422. ආහුනෙය්යො මෙසි හිතානුකම්පී ධාතා විධාතා චසි කාමපාලො, තයි හුතා දෙව මහප්ඵලා හි කාමෙන මෙ උම්මදන්තිං පටිච්ඡ.
3423. අද්ධා හි සබ්බං අහිපාරක ත්වං ධම්මං අචාරි මම කත්තුපුත්ත, අඤ්ඤො නු තෙ කො ඉධ සොත්ථිකත්තා දිපදො නරො අරුණෙ ජිවලොකෙ.
3424. තුවං නු සෙට්ඨො ත්වමනුත්තරොසි ත්වං ධම්මගුත්තො ධම්මවිදූ සුමෙධො, සො ධම්මගුත්තො චිරමෙව ජීව ධම්මඤ්ච මෙ දෙසය ධම්මපාල.
3425. තදිඞ්ඝ අහිපාරක සුණොහි වචනං මම, ධම්මන්තෙ දෙසයිස්සාමි සතං ආසෙවිතං අහං.
3426. සාධු ධම්මරුචී රාජා සාධු පඤ්ඤාණවා නරො, සාධු මිත්තානමද්දුබ්භො පාපස්සාකරණං සුඛං.
3427. අක්කොධනස්ස විජිතෙ ඨිතධම්මස්ස රාජිනො, සුඛං මනුස්සා ආසෙථ සීතච්ඡායාය සඞ්ඝරෙ.
3428. න චාහමෙතං අභිරොචයාමි කම්මං අසමෙක්ඛ කතං අසාධු, යෙවාපි ඤත්වාන සයං කරොන්ති උපමා ඉමා මය්හ තුවං සුණොහි.
3429. ගවඤ්චෙ තරමානානං ජිම්හං ගච්ඡති පුඞ්ගවො, සබ්බා තා ජිම්හං ගච්ඡන්ති නෙත්තෙ ජිම්හං ගතෙ සති.
3430. එවමෙව මනුස්සෙසු යො හොති සෙට්ඨසම්මතො, සො චෙ අධම්මං චරති පගෙව ඉතරා පජා සබ්බං රට්ඨං දුඛං සෙති රාජා චෙ හොති අධම්මිකො.
3431. ගවඤ්චෙ තරමානානං උජුං ගච්ඡති පුඞ්ගවො, සබ්බා තා උජුං ගච්ඡන්ති නෙත්තෙ උජුගතෙ සති.
3432. එවමෙව මනුස්සෙසු යො හොති සෙට්ඨසම්මතො, සො චෙපි ධම්මං චරති පගෙව ඉතරා පජා සබ්බං රට්ඨං සුඛං සෙති රාජා චෙ හොති ධම්මිකො.
3433. න චාපහං අධම්මෙන අමරත්තමහිපත්ථයෙ, ඉමං වා පඨවිං සබ්බං විජෙතුං අහිපාරක.
3434. යං හි කිඤ්චි මනුස්සෙසු රතනං ඉධ විජ්ජති, ගාවො දාසො හිරඤ්ඤඤ්ච වත්ථියං හරිචන්දනං.
3435. අස්සිත්ථියො ච රතනං මණිකඤ්ච යඤ්චාපි මෙ චන්දසුරියාභිපාලයන්ති, න තස්ස හෙතු විසමං චරෙය්ය මජ්ඣෙ සිවීනං උසභොස්මි ජාතො
3436. නෙතා පිතා උග්ගතො රට්ඨපාලො ධම්මං සිවීනං අපචායමානො, සො ධම්මමෙවානුවිචින්තයන්තො තස්මා සකෙ චිත්තචසෙ න වත්තෙ.
3437. අද්ධා තුවං මහාරාජ නිච්චං අබ්යසනං සිවං, කරිස්සසි චිරං රජ්ජං පඤ්ඤා හි තව තාදිසී.
3438. එතං තෙ අනුමොදාමි යං ධම්මං නප්පමජ්ජසි, ධම්මං පමජ්ජ ඛත්තියො ඨානා චවති ඉස්සරො.
3439. ධම්මං චර මහාරාජ මාතාපිතුසු ඛත්තිය, ඉධ ධම්මං චරිත්වාන රාජ සග්ගං ගමිස්සසි.
3440. ධම්මං චර මහාරාජ පුත්තදාරෙසු ඛත්තිය, ඉධ ධම්මං චරිත්වාන රාජ සග්ගං ගමිස්සසි.
3441. ධම්මං චර මහාරාජ මිත්තාමච්චෙසු ඛත්තිය, ඉධ ධම්මං චරිත්වාන රාජ සග්ගං ගමිස්සසි.
3442. ධම්මං චර මහාරාජ වාහනෙසු බලෙසු ච, ඉධ ධම්මං චරිත්වාන රාජ සග්ගං ගමිස්සසි.
3443. ධම්මං චර මහාරාජ ගාමෙසු නිගමෙසු ච, ඉධ ධම්මං චරිත්වාන රාජ සග්ගං ගමිස්සසි.
3444. ධම්මං චර මහාරාජ රට්ඨෙසු ජනපදෙසු ච, ඉධ ධම්මං චරිත්වාන රාජ සග්ගං ගමිස්සසි.
3445. ධම්මං චර මහාරාජ සමණබ්රාහ්මණෙසු ච, ඉධ ධම්මං චරිත්වාන රාජ සග්ගං ගමිස්සසි.
3446. ධම්මං චර මහාරාජ මිගපක්ඛීසු ඛත්තිය, ඉධ ධම්මං චරිත්වාන රාජ සග්ගං ගමිස්සසි.
3447. ධම්මං චර මහාරාජ ධම්මො චිණ්ණො සුඛාවහො, ඉධ ධම්මං චරිත්වාන රාජ සග්ගං ගමිස්සසි.
3448. ධම්මං චර මහාරාජ සඉන්දා දෙවා සබ්රහ්මකා, සුචිණ්ණෙන දිවං පත්තා මා ධම්මං රාජ පමාදොති.
උම්මාදන්තී ජාතකං.
3. මහාබොධිජාතකං.
3449. කින්නු දණ්ඩං කිමජිනං කිං ඡත්තං කිං උපාහනං, කිං අඞ්කුසඤ්ච පත්තඤ්ච සඞ්ඝාටිඤ්චාපි බ්රාහ්මණ තරමානරූපො ගණ්හාසි කන්නු පත්ථයසෙ දිසං.
3450. ද්වාදසෙතානි වස්සානි වුසිතානි තවන්තිකෙ, නාභිජානාමි සොණෙන පිඞ්ගලෙනාභිකුජ්ජිතං.
3451. ස්වායං දිත්තොව නදති සුක්කදාඨං විදංසයං, තව සුත්වා සභරියස්ස වීතසද්ධස්ස මං පති.
3452. අහු එස කතො දොසො යථා භාසසි බ්රාහ්මණ, එස භිය්යො පසීදාමි වස බ්රාහ්මණ මාගමා.
3453. සබ්බසෙතො පුරෙ ආසි තතොපි සබලො අහු, සබ්බලොහිතකොදානි කාලො පක්කමිතුං මම.
3454. අබ්භන්තරං පුරෙ ආසි තතො මජ්ඣෙ තතො බහි, පුරා නිද්ධමනා හොති සයමෙව වජාමහං.
3455. වීතසද්ධං න සෙවෙය්ය උදපානංව නොදකං, සචෙපි නං අනුඛණෙ වාරිකද්දමගන්ධිකං.
3456. පසන්නමෙව සෙවෙය්ය අප්පසන්නං විවජ්ජයෙ, පසන්නං පයිරුපාසෙය්ය රහදංවොදකත්ථිකො.
3457. භජෙ භජන්තං පුරිසං අභජන්තං න භජ්ජයෙ,{1} අසප්පුරිසධම්මො සො යො භජන්තං න භජ්ජති.{2}
3458. යො භජන්තං න භජති සෙවමානං න සෙවති, ස වෙ මනුස්සපාපිට්ඨො මිගො සාඛස්සිතො යථා.
3459. අච්චාභික්ඛණසංසග්ගා අසමොසරණෙන ච, එතෙන මිත්තා ජීරන්ති අකාලෙ යාචනාය ච.
3460. තස්මා නාභික්ඛණං ගච්ඡෙ න ච ගච්ඡෙ චිරාචිරං, කාලෙන යාචං යාචෙය්ය එවං මිත්තා න ජීයරෙ.
3461. අතිචිරං නිවාසෙන පියො භවති අප්පියො, ආමන්ත ඛො තං ගච්ඡාම පුරා තෙ හොම අප්පියා.
3462. එවං චෙ{3} යාචමානානං අඤ්ජලිං නාවඛුජ්ඣසි, පරිචාරකානං සත්තානං වචනං න කාරොසි නො එවං තං අභියාචාම පුන කයිරාසි පරියායං.
3463. එවං චෙ නො විහරතං අන්තරායො න හෙසස්ති, තුම්හං චාපි{4} මහාරාජ අම්හං{5} වා රට්ඨවඩ්ඪන අප්පෙවනාම පස්සෙම{6} අහොරත්තානමච්චයෙ.
3464. උදීරණා චෙ සඞ්ගත්යා භාවාය මනුවත්තති, අකාමා අකරණීයං වා කරණීයං වාපි කුබ්බති අකාමකරණීයස්මිං{1} ක්විධ පාපෙන ලිප්පති{2}.
3465. සො චෙ අත්ථො ච ධම්මො ච කල්යාණො න ච පාපකො, භොතො චෙ වචනං සච්චං සුහතො වානරො මයා.
3466. අත්තනො චෙ හි වාදස්ස අපරාධං විජානියා, න මං ත්වං ගරහෙය්යාසි භොතො වාදො හි තාදිසො.
3467. ඉස්සරො සබ්බලොකස්ස සචෙ කප්පෙති{3} ජීවිතං, ඉද්ධිබ්යසනභාවඤ්ච කම්මං කල්යාණපාපකං නිද්දෙසකාරී පුරිසො ඉස්සරො තෙන ලිප්පති.
3468. සො චෙ අත්ථො ච ධම්මො ච කල්යාණො න ච පාපකො, භොතො චෙ වචනං සච්චං සුහතො වානරො මයා.
3469. අත්තනො චෙ හි වාදස්ස අපරාධං විජානියා, න මං ත්වං ගරහෙය්යාසි භොතො වාදො හි තාදිසො.
3470. සචෙ පුබ්බෙකතහෙතු සුඛදුක්ඛං නිගච්ඡති, පොරාණකං කතං පාපං තමෙසො මුඤ්චතෙ ඉණං පොරාණකඉණමොක්ඛො ක්විධ පාපෙන ලිප්පති.
3471. සො චෙ අත්ථො ච ධම්මො ච කල්යාණො න ච පාපකො, භොතො චෙ වචනං සච්චං සුහතො වානරො මයා.
3472. අත්තනො චෙ හි වාදස්ස අපරාධං විජානියා, න මං ත්වං ගරහෙය්යාසි භොතො වාදො හි තාදිසො.
3473. චතුන්නංයෙවුපාදාය රූපං සම්භොති පාණිනං, යතො ච රූපං සම්භොති තත්ථෙව{1} අනුපගච්ඡති.
3474. ඉධෙව ජීවති ජීවො පෙච්ච පෙච්ච විනස්සති, උච්ඡිජ්ජති අයං ලොකො යෙ බාලා යෙ ච පණ්ඩිතා උච්ඡිජ්ජමානෙ ලොකස්මිං ක්විධ පාපෙන ලිප්පති.
3475. සො චෙ අත්ථො ච ධම්මො ච කල්යාණො න ච පාපකො, භොතො චෙ වචනං සච්චං සුහතො වානරො මයා.
3476. අත්තනො චෙ හි වාදස්ස අපරාධං විජානියා, න මං ත්වං ගරහෙය්යාසි භොතො වාදො හි තාදිසො.
3477. ආහු බත්තවිධා ලොකෙ බාලා පණ්ඩිතමානිනො, මාතරං පිතරං හඤ්ඤෙ අථො ජෙට්ඨම්පි භාතරං හනෙය්ය පුත්තදාරෙ ච අත්ථො චෙ තාදිසො සියා.
3478. යස්ස රුක්ඛස්ස ඡායාය නිසීදෙය්ය සයෙය්ය වා, න තස්ස සාඛං භඤ්ජෙය්ය මිත්තදුබ්භො හි පාපකො.
3479. අථ අත්ථො සමුප්පන්නෙ සමූලමපි අබ්බහෙ. අත්ථො මෙ සම්බලෙනාසි සුහතො වානරො මයා.
3480. සො චෙ අත්ථො ච ධම්මො ච කල්යාණො න ච පාපකො, භොතො චෙ වචනං සච්චං සුහතො වානරො මයා.
3481. අත්තනො චෙ හි වාදස්ස අපරාධං විජානියා, න මං ත්වං ගරහෙය්යාසි භොතො වාදො හි තාදිසො.
3482. අහෙතුවාදො පුරිසො යො ච ඉස්සරකුත්තිකො, පුබ්බෙකතී ච උච්ඡෙදී යො ච ඛත්තවිධො නරො
3483. එතෙ අසප්පුරිසා ලොකෙ බාලා පණ්ඩිතමානිනො, කරෙය්ය තාදිසො පාපං අථො අඤ්ඤම්පි කාරයෙ අසප්පුරිසසංසග්ගො දුක්කටො කටුකුද්රයො.
3484. උරබ්භරූපෙන බකාසු{1} පුබ්බෙ අසඞ්කිතො අජයූථං උපෙති, හන්ත්වා උරණිං අජියං{2} අජඤ්ච චිත්රාසයිත්වා යෙන කාමං පලෙති.
3485. තථා විධෙකෙ සමණබ්රාහ්මණාසෙ ඡදනං කත්වා වඤ්චයන්ති මනුස්සෙ, අනාසකා ථණ්ඩිලසෙය්යකා ච රජොජල්ලං උක්කුටිකප්පධානං පරියායභත්තඤ්ච අපාණකත්තං{3} පාපාචාරා අරහන්තො වදානා.
3486. එතෙ අසප්පුරිසා ලොකෙ බාලා පණ්ඩිතමානිනො, කරෙය්ය තාදිසො පාපං අථො අඤ්ඤෙපි කාරයෙ අසප්පුරිසසංසග්ගො දුක්කටො කටුකුද්රයො.
3487. යමාහු නත්ථි විරියන්ති හෙතුඤ්ච අපවදන්ති{4} යෙ, පරකාරං අත්තකාරඤ්ච යෙ තුච්ඡං සමවණ්ණයුං.
3488. එතෙ අසප්පුරිසා ලොකෙ බාලා පණ්ඩිතමානිනො, කරෙය්ය තාදිසො පාපං අථො අඤ්ඤෙපි කාරයෙ අසප්පුරිසසංසග්ගො දුක්කටො{5} කටුකුද්රයො.
3489. සචෙ හි විරියං නාස්ස කම්මං කල්යාණපාපකං, න භරෙ වඩ්ඪකිං{6} රාජා නපි යන්තානි{7} කාරයෙ.
3490. යස්මා ච විරියං අත්ථි කම්මං කල්යාණපාපකං, තස්මා යන්තානි කාරෙති රාජා භරති වඩ්ඪකිං.
3491. යදි වස්සසතං දෙවො න වස්සෙ න හිමං පතෙ, උච්ඡිජ්ජෙය්ය අයං ලොකො විනස්සෙය්ය අයං පජා.
3492. යස්මා ච වස්සති දෙවො හිමං චාපි{1} ඵුසීයති, තස්මා සස්සානි පච්චන්ති රට්ඨඤ්ච පල්ලතෙ චිරං.
3493. ගවඤ්චෙ තරමානානං ජිම්හං ගච්ඡති පුඞ්ගවො, සබ්බා තා ජිම්හං ගච්ඡන්ති නෙත්තෙ ජිම්හං ගතෙ සති.
3494. එවමෙව මනුස්සෙසු යො හොති සෙට්ඨසම්මතො, සො චෙ අධම්මං චරති පගෙව ඉතරා පජා සබ්බං රට්ඨං දුක්ඛං සෙති රාජා චෙ හොති අධම්මිකො.
3495. ගමඤ්චෙ තරමානානං උජුං ගච්ඡති පුඞ්ගවො, සබ්බා තා උජුං ගච්ඡන්ති නෙත්තෙ උජු{2}ගතෙ සති
3496. එවමෙව මනුස්සෙසු යො හොති සෙට්ඨසම්මතො, සො චෙව ධම්මං චරති පගෙව ඉතරා පජා සබ්බං රට්ඨං සුඛං සෙති රාජා චෙ හොති අධම්මිකො.
3497. මහාරුක්ඛස්ස ඵලිනො ආමං ඡින්දති යො ඵලං, රසඤ්චස්ස න ජානාති බීජඤ්චස්ස විනස්සති.
3498. මහාරුක්ඛූපමං රට්ඨං අධම්මෙන යො පසාසති, රසඤ්චස්ස න ජානාති රට්ඨඤ්චස්ස විනස්සති.
3499. මහාරුක්ඛස්ස ඵලිනො පක්කං ඡින්දති යො ඵලං, රඤ්චස්ස විජානාති බීජඤ්චස්ස න නස්සති.
3500. මහාරුක්ඛූපමං රට්ඨං ධම්මෙන යො පසාසති, රසඤ්චස්ස විජානාති රට්ඨඤ්චස්ස න නස්සති.