3311. අයමස්ස අසොකවනිකා සුපුප්ඵිතා සබ්බකාලිකා රම්මා, යහිමනුවිචරී රාජා පරිකිණ්ණො ඉත්ථාගාරෙහි.
3312. අයමස්ස අසොකවනිකා සුපුප්ඵිතා සබ්බකාලිකා රම්මා, යහිමනුවිචරී රාජා පරිකිණ්ණො ඤාතිසඞ්ඝෙන.
3313. ඉදමස්ස උය්යානං සුපුප්ඵිතං සබ්බකාලිකං රම්මං, යහිමනුවිචරී රාජා පරිකිණ්ණො ඉත්ථාගාරෙහි.
3314. ඉදමස්ස උය්යානං සුපුප්ඵිතං සබ්බකාලිකං රම්මං, යහිමනුවිචරී රාජා පරිකිණ්ණො ඤාතිසඞ්ඝෙන
3315. ඉදමස්ස කණිකාරවනං සුපුප්ඵිතං සබ්බකාලිකං රම්මං, යහිමනුවිචරී රාජා පරිකිණ්ණො ඉත්ථාගාරෙහි.
3316. ඉදමස්ස කණිකාරවනං සුපුප්ඵිතං සබ්බකාලිකං රම්මං, යහිමනුවිචරී රාජා පරිකිණ්ණො ඤාතිසඞ්ඝෙන
3317. ඉදමස්ස පාටළීවනං සුපුප්ඵිතං සබ්බකාලිකං රම්මං, යහිමනුවිචරී රාජා පරිකිණ්ණො ඉත්ථාගාරෙහි.
3318. ඉදමස්ස පාටළිවනං සුපුප්ඵිතං සබ්බකාලිකං රම්මං, යහිමනුවිචරී රාජා පරිකිණ්ණො ඤාතිසඞ්ඝෙන.
3319. ඉදමස්ස අම්බවනං සුපුප්ඵිතං සබ්බකාලිකං රම්මං, යහිමනුවිචරී රාජා පරිකිණ්ණො ඉත්ථාගාරෙහි.
3320. ඉදමස්ස අම්බවනං සුපුප්ඵිතං සබ්බකාලිකං රම්මං, යහිමනුවිචරී රාජා පරිකිණ්ණො ඤාතිසඞ්ඝෙන.
3321. අයමස්ස පොක්ඛරණී සඤ්ඡන්නා අණ්ඩජෙහි වීතිකිණ්ණා, යහිමනුවිචරී රාජා පරිකිණ්ණො ඉත්ථාගාරෙහි.
3322. අයමස්ස පොක්ඛරණී සඤ්ඡන්නා අණ්ඩජෙහි වීතිකිණ්ණා, යහිමනුවිචරී රාජා පරිකිණ්ණො ඤාතිසඞ්ඝෙන.
3323. රාජා ඛො පබ්බජිතො සුතසොමො රජ්ජං ඉමං පහත්වාන, කාසායවත්ථසනො නාගොව එකකොව චරති.
3324. මාස්සු පුබ්බෙ රතිකීළිතානි හසිතානි අනුස්සරිත්ථ, මා වො කාමා හනිංසු රම්මං හි සුදස්සනං නාම නගරං.
3325. මෙත්තං චිත්තඤ්ච භාවෙථ අප්පමාණං දිවා ච රත්තො ච, අථ ගඤ්ඡිත්ථ දෙවපුරං ආවාසං පුඤ්ඤකම්මිනන්ති.
චුල්ලසුතසොමජාතකං.
චත්තාළීසනිපාතො නිට්ඨිතො.
තස්සුද්දානං:
සුවපණ්ඩිතජම්බුකකුණ්ඩලිනො සරභඞ්ගමලම්බුසජාතකඤ්ච, පවරුත්තමසඞ්ඛසිරිව්හයකො සුතසොම අරින්දම රාජවරොති.
18. පඤ්ඤාසනිපාතො
1. නලිනිකාජාතකං.
3326. උඩ්ඪය්හතෙ{1} ජනපදො රට්ඨඤ්චාපි විනස්සති, එහි නලිනිකෙ{2} ගච්ඡ තං මෙ බ්රාහ්මණමානය.
3327. නාහං දුක්ඛක්ඛමා රාජ නාහං අද්ධානකොවිදා, කථං අහං ගමිස්සාමි වනං කුඤ්ජරසෙවිතං.
3328. ඵීතං ජනපදං ගන්ත්වා හත්ථිනා ච රථෙන ච, දාරුසඞ්ඝාටයානෙන එවං ගච්ඡ නලීනිකෙ{2}.
3329. හත්ථි අස්සා රථා පත්තී{3} ගච්ඡෙවාදාය ඛත්තියෙ, තවෙව වණ්ණරූපෙන වසං තං ආනයිස්සසි.
3330. කදලීධජපඤ්ඤාණො ආභුජීපරිවාරිතො, එසො පදිස්සති රම්මො ඉසිසිඞ්ගස්ස අස්සමො.
3331. එසො අග්ගිස්ස සඞ්ඛාතො එසො ධූමො පදිස්සති, මඤ්ඤෙ නො අග්ගිං හාපෙති ඉසිසිඞ්ගො මහිද්ධිකො.
3332. තඤ්ච දිස්වාන ආයන්තිං ආමුත්තමණිකුණ්ඩලං{4}, ඉසිසිඞ්ගො පාවිසි භීතො අස්සමං පණ්ණඡාදනං.
3333. අස්සමස්ස ච සා ද්වාරෙ භෙණ්ඩුකෙනස්ස කීළති, විදංසයන්තී අඞ්ගානි ගුය්හං පකාසිතානි ච.
3334. තඤෙ දිස්වාන කීළන්තිං{5} පණ්ණසාලගතො ජටී, අස්සමා නික්ඛමිත්වාන ඉදං වචනමබ්රවි.
3335. අම්භො කො නාම සො රුක්ඛො යස්ස තෙවංගතං ඵලං, දූරෙපි ඛිත්තං පච්චෙති න තං ඔහාය ගච්ඡති.
3336. අස්සමස්ස මමං{6} බ්රහ්මෙ සමීපෙ ගන්ධමාදනෙ, පබ්බතෙ තාදිසා රුක්ඛා යස්ස තෙවඞ්ගතං ඵලං දූරෙපි ඛිත්තං පච්චෙති න මං ඔහාය ගච්ඡති.{7}
3337. එතු භවං අස්සමිමං අදෙතු පජ්ජඤ්ච භක්ඛඤ්ච පටිච්ඡ දම්මි, ඉදමාසනං අත්ර භවං නිසීදතු ඉතො භවං මූලඵලානි ඛාදතු{1}
3338. කින්තෙ ඉදං ඌරූනමන්තරසමිං සුපිච්ඡිතං කණ්හරිවප්පකාසති, අක්ඛාහි මෙ පුච්ඡිතො එතමත්ථං කොසෙනු තෙ උත්තමඞ්ගං පවිට්ඨං.
3339. අහං වනෙ මූලඵලෙසනං චරං ආසාදයිං{2} අච්ඡං සුඝොරරූපං, සො මං පතිත්වා සහසජ්ඣපත්තො{3} පනුජ්ජ මං අබ්බහි{4} උත්තමඞ්ගං.
3340. ස්වායං වණො ඛජ්ජති කණ්ඩුවායති සබ්බඤ්ච කාලං න ලභාමි සාතං, පහො භවං කණ්ඩුමිමං විනෙතුං කුරුතං භවං යාචිතො බ්රාහ්මණත්ථං.
3341. ගම්භීරරූපො තෙ වණො සලොහිතො අපූතිකො පක්කගන්ධො මහා ච, කරොමි තෙ කිඤ්චි කසායයොගං යථා භවං පරමසුඛී භවෙය්ය.
3342. න මන්තයොගා න කසාවයොගා න ඔසධා බ්රහ්මචාරී කමන්ති, යං තෙ මුදු තෙන විනෙහි කණ්ඩු යථා අහං පරමසුඛී භවෙය්යං.
3343. ඉතො නු භොතො කතමෙන අස්සමො කච්චි භවං අභිරමසී අරඤ්ඤෙ, කච්චිනු තෙ මූලඵලං පහූතං{5} කච්චි භවන්තං න විහිංසන්ති වාළා.
3344. ඉතො උජුං උත්තරායං දිසායං ඛෙමා නදී හිමවන්තා පභාති,{6} තස්සා තීරෙ අස්සමො මය්හ රම්මො අහො භවං අස්සමං මය්හ පස්සෙ.
3345. අම්බා ච සාලා තිලකා ච ජම්බුයො උද්දාලකා පාටලියො ච ඵුල්ලා, සමන්තතො කිම්පුරිසාභිගීතං අහො භවං අස්සමං මය්හ{1} පස්සෙ.
3346. තාලා ච මූලා ච ඵලා ච මෙත්ථ වණ්ණෙන ගන්ධෙන උපෙතරූපා, තං භූමිභාගෙහි උපෙතරූපං අහො භවං අස්සමං මය්හ පස්සෙ.
3347. ඵලා ච මූලා ච පහූත{2} මෙත්ථ වණ්ණෙන ගන්ධෙන රසෙනුපෙතා, ආයන්ති ච ලුද්දකා නං පදෙසං මා මෙ තතො මූලඵලං අභාසුං.{3}
3348. පිතා මමං මූලඵලෙසනං ගතො ඉදානි ආගච්ඡති සායකාලෙ,{4} උභොව ගච්ඡාමසෙ අස්සමං තං යාව පිතා මූලඵලතො එතු.
3349. අඤ්ඤෙ බහූ ඉසයො සාධුරූපා රාජිසයො අනුමග්ගෙ වසන්ති, තෙයෙව පුච්ඡෙසි මමස්සමං තං තෙ තං නයිස්සන්ති මමං සකාසෙ.
3350. න තෙ කට්ඨානි භින්නානි න තෙ උදකමාභතං, අග්ගිපි තෙ න භාසිතො{5} කින්නු මන්දොව ඣායසි.
3351. භින්නානි කට්ඨානි හුතො ච අග්ගි තපනීපි{6} තෙ සමිතා බ්රහ්මචාරි, පීඨඤ්ච මය්හං උදකඤ්ච හොති රමසි ත්වං බ්රහ්මභූතො පුරත්ථා.
3352. අභින්නකට්ඨොසි අනාභතොදකො අභාසිතග්ගීසි අසිද්ධභොජනො, න මෙ තුවං ආලපසී මමජ්ජ නට්ඨන්නු කිං චෙතසිකඤ්ච දුක්ඛං.
3353. ඉධාගමා ජටිලො බ්රහ්මචාරී සුදස්සනෙය්යො සුතනූ විනෙති, නෙවාතිදීඝො නපනාතිරස්සො සුකණ්හකණ්හච්ඡදනෙභි භොතො.
3354. අමස්සුජාතො අපුරාණවණ්ණී ආධාරරූපඤ්ච පනස්ස කණ්ඨෙ, ද්වෙපස්ස{1} ගණ්ඩා උරෙ සුජාතා සුවණ්ණපිණ්ඩූපනිභා{2} පභස්සරා.
3355. මුඛඤ්ච තස්ස භුස{3}දසසනෙය්යං කණ්ණෙසු ලම්බන්ති ච කුඤ්චිතග්ගා, තෙ ජොතරෙ චරතො මාණවස්ස සුත්තඤ්ච යං සංයමනං ජටානං.
3356. අඤ්ඤා ච තස්ස සඤ්ඤමනී චතස්සො නීලා පීතා ලොහිතිකා ච සෙතා, තා සංසරෙ චරතො මාණවස්ස චිරීටිසඞ්ඝාරිව පාවුසම්හි.{4}
3357. න මෙඛලං{5} මුඤජමයං ධාරෙති න සන්තචෙ{6} නො පන බබ්බජස්ස,{7} තා ජොතරෙ ජඝනන්තරෙ{8} විසත්තා සතෙරිතා විජ්ජුරිවන්තලික්ඛෙ.
3358. අඛීලකානි ච අවණ්ටකානි හෙට්ඨා නාභ්යා{9} කටිසමොහිතානි, අඝට්ටිතා නිච්චකිලිං කරොන්ති හං තාත කිං රුක්ඛඵලානි තානි.
3359. ජටා ච තස්ස භුසදස්සනෙය්යා පරොසතං වෙල්ලිතග්ගා සුගන්ධා, ද්වෙධාසිරො සාධුවිභත්තරූපො අහො නුඛො මය්හ තථා ජටාස්සු.
3360. යදා ච සො පකිරති තා ජටායො වණ්ණෙන ගන්ධෙන උපෙතරූපා, නීලුප්පලං වාතසමෙරිතංව තථෙව සංවාති වනස්සමො අයං.
3361. පඞ්කො ච තස්ස භුසදස්සනෙය්යො නෙතාදිසො යාදිසො මය්හකායො, සො වායති එරිතො මාළුතෙන වනං යථා අග්ගගිම්භෙ සුඵුල්ලං.
3362. නිහන්ති සො රුක්ඛඵලං පඨබ්යා සුචිත්තරූපං රුචිරං දස්සනෙය්යං, ඛිත්තඤ්ච තස්ස පුනරෙති හත්ථං හං තාත කිං රුක්ඛඵලං නු ඛො තං.
3363. දන්තා ච තස්ස භුසදස්සනෙය්යා සුද්ධා සමා සඞ්ඛවරූපපන්නා, මනො පසාදෙන්ති විවරියමානා නහ නූන සො සාකමඛාදි තෙහි.
3364. අකක්කසං අගළිතං{1} මුහුං මුදුං උජුං අනුද්ධතං අචපලමස්ස භාසිතං, රුදං මනුඤ්ඤං කරවීතසුස්සරං හදයඞ්ගමං රඤ්ජයතෙව මෙ මනො
3365. බින්දුස්සරො නාතිවිස්සට්ඨවාක්යො න නූන සජ්ඣායමතිප්පයුත්තො, ඉච්ඡාමි ඛො{2} තං පුනරෙව{3} දට්ඨුං මිත්තං හි මෙ මාණවාහු පුරත්ථා.
3366. සුසන්ධි සබ්බත්ථ විමට්ඨිමං වණං පුථූ සුජාතං ඛරපත්තසන්නිභං, තෙනෙව මං උත්තරියාන මාණවො විවරිය ඌරුං ජඝතෙන පීළයි.
3367. තපන්ති ආභන්ති විරොචරෙ ච සතෙරතා විජ්ජුරිවන්තලික්ඛෙ, බාහා මුදා අඤ්ජනලොමසාදිසා විචිත්රවට්ටඞ්ගුලිකාස්ස සොභරෙ.
3368. අකක්කසඞ්ගො න ච දීඝලොමො නඛස්ස දීඝා අපි ලොහිතග්ගා, මුදූහි බාහාහි පළිස්සජන්තො කල්යාණරූපො රමයං උපට්ඨහි.
3369. දුමස්ස තූලූපනිභා පභස්සරා සුවණ්ණකම්බූතලවට්ටසුච්ඡවි, හත්ථා මුදු තෙහි මං සම්ඵුසිත්වා ඉතො ගතො තෙ මං දහන්ති තාත.
3370. නහ නූන සො ඛාරිවිධං අහාසි න නූන කට්ඨානි සයං අභඤ්ජි, න නූන සො හන්ති දුමෙ කුඨාරියා න පිස්ස හත්ථෙසු ඛීලානි අත්ථි.
3371. අච්ඡො ච ඛො තස්ස වණං අකාසි සො මං බ්රවී සුඛිතං මං කරොහි, තාහං කරිං තෙන මමාසි සොඛ්යං සො මං බ්රවී සුඛිතොස්මීති බ්රහ්මෙ.
3372. අයඤ්ච තෙ මාලුවපණ්ණසන්ථතා විකිණ්ණරූපාව මයා ච තෙන ච, කිලන්තරූපා උදකෙ රමිත්වා පුනප්පුනං පණ්ණකුටිං වජාම.
3373. න මජ්ජ මන්තා පටිභන්ති තාත න අග්ගිහුත්තං නපි යඤ්ඤතන්ත්රං, න චාපි තෙ මූලඵලානි භුඤෙජ යාව න පස්සාමි තං බ්රහ්මචාරිං.
3374. අද්ධා පජානාසි තුවම්පි තාත යස්සං දිසායං වසතෙ බ්රහ්මචාරී, තං මං දිසා පාපය තාත ඛිප්පං මා තෙ අහං අමරිං අස්සමම්හි.
3375. විචිත්රපුප්ඵං හි වනං සුතං මයා දිජාභිඝුට්ඨං දිජසඞ්ඝසෙවිතං, තං මං වනං පාපය තාත ඛිප්පං පුරා තෙ පාණං විජහාමි අස්සමෙ.
3376. ඉමස්මාහං ජොතිරසෙ වනම්හි ගන්ධබ්බදෙවච්ඡරසඞ්ඝසෙවිතෙ, ඉසීනමාවාසෙ සනන්තනම්හි නෙතාදිසං අරතිං පාපුණෙථ.
3377. භවන්ති මිත්තානි අථො න හොන්ති ඤාතීසු මිත්තෙසු කරොන්ති පෙමං, අයඤ්ච ජම්මො කිස්ස වා නිවිට්ඨො යො නෙව ජානාති කුතොම්භි ආගතො.
3378. සංවාසෙන හි මිත්තානි සන්ධීයන්ති පුනප්පුනං, ස්වෙව මිත්තො අඝඞ්ගත්තු අසංවාසෙන ජීරති.
3379. සචෙ තුවං දක්ඛසි බ්රහ්මචාරිං සචෙ තුවං සල්ලපි{1} බ්රහ්මචාරිනා, සම්පන්නසස්සං ව මහොදකෙන තපොගුණං ඛිප්පමිමං පහස්සසි.{2}
3380. පුනපි චෙ දක්ඛසි බ්රහ්මචාරිං පුනපි චෙ සල්ලපෙ බ්රහ්මචාරිනා, සම්පන්නසස්සං ව මහොදකෙන උස්මාගතං ඛිප්පමිමං පභස්සසි.{3}
3381. භූතානි හෙතානි චරන්ති තාත විරූපරූපෙන මනුස්සලොකෙ, න තානි සෙවෙථ නරො සපඤ්ඤො ආසජ්ජ නං නස්සති බ්රහ්මචාරීති,
නලිනිකාජාතකං.
2. උම්මාදන්තීජාතකං
3382. නිවෙසනං කස්ස නුදං සුනන්ද පාකාරෙන පණ්ඩුමයෙන ගුත්තං, කා දිස්සති අග්ගිසිඛාව දූරෙ වෙහාසයං{4} පබ්බතග්ගෙව අච්චී.
3383. ධීතානයං කස්ස සුනන්ද හොති සුණිසානයං කස්ස අථොපි භරියා, අක්ඛාහි මෙ ඛිපපමිධෙව පුට්ඨො අවාවටා යදි වා අත්ථි භත්තා
3384. අහං හි ජානාමි ජනින්ද එතං මත්යා ච පෙත්යා ච අථොපි අස්සා, තවෙව සො පුරිසො භූමිපාල රත්තින්දිවං අප්පමතො තවත්ථෙ.
3385. ඉද්ධො ච ඵීතො ච සුවඩ්ඪි{1}තො ච අමච්චො ච තෙ අඤ්ඤතරො ජනින්ද, තස්සොසා{2} භරියා අහිපාරකස්ස උම්මාදන්තී{3} නාමධෙය්යෙන රාජ.
3386. අම්භො අම්භො නාමමිදං ඉමිස්සා මත්යා ච පෙත්යා ච කතං සුසාධු, තථා හි{4} මය්හං අවලොකයන්ති උම්මත්තකං උම්මදන්තී අකාසි.
3387. සා පුණ්ණමාසෙ මිගමන්දලොචනා උපාවිසී පුණ්ඩරීකත්තචඞ්ගී, ද්වෙ පුණ්ණමායො තදහු අමඤ්ඤං දිස්වාන පාරාවතරත්තවාසිනිං.
3388. අළාරපම්හෙහි සුභෙහි වග්ගුහි පලොහයන්ති මං යදා උදික්ඛති, විජම්භමානා හරතෙව මෙ මනො ජාතා වනෙ කිම්පුරිසීව පබ්බතෙ.
3389. තදා හි බ්රහතී සාමා ආමුත්තමණිකුණ්ඩලා, එකච්චවසනා නාරී මිගී භන්තාවුදික්ඛති.
3390. කදාස්සු මං තම්බනඛා සුලොමා බාහා මුදූ චන්දනසාරලිත්තා, වට්ටඞ්ගුලී සන්නතධීරකුත්තියා නාරී උපඤ්ඤිස්සති සීසතො සුභා.
3391. කදාස්සු මං කඤ්චනජාලුරච්ඡදා ධීතා තිරීටිස්ස විලාකමජ්ඣා, මුදූහි බාහාහි පළිස්සජිස්සති බ්රහාවනෙ ජාතදුමංව මාලුවා.
3392. කදාස්සු ලාඛාරසරත්තසුච්ඡවි ඛින්දුත්ථනී පුණ්ඩරීකත්තචඞ්ගී, මුඛං මුඛෙන උපනාමයිස්සති සොණ්ඩොව සොණ්ඩස්ස සුරාය ථාලං.
3393. යදාද්දසං තං තිට්ඨන්තිං සබ්බගත්තං මනොරමං, තතො සකස්ස චිත්තස්ස නාවබොධාමි කඤ්චිනං.
3394. උම්මාදන්තිමහං දිට්ඨො ආමුත්තමණිකුණ්ඩලං, න සුපාමි දිවාරත්තිං සහස්සංව පරාජිතො.
3395. සක්කො ච මෙ වරං දජ්ජා සො ච ලබ්භෙථ මෙ වරො, එකරත්තං දිරත්තං වා භවෙය්යං අභිපාරකො උම්මාදන්ත්යා රමිත්වාන සිවිරාජා තතො සියං.
3396. භූතානි මෙ භූතපතී නමස්සතො ආගම්ම යක්ඛො ඉදමෙවමබ්රවි,{1} රඤ්ඤො මනො උම්මදන්ත්යා නිවිට්ඨො දදාමි තෙ තං පරිචාරයස්සු.
3397. පුඤ්ඤා විධංසෙ{2} අමරො න චම්හි ජනො ච මෙ පාපමිදන්ති ජඤ්ඤා, භුසො ච ත්යස්ස මනසො විඝාතො දත්වා පියං උම්මදන්තිං අදිට්ඨා.
3398. ජනින්ද නාඤ්ඤතු තයා මයා වා සබ්බාපි කම්මස්ස කතස්ස ජඤ්ඤා, යන්තෙ මයා උම්මදන්තී පදින්නා භුසෙහි රාජා වනථං සජාහි.
3399. යො පාපකං කම්මකරං මනුස්සො සො මඤ්ඤති මායිදං මඤ්ඤිංසු අඤ්ඤෙ, පස්සන්ති භූතානි කරොන්තමෙතං යුත්තා ව යෙ හොන්ති නරා පඨබ්යා.
3400. අඤ්ඤො නු තෙ කොචි නරො පඨබ්යා සද්දහෙය්ය{3} ලොකස්මිං න මෙ පියාති, භුසො ච ත්යස්ස මනසො විඝාතො දත්වා පියං උම්මදන්තිං අදිට්ඨා.
3401. අද්ධා පියා මය්හ ජනින්ද එසා න සා මම අප්පියා භූමිපාල, ගච්ඡෙව ත්වං උම්මදන්තිං භදන්තෙ සීහොව සෙලස්ස ගුහං උපෙහි.
3402. න පීළිතා අත්තදුක්ඛෙන ධීරා සුඛප්ඵලං කම්මං පරිච්චජන්ති, සම්මොහිතාවාපි සුඛෙන මත්තා න පාපකම්මඤ්ච සමාචරන්ති.