3215. සොහං තථා කරිස්සාමි ධිරත්ථු ජීවිතෙන මෙ, පුන වා තාදිසො හෙස්සං මරණං වා මෙ භවිස්සති.
3216. තස්ස තෙජඤ්ච විරියඤ්ච ඨිතිං ඤත්වා සුවඩ්ඪිතං, සිරසා අග්ගහි පාදෙ ඉසිසිඞ්ගං අලම්බුසා.
3217. මා මෙ කුජ්ඣ මහාවීර මා මෙ කුජ්ඣ මහාඉසී, මහා අත්ථො මයා චිණ්ණො තිදසානං යසස්සිනං තයා පකම්පිතං{1} ආසි සබ්බං දෙවපුරං තදා.
3218. තාවතිංසා ච යෙ දෙවා තිදසානඤ්ච වාසවො, ත්වඤ්ච භද්දෙ සුඛී හොහි ගච්ඡ කඤ්ඤෙ යථාසුඛං.
3219. තස්ස පාදෙ ගහෙත්වාන කත්වා ච නං පදක්ඛිණං, අඤ්ජලිං පග්ගහෙත්වාන තම්හා ඨානා අපක්කමි.
3220. යො තස්සා ආසි පල්ලඞ්කො සොවණ්ණො සොපවාහනො, සඋත්තරච්ඡදපඤ්ඤාසො සහස්සපටිකත්ථතො තමෙව පල්ලඞ්ක මාරුය්හ අගා දෙවානසන්තිකෙ.
3221. තමොක්කමිව ආයන්තිං ජලන්තිං විජ්ජුතං යථා, පතීතො සුමනො විත්තො දෙවින්දො අදදා වරං.
3222. වරං චෙ මෙ අදො සක්ක සබ්බභූතානමිස්සර, න ඉසිපලොභිකා ගච්ඡෙ එතං සක්ක වරං වරෙති.
අලම්බුසාජාතකං.
4. සඞ්ඛපාලජාතකං.
3223. අරියාවකාසොපි පසන්නනෙත්තො මඤ්ඤෙ භවං පබ්බජිතො කුලම්භා, කථන්නු චිත්තානි පහාය භොගෙ පබ්බජි{1} නික්ඛම්ම ඝරා සපඤ්ඤ.
3224. සයං විමානං නරදෙව දිස්වා මහානුභාවස්ස මහොරගස්ස, දිස්වාන පුඤ්ඤාන මහාවිපාකං සද්ධායහං පබ්බජිතොම්හි රාජ.
3225. න කාමකාමා න භයා න දොසා වාචං මුසා පබ්බජිතා භණන්ති, අක්ඛාහි මෙ පුච්ඡිතො එතමත්ථං සුත්වාන මෙ ජායිහිතිප්පසාදො.
3226. වාණිජ්ජ රට්ඨාධිප ගච්ඡමානො පථෙ අද්දසාසිම්හි මිලාචපුත්තෙ, පවඩ්ඪකායං උරගං මහන්තං ආදාය ගච්ඡන්තෙ පමොදමානෙ.
3227. සොහං සමාගම්ම ජනින්ද තෙහි සංහට්ඨලොමො අවචස්මිං{2} භීතො, කුහිං අයං නීයති භීම{3}කායො නාගෙන කිං කාහථ භොජපුත්තා.
3228. නාගො අයං නීයති භොජනත්ථං පවඩ්ඪකායො උරගො මහන්තො, සාදුඤ්ච ථූලඤ්ච මුදුඤ්ච මංසං න ත්වං රසඤ්ඤාසි විදෙහපුත්ත.
3229. ඉතො මයං ගන්ත්වා සකං නිකෙතං ආදාය සත්ථානි විකොපයිත්වා, මංසානි භොක්ඛාම පමොදමානා මයං හි වෙ සත්තවො පන්නගානං.
3230. සචෙ අයං නීයති භොජනත්ථං පවඩ්ඪකායො උරගො මහන්තො, දදාමි වො බලිවද්දානි{4} සොළස නාගං ඉමං මුඤ්චථ බන්ධනස්මා.
3231. අද්ධා හි නො භක්ඛො අයං මනාපො බහූ ච නො උරගා භුත්තපුබ්බා, කරොම තෙ තං වචනං අළාර මිත්තඤ්ච නො හොහි විදෙහපුත්ත.
3232. තදස්සු තෙ බන්ධනා මොචයිංසු යං නත්ථුතො පටිමොක්ඛස්ස පාසෙ, මුත්තො ච සො බන්ධනා නාගරාජා පක්කාමි පාචීනමුඛො මුහුත්තං
3233. ගන්ත්වාන පාචීනමුඛො මුහුත්තං පුණ්ණෙහි නෙත්තෙහි පලොකයී මං, තදස්සහං පිට්ඨිතො අන්වගච්ඡිං දසඞ්ගුලිං අඤ්ජලිං පග්ගහෙත්වා.
3234. ගච්ඡෙව ඛො ත්වං තරමානරූපො මා තං අමිත්තා පුනරග්ගහෙසුං, දුක්ඛො හි ලුද්දෙහි පුනා සමාගමො අදස්සනං භොජපුත්තාන ගච්ඡ.
3235. අගමාසි සො රහදං විප්පසන්නං නීලොභාසං රමණීයං සුතිත්ථං, සමොතතං ජම්බූහි චෙතසාහි පාවෙක්ඛි නිත්තිණ්ණභයො පතීතො
3236. සො තං පවිස්ස න චිරස්ස නාගො දිබ්බෙන මෙ පාතුරහූ ජනින්ද, උපට්ඨහි මං පිතරං ව පුත්තො හදයඞ්ගමං කණ්ණසුඛං භණන්තො
3237. ත්වංමෙසි මාතා ච පිතා අළාර අබ්භන්තරො පාණදදො සහායො, සකඤ්ච ඉද්ධිං පටිලාභිතොස්මි අළාර පස්ස මෙ නිවෙසනානි පහූතභක්ඛං බහු අන්නපානං මසක්කසාරං විය වාසවස්ස.
3238. තං භූමිභාගෙහි උපෙතරූපං අසක්ඛරා චෙව මුදූ සුභා ච, නීචතිණා අප්පරජා ච භූමි පාසාදිකා යත්ථ ජහන්ති සොකං.
3239. අනාවකූලා වෙළුරියූපනීලා චාතුද්දිසං අම්බවනං සුරම්මං, පක්කා ච පෙසී ච ඵලා සුඵුල්ලා නිච්චොතුකා ධාරයන්තී ඵලානි
3240. තෙසං වනානං නරදෙව මජ්ඣෙ නිවෙසනං භස්සරසන්නිකාසං, රජතග්ගළං සොණ්ණමයං උළාරං පභාසති විජ්ජුරිවන්තලික්ඛෙ.
3241. මණිමයා සොවණ්ණමයා උළාරා අනෙකචිත්තා සතතං සුනිම්මිතා, පරිපූරා කඤ්ඤාහි අලඞ්කතාහි සොවණ්ණකායූරධරාහි රාජ.
3242. සො සඞ්ඛපාලො තරමානරූපො පාසාදමාරුය්හ අනොමවණ්ණො, සහස්සථම්භං අතුලානුභාවං යත්ථස්ස භරියා මහෙසී අහොසි.
3243. එකා ච නාරී තරමානරූපා ආදාය වෙළුරියමයං මහග්ඝං, සුභං මණිං ජාතිමන්තූපපන්නං අචොදිතා ආසනමබ්භිභාසි.
3244. තතො මං උරගො හත්ථෙ ගහෙත්වා නිසීදයී පමුඛමාසනස්මිං, ඉදමාසනං අත්ර භවං නිසීදතු භවඤ්හි මෙ අඤ්ඤතරො ගරූනං.
3245. අඤ්ඤා ච නාරී තරමානරූපා ආදාය වාරිං උපසඞ්කමිත්වා, පාදානි පක්ඛාලයි මෙ ජනින්ද භරියාව භත්තු පතිනො පියස්ස.
3246. අපරා ච නාරී තරමානරූපා පග්ගය්හ සොවණ්ණමයාය පාතියා, අනෙකසූපං විවිධං වියඤ්ජනං උපනාමයි භත්ත මනුඤ්ඤරූපං.
3247. තුරියෙහි මං භාරත භුත්තභත්තං උපට්ඨහුං භත්තු මනො විදිත්වා, තතුත්තරිං මං නිපතී මහන්තං දිබ්බෙහි කාමෙහි අනප්පකෙහි.
3248. භරියා මමෙතා තිසතා අළාර සබ්බත්තමජ්ඣා පදුමුත්තරාභා, ආළාර එතාසු තෙ කාමකාරො දදාමි තෙ තා පරිචාරයස්සු
3249. සංවච්ඡරං දිබ්බරසානුභුත්වා තදස්සහං උත්තරිං පච්චභාසිං, නාගස්සිදං කින්ති කථඤ්ච ලද්ධං කථජ්ඣගමාසි විමානසෙට්ඨං.
3250. අධිච්චලද්ධං පරිණාමජන්තෙ සයං කතං උදාහු දෙවෙහි දින්නං, පුච්ඡාමි තං නාගරාජෙ තමත්ථං කථජ්ඣගමාසි විමානසෙට්ඨං.
3251. නාධිච්චලද්ධං න පරිණාමජං මෙ න සයං කතං නපි දෙවෙහි දින්නං, සකෙහි කම්මෙහි අපාපකෙහි පුඤ්ඤෙහි මෙ ලද්ධමිදං විමානං.
3252. කින්තෙ වතං කිං පන බ්රහ්මචරියං කිස්ස සුචිණ්ණස්ස අයං විපාකො, අක්ඛාහි මෙ නාගරාජෙතමත්ථං කථන්නු තෙ ලද්ධමිදං විමානං.
3253. රාජා අහොසිං මගධානමිස්සරො දුය්යොධනො නාම මහානුභාවො, සො ඉත්තරං ජීවිතං සංවිදිත්වා අසස්සතං විපරිණාමධම්මං.
3254. අන්නඤ්ච පානඤ්ච පසන්නචිත්තො සක්කච්ච දානං විපුලං අදාසිං ඔපානභූතං මෙ ඝරං තදාසි සන්තප්පිතා සමණබ්රාහ්මණා ච.
3255. මාලඤ්ච ගන්ධඤ්ච විලෙපනඤ්ච පදීපියං යානමුපස්සයඤ්ච, අච්ඡාදනං සයනමථන්නපානං සක්කච්ච දානානි අදම්හ තත්ථ.
3256. තං මෙ වතං තං පන බ්රහ්මචරියං තස්ස සුචිණ්ණස්ස අයං විපාකො, තෙනෙව මෙ ලද්ධමිදං විමානං පහූතභක්ඛං බහුඅන්නපානං නච්චෙහි ගීතෙහි චුපෙතරූපං චිරට්ඨිතිකං න ච සස්සතායං.
3257. අප්පානුභාවා තං මහානුභාවං තෙජස්සිනං හන්ති අතෙජවන්තො, කිමෙව දාඨාවුධ කිං පටිච්ච හත්ථත්ථ{1} මාගඤ්ඡි වණිබ්බකානං.
3258. භයන්නු තෙ අන්වගතං මහන්තං තෙජොනු තෙ නාන්වගං දන්තමූලං, කිමෙව දාඨාවුධ කිං පටිච්ච කිලෙසමාපජ්ජි වණිබ්බකානං.
3259. න මෙ භයං අන්වගතං මහන්තං තෙජො න සක්කා මම තෙහි හන්තුං, සතඤ්ච ධම්මානි සුකිත්තිතානි සමුද්දවෙලාව දුරච්චයානි.
3260. චාතුද්දසිං පඤ්චදසිං ච’ළාර{1} උපොසථං නිච්චමුපාවසාමි, අථාගමුං සොළස භොජපුත්තා රජ්ජුං ගහෙත්වාන දළ්හඤ්ච පාසං.
3261. භෙත්වාන තාසං අතිකස්ස රජ්ජුං නයිංසු මං සම්පරිගය්හ ලුද්දා, එතාදිසං දුක්ඛමහං තිතික්ඛං උපොසථං අප්පටිකොපයන්තො.
3262. එකායනෙ තං පථෙ අද්දසංසු බලෙන වණ්ණෙන චු’පෙතරූපං{2}, සිරියා ච පඤ්ඤාය ච භාවිතොසි කිමත්ථියං නාග තපො කරොසි.
3263. න පුතතහෙතු න ධනස්ස හෙතු න ආයුනො චාපි අළාර හෙතු, මනුස්සයොනිං අභිපත්ථයානො තස්මා පරක්කම්ම තපො කරොමි.
3264. ත්වං ලොහිතක්ඛො විහතන්තරංසො අලඞ්කතො කප්පිතකෙසමස්සු, සුරොසිතො ලොහිතචන්දනෙන ගන්ධබ්බරාජාව දිසා පභාස්සි.
3265. දෙවිද්ධිපත්තොසි මහානුභාවො සබ්බෙහි කාමෙහි සමඞ්ගිභූතො, පුච්ඡාමි තං නාගරාජෙතමත්ථං සෙය්යො ඉතො කෙන මනුස්සලොකො.
3266. ආළාර නාඤ්ඤත්ර මනුස්සලොකා සුද්ධි වි සංවිජ්ජති සඤ්ඤමො වා, අහඤ්ච ලද්ධාන මනුස්සයොනිං කාහාමි ජාතිමරණස්ස අන්තං.
3267. සංවච්ඡරො මෙ උසිතො{1} තවන්තිකෙ අන්නෙන පානෙන උපට්ඨිතොස්මි, ආමන්තයිත්වාන පළෙමි නාග චිරප්පවුත්ථොස්මි{2} අහං ජනින්ද.
3268. පුත්තා ච දාරා ච‘නුජිවිනො ච නිච්චානුසිට්ඨා{3} උපතිට්ඨතෙ තං, කච්චින්නු තෙ නාභිසංසිත්ථ කොචි පියඤ්හි මෙ දස්සනං තුය්හළාර.{4}
3269. යථාපි මාතු ච පිතු අගාරෙ පුත්තො පියො පටිවිහිතො වසෙය්ය, තතොපි මය්හං ඉධ මෙව සෙය්යො චිත්තං හි තෙ නාග මයි පසන්නං.
3270. මණී මමං විජ්ජති ලොහිතඞ්කො ධනාහරො මණිරතනං උළාරං, ආදාය තං ගච්ඡ සකං නිකෙතං ලද්ධා ධනං තං මණිමොස්සජස්සු.
3271. දිට්ඨා මයා මානුසිකාපි කාමා අසස්සතා විපරිණාමධම්මා,{5} ආදීනවං කාමගුණෙසු දිස්වා සද්ධායහං පබ්බජිතොම්හි රාජ.
3272. දුමප්ඵලානෙව පතන්ති මාණවා දහරා ච වුද්ධා ච සරීරභෙදා, එතම්පි දිස්වා පබ්බජිතොම්හි රාජ. අපණ්ණකං සාමඤ්ඤමෙව සෙය්යො.
3273. අද්ධා හවෙ සෙවිතබ්බා සපඤ්ඤා බහුස්සුතා යෙ බහුඨානචින්තිනො, නාගඤ්ච සුත්වා න තවඤ්චළාර කාහාමි පුඤ්ඤානි අනප්පකානි.
3274. අද්ධා හවෙ සෙවිතබ්බා සපඤ්ඤා බහුස්සුතා යෙ බහුඨානචින්තිනො, නාගඤ්ච සුත්වා මමඤ්ච රාජ කරොහි පුඤ්ඤානි අනප්පකානීති.
සඞ්ඛපාල ජාතකං.
5. චුල්ලසුතසොමජාතකං.
3275. ආමන්තයාමි නිගමං මිත්තාමච්චෙ පාරිසජ්ජෙ ච{1}, සිරස්මිං පලිතං ජාතං පබ්බජ්ජං දානි රොච’හං.
3276. අභුං මෙ කථන්නු භණසි සල්ලං මෙ දෙව උරසි කප්පෙසි, සත්තසතා තෙ භරියා කථන්නු තෙ තා භවිස්සන්ති.
3277. පඤ්ඤායිහින්ති එතා දහරා අඤ්ඤම්පි තා ගමිස්සන්ති, සග්ගඤ්ච පත්ථයානො තෙනා’හං පබ්බජිස්සාමි.
3278. දුල්ලද්ධං මෙ ආසි සුතසොම යස්ස තෙ හොමහං මාතා, යං මෙ විලපන්තියා අනපෙක්ඛො පබ්බජසි දෙව.
3279. දුල්ලද්ධං මෙ ආසි සුතසොම යන්තං අහං විජායිස්සං, යං මෙ විලපන්තියා අනපෙක්ඛො පබ්බජසි දෙව.
3280. කොනාමෙසො ධම්මො සුතසොම කා ච නාම පබ්බජ්ජා,{2} යං නො අම්හෙ ජිණ්ණො අනපෙක්ඛො පබ්බජසි දෙව.
3281. පුත්තාපි තුය්හං බහවො දහරා අප්පත්තයොබ්බනා, මඤ්ජූ තෙ{3} තං අපස්සන්තා මඤ්ඤෙ දුක්ඛං නිගච්ඡන්ති.
3282. පුත්තෙහි ච මෙ එතෙහි දහරෙහි අප්පත්තයොබ්බනෙහි, මඤ්ජූහි සබ්බෙහිපි තුම්හෙහි චිරම්පි ඨත්වා විනාභාවො.
3283. ඡින්නං නු තුය්හං හදයං ආදු{1} කරුණා ච නත්ථි අම්හෙසු, යං නො වික්කන්දත්තියො අනපෙක්ඛො පබ්බජසි දෙව.
3284. න ච මය්හං ඡින්නං හදයං අත්ථි කරුණාපි මය්හං තුම්හෙසු, සග්ගඤ්ච පත්ථයානො තෙනාහං පබ්බජිස්සාමි.
3285. දුල්ලද්ධං මෙ ආසි සුතසොම යස්ස තෙ අහං භරියා, යං මෙ විලපන්තියා අනපෙක්ඛො පබ්බජසි දෙව.
3286. දුල්ලද්ධං මෙ ආසි සුතසොම යස්ස තෙ අහං භරියා, යං මෙ කුච්ඡිපටිසන්ධිං අනපෙක්ඛො පබ්බජසි දෙව.
3287. පරිපක්කො මෙ ගබ්භො කුච්ඡිගතො යාව නං විජායාමි, මාහං එකො විධවා පච්ඡා දුක්ඛානි අද්දක්ඛිං.{2}
3288. පරිපක්කො තෙ{3} ගබ්භො කුච්ඡිගතො ඉඞ්ඝ ත්වං{4} විජායස්සු, පුත්තං අනොමවණ්ණං තං හිත්වා පබ්බජිස්සාමි.
3289. මා ත්වං චන්දෙ රුදි මා සොචි වනතිමිරමත්තක්ඛි, ආරොහ වරපාසාදං අනපෙක්ඛො අහං ගමිස්සාමි.
3290. කො තං අම්ම කොපෙසි කිං රොදසි පෙක්ඛසි ච මං බාළ්හං, කං{5} අවජ්ඣං ඝාතෙමි ඤාතීනං උදික්ඛමානානං.
3291. නහි සො සක්කා හන්තුං විජිතාවී යො මං තාත කොපෙසි, පිතා තෙ මං තාත අවච අනපෙක්ඛො අහං ගමිස්සාමි.
3292. යාහං පුබ්බෙ නිය්යාමි උය්යානං{1} කුඤජරෙ{2} ච යොධෙමි, සුතසොමෙ{3} පබ්බජිතෙ කථන්නුදානි කරිස්සාමි.
3293. මාතු ච මෙ රුදන්ත්යා{4} ජෙට්ඨස්ස ච භාතුනො අකාමස්ස, හත්ථෙපි තෙ ගහෙස්සං{5} න හි ගච්ඡසි නො අකාමානං.
3294. උට්ඨෙහි ත්වං ධාති ඉමං කුමාරං{6} රමෙහි අඤ්ඤත්ථ, මා මෙ පරිපත්ථමකා{7} සග්ගං මම පත්ථයානස්ස.
3295. යන්නූනිමං දදෙය්යං{8} පභඞ්කරං කො නු මෙ ඉමිනා අත්ථො, සුතසොමෙ පබ්බජිතෙ කින්නු මෙ තං කරිස්සාමි.
3296. කොසො ච තුය්හං විපුලො කොට්ඨාගාරඤ්ච තුය්හං පරිපූරං, පඨවී{9} ච තුය්හං විජිතා{10} රමස්සු මා පබ්බජස්සු දෙව.
3297. කොසො ච තුය්හං විපුලො කොට්ඨාගාරඤ්ච මය්හං පරිපූරං, පඨවී ච මය්හං විජිතා තං හිත්වා පබ්බජිස්සාමි.
3298. මය්හම්පි ධනං පහූතං සඞ්ඛ්යාතුං නොපි දෙව සක්කොමි, තං දෙව තෙ දදාමි සබ්බම්පි රමස්සු මා පබ්බජ දෙව.
3299. ජානාමි තෙ ධනං පහූතං කුලවඩ්ඪන පූජිතො තයා ච’ස්මි, සග්ගඤ්ච පත්ථයානො තෙනාහං පබ්බජිස්සාමි.
3300. උක්කණ්ඨිතොස්මි බාළ්හං අරති මං සොමදත්ත ආවිසති, බහුකා හි අන්තරායා අජ්ජෙවාහං පබ්බජිස්සාමි.
3301. ඉදම්පි තුය්හං රුචිතං සුතසොම අජ්ජෙවදානි ත්වං පබ්බජ, අහම්පි පබ්බජිස්සාමි න උස්සහෙ තයා විනා අහං ඨාතුං.
3302. න හි සක්කා පබ්බජිතුං. නගරෙ න හි පච්චති ජනපදෙ ච, සුතසොමෙ පබ්බජිතෙ කථන්නුදානි කරිස්සාම.
3303. උපනීයතිදං මඤ්ඤෙ පරිත්තං උදකංව චඞ්ගවාරම්භි, එවං සුපරිත්තකෙ ජීවිතෙ න ච පමජ්ජිතුං කාලො.
3304. උපනීයතිදං මඤ්ඤෙ පරිත්තං උදකංව චඞ්ගවාරම්හි, එවං සුපරිත්තකෙ ජීවිතෙ අථ බාලා පමජ්ජන්ති.
3305. තෙ වඩ්ඪයන්ති නිරයං තිරච්ඡානයොනිඤ්ච පෙත්තිවිසයඤ්ච, තණ්හාබන්ධනබද්ධා වඩ්ඪෙන්ති අසුරකායං.
3306. ඌහඤ්ඤතෙ රජග්ගං අවිදූරෙ පුප්ඵකම්භි පාසාදෙ, මඤ්ඤෙ නො කෙසා ඡින්නා යසස්සිනො ධම්මරාජස්ස.
3307. අයමස්ස පාසාදො සොවණ්ණපුප්ඵමාල්යවීතිකිණ්ණො, යහිමනුවිචරී රාජා පරිකිණ්ණො ඉත්ථාගාරෙහි.
3308. අයමස්ස පාසාදො සොවණ්ණපුප්ඵමාල්යවීතිකිණ්ණො, යහිමනුවිචරී රාජා පරිකිණ්ණො ඤාතිසඞ්ඝෙන.
3309. ඉදමස්ස කූටාගාරං සොවණ්ණපුප්ඵමාල්යවීතිකිණ්ණං, යහිමනුවිචරී රාජා පරිකිණ්ණො ඉත්ථාගාරෙහි.
3310. ඉදමස්ස කූටාගාරං සොවණ්ණපුප්ඵමාල්යවීතිකිණ්ණං, යහිමනුවිචරී රාජා පරිකිණ්ණො ඤාතිසඞ්ඝෙන.