3119. ධම්මං චර මහාරාජ මාතාපිතුසු ඛත්තිය, ඉධ ධම්මං චරිත්වාන රාජ සග්ගං ගමිස්සසි.
3120. ධම්මං චර මහාරාජ පුත්තදාරෙසු ඛත්තිය, ඉධ ධම්මං චරිත්වාන රාජ සග්ගං ගමිස්සසි.
3121. ධම්මං චර මහාරාජ මිත්තාමච්චෙසු ඛත්තිය, ඉධ ධම්මං චරිත්වාන රාජ සග්ගං ගමිස්සසි.
3122. ධම්මං චර මහාරාජ වාහනෙසු බලෙසු ච, ඉධ ධම්මං චරිත්වාන රාජ සග්ගං ගමිස්සසි.
3123. ධම්මං චර මහාරාජ ගාමෙසු නිගමෙසු ච, ඉධ ධම්මං චරිත්වාන රාජ සග්ගං ගමිස්සසි.
3124. ධම්මං චර මහාරාජ රට්ඨෙසු ජනපදෙසු ච, ඉධ ධම්මං චරිත්වාන රාජ සග්ගං ගමිස්සසි.
3125. ධම්මං චර මහාරාජ සමණබ්රාහ්මණෙසු ච, ඉධ ධම්මං චරිත්වාන රාජ සග්ගං ගමිස්සසි.
3126. ධම්මං චර මහාරාජ මිගපක්ඛීසු ඛත්තිය, ඉධ ධම්මං චරිත්වාන රාජ සග්ගං ගමිස්සසි.
3127. ධම්මං චර මහාරාජ ධම්මො චිණ්ණො{1} සුඛාවහො, ඉධ ධම්මං චරිත්වාන රාජ සග්ගං ගමිස්සසි.
3128. ධම්මං චර මහාරාජ සඉන්දා{2} දෙව සබ්රහ්මකා, සුචිණ්ණෙන දිවං{3} පත්තා මා ධම්මං රාජ පමාදො
3129. තත්ථෙව තෙ වත්තපදා එසාව අනුසාසනී, සප්පඤ්ඤසෙවිකල්යාණී සමත්තං{4} සාමතං{5} විදූති.
තෙසකුණජාතකං.
2. සරභඞ්ගජාතකං.
3130. අලඞ්කතා කුණ්ඩලිනො සුවත්ථා වෙළුරියමුත්තා ථරුඛග්ගබන්ධා, රථෙසභා තිට්ඨථ කෙනු තුම්හෙ කථං වො ජානන්ති මනුස්සලොකෙ.
3131. අහමට්ඨකො භීම{6}රථො පනායං කාලිඞ්ගරාජා පන උග්ගතො අයං, සුසඤ්ඤතානං ඉසීනං දස්සනාය ඉධාගතා පුච්ඡිතායෙම්හ පඤ්හෙ.
3132. වෙහාසයං තිට්ඨති අන්තලික්ඛෙ පථද්ධුනො පණ්ණරසෙව චන්දො, පුච්ඡාමි තං යක්ඛ මහානුභාව කථං තං ජානන්ති මනුස්සලොකෙ.
3133. යමාහු දෙවෙසු සුජම්පතීති මඝවාති තං ආහු මනුස්සලොකෙ, සදෙවරාජා ඉදමජ්ජ පත්තො සුසඤ්ඤතානං ඉසීනං දස්සනාය.
3134. දූරෙ සුතා නො ඉසයො සමාගතා මහිද්ධිකා ඉද්ධිගුණූපපන්තා, වන්දාමි තෙ අයිරෙ පසන්නචිත්තො යෙ ජීවලොකෙත්ථ මනුස්සසෙට්ඨා.
3135. ගන්ධො ඉසීනං චිරදික්ඛිතානං කායා චුතො ගච්ඡති මාළුතෙන, ඉතො පටික්කම්ම සහස්සනෙත්ත ගන්ධො ඉසීනං අසුචි දෙවරාජ.
3136. ගන්ධො ඉසීනං චිරදික්ඛිතානං කායා චුතො ගච්ඡතු{1} මාළුතෙන, විචිත්රපුප්ඵං සුරභිංව මාලං ගන්ධං එතං පාටිකඞ්ඛාම භන්තෙ න හොත්ථ දෙවා පටික්කූලසඤ්ඤිනො.
3137. පුරින්දදො භූතපතී යසස්සී දෙවානමින්දො මඝවා සුජම්පති, ස දෙවරාජා අසුරගණප්පමද්දනො ඔකාසමාකඞ්ඛති පඤ්හ{2}පුච්ඡිතුං.
3138. කොනෙවිමෙසං ඉධ පණ්ඩිතානං පඤ්හෙ පුට්ඨො නිපුණෙ ව්යාකරිස්සති, තිණ්ණඤ්ච රඤ්ඤං මනුජාධිපානං දෙවානමින්දස්ස ච වාසවස්ස.
3139. අයං ඉසී සරභඞ්ගො යසස්සී යතො ජාතො විරතො මෙථුනස්මා, ආචරිය{3}පුත්තො සුචිනීතරූපො සො නෙසං පඤ්හානි ව්යාකරිසස්ති.
3140. කොණ්ඩඤ්ඤ පඤ්හානි වියාකරොහි යාචන්ති තං ඉසයො සාධුරූපා, කොණ්ඩඤ්ඤ එසො මනුජෙසු ධම්මා යං වුඩ්ඪමාගච්ඡති එස භාරො.
3141. කතාවකාසා පුච්ඡන්තු භොන්තො යං කිඤ්චි පඤ්හං මනසාභිපත්ථිතං, අහං හි තං තං වො වියාකරිස්සං ඤත්වා සයං ලොකමිමං පරඤ්ච.
3142. තතො ච මඝවා සක්කො අත්ථදස්සී පුරින්දදො, අපුච්ඡි පඨමං පඤ්හං යඤ්චාසි අභිපත්ථිතං.
3143. කිංසු වධිත්වා න කදාචි සොචති කිස්සප්පහානං ඉසයො වණ්ණයන්ති, කස්සීධ වුත්තං ඵරුසං ඛමෙථ අක්ඛාහි මෙ කොණ්ඩඤ්ඤ එතමත්ථං.
3144. කොධං වධිත්වා න කදාචි සොචති මක්ඛප්පහානං ඉසයො වණ්ණයන්ති, සබ්බෙසං වුත්තං ඵරුසං ඛමෙථ එතං ඛන්තිං උත්තමමාහු සන්තො.
3145. සක්කා උභින්නං වචනං තිතික්ඛිතුං සදිසස්ස වා සෙට්ඨතරස්ස වාපි, කථන්නු හීනස්ස වචො ඛමෙථ අක්ඛාහි මෙ කොණ්ඩඤ්ඤ එතමත්ථං.
3146. භයා හි සෙට්ඨස්ස වචො ඛමෙථ සාරම්භහෙතු පන සාදිසස්ස, යො චිධ හීනස්ස වචො ඛමෙථ එතං ඛන්තිං උත්තමමාහු සන්තො.
3147. කථං විජඤ්ඤා චතුමට්ඨරූපං සෙට්ඨං සරික්ඛං අථවාපි හීනං, විරූපරූපෙන චරන්ති සන්තො තස්මා හි සබ්බෙස වචො ඛමෙථ.
3148. න හෙතමත්ථං මහතීපි සෙනා සරාජිකා යුජ්ඣමානා ලභෙථ, යං ඛන්තිමා සප්පුරිසො ලභෙථ ඛන්තීබලස්සූපසමන්ති වෙරා.
3149. සුභාසිතන්තෙ අනුමොදියාන අඤ්ඤං තං පුච්ඡාමි තදිඞ්ඝ බ්රූහි, යථා අහූ දණ්ඩකී නාළිකීරො{1} අථජ්ජුනො කලාබු චාපි රාජා, තෙසං ගතිං බ්රූහි සුපාපකම්මිනං කත්ථුපපන්නා ඉසීනං විහෙඨකා.
3150. කිසං හි{2} වච්ඡං අවකිරිය{3} දණ්ඩකී උච්ඡින්නමූලො සජනො සරට්ඨො, කුක්කුලනාමෙ නිරයම්හි පච්චති තස්ස ඵුලිඞ්ගානි පතන්ති කායෙ.
3151. යො සඤ්ඤතෙ පබ්බජිතෙ අහෙඨයි{1} ධම්මං භණන්තෙ සමණෙ අදූසකෙ, තං නාළිකීරං සුනඛා පරත්ථ සඞ්ගම්ම ඛාදන්ති විඵන්දමානං.
3152. අථජ්ජුනො නිරයෙ සත්තිසූලෙ අවංසිරො පතිතො උද්ධපාදො, අඞ්ගීරසං ගොතමං හෙඨයිත්වා ඛන්තිං තපස්සිං චිරබ්රහ්මචාරිං.
3153. යො ඛණ්ඩසො පබ්බජිතං{2} අඡෙදයී ඛන්තිං වදන්තං සමණං අදූසකං, කාලබුවීචිං උපපජ්ජ පච්චති මහාපතාපං කටුකං භයානකං.
3154. එතානි සුත්වා නිරයානි පණ්ඩිතො අඤ්ඤානි පාපිට්ඨතරානි චෙත්ථ, ධම්මං චරෙ සමණබ්රාහ්මණෙසු එවං කා සග්ගමුපෙති ඨානං.
3155. සුභාසිතං තෙ අනුමොදියාන අඤ්ඤං තං පුච්ඡාමි තදිඞ්ඝ බ්රූහි කථං විධං සීලවන්තං වදන්ති කථං විධං පඤ්ඤවන්තං වදන්ති, කථං විධං සප්පුරිසං වදන්ති කථං විධං නො සිරි නො ජහාති.
3156. කායෙන වාචාය ච යො ධ සඤ්ඤතො මනසා ච කිඤ්චි න කාරොති පාපං, න අත්තහෙතු අලිකං භණාති{3} තථා විධං සීලවන්තං වදන්ති.
3157. ගම්භීර පඤ්හං මනසා විචින්තයං නාච්චාහිතං{4} කම්ම කරොති ලුද්දං, කාලාගතං අත්ථපදං න රිඤ්චති තථා විධං පඤ්ඤවන්තං වදන්ති.
3158. යො චෙ කතඤ්ඤූ කතවෙදි ධීරො කල්යාණමිත්තො දළ්හභත්තී ච හොති, දුඛිතස්ස සක්කච්ච කරොති කිච්චං තථාවිධං සප්පුරිසං වදන්ති.
3159. එතෙහි සබ්බෙහි ගුණෙහුපෙතො සද්ධො මුදු සංවිභාගී වදඤ්ඤූ, සඞ්ගාහකං සඛිලං සණ්හවාචං තථාවිධං නො සිරි නො ජහාති.
3160. සුභාසිතන්තෙ අනුමොදියාන අඤ්ඤං තං පුච්ඡාමි තදිඞ්ඝ බ්රූහි, සීලං සිරිඤ්චාපි සතඤ්ච ධම්මං පඤ්ඤච්ච කං සෙට්ඨතං වදන්ති.
3161. පඤ්ඤා හි සෙට්ඨා කුසලා වදන්ති නක්ඛත්තරාජාරිව තාරකානං, සීලං සිරිඤ්චාපි සතඤ්ච ධම්මො අන්වායිකා පඤ්ඤවතො භවන්ති.
3162. සුභාසිතන්තෙ අනුමොදියාන අඤ්ඤං තං පුච්ඡාමි තදිඞ්ඝ බ්රූහි, කථංකරො කින්තිකරො කිමාචරං කිං සෙවමානො ලභතීධ පඤ්ඤං, පඤ්ඤායිදානි{1} පටිපදං වදෙහි කථං කරො පඤ්ඤවා හොති මච්චො.
3163. සෙවෙථ වුඩ්ඪෙ නිපුණෙ බහුස්සුතෙ උග්ගාහකො පරිපුච්ඡකො{2} සියා, සුණෙය්ය සක්කච්ච{3} සුභාසිතානි එවංකරො පඤ්ඤවා හොති මච්චො.
3164. ස පඤ්ඤවා කාමගුණෙ අවෙක්ඛති අනිච්චතො දුක්ඛතො රොගතො ච, එවං විපස්සී පජහාති ඡන්දං දුක්ඛෙසු කාමෙසු මහබ්භයෙසු.
3165. සවීතරාගො පවිනෙය්ය දොසං මෙත්තං චිත්තං භාවයෙ අප්පමාණං, සබ්බෙසු භූතෙසු නිධාය දණ්ඩං අනින්දිතො බ්රහ්මමුපෙති ඨානං.
3166. මහිද්ධියං{1} ආගමනං අහොසි තවමට්ඨක භීමරථස්ස චාපි, කාලිඞ්ගරාජස්ස ච උග්ගතස්ස සබ්බෙස{2} වො කාමරාගො පහීනො.
3167. එවං මෙතං පරචිත්තවෙදී සබ්බෙස නො කාමරාගො පහීනො, කරොහි ඔකාසමනුග්ගහාය යථාගතිං තෙ අභිසම්භවෙම.
3168. කරොමි ඔකාසමනුග්ගහාය තථා හි වො කාමරාගො පහීනො, ඵරාථ කායං විපුලාය පීතියා යථා ගතිං මෙ අභිසම්භවෙථ.
3169. සබ්බං කරිස්සාම තවානුසාසනං යං යං තුවං වක්ඛසි භූරිපඤ්ඤ, ඵරාථ කායං විපුලාය පීතියා යථා ගතිං මෙ අභිසම්භවෙම.
3170. කතායං වච්ඡස්ස කිසස්ස පූජා ගච්ඡන්තු භොන්තො ඉසයො සාධුරූපා, ඣානෙ රතා හොථ සදා සමාහිතා එසා රතී පබ්බජිතස්ස සෙට්ඨා.
3171. සුත්වාන ගාථා පරමත්ථසඤ්හිතා සුභාසිතා ඉසිනා පණ්ඩිතෙන, තෙ වෙදජාතා අනුමොදමානා පක්කාමු දෙවා දෙවපුරං යසස්සිනො.
3172. ගාථා ඉමා අත්ථවතී සුබ්යඤ්ජනා සුභාසිතා ඉසිනා පණ්ඩිතෙන, යො කොචිමා අට්ඨිකත්වා සුණෙය්ය ලභෙථ පුබ්බාපරියං විසෙසං ලද්ධාන පුබ්බාපරියං විසෙසං අදස්සනං මච්චුරාජස්ස ගච්ඡෙ.
3173. සාලීස්සරො සාරිපුත්තො මෙණ්ඩිස්සරො නාම කස්සපො, පබ්බතො අනුරුද්ධො ච කච්චායනො ච දෙවලො.
3174. අනුසිස්සො ච ආනන්දො කිසවච්ඡො ච කොලිතො, නාරදො පුණෙණා මන්තානිපුත්තො සෙසපරිසා බුද්ධපරිසා සරභඞ්ගො ලොකනාථො එවං ධාරෙථ ජාතකන්ති.
සරභඞ්ගජාතකං.
3. අලම්බුසාජාතකං.
3175. අථබ්රවි බ්රහා ඉන්දො වත්රභූ ජයතං පිතා, දෙවකඤ්ඤං පරාභෙත්වා සුධම්මායං අලම්බුසං.
3176. මිස්සෙ දෙවා තං යාචන්ති තාවතිංසා සඉන්දකා, ඉසිපලොභිකෙ ගච්ඡ ඉසිසිඞ්ගං අලම්බුසෙ.
3177. පුරායං අම්හෙ අච්චෙති වතවා බ්රහ්මචරියවා, නිබ්බානාභිරතො වුද්ධො තස්ස මග්ගානි ආවර.
3178. දෙවරාජ කිමෙව ත්වං මමෙව තුවං සික්ඛසි, ඉසි පලොභිකෙ ගච්ඡ සන්ති අඤ්ඤාපි අච්ඡරා.
3179. මාදිසියො පවරා චෙව අසොකෙ නන්දනෙ වනෙ, තාසම්පි හොතු පරියායො තාපි යන්තු පලොභිකා.
3180. අද්ධා හි සච්චං භණසි සන්ති අඤ්ඤාපි අච්ඡරා, තාදිසියො පවරා චෙව අසොකෙ නන්දානෙ වනෙ.
3181. න තා එවං පජානන්ති පාරිචරියං පුමංගතා, යාදිසං ත්වං පජානාසි නාරි සබ්බඞ්ග සොභනෙ.
3182. ත්වමෙව ගච්ඡ කල්යාණි ඉත්ථීනං පවරා චසි, තවෙව වණ්ණරූපෙන වසමානාපයිස්සසි.{1}
3183. න චාහං න ගමිස්සාමි දෙවරාජෙන පෙසිතා, විභෙමි චෙතං ආසාදුං උග්ගතෙජො හි බ්රාහ්මණො.
3184. අනෙකෙ නිරයං පත්තා ඉසිමාසාදියා ජනා, ආපන්නා මොහසංසාරං තස්මා ලොමානි හංසයෙ.
3185. ඉදං වත්වාන පක්කාමි අච්ඡරා කාමවණ්ණිනී, මිස්සා මිස්සෙතු{2}මිච්ඡන්ති ඉසිසිඞ්ගං අලම්බුසා.
3186. සා ච තං වනමොගය්හ ඉසිසිඞ්ගෙන රක්ඛිතං, බිම්බි{1}ජාලකසඤ්ඡන්නං සමන්තා අඩ්ඪයොජනං.
3187. පාතොව පාතරාසම්හි උදන්හසමයං පටි, අග්ගිට්ඨං පරිමජ්ජන්තං ඉසිසිඞ්ගං උපාගමි.
3188. කානු විජ්ජුරිවාහාසි ඔසධී විය තාරකා, විචිත්තවත්ථාභරණා ආමුත්තමණිකුණ්ඩලා.
3189. ආදිච්චවණ්ණසඞ්කාසා හෙමචන්දනගන්ධිනී, සඤ්ඤතූරු මහාමායා කුමාරී චාරුදස්සනා.
3190. විලාකා{2} මුදුකා සුද්ධා පාදා තෙ සුප්පතිට්ඨිතා, කමනා{3} කමනීයා තෙ හරන්තියෙව මෙ මනො.
3191. අනුබ්බා ච තෙ ඌරු නාගනාසසමූපමා, විමට්ඨා තුය්හං සුස්සොණී අක්ඛස්ස ඵලකං යථා.
3192. උප්පලස්සෙව කිඤ්ජක්ඛා නාභි තෙ සාධු සණ්ඨිතා, පූරාකඤ්හඤ්ජනස්සෙව දූරතො පටිදිසස්ති.
3193. දුවිධා ජාතා උරජා අවණ්ටා සාධුපච්චුදා, පයොධරා අප්පතීතා අඩ්ඪලාබුසමා ථනා.
3194. දීඝා කම්බුතලාභාසා ගීවා එණෙය්යකා යථා, පණ්ඩරාවරණා වග්ගු චතුත්ථමනසන්නිභා.
3195. උද්ධග්ගා ච අධග්ගා ච දුමග්ගපරිමජ්ජිතා, දුවිජා නෙලසම්භූතා දින්නා තව සුදස්සනා.
3196. අපණ්ඩරා ලොහිතන්තා ජිඤ්ජුකඵලසන්නිභා, ආයතා ච විසාලා ච නෙත්තා තව සුදස්සනා.
3197. නාතිදීඝා සුසම්මට්ඨා කනකබ්යාසමොචිතා, උත්තමඞ්ගරුහා තුය්හං කෙසා චන්දනගන්ධිකා.
3198. යාවතා කසිගොරක්ඛා වාණිජානඤ්ච යා ගති, ඉසීනඤ්ච පරක්ඛන්තං සඤ්ඤතානං තපස්සිනං.
3199. න තෙ සමසමං පස්සෙ අස්මිං පඨවිමණ්ඩලෙ, කො වා ත්වං කස්ස වා පුත්තො කථං ජානෙමු තං මයං.
3200. න පඤහකාලො භද්දන්තෙ කස්සපෙවං ගතෙ සතී, එහි සම්ම රමිස්සාම උභො අස්මාක අස්සමෙ එහි තං උපගූහිස්සං රතීනං කුසලො භව.
3201. ඉදං වත්වාන පක්කාමි අච්ඡරා කාමවණ්ණිනී, මිස්සා මිස්සෙතුමිච්ඡන්ති ඉසිඞ්ගං අලම්බුසා.
3202. සො ච වෙගෙන නික්ඛම්ම ඡෙත්වා දන්ධපරක්කමං, තමුත්තමාසු වෙණීසු අජ්ඣප්පත්තො පරාමසී.
3203. තමුදාවත්ත කල්යාණි පළිස්සජි සුසොභනා, චවි තම්හි බ්රහ්මචරියා යථා තං අථ තොසිතා.
3204. මනසා අගමා ඉන්දං වසන්තං නන්දනෙ වනෙ, තස්සා සඞ්කප්පමඤ්ඤාය මඝවා දෙවකුඤ්ජරො.
3205. පල්ලඞ්කං පහිණී ඛිප්පං සොවණ්ණං සොපවාහනං, ස උත්තරච්ඡදපඤ්ඤාසං සහස්සපටිකත්ථතං.
3206. තමෙනං තත්ථ ධාරෙසි උරෙ කත්වාන සොභනා, යථා එකමුහුත්තංව තීණි වස්සානි ධාරයි.
3207. විමදො තීහි වස්සෙහි පබුජ්ඣිත්වාන බ්රාහ්මණො, අද්දසාසි හරිතරුක්ඛෙ සමන්තා අග්ගියායනං.
3208. නවපත්තවනං ඵුල්ලං කොකිලාගණඝොසිතං, සමන්තා ස විලොකෙත්වා{1} රුදං අස්සූනි වත්තයි.
3209. න ජුහෙ න ජපෙ මන්තෙ අග්ගිහුත්තං පහාපිතං, කොනු මෙ පාරිචරියාය පුබ්බෙ චිත්තං පලොභයි.
3210. අරඤ්ඤෙ මෙ විහරතො යො මෙ තෙජාහ සම්භතං, නානාරතනපරිපුණ්ණං නාවංව ගණ්හි අණ්ණවෙ.
3211. අහන්තෙ පාරිචරියාය දෙවරාජෙන පෙසිතා, අවධිං චිත්තං චිතෙතන පමාදා ත්වං න බුජ්ඣසි.
3212. ඉමානි කිර මං තාතො කස්සපො අනුසාසති, කමලාසරිසිත්ථියො තායො බුජ්ඣෙසි මාණව.
3213. උරෙ ගණ්ඩායො බුජ්ඣෙසි තායො බුජ්ඣෙසි මාණව, ඉච්චානුසාසි මං තාතො යථා මං අනුකම්පකො.
3214. තස්සාහං වචනං නාකං පිතු වුද්ධස්ස සාසනං, අරඤ්ඤෙ නිම්මනුස්සම්හි ස්වාජ්ජ ඣායාමි එකකො.