3027. තිණලතානි ඔසධ්යො පබ්බතානි වනානි ච, රාජපුත්තං අපස්සන්තී තුම්හම්හි සරණං ගතා.
3028. වන්දෙ ඉන්දීවරීසාමං රත්තිං නක්ඛත්තමාලිනිං, රාජපුත්තං අපස්සන්තී තුම්හම්හි සරණං ගතා.
3029. වන්දෙ භාගීරථිං ගඞ්ගං සවන්තීනං පටිග්ගහං, රාජපුත්තං අපස්සන්තී තුම්හම්හි සරණං ගතා.
3030. වන්දෙ අහං පබ්බතරාජසෙට්ඨං හිවවන්තං සිලුච්චයං, රාජපුත්තං අපස්සන්තී තුම්හම්හි සරණං ගතා.
3031. අතිසායං වතාගඤ්ජි රාජපුත්ති යසස්සිනි, කෙනනුජ්ජ සමාගඤජි කො තෙ පියතරො මයා.
3032. ඉදං ඛොහං තදවොචං ගහිතා තෙන සත්තුනා, න මෙ ඉදං තථා දුක්ඛං යං මං ඛාදෙය්ය රක්ඛසො යඤ්ච මෙ අය්යපුත්තසස මනො හෙසස්ති අඤ්ඤථා.
3033. චොරීනං බහුබුද්ධීනං යාසු සච්චං සුදුල්ලභං, ථිනං භාවො දුරාජානො මච්ඡස්සෙවොදකෙ ගතං.
3034. තථා මං සච්චං පාලෙතු පාලයිසස්ති චෙ මමං, යථාහං නාභිජානාමි අඤ්ඤං පියතරං තයා එතෙන සච්චවජ්ජෙන ව්යාධි තෙ වූපසම්මතු.
3035. යෙ කුඤ්ජරා සත්තසතා උළාරා රක්ඛන්ති රත්තින්දිවං උය්යුතාවුධා, ධනුග්ගහානඤ්ච සතානි සොළස කථං විධෙ පස්සසි භද්දෙ සත්තවො.
3036. අලඞ්කතායො පදුමුත්තරත්තවා විරාගිතා පස්සති භංසගග්ගරා, තාසං සුණිත්වා මිතගීතවාදිතං න දානි මෙ තාත තථා යථා පුරෙ.
3037. සුවණ්ණසඞ්කච්චධරා සුචිග්ගහා අලඞ්කතා මානුසියච්ඡරූපමා, සෙනොපියා තාත අනින්දිතඞ්ගියො{1} ඛත්තියකඤ්ඤා පටිලොභයන්ති නං.
3038. සචෙ අහං තාත තථා යථා පුරෙ පතිං තමුඤ්ඡාය{2} පුනා වනෙ භරෙ, සම්මානයෙ මං න ච මං විමානයෙ ඉතොපි මෙ තාත තතො වරං සියා.
3039. යමන්නපානෙ විපුලස්මි ඔහිතෙ නාරි විමට්ඨාභරණා අලඞ්කතා, සබ්බඞ්ගු{3}පෙතා පතිනො ච අප්පියා අඛජ්ඣ තස්සා මරණං තතො වරං.
3040. අපි චෙ දළිද්දා කපණා අනාළ්හියා{4} කටාදුතීයා පතිනොච සා පියා, සබ්බඞ්ගුපෙතායපි අප්පියාය අයමෙව සෙය්යා කපණාපි යා පියා.
3041. සුදුල්ලභිත්ථි පුරිසස්ස යා හිතා භත්තිත්ථියා දුල්ලභො යො හිතො ච, හිතා ච තෙ සීලවතී ච භරියා ජනින්ද ධම්මං චර සම්බුලාය.
3042. සචෙ තුවං විපුලෙ{5} ලද්ධභොගෙ ඉස්සාවතිණ්ණා මරණං උපෙසි, අහඤ්ච තෙ භද්දෙ ඉමා රාජකඤ්ඤා සබ්බෙව තෙ වචනකරා භවාමාති.
සම්බුලා ජාතකං.
10. ගන්ධතින්දුකජාතකං.{*}
3043. අප්පමාදො අමතපදං පමාදො මච්චුනො පදං, අප්පමත්තා න මීයන්ති යෙ පමත්තා යථා මතා.
3044. මදා පමාදො ජායෙථ පමාදා ජායතෙ ඛයො, ඛයා ච දොසා{1} ජායන්ති මා මදො භරතූසභ.{2}
3045. බහූ හි ඛත්තියා ජිනා අත්ථං රට්ඨං පමාදිනො, අථොපි ගාමිනො ගාමා අනාගාරා අගාරිනො.
3046. ඛත්තියස්ස පමත්තස්ස රට්ඨස්මිං රට්ඨවඩ්ඪන, සබ්බෙ භොගා විනස්සන්ති රඤ්ඤො තං වුච්චතෙ අඝං.
3047. නෙස ධම්මො මහාරාජ අතිවෙලං පමජ්ජසි, ඉද්ධං ඵීතං ජනපදං චොරා විද්ධංසයන්ති නං.
3048. න තෙ පුත්තා භවිස්සන්ති න හිරඤ්ඤං න ධානියං, රට්ඨෙ විලුප්පමානම්හි සබ්බභොගෙහි ජීයසි.
3049. සබ්බභොගපරිජිණ්ණං රාජානං වාපි ඛත්තියං{3}, ඤාතිමිත්තා සුහජ්ජා ච න තං මඤ්ඤන්ති මානියං.{4}
3050. හත්ථාරොහා{5} අනීකට්ඨා රථිකා පත්තිකාරකා, තමෙවමුපජීවන්තා න තං මඤ්ඤන්ති මානියං.
3051. අසංවිහිතකම්මන්තං බාලං දුම්මන්ති මන්තිනං, සිරී ජහති දුම්මෙධං ජිණ්ණංව උරගො තචං.
3052. සුසංවිහිතකම්මන්තං කාලුට්ඨායිං අතන්දිතං, සබ්බෙ භොගාභිවඩ්ඪන්ති ගාවො සඋසභාමිව.
3053. උපස්සුතිං මහාරාජ රට්ඨෙ ජනපදෙ චර, තත්ථ දිස්වා ච සුත්වා ච තතො තං පටිපජ්ජසි,
3054. එවං වෙදෙතු පඤ්චාලො සඞ්ගාමො සරසමප්පිතො,{6} යථාහමජ්ජ වෙදෙමි කණ්ටකෙන සමප්පිතො.
3055. ජිණ්ණො දුබ්බලචක්ඛූසි න රූපං සාධු පස්සසි, කිං තත්ථ බ්රහ්මදත්තස්ස යං තං මග්ගෙය්ය කණ්ටකො.
3056. බව්හෙත්ථ{1} බ්රාහ්මදත්තස්ස යොහං මග්ගස්මි{2} බ්රාහ්මණ, අරක්ඛිතා ජානපදා අධම්මබලිනා හතා.
3057. රත්තිඤ්ච චොරා ඛාදන්ති දිවා ඛාදන්ති තුණ්ඩියා, රට්ඨස්මිං කූටරාජස්ස බහු අධම්මිකො ජනො.
3058. එතාදිසෙ භයෙ තාත{3} භයට්ටා තාව{4} මානවා, නිල්ලෙනකානි කුබ්බන්ති වනෙ ආහත්ව{5} කණ්ටකං.
3059. කදාස්සු නාමයං රාජා බ්රහ්මදත්තො මරිස්සති, යස්ස රට්ඨම්හි{6} ජීයන්ති{7} අප්පතීකා{8} කුමාරිකා.
3060. දුබ්භාසිතඤ්හි තෙ ජම්මි අනත්ථපදකොවිදෙ, කුහිං රාජා කුමාරීනං භත්තාරං පරියෙසති.
3061. න මෙ දුබ්භාසිතං බ්රහ්මෙ කොවිදත්ථපදා අහං, අරක්ඛිතා ජානපදා අධම්මබලිනා හතා.
3062. රත්තිඤ්ච චොරා ඛාදන්ති දිවා ඛාදන්ති තුණ්ඩියා, රට්ඨස්මිං කූටරාජස්ස බහු අධම්මිකො ජනො දුජ්ජීවෙ දුබ්භරෙ{9} දාරෙ කුතො භත්තා කුමාරියො.
3063. එවං සයතු පඤ්චාලො සඞ්ගාමෙ සත්තියා හතො, යථායං කපණො සෙති භතො ඵාලෙන සාලියො.
3064. අධම්මෙන තුවං ජම්ම බ්රාහ්මදත්තස්ස කුජ්ඣසි, යො ත්වං සපසි රාජානං අපරජ්ඣිත්වාන අත්තනො.{1}
3065. ධම්මෙන බ්රහ්මදත්තස්ස අහං කුජ්ඣාමි බ්රාහ්මණ, අරක්ඛිතා ජානපදා අධම්මබලිනා හතා.
3066. අත්තිඤ්ච චොරා ඛාදන්ති දිවා ඛාදන්ති තුණ්ඩියා, රට්ඨස්මිං කූටරාජස්ස බහු අධම්මිකො ජනො.
3067. සා නූන පුන රෙ පක්කා විකාලෙ භත්තමාහරි, භත්තහාරිං අපෙක්ඛන්තො හතො ඵාලෙන සාලියො.
3068. එවං හඤ්ඤතු පඤ්චාලො සඞ්ගාමෙ අසිනා හතො,{2} යථාහමජ්ජ පහටො ඛීරඤ්ච මෙ පවට්ටිතං.{3}
3069. යං පසු ඛීරං ඡඩ්ඩෙති පසුපාලඤ්ච හිංසති.{4} කිං තත්ථ බ්රහ්මදත්තස්ස යං නො ගරහතෙ{5} භවං.
3070. ගාරය්හො බ්රහ්මෙ පඤ්චාලො බ්රහ්මදත්තස්ස රාජිනො, අරක්ඛිතා ජානපදා අධම්මබලිනා හතා.
3071. රත්තිඤ්ච චොරා ඛාදන්ති දිවා ඛාදන්ති තුණ්ඩියා, රට්ඨස්මිං කූටරාජස්ස බහු අධම්මිකො ජනො.
3072. චණ්ඩා අටනකා ගාවී යං පුරෙ න දුහාමසෙ, තං දානි අජ්ජ දොහාම ඛීරකාමෙහුපද්දුතා.
3073. එවං කඤ්ඤතු පඤ්චාලො විපුත්තො විප්පසුක්ඛතු, යතායං කපණා ගාවී විපුත්තා පරිධාවති.
3074. යං පසු පසුපාලස්ස පබ්භමෙය්ය රවෙය්ය වා, කොනිධ අපරාධත්ථි බ්රහ්මදත්තස්ස රාජිනො.
3075. අපරාධො මහාබ්රහ්මෙ බ්රහ්මදත්තස්ස රාජිනො, අරක්ඛිතා ජානපදා අධම්මබලිනා හතා.
3076. රත්තිඤ්ච චොරා ඛාදන්ති දිවා ඛාදන්ති තුණ්ඩියා, රට්ඨස්මිං කූටරාජස්ස{1} බහු අධම්මිකො ජනො කථං නො අසිකොසත්ථා ඛීරපා හඤ්ඤතෙ පජා.
3077. එවං ඛජ්ජතු පඤ්චාලො හතො යුද්ධෙ සපුත්තකො, යථාහමජ්ජ ඛජ්ජාමි ගාමකෙහි{2} අරඤ්ඤජො.
3078. න සබ්බභූතෙසු විධෙන්ති රක්ඛං රාජානො මණ්ඩුක මනුස්සලොකෙ නෙන්තාවතා රාජා අධම්මචාරී යා තාදිසං ජිවමදෙය්යුං ධඞ්කා.
3079. අධම්මරූපො වත බ්රහ්මචාරි අනුම්පියං{3} භාසසි{4} ඛත්තියස්ස, විලුම්පමානාය{5} පුථුප්පජාය පූජෙසි රාජං පරමප්පවාදං.{6}
3080. සචෙ ඉදං බ්රහ්මෙ සුරජ්ජකං සියා ඵීතං රට්ඨං මුදිතං විප්පසන්නං, භුත්වා බලිං අග්ගපිණ්ඩඤ්ච කාකා න මාදිසං ජිවමදෙය්යුං ධඞ්කාති.
ගන්ධතින්දුක{*} ජාතකං.
තිංසති නිපාතො නිට්ඨිතො.
තස්සුද්දානං:
කිංඡන්ද කුම්භජයද්දිසඡද්දන්ත අථ පණ්ඩිත සම්භව සීරකම්පි, දකරක්ඛස පණ්ඩරනාසවරො අථ සම්බුල තින්දුකදෙවපුත්තොති.
17. චත්තාළීසනිපාතො
1. තෙසකුණජාතකං
3081. වෙස්සන්තරං තං පුච්ඡාමි සකුණා භද්දමත්ථු තෙ, රජ්ජං කාරෙතුකාමෙන කිංසු කිච්චං කතං වරං.
3082. චිරස්සං වත මං තාතො කංසො බාරාණසිග්ගහො, පමත්තො අප්පමත්තම්පි{1} පිතා පුත්තං අචොදයි.
3083. පඨමෙනෙව විතථං කොධං හාසං නිවාරයෙ, තතො කිච්චානි කාරෙය්ය තං වතං{2} ආහු ඛත්තිය.
3084. යං ත්වං තාත තපෙ{3} කම්මං පුබ්බෙකතමංසයං, රත්තො දුට්ඨො ච යං කයිරා න තං කයිරා තතො පුන.
3085. ඛත්තියස්ස පමත්තස්ස රට්ඨස්මිං රට්ඨවඩ්ඪන, සබ්බෙ භොගා විනස්සන්ති රඤ්ඤො තං වුච්චතෙ අඝං.
3086. සිරී ච තාත ලක්ඛී{4} ච පුච්ඡිතා එතදබ්රවුං, උට්ඨානවිරියෙ පොසෙ රමාහං අනුසූයකෙ{5}.
3087. උසූයකෙ{6} දූහදයෙ පුරිසෙ කම්මදූසකෙ,{7} කාලකණ්ණි මහාරාජ රමතී චක්කභඤ්ජනී.
3088. සො ත්වං සබ්බෙසු{8} සුහදයො සබ්බෙසං රක්ඛිතො භව, අලක්ඛිං නුද මහාරාජ ලක්ඛ්යා භව නිවෙසනං.
3089. සලක්ඛී ධිතිසම්පන්නො පුරිසො හි මහග්ගතො, අමිත්තානං කාසිපති මූලං අග්ගඤ්ච ඡින්දති.
3090. සක්කොපි හි භූතපති උට්ඨානෙ නප්පමජ්ජති, සකල්යාණෙ ධිතිං කත්වා උට්ඨානෙ කුරුතෙ මනො.
3091. ගන්ධබ්බා පිතරො දෙවා සජීවා{9} හොන්ති තාදිනො, උට්ඨහතො අප්පමජ්ජතො අනුතිට්ඨන්ති දෙවතා.
3092. සො අප්පමත්තො අකුද්ධො තාත කිච්චානි කාරය, වායමස්සු ච කිච්චෙසු{1} නාලසො වින්දතෙ සුඛං.
3093. තත්ථෙව තෙ වත්තපදා එසාව අනුසාසනී, අලං මිත්තෙ සුඛාපෙතුං අමිත්තානං දුඛාය ච.
3094. සඛී{2} තුවං කුණ්ඩලිනී මඤ්ඤසි ඛත්තබන්ධුනී, රජ්ජං කාරෙතු කාමෙන කිංසු කිච්චං කතං වරං.
3095. ද්වෙව තාත පදකානි යත්ථ සබ්බං පතිට්ඨිතං, අලද්ධස්ස ච යො ලාභො ලද්ධස්ස අනුරක්ඛනා.
3096. අමච්චෙ තාතා ජානාහි ධීරෙ අත්ථස්ස කොවිදෙ, අනක්ඛාකිතවෙ{3} තාත අසොණ්ඩෙ අවිනාසකෙ.
3097. යො ච තං තාත රක්ඛෙය්ය ධනං යඤ්චෙව තෙ සියා, සූතොව රථං සඞ්ගණ්හෙ සො තෙ කිච්චානි කාරයෙ.
3098. සුසඞ්ගහීතන්තජනො සයං විත්තං අවෙක්ඛිය, නිධිඤ්ච ඉණදානඤ්ච න කරෙ පරපත්තියා.
3099. සයං ආයං වයං ජඤ්ඤා සයං ජඤ්ඤා කතාකතං, නිග්ගණ්හෙ නිග්ගහාරහං පග්ගණ්හෙ පග්ගහාරහං.
3100. සයං ජානපදං අත්ථං අනුසාස රථෙසභ, මා තෙ අධම්මිකා යුත්තා ධනං රට්ඨඤ්ච නාසයුං.
3101. මා ච වෙගෙන කිච්චානි කාරෙසි කාරයෙසි වා, වෙගසා හි කතං කම්මං මන්දො පච්ඡානුතප්පති.
3102. මා තෙ අධිසරෙ මුච්ච{4} සුඛාළ්හමධිකොපිතං, කොධසා හි ඛහූ ඵිතා කුලා අකුලතං ගතා.
3103. මා තාත ඉස්සරොම්භීති අනත්ථාය පතාරයි, ඉත්ථීනං පුරිසානඤ්ච මා තෙ ආසි දුඛුද්රයො.
3104. අපෙතලොමහංසස්ස රඤ්ඤො කාමානුසාරිනො, සබ්බෙ භොගා විනස්සන්ති රඤ්ඤො තං වුච්චතෙ අඝං
3105. තත්ථෙව තෙ වත්තපදා එසාව අනුසාසනී, දක්ඛස්සුදානි පුඤ්ඤකරො අසොණ්ඩො අවිනාසකො සීලවස්සු{1} මහාරාජ දුස්සීලො විනිපාතිකො.
3106. අපුච්ඡිම්හා කොසියගොත්තං කුණ්ඩලිනිං තථෙව ච, ත්වං දානි වදෙහි ජම්බුක බලානං බලමුත්තමං.
3107. බලං පඤ්චවිධං ලොකෙ පුරිසස්මිං මහග්ගතෙ, තත්ථ බාහුබලන්නාම චරිමං වුච්චතෙ බලං.
3108. භොගබලඤ්ච දීඝාවු දුතියං වුච්චතෙ බලං අමච්චබලඤ්ච දීඝාවු තතියං වුච්චතෙ බලං.
3109. අභිජච්චබලඤ්චෙව තං චතුත්ථං අසංසයං, යානි එතානි සබ්බානි අධිගණ්හාති පණ්ඩිතො.
3110. තං බලානං බලසෙට්ඨං අග්ගං පඤ්ඤාබලං වරං, පඤ්ඤාබලෙනුපත්ථද්ධො අත්ථං වින්දති පණ්ඩිතො.
3111. අපි චෙ ලභති මන්දො ඵීතං ධරණිමුත්තමං, අකාමස්ස පසය්හ වා අඤ්ඤො තං පටිපජ්ජති.
3112. අභිජාතොපි චෙ හොති රජ්ජං ලද්ධාන ඛත්තියො, දුප්පඤ්ඤො හි කාසිපති සබ්බෙනපි න ජීවති.
3113. පඤ්ඤා සුතං විනිච්ඡිනී පඤ්ඤා කින්තිසිලොකවඩ්ඪනී,{3} පඤ්ඤාසහිතො නරො ඉධ අපි දුක්ඛෙපි සුඛානි{4} වින්දති.
3114. පඤ්ඤඤ්ච ඛො අසුස්සූසං න කොචි අධිගච්ඡති, බහුස්සුතං අනාගම්ම ධම්මට්ඨං අවිනිබ්භුජං.
3115. යො ච ධම්මවිභාගඤ්ඤූ කාලුට්ඨායී අතන්දිතො{1}, අනුට්ඨහති කාලෙන තම්ඵලං{2} තස්ස ඉජ්ඣති.{3}
3116. අනායතන{4} සීලස්ස අනායතන සෙවිනො, න නිබ්බින්දියකාරිස්ස සම්මදත්ථො විපච්චති.
3117. අජ්ඣත්තඤ්ච පයුත්තස්ස තථායතනසෙවිනො, අනිබ්බින්දියකාරිස්ස සම්මදත්ථො විපච්චති.
3118. යොගප්පයොගසඞ්ඛාතං සම්භතස්සානුරක්ඛනං, තානි ත්වං තාත සෙවස්සු මා අකම්මාය රන්ධයි අකම්මුනා ච දුම්මෙධො නළාගාරංව සීදති.