2933. තං වො වදාමි භද්දං වො යාවන්තෙත්ථ සමාගතා, මාස්සු මිත්තාන දුබ්භිත්ථො මිත්තදුබ්භො හි පාපාකො.
2934. කුට්ඨි කිලාසි භවති යො මිත්තානං{2} ඉධද්දුභී, කායස්ස භෙදා මිත්තද්දු{3} නිරයං සො උපපජ්ජතීති.
මහාකපිජාතකං.
7. දකරක්ඛසපඤ්හො
2935. සචෙ වො වුය්හමානානං සත්තන්නං උදකණ්ණවෙ, මනුස්සබලිමෙසානො නාමං ගණ්හෙය්ය රක්ඛසො අනුපුබ්බං කථං දත්වා මුඤ්චෙසි දකරක්ඛිනො.
2936. මාතරං පඨමං දජ්ජං භරියං දත්වාන භාතරං, තතො සහායං දත්වාන පඤ්චමං දජ්ජං{4} බ්රාහ්මණං ඡට්ඨාහං දජ්ජමත්තානං නෙවදජ්ජං මහොසධං.
2937. පොසෙතා තෙ ජනෙත්තී ච දීඝරත්තානුකම්පිකා, ඡම්භී තයි පදුට්ඨස්මිං පණ්ඩිතා අත්ථදස්සිනී අඤ්ඤං උපනිසං කත්වා වධා තං පරිමොචයි.
2938. තං තාදිසං පාණදදිං ඔරසං ගබ්භධාරිණිං, මාතරං කෙන දොසෙන දජ්ජාසි දකරක්ඛිනො.
2939. දහරා විය අලඞ්කාරං ධාරෙති අපිළන්ධනං, දොවාරිකෙ අනීකට්ඨෙ අතිවෙලං පජග්ඝති.
2940. තතොපි පටිරාජානං සයං දූතානි සාසති, මාතරං තෙන දොසෙන දජ්ජාහං දකරක්ඛිනො.
2941. ඉත්ථිගුම්බස්ස පවරා අච්චන්තපියවාදිනී{1}, අනුග්ගතා{2} සීලවතී ඡායාව අනපායිනී.
2942. අක්කොධනා පඤ්ඤවතී පණ්ඩිතා අත්ථදස්සිකී, උබ්බරිං{3} කෙන දොසෙන දජ්ජාසි දකරක්ඛිනො
2943. ඛිඩ්ඪාරතිසමාපන්නං අනත්ථවසමාගතං, සා මං සකානං පුත්තානං අයාචං යාචතෙ ධනං.
2944. සොහං දදාමි සාරත්තො{4} බහුං උච්චාවචං ධනං, සුදුච්චජං චජිත්වාන පච්ඡා සොචාමි දුම්මනො උබ්බරිං තෙන දෙසෙන දජ්ජාමි දකරක්ඛිනො
2945. යෙනොචිතා ජානපදා{5} ආනීතා ච පටිග්ගහං, ආභතං පරරජ්ජෙහි අභිට්ඨාය{6} බහුං{7} ධනං.
2946. ධනුග්ගහානං පවරං සූරං තිඛිණමන්තිනං, භාරතං කෙන දොසෙන දජ්ජාසි දකරක්ඛිනො
2947. මයොචිතා{8} ජානපදා ආනීතා ච පටිග්ගහං, ආභතං පරරජ්ජෙහි අභිට්ඨාය බහුං ධනං.
2948. ධනුග්ගහානං පවරො සූරො තිඛිණමන්ති ච, මයායං සුඛිතො රාජා අතිමඤ්ඤති දාරකො.
2949. උපට්ඨානම්පි මෙ අය්යෙ න සො එති යථා පුරෙ, භාරතං තෙන දෙසෙන දජ්ජාසිං දකරක්ඛිනො.
2950. එකරත්තෙන උභයො තුවඤ්ච{1} ධනුසෙඛවා, උභො ජාතෙත්ථ පඤ්චාලා සහායා සුසමාවයා.
2951. චරියා තං අනුබන්ධිත්ථො{2} එකදුක්ඛසුඛො තව, උස්සුක්කො තෙ දිවාරත්තිං සබ්බකිච්චෙසු ව්යාවටො{3}. සහායං තෙන දොසෙන දජ්ජාසි දකරක්ඛිනො.
2952. චරියාය{4} අයං අය්යෙ පජග්ඝිත්ථො මයා සහ, අජ්ජාපි තෙන වණ්ණෙන අතිවෙලං පජග්ඝති.{5}
2953. උබ්බරියාපි මෙ අය්යෙ මන්තයාමි රහොගතො, අනාමන්තා පවිසති පුබ්බෙ අප්පටිවෙදිතො.
2954. ලද්ධවාරො කතොකාසො අහිරිකං අනාදරං, සහායං තෙන දොසෙන දජ්ජාහං දකරක්ඛිනො.
2955. කුසලො සබ්බනිමිත්තානං රුදඤ්ඤූ{6} ආගතාගමො, උප්පාදෙ සුපිනෙ යුත්තො නිය්යාණෙ ච පවෙසනෙ.
2956. පද්ධො{7} භුම්මන්තලික්ඛස්මිං නක්ඛත්තපදකොවිදො, බ්රාහ්මණං කෙන දොසෙන දජ්ජාසි දකරක්ඛිනො.
2957. පරිසායම්පි මෙ අය්යෙ මීලයිත්වා උදික්ඛති, තස්මා අජ්ජ භමුං ලුද්දං දජ්ජාහං දකරක්ඛිනො.
2958. සසමුද්දපරියායං මහිං සාගරකුණ්ඩලං, වසුන්ධරං ආවසසි අමච්චපරිවාරිතො.
2959. චාතුරන්තො මහාරට්ඨො විජිතාවී මහබ්බලො, පථව්යා එකරාජාසි යසො තෙ විපුලං ගතො{8}.
2960. සොළසිත්ථිසහස්සානි ආමුත්තමණිකුණ්ඩලා, නානාජනපදා නාරියො දෙවකඤ්ඤූපමා සුභා.
2961. එවං සබ්බඞ්ගසම්පන්නං සබ්බකාමසමිද්ධිනං, සුඛිතානං පියං දීඝං ජීවිතං ආයු ඛත්තිය.
2962. අථ ත්වං කෙන වණ්ණෙන කෙන වා පන හෙතුනා, පණ්ඩිතං අනුරක්ඛන්තො පාණං චජසි දුච්චජං.
2963. යතොපි ආගතො අය්යෙ මම හත්ථං මහොසධො, නාභිජානාමි ධීරස්ස අණුමත්තම්පි දුක්කතං.
2964. සචෙ ච{1} කිස්මිචි{2} කාලෙ මරණං මෙ පුරෙ සියා, පුත්තෙ ච මෙ පපුත්තෙ{3} ච සුඛාපෙය්ය මහොසධො.
2965. අනාගතං පච්චුප්පන්නං සබ්බමත්ථං විපස්සති, අනාපරාධකම්මන්තං න දජ්ජං දක්රක්ඛිනො.
2966. ඉදං සුණොථ පඤ්චාලා චූළනීයස්ස{4} භාසිතං, පණ්ඩිතං අනුරක්ඛන්තො පාණං චජති දුච්චජං.
2967. මාතු භරියාය{5} භාතුච්ච සඛිනො බ්රාහ්මණස්ස ච, අත්තනො චාපි පඤ්චාලො ඡන්නං චජති ජීවිතං.
2968. එවං මහත්ථිකා{6} පඤ්ඤා නිපුණා සාධුචින්තනී,{7} දිට්ඨධම්මෙ හිතත්ථාය සම්පරායෙ සුඛාය චාති.
දකරක්ඛසපඤ්හො.
8. පණ්ඩරකජාතකං.
2969. විකිණ්ණවාචං අනිගුය්හමන්තං{8} අසඤ්ඤතං අපරිචක්ඛිතාරං{9}, භයං තමත්වෙති සයං අබොධං නාගං යථා පණ්ඩරකං සුපණ්ණො.
2970. යො ගුය්හමන්තං පරිරක්ඛණෙය්යං මොහා නරො සංසති භාසමානො, තං භින්නමන්තං භයමන්වෙති ඛිප්පං නාගං යථා පණ්ඩරකං සුපණ්ණො.
2971. නානුමිත්තො ගරුං අත්ථං ගුය්හං වෙදිතුමරහති{1}, සුමිත්තො ච අසම්බුද්ධං සම්බුද්ධං වා අනත්ථවා.
2972. විස්සාසමාපජ්ජිමහං අචෙලො සමණො අයං සම්මතො භාවිතත්තො, තස්සාහමක්ඛිං විවරං{2} ගුය්හමත්ථං අතීතමත්ථො කපණං රුදාමි.
2973. තස්සාහං පුරිමං බ්රහ්මෙ ගුය්හං වාචං හි මං නාසක්ඛිං{3} සංයමෙතුං තප්පක්ඛතො හි භයමාගතං මෙ අතීතමත්ථො කපණං රුදාමි.
2974. යො වෙ නරො සුහදං මඤ්ඤමානො ගුය්හමත්ථං සංසති දුක්කුලීනෙ, දොසා භයා අථවා රාගරත්තො පල්ලත්ථිතො{4} බාලො අසංසයං සො.
2975. තිරොක්ඛවාචො අසතං පවිට්ඨො යො සඞ්ගතීසු මුදීරෙති වාක්යං, ආසීවිසො දුම්මුඛො ත්යාහු තං නරං ආරා ආරා සංයමෙ තාදිසම්භා.
2976. අන්නං පානං කාසි{5}කචන්දනඤ්ච මනාපිත්ථියො මාලච්ඡාදනඤ්ච,{6} ඔහාය ගච්ඡාමසෙ සබ්බකාමෙ සුපණ්ණ පාණූපගතාව ත්යම්භා.
2977. කොනීධ{7} තිණ්ණං ගරහං උපෙති අස්මිඤ්ච ලොකෙ පාණභූ නාගරාජ, සමණො සුපණ්ණෙ අථවා තවෙව කිං කාරණා පණ්ඩරකග්ගහීතො.
2978. සමණොති මෙ සම්මතත්තො අහොසි පියො ච මෙ මනසා භාවිතත්තො, තස්සාහමක්ඛිං විවරං ගුය්හමත්ථං අතීතමත්ථො කපණං රුදාමි.
2979. න චත්ථි සත්තො අමරො පථබ්යා පඤ්ඤාවිධා නත්ථි න නින්දිතබ්බා, සච්චෙන ධම්මෙන ධියා දමෙන අලබ්භමබ්යාහරතී නරො ඉධ.
2980. මතා පිතා පරමා බන්ධවානං නාස්ස{1} තතියො අනුකම්පකත්ථි, තෙසම්පි ගුය්හං පරමං න සංසෙ මන්තස්ස භෙදං පරිසඞ්කමානො.
2981. මාතාපිතා භගිනීභාතරො ච සහායා වා යස්ස හොන්තී සපක්ඛා, තෙසම්පි ගුය්හං පරමං න සංසෙ මන්තස්ස භෙදං පරිසඞ්කමානො.
2982. භරියා වෙ පුරිසං වජ්ජා කොමාරී පියභාණිනි පුත්තරූපයසූපෙතා ඤාතිසඞ්ඝපුරක්ඛතා, තෙසම්පි ගුය්හං පරමං න සංසෙ මන්තස්ස භෙදං පරිසඞ්කමානො.
2983. න ගුය්හමත්ථං විවරෙය්ය රක්ඛෙය්ය නං යථා නිධිං, න හි පාතුකතො සාධු ගුය්හමත්ථො{2} පජානතා.
2984. ථියා ගුය්හං න සංසෙය්ය අමිත්තස්ස ච පණ්ඩිතො, යො චාමිසෙන සංහීරො හදයත්ථෙනො ච යො නරො.
2985. ගුය්හමත්ථමසම්බුද්ධං සම්බොධයති යො නරො, මන්තභෙදභයා තස්ස දාසභුතො තිතික්ඛති.
2986. යාවන්තො පුරිසස්සත්ථං ගුය්හං ජානන්ති මන්තිතං, තාවන්තො තස්ස උබ්බෙගා තස්මා ගුය්හං න විස්සජෙ.
2987. විවිච්ච භාසෙය්ය දිවා රහස්සං රත්තිං ගිරං නාතිවෙලං පමුඤ්චෙ, උපස්සුතිකා හි සුණන්ති මන්තං තස්මා මන්තො ඛිප්පමුපෙති භෙදං.
2988. යථාපි අස්ස නගරං මහන්තං අද්වාරකං ආයසං භද්දසාලං, සමන්තඛාතාපරිඛාඋපෙතං එවම්පි මෙ තෙ ඉධ ගුය්හමන්තා.
2989. යෙ ගුය්හමන්තා අවිකිණ්ණවාචා දළ්හා සදත්ථෙසු නරා දුජිව්හ, ආරා අමිත්තා බ්යවජන්ති තෙහි ආසීවිසාවාරිව සත්තසඞ්ඝා.
2990. හිත්වා ඝරං පබ්බජිතො අචෙලො නග්ගො මුණ්ඩො විචරති ඝාසහෙතු, තම්හි නු ඛො විවරිං ගුය්හමත්ථං අත්ථා ච ධම්මා ච අපාගතම්භා.{1}
2991. කථං කරො හොති සුපණ්ණරාජ කිංසීලො කෙන වතෙන වත්තං, සමණො චරං හිත්වා මමායිතානි කථංකරො සග්ගමුපෙති ඨානං.
2992. හිරියා තිතික්ඛාය දමෙන ඛන්තියා අක්කොධනො පෙසුනියං පහාය, සමණො චරං හිත්වා මමායිතානි{2} එවංකරො සග්ගමුපෙති ඨානං.
2993. මාතා ච පුත්තං තරුණං තනූජං{3} සම්පස්ස තං සබ්බගත්තං එරෙති, එවම්පි මෙ ත්වං පාතුරහූ දිජින්ද මාතාව පුත්තං අනුකම්පමානො.
2994. භන්දජ්ජ ත්වං මුච්ච{4} වධා දුජිව්හ තයො හි පුත්තා නහි අඤ්ඤො අත්ථි, අන්තෙවාසී දින්නකො අත්රජො ච රජස්සු පුත්තඤ්ඤතරො මෙ අහොසි.
2995. ඉච්චෙව වාක්යං විසජ්ජි{5} සුපණ්ණො භුම්යං{6} පතිට්ඨාය දිජො දුජිව්හං, මුත්තජ්ජ ත්වං සබ්බභයාතිවත්තො ථලූදකෙ හොහි මයාභිගුත්තො.
2996. අතඞ්කිනං යථා කුසලො භිසක්කො පිපාසිතානං රහදොව සීතො, වෙස්මං යථා හිමසීතට්ටිතානං{7} එවම්පි තෙ සරණමහං භවාමි.
2997. සන්ධිං කත්වා අමිත්තෙන අණ්ඩජෙන ජලාබුජ, විවරිය දාඨං සයසි{8} කුතො තෙ භයමාගතං.
2998. සඞ්කථෙව අමිත්තම්හි මිත්තස්මිම්පි න විස්සසෙ, අභයා භයමුප්පන්නං අපි මූලානි කන්තති.
2999. කථන්නු විස්සසෙ ත්යම්හි යෙනාසි කලහො කතො, නිච්චයත්තෙන ඨාතබ්බං සො දිසබ්භී න රජ්ජති.
3000. විස්සාසයෙ න ච නං විස්සසෙය්ය අසඞ්කිතො ච සඞ්කිතො භවෙය්ය, තථා තථා විඤ්ඤූ පරක්කමෙය්ය යථා යථා භාවං පරො න ජඤ්ඤා,
3001. තෙ දෙවවණ්ණා සුඛුමාලරූපා උභො සමා සුජයො පුඤ්ඤක්ඛන්ධා, උපාගමුං කාදම්බියං අචෙලං. මිස්සීභූතා අස්සවාහාව නාගා.
3002. තතො හවෙ පණ්ඩරකො අචෙලං සයමෙවුපාගම්ම ඉදං අවොච, මුත්තජ්ජහං සබ්බභයාතිවත්තො න හි නූන තුය්හං මනසො පියම්හා.
3003. පියො හි මෙ ආසි සුපණ්ණරාජා අසංසයං පණ්ඩරකෙන සච්චං. සො රාගරත්තො ච අකාසිං එතං පාපං කම්මං සම්පජානො න මොහා.
3004. න මෙ පියං අප්පියං වාපි හොති සම්පස්සතො ලොකමිමං පරඤ්ච, සුසඤ්ඤතානං හි වියඤ්ජනෙන අසඤ්ඤතො ලොකමිමං චරාසි.
3005. අරියාවකාසොසි අනරියො චාසි අසඤ්ඤතො සඤ්ඤතසන්නිකාසො, කණ්හාභිජාතිකොසි අනරියරූපො පාපං බහුං දුච්චරිතං අචාරි.
3006. අදුට්ඨස්ස තුවං දුබ්භි දුබ්භි ච පිසුනො චසි, එතෙන සච්චවජ්ජෙන මුද්ධා තෙ ඵලතු සත්තධා.
3007. තස්මා හි මිත්තානං න දුබ්භිතබ්බං මිත්තදුබ්භා පාපියො නත්ථි අඤ්ඤො, ආසිත්තසත්තො නිහතො පථබ්යා ඉන්දස්ස වාක්යෙන හි සංවරො හතොති.
පණ්ඩරකජාතකං.
9. සම්බුලාජාතකං
3008. කා වෙධමානා ගිරිකන්දරාය එකා තුවං තිට්ඨසි සඤ්ඤතූරු, පුට්ඨාසි මෙ පාණිපමෙය්යමජ්ඣෙ අක්ඛාහි මෙ නාමඤ්ච බන්ධවෙ ච.
3009. ඔභාසයං වනං රම්මං සීහව්යග්ඝනිසෙවිතං, කා වා ත්වමසි කල්යාණි කස්ස වා ත්වං සුමජ්ඣිමෙ අභිවාදෙමි තං භද්දෙ දානවාහං නමත්ථු තෙ.
3010. යො පුත්තො කාසිරාජස්ස සොත්ථිසෙනොති නං විදූ, තස්සාහං සම්බුලා භරියා එවං ජානාහි දානව අභිවාදෙමි භද්දන්තෙ සම්බුලාහං නමත්ථු තෙ.
3011. වෙදෙහපුත්තො භද්දන්තෙ වනෙ වසති ආතුරො, තමහං රොගසම්මත්තං එකා එකං උපට්ඨහිං.
3012. අහඤ්ච වනමුඤ්ඡාය මධුමංසං මිගාවිලං, යදා හරාමි තං භක්ඛො තස්ස නූනජ්ජ නාධති.
3013. කිං වනෙ රාජපුත්තෙන ආතුරෙන කරිස්සසි, සම්බුලෙ පරිචිණ්ණෙන අහං භත්තා භවාමි තෙ.
3014. සොකට්ටාය දුරත්තාය කිං රූපං විජ්ජතෙ මම, අඤ්ඤං පරියෙස භද්දන්තෙ අභිරූපතරං මයා.
3015. එහිමං ගිරිමාරුය්හ භරියා මය්හං චතුස්සතා, තාසං ත්වං පවරා හොහි සබ්බකාමසමිද්ධිනී.
3016. නූන තාරකවණ්ණාභෙ යඞ්කිඤ්චි මනසිච්ඡසි, සබ්බන්තං පචුරං මය්හං රමස්සුජ්ජ මයා සහ.
3017. නො චෙ තුවං මහෙසෙය්යං සම්බූලෙ කාරයිසස්සි, අලං ත්වං පාතරාසාය මඤ්ඤෙ භක්ඛා භවිස්සසි.
3018. තඤ්ච සත්තජටො ලුද්දො කළාරො පුරිසාදකො, වනෙ නාථං අපස්සන්තිං සම්බුලං අග්ගහී භුජෙ.
3019. අධිපන්නා පිසාචෙන ලුද්දෙනාමිසචක්ඛුනා, සා ච සත්තුවසම්පත්තා පතිමෙවානුසොචති.
3020. න මෙ ඉදං තථා දුක්ඛං යං මං ඛාදෙය්ය රක්ඛසො, යඤ්ච මෙ අය්යපුත්තස්ස මනො හෙස්සති අඤ්ඤථා
3021. න සන්ති දෙවා පවසන්ති නූන න හි නූන සන්ති ඉධ ලොකපාලා, සහසා කරොන්තානං අසඤ්ඤතානං න හි නූන සන්ති පටිසෙධිතාරො.
3022. ඉත්ථිනමෙසා පවරා යසස්සිනී සන්තා සමා අග්ගිරිවුග්ගතෙජා, තඤ්චෙ තුවං රක්ඛසාදෙසි කඤ්ඤං මුද්ධා ච හි සත්තධා තෙ ඵලෙය්ය මා ත්වං දහි මුඤ්ච පතිබ්බතා සා.
3023. සා ච අස්සමමාගඤ්ඡි පමුත්තා පුරිසාදකා, නීළං ඵලිනසකුණීව ගතසිඞ්ගංව ආලයං.
3024. සා තත්ථ පරිදෙවෙසි රාජපුත්ති යසස්සිනී, සම්බුලා උතුමත්තක්ඛා වනෙ නාථං අපස්සතී.
3025. සමණෙ බ්රාහ්මණෙ වන්දෙ සම්පන්නචරණෙ ඉසෙ, රාජපුත්තං අපස්සන්තී තුම්හම්හි සරණං ගතා.
3026. වන්දෙ සීහෙ ච බ්යග්ඝෙ ච යෙ ච යෙච අඤ්ඤෙ වනෙ මිගා, රාජපුත්තං අපස්සන්තී තුම්හම්හි සරණං ගතා.