2837. කාසිස්ස රඤ්ඤො මහෙසී භදන්තෙ සා පූජිතා රාජකුලෙ සුභද්දා, තං{1} අද්දසා සා ච මමං අසංසි දන්තෙහි අත්ථොති ච මං අවොච.
2838. බහූ හි මෙ දන්තයුගා උළාරා යෙ මෙ පිතූනඤ්ච පිතාමහානං, ජානාති සා කොධනා රාජපුත්තී වධත්ථීකා වෙරමකාසි බාලා.
2839. උට්ඨෙහි ත්වං ලුද්ද ඛරං ගහෙත්වා දන්තෙ ඉමෙ ඡන්ද පුරා මරාමි, වජ්ජාසි තං කොධනං රාජපුත්තිං නාගො හතො හන්ද ඉමස්ස දන්තා.
2840. උට්ඨාය සො ලුද්දො ඛරං ගහෙත්වා ඡෙත්වාන දන්තානි ගජුත්තමස්ස, වග්ගූ සුභෙ අප්පටිමෙ පථබ්යා{2} ආදාය පක්කාමි තතො හි ඛිප්පං.
2841. භයද්දිතා{3} නාගවධෙන අට්ටා යෙ තෙ නාගා අට්ඨ දිසා විධාවුං, අදිස්ව{4} පොසං ගජපච්චමිත්තං පච්චාගමුං යෙන සො නාගරාජා.
2842. තෙ තත්ථ කන්දිත්වා රොදිත්ව{5} නාගා සීසෙ සකෙ පංසුකං ඔකිරිත්වා, අගමංසු{6} තෙ සබ්බෙ සකං නිකෙතං පුරක්ඛත්වා මහෙසිං සබ්බභද්දං.
2843. ආදාය දන්තානි ගජුත්තමස්ස වග්ගු සුභෙ අප්පටිමෙ පථබ්යා, සුවණ්ණරාජීහි සමන්තමොදරෙ සො ලුද්දකො කාසිපුරං උපාගමි උපානෙසී සො රාජකඤ්ඤාය දන්තෙ නාගො හතො හන්ද ඉමස්ස අන්තා.
2844. දිස්වාන දන්තානි ගජුත්තමස්ස භත්තුප්පියස්ස පුරිමාය ජාතියා, තත්ථෙව තස්සා හදයං අඵාලි තෙනෙව සා කාලමකාසි බාලා.
2845. {*}සම්බොධිපත්තො ච මහානුභාවො සිතං අකාසි පරිසාය මජ්ඣෙ, පුච්ඡිංසු භික්ඛූ සුවිමුත්තචිත්තා නාකාරණෙ පාතුකරොන්ති බුද්ධා.
2846. යමද්දසාථ දහරිං කුමාරිං කාසාවවත්ථං අනගාරියං චරන්තිං, සා ඛො තදා රාජකඤ්ඤා අහොසි අහං තදා නාගරාජා අහොසිං.
2847. ආදාය දන්තානි ගජුත්තමස්ස වග්ගූ සුභෙ අප්පටිමෙ පථබ්යා, යො ලුද්දකො කාසිපුරං උපාගමි සො ඛො තදා අදවදත්තො අහොසි.
2848. අනාවසූරං චිරරත්තසංසිතං උච්චාවචං චරිතමිදං පුරාණං, වීතද්දරො වීතසොකො විසල්ලො සයං අභිඤ්ඤාය අභාසි බුද්ධො.
2849. අභං වො තෙන කාලෙන අහොසිං තත්ථ භික්ඛවො, නාගරාජා තදා හොසිං එවං ධාරෙථ ජාතකන්ති.
ඡද්දන්තජාතකං.
5. සම්භවජාතකං.
2850. රජ්ජඤ්ච පටිපන්නස්මා ආධිපච්චං සුචීරත,{1} මහත්තං{2} පත්තුමිච්ඡාමි විජෙතුං පඨවිං ඉමං.
2851. ධම්මෙන නො අධම්මෙන අධම්මො මෙ න රුච්චති, කිච්චොව ධම්මො චරිතො රඤ්ඤො හොති සුචීරත.
2852. ඉධ චෙවානින්දිතා යෙන පෙච්ච{3} යෙන අනින්දිතා, යසං දෙවමනුස්සෙසු යෙන පප්පෙමු{4} බ්රාහ්මණ.
2853. යොහං අත්ථඤ්ච ධම්මඤ්ච කත්තුමිච්ඡාමි බ්රාහ්මණ, තං ත්වං අත්ථඤ්ච ධම්මඤ්ච බ්රාහ්මණක්ඛාහි පුච්ඡිතො
2854. නාඤ්ඤත්ර විධුරා එතදක්ඛාතුමරහති, යං ත්වං අත්ථඤ්ච ධම්මඤ්ච කත්තුමිච්ඡසි ඛත්තිය.
2855. එහි ඛො පහිතො ගච්ඡ විධුරස්ස උපන්තිකං නික්ඛං රත්තසුවණ්ණස්ස හරං ගච්ඡ සුචීරත, අභිහාරං ඉමං දජ්ජා අත්ථධම්මානුසිට්ඨියා.
2856. ස්වාධිප්පාගා භාරද්වාජො විධුරස්ස උපන්තිකං, තමද්දස මහාබ්රාහ්මා අසමානං සකෙ ඝරෙ.
2857. රඤ්ඤොහං පහිතො දූතො කොරව්යස්ස යසස්සිනො, අත්ථං ධම්මඤ්ච පුච්ඡෙසි ඉච්චබ්රවි යුධිට්ඨිලො තං ත්වං අත්ථඤ්ච ධම්මඤ්ච විධුරක්ඛාහි පුච්ඡිතො.
2858. මඞ්ගං මෙ පිදහිස්සන්ති න තං සක්කොමි බ්රාහ්මණ, අපිධෙතුං මහාසින්ධුං තං කථං සො භවිස්සති න තෙ සක්කොමි අක්ඛාතුං අත්ථං ධම්මඤ්ච පුච්ඡිතො.
2859. භද්රකාරො ච මෙ පුත්තො ඔරසො මම අත්රජො, තං ත්වං අත්ථඤ්ච ධම්මඤ්ච ගන්ත්වා පුච්ඡස්සු බ්රාහ්මණ.
2860. ස්වාධිප්පාගා භාරද්වාජො භද්රකාරස්ස සන්තිකං, තමද්දස මහාබ්රහ්මා නිසින්නං සම්හි වෙස්මනි.
2861. රඤ්ඤොහං පහිතො දූතො කොරව්යස්ස යසස්සිනො, අත්ථං ධම්මඤ්ච පුච්ඡෙසි ඉච්චබ්රවි යුධිට්ඨිලො තං ත්වං අත්ථඤ්ච ධම්මඤ්ච භද්රකාර බ්රවීහි මෙ.
2862. මංසකාජං{1} අවහාය ගොධං අනුපතාමහං, න තෙ සක්කොමි අක්ඛාතු අත්ථං ධම්මඤ්ච පුච්ඡිතො.
2863. සඤ්ජයො නාම මෙ භාතා කණිට්ඨො මෙ සුචීරත, තං ත්වං අත්ථඤ්ච ධම්මඤ්ච ගන්ත්වා පුච්ඡස්සු බ්රාහ්මණ
2864. ස්වාධිප්පාගා භාරද්වාජො සඤ්ජයස්ස උපන්තිකං, තමද්දස මහාබ්රහ්මා නිසින්නං සම්හි වෙසමනි.
2865. රඤ්ඤොහං පහිතො දූතො කොරව්යස්ස යසස්සිනො, අත්ථං ධම්මඤ්ච පුච්ඡෙසි ඉච්චබ්රවි යුධිට්ඨිලො තං ත්වං අත්ථාඤ්ච ධම්මඤ්ච සඤ්ජයක්ඛාහි පුච්ඡිතො.
2866. සදා මං ගිලතී{2} මච්චු සායං පාතො සුචීරත, න තෙ සකෙකාමි අක්ඛාතුං අත්ථං ධම්මඤ්ච පුච්ඡිතො.
2867. සම්භවො නාම මෙ භාතා කණිට්ඨො මෙ සුචීරත, තං ත්වං අත්ථඤ්ච ධම්මඤ්ච ගන්ත්වා පුච්ඡස්සු බ්රාහ්මණ.
2868. අබ්භුතො වත භො ධම්මො නායං අස්මාකරුච්චති, තයො ජනා පිතාපුත්තා තෙසු පඤ්ඤාය නො විදූ.
2869. න නං සක්කොථ අක්ඛාතුං අත්ථං ධම්මඤ්ච පුච්ඡිතා, කථං නු දහරො ජඤ්ඤා අත්ථං ධම්මඤ්ච පුච්ඡිතො.
2870. මා නං දහරොති උඤ්ඤාසි{3} අපුච්ඡිත්වාන සම්භවං, පුච්ඡිත්වා සම්භවං ජඤ්ඤා අත්ථං ධම්මඤ්ච බ්රාහ්මණ.
2871. යථාපි චන්දො විමලො ගච්ඡං ආකාසධාතුයා, සබ්බෙ තාරා{4}ගණෙ ලොකෙ ආභාය අතිරොචති.
2872. එවම්පි දහරූපෙතා පඤ්ඤායොගෙන සම්භවො, මා නං දහරොති උඤ්ඤාසි අපුච්ඡිත්වාන සම්භවං පුච්ඡිත්වා සම්භවං ජඤ්ඤා අත්ථං ධම්මඤ්ච බ්රාහ්මණ.
2873. යථාපි රම්මකො මාසො ගිම්හානං හොති බ්රාහ්මණ, අතෙවඤ්ඤොහි මාසෙහි දූමපුප්ඵෙහි සොභති.
2874. එවම්පි දහරූපෙතො පඤ්ඤායොගෙන සම්භවො, මා නං දහරොති උඤ්ඤාසි අපුච්ඡිත්වාන සම්භවං පුච්ඡිත්වා සම්භවං ජඤ්ඤා අත්ථං ධම්මඤ්ච බ්රාහ්මණ.
2875. යථාපි හිමවා බ්රහ්මෙ පබ්බතො ගන්ධමාදනො, නානාරුක්ඛෙහි සඤ්ඡන්නො මහාභූතගණාලයො ඔසධෙහි ච දිබ්බෙහි දිසා භාති පවාති ච.
2876. එවම්පි දහරූපෙතො පඤ්ඤායොගෙන සම්භවො, මා නං දහරොති උඤ්ඤාසි අපුච්ඡිත්වාන සම්භවං පුච්ඡිත්වා සම්භවං ජඤ්ඤා අත්ථං ධම්මඤ්ච බ්රාහ්මණ.
2877. යථාපි පාවකො බ්රහ්මෙ අච්චිමාලී යසස්සිමා, ජලමානො වනෙ ගච්ඡෙ අනලො කණ්හවත්තතී.
2878. ඝතාසනො ධූමකෙතු උත්තමාහෙවනං දහො, නිසීථෙ{1} පබ්බතග්ගස්මිං පහූතෙධො{2} විරොචති.
2879. එවම්පි දහරූපෙතො පඤ්ඤායොගෙන සම්භවො, මා නං දහරොති උඤ්ඤාසි අපුච්ඡිත්වාන සම්භවං පුච්ඡිත්වා සම්භවං ජඤ්ඤා අත්ථං ධම්මඤ්ච බ්රාහ්මණ.
2880. ජවෙන භද්රං ජානන්ති බලිවද්දඤ්ච{3} වාහියෙ,{4} දොහෙන ධෙනුං ජානන්ති භාසමානඤ්ච පණ්ඩිතං.
2881. එවම්පි දහරූපෙතො පඤ්ඤායොගෙන සම්භවො, මා නං දහරොති උඤ්ඤාසි අපුච්ඡිත්වාන සම්භවං පුච්ඡිත්වා සම්භවං ජඤ්ඤා අත්ථං ධම්මඤ්ච බ්රාහ්මණ.
2882. ස්වාධිප්පාගා භාරද්වාජො සම්භවස්ස උපන්තිකං, තමද්දස මහාබ්රහ්මා කීළමානං බහීපුරෙ.
2883. රඤ්ඤොහං පහිතො දූතො කොරව්යස්ස යසස්සිනො, අත්ථං ධම්මඤ්ච පුච්ඡෙසි ඉච්චබ්රවි යුධිට්ඨිලො තං ත්වං අත්ථඤ්ච ධම්මඤ්ච සම්භවක්ඛාහි පුච්ඡිතො.
2884. තග්ඝ තෙ අහමක්ඛිස්සං යථාපි කුසලො තථා, රාජා ච ඛො තං ජානාති යදි කාහති වා නවා.
2885. අජ්ජ සුවෙති සංසෙය්ය රඤ්ඤා පුටෙඨා සුචීරත, මා කත්වා අවසී රාජා අත්ථෙ ජාතෙ යුධිට්ඨිලො.
2886. අජ්ඣත්තඤ්ඤෙව සංසෙය්ය රඤ්ඤා පුට්ඨො සුචීරත, කුම්මග්ගං{1} න නිවෙසෙය්ය යථා මූළ්හො අචෙතසො.
2887. අත්තානං නාතිවත්තෙය්ය අධම්මං න සමාචරෙ, අතිත්ථෙ නප්පතාරෙය්ය{2} අනත්ථෙ න යුතො සියා.
2888. යො ච එතානි ඨානානි කත්තුං ජානාති ඛත්තියො, සදා සො වඩ්ඪතෙ රාජා සුක්කපක්ඛෙව චන්දිමා.
2889. ඤාතීනඤ්ච පියො හොති මිත්තෙසු ච විරොචති, කායස්ස භෙදා සප්පඤ්ඤො සග්ගං සො උපපජ්ජතීති.
සම්භවජාතකං.
6. මහාකපිජාතකං.
2890. බාරාණස්සං{3} අහු රාජා කාසීනං රට්ඨවඩ්ඪනො{4}, මිත්තාමච්ච පරිබූළ්හො{5} අගමාසි මිගාජිරං{6}.
2891. තත්ථ බ්රාහ්මණමද්දක්ඛි සෙතං චිත්රංකිලාසිනං, විද්ධසතං කොවිළාරංව කිසං ධමනිසන්ථතං.
2892. පරමකාරුඤ්ඤතං පත්තං දිස්වා කිච්ඡගතං නරං, අවච බ්යම්හිතො රාජා යක්ඛානං කතමොනුසි.
2893. හත්ථපාදා ච තෙ සෙතා තතො සෙතතරං{1} සිරො, ගත්තං කම්මාසවණ්ණන්තෙ කිලාසබහුලොවසී.
2894. වට්ටනාවළිසඞ්කාසා පිට්ඨි තෙ නිනන්තුන්නතා, කාළපබ්බාව තෙ අඞ්ගා නාඤ්ඤං පස්සාමි එදිසං.
2895. උග්ඝට්ටපාදො තසිතො කිසො ධමනිසන්ථතො, ඡාතො ආතත්තරූපොසි කුතොසි{2} කත්ථ ගච්ඡසි.
2896. දුද්දසී අප්පකාරොසි දුබ්බණ්ණො භීමදස්සනො{3}, ජනෙත්ති යාපි තෙ මාතා න තං ඉච්ඡෙය්ය පස්සිතුං.
2897. කිං කම්මමකරා{4} පුබ්බෙ කිං{5} අවජ්ඣං අඝාතයි, කිබ්බිසං යං කරිත්වාන ඉදං දුක්ඛං උපාගමි.
2898. තග්ඝ තෙ අහමක්ඛිස්සං යථාපි කුසලො තථා, සච්චවාදිං හි ලොකස්මිං පසංසන්තීධ පණ්ඩිතා.
2899. එකො චරං ගොගවෙසෙ මූළ්හො අච්චසරිං වනෙ, අරඤ්ඤෙ ඊරිණෙ{6} විවනෙ නානාකුඤජරසෙවිතෙ.
2900. වාළමිගානුචරිතෙ විප්පනට්ඨොස්මි කානනෙ, අචරිං තත්ථ සත්තාහං ඛුප්පිපාසාසමප්පිතො.
2901. තත්ථ තින්දුකමද්දක්ඛිං{7} විසමට්ඨං බුභුක්ඛිතො, පපාතම්භි ලම්බන්තං සම්පන්නඵලධාරිනං.
2902. වාතසීතානි{8} භක්ඛෙසිං තානි රුච්චිංසු මෙ භුසං, අතිත්තො රුක්ඛමාරුය්හ{9} තත්ථ හෙස්සාමි ආසිතො{10}
2903. එකම්මෙ භක්ඛිතං ආසි දුතියං අභිපත්ථිතං, තතො සා භඤ්ජථ{11} සාඛා ඡින්නා ඵරසුනා විය.
2904. සොහං සහාව සාඛාහි උද්ධපාදො අවංසිරො, අප්පතිට්ඨෙ අනාලම්බෙ ගිරිදුග්ගස්මිං පාපතං.
2905. යස්මා ච වාරිගම්භීරං තස්මා න සමපජ්ජසිං,{1} තත්ථ සෙසිං නිරානන්දො අනාථො දස රත්තියො.
2906. අථෙත්ථ කපි මගඤ්ඡි ගොනඞ්ගුට්ඨො{2} දරීවරො, සාඛාහි සාඛං විචරන්තො ඛාදමානො දුමප්ඵලං.
2907. සො මං දිස්වා කිසං පණ්ඩුං කාරුඤ්ඤමකරා{3} මයි, අම්භො කොනාම සො එත්ථ එවං දුක්ඛෙන අට්ටිතො මනුස්සො අමනුස්සො වා අත්තානං මෙ පවෙදය.
2908. තස්සඤ්ජලිං පණාමෙත්වා ඉදං වචනමබ්රවිං, මනුස්සොහං බ්යසම්පත්තො{4} සා මෙ නත්ථි ඉතො ගති තං වො වදාමි{5} භද්දං වො ත්වඤ්ච මෙ සරණං භව.
2909. ගරුසිලං{6} ගහෙත්වාන විචරං{7} පබ්බතෙ කපි, සිලාය යොග්ගං කත්වාන නිසභො එතදබ්රවි.
2910. එහි මෙ පිට්ඨිමාරුය්හ ගීවං ගණ්හාහි බාහුහි, අහං තං උද්ධරිස්සාමි ගිරිදුග්ගත වෙගසා.
2911. තස්ස තං වචනං සුත්වා වානරින්දස්ස සිරීමතො, පිට්ඨිමාරූය්හ ධීරස්ස ගීවං බාහාහි අග්ගහිං.
2912. සො මං තතො සමුට්ඨාසි තෙජස්සී බලවා කපි, විහඤ්ඤමානො කිච්ඡෙන ගිරිදුග්ගත වෙගසා,
2913. උද්ධරිත්වාන මං සන්තො නිසභො එතදබ්රවි, ඉඞ්ඝ මං සම්ම රක්ඛස්සු පස්සුපිසසං මුහුත්තකං.
2914. සීහා ව්යග්ඝා ච දීපී ච අච්ඡකොකතරච්ඡයො, තෙ මං පමත්තං හිංසෙය්යුං තෙ ත්වං දිස්වා නිවාරය.
2915. එවං මෙ පරිත්තාතූන පස්සුපී සො මුහුත්තකං තදාහං පාපකං දිට්ඨිං පටිලච්ඡිං අයොනිසො.
2916. භක්ඛො අයං මනුස්සානං යථා චඤ්ඤෙ වනෙ මිගා, යන්නූනිමං වධිත්වාන ඡාතො ඛාදෙය්යං වානරං.
2917. අසිතො ච ගමිස්සාමි මංසමාදාය සම්බලං, කන්තාරං නිත්ථරිස්සාමි පාථෙය්යං මෙ භවිස්සති.
2918. තතො සිලං ගහෙත්වාන මත්ථකං සන්නිතාළයිං, මම භත්තකිලන්තස්ස{1} පහාරො දුබ්බලො අහු.
2919. සො ච වෙගෙනුදප්පත්තො කපි රුධිරමක්ඛිතො,{2} අස්සුපුණ්ණෙහි නෙත්තෙහි රොදන්තො මං උදික්ඛති.
2920. මාය්යො මං කරි භද්දන්තෙ ත්වං ච නාමෙදිසං කරි, ත්වං ච ඛො නාම දීඝායු අඤ්ඤෙ වාරෙතුමරහසි.
2921. අහො වත රෙ පුරිස තාව දුක්කරකාරක, එදිසා විසමා දුග්ගා පපාතා උද්ධතො මයා.
2922. ආනීතො පරලොකාව දුබ්භෙය්යං මං අමඤ්ඤථ, තන්තෙන පාපධම්මෙන පාපං පාපෙන චින්තිතං.
2923. මා හෙව ත්වං අධම්මට්ඨ වෙදනං කටුකං ඵුසි, මාහෙව පාපකම්මන්තං ඵලං වෙළුංව තං වධි.
2924. තයි මෙ නත්ථි විස්සාසො පාපධම්මො අසසඤ්ඤතො,{*} එහි මෙ පිට්ඨිතො ගච්ඡ දිස්සමානොව සන්තිකෙ.
2925. මුත්තොසි{3} හත්ථා වාලානං පත්තොසි මානුසිං පදං, එසමග්ගො අධම්මට්ඨ තෙන ගච්ඡ යථා සුඛං.
2926. ඉදං වත්වා ගිරිචරො රුහිරං පක්ඛාල්ය{4} මත්ථකං, අස්සූනි සම්පමජ්ජිත්වා තතො පබ්බතමාරුහි.
2927. සොහං තෙනාභිසත්තොස්මි පරිලාහෙන අද්දිතො,{5} ඩය්හමානෙන ගත්තෙන වාරිං පාතුං උපාගමිං.
2928. අග්ගිනා විය සන්තත්තො රහදො රුධිරමක්ඛිතො, පුබ්බලොහිතසඞ්කාසො සබ්බො මෙ සමපජ්ජථ.
2929. යාවන්තො උදඛින්දූනි කායස්මිං නිපතිංසු මෙ, තාවන්තො ගණ්ඩූ ජායෙථ අඩ්ඪබෙළුවසාදිසා.
2930. පභින්නා පග්ඝරිංසු මෙ කුණපා පුබ්බලොහිතා, යෙන යෙනෙව ගච්ඡාමි ගාමෙසු නිගමෙසු ච.
2931. දණ්ඩහත්ථා නිවාරෙන්ති ඉත්ථියො පුරිසා ච මං, ඔකිණ්ණා{1} පූතිගන්ධෙන මාස්සු ඔරෙන ආගමා.
2932. එතාදිසං ඉදං දුක්ඛං සත්ත වස්සානිදානි මෙ, අනුභොමි සකං කම්මං පුබ්බෙ දුක්කටමත්තනො.