2743. අජ්ඣෙනානි පටිග්ගය්හ කාමෙසු ගථිතො අහං, අචරිං දීඝමද්ධානං පරෙසං අහිතායහං.
2744. යො පිට්ඨිමංසිකො හොති එවං උක්කච්ච ඛාදති, යථාහමජ්ජ ඛාදාමි පිට්ඨිමංසානි අත්තනොති.
කිංඡන්ද ජාතකං.
2. කුම්භජාතකං
2745. කො පාතුරාසි තිදිවා නභම්භි ඔභාසයං සංවරිං චන්දිමාව, ගත්තෙහි තෙ රස්මියො නිච්ඡරන්ති සතෙරිතා{1} විජ්ජුරිවන්තලික්ඛෙ.
2746. සො ඡින්නවාතං කමසි{2} අඝම්භි වෙහාසයං ගච්ඡසි තිට්ඨසී ච, ඉද්ධී නු තෙ වත්ථුකතා සුභාවිතා අනද්ධගුණමපි දෙවතානං.
2747. වෙහාසයං කමමාගම්ම තිට්ඨසි{3} කුම්භං කිණාථාති යමෙතමත්ථං, කො වා තුවං කිස්ස වතාය කුම්භො අක්ඛාහි මෙ බ්රාහ්මණ එතමත්ථං.
2748. න සප්පිකුම්භො නපි තෙලකුම්භො න ඵාණිතස්ස න මධුස්ස කුම්භො, කුම්භස්ස වජ්ජානි අනප්පකානි දොසෙ බහූ කුම්භගතෙ සුණාථ.
2749. ගලෙය්ය යං පීත්වා පතෙ පපාතං සොබ්භං ගුහං චන්දනියොළිගල්ලං, බහුම්පි භුඤ්ජෙය්ය අභොජනෙය්යං තස්සා පුණ්ණං කුම්භමිමං කිණාථ.
2750. යං වෙ පීත්වා{4} චිත්තස්මිං{5} අනෙසමානො ආභිණ්ඩතී ගොරිව භක්ඛසාදී, අනාථමානො උපගායති නච්චතී ච තස්සා පුණ්ණං කුම්භමිමං කිණාථ.
2751. යං වෙ පීත්වා අචෙලකොව නග්ගො චරෙය්ය ගාමෙ විසිඛන්තරානි සම්මූළ්හචිත්තො අතිවෙලසායී{*} තස්සා පුණ්ණං කුම්භමිමං කිණාථ.
2752. යං වෙ පීත්වා වුට්ඨාය පවෙධමානො සීසඤ්ච බාහුඤ්ච පසාරයන්තො, සො නච්චති දාරුකටල්ලකොව තස්සා පුණ්ණං කුම්භමිමං කිණාථ.
2753. යං වෙ පීත්වා{1} අග්ගිදඩ්ඪා සයන්ති අථො සිගාලෙහිපි ඛාදිතාසෙ, බන්ධං වධං භොගජානිඤ්චුපෙන්ති තස්සා පුණ්ණං කුම්භමිමං කිණාථ.
2754. යං වෙ පීත්වා භාසෙය්ය අභාසනෙය්යං සහායමාසීනො අපෙතවත්ථො, සම්මක්ඛිතො වන්තගතො ව්යසන්නො තස්සා පුණ්ණං කුම්භමිමං කිණාථ.
2755. යං වෙ පීත්වා උක්කට්ඨො ආවිලක්ඛො{2} මමෙව සබ්බපඨවීති{*} මඤ්ඤති, න මෙ සමො සමො චාතුරන්තොපි රාජා තස්සා පුණ්ණං කුම්භමිමං කිණාථ.
2756. මානාතිමානා කලහාති පෙසුනී දුබ්බණ්ණිනී නග්ගියිනී පලායිනී, චොරාන ධුත්තාන{3} ගතී නිකෙතො තස්සා පුණ්ණං කුම්භමිමං කිණාථ.
2757. ධඤ්ඤං ධනං රජතං ජාතරූපං ඛෙත්තං ගවං යත්ථ විනාසයන්ති, උච්ඡෙදනී විත්තවතං කුලානං තස්සා පුණ්ණං කුම්භමිමං කිණාථ.
2758. ඉද්ධානි ඵීතානි කුලානි අස්සු අනෙකසාහස්සධනානි ලොකෙ, උච්ඡින්නදායජ්ජකතානිමාය තස්සා පුණ්ණං කුම්භමිමං කිණාථ.
2759. යං පීත්වා දුට්ඨරූපොව පොසො අක්කොසති පිතරං මාතරඤ්ච, සස්සුම්පි ගණ්හෙය්ය අථොපි සුණ්හං තස්සා පුණ්ණං කුම්භමිමං කිණාථ.
2760. යං වෙ පීත්වා දුට්ඨ{4}රූපාව නාරී අක්කොසති සසුරං සාමිකඤ්ච, දාසම්පි ගණ්හෙ පරිචාරකම්පි තස්සා පුණ්ණං කුම්භමිමං කිණාථ.
2761. යං වෙ පිවිත්වාන{1} හනෙය්ය පොසො ධම්මෙ ඨිතං සමණං බ්රාහ්මණං වා, ගච්ඡෙ අපායම්පි තතො නිදානං තස්සා පුණ්ණං කුම්භමිමං කිණාථ.
2762. යං වෙ පීත්වා දුච්චරිතං චරන්ති කායෙන වාචාය ච චෙතසා වා, නිරයං වජන්ති දුච්චරිතං චරිත්වා තස්සා පුණ්ණං කුම්භමිමං කිණාථ.
2763. යං යාචමානා න ලභන්ති පුබ්බෙ බහුං හිරඤ්ඤම්පි පරිච්චජන්තා, සො තං පිවිත්වා අලිකං භණාති තස්සා පුණ්ණං කුම්භමිමං කිණාථ.
2764. යං වෙ පීත්වා පෙසනෙ පෙසයන්තො අච්චායිකෙ කරණීයම්භි ජාතෙ, අත්ථම්පි සො නප්පජානාති වුත්තො තස්සා පුණ්ණං කුම්භමිමං කිණාථ.
2765. හිරීමනාපි අහිරීකභාවං පාතුං කරොන්ති මදනාය මත්තා, ධීරාපි සන්තා බහුකං භණන්ති තස්සා පුණ්ණං කුම්භමිමං කිණාථ.
2766. යං වෙ පීත්වා එකථූපා සයන්ති අනාසකා ථණඩිලදුක්ඛසෙය්යං, දුබ්බණ්ණියං ආයසක්යඤ්චුපෙන්ති තස්සා පුණ්ණං කුම්භමිමං කිණාථ.
2767. යං වෙ පීත්වා පත්තක්ඛන්ධා සයන්ති ගාවො කූටහතාරිව නහි වාරුණියා වෙගො නරෙන සුස්සහොරිව.
2768. යං මනුස්සා විවජ්ජෙන්ති{2} සප්පං ඝොරවිසම්මිව, තං ලොකෙ විසසමානං කො නරො පාතාමරහති.
2769. යං වෙ පීත්වා අන්ධකවෙණ්හුපුත්තා සමුද්දතීරෙ පිරිචාරයන්තා, උපක්කමුං මුසලෙහඤ්ඤමඤ්ඤං තස්සා පුණ්ණං කුම්භමිමං කිණාථ.
2770. යං වෙ පීත්වා පුබ්බදෙවා පමත්තා තිදිවා චුතා සස්සතියා සමායා, තං තාදිසං මජ්ජමිමං නිරත්ථකං ජානං මහාරාජ කථං පිබෙය්ය.
2771. නයිමස්මිං කුම්භස්මිං දධි වා මධුං වා එවං අභිඤ්ඤාය කිණාහි රාජ, එවං හි මං කුම්භගතා මයා තෙ අක්ඛාතරූපං තව සබ්බමිත්ත.
2772. න මෙ පිතා වා අථවාපි මාතා එතාදිසො යාදිසකො තුවංසි, හිතානුකම්පී පරමත්ථකාමො සොහං කරිස්සං වචනං තවජ්ජ.
2773. දදාමි තෙ ගාමවරානි පඤ්ච දාසීසතං සත්ත ගවං සතානි, ආජඤ්ඤයුත්තෙ ච රථෙ දසා ඉමෙ ආචරියො හොසි මමත්ථකාමො.
2774. තවෙව දාසී සතමත්ථු රාජ ගාමා ච ගාවො ච තවෙව හොන්තු. ආජඤ්ඤයුත්තා ච රථා තවෙව සක්කො හමස්මි{1} තිදසානමින්දො.
2775. මංසොදනං සප්පිපායඤ්ච{2} භුඤ්ජ ඛාදස්සු ච ත්වං මධුමාසපූවෙ,{3} එවං තුවං ධම්මරතො ජනින්ද අනින්දිතො සග්ගමුපෙහි ඨානන්ති.
කුම්භජාතකං.
3. ජයද්දිසජාතකං.
2776. චිරස්සං වත මෙ උදපාදි අජ්ජ භක්ඛො මහා සත්තමිභත්තකාලෙ, කුතොසි කො වාසි තදිඞ්ඝ බ්රූහි ආචික්ඛ ජාතිං විදිතො යථාසි.
2777. පඤ්චාලරාජා මිගවං පවිට්ඨො{1} ජයද්දිසො නාම යදිස්සුතො තෙ, චරාමි කච්ඡානි වනානි චාහං පසදිමං{2} ඛාද මමජ්ජ මුඤ්ච.
2778. සෙනෙව ත්වං පණසි සස්සමානෙ{3} මමෙසො භක්ඛො පසදො යං වදෙසි, තං ඛාදියාන පසදං ජිඝඤ්ඤං{*} ඛාදිස්සං පච්ඡා න විලාපකාලො.
2779. න චත්ථි මොක්ඛො මම වික්කයෙන{4} ගන්ත්වාන පච්ඡා ගමනායපණ්හෙ, තං සඞ්ගරං බ්රාහ්මණස්සප්පදාය සච්චානුරක්ඛි පුනරාවජිස්සං.
2780. කිං කම්මජාතං අනුතප්පතී තං{5} පත්තං සමීපං මරණස්ස රාජ, ආචික්ඛ මෙ තං අපි සක්කුණෙමු අනුජානිතුං ආගමනාය පණ්හෙ.
2781. කතා මයා බ්රාහ්මණස්ස ධනාසා තං සඞ්ගරං පටිමොක්ඛං{6} න මුත්තං, තං සඞ්ගරං බ්රාහ්මණස්සප්පදාය සච්චානුරක්ඛී පුනරාවජිස්සං.
2782. යං තෙ කතා බ්රාහ්මණස්ස ධනාසා තං සඞ්ගරං පටිමොක්ඛං න මුත්තං, තං සඞ්ගරං බ්රාහ්මණස්සප්පදාය සච්චානුරක්ඛී පුනරාවජස්සු.
2783. මුත්තො ච සො පුරිසාදස්ස හත්ථා ගන්ත්වා සකං මන්දිරං කාමකාමී, තං සඞ්ගරං බ්රාහ්මණස්සප්පදාය ආමන්තයී පුත්ත මලීනසත්තං.{7}
2784. අජ්ජෙව රජ්ජං අභිසෙචයස්සු ධම්මඤ්ච රට්ඨෙසු ජනෙසු චාපි,{8} අධම්මකාරො ච තෙ මාහු රට්ඨෙ ගච්ඡාමහං පොරිසාදස්ස ඤත්තෙ.
2785. කිං කම්ම කුබ්බං තව දෙව පාදෙ නාරාධයිං තදිච්ඡාමි සොතුං, යමජ්ජ රජ්ජම්භි උදසසයෙ ත්වං. රජ්ජම්පි න ඉච්ඡෙය්යං{1} තයා විනා අහං.
2786. න කම්මුනා වා වචසාව තාත අපරාධිතොහං තුවියං සරාමි, සන්ධිඤ්ච කත්වා පුරිසාදකෙන සච්චානුරක්ඛී පුනහං ගමිස්සං.
2787. අහං ගමිස්සාමි ඉධෙව හොහි නත්ථි තතො ජීවතො විප්පමොක්ඛො, සචෙ තුවං ගච්ඡසියෙව රාජ අහම්පි ගච්ඡාමි උභො න හොම.
2788. අද්ධා හි තාත සතානෙස ධම්මො මරණා ච මෙ දුක්ඛතරං තදස්ස, කම්මාසපාදො තං යදා පචිත්වා පසය්හ ඛාදෙ භිදා රුක්ඛ{2}සූලෙ.
2789. පාණෙන තෙ පාණමහං නිමිස්සං මා ත්වමගා පොරිසාදස්ස ඤත්තෙ, එතඤ්ච තෙ පාණම්හං නිමිස්සං තස්මා මතං ජීවිතස්ස වරෙමි.{3}
2790. තතො හවෙ ධිතිමා රාජපුත්තො වන්දිත්ථ මාතුච්ච පිතුච්ච පාදෙ, දුඛිනිස්ස මාතා නිපතී පථබ්යා{4} පිතස්ස පග්ගය්හ භුජානි කන්දති.
2791. තං ගච්ඡන්තං තාව පිතා විදිත්වා පරම්මුඛො වන්දති පඤ්ජලීකො{5}, සොමො ච රාජා වරුණො ච රාජා පජාපතී චන්දිමා සුරියො ච එතෙහි ගුත්තො පුරිසාදකම්හා අනුඤ්ඤාතො සොත්ථි පච්චෙහි තාත.
2792. යං දණ්ඩකාරඤ්ඤගතස්ස මාතා රොමස්සකා{6} සොත්ථානං සුගුත්තා තන්තෙ අහං සොත්ථානං කරොමි එතෙන සච්චෙන සරන්තු දෙවා. අනුඤ්ඤාතො සොත්ථි පච්චෙහි පුත්ත.
2793. ආවී රහො වාපි මනොපදොසං නාහං සරෙ ජාතුමලීනසත්තෙ, එතෙන සච්චෙන සරන්තු දෙව අනුඤ්ඤාතො සොත්ථි පච්චෙහි භාත.
2794. යස්මා ච මෙ අනධිමනොසි සාමි නචාපි මෙ මනාස අප්පියොසි, එතෙන සච්චෙන සරන්තු දෙවා අනුඤ්ඤාතො සොත්ථි පච්චෙහි සාමි.
2795. බ්රහා උජූ චාරුමුඛො කුතොසි න මං පජානාසි වනෙ වසන්තං, ලුද්දඤ්ච මං ඤත්වා පුරිසාදකොති කො සොත්ථිමාජානමිධාවජෙය්ය.
2796. ජානාමි ලුද්ද පුරිසාදකො ත්වං න තං න ජානාමි වනෙ වසන්තං, අහඤ්ඤච පුත්තොස්මි ජයද්දිසස්ස මමජ්ජ ඛාද පිතුනො පමොක්ඛා.
2797. ජානාමි පුත්තොති ජයද්දිසස්ස තථාහි වො මුඛවණ්ණො උභින්නං, සුදුක්කරඤ්ඤෙව කතං තවෙදං යො මත්තුමිච්ඡෙ{1} පිතුනො පමොක්ඛො.
2798. න දුක්කරං කිඤ්චිමහෙත්ථ මඤ්ඤෙ යො මත්තුමිච්ඡෙ පිතුනො පමොක්ඛා, මාතුච්ච{2} හෙතු පරලොකගම්යා{3} සුඛෙන සග්ගෙන ච සම්පයුත්තො.
2799. අහඤ්ච ඛො අත්තනො පාපකිරියං ආවී රහො චාපි සරෙ න ජාතු. සඞ්ඛාතජාතිමරණොහමස්මි යථෙව මෙ ඉධ තථා පරත්ථ.
2800. ඛාදජ්ජ මංදානි මහානුභාව කරස්සු කිච්චානි ඉමං සරීරං, රුක්ඛස්ස වතෙ පපතාමි අග්ගා ඡාදයමානො මය්හං ත්වමදෙසි මංසං.
2801. ඉදඤ්ච තෙ රුච්චති රාජපුත්ත චජාසි පාණං පිතුනො පමොක්ඛා, තස්මාතිහ ත්වං{1} තරමානරූපො සම්භඤ්ජ කට්ඨානි ජලෙහි අග්ගිං.
2802. තතො හවෙ ධිතිමා රාජපුත්තො දාරූ{2} සමාහත්ව{3} මහන්තමග්ගිං, ආදීපයිත්වා{4} පටිවෙදයිත්ථ ආදීපිතොදානි මහායමග්ගි.
2803. ඛාදජ්ජ මං දානි පසය්හකාරි කිං මං මුහුං පෙක්ඛසි හටඨලොමො, තථා තථා තුය්හමහං කරොමි යථා යථා මං ඡාදයමානො{5} අදෙසි.
2804. කො තාදිසං අරහති ඛාදිතායෙ ධම්මෙ ඨිතං සච්චවාදිං වදඤ්ඤුං, මුද්ධාපි තස්ස විඑලෙය්ය සත්තධා යො තාදිසං සච්චවාදිං අදෙය්ය.
2805. ඉදං හි සො{*} බ්රාහ්මණං{6} මඤ්ඤමානො සසො අවාසෙසි සකෙ සරීරෙ, තෙනෙව සො චන්දිමා දෙවපුත්තො සසත්ථුතො කාමදුහජ්ජ යක්ඛ.
2806. චන්දො යථා රාහුමුඛා පමුත්තො විරොචතෙ පණ්ණරසෙව භානුමා, එවං තුවං පොරිසාදා පමුත්තො විරොච කම්පිල්ල මහානුභාව, ආමොදයං පිතරං මාතරඤ්ච සබ්බො ච තෙ නන්දතු ඤාතිපක්ඛො.
2807. තතො හවෙ ධිතිමා රාජපුත්තො කතඤ්ජලී පරියගා{7} පොරිසාදං, , අනුඤ්ඤාතො සොත්ථි සුඛී අරොගො පච්චාගමා කම්පිල්ලමලීනසත්තො.
2808. තං නෙගමා ජානපදා ච සබ්බෙ හත්ථාරොහා රථිකා පත්තිකා ව, නමස්සමානා පඤ්ජලිකා උපාගමුං නමත්ථු තෙ දුක්කරකාරකොසීති.
ජයද්දිසජාතකං.
4. ඡද්දන්තජාතකං
2809. කින්නු සොචසි අනුච්චඞ්ගී පණ්ඩූසි වරවණ්ණිනි, මිලායසි විසාලක්ඛි මාලාව පරිමද්දිතා.
2810. දොහළො මෙ මහාරාජ සුපිනන්තෙනුපච්චගා, න සො සුලභරූපොව යාදිසො මම දොහළො.
2811. යෙ කෙචි මානුසා කාමා ඉධ ලොකස්මිං නන්දනෙ, සබ්බෙ තෙ පචුරා මය්හං අහන්තෙ දම්මි දොහළං.
2812. ලුද්දා ද්වෙ සමායන්තු යෙ කෙචි විජිතෙ තව, එතෙසං අහමක්ඛිස්සං යාදිසො මම දොහළො.
2813. ඉමෙ තෙ ලුද්දකා දෙවි කතහත්ථා විසාරදා, වනඤ්ඤු ච මිගඤ්ඤූ ච මමත්ථෙ චත්තජීවිතා.
2814. ලුද්දපුත්තා නිසාමෙථ යාවන්තෙත්ථ සමාගතා, ඡබ්බිසාණං ගජං සෙතං අද්දසං සුපිනෙ අහං, තස්ස දන්තෙහි මෙ අත්ථො අලාභෙ නත්ථි ජීවිතං.
2815. න නො පිතූනං න පිතාමහානං දිට්ඨො සුතො කුඤ්ජරො ඡබ්බිසාණො, යමද්දසා සුපිනෙ රාජපුත්ති අක්ඛාහි නො යාදිසො හත්ථිනාගො.
2816. දිසා චතස්සො විදිසා චතස්සො උද්ධං අධො දසදිසා ඉමායො, කතමං දිසං තිට්ඨති නාගරාජා යමද්දසා සුපිනෙ ඡබ්බිසාණං.
2817. ඉතො උජුං උත්තරියං{1} දිසායං අතික්කම්ම සො සත්ත ගිරී බ්රහන්තෙ, සුවණ්ණපස්සො නාම ගිරී උළාරො සුපුප්ඵිතො කිම්පුරිසානුචිණ්ණො.
2818. ආරුය්හ සෙලං භවනං කින්නරානං ඔලොකය පබ්බතපාදමූලං, අථ දක්ඛසි මෙඝසමානවණ්ණං නිග්රොධරාජං අට්ඨසහස්සපාදං.{2}
2819. තත්ථච්ඡති කුඤ්ජරො ඡබ්බිසාණො සබ්බසෙතො දුප්පසෙහො පරෙහි, රක්ඛන්ති නං අට්ඨසහස්සනාගා ඊසාදන්තා වාතජවප්පහාරිනො.
2820. තිට්ඨන්ති තෙ තුමුලං පස්සසන්තා කුප්පන්ති වාතස්සපි එරිතස්ස, මනුස්සභූතං පන තත්ථ දිස්වා භස්මං කරෙය්යුං නාස්ස රජොපි තස්සාති.
2821. බහූ හි මෙ රාජකුලම්භි සන්ති පිළන්ධනා ජාතරූපස්ස දෙවි, මුත්තා මණීවෙළුරියාමයා ච කිං කාහසි දන්තපිළන්ධනෙන, මාරෙතුකාමා කුඤ්ජරං ඡබ්බිසාණං උදාහු ඝාතෙස්සසි ලුද්දපුත්තෙ.
2822. සා ඉස්සිතා දුක්ඛිතා චස්මි ලුද්ද උද්ධඤ්ච සුස්සාමි අනුස්සරන්තී, කරොහි මෙ ලුද්දක එතමත්ථං දස්සාමි තෙ ගාමවරානි පඤ්ච.
2823. කත්ථච්ඡති කත්ථමුපෙති ඨානං වීථිස්ස කා නහානගතස්ස හොති, කථඤ්හි සො නහායති නාගරාජා කථං විජානෙමු ගතිං ගජසස.
2824. තත්ථෙව සා පොක්ඛරණී අදූරෙ රම්මා සුතිත්ථා ච මහොදිකා ච, සම්පුප්ඵිතා භමරගණානුචිණ්ණා එත්ථ හි සො නහායති නාගරාජා.
2825. සීසං{1} නහාතො උප්පලමාලධාරී සබ්බසෙතො පුණ්ඩරීකත්තචඞ්ගී, ආමොදමානො ගච්ඡති සන්තිකෙ තං පුරක්ඛත්වා මහෙසිං සබ්බභද්දං.
2826. තත්ථෙව සො උග්ගහෙත්වාන වාක්යං ආදාය තුණිඤ්ච ධනුඤ්ච ලුද්දො, විතුරිය{2} සො සත්ත ගිරී බ්රහන්තෙ සුවණ්ණපස්සං නාම ගිරිං උළාරං.
2827. ආරුය්හසෙලං භවනං කින්නරානං ඔලොකයී පබ්බතපාදමූලං, තත්ථද්දසා මෙඝසමානවණ්ණං නිග්රොධරාජං අට්ඨසහස්සපාදං.
2828. තත්ථද්දසා කුඤ්ජරං ඡබ්බිසාණං සබ්බසෙතං දුප්පසහං පරෙහි, රක්ඛන්ති තං අට්ඨසහස්සනාගා ඊසාදන්තා වාතජවප්පහාරිනො.
2829. තත්ථද්දසා පොක්ඛරණිං අදූරෙ රම්මං සුතිත්ථඤ්ච මහොදිකඤ්ච, සම්පුප්ඵිතං භමරගණානුචිණ්ණං යත්ථ හි සො නහායති නාගරාජා.
2830. දිස්වාන නාගස්ස ගතිං ඨිතිඤ්ච වීථිස්ස යා නහානගතස්ස හොති, ඔපාතමාගඤ්ඡි අනරියරූපො පයොජිතො චිත්තවසානුගාය.
2831. ඛණිත්වාන{1} කාසුං ඵලකෙහි ඡාදයි අත්තානමොධාය ධනුඤ්ච ලුද්දො, පස්සාගතං පුථුසල්ලෙන නාගං සමප්පයී{2} දුක්කට{3}කම්මකාරී.
2832. විද්ධො ච නාගො කොඤ්චමනාදි ඝොරං සබ්බෙව නාගා නින්නදුං ඝොරරූපං, තිණඤ්ච කට්ඨඤ්ච චුණ්ණං කරොන්තා ධාවිංසු තෙ අට්ඨ දිසා සමන්තතො.
2833. වධිස්සමෙතන්ති පරාමසන්තො කාසාවමද්දක්ඛි ධජං ඉසීනං, දුක්ඛෙන පුට්ඨස්සුදපාදි සඤ්ඤා අරහද්ධජො සබ්භි අවජ්ඣරූපො.
2834. අනික්කසාවො කාසාවං යො වත්ථං පරිදහෙස්සති, අපෙතො දමසච්චෙන න සො කාසාවමරහති.
2835. යො ච වන්තකසාවස්ස සීලෙසු සුසමාහිතො, උපෙතො දමසච්චෙන ස වෙ කාසාවමරහති,
2836. සමප්පිතො පුථුසල්ලෙන නාගො අදුට්ඨචිත්තො ලුද්දකං අජ්ඣභාසි, කිමත්ථයං කිස්ස වා සම්ම හෙතු මමං වධී කස්ස වායං පයොගො.