2465. එතදරියස්ස කල්යාණං යං ත්වං සුමුඛ භාසසි, තඤ්ච වීමංසමානොහං පතතෙතං අවස්සජිං.
2466. අපදෙන පදං යාති අන්තලික්ඛෙ චරො දිජො, ආරා පාසං න බුජ්ඣි ත්වං හංසානං පවරුත්තමො.
2467. යදා පරාභවො හොති පොසො ජීවිතසඞ්ඛයෙ, අථ ජාලඤ්ච පාසඤ්ච ආසජ්ජාපි න බුජ්ඣති.
2468. එතෙ හංසා පක්කමන්ති වක්කඞ්ගා භයමෙරිතා, හරිත්තච හෙමවණ්ණ ත්වඤ්ච තං අවහීයසි.
2469. එතෙ භුත්වා පිවිත්වා ච පක්කමන්ති විහඞ්ගමා, අනපෙක්ඛමානා චක්කඞ්ග ත්වඤ්ඤෙචෙකො උපාසසි.
2470. කින්නු තායං දිජො හොති මුත්තො බද්ධං උපාසසි, ඔහාය සකුණා යන්ති කිං එකො අවහිය්යසි.
2471. රාජො මෙ’සො දිජො මිත්තො සඛා පාණසමො ච මෙ, නෙව නං විජභිස්සාමි යාව කාලස්ස පරියායං.
2472. යො ච ත්වං සඛිනො හෙතු පාණං චජිතුමිච්ඡසි. සො තෙ සහායං මුඤ්චාමි හොතු රාජා තවානුගො.
2473. එවං ලුද්දක නන්දස්සු සහ සබ්බෙහි ඤාතිභි, යථාහමජ්ජ නන්දාමි මුත්තං දිස්වා දිජාධිපං.
2474. කච්චින්නු භොතො කුසලං කච්චි භොතො අනාමයං, කච්චි රට්ඨමිදං ඵීතං ධම්මෙන මනුසාසසි.
2475. කුසලං චෙව මෙ හංස අථො අනාමයං, අථො රට්ඨමිදං ඵීතං ධම්මෙන මනුසාසහං.
2476. කච්චි භොතො අමච්චෙසු දොසො කොචි න විජ්ජති, කච්චි ආරා අමිත්තා තෙ ඡායා දක්ඛිණතොරිව,
2477. අථොපි මෙ අමච්චෙසු දොසො කොචි න විජ්ජති, අථො ආරා අමිත්තා තෙ ඡායා දක්ඛිණතොරිව.
2478. කච්චි තෙ සාදිසී භරියා අස්වා පියභාණිනි, පුනතරූපයසූපෙතා තව ඡන්දවසානුගා.
2479. අථො මෙ සාදිසී භරියා අස්සවා පියභාණිනී, පුත්තරූපයසූපෙතා මම ඡන්දවසානුගා.
2480. කච්චි තෙ බහවො පුත්තා සුජාතා රට්ඨවඩ්ඪන, පඤ්ඤාජවෙන සම්පන්නා සම්මොදන්ති තතො තතො.
2481. සතං එකො ච මෙ පුත්තා ධතරට්ඨ මයා සුතා, තෙසං ත්වං කිච්චමක්ඛාහි නාවරජ්ඣන්ති තෙ වචො.
2482. උපපන්නොපි චෙ හොති ජාතියා විනයෙන වා, අථ පච්ඡා කුරුතෙ යොගං කිච්චෙ ආපාසු සීදති.
2483. තස්ස සංහීරපඤ්ඤස්ස විවරො ජායතෙ මහා, නත්තමන්ධොව රූපානි ථුල්ලානි මනුස්සති{1}.
2484. අසාරෙ සාරයොගඤ්ඤු මතිං නත්වෙව වින්දති, සරභොව ගිරිදුග්ගස්මිං අන්තරායෙව සීදති.
2485. හිනජච්චො’පි චෙ හොති උට්ඨාතා ධිතිමා නරො, ආචාරසීලසම්පන්නො නිසෙ අග්ගීව භාසති.
2486. එතං මෙ උපමං කත්වා පුත්තෙ විජ්ජාසු වාචය, සංවිරූළ්හෙථ මෙධාවී ඛෙත්තබීජංව වුට්ඨියාති.
චුලහංස ජාතකං.
7. සත්තිගුම්බජාතකං
2487. මිගලුද්දො මහාරාජා පඤ්චාලානං රථෙසභො, නික්ඛන්තො සහ සෙනාය ඔගණො වනමාගමා.
2488. තත්ථද්දසා අරඤ්ඤස්මිං තක්කරානං කුටිං කතං, තස්සා කුටියා නික්ඛම්ම සුවො ලුද්දානි භාසති.
2489. සම්පන්නවාහනො පොසො යුවා සම්මට්ඨකුණ්ඩලො, සොභති ලොහිතුණ්හීසො දිවාසුරියොව භාසති.
2490. මජ්ඣන්තිකෙ සම්පටිකෙ සුත්තො රාජා සසාරථි, හන්දස්සාභරණං සබ්බං ගණ්හාම සහසා මයං.
2491. නිසීථෙපි රහොදානි සුත්තො රාජා සසාරථි, ආදාය වත්ථං මණිකුණ්ඩලඤ්ච හන්ත්වාන සාඛාහි අපත්ථරාම.
2492. කින්නු උම්මත්තරූපොව සන්තිගුම්බ පභාසසි, දූරාසදා හි රාජානො අග්ගි පජ්ජලිතො යථා.
2493. අථ ත්වං පතිකොළම්බ{1} මත්තො ථුල්ලානි ගච්ඡසි, මාතරි මය්හ නග්ගාය කින්නු ත්වං විජිගුච්ඡසෙ.
2494. උට්ඨෙහි සම්ම තරමානො රථං යොජෙහි සාරථි, සකුණා මෙ න රුච්චන්ති අඤ්ඤං ගච්ඡාම අස්සමං.
2495. යුත්තො රථො මහාරාජ යුත්තො ච බලවාහනො, අධිතිට්ඨ මහාරාජ අඤ්ඤං ගච්ඡාම අස්සමං.
2496. කොනු මෙව ගතා සබ්බෙ යෙ අස්මිං පරිචාරකා,{2} එස ගච්ඡති පඤ්චාලො මුත්තො තෙසං අදස්සනා.
2497. කොදණ්ඩකානි ගණ්හථ සත්තියො තොමරානි ච, එස ගච්ඡති පඤාලො මා වො මුඤ්චිත්ථ ජීවිතං.
2498. අථාපරො{3} පටිනන්දිත්ථ සුවො ලොහිතතුණ්ඩකො, ස්වාගතං තෙ මහාරාජ අථො තෙ අදුරාගතං. ඉස්සරොසි අනුප්පත්තො යං ඉධත්ථි පවෙදය.
2499. තින්දුකානි පියාලානි මධුකෙ කාසුමාරියො, ඵලානි ඛුද්දකප්පානි භුඤ්ජ රාජ වරං වරං.
2500. ඉදම්පි පානීයං සීතං ආභතං ගිරිගබ්භරා, තතො පිව මහාරාජ සචෙ ත්වං අභිකඞ්ඛසි.
2501. අරඤ්ඤං උඤ්ඡාය ගතා යෙ අස්මිං පරිචාරකා, සයං උට්ඨාය ගණ්හව්හො හත්ථා මෙ නත්ථි දාතවෙ.
2502. භද්රකො{1} වත යං පක්ඛී ද්විජො පරමධම්මිකො, අථෙසො ඉතරො පක්ඛී සුවො ලුද්දානි භාසති.
2503. එතං හනථ බන්ධථ මා වො මුඤ්චිත්ථ ජීවිතං, ඉච්චෙවං විලපන්තස්ස සොත්ථිං පත්තොස්මි අස්සමං.
2504. භාතරොස්ම මහාරාජ සොදරියා එකමාතුකා, එකරුක්ඛස්මිං සංවඩ්ඪා නානාඛෙත්තගතා උහො.
2505. සත්තිගුම්බො ච චොරානං අහඤ්ච ඉසිනං ඉධ, අසතං සො සතං අහං තෙන ධම්මෙන නො විනා.
2506. තත්ථ වධො ච බන්ධො ච නිකතී වඤ්චනානි ච, ආලොපසහසාකාරා{2} තානි සො තත්ථ සික්ඛති.
2507. ඉධ සච්චඤ්ච ධම්මො ච අහිංසා සඤ්ඤමො දමො, ආසනූදකදායීනං අඞ්කෙ වද්ධොස්මි භාරත.
2508. යං යං හි රාජ භජති සතං{3} වා යදි වා අසං, සීලවන්තං විසීලං වා වසං තස්සෙව ගච්ඡති.
2509. යාදිසං කුරුතෙ මිත්තං යාදිසඤ්චූපසෙවති, සොපි තාදිසකො හොති සහවාසො හි තාදිසො.
2510. සෙවමානෙ සෙවමානං සම්ඵුට්ඨො සම්ඵුසං පරං, සරො දිද්ධො කලාපං ව{4} ආලිත්තමුපලිම්පති. උපලෙපභයා{5} ධීරො නෙව පාපසඛා සියා.
2511. පූතිමච්ඡං කුසග්ගෙන යො නරො උපනය්හති. කුසාපි පූති වායන්ති එවං බාලූපසෙවනා.
2512. තගරඤ්ච පලාසෙන යො නරො උපනය්හති, පත්තාපි සුරභි වායන්ති එවං ධීරූපසෙවනා.
2513. තස්මා ඵල{1}පුටස්සෙව ඤත්වා සම්පාකමත්තනො, අසන්තෙ නොපසෙවෙය්ය සන්තෙ සෙවෙය්ය පණ්ඩිතො අසන්තො නිරයං නෙත්ති සන්තො පාපෙන්ති සුග්ගතින්ති.
සත්තිගුම්බජාතකං.
8. හල්ලාටියජාතකං.
2514. හල්ලාටියො නාම අහොසි රාජා රට්ඨං පහාය මිගවං අචාරි සො, අගමා ගිරිවරං ගන්ධමාදනං සම්පුප්ඵිතං කිම්පුරිසානුචිණ්ණං
2515. සාලූරසඞ්ඝඤ්ච නිසෙධයිත්වා ධනුං කලාපඤ්ච සො නික්ඛිපිත්වා, උපාගමි වචනං වත්තුකාමො යත්ථට්ඨිතා කිම්පුරිසා අහෙසුං.
2516. හිමච්චයෙ හෙමවතාය තීරෙ කිමිධට්ටිතා මන්තයව්හො අභිණ්හං, පුච්ඡාමි වො මානුසදෙහවණ්ණෙ කථං වො ජානන්ති මනුස්සලොකෙ.
2517. {*}මල්ලං ගිරං පණ්ඩරකං තිකූටං {2}සීතොදියා අනුවිචරාම නජ්ජො, මිගා මනුස්සාව නිභාසවණ්ණා ජානන්ති නො කිම්පුරිසාති ලුද්ද.
2518. සුකිච්ඡරූපං පරිදෙවයව්හො ආලිඞ්ගිතොචාසි පියො පියාය, පුච්ඡාමි වො මානුසදෙහවණ්ණෙ කිමිධ වනෙ රොදථ අප්පතීතා.
2519. සුකිච්ඡරූපං පරිදෙවයව්හො ආලිඞ්ගිතො චාසි පියො පියාය, පුච්ඡාමි වො මානුසදෙහවණ්ණෙ කිමිධ වනෙ විපපථ අප්පතීතා.
2520. සුකිච්ඡරූපං පරිදෙවයව්හො ආලිඞ්ගිතො චාසි පියො පියාය, පුච්ඡාමි වො මානුසදෙහවණ්ණෙ කිමිධ වනෙ සොචථ අප්පතීතා.
2521. මයමෙකරත්තං{1} විප්පවසිම්භ ලුද්ද අකාමකා අඤ්ඤමඤ්ඤං සරන්තා, තමෙකරන්තිං අනුතප්පමානා සොචාම සා රත්ති පුනං න හෙස්සති.
2522. යමෙකරත්තිං අනුතප්පථෙතං ධනං ව නට්ඨං පිතරං ව පෙතං, පුච්ඡාමි වො මානුසදෙහවණ්ණෙ කථං විනාවාසමකප්පයිත්ථ.
2523. යයිමං{2} නදිං පස්සසි සීඝසොතං නානාදුමච්ඡදං සෙලකූටං, තම්මෙ පියො උත්තරි වස්සකාලෙ මමඤ්ච {3}මඤ්ඤං අනුබන්ධතීති.
2524. අහඤ්ච අඞ්කොලකං ඔචිනාමි අති{4}මුත්තකං සත්තලීයොථිකඤ්ච, පියො ච මෙ හොහිති මාලභාරී අහඤ්ච නං මාලිනී අජ්ඣුපෙස්සං.
2525. අහඤ්චිදං කුරවකං ඔචිනාමි උද්දාලකා පාටලිසින්දුවාරකා, පියො ච මෙ හොහිති මාලභාරී අහඤ්ච නං මාලිනී අජ්ඣුපෙස්සං.
2526. අහඤ්ච සාලස්ස සුපුප්ඵිතස්ස ඔචෙය්ය පුප්ඵානි කරොමි මාලං, පියො ච මෙ හොහිති මාලභාරී අහඤ්ච නං මාලිනී අජ්ඣුපෙස්සං.
2527. අහඤ්ච සාලස්ස සුපුප්ඵිතස්ස ඔචෙය්ය පුප්ඵානි කරොමි භාරං, ඉදඤ්ච නො හොහිති සත්ථරත්ථං යත්ථජ්ජමං විහරිස්සාමු රත්තිං.
2528. අහං ච ඛො අගළුං චන්දනඤ්ච සිලාය පිංසාමි පමත්තරූපා, පියො ච මෙ හොහිති රොසිතඞ්ගො අහඤ්ච න රොසිතා ආජ්ඣුපෙස්සං.
2529. අථාගමා සලිලං සීඝසොතං නුදං සාලෙ සලළෙ කණ්ණිකාරෙ. අපූරථ තෙන මුහුත්තකෙන සායං නදී ආසි මයා සුදුත්තරා.
2530. උභොසු තීරෙසු මයං තදා ඨිතා සම්පස්සන්තා උභයො අඤ්ඤමඤ්ඤං, සකිම්පි රොදාම සකිං හසාම කිච්ඡෙන නො අගමා සංවරී සා.
2531. පාතො ච ඛො උග්ගතෙ සූරියම්භි චතුක්කං නදිං උත්තරියාන ලුද්ද, ආලිඞ්ගියා අඤ්ඤමඤ්ඤං මයං උභො සකිම්පි රොදාම සකිං හසාම.
2532. තීහූනකං සත්ත සතානි ලුද්ද යමිධ මයං විප්පවසිම්හ පුබ්බෙ, වාසෙකිමං{*} ජීවිතං භූමිපාල කොනීධ කන්තාය විනා වසෙය්ය.
2533. ආයුඤ්ච වො කීවතකො නු සම්ම සචෙපි ජානාථ වදෙථ ආයුං, අනුස්සවා වද්ධතො ආගමා වා අක්ඛාථ මෙ තං අවිකම්පමානා.
2534. ආයුඤ්ච නො වස්සසහස්සං ලුද්ද න චන්තරා පාපකො අත්ථි රොගො, අප්පඤ්ච දුක්ඛං සුඛමෙව භිය්යො අවීතරාගා විජහාම ජීවිතං.
2535. ඉදඤ්ච සුත්වාන අමානුසානං භල්ලාටියො ඉත්තරං ජීවිතන්ති, {1}නිවන්තථ න මිගවධං අචාරි අදාසි දානානි අභුඤජි භොගෙ.
2536. ඉදඤ්ච සුත්වාන අමානුසානං සම්මොදථ මා කලහං අකත්ථ, මා වො තපී අත්තකම්මාපරාධො යථාපි තෙ කිම්පුරිසෙකරත්තිං.
2537. ඉදඤ්ච සුත්වාන අමානුසානං සම්මොදථ මා විවාදං අකත්ථ, මා වො තපී අත්තකම්මාපරාධො යථාපි තෙ කිම්පුරිසෙකරත්තිං.
2538. විවිධඅධිමනා සුණොමහං වචනපථං තව අත්ථසංහිතං, මුඤ්ච ගිරං නුදසෙව මෙ දරං සමණ සුඛාවහ ජීව මෙ චිරන්ති.
හල්ලාටියජාතකං.
9. සොමනස්සජාතකං
2539. කො තං හිංසති හෙඨෙති{1} කිං දුම්මනො සොචසි අප්පතීතො, කස්සජ්ජ මාතාපිතරො රුදන්තු ක්වජ්ජ{2} සෙතු නිහතො පථව්යා.
2540. තුට්ඨොස්මි ද්වෙ තව දස්සනෙන චිරස්ස පස්සාමි තං භූමිපාල, අභිංසකො රෙණුමනුප්පවිස්ස පුත්තෙන තෙ හෙඨයිතොස්මි දෙව.
2541. ආයන්තු දොවාරිකා ඛග්ගබද්ධා, කාසාවියා යන්තු අන්තෙපුරං තං, ගන්ත්වාන{3} තං සොමනස්සං කුමාරං ඡෙත්වාන සීසං වරමාහරන්තු.
2542. පෙසිතා රාජිනො දූතා කුමාරං එතදබ්රවුං, ඉස්සරෙන විතිණ්ණොසි {4}වධප්පත්තොසි ඛත්තිය.
2543. ස රාජපුත්තො පරිදෙවයන්තො දසඞ්ගුලිං අඤ්ජලිං පග්ගහෙත්වා, අහම්පි ඉච්ඡාමි ජනින්ද දට්ඨුං ජීවං පනෙත්වා{5} පටිදසස යාථ.
2544. තස්ස තං වචනං සුත්වා රඤ්ඤො පුත්තං අදස්සයුං, පුත්තො ච පිතරං දිස්වා දූරතොවජ්ඣභාසථ.
2545. ආගඤ්ඡුං දොවාරිකා ඛග්ගබද්ධා කාසාවියා හන්තු මමං ජනින්ද, අක්ඛාහි මෙ පුච්ඡිතො එතමත්ථං අපරාධො කොනිධ මමජ්ජ අත්ථි.
2546. සායඤ්ච පාතො උදකං සජාති අග්ගිං සදා පරිචරතප්පමත්තො, තං තාදිසං සංයතං බ්රහ්මචාරිං කස්මා තුවං බ්රූසි ගහපතීති.
2547. තාලා ච මූලා ච ඵලා ච දෙව පරිග්ගහා විවිධා සන්තිමස්ස, තෙ රක්ඛති ගොපයතප්පමත්තො බ්රාහ්මණො{1} ගහපති තෙන හොති.
2548. සච්චං ඛො එතං වදසි කුමාර පරිග්ගහා විවිධා සන්තිමස්ස, තෙ රක්ඛති ගොපයතප්පමත්තො බ්රාහ්මණො{2} ගහපති තෙන හොති.
2549. සුණන්තු මය්හං පරිසා සමාගතා සුනෙගමා ජානපදා ච සබ්බෙ, බාලායං බාලස්ස වචො නිසම්ම අහෙතුනා ඝාතයතෙ ජනින්දො.
2550. දළ්හස්මි මූලෙ විසතෙ විරූළ්හෙ දුන්නික්ඛයො වෙළු පසාඛජාතො, වන්දාමි පාදානි තවං ජනින්ද අනුජාන මං පබ්බජිස්සාමි දෙව.
2551. භුඤ්ජස්සු භොගෙ විපුලඵලෙ{3} කුමාර සබ්බඤ්ච තෙ ඉස්සරියං දදාමි, අජ්ජෙව ත්වං කුරුනං හොහි රාජා මා පබ්බජි පබ්බජ්ජා හි දුක්ඛා.
2552. කින්නූධ දෙව තවමත්ථි භොගො පුබ්බෙවහං දෙවලොකෙ රමිස්සං, රූපෙහි සද්දෙහි අථො රසෙහි ගන්ධෙහි ඵස්සෙහි මනොරමෙහි.
2553. භුත්තා මෙ භොගා තිදිවස්මි දෙව පරිවාරිතා අච්ඡරානං ගණෙන, තුවඤ්ච බාලං පරනෙය්යං විදිත්වා න තාදිසෙ රාජකුලෙ වසෙය්යං.
2554. සචාහං බලො පරනෙය්යොහමස්මි එකාපරාධං ඛම පුත්ත මය්හං, පුනාපි චෙ එදිසකං භවෙය්ය යථාමතී සොමනස්සං{1} කරොහි.
2555. අනිසම්ම කතං කම්මං අනවත්ථාය චින්තිතං, භෙසප්පස්සෙව වෙභඞ්ගො විපාකො හොති පාපකො.
2556. නිසම්ම ච කතං කම්මං සම්මාවත්ථාය චින්තිතං, භෙසප්පස්සෙව සම්පත්ති විපාකො හොති භද්රකො.
2557. අලසො ගිහී කාමභොගී න සාධු අසඤ්ඤතො පබ්බජිතො න සාධු, රාජා න සාධු අනිසම්මකාරී යො පණ්ඩිතො කොධනො තං න සාධු.
2558. නිසම්ම ඛත්තියො කයිරා නානිසම්ම දිසම්පති, නිසම්මකාරිකො රාජා යසො කිත්ති ච වඩ්ඪති.