2373. යථාපි මාතා ච පිතා ච පුත්තං අනුසාසරෙ කින්ති සුඛීභවෙය්ය, එවම්පි මං ත්වං අනුසාස භන්තෙ යමාචරං පෙච්ච සුඛිභවෙය්යං.
2374. නො චෙ තුවං උස්සහසෙ ජනින්ද කාමෙ ඉමෙ මානුසකෙ පහාතුං, ධම්මං ඛිලිං පට්ඨපයස්සු රාජ අධම්මකාරො ච තෙ මාහු රට්ඨෙ.
2375. දූතා විධාවන්තු දිසා චතස්සො නිමන්තකා සමණබ්රාහ්මණානං, තෙ අන්නපානෙන උපට්ඨහස්සු වත්ථෙන සෙනාසනපච්චයෙන ච.
2376. අන්නෙන පානෙන පසන්නචිත්තො සන්තප්පය සමණබ්රාහ්මණෙ ච, දත්වා ච භුත්වා ච යථානුභාවං අනින්දිතො සග්ගමුපෙහි ඨානං.
2377. සචෙ ව තං රාජ මදො සහෙය්ය නාරීගණෙහි පරිචාරයන්තං ඉමමෙවගාථං මනසිකරොහි භාසෙසි චෙ නං පරිසාය මජ්ඣෙ.
2378. අබ්භොකාසසයො ජන්තු වජන්ත්යා ඛීරපායිතො, පරිකිණ්ණො සුපානෙහි ස්වාජ්ජ රාජාති වුච්චතීති.
චිත්තසම්භූත ජාතකං.
3. සිවිජාතකං{1}
2379. දූරෙ අපස්සං ථෙරොව චක්ඛුං යාචිතුමාගතො, එකනෙත්තා භවිස්සාම චක්ඛුං මෙ දෙහි යාචිතො.
2380. කෙනානුසිට්ඨො ඉධමාගතොසි වණිබ්බක චක්ඛුපථානු යාචිතුං, සුදුච්චජං යාචසි උත්තමඞ්ගං යාමාහු නෙත්තං පුරිසෙන දුච්චජං.
2381. යමාහු දෙවෙසු සුජම්පතීති මඝවාති තං ආහු මනුස්සලොකෙ, තෙනානුසිට්ඨො ඉධමාගතොස්මි වණිබ්බකො චක්ඛුපථානි යාචිතුං.
2382. වණිබ්බතො මය්හං වණිං අනුත්තරං දදාහි මෙ චක්ඛුපථානි යාචිතො, දදාහි මෙ චක්ඛුපථං අනුත්තරං යමාහු නෙත්තං පුරිසෙන දුච්චජං.
2383. යෙන අත්ථෙන ආගඤ්ඡි යමත්ථමභිපත්ථයං, තෙ තෙ ඉජ්ඣන්තු සඞ්කප්පා ලභ චක්ඛූනි බ්රාහ්මණ.
2384. එකං තෙ යාචමානස්ස අභයානි දදාමහං සචක්ඛුමා ගච්ඡ ජනස්ස පෙක්ඛතො, යදිච්ඡසෙ ත්වං තං තෙ{2} සමිජ්ඣතු.
2385. මා නො දෙව අදා චක්ඛුං මා නො සබ්බෙ පරාකරි, ධනං දෙහි මහාරාජ පුත්තා වෙළුරියා බහූ.
2386. යුත්තෙ දෙව රථෙ දෙහි ආජානීයෙ චලඞ්කතෙ, නාගෙ දෙහි මහාරාජ හෙමකප්පනවාසසෙ.
2387. යථා තං සිවයො සබ්බෙ සයොග්ගා සරථා සදා, සමන්තා පරිකිරෙය්යුං එවං දෙහි රථෙසභ.
2388. යො වෙ දස්සන්ති වත්වාන අදානෙ කුරුතෙ මනො, භුම්යා සො පතිතං පාසං ගීවාය පටිමුඤ්චති.
2389. යො වෙ දස්සන්ති වත්වාන අදානෙ කුරුතෙ මනො, පාපා පාපතරො හොති සම්පත්තො යමසාධනං.
2390. යං හි යාචෙ තං හි දදෙ යං න යාචෙ න තං දදෙ, ස්වාහං තමෙ ච දස්සාමි යං මං යාචති බ්රාහ්මණො.
2391. ආයුං නු වණ්ණං නු සුඛං බලං නු කිං පත්ථයානො නු ජනින්ද දෙසි, කථං හි රාජා සිවිනං අනුත්තරො චක්ඛූනි දජ්ජා පරලොකහෙතු.
2392. නචාහමෙතං යසසා දදාමි න පුත්තමිච්ඡෙ න ධනං න රට්ඨං, සතඤ්ච ධම්මො චරිතො පුරාණො ඉච්චෙව දානෙ රමතෙ මනො මමං.
2393. න මෙ දෙස්සා උභො චක්ඛූ අත්තානං මෙ න දෙස්සියං සබ්බඤ්ඤුතං පියං මය්හං තස්මා චක්ඛුං අදාසහං.
2394. සඛා ච මිත්තො ච මමාසි සීවක සුසික්ඛිතො සාධු කරොහි මෙ වචො, උද්ධත්ව චක්ඛූනි මමං ජිගිංසතො හත්ථෙසු ආවෙසි වණිබ්බකස්ස.
2395. චොදිතො සිවිරාජෙන සීවකො වචනංකරො, රඤ්ඤො චක්ඛූනි උද්ධත්වා බ්රාහ්මණස්සුපනාමයි සචක්ඛු බ්රාහ්මණො ආසි අන්ධො රාජා උපාවිසි.
2396. තතො සො කතිපාහස්ස උපරූළ්හෙසු චක්ඛුසු, සූතං ආමන්තයී රාජා සිවීනං රට්ඨවඩ්ඪනො.
2397. යොජෙහි සාරථි යානං යුත්තඤ්ච පටිවෙදය, උය්යානභූමිං ගච්ඡාම පොක්ඛරඤ්ඤො වනානි ච.
2398. සො ච පොක්ඛරණියා තීරෙ පල්ලඞ්කෙන උපාවිසි, තස්ස සක්කො පාතුරහු දෙවරාජා සුජම්පති.
2399. සක්කො හමස්මි දෙවින්දො ආගතොස්මි තවන්තිකෙ, වරං වරස්සු රාජීසි යං කිඤ්චි මනසිච්ඡසි.
2400. පහූතං මෙ ධනං සක්ක බලං කොසො චනප්පකො, අන්ධස්ස මෙ සතොදානි මරණඤ්ඤෙව රුච්චති.
2401. යානි සච්චානි දිපදින්ද තානි භාසස්සු ඛත්තිය, සච්චන්තෙ භණමානස්ස පුන චක්ඛුං භවිස්සති.
2402. යෙ මං යාචිතුමායන්ති නානාගොත්තා වණිබ්බකා, යොපි මං යාචතෙ තත්ථ සොපි මෙ මනසො පියො. එතෙන සච්චවජ්ජෙන චක්ඛුම්මෙ උපපජ්ජථ.
2403. යං මං සො යාචිතුං ආග දෙහි චක්ඛුන්ති බ්රාහ්මණො, තස්ස චක්ඛූනි පාදාසිං බ්රාහ්මණස්ස වණිබ්බිනො.
2404. භිය්යො මං ආවිසී පීති සොමනස්සඤ්චනප්පකං, එතෙන සච්චවජ්ජෙන දුතියම්මෙ උපපජ්ජථ.
2405. ධම්මෙන භාසිතා ගාථා සිවීනං රට්ඨවඩ්ඪන, එතානි තව නෙත්තානි දිබ්බානි පටිදිස්සරෙ.
2406. තිරො තුඩ්ඪං තිරො සෙලං සමතීග්ගය්හ පබ්බතං, සමන්තා යොජනසතං දස්සනං අනුභොන්තු තෙ.
2407. කොනීධ විත්තං න දදෙය්ය යාචිතො අපි විසිට්ඨං සුපියම්පි අත්තනො, තදිඞ්ඝ සබ්බෙ සිවයො සමාගතා දිබ්බානි නෙත්තානි මමජ්ජ පස්සථ.
2408. තිරො කුඩ්ඩං තිරො සෙලං සමතීග්ගය්හ පබ්බතං, සමන්තා යොජනසතං දසස්නං අනුභොන්ති මෙ.
2409. න චාගමත්තා පරමත්ථි කිඤ්චි මච්චානං ඉධ ජීවිතෙ, දත්වා මානුසකං චක්ඛුං ලද්ධං මෙ චක්ඛුං අමානුසං.
2410. එතම්පි දිස්වා සිවයො දෙථ දානානි භුඤ්ජථ දත්වා ච භුත්වා ච යථානුභාවං අනින්දිතා සග්ගමුපෙථ ඨානන්ති.
සිවි ජාතකං.
4. සිරිමන්දජාතකං
2411. පඤ්ඤායුපෙතං සිරියා විහීනං යසස්සිනඤ්චාපි අපෙතපඤ්ඤං, පුච්ඡාමි තං සෙනක එතමත්ථං කමෙත්ථ සෙය්යො කුසලා වදන්ති.
2412. ධීරා ච බාලා ච හවෙ ජනින්ද සිප්පූපපන්නා ච අසිප්පිනො ච, සුජාතිමන්තොපි අජාතිමස්ස යසස්සිනො පෙස්සකරා භවන්ති. එතම්පි දිස්වාන අහං වදාමි පඤ්ඤො නිහීනො සිරිමාව සෙය්යො.
2413. තවම්පි පුච්ඡාමි අනොමපඤ්ඤ මහොසධ කෙවලධම්මදස්සි, බාලං යසස්සිං පණ්ඩිතං අප්පභොගං කමෙත්ථ සෙය්යො කුසලා වදන්ති.
2414. පාපානි කම්මානි කරොති බාලො ඉදමෙව සෙය්යො ඉති මඤ්ඤමානො ඉධලොකදස්සි පරලොකං අදස්සි, උභයත්ථ බලො කලිමග්ගහෙසි එතම්පි දිස්වාන අහං වදාමි පඤ්ඤොව සෙය්යො න යස්සසී බාලො.
2415. න සිප්පමෙතං විද්ධාති භොගං න බන්ධවා න සරීරාවකාසො පස්සෙළමූගං සුඛමෙධමානං සිරිහීනං භජතෙ ගොරිමන්දං එතම්පි දිස්වාන අහං වදාමි පඤ්ඤො නිහීනො සිරිමාව සෙය්යො.
2416. ලද්ධා සුඛං මජ්ජති අප්පපඤ්ඤො දුක්ඛෙන ඵුට්ඨොපි පමොහමෙති ආගන්තුනා සුඛදුක්ඛෙන ඵුට්ඨො පවෙධති වාරිචරොව ඝම්මෙ එතම්පි දිස්වාන අහං වදාමි පඤ්ඤොව සෙය්යො න යසස්සි බලො.
2417. දූමං යථා සාලුඵලං අරඤ්ඤෙ සමන්තතො සබ්භි චරන්ති පක්ඛී එවම්පි අඩ්ඪං සධනං සභොගං, බහුජ්ජනො භජති අත්ථහෙතු එතම්පි දිස්වාන අහං වදාමි පඤ්ඤො නිහීනො සිරිමාව සෙය්යො.
2418. න සාධු බලවා බාලො සාහසං වින්දතෙ ධනං, කන්දන්තමෙව දුම්මෙධං කඩ්ඪන්ති නිරයෙ භුසං, එතම්පි දිස්වාන අහං වදාමි පඤ්ඤොව සෙය්යො න යසස්සි බලො.
2419. යා කාචි නජ්ජො ගඞ්ගමභිස්සවන්ති, සබ්බාව තා නාමගොත්තං ජහන්ති ගඞ්ගා සමුද්දං පටිපජ්ජමානා න ඛායතෙ ඉද්ධිපරො හි ලොකෙ, එතම්පි දිස්වාන අහං වදාමි පඤ්ඤො නිහීනො සිරිමාව සෙය්යො.
2420. යමෙනමක්ඛා උදධිං මහන්තං සවන්ති නජ්ජො සබ්බකාලං අසඞ්ඛං, සො සාගරො නිච්චමුළාරවෙගො වෙලං න අච්චෙති මහාසමුද්දො.
2421. එවම්පි බාලස්ස පජප්පිතානි පඤ්ඤං න අචෙචති සිරී කදාචි, එතම්පි දිස්වාන අහං වදාමි. පඤ්ඤොව සෙය්යො න යසස්සි බලො.
2422. අසඤ්ඤතො චෙපි පරෙසමත්ථං භණාති සන්ථානගතා යසස්සී, තස්සෙව තං රූහති ඤාතිමජ්ඣෙ සිරිහීනං තාරයතෙ න පඤ්ඤා එතම්පි දිස්වාන අහං වදාමි. පඤ්ඤො නිහීනො සිරිමාව සෙය්යො.
2423. පරස්ස වා අත්තනොචාපි හෙතු බලො මුසා භාසති අප්පපඤ්ඤො සො නින්දිතො හොති සභාය මජ්ඣෙ, පෙච්චාපි සො දුග්ගතිගාමි හොති. එතම්පි දිස්වාන අහං වදාමි පඤ්ඤොව සෙය්යො න යසස්සි බලො.
2424. අත්ථම්පි චෙ භාසති භූරිපඤ්ඤො අනාළ්හියො අප්පධානො දළිද්දො න තස්ස තං රූහති ඤාතිමජ්ඣෙ සිරී ච පඤ්ඤාණවතො න හොති, එතම්පි දිස්වාන අහං වදාමි. පඤ්ඤො නිහීනො සිරිමාව සෙය්යො.
2425. පරස්සවා අන්තනොවාපි හෙතු න භාසති අලිකං භූරිපඤ්ඤො සො පූජිතො හොති සභාය මජ්ඣෙ පෙච්චං ච සො සුග්ගතිගාමි හොති. එතම්පි දිස්වාන අහං වදාමි. පඤ්ඤොව සෙය්යො න යසස්සි බලො.
2426. හත්ථිගවාස්සා මණිකුණ්ඩලා ච නාරියො ච ඉද්ධෙසු කුලෙසු ජාතා සබ්බාව තා උපභොගා භවන්ති, ඉද්ධස්ස පොසස්ස අනිද්ධිමන්තො එතම්පි දිස්වාන අහං වදාමි. පඤ්ඤොව නිහීනො සිරිමාව සෙය්යො.
2427. අසංවිහිතකම්මන්තං බාලං දුම්මන්තමන්තිනං සිරී ජහති දුම්මෙධං ජිණ්ණංව උරගො තචං, එතම්පි දිස්වාන අහං වදාමි. පඤ්ඤොව සෙය්යො න යසස්සි බලො.
2428. පඤ්ච පණ්ඩිතා මයං භදන්තෙ සබ්බෙ පඤ්ජලිකා උපට්ඨිතා ත්වං නො අභිභුය්ය ඉස්සරොසි සක්කො භූතපතීව දෙවරාජා එතම්පි දිස්වාන අහං වදාමි. පඤ්ඤො නිහීනො සිරිමාව සෙය්යො.
2429. දාසො ව පඤ්ඤස්ස යසස්සි බලො අත්ථෙසු ජාතෙසු තථාවිධෙසු යං පණ්ඩිතො නිපුණං සංවිධෙති, සම්මොහමාපජ්ජති තත්ථ බලො එතම්පි දිස්වාන අහං වදාමි. පඤ්ඤොව සෙය්යො න යසස්සි බලො.
2430. අද්ධා හි පඤ්ඤාව සතං පසත්ථා කන්තා සිරී භොගරතා මනුස්සා ඤාණඤ්ච බුද්ධානමතුල්යරූපං පඤ්ඤං න අච්චෙති සිරි කදාචි.
2431. යං තං අපුච්ඡිම්හ අකිත්තයී නො මහොසධ කෙවලධම්මදස්සි ගවං සහස්සං උසභඤ්ච නාගං ආජඤ්ඤයුත්තෙ ච රථෙ දස ඉමෙ පඤ්හස්ස වෙය්යාකරණෙන තුට්ඨො දදාමි තෙ ගාමවරානි සොළසාති.
සිරිමන්ද ජාතකං.
5. රොහන්තමිගජාතකං
2432. එතෙ යූථා පටියන්ති භීතා මරණස්ස චිත්තක, ගච්ඡ තුවම්පි මා කඞ්ඛි ජීවිස්සන්ති තයා සහ.
2433. නාහං රොහන්ත ගච්ඡාමි හදයම්මෙ අවකස්සති, න තං අහං ජහිස්සාමි ඉධ හෙස්සාමි ජීවිතං.
2434. තෙ හි නූන මරිස්සන්ති අන්ධා අපරිනායකා, ගච්ඡ තුවම්පි මා කඞ්ඛි ජීවිස්සන්ති තයා සහ.
2435. නාහං රොහන්ත ගච්ඡාමි හදයම්මෙ අවකස්සති, න තං බද්ධං ජහිස්සාමි ඉධ හෙස්සාමි ජීවිතං.
2436. ගච්ඡ භීරු පලායස්සු කූටෙ බද්ධොස්මි ආයසෙ, ගච්ඡ තුවම්පි මා කඞ්ඛි ජීවිස්සන්ති තයා සහ.
2437. නාහං රොහන්ත ගච්ඡාමි හදයම්මෙ අවකස්සති, න තං අහං ජහිස්සාමි ඉධ හෙස්සාමි ජීවිතං.
2438. තෙ හි නූන මරිස්සන්ති අන්ධා අපරිනායකා, ගච්ඡ තුවම්පි මා කඞ්ඛි ජීවිස්සන්ති තයා සහ.
2439. නාහං රොහනන ගච්ඡාමි හදයම්මෙ අවකස්සති, න තං බද්ධං ජහිස්සාමි ඉධ හෙස්සාමි ජීවිතං.
2440. අයං සො ලුද්දකො එති රුද්දරූපො සහාවුධො, සො නො වධිස්සති අජ්ජ උසුනා සත්තියාමපි.
2441. සා මුහුත්තං පලායිත්වා භයට්ටා භයතජ්ජිතා, සුදුක්කරං අකරා භීරු මරණායුපනිවත්තථ.
2442. කින්නු තෙ මෙ මිගා හොන්ති මුත්තා බද්ධං උපාසරෙ, න තං චජිතුමිච්ඡන්ති ජීවිතස්සපි කාරණා.
2443. භාතරො හොන්ති මෙ ලුද්ද සොදරියා එකමාතුකා, න මං චජිතු මිච්ඡන්ති ජීවිතස්සපි කාරණා.
2444. තෙ හි නූන මරිස්සන්ති අන්ධා අපරිනායකා, පඤ්චන්නං ජීවිතං දෙහි භාතරං මුඤ්ච ලුද්දක.
2445. සො වො අහං පමොක්ඛාමි මාතාපෙත්තිභරං මිගං, නන්දන්තු මාතාපිතරො මුත්තං දිස්වා මහාමිගං.
2446. එවං ලුද්දක නන්දස්සු සහ සබ්බෙහි ඤාතිභි, යථාහමජ්ජ නන්දාමි මුත්තං දිස්වා මහාමිගං.
2447. කථං පමොක්ඛො ආසි උපනීතස්මිං ජීවිතෙ, කථං පුත්ත අමොචෙසි කූටා පාසම්භා ලුද්දකො.
2448. භණං කණ්ණසුඛං වාචං භදයඞ්ගං හදයනිස්සිතං, සුභාසිතාහි වාචාහි චිත්තකො මං අමොචයි.
2449. භණං කණ්ණසුඛං වාචං භදයඞ්ගං හදයනිස්සිතං, සුභාසිතාහි වාචාහි සුතනා මං අමොචයි.
2450. සුත්වා කණ්ණසුඛං වාචං භදයඞ්ගං හදයනිස්සිතං, සුභාසිතානි සුත්වාන ලුද්දකො මං අමොචයි.
2451. එවං ආනන්දිතො හොතු සහ දාරෙහි ලුද්දකො, යථා මයජ්ජ නන්දාම දිස්වා රොහන්තමාගතං.
2452. නනු ත්වං අවචා ලුද්ද මිගචම්මානි ආහරිං, අථ කෙන නු වණ්ණෙන මිගචම්මානි නාහරි.
2453. ආගමාචෙව හත්ථත්ථං කුටපාසඤ්ච සො මිගො, අබජ්ඣිතඤ්ච මිගරාජං තඤ්ච මුත්තා උපාසරෙ.
2454. තස්ස මෙ අහු සංවෙගො අබ්භුතො ලොමහංසනො, ඉමං චාහං මිගං හඤ්ඤෙ අජ්ජ හෙස්සාමි ජීවිතං.
2455. කීදිසා තෙ මිගා ලුද්ද කීදාසා ධම්මිකා මිගා, කථං වණ්ණා කථං සීලා බාළ්හං ඛො තෙ පසංසසි.
2456. ඔදාතසිඞ්ගා සුවිවාළා ජාතරූපතචූපමා, පාදා ලොහිතකා තෙසං අඤ්ජිතක්ඛා මනොරමා.
2457. එදිසා තෙ මිගා දෙව එදිසා ධම්මිකා මිගා, මාතාපෙත්තිහරා දෙව න තෙ සො {*}අභිභාරයුං.
2458. දම්මි නික්ඛසතං ලුද්ද ථුල්ලඤ්ච මණිකුණ්ඩලං, චතුද්දසඤ්ච පල්ලඞ්කං උම්මාපුප්ඵසිරිනිභං.
2459. ද්වෙ ච සාදිසියො භරියා උසභඤ්ච ගවං සතං, ධම්මෙන රජ්ජං කාරෙස්සං බහුකාරො මෙසි ලුද්දක.
2460. කසී වණිජ්ජා ඉණදානං උඤ්ඡාචරියාය ලුද්දක, එතෙහි දාරං පොසෙහි මා පාපං අකරා පුනන්ති.
රොහන්තමිගජාතකං.
6. චූලහංසජාතකං.
2461. එතෙ හංසා පක්කමන්ති වක්කඞ්ගා භයමෙරිතා, හරිත්තච හෙමවණ්ණ කාමං සුමුඛ පක්කම.
2462. ඔහාය මං ඤාතිගණා එකං පාසවසං ගතං, අනපෙක්ඛමානා ගච්ඡන්ති කිං එකො අවහීයසි.
2463. පතෙව පතතං සෙට්ඨ නත්ථි බද්ධෙ සහායතා. මා අනීඝාය හාපෙසි කාමං සුමුඛ පක්කම.
2464. නාහං දුක්ඛපරෙතොති ධතරට්ඨ තුවං ජහෙ, ජීවිතං මරණං වා මෙ තයා සද්ධිං භවිස්සති.