2177. වාණිජකසමා රාජ තෙපි වුච්චන්ති බ්රාහ්මණා, අක්ඛාතා තෙ මහාරාජ තාදිසෙ නිපතාමසෙ.
2178. අපෙතා තෙ බ්රහ්මඤ්ඤා (ඉති රාජාකොරව්යො,) න තෙ වුච්චන්ති බ්රාහ්මණා අඤ්ඤෙ විධුර පරියෙස සීලවන්තෙ බහුස්සුතෙ.
2179. විරතෙ මෙථුනා ධම්මා යෙ මෙ භුඤ්ජෙය්යුං භොජනං, දක්ඛිණං සම්ම දස්සාම යත්ථ දින්නං මහප්ඵලං.
2180. නික්ඛන්තභික්ඛං{1} භුඤ්ජන්ති ගාමෙස්වෙකෙ පුරොහිතා, බහූ තෙ{2} පටිපුච්ඡන්ති අණ්ඩච්ඡෙදා නිලඤ්ඡකා{3} පසූපි තත්ථ හඤ්ඤන්ති මහිසා සූකරා අජා.
2181. ගොඝාතකසමාචාරා තෙපි වුච්චන්ති බ්රාහ්මණා, අක්ඛාතා තෙ මහාරාජ තාදිසෙ නිපතාමසෙ.
2182. අපෙතා තෙ බ්රහ්මඤ්ඤා (ඉති රාජා කොරව්යො) න තෙ වුච්චන්ති බ්රාහ්මණා අඤ්ඤෙ විධුර පරියෙස සීලවන්තෙ බහුස්සුතෙ
2183. විරතෙ මෙථුනා ධම්මා යෙ මෙ භුඤ්ජෙය්යුං භොජනං, දක්ඛිණං සම්ම දස්සාම යත්ථ දින්නං මහප්ඵලං.
2184. අසිචම්මං ගහෙත්වාන ඛග්ගං පග්ගය්හ බ්රාහ්මණා, වෙස්සපථෙසු තිට්ඨන්ති සත්ථං අබ්බාහයන්තිපි.
2185. සමා ගොපනිසාදෙහි තෙපි වුච්චන්ති බ්රාහ්මණා, අක්ඛාතා තෙ මහාරාජ තාදිසෙ නිපතාමසෙ.
2186. අපෙතා තෙ බ්රහ්මඤ්ඤා (ඉති රාජා කොරව්යො,) න තෙ වුච්චන්ති බ්රාහ්මණා අඤ්ඤෙ විධුර පරියෙස සීලවන්තෙ බහුස්සුතෙ.
2187. විරතෙ මෙථුනා ධම්මා යෙ මෙ භුඤ්ජෙය්යුං භොජනං, දක්ඛිණං සම්ම දස්සාම යත්ථ දින්නං මහප්ඵලං.
2188. අරඤ්ඤෙ කුටිකං කත්වා කූටානි කාරයන්ති තෙ, සසඛිළාරෙ බාධෙන්ති ආගොධා මච්ඡකච්ඡපං.
2189. ලුද්දකා තෙ මහාරාජ තෙපි වුච්චන්ති බ්රාහ්මණ, අක්ඛාතා තෙ මහාරාජ තාදිසෙ නිපතාමසෙ.
2190. අපෙතා තෙ බ්රහ්මඤ්ඤා (ඉති රාජා කොරව්යො,) න තෙ වුච්චන්ති බ්රාහ්මණා අඤ්ඤෙ විධුර පරියෙස සීලවන්තෙ බහුස්සුතෙ.
2191. විරතෙ මෙථුනා ධම්මා යෙ මෙ භුඤ්ජෙය්යුං භොජනං, දක්ඛිණං සම්ම දස්සාම යත්ථ දින්නං මහප්ඵලං.
2192. අඤ්ඤෙ ධනස්ස කාමාහි හෙට්ඨාමඤ්චෙ පසක්ඛිතා, රාජානො උපරි නහායන්ති සොමයාගෙ උපට්ඨිතෙ.
2193. මලමජ්ජකසමා රාජ තෙපි වුච්චන්ති බ්රාහ්මණා, අක්ඛාතා තෙ මහාරාජ තාදිසෙ නිපතාමසෙ.
2194. අපෙතා තෙ බ්රහ්මඤ්ඤා (ඉති රාජා කොරව්යො,) න තෙ වුච්චන්ති බ්රාහ්මණා අඤ්ඤෙ විධුර පරියෙස සීලවන්තෙ බහුස්සුතෙ
2195. විරතෙ මෙථුනා ධම්මා යෙ මෙ භුඤ්ජෙය්යුං භොජනං, දක්ඛිණං සම්ම දස්සාම යත්ථ දින්නං මහප්ඵලං.
2196. අත්ථි බ්රාහ්මණා දෙව සීලවන්තො බහුස්සුතා, විරතා මෙථුනා ධම්මා යෙ තෙ භුඤ්ජෙය්යුං භොජනං.
2197. එකඤ්ච භත්තං භුඤ්ජන්ති න ච මජ්ජං පිවන්ති තෙ, අක්ඛාතා තෙ මහාරාජ තාදිසෙ නිපතාමසෙ.
2198. එතෙ ඛො බ්රාහ්මණා විධුර සීලවන්තො බහුස්සුතා, එතෙ විධුර පරියෙස ඛිප්පඤ්ච තෙ නිමන්තයාති.
12. දසබ්රාහ්මණජාතකං.
2199. සුඛුමාලරූපං දිස්වාන{1} රට්ඨා විවනමාගතං, කූටාගාරවරූපෙතං මහාසයනමුපාසිතං,{2}
2200. තස්ස තෙ පෙමකෙනාහං අදාසිං බද්ධ{3}මොදනං, සාලීනං විචිතං භත්තං සුචිං මංසූපසෙචනං.
2201. තං ත්වං භත්තං පටිග්ගය්හ බ්රාහ්මණස්ස අපාපයි{4}, අත්තානං අනසිත්වාන කොයං ධම්මො නමත්ථු තෙ.
2202. ආචරියො බ්රාහ්මණො මය්හං කිච්චාකිච්චෙසු ව්යාවටො, ගරු ච ආමන්තනීයො දාතුමරහාමි භොනං.
2203. බ්රාහ්මණන්දානි පුච්ඡාමි ගොතමං රාජපූජිතං, රාජා තෙ භත්තං පාදාසි සුචිං මංසූපසෙචනං.
2204. තං ත්වං භත්තං පටිග්ගය්හ ඉසිස්ස භොජනං අදා, අඛෙන්තඤ්ඤූසි දානස්ස කොයං ධම්මො නමත්ථු තෙ.
2205. භරාමි පුත්තෙ දාරෙ ච ඝරෙසු ගථිතො අහං, භුඤ්ජෙ මානුසකෙ කාමෙ අනුසාසාමි රාජිනො.
2206. ආරඤ්ඤකස්ස ඉසිනො චිරරත්තං තපස්සිනො, වද්ධස්ස{5} භාවිතත්තස්ස දාතුමරහාමි භොජනං
2207. ඉසිඤ්චදානි පුච්ඡාමි කිසං ධමනිසන්ථතං. පරූළ්හකච්ඡනඛලොමං පඞ්කදන්තං රජස්සිරං.
2208. එකො අරඤ්ඤෙ විහරසි{6} නාවකඞ්ඛසි ජීවිතං, භික්ඛු කෙන තයා සෙය්යො යස්ස ත්වං භොජනං අදා
2209. ඛණන්තාලු{7}කලම්බානි බිළාලීතක්කළානි ච, ධුනං සාමාකනීවාරං සඞ්ඝාරියං{8} පසාරියං,
2210. සාකං භිසං මධුං මංසං පදරාමලකානි ච, තානි ආහත්ව{1} භුඤ්ජාමි අත්ථි මෙ සො පරිග්ගහො.
2211. පචන්තො අපචන්තස්ස අමමස්ස අකිඤ්චනො, අනාදානස්ස සාදානො දාතුමරහාමි භොජනං.
2212. භික්ඛුඤ්චදානි පුච්ඡාමි තුණ්හීමාසීන සුබ්බතං. ඉසි තෙ භත්තං පාදාසි සුචිං මංසූපසෙචනං.
2213. තං ත්වං භත්තං පටිග්ගය්හ තුණ්හී භුඤ්ජසි එකකො, නාඤ්ඤං කඤ්චි නිමන්තෙසි කොයං ධම්මො නමත්ථු තෙ.
2214. න පචාමි න පාචෙමි න ඡින්දාමි න ඡෙදයෙ, තං මං අකිඤ්චනං ඤත්වා සබ්බපාපෙහි ආරතං.
2215. වාමෙන භික්ඛමාදාය දක්ඛිණෙන කමණ්ඩලුං, ඉසි මෙ භත්තං පාදාසි සුචිං මංසූපසෙචනං.
2216. එතෙ හි දාතුමරහන්ති සමමා සපරිග්ගහා, පච්චණීකමහං මඤ්ඤෙ යො දාතාරං නිමන්තයෙ.
2217. අත්ථාය වත මෙ අජ්ජ ඉධාගඤ්ජි{2} රථෙසභො, ඉතො පුබ්බෙ න පජානාමි{3} යත්ථ දින්නං මහප්ඵලං.
2218. රට්ඨෙසු ගිද්ධා රාජානො කිච්චාකිච්චෙසු බ්රාහ්මණා, ඉසී මූලඵලෙ ගිද්ධා විප්පමුත්තා ච භික්ඛවොති.
13. භික්ඛාපරම්පරජාතකං.
පකිණ්ණකනිපාතං නිට්ඨිතං
තස්සුද්දානං:
සුව කින්නරමුක්කඛරාජීන සො, භිසජාත මහෙසි කපොතවරො, අථ මොර සතච්ඡක වාණිජකො අථ රාජ දසබ්රාහ්මණා භික්ඛපරන්ති.
සුත්තන්තපිටකෙ - ඛුද්දකනිකායෙ
ජාතකපාළි
(දුතියො භාගො)
නමො තස්ස භගවතො අරහතො සම්මා සම්බුද්ධස්ස
15. වීසතිනිපාතො
1. මාතඞ්ගජාතකං
2328. කුතො නු ආගච්ඡසි රුම්මවාසී{1} ඔතල්ලකො පංසුපිසාචකොව, සඞ්කාරචොළං පටිමුච්ච{2} කණ්ඨෙ කො රෙ තුවං හොහිසි අදක්ඛිණෙය්යො.
2329. අන්නං තව{3} ඉදං පකතං යසස්සී{4} තං ඛජ්ජරෙ භුඤ්ජරෙ පිය්යරෙ ච, ජානාසි මං ත්වං පරදත්තූපජීවිං{5} උත්තිට්ඨපිණ්ඩං ලභතං සපාකො.
2330. අන්නං මම{6} ඉදං පකතං බ්රාහ්මණානං අත්තත්ථාය සද්දහතො මමයිදං, අපෙහි එත්තො කිමිධට්ඨිතොසි න මාදිසා තුය්හං දදන්ති ජම්ම.
2331. ථලෙ ච නින්නෙ ච වපන්ති බීජං අනූපඛෙත්තෙ ඵලමාසසානා{7}, එතාය සද්ධාය දදාහි දානං අප්පෙව ආරාධයෙ දක්ඛිණෙය්යෙ.
2332. ඛෙත්තානි මය්හං විදිතානි ලොකෙ යෙසාහං බීජානි පතිට්ඨපෙමි, යෙ බ්රාහ්මණා ජාතිමන්තූපපන්නා තානීධ ඛෙත්තානි සුපෙසලානී.
2333. ජාතිමදො ව අතිමානිතා ච ලොභො ච දොසො ච මදො ච මොහො, එතෙ අගුණා{1} යෙසු වසන්ති සබ්බෙ, තානීධ ඛෙත්තානි අපෙසලානි.
2334. ජාතිමදො ව අතිමානිතා ච ලොභො ච දොසො ච මදො ච මොහො, එතෙ අගුණා යෙසු න සන්ති සබ්බෙ, තානීධ ඛෙත්තානි සුපෙසලානි.
2335. කෙවත්ථ{2} ගතා උපජොතියො ච උපජ්ඣායො අථවා භණ්ඩකුච්ඡි{3}, ඉමස්ස දණ්ඩඤ්ච වධඤ්ච දත්වා ගලෙ ගහෙත්වා ඛලයාථ{4} ජම්මං.
2336. ගිරං නඛෙන ඛණසි අයො දන්තෙන ඛාදසි, ජාතවෙදං පදහසි යො ඉසිං පරිභාසසි.
2337. ඉදං වත්වාන මාතඞ්ගො ඉසි සච්චපරක්කමො, අන්තලික්ඛස්මිං පක්කාමි බ්රාහ්මණානං උදික්ඛතං.
2338. ආවෙඨිතං{5} පිට්ඨිතො උත්තමඞ්ගං බාහං{6} පසාරෙති අකම්මනෙය්යං සෙතානි අක්ඛීනි යථා මතස්ස කො මෙ ඉමං පුත්තමකාසි එවං.
2339. ඉධාගමා සමණො රුම්මවාසී ඔතල්ලකො පංසුපිසාචකොව සඞ්කාරචොළං පටිමුච්ච කණ්ඨෙ සො තෙ ඉමං පුත්තමකාසි එවං.
2340. කතමං දිසං අගමා භූරිපඤ්ඤො අක්ඛාථ මෙ මාණවා එතමත්ථං ගන්ත්වාන තං පටිකිරියෙමු{7} අච්චයං අප්පෙව නං පුත්තං ලභෙමු ජීවිතං.
2341. වෙහාසයං අගමා භූරිපඤ්ඤො පථද්ධුනො පණ්ණරසෙව චන්දො, අපිචාපි සො පුරිමං දිසං අගඤ්ඡි සච්චප්පටිඤ්ඤො ඉසි සාධුරූපො.
2342. ආවෙඨිතං පිට්ඨිතො උත්තමඞ්ගං බාහං පසාරෙති අකම්මනෙය්යං, සෙතානි අක්ඛීනි යථා මතස්ස කො මෙ ඉමං පුත්තමකාසි එවං.
2343. යක්ඛා හවෙ සන්ති මහානුභාවා අන්වාගතා ඉසයො සාධුරූපා, තෙ දුට්ඨචිත්තං කුපිතං විදිත්වා යක්ඛා හි තෙ පුත්තමකංසු එවං.
2344. යක්ඛා ච මෙ පුත්තමකංසු එවං ත්වඤ්ඤෙව මෙ මා කුද්ධො බ්රහ්මචාරි, තුම්හෙව පාදෙ සරණං ගතාස්මි අන්වාගතා පුත්තසොකෙන භික්ඛු.
2345. තදෙවහි එතරහි ච මය්හං මනොපදොසො න මමත්ථි කොචි, පුත්තො ච තෙ වෙදමදෙන මත්තො අත්ථං න ජානාති අධිච්ච වෙදෙ.
2346. අද්ධා හවෙ භික්ඛු මුහුත්තකෙන සම්මුය්හතෙව පුරිසස්ස සඤ්ඤා, එකාපරාධං ඛම භූරිපඤ්ඤ න පණ්ඩිතා කොධබලා භවන්ති.
2347. ඉමඤ්ච{1} මය්හං උත්තිට්ඨපිණ්ඩං තං මණ්ඩව්යො භුඤ්ජතු අප්පපඤ්ඤො, යක්ඛා ච තෙ නං න විභෙඨයෙය්යුං පුත්තො{2} ච තෙ හොහිති සො අරොගො.
2348. මණ්ඩව්ය බාලොසි පරිත්තපඤො යො පුඤ්ඤක්ඛෙත්තානං අකොවිදොසි, මහක්කසාවෙසු දදාහි{3} දානං කිලිට්ඨකම්මෙසු අසඤ්ඤතෙසු.
2349. ජටා ච කෙසා අජිනා නිවත්ථා ජරූදපානංව මුඛං පරූළහං, පජං ඉමං පස්සථ රුම්මරූපිං{4} න ජටාජිනං තායතෙ අප්පපඤ්ඤං.
2350. යෙසං රාගො ච දොසො ච අවිජ්ජා ච විරාජිතා, ඛීණාසවා අරහන්තො තෙසු දින්නං මහප්ඵලං. {*} උපහච්ච මනං මෙජ්ඣො මාතඞ්ගස්මිං යසස්සිනෙ, සපාරිසජ්ජො උච්ඡින්නො මෙජ්ඣාරඤ්ඤං තදා අහූ’ති.
මාතඞ්ග ජාතකං.
2. චිත්තසම්භුතජාතකං.
2351. සබ්බං නරානං සඵලං සුචිණ්ණං න කම්මනා{1} කිඤ්චන මොඝමත්ථි, පස්සාමි සම්භූතං මහානුභාවං සකම්මනා පුඤ්ඤඵලූපපන්නං.
2352. සබ්බං නරානං සඵලං සුචිණ්ණං න කම්මනා කිඤ්චන මොඝමත්ථි, කච්චින්නු චිත්තස්සපි එවමෙව ඉද්ධො මනො තස්ස යථාපි මය්හං.
2353. සබ්බං නරානං සඵලං සුචිණ්ණං න කම්මනා කිඤ්චන මොඝමත්ථි, චිත්තං විජානාහි තථෙව දෙව ඉද්ධො මනො තස්ස යථාපි තුය්හං.
2354. භවං නු චිත්තො සුතමඤ්ඤතො තෙ උදාහු තෙ කොචිනං එතදක්ඛා, ගාථා සුගීතා න මමත්ථි කඞ්ඛා දදාමි තෙ ගාමවරං සතඤ්ච.
2355. න චාහං චිත්තො සුතමඤ්ඤතො මෙ ඉසී ච මෙ එතමත්ථං අසංසි ගන්ත්වාන රඤ්ඤො පටිගාහි ගාථං අපි තෙ වරං අත්තමනො දදෙය්ය.{2}
2356. යොජෙන්තු වෙ රාජරථෙ සුකතෙ චිත්තසිබ්බනෙ, කච්ඡං නාගානං බන්ධථ ගීවෙය්යං පටිමුඤ්චථ.
2357. ආහඤ්ඤන්තු භෙරිමුදිඞ්ගසඞ්ඛෙ සීඝානි යානානි ච යොජයන්තු අජ්ජෙවහං අස්සමං තං ගමිස්සං යත්ථෙව දක්ඛිස්සං ඉසිං නිසින්නං.
2358. සුලද්ධලාභො වත මෙ අහොසි ගාථා සුගීතා පරිසාය මජ්ඣෙ, සොහං ඉසිං සීලවතූපපන්නං දිස්වා පතීතො සුමනොහමස්මි.
2359. ආසනං උදකං පජ්ජං පතිගණ්හාතු නො භවං, අග්ඝෙ භවන්තං පුච්ඡාම අග්ඝං කුරුතු නො භවං.
2360. රම්මඤ්ච තෙ ආවසථං කරොන්තු නාරීගණෙහි පරිචාරයස්සු කරොහි මකාසමනුග්ගහාය උභොපිමං ඉස්සරියං කරොම.
2361. දිස්වා ඵලං දුච්චරිතස්ස රාජ අථො සුචිණ්ණස්ස මහාවිපාකං, අන්තානමෙවං පටිසඤ්ඤමිස්සං න පත්ථයෙ පුත්තං පසුං ධනං වා.
2362. දසෙවිමා වස්සදසා මච්චානං ඉධ ජීවිතං, අප්පත්තඤ්ඤෙව තං ඔධිං නළො ඡින්නොව සුස්සති.
2363. තත්ථ කා නන්දි කා ඛිඩ්ඩා කා රතී කා ධනෙසනා, කිම්මෙ පුත්තෙහි දාරෙහි රාජ මුත්තොස්මි බන්ධනා.
2364. සො අහං සුප්පජානාමි මච්චු මෙ නප්පමජ්ජති, අන්තකෙනාධිපන්නස්ස කා රතී කා ධනෙසනා.
2365. ජාති නරානං අධමා ජනින්ද චණ්ඩාලයොනි දිපදා කණිට්ඨා, සකෙහි කම්මෙහි සුපාපකෙහි චණ්ඩාලගබ්භෙ අවසිම්භ පුබ්බෙ.
2366. චණ්ඩාලාහුම්හ අවන්තීසු මිගා නෙරඤ්ජරම්පති, උක්කුසා නම්මදාතීරෙ ත්යජ්ජ බ්රාහ්මණඛත්තියා,
2367. උපනීයති ජීවිතමප්පමායු ජරූපනීතස්ස න සන්ති තාණා, කරොහි පඤ්චාල මමෙතවාක්යං මාකාසි කම්මානි දුඛුද්රයානි.
2368. උපනීයති ජීවිතමප්පමායු ජරූපනීතස්ස න සන්ති තාණා, කරොහි පඤ්චාල මමෙතවාක්යං මාකාසි කම්මානි දුක්ඛප්ඵලානි.
2369. උපනීයති ජීවිතමප්පමායු ජරූපනීතස්ස න සන්ති තාණා, කරොහි පඤ්චාල මමෙතවාක්යං මාකාසි කම්මානි රජස්සිරානි.
2370. උපනීයති ජීවිතමප්පමායු වණ්ණං ජරා හන්ති නරස්ස ජීයතො, කරොහි පඤ්චාල මමෙතවාක්යං මාකාසි කම්මානි නිරයූපපත්තියා.
2371. අද්ධා හි සච්චං වචනං තවෙතං යථා ඉසි භාසසි එවමෙතං, කාමා ච මෙ සන්ති අනප්පරූපා තෙ දුච්චජා මාදිසකෙන භික්ඛු.
2372. නාගො යථා පඞ්කමඣෙ බ්යසන්නො පස්සං ථලං නාභිසම්භොති ගන්තුං, එවංපහං කාමපඞ්කෙ බ්යසන්නො න භික්ඛුනො මග්ගමනුබ්බජාමි.