2081. න සන්ති දෙවා ඉච්චාහු එකෙ ඉධෙව ජීවො විභවං උපෙති, තථා ඵලං සුකතදුක්කතානං දත්තු{2}පඤ්ඤත්තඤ්ච වදන්ති දානං. තෙසං වචො අරහතං සද්දහානො තස්මා අහං සකුණෙ බාධයාමි.
2082. චන්දො ච සුරියො ච උභො සුදස්සනා ගච්ඡන්ති ඔභාසයමන්තලික්ඛෙ, ඉමස්ස ලොකස්ස පරස්ස වා තෙ කථන්නු තෙ ආහු මනුස්සලොකෙ.
2083. චන්දො ච සුරියො ච උභො සුදස්සනා ගච්ඡන්ති ඔභාසයමන්තලික්ඛෙ, පරස්ස ලොකස්ස න තෙ ඉමස්ස දෙවාති තෙ ආහු මනුස්සලොකෙ.
2084. එත්ථෙව තෙ නිහතා හීනවාදා අහෙතුකා යෙ න වදන්ති කම්මං, තථා ඵලං සුකතදුක්කතානං දත්තූ{1} පඤ්ඤත්තං යෙ ච වදන්ති දානං.
2085. අද්ධා හි සච්චං වචනං තවෙතං කථං හි දානං අඵලං වදෙය්ය, තථා ඵලං සුකතදුක්කතානං දත්තූපඤ්ඤත්තඤ්ච කථං භවෙය්යා
2086. කථං කරො කින්නිකරො කිමාචරං කිං සෙවමානො කෙන තපොගුණෙන, අක්ඛාහි{2} මෙ මොරරාජෙතමත්ථං{3} යථා අහං නො නිරයං පතෙය්යං.
2087. යෙ කෙචි අත්ථි සමණා පථව්යා{4} කාසාවවත්ථා අනගාරියා{5} තෙ, පාතොව පිණ්ඩාය චරන්ති කාලෙ විකාලචරියා විරතා හි සන්තො.
2088. තෙ තත්ථ කාලෙනුපසඞ්කමිත්වා පුච්ඡෙසි{6} යන්තෙ මනසො පියං සියා, තෙ තෙ{7} පවක්ඛන්ති යථා පජානං ඉමස්ස ලොකස්ස පරස්ස චත්ථුං.
2089. තචංව ජිණ්ණං උරගො පුරාණං පණ්ඩූපලාසං හරිතො දුමොව, ඵසප්පහීනො මම ලුද්දභාවො පජහා{8}මහං ලුද්දකභාවමජ්ජ.
2090. යෙ චාපි මෙ සකුණා අත්ථි බද්ධා{1} සතානි නෙකානි නිවෙසනස්මිං, තෙසංපහං{2} ජීවිතං අජ්ජ දම්මී මොක්ඛඤ්ච තෙ පත්තො{3} සකං නිකෙතං.
2091. ලුද්දො චරී පාසහත්ථො අරඤ්ඤෙ බාධෙතුං{4} මොරාධිපතිං යසස්සිං බන්ධිත්ව{5} මොරාධිපතිං යසස්සිං දුක්ඛා පමුච්චි{6} යථාහං පමුත්තොති.
8. මහාමොරජාතකං.
2092. යදෙසමානා විචරිම්හ පබ්බතානි වනානි ච, අන්වෙසං විචරිං{7} ඤාතී{8} තෙමෙ අධිගතා මයා
2093. බහුං ඉදං{9} මූලඵලං භක්ඛො චායං අනප්පකො, රම්මා චිමා ගිරි නදියො ඵාසු වාසො භවිස්සති.
2094. ඉධෙවාහං වසිස්සාමි සහ සබ්බෙහි ඤාතිභි, අප්පොස්සුක්කො නිරාසඞ්කි අසොකො අකුතොභයො.
2095. අඤ්ඤං හි ලෙනං{10} පරියෙස සත්තු නො ඉධ විජ්ජති, සො තච්ඡ සූකරෙ හන්ති ඉධාගන්ත්වා වරං වරං
2096. කොනම්හාකං ඉධ සත්තු කො ඤාතී සුසමාගතෙ, අප්පධංසෙ පධංසෙති තම්මෙ අක්ඛාථ පුච්ඡිතා.
2097. උද්ධග්ගරාජී මිගරාජා බලී දාඨාවුධො මිගො, සො තච්ඡ සූකරෙ{11} හන්ති ඉධාගන්ත්වා වරං වරං.
2098. න නො දාඨා න විජ්ජන්ති බලං කායෙ සමූහතං{12}, සබ්බෙ සමග්ගා හුත්වාන වසං කාහාම එකකං.
2099. හදයඞ්ගමං කණ්ණසුඛං වාචං භාසසි තච්ඡක, යොපි යුද්ධෙ පලායෙථ{13} තම්පි පච්ඡා හනාමසෙ.
2100. පාණාතිපාතා විරතො නු අජ්ජ අභයං නු තෙ සබ්බභූතෙසු දින්නං, දාඨා නු තෙ මිග විරියං න සන්ති යො සඞ්ඝපත්තො කපණොව ඣායසි.
2101. න මෙ දාඨා න විජ්ජන්ති බලං කායෙ සමූහතං, ඤාතී ච දිස්වාන සමඞ්ගි{1}එකතො තස්මා ඣායාමි වනම්හි එකතො
2102. ඉමස්සුදං යන්ති දිසොදිසං පුරෙ භයද්දිතා{2} ලෙනගවෙසිනො පුථු, තෙදානි සඞ්ගම්ම වසන්ති{3} එකකො යත්ථට්ඨිතා දුප්පසහජ්ජ තෙ මයා.
2103. පරිණායකසම්පන්නා සහිතා එකවාදිනො{4} තෙ මං සමග්ගා හිංසෙය්යුං තස්මා තෙසං න පත්ථයෙ{5}.
2104. එකොව ඉන්දො අසුරෙ ජිනාති එකොව සෙනො හන්ති දිජෙ පසය්හ, එකොව ව්යග්ඝො{6} මිගසඞ්ඝපත්තො වරං වරං හන්ති බලං හි තාදිසං.
2105. නහෙව ඉන්දො න සෙනො නපි ව්යග්ඝො මිගාධිපො, සමග්ගෙ සහිතෙ ඤාතී ව්යගෙඝ{7} ච කුරුතෙ වසෙ.
2106. කුම්භීලකා සකුණිකා{8} සඞ්ඝිනො ගණචාරිනො, සම්මොදමානා එකජ්ඣං උප්පතන්නි ඩයන්ති ච{9}
2107. තෙසඤ ඩයමනානං එකෙත්ථ අපවත්තති{10}, තඤ්ච{11} සෙනො නිතාළෙති වෙය්යග්ඝියෙව සා ගති.
2108. උස්සාහිතො ජටිලෙන{12} ලුද්දෙනාමිසචක්ඛුනා, දාඨි දාඨිසු පක්ඛන්දි මඤ්ඤමානො යථාපුරෙ.
2109. සාධු සම්බහුලා ඤාති අපි රුක්ඛා අරඤ්ඤජා, සූකරෙහි සමග්ගෙහි ව්යග්ඝො එකායනෙ{13} හතො.
2110. බ්රාහ්මණඤ්චෙව ව්යග්ඝඤ්ච උභො හන්ත්වාන සූකරා, ආනන්දිනො පමුදිතා{1} මහානාදඤ්ච නාදිසුං.
2111. තෙ{2}සු උදුම්බරමූලස්මිං සූකරා සුසමාගතා, තච්ඡකං අභිසිඤ්චිංසු ත්වං නො රාජාසි ඉස්සරොති.
9. තච්ඡසූකරජාතකං.
2112. වාණිජා සමිතිං කත්වා නානාරට්ඨතො ආගතා, ධනාහාරා පක්කමිංසු එකං කත්වාන ගාමණිං.
2113. තෙ තං කන්තාරමාගම්ම අප්පභක්ඛං අනොදකං, මහානිග්රොධමද්දක්ඛුං සීතච්ඡායං මනොරමං.
2114. තෙ ච තත්ථ නිසීදිත්වා තස්ස රුක්ඛස්ස ඡාදියා{3}, වාණිජා සමචින්තෙසු බාලා මොහෙන පාරුතා.
2115. අද්දායතෙ{4} අයං රුක්ඛො අපි වාරි ච{5} සන්දති, ඉඞ්ඝස්ස පුරිමං සාඛං මයං ඡින්දාම වාණිජා.
2116. සා ච ඡින්නාව පග්ඝරි අච්ඡං වාරිං{6} අනාවිලං, තෙ තත්ථ නහාත්වා ච පිවිත්වා ච යාවතිච්ඡිංසු වාණිජා.
2117. දුතියං සමචින්තෙසු බාලා මොහෙන පාරුතා, ඉඞ්ඝස්ස දක්ඛිණං සාඛං මයං ඡින්දාම වාණිජා.
2118. සා ච ඡින්නාව පග්ඝරි සාලිමංසොදනං බහුං, අප්පොදවණ්ණෙ කුම්මාසෙ{7} සිඞ්ගිං{8} බිදල සූපියො.
2119. තෙ තත්ථ භුත්වා ඛාදිත්වා{9} යාවතිච්ඡිංසු වාණිජා, තතියං සමචින්තෙසුං බාලා මොහෙන පාරුතා.
2120. ඉඞ්ඝස්ස පච්ඡිමං සාඛං මයං ඡින්දාම වාණිජා, සා ච ඡින්නාව පග්ඝරි නාරියො සමලඞ්කතා.
2121. විචිත්රවත්ථාභරණා{10} ආමුත්තතමණිකුණ්ඩලා, අපිසු වාණිජා එකා නාරියො පණ්ණවීසති.
2122. සමන්තා පරිකරිංසු{11} තස්ස රුක්ඛස්ස ඡාදියා, තෙ තාහි පරිචාරෙසුං{12} යාවතිච්ඡිංසු වාණිජා.
2123. චතුත්ථං සමචින්තෙසුං බාලා මොහෙන පාරුතා ඉඞ්ඝස්ස උත්තරං සාඛං ඡින්දාම වාණිජා.
2124. සා ච ඡින්නාව පග්ඝරි මුත්තා වෙළුරියෙ බහු, රජතං ජාතරූපඤ්ච කුත්තියො පටියානි ච.
2125. කාසිකානි ච වත්ථානි උද්දියානෙ ච කම්බලෙ{1}, තෙ තත්ථ භාරෙ බන්ධිත්වා යාවතිච්ඡිංසු වාණිජා.
2126. පඤ්චමං සමචින්තෙසුං බාලා මොහෙන පාරුතා, ඉඞ්ඝස්ස මූලං ඡින්දාම අපි භිය්යො ලභාමසෙ.
2127. අථුට්ඨහී සත්ථවාහො යාචමානො කතඤ්ජලී, නිග්රොධෙ කිං අපරජ්ඣථ{2} වාණිජා භද්දමත්ථු තෙ.
2128. චාරිදා පුරිමා සාඛා අන්නපානං ච දක්ඛිණා, නාරිදා පච්ඡිමා සාඛා සබ්බකාමෙ ච උත්තරා නිග්රොධෙ{3} කිං අපරජ්ඣථ වාණිජා භද්දමත්ථු තෙ.
2129. යස්ස රුක්ඛස්ස ඡායාය නිසීදෙය්ය සයෙය්ය වා, න තස්ස සාඛං භඤ්ජෙය්ය මිත්තදුබ්භො හි{4} පාපකො.
2130. තෙ ච තස්ස අනාදිත්වා එකස්ස වචනං බහූ. නිසිතාහි කුඨාරීහි මූලතො තං උපක්කමුං.
2131. තතො නාගා නික්ඛමිංසු සන්නද්ධා පණ්ණවීසති, ධනුග්ගහානං තිසතා ඡසහස්සා ච වම්මිනො.
2132. එතෙ හනථ බන්ධථ මා වො මුඤ්චිත්ථ ජීවිතං, ඨපෙත්වා සත්ථවාහං සබ්බෙ භස්මීකරොථ තෙ.
2133. තස්මා හි පණ්ඩිතො පොසො සම්පස්සං අත්ථමත්තනො. ලොභස්ස න වසං ගච්ඡෙ හනෙය්ය{5} දිසතං මනං.
2134. එතමාදීනවං ඤාත්වා තණ්හා දුක්ඛස්ස සම්භවං, වීතතණ්හො අනාදානො සතො භික්ඛු පරිබ්බජෙති.
10. මහාවාණිජජාතකං.
2135. අබ්භුතො වත ලොකස්මිං උප්පජ්ජි ලොමහංසනො, දිබ්බො රථො පාතුරහූ වෙදෙහස්ස යසස්සිනො.
2136. දෙවපුත්තො මහිද්ධිකො මාතලී දෙවසාරථි, නිමන්තයිත්ථ රාජානං වෙදෙහං මිථිලග්ගහං.
2137. එහිමං රථමාරුය්හ රාජසෙට්ඨ දිසම්පති. දෙව දස්සනකාමා තෙ තාවතිංසා සඉන්දකා. සරමානා හි තෙ දෙවා සුධම්මායං සමච්ඡරෙ.
2138. තතො ච රාජා සාධීනො පමුඛො රථමාරුහි, සහස්සයුත්තං අභිරුය්හ අගා දෙවානසන්තිකෙ තං දෙව පටිනන්දිංසු දිස්වා රාජානමාගතං
2139. ස්වාගතං තෙ මහාරාජ අථො තෙ අදුරාගතං, නිසීදදානි රාජිසි දෙවරාජස්ස සන්තිකෙ.
2140. සක්කොපි පටිනන්දිත්ථ වෙදෙහං මිථිලග්ගහං, නිමන්තයී ච කාමෙහි ආසනෙන ච වාසවො.
2141. සාධු ඛොසි අනුප්පත්තො ආවාසං වසවත්තිනං, වස දෙවෙසු රාජිසි සබ්බකාමසමිද්ධිසු තාවතිංසෙසු දෙවෙසු භුඤ්ජ කාමෙ අමානුසෙ.
2142. අහං පුරෙ සග්ගගතො රමාමි නච්චෙහි ගීතෙහි ච වාදිතෙහි, සොදානි අජ්ජ න රමාමි සග්ගෙ ආයුං නු ඛීණො මරණං නු සන්තිකෙ උදාහු මූළ්හොස්මි ජනින්දසෙට්ඨ.
2143. නචායු ඛීණං මරණං තෙ දූරෙ නචාපි මූළ්හො නරවිරිය{1} සෙට්ඨ, තවඤ්ච{2} පුඤ්ඤානි පරිත්තකානි යෙසං විපාකං ඉධ වෙදයිත්ථො.
2144. වස දෙවානුභාවෙන රාජසෙට්ඨ දිසම්පති, තාවතිංසෙසු දෙවෙසු භුඤ්ජ කාමෙ අමානුසෙ.
2145. යථා යාචිතකං යානං යථා යාචිතකං ධනං. එවං සම්පදමෙවෙතං යං පරතො දානපච්චයා.
2146. නචාහමෙතං ඉච්ඡාමි යං පරතො දානපච්චයා, සයං කතානි පුච්චානි තම්මෙ ආවෙණිකං ධනං.
2147. සොහං ගන්ත්වා මනුස්සෙසු කාහාමි කුසලං බහුං, දානෙන සමචරියාය සංයමෙන දමෙන ච. යං කත්වා සුඛිනො හොති න ච පච්ඡානුතප්පති.
2148. ඉමානි තානි ඛෙත්තානි ඉමං නික්ඛං සුකුණ්ඩලං{1}, ඉමා තා හරිතා නූපා{2} ඉමා නජ්ජො සවන්තියො.
2149. ඉමා තා පොක්ඛරණියො රම්මා චක්කවාකූපකූජිතා, මන්දාලකෙහි{3} සඤ්ඡන්නා පදුමුප්පලකෙහි ච යස්සිමානි මමායිංසු කින්නු තෙ දිසතං ගතා.
2150. තානීධ{4} ඛෙත්තානි සො භූමිභාගො තෙ ආරාමා තෙ වන මෙ පචාරා{5}, තමෙව මය්හං ජනතං අපස්සතො සුඤ්ඤාව මෙ නාරද ඛායතෙ දිසා.
2151. දිට්ඨා මයා විමානානි ඔභාසෙන්තා{6} චතුද්දිසා, සම්මුඛා දෙවරාජස්ස තිදසානඤ්ච සම්මුඛා.
2152. වුත්ථං මෙ භවනං දිබ්බං{7} යුත්තා කාමා අමානුසා, තාවතිංසෙසු දෙවෙසු තිබ්බකාමසමිද්ධිසු.
2153. සොහං එතාදිසිං දිස්වා{8} පුඤ්ඤාය’ම්භි ඉධාගතො, ධම්මමෙව චරිස්සාමි නාහං රජ්ජෙන අත්ථිකො.
2154. අදණ්ඩාවචරං මග්ගං සම්මාසම්බුද්ධදෙසිතං. තං මග්ගං පටිපජ්ජිස්සං යෙන ගච්ඡන්ති සුබ්බතා’ති.
11. සාධීනජාතකං{9}.
2155. රාජා අවොච විධුරං{1} ධම්මකාමො යුධිට්ඨිලො, බ්රාහ්මණෙ විධුර පරියෙස සීලවන්තෙ බහුස්සුතෙ.
2156. විරතෙ මෙථුනා ධම්මා යෙ මෙ භුඤ්ජෙය්යුං{2} භොජනං, දකඛීණං සම්ම දස්සාම යත්ථ දින්නං මහප්ඵලං
2157. දුල්ලභා බ්රාහ්මණා දෙව සීලවන්තො බහුස්සුතා, විරතා මෙථුනා ධම්මා යෙ තෙ භුඤ්ජෙය්යුං භොජනං.
2158. දස ඛලු මහාරාජ යා තා බ්රාහ්මණජාතියො, තෙසං විභඞ්ගං විචයං විත්ථාරෙන සුණොහි මෙ.
2159. පසිබ්බකෙ ගහෙත්වාන පුණ්ණෙ මූලස්ස සංවුතෙ, ඔසධියො{3} ගන්ථෙන්ති නහායන්ති ජපන්ති ච.
2160. තිකිච්ඡකසමා රාජ තෙපි වුච්චන්ති බ්රාහ්මණා, අක්ඛාතා තෙ මහාරාජ තාදිසෙ නිපතාමසෙ.
2161. අපෙතා තෙ බ්රහ්මඤ්ඤා{4} (ඉතිරාජාකොරව්යො,) න තෙ වුච්චන්ති බ්රාහ්මණා අඤ්ඤෙපි විධුර පරියෙස සීලවන්තෙ බහුස්සුතෙ.
2162. විරතෙ මෙථුනා ධම්මා යෙ මෙ භුඤ්ජෙය්යුං භොජනං, දක්ඛිණං සම්ම දස්සාම යත්ථ දින්නං මහප්ඵලං
2163. කිංකිණිකායො{5} ගහෙත්වාන ඝොසෙන්ති පුරතොපි තෙ, පෙසනානිපි ගච්ඡන්ති රථචරියාසු සික්ඛරෙ.
2164. පරිචාරකසමා රාජ තෙපි වුච්චන්ති බ්රාහ්මණා, අක්ඛාතා තෙ මහාරාජ තාදිසෙ නිපතාමසෙ.
2165. අපෙතා තෙ බ්රහ්මඤ්ඤා (ඉතිරාජා කොරව්යො,) න තෙ වුච්චන්ති බ්රාහ්මණා අඤ්ඤෙ විධුර පරියෙස සීලවන්තෙ බහුස්සුතෙ.
2166. විරතෙ මෙථුනා ධම්මා යෙ මෙ භුඤ්ජෙය්යුං භොජනං, දක්ඛිණං සම්ම දස්සාම යත්ථ දින්නං මහප්ඵලං
2167. කමණ්ඩලුං ගහෙත්වාන වංකදණ්ඩඤ්ච බ්රාහ්මණා, පච්චුපෙස්සන්ති රාජානො ගාමෙසු නිගමෙසු ච. නාදින්නෙ වුට්ඨහිස්සාම ගමෙම්භි ච වනම්හි ච.
2168. නිග්ගාහකසමා රාජ තෙපි වුච්චන්ති බ්රාහ්මණා, අක්ඛාතා තෙ මහාරාජ තාදිසෙ නිපතාමසෙ
2169. අපෙතා තෙ බුහ්මඤ්ඤා (ඉති රාජාකොරව්යො,) න තෙ වුච්චන්ති බ්රාහ්මණා අඤ්ඤෙ විධුර පරියෙස සීලවන්තෙ බහුස්සුතෙ.
2170. විරතෙ මෙථුනා ධම්මා යෙ මෙ භුඤ්ජෙය්යුං භොජනං, දක්ඛිණං සම්ම දස්සාම යත්ථ දින්නං මහප්ඵලං
2171. පරූළ්හකච්ඡ නඛලොමා{1} සඞ්කදන්තා රජස්සිරා. ඔකිණ්ණා රජරෙණූහි යාචකා විචරන්ති තෙ.
2172. ඛාණුඝාතසමා රාජ තෙපි වුච්චන්ති බ්රාහ්මණා, අක්ඛාතා තෙ මහාරාජ තාදිසෙ නිපතාමසෙ.
2173. අපෙතා තෙ බ්රහ්මඤ්ඤා (ඉතිරාජාකොරව්යො,) න තෙ වුච්චන්ති බ්රාහ්මණා අඤ්ඤෙපි විධුර පරියෙස සීලවන්තෙ බහුස්සුතෙ.
2174. විරතෙ මෙථුනා ධම්මා යෙ මෙ භුඤ්ජෙය්යුං භොජනං, දක්ඛිණං සම්ම දස්සාම යත්ථ දින්නං මහප්ඵලං
2175. හරීටකං{2} ආමකං අම්බං{3} ජම්බුවිහීටකං, ලබුජං දන්තපොණානි බෙලුවා ඛදරානි ච.
2176. රාජායතනං උච්ඡුපුටං ධූමනෙත්තං මධුඅඤ්ජනං. උච්චාවචානි පණියානි විපණෙන්ති{4} ජනාධිප.