1986. පසූ මනුස්සා මිගවිරියසෙට්ඨ{6} භයද්දිතා{7} සෙට්ඨමුපබ්බජන්ති{8}, පුත්තා මමට්ටා ගතිමාගතොස්මි ත්වං නොසි රාජා භව මෙ සුඛාය.
1987. කරොමි තෙ සෙනක එතමත්ථං ආයාම{9} තෙ තං දිසතං වධාය, කථං හි විඤ්ඤූ පහු{10} සම්පජානො න වායමෙ අත්තජනස්ස ගුත්තියා.
1988. මිත්තඤ්ච{11} කයිරාථ සුභද්දයඤ්ච{12} අයිරඤ්ච කයිරාථ සුඛෙහි අයිරො{13}, නිවත්ථකොජො ව සරෙභිහන්ත්වා මොදාම පුත්තෙහි සමඞ්ගිභූතා.
1989. සකමිත්තස්ස{14} කම්මෙන සහායස්සාපලායිනො, කූජන්තමුපකූජන්ති{15} ලොමසා හදයඞ්ගමං.
1990. මිත්තං සහායං අධිගම්ම පණ්ඩිතො සො භුඤ්ජති පුත්තපසුං{16} ධනං වා, අහඤ්ච පුත්තා ච පතී ච මය්හං මිත්තානුකම්පාය සමඞ්ගිභූතා.
1991. රාජාවතා සූරවතා ච අත්ථො සම්පන්න සක්ඛිස්ස{17} භවන්ති හෙතෙ, සො මිත්තවා යසවා උග්ගතත්තො අස්මිඤ්ච{18} ලොකෙ මොදති කාමකාමී.
1992. කරණීයානි{1} මිත්තානි දළිද්දෙනාපි සෙනක, පස්ස මිත්තානුකම්පාය සමග්ගම්භා සඤාතකෙ.
1993. සූරෙන බලවන්තෙන යො මෙත්තිං{2} කුරුතෙ දිජො, එවං සො සුඛිතො හොති යථාහං ත්වඤ්ච සෙනකාති.
3. මහාඋක්කුසජාතකං.
1994. ඛරාජිනා ජටිලා සඞ්කදන්තා දුම්මුඛරූපා{3} යෙ මෙ ජපන්ති{4}, කච්චින්නු{5} තෙ මානුසකෙ පයොගෙ ඉදං විදූ පරිමුත්තා අපායා.
1995. පාපානි කම්මානි කරොථ{6} රාජ බහුස්සුතො චෙ න චරෙය්ය ධම්මං, සහසසවෙදාපි න තං පටිච්ච දුක්ඛා පමුච්චෙ චරණං අපත්වා.
1996. සහස්සවෙදොපි න තං පටිච්ච දුක්ඛා පමුච්චෙ චරණං අපත්වා මඤ්ඤාමි වෙදා අඵලා භවන්ති සසංයමං චරණඤ්ඤෙව සච්චං.
1997. නහෙව වෙදා අඵලා භවන්ති සසංයමං චරණඤ්ඤෙව සච්චං, කිත්තිං{7} හි පප්පොති අධිච්ච වෙදෙ සන්තිං පුණොති{8} චරණෙන දන්තො.
1998. භච්චා මාතා පිතා බන්ධූ යෙන ජාතො{9} සයෙව{10} සො, උද්දාලකො අහං භොතො{11} සොත්ථියා{12}කුලවංසකො.
1999. කථං භො බ්රාහ්මණො හොති කථං භවති කෙවලී, කථඤ්ච පරිනිබ්බානං ධම්මට්ඨො කින්ති වුච්චති.
2000. නිරං කත්වා අග්ගිමාදාය බ්රාහ්මණො ආපොසිජං{13} යජමුස්සෙති යූපං, එවං කරො බ්රාහ්මණො හොති ඛෙමී ධම්මෙ ඨිතං තෙන අමාපයිංසු.
2001. න සුද්ධි සෙචනෙනත්ථි නපි{1} කෙවලී බ්රාහ්මණො, න ඛන්ති නපි සොරච්චං{2} නපි සො පරිනිබ්බුතො.
2002. කථං සො බ්රාහ්මණො හොති කථං භවති කෙවලී, කථඤ්ච පරිනිබ්බානං ධම්මට්ඨො කින්ති වුච්චති.
2003. අක්ඛෙත්තබන්ධූ{3} අමමො නිරාසො නිල්ලොභපාපො භවලොභඛීණො, එවං කරො බ්රාහ්මණො හොති ඛෙමී ධම්මෙ ඨිතං තෙන අමාපයිංසු.
2004. ඛත්තියා බ්රාහ්මණා වෙස්සා සද්දා චණ්ඩාල පුක්කුසා, සබ්බෙව සොරතා දන්තා සබ්බෙව පරිනිබ්බුතා. සබ්බෙසං සීතිභූතානං අත්ථි සෙය්යොව පාපියො.
2005. ඛත්තියා බ්රාහ්මණා වෙස්සා සුද්දා චණ්ඩාල පුක්කුසා, සබ්බෙව සොරතා දන්තා සබ්බෙව පරිනිබ්බුතා. සබ්බෙසං සීතිභූතානං නත්ථි සෙය්යොව පාපියො.
2006. ඛත්තියා බ්රාහ්මණා වෙස්සා සද්දා චණ්ඩාල පුක්කුසා, සබ්බෙව සොරතා දන්තා සබ්බෙව පරිනිබ්බුතා.
2007. සබ්බෙසං සීතිභූතානං නත්ථි සෙය්යොව පාපියො. පනට්ඨං චරසි බ්රහ්මඤ්ඤං සොත්ථියා කුලවංසතං.
2008. නානාරත්තෙහි වත්ථෙහි විමානං භවති ඡාදිතං, න තෙසං ඡායාවත්ථානං සො රාගො අපනුජ්ජථ.
2009. එවමෙව මනුස්සෙසු යදා{4} සුජ්ඣන්ති මානවා, න තෙසං ජාතිං පුච්ඡන්ති ධම්මමඤ්ඤාය සුබ්බතා’ති.
4. උද්දාලකජාතකං.
2010. අස්සං ගවං රජතං ජාතරූපං භරියඤ්ච සො ඉධ ලභතං මනාපං, පුත්තෙහි දාරෙහි සමඞ්ගි හොතු භිසානි තෙ බ්රාහ්මණ යො අහාසි.
2011. මාලඤ්ච සො කාසිකචන්දනඤ්ච ධාරෙතු පුත්තස්ස බහූ භවන්තු, කාමෙසු තිබ්බං කුරුතං අපෙක්ඛං භිසානි තෙ බ්රාහ්මණ යො අහාසි.
2012. පහූතධඤ්ඤො කසිමා යසස්සී පුත්තෙ ගිහී ධනිමා සබ්බකාමෙ, වයං අපස්සං ඝරමාවසාතු භිසානි තෙ බ්රාහ්මණ යො අහාසි.
2013. සො ඛත්තියො හොතු{1} පසය්හකාරී රාජාභිරාජා බලවා යසස්සී, සචාතුරන්තං මහිමාවසාතු භිසානි තෙ බ්රාහ්මණ යො අහාසි.
2014. සො බ්රාහ්මණො හොතු අවීතරාගො මුහුත්තනක්ඛත්තපථෙසු යුත්තො, පූජෙතු නං රට්ඨපතී යසස්සී භිසානි තෙ බ්රාහ්මණ යො අහාසා.
2015. අජ්ඣායකං සබ්බසමත්තවෙදං{2} තපස්සිනං මඤ්ඤතු සබ්බලොකො, පූජෙන්තු{3} තං ජානපදා සමෙච්ච භිසානි තෙ බ්රාහ්මණ යො අහාසි.
2016. චතුස්සදං ගාමවරං සමිද්ධං දින්නං හි භුඤ්ජතු වාසවෙන, අවීතරාගො මරණං උපෙතු භිසානි තෙ බ්රාහ්මණ යො අහාසි.
2017. සො ගාමණී හොතු සහායමජ්ඣෙ නච්චෙහි ගීතෙහි පමොදමානො, මා රාජතො ව්යසනමලත්ථකිඤ්චි භිසානි තෙ බ්රාහ්මණ යො අහාසි.
2018. යං එකරාජා පඨවිං විජෙත්වා{1} ඉත්ථි සහස්සස්ස{2} ඨපෙතු අග්ගං සීමන්තිනීනං පවරා භවාතු{3} භිසානි තෙ බ්රාහ්මණ යා අහාසි.
2019. ඉසීනං{4} හි සා සබ්බසමාගතානං භුඤ්ජෙය්ය සාදුං අවිකම්පමානා, චරාතු ලාභෙන විකත්ථමානා භිසානි තෙ බ්රාහ්මණ යා අහාසි.
2020. ආවාසිකො හොතු මහාවිහාරෙ නවකම්මිකො හොතු කජඞ්ගලායං, ආලොකසන්ධිං{5} දිවසා කරොතු භිසානි තෙ බ්රාහ්මණ යො අහාසි.
2021. සො බජ්ඣතං{6} පාසසතෙහි ඡම්හි{*} රම්මා වනා නීයතු රාජධානිං, තුත්තෙහි සො හඤ්ඤතු පාචනෙහි භිසානි තෙ බ්රාහ්මණ යො අහාසි.
2022. අලක්කමාලී තිපුකණ්ණවිද්ධො{7} ලට්ඨිහතො සප්පමුඛං උපෙතු, සක්කවචබද්ධො{8} විසිඛං{9} චරාතු භිසානි තෙ බ්රාහ්මණ යො අහාසි.
2023. යො චෙ{10} අනට්ඨං නට්ඨන්ති චාහ{11} කාමෙච සො ලභතං භුඤ්ජතඤ්ච{12}, අගාරමජ්ඣෙ මරණං උපෙතු යො චා භොන්තො සඞ්කති කඤ්චිදෙව.
2024. යදෙසමානා විචරන්ති ලොකෙ ඉට්ඨඤ්ච කන්තඤ්ච බහුන්නමෙතං,{13} පියං මනුඤ්ඤං ඉධ ජිවලොකෙ කස්මා ඉසයො නප්පසංසන්ති කාමෙ
2025. කාමෙසු චෙ හඤ්ඤරෙ බජ්ඣරෙ ච කාමෙසු දුක්ඛඤ්ච භයඤ්ච ජාතං, කාමෙසු භූතාධිපතී පමත්තා පාපානි කම්මානි කරොන්ති මොහා.
2026. තෙ පාපධම්මා පසවෙත්වා{1} පාපං කායස්ස භෙදා නිරයං වජන්ති, ආදීනවං කාමගුණෙසු දිස්වා තස්මා ඉසයො නප්පසංසන්ති කාමෙ.
2027. වීමංසමානො ඉසිනො භිසානි තීරෙ ගහෙත්වාන ථලෙ නිධෙසිං, සුද්ධා අපාපා ඉසයො වසන්ති එතානි තෙ බ්රාහ්මචාරී භිසානි.
2028. න තෙ නටා නො පන කීළනෙය්යා න බන්ධවා නො පන තෙ සහායා, කිස්මිං පරත්ථම්භ{2} සහස්සනෙත්ත ඉසීහි ත්වං කීළසි දෙවරාජ.
2029. ආචරියො මෙසි පිතා ච මය්හං එසා පතිට්ඨා ඛලිතස්ස බ්රහ්මෙ, එකාපරාධං ඛම භූරිපඤ්ඤ න පණ්ඩිතා කොධබලා භවන්තී
2030. සුවොසිතං ඉසිනං{3} එකරත්තං යං වාසවං භූතපතිං අද්දසාම, සබ්බෙව භොන්තො සුමනා භවන්තු යං බ්රාහ්මණො පච්චපාදී භිසානි.
2031. අහඤ්ච සාරිපුත්තො ච මොග්ගල්ලානො ච කස්සපො, අනුරුද්ධො පුණ්ණො ආනන්දො තදාසුං සත්ත භාතරො.
2032. භගිනී උප්පලවණ්ණා දාසී ඛුජ්ජුත්තරා තදා, චිත්තො ගහපති දාසො යක්ඛො සාතාගිරො තදා.
2033. පාරිලෙය්යො{4} තදා නාගො මධුදො සෙට්ඨවානරො, කාළුදායී තදා සක්කො එවං ධාරෙථ ජාතකන්ති.
5. භිසජාතකං.
2034. මහෙසි රුචිනො භරියා ආනීතා පඨමං අහං. දසවසස්සහසසානි යං මං සුරුචිමානයි.
2035. සාහං බ්රාහ්මණ රාජානං වෙදෙහං මිථිලග්ගහං නාභිජානාමි කායෙන වාචාය උදචෙතසා සුරුචිං අතිමඤ්ඤිත්ථො ආවිවා{1} යදිවා රහො.
2036. එතෙන සච්චවජ්ජෙන පුත්තො උප්පජ්ජතං ඉසෙ, මුසා මෙ භණමානාය මුද්ධා ඵලතු සත්තධා.
2037. භත්තුමනාපස්ස පිතා මාතා චාපි සුවාමිනො{2}, තෙ මං බ්රහ්මෙ විනෙතාරො යාව අට්ඨංසු ජීවිතෙ.
2038. සාහං අභිංසාරතිනී කාමසො ධම්මචාරිණි, සක්කච්චං තෙ උපට්ඨාසිං රත්තින්දිවමතන්දිතා.
2039. එතෙන සච්චවජ්ජෙන පුත්තො උප්පජ්ජතං ඉසෙ, මුසා මෙ භණමානාය මුද්ධා ඵලතු සත්තධා.
2040. සොළසිත්ථිසහස්සානි සහභරියානි බ්රාහ්මණ, තාසු ඉස්සා වා කොධො වා නාහු මය්හං කුදාචනං.
2041. හිතෙන තාසං නන්දාමි නච මෙ කාචි අප්පියා අත්තානං වානුකම්පාමි සදා සබ්බා සපත්තියො.
2042. එතෙන සච්චවජ්ජෙන පුත්තො උප්පජ්ජතං ඉසෙ, මුසා මෙ භණමානාය මුද්ධා ඵලතු සත්තධා.
2043. දාසෙ කම්මකරෙ පෙස්සෙ{4} යෙ චඤ්ඤෙ අනුජීවිනො, පොසෙමි සහධම්මෙන සදා පමුදිතින්ද්රියා
2044. එතෙන සච්චවජ්ජෙන පුත්තො උප්පජ්ජතං ඉසෙ, මුසා මෙ භණමානාය මුද්ධා ඵලතු සත්තධා.
2045. සමණෙ බ්රාහ්මණෙ චාපි අඤ්ඤෙ වාපි වණිබ්බකෙ, තප්පෙමි අන්නපානෙන සදා පයතපාණිනී.
2046. එතෙන සච්චවජ්ජෙන පුත්තො උප්පජ්ජතං ඉසෙ, මුසා මෙ භණමානාය මුද්ධා ඵලතු සත්තධා.
2047. චාතුද්දසී පණ්ණරසි යාව පක්ඛස්ස අට්ඨමී, පාටිහාරියපක්ඛඤ්ච අට්ඨඞ්ගසුසමාහිතං. උපොසථං උපවසාමි සදා සීලෙසු සංවුතා.
2048. එතෙන සච්චවජ්ජෙන පුත්තො උප්පජ්ජතං ඉසෙ, මුසා මෙ භණමානාය මුද්ධා ඵලතු සත්තධා.
2049. සබ්බෙව තෙ ධම්මගුණා රාජපුත්ති යසස්සිනි, සංවිජ්ජන්ති තයි භද්දෙ යෙ ත්වං කිත්තෙසි අත්තනි.
2050. ඛත්තියො ජාතිසම්පන්නො අභිජාතො සසස්සිමා, ධම්මරාජා විදෙහානං පුත්තො උප්පජ්ජතෙ{1} තවං{2},
2051. රුම්මි{3} රජොජල්ලධරො අඝෙ වෙහාසයං ඨිතො, මනුඤ්ඤං භාසසි{4} වාචං යං මය්හං හදයඞ්ගමං.
2052. දෙවතානුසි සග්ගම්හා ඉසිවාසි{5} මහිද්ධිකො, කොවාසි ත්වං අනුප්පත්තො අත්තානං මෙ පවෙදය.
2053. යං දෙවසඞ්ඝා වන්දන්ති සුධම්මායං{6} සමාගතා, සොහං සක්කො සහස්සක්ඛො ආගතොස්මි තවන්තිකෙ.
2054. ඉත්ථියො ජීවලොකස්මිං යා හොන්ති සමචාරිනී, මෙධාවිනී සීලවතී සස්සුදෙවා පතිබ්බතා.
2055. තාදිසාය සුමෙධාය සුවිකම්මාය නාරියා, දෙවා දස්සනමායන්ති මානුසියා අමානුසා.
2056. ත්වඤ්ච භද්දෙ සුචිණ්ණෙන පුබ්බෙ සුචරිතෙන ච, ඉධ රාජකුලෙ ජාතා සබ්බකාමසමිද්ධිනී.
2057. අයඤ්ච තෙ රාජපුත්ති උභයත්ථ කටග්ගහො, දෙවලොකූපපත්තී ච කිත්ති ච ඉධ ජීවිතෙ.
2058. චිරං සුමෙධෙ සුඛිනී ධම්මං පාලයමත්තනි{7}, එසාහං තිදිවං යාමි පියම්මෙ ත ව දස්සනන්ති.
6. සුරුචිජාතකං.
2059. අප්පොස්සුක්කොදානි තුවං කපොත විහඞ්ගම න තව භොජනත්ථො, ඛුදං පිපාසං අධිවාසයන්තො කස්මා භවං පොසථිකො කපොතො{1}.
2060. අහං පුරෙ ගිද්ධිගතො කපොතියා අස්මිං පදෙසස්මිං උභො රමාම, අථග්ගහී සාකුණිකො කපොතිං අකාමකො තාය විනා අහොසිං.
2061. නානාභවා{2} විප්පයොගෙන තස්සා මනොමයං වෙදනං වෙදියාමි{3}, තස්මා අහං පොසථං{4} පාලයාමි රාගො මමං මා පුනරාගමාසි.
2062. අනුජ්ජුගාමි උරග{5} ද්විජිව්හ දාඨාවුධො ඝොරවිසොසි පස්ස, ඛුදං පිපාසං අධිවාසයන්තො කස්මා භවං පොසථිකො නු දීඝො
2063. උසභො අහූ බලවා ගාමිකස්ස චලක්කකූ වණ්ණබලූපපන්නො මං අක්කමි තං කුපිතො අඩංසිං{6} දුක්ඛාභිතුණ්ණො මරණං උපාගමි{7}.
2064. තතො ජනා නික්ඛමිත්වාන ගාමා කන්දිත්වා රොදිත්ව අපක්කමිංසු, තස්මා අහං පොසථං පාලයාමි කොධො මමං මා පුනරාගමාසි.
2065. මතාන{8} මංසානි බහූ සුසානෙ මනුඤ්ඤරූපං තව භොජනෙතං, ඛුදං පිපාසං අධිවාසයන්තො කස්මා භවං පොසථිකො සිගාලො{9}.
2066. පවිස්ස{1} කුච්ඡිං මහතො ගජස්ස කුණපෙ රතො හත්ථමංසෙ පගිද්ධො, උණ්හො ච වාතො තිඛිණා ච රස්මියො තෙ සොසයුං තස්ස කරීසමග්ගං.
2067. කිසො ච පණ්ඩූ ච අහං භදන්තෙ{2} න මෙ අහූ නික්ඛමනාය මග්ගො, මහා ච මෙඝො සහසා පවස්සි සො තෙමයී තස්ස කරීසමග්ගං.
2068. තතො අහං නිකඛමිස්සං භදන්තෙ චන්දො යථා රාහුමුඛා පමුත්තො, තස්මා අහං පොසථං පාලයාමි ලොභො මමං මා පුනරාගමාසි.
2069. වම්මිකථූපස්මිං කිපිල්ලිකානි නිප්පොථයන්තො තුවං පුරෙ චරාසි, ඛුදං පිපාසං අධිවාසයන්තො කස්මා භවං පොසථිකො නු අච්ඡො.
2070. සකං නිකෙතං අතිහීලයානො{4} අත්රිච්ඡතාය මලතං{5} අගඤ්ඡිං, තතො ජනා නික්ඛමිත්වාන ගාමා කොදණ්ඩකෙන පරිපොථයිංසු මං
2071. සො භින්නසීසො රුහිරමක්ඛිතඞ්ගො පච්චාගමාසිං සකං{6} නිකෙතං, තස්මා අහං පොසථං පාලයාමි අත්රිච්ඡතා මා පුනරාගමාසි.
2072. යං නො අපුච්ඡිත්ථ තුවං භදන්තෙ සබ්බෙව ව්යාකරිම්හ යථාපජානං,{7} මයම්පි පුච්ඡාම තවං භදන්තෙ{8} කස්මා භවං පොසථිකොනු බ්රහ්මෙ.
2073. අනූපලිත්තො මම අස්සමම්හි පච්චෙකබුද්ධො මුහුත්තං නිසීදි, සො මං අවෙදි ගතිමාගතිඤ්ච නාමඤ්ච ගොත්තං චරණඤ්ච සබ්බං.
2074. එවම්පහං නග්ගහෙ තස්ස පාදෙ න චාපි නං මානගතෙන පුච්ඡිං, තස්මා අහං පොසථං පාලයාමි මනො මමං මා පුනරාගමාසීති.
7. පඤ්චුපොසථජාතකං.
2075. සචෙ හි ත්යාහං ධනහෙතු ගහිතො මා මං වධි ජීවගාහං ගහෙත්වා, රඤ්ඤො ච මං සම්ම උපෙන්ති නෙහි මඤ්ඤෙ ධනං ලච්ඡසි නප්පරූපං.
2076. න මෙ අයං තුම්හෙ{1} වධාය අජ්ජ සමාහිතො චාපවරො ඛුරප්පො, පාසඤ්ච ත්යාහං අධිපාතයිස්සං. යථා සුඛං ගච්ඡතු මොරරාජා.
2077. යං සත්ත වස්සානි මමානුබන්ධි රත්තින්දිවං ඛුප්පිපාසං සහන්තො, අථ කිස්ස මං පාසවසූපනීතං පමුත්තවෙ ඉච්ඡසි බන්ධනස්මා.
2078. පාණාතිපාතා විරතොනුසජ්ජ අභයං නු තෙ සබ්බබභූතෙසු දින්නං, යං මං තුවං පාසවසූපනීතං, පමුත්තවෙ ඉච්ඡසි බන්ධනස්මා.
2079. පාණාතිපාතා විරතස්ස බ්රූහි අභයඤ්ච යො සබ්බභූතෙසු දෙති, පුච්ඡාමි තං මොරරාජෙතමත්ථං ඉතො චුතො කිං ලභතෙ සුඛං සො.
2080. පාණාතිපාතා විරතස්ස බ්රූමි අභයඤ්ච යො සබ්බභූතෙසු දෙති, දිට්ඨෙව ධම්මෙ ලභතෙ පසංසං සග්ගඤ්ච සො යාති සරීරභෙදා.