1801. ඉති ඵන්දනරුක්ඛොපි තාවදෙ අජ්ඣභාසථ, මය්හම්පි වචනං අත්ථි භාරද්වාජ සුණොහි මෙ.
1802. ඉස්සස්ස{5} උපඛන්ධම්භා{6} ඔක්කච්ච චතුරඞ්ගුලං, තෙන නෙමිං පරිහරෙසි{7} එවං දළ්හතරං සියා
1803. ඉති ඵන්දනරුක්ඛොපි වෙරං අප්පෙසි{8} තාවදෙ, ජාතානඤ්ච අජාතානං ඉස්සානං දුක්ඛමාවහි{9}.
1804. ඉච්චෙව{10} ඵන්දනො ඉස්සං ඉස්සො{11} ච පන ඵන්දනං අඤ්ඤමඤ්ඤං විවාදෙන අඤ්ඤමඤ්ඤමඝාතයුං.
1805. එවමෙව මනුස්සෙසු විවාදො යත්ථ ජායති, මයූරනච්චං නච්චන්ති යථා තෙ ඉස්සඵන්දනා{12}.
1806. තං චො වදාමි භද්දං{1} වො යාවන්තෙත්ථ සමාගතා, සම්මොදථ මාවිවදිත්ථ මා හොථ ඉස්සඵන්දනා.
1807. සාමග්ගිමෙව සික්ඛෙථ බුද්ධෙහෙතං පසංසිතං, සාමග්ගිරතො{2} ධම්මට්ඨො යොගක්ඛෙමා න ධංසතීති.
2. ඵන්දනජාතකං.
1808. ඉධෙව හංස නිපත සිපියං මෙ තව දස්සනං, ඉස්සරොසි අනුප්පත්තො යං ඉධත්ථි පවෙදය.
1809. සවණෙන චෙකස්ස{3} පියා භවන්ති දිස්වා පනෙකස්ස වියෙති{4} ඡන්දො, දිස්වා ච සුත්වා ච පියා භවන්ති. කච්චින්නු{5} මෙ පිය්යසි දස්සනෙන.
1810. සමණෙන පියො මෙසි භිය්යො චාගම්ම දස්සනං, එවං පියදස්සනො සමානො වස හංස මම සන්තිකෙ.
1811. වසෙය්යාම තවාගාරෙ නිච්චං සක්කතපූජිතා, මත්තො ච එකදා වජ්ජා{6} හංසරාජං පචන්තු මෙ.
1812. ධිරත්ථු තං අන්නපානං යම්මෙ පියතරං තයා, න චාපි මජ්ජං පායාමි යාව මෙ වච්ඡසී ඝරෙ.
1813. සුවිජානං සිගාලානං සකුන්තානඤ්ච වස්සිතං, මනුස්සවස්සිතං රාජ දුබ්බිජානතරං තතො.
1814. අපි චෙ මඤ්ඤති පොසො ඤාති මිත්තො සඛාති වා, යො{7} පුබ්බෙ සුමනො හුත්වා පච්ඡා සම්පජ්ජතෙ දිසො.
1815. යස්මිං මනො නිවිසති අවිදූරෙ සහාපි සො{8}, සන්තිකෙපි හි සො දූරෙ යස්මා විවසතෙ මනො.
1816. අන්තොපි සො{1} හොති පසන්න චිත්තො පාරං සමුද්දස්ස පසන්නචිත්තො, අන්තොපි යො හොති පදුට්ඨචිත්තො පාරං සමුද්දස්ස පදුට්ඨචිත්තො.
1817. සංවසන්තාපි විවසන්ති යෙ දිසා{2} තෙ රථෙසභ, ආරා සන්තො සංවසන්ති{3} මනසා රට්ඨවඩ්ඪන.
1818. අතිචිරං නිවාසෙන පියො භවති අප්පියො, ආමන්ත ඛො තං ගච්ඡාම{4} පුරා තෙ හොම{5} අප්පියා{6}
1819. එවං චෙ යාචමානානං අඤ්ජලිං නාවඛුජ්ඣසි, පරිවාරකානං සත්තානං වචනං න කරොසි නො, එවං තං අභියාචාම පුන කයිරාසි පරියායං.
1820. එවං චෙ නො විහරතං අන්තරායො න හෙස්සති, තුය්හං චාපි මහාරාජ මය්හං වා රට්ඨවඩ්ඪන{7}, අප්පෙවනාම පස්සෙම{8} අහොරත්තානමච්චයෙති.
3. ජවනහංසජාතකං.
1821. න තෙ කට්ඨානි භින්නානි න තෙ උදකමාභතං, අග්ගිපි තෙ න හාසිතො{9} කින්නු මන්දෙව ඣායසි.
1822. න උස්සහෙ වනෙ වත්ථුං කස්සපාමන්තයාමි තං. දුක්ඛො වාසො අරඤ්ඤස්මිං රට්ඨං ඉච්ඡාමි ගන්තවෙ.
1823. යථා අහං ඉතො ගන්ත්වා යස්මිං ජනපදෙ වසං, ආචාරං බ්රහ්මෙ{10} සික්ඛෙය්යං තං ධම්මං අනුසාස මං.
1824. සචෙ අරඤ්ඤං හිත්වාන මනමූලඵලානි ච, රට්ඨෙ රොචයසෙ වාසං තං ධම්මං නිසාමෙහි මෙ.
1825. විසං මා පතිසෙවිත්ථො පපාතං පරිවජ්ජය, පඞ්කෙ{1} ච මා විසීදිත්ථො{2} යත්තො ආසීවිසෙ{3} චරෙ
1826. කින්නු විසං පපාතො වා පඞ්කො වා බ්රහ්මචාරිනං, කං ත්වං ආසීවිසං බ්රූහි තම්මෙ අක්ඛාහි පුච්ඡිතො.
1827. ආසවො තාත ලොකස්මිං සුරා නාම පවුච්චති, මනුඤාඤා{4} සුරභි වග්ගු මධුඛුද්දරසූපමා{5} විසං තදාහු අරියා බ්රහ්මචරියස්ස නාරද.
1828. ඉත්ථියො තාත ලොකස්මිං පමත්තං පමථෙනති තා, හරන්ති යුවිනො{6} චිත්තං තූලභට්ටංව{7} මාලුතො පපාතො එසො අක්ඛාතො බ්රහ්මචරියස්ස නාරද.
1829. ලාභො සිලොකො සක්කාරො පූජා පරකුලෙසු ච, පඞ්කො එසො{8} අක්ඛාතො බ්රහ්මචරියස්ස නාරද.
1830. ස සත්ථා{9} තාත රාජානො ආවසන්ති මහිං ඉමං, තෙ තාසිසෙ මනුස්සින්දෙ මහන්තෙ තාත නාරද.
1831. ඉස්සරානං අධිපතීනං න තෙසං පාදතො චරෙ, ආසීවිසො සො අක්ඛාතො බ්රහ්මචරියස්ස නාරද.
1832. භත්තත්ථො{10} භත්තකාලෙ යං යං ගෙහං උපසඞ්කමෙ, යදෙත්ථ කුසලං ජඤ්ඤා තත්ථ ඝාසෙසනං චරෙ.
1833. පවිසිත්වා පරකුලං පානත්ථං{11} භොජනාය වා, මිතං ඛාදෙ මිතං භුඤ්ජෙ න ච රූපෙ මනං කරෙ.
1834. ගොට්ඨං{12} මජ්ජං කිරාසඤ්ච{13} සභානි කිරණානි ච, ආරකා පරිවජ්ජෙති යානීව{14} විසමං පථන්ති.
4. චුල්ලනාරදජාතකං.
1835. දූතෙ තෙ බ්රහ්මෙ{15} පාහෙසිං ගඞ්ගාතීරස්මිං ඣායතො, තෙසං පුට්ඨො න ව්යාකාසි{16} දුක්ඛං ගුය්හං මතන්නු තෙ.
1836. සචෙ තෙ දුක්ඛං උප්පජ්ජෙ කාසීනං රට්ඨවඩ්ඪන, මා ඛො නො{1} තස්ස අක්ඛාහි යො තං දුක්ඛා න මොචයෙ.
1837. යො තස්ස දුක්ඛජාතස්ස එකන්තං අපි භාසතො, විප්පමොචෙය්ය ධම්මෙන කාමං තස්ස පවෙදයෙ.
1838. සුවිජානං සිගාලානං සකුන්තානඤ්ච{2} වස්සිතං මනුස්සවස්සිතං රාජ දුබ්බිජානතරං තතො.
1839. අපි චෙ මඤ්ඤති පොසො ඤාති මිත්තො සඛාති වා, යො පුබ්බෙ සුමනො හුත්වා පච්ඡා සම්පජ්ජතෙ දිසො.
1840. යො අත්තනො දුක්ඛමනානුපුට්ඨො පවෙදයෙ ජන්තු අකාලරූපෙ, ආනන්දිනො{3} තස්ස භවන්තමිත්තා{4} හිතෙසිනො තස්ස දුඛී{5} භවන්ති.
1841. කාලඤ්ච ඤත්වාන තථාවිධස්ස මෙධාවිනං එකමනං විදිත්වා, අක්ඛෙය්ය තිප්පානි පරස්ස ධීරො සණ්හං ගිරං අත්ථවතිං පමුඤ්චෙ.
1842. සචෙ ච ජඤ්ඤා අවිසය්හමත්තනො නායං නීති{6} මය්හසුඛාගමාය, එකොපි තිප්පානි{7} සහෙය්ය ධීරො, සච්චං හිරොත්තප්පමපෙක්ඛමානො.
1843. අහං රට්ඨානි විචරන්තො නිගමෙ රාජධානියො{8}, භික්ඛමානො මහාරාජ ආචරියස්ස{9} ධනත්ථිකො.
1844. ගහපතී රාජපුරිසෙ මහාසාලෙ ච බ්රාහ්මණෙ, අලත්ථං{10} සත්ත නික්ඛානි සුවණ්ණස්ස ජනාධිප තෙ මෙ නට්ඨා මහාරාජ තස්මා සොචාමහං භුසං.
1845. පුරිසා තෙ මහාරාජ මනසා අනුවිචින්තිතා නාලං දුක්ඛා පමොචෙතුං තස්මා තෙසං න ව්යාහරිං
1846. ත්වං ච ඛො මෙ මහාරාජ මනසා අනුවිචින්තිතො, අලං දුක්ඛා පමොචෙතුං තස්මා තුය්හං පවෙදයිං.
1847. තස්සාදාසි පසන්නත්තො{11} කාසීනං රට්ඨවඩ්ඪනො, ජාතරූපමයෙ නික්ඛෙ සුවණ්ණස්ස චතුද්දසාති.
5. දූතජාතකං.
1848. රාජා කාලිඞ්ගො{1} චක්කවත්තී ධම්මෙන පඨවිමනුසාසං, අගමා{2} බොධිසමීපං නාගෙන මහානුභාවෙන.
1849. කාලිඞ්ගො භාරද්වාජො රාජානං කාලිඞ්ගං සමණකොලඤ්ඤං, චක්කං වත්තයතො පරිග්ගහෙත්වා පඤ්ජලී ඉදමවොච{3}.
1850. පච්චොරොහ මහාරාජ භූමිභාගො යථා සමනුගීතො{4}, ඉධ අනධිවරා බුද්ධා අභිසම්බුද්ධා විරොචන්ති.
1851. පදක්ඛිණතො ආවට්ටා{5} තිණලතා අස්මිං භූමිභාගස්මිං, පුථුවියා අයං{6} මණ්ඩො ඉති නො සුතං මහාරාජ{7}.
1852. සාගරපරියන්තාය මෙදිනියා සබ්බභූතධරණියා, පුථුවියා අයං මණ්ඩො ඔරොහිත්වා නමො කරොහි.
1853. යෙ තෙ භවන්ති නාගා අභිජාතා{8} මාතිතො ච පිතිතො ච, එත්තාවතා පදෙසං තෙ නාගා නෙවමුපයන්ති
1854. අභිජාතො තෙ නාගො කාමං පෙසෙහි කුඤ්ජරං දන්තිං, එත්තාවතා පදෙසො සක්කා නාගෙන මුපගන්තුං.{9}
1855. තං සුත්වා රාජා කාලිඞ්ගො වෙය්යඤ්ජනිකවචො{1} නිසාමෙත්වා සංපෙසෙසි නාගං ඤස්සාම{2}මයං යථා ඉදං වචනං.
1856. සංපෙසිතො ච රඤ්ඤා නාගො කොඤ්චො ච අභිනදිත්වාන, පටිසක්කිත්වා නිසීදි ගරුභාරං අසහමානො.
1857. කාලිඞ්ගොහාරද්වාජො නාගං ඛීණායුකං විදිත්වාන, රාජානං කාලිඞ්ගං තරමානො අජ්ඣභාසිත්ථ. අඤ්ඤං සඞ්කම නාගං නාගො ඛීණායුකො මහාරාජ.
1858. තං සුත්වා කාලිඞ්ගො තරමානො සඞ්කමි නාගං සඞ්කන්තෙ ච රඤ්ඤො, නාගො තත්ථෙව පති භූම්යා වෙය්යඤජනිකවචො යථා තථා අහු නාගො.
1859. කාලිඞ්ගභාරද්වාජං කාලිඞ්ගො බ්රාහ්මණං ඉදමමොච{4} ත්වමෙවාසි සම්බුද්ධො සබ්බඤ්ඤූ සබ්බදස්සාවී.
1860. තං වචනං අනධිවාසෙන්තො කාලිඞ්ගො බ්රාහ්මණො ඉදමවොච, වෙය්යඤ්ජනිකා හි මයං බුද්ධා සබ්බඤ්ඤුනොව මහාරාජ
1861. සබ්බඤ්ඤූ සබ්බවිදූ ච බුද්ධා න ලක්ඛණෙන ජානන්ති{*}, ආගමබලසාහි මයං බුද්ධා සබ්බං පජානන්ති.
1862. මහායිත්වාන{1} සම්බොධිං නානා තුරියෙහි වජ්ජමානෙහි, මාලාගන්ධවිලෙපනං{2} ආහරිත්වා පාකාරපරික්ඛෙපං කාරෙසි.
1863. සට්ඨවාහසහස්සානං පුප්ඵානං සන්නිපාතයි, පූජෙසි රාජා කාලිඞ්ගො බොධිමණ්ඩවරුත්තමෙ’ති.
6. කාලිඞ්ගබොධිජාතකං.
1864. අකිත්තිං දිස්වාන සම්මන්තං සක්කො භූතපති බ්රවි, කිමත්ථියං මහාබ්රහ්මෙ එකො සම්මසි ඝම්මනි.
1865. දුක්ඛො පුනබ්භවො සක්ක සරීරස්ස ච භෙදනං, සම්මොහමරණං දුක්ඛං තස්මා සම්මාමි වාසව.
1866. එතස්මිං තෙ සුලපිතෙ පතිරූපෙ සුභාසිතෙ, වරං කස්සප තෙ දම්මි යං කිඤ්චි මනසිච්ඡසි.
1867. වරං චෙ මෙ අදො සක්ක සබ්බභූතානමිස්සර, යෙන පුත්තෙ ච දාරෙ ච ධනධඤ්ඤං පියානි ච ලද්ධා නරා න තප්පන්ති සො ලොභො න මයි වසෙ.
1868. එතස්මිං තෙ සුලපිතෙ පතිරූපෙ සුභාසිතෙ, වරං කස්සප තෙ දම්මි යඞ්කිඤ්චි මනසිච්ඡසි.
1869. වරං චෙ මෙ අදො සක්ක සබ්බභූතානමිස්සර, ඛෙත්තං වත්ථුං හිරඤ්ඤඤ්ච ගවාස්සං{3} දාසපොරිසං යෙන ජාතෙන ජීයන්ති සො දොසො න මයි වසෙ.
1870. එතස්මිං තෙ සුලපිතෙ පතිරූපෙ සුභාසිතෙ, වරං කස්සප තෙ දම්මි යං කිඤ්චි මනසිච්ඡසි.
1871. වරං චෙ මෙ අදො සක්ක සබ්බභූතානමිස්සර, බාලං න පස්සෙ න සුණෙ න ච බාලෙන සංවසෙ බාලෙන අල්ලාපසල්ලාපං න කරෙ න ච රොචයෙ
1872. කින්නු තෙ අකරං බාලො වද කස්සප කාරණං, කෙන කස්සප බාලස්ස දස්සනං නාභිකඞ්ඛසි.
1873. අනයං නති දුම්මෙධො අධුරායං නියුඤ්ජති, දුන්නයො සෙය්යසො හොති සම්මාවුත්තො පකුප්පති විනයං සො න ජානාති සාධු තස්ස අදස්සනං.
1874. එතස්මිං තෙ සුලපිතෙ පතිරූපෙ සුභාසිතෙ, වරං කස්සප තෙ දම්මි යං කිඤ්චි මනසිච්ඡසි.
1875. වරං චෙ මෙ අදො සක්ක සබ්බභූතානමිස්සර, ධීරං පස්සෙ සුණෙ ධීරං ධීරෙන සහ සංවසෙ. ධීරෙන අලලාපසල්ලාපං තං කරෙ තං ච රොචයෙ.
1876. කින්නු තෙ අකරං ධීරො වද කස්සප කාරණං, කෙන කස්සප ධීරස්ස දස්සනං අභිකඞ්ඛසි.
1877. නයං නයති මෙධාවී අධුරායං න යුඤ්ජති, සුනයො සෙය්යසො හොති සම්මා වුත්තො න කුප්පති විනයං සො පජානාති සාධු තෙන සමාගමො
1878. එතස්මිං තෙ සුලපිතෙ පතිරූපෙ සුභාසිතෙ, වරං කස්සප තෙ දම්මි යං කිඤ්චි මනසිච්ඡසි.
1879. වරං චෙ මෙ අදො සක්ක සබ්බභූතානමිස්සර, තතො රත්යා විවසනෙ{1} සුරියස්සුග්ගමනං පති. දිබ්බා භක්ඛා පාතුභවෙය්යුං සීලවන්තො ච යාචකා.
1880. දදතො ච මෙ න ඛීයෙථ දත්වා නානුතපෙය්යහං, දදං චිත්තං පසාදෙය්යං එතං සක්ක වරං වරෙ.
1881. එතස්මිං තෙ සුලපිතෙ පතිරූපෙ සුභාසිතෙ, වරං කස්සප තෙ දම්මි යං කිඤ්චි මනසිච්ඡසි.
1882. වරං චෙ මෙ අදො සක්ක සබ්බභූතානමිස්සර, න මං පුන උපෙය්යාසි එතං සක්ක වරං වරෙ.
1883. බහූහි වත්තචරියාහි නරා ච අථ නාරියො, දස්සනං අභිකඞ්ඛන්ති කින්නු මෙ දස්සනෙ භයං.
1884. තං තාදිසං දෙවවණ්ණං සබ්බකාමසමිද්ධිනං, දිස්වා තපො පමජ්ජෙය්යං{1} එතං තෙ දස්සනෙ භයන්ති.
7. අකිත්තිජාතකං{2}.
1885. අහමෙව දුබ්භාසිතං භාසි බාලො භොකො ව අරඤ්ඤෙ අහිමව්හයානො{3}, තක්කාරියෙ සොබ්භමිමං{4} පතාමි න කිරෙව සාධු අතිවෙලභාණි.
1886. පප්පොති මච්චො අතිවෙලභාණී බන්ධං වධං සොකපරිද්දවඤ්ච, අත්තානං යෙව{5} ගරහාසි එත්තො{6} ආචෙර යං තං නිඛණන්ති{7} සොබ්භෙ.
1887. කිමෙවාහං තුණ්ඩිල මනුපුච්ඡිං{8} කරෙය්ය{9} සං භාතරං කාළිකායං{10}, නග්ගොවහං වත්ථයුගඤ්ච ජීනො අයම්පි අත්ථො බහුතාදිසොව.
1888. යො යුජ්ඣමානානං අයුජ්ඣමානො මෙණ්ඩන්තරං අච්චුපතී කුලිඞ්ගො, සො පිංසිතො මෙණ්ඩසිරෙහි තත්ථ අයම්පි අත්ථො බහුතාදිසොව.
1889. චතුරො ජනා පොත්ථකං අග්ගහෙසුං එකඤ්ච පොසං අනුරක්ඛමානා සබ්බෙව තෙ භින්නසිරා සයිංසු අයම්පි අත්ථො බහුතාදිසොව.
1890. අජා යථා වෙළුගුම්බස්මිං බද්ධා අවෙක්ඛිපන්තී අසිමජ්ඣගඤ්ජි{11}, තෙනෙව තස්සා ගලකාවකන්තං{12} අයම්පි අත්ථො බහුතාදිසොව.
1891. නයිමෙ{1} දෙවා නපි{2} ගන්ධබ්බපුත්තා, මිගා ඉමෙ අත්ථවසාහතා ඉමෙ{3} එකඤ්ච නං සායමාසෙ පචන්තු. එකඤ්ච පුන පාතරාසෙ{4} පචන්තු.
1892. සතං සහස්සානං දුබ්භාසිතානං{5} කලම්පි නාග්ඝන්ති සුභාසිතස්ස, දුබ්භාසිතං සඞ්කමානො කිලෙසො තස්මා තුණ්හී කිම්පුරිසො න බාල්යා.
1893. යා මෙසා ව්යාකාසි පමුඤ්චථෙතං. ගිරිඤ්ච{6} නං හිමවන්තං නයන්තු, ඉමඤ්ච ඛො දෙන්තු මහානසාය පාතොව නං පාතරාසෙ පචන්තු.
1894. පජ්ජුන්නනාථා පසවො පසුනාථා අයං පජා, ත්වං නාථොස්මි මහාරාජ අම්භනාථා මම භරියා{7}, ද්වින්නමඤ්ඤතරං ඤත්වා මුතෙතා ගච්ඡෙය්ය පබ්බතං.