1711. කායං මිගානං අත්ථාය උසීනර{3} භවිස්සති, මනුස්සානං අනයො හුත්වා තදා කණ්හො පමොක්ඛති.
1712. පත්තහත්ථා සමණකා මුණ්ඩා සංඝාටිපාරුතා, නඞ්ගලෙහි කසිස්සන්ති තදා කණ්හො පමොක්ඛති.
1713. තපස්සිනියො පබ්බජිතා මුණ්ඩා සංඝාටි පාරුතා, යදා ලොකෙ ගමිස්සන්ති තදා කණ්හො පමොක්ඛති.
1714. දීඝුත්තරොට්ඨා{4} ජටිලා පඞ්කදන්තා රජස්සිරා, ඉණං වොදාය ගච්ඡන්ති තදා කණ්හො පමොක්ඛති.
1715. අධිච්ච වෙදෙ{5} සාවිත්තිං යඤ්ඤතන්ත්රඤ්ච{6} බ්රාහ්මණා, භතිකාය යජිස්සන්ති තදා කණ්හො පමොක්ඛති.
1716. මාතරං පිතරං වාපි ජිණ්ණකෙ ගතයොබ්බනෙ{1}, පහූ සන්තා න භරන්ති තදා කණ්හො පමොක්ඛති.
1717. මාතරං පිතරං වාපි ජිණ්ණකෙ ගතයොබ්බනෙ, බාලා තුම්හෙති වක්ඛන්ති තදා කණ්හො පමොක්ඛති.
1718. ආචරියභරියං සඛාභරියං{2} මාතුලානිං පිතුච්ඡයං{3}, යදා ලොකෙ ගමිස්සන්ති තදා කණ්හො පමොක්ඛති.
1719. අසිචම්මං ගහෙත්වාන ඛග්ගං පග්ගය්හ බ්රාහ්මණා පන්ථඝාතං{4} කරිස්සන්ති තදා කණ්හො පමොක්ඛති.
1720. සුක්කච්ඡවි වෙධවෙරා ථුල්ලබාහු අපාතුභා, මිථුභෙදං කරිස්සන්ති තදා කණ්හො පමොක්ඛති.
1721. මායාවිනො නෙකතිකා අසප්පුරිසචින්තකා, යදා ලොකෙ භවිස්සන්ති තදා කණ්හො පමොක්ඛතීති.
6. මහාකණ්හ ජාතකං.
1722. නෙව කිණාමි නපි වික්කිණාමි න චාපි මෙ සන්නිචයො ච අත්ථි, සුකිච්ඡරූපං වතිදං පරිත්තං. පත්ථොදනො නාලමයං දුවින්නං.
1723. අප්පම්හා අප්පකං දජ්ජං අනුමජ්ඣතො මජ්ඣකං, බහුම්හා බහුකං දජ්ජා අදානං නූපපජ්ජති.
1724. තං තං වදාමි කොසිය දෙහි දානානි භුඤ්ජ ච, අරියං මග්ගං සමාරුහ නෙකාසී ලභතෙ සුඛං
1725. මොඝඤ්චස්ස හුතං හොති මොඝඤ්චාපි සමීහිතං, අතිථිස්මිං යො නිසින්නස්මිං එකො භුඤ්ජති භොජනං,
1726. තං තං වදාමි කොසිය දෙහි දානානි භුඤ්ජ ච, අරියං මග්ගං සමාරුහ නෙකාසී ලභතෙ සුඛං.
1727. සච්චං තස්ස{1} හුතං හොති සච්චං චාපි සමීහිතං, අතිථිස්මිං යො නිසින්නස්මිං නෙකො භුඤ්ජති භොජනං.
1728. තං තං වදාමි කොසිය දෙහි දානානි භුඤ්ජ ච, අරියං මග්ගං සමාරුහ නෙකාසී{2} ලභතෙ සුඛං.
1729. සරඤ්ච ජුහති පොසො බාහුකාය ගයාය ච, දොණෙ තිම්බරුතිත්ථස්මිං සීඝසොතෙ{3} මහාවහෙ.
1730. අත්ර චස්ස හොති අත්ර චස්ස සමීහිතං, අතිථිස්මිං යො නිසින්නස්මිං නෙකො භුඤ්ජති භොජනං.
1731. තං තං වදාමි කොසිය දෙහි දානානි භුඤ්ජ ච, අරියං මග්ගං සමාරුහ නෙකාසී ලභතෙ සුඛං.
1732. ඛිළිසං හි සො නිග්ගිලති{4} දීඝසුත්තං සබන්ධනං, අතිථිස්මිං යො නිසින්නස්මිං එකො භුඤ්ජති භොජනං.
1733. තං තං වදාමි කොසිය දෙහි දානානි භුඤ්ජ ච, අරියං මග්ගං සමාරුහ නෙකාසී ලභතෙ සුඛං.
1734. උළාරවණණා වත බ්රාහ්මණා ඉමෙ, අයඤ්ච වො සුනඛො කිස්ස හෙතු, උච්චාවචං වණ්ණනිභං විකුබ්බති අක්ඛාථ නො බ්රාහ්මණා කෙ නු තුම්හෙ.
1735. චන්දො ච සුරියො ච උභො ඉධාගතා අයං පන මාතලි දෙව සාරථි, සක්කොහමස්මි තිදසානමින්දො එසො ච ඛො පඤ්චසිඛොති වුච්චති.
1736. පාණිස්සරා මුදිඞ්ගා ච මුරජාළම්බරානි ච, සුත්තමෙනං පබොධෙන්ති පටිබුද්ධො ච නන්දති.
1737. යෙ කෙචිමෙ මච්ඡරිනො කදරියා පරිභාසකා සමණබ්රාහ්මණානං, ඉධෙව නික්ඛිප්ප සරීරදෙහං කායස්ස භෙදා නිරයං වජන්ති.
1738. යෙ කෙචිමෙ සුග්ගතිමාසසානා{1} ධම්මෙ ඨිතා සංයමෙ සංවිභාගෙ, ඉධෙව නික්ඛිප්ප සරීරදෙහං කායස්ස භෙදා සුගතිං වජන්ති.
1739. ත්වං නොසි ඤාති පුරිමාසු ජාතිසු සො මච්ඡරී රොසකො පාපධම්මො, තවෙව අත්ථාය ඉධාගතම්හා මා පාපධම්මො නිරයං අපත්ථ.
1740. අද්ධා හි මං වො හිතකාමා යං මං සමනුසාසථ, සොහං තථා කරිස්සාමි සබ්බං වුත්තං හිතෙසිහි.
1741. එසාහමජ්ජෙව අපාරමාමි නචාපහං කිඤ්චි කරෙය්ය පාපං, නචාපි මෙ කිඤ්චිමදෙය්යමත්ථි නචාපදත්වා උදකම්පහං පිබෙ{2}.
1742. එවඤ්ච මෙ දදතො සබ්බකාලං භොගා ඉමෙ වාසව ඛීයිස්සන්ති, තතො අහං පබ්බජිස්සාමි සක්ක හිත්වාන කාමානි යථොධිකානීති.
7. කොසියජාතකං.
1743. යෙසං න කදාචි භූතපුබ්බං{1} සක්ඛිං සත්තපදම්පි ඉමස්මිං ලොකෙ, ජාතා අමිත්තා{2} දුවෙ සහායා පටිසන්ධාය චරන්ති කිස්ස හෙතු.
1744. යදි මෙ අජ්ජ පාතරාසකාලෙ පණ්හං න සක්කුණෙය්යාථ වත්තුමෙතං, රට්ඨා පබ්බාජයිස්සාමි වො සබ්බෙ නහි මත්ථො දුප්පඤ්ඤජාතිකෙහි.
1745. මහාජනසමාගමම්භි ඝොරෙ ජනකොලාහලසඞ්ගමම්හි ජාතෙ වික්ඛිත්තමනා අනෙකවචිත්තා පඤ්හං න සක්කුණොම වත්තුමෙතං.
1746. එකග්ගචිත්තා ච එකමෙකා රහසිගතා අත්ථං නිචින්තයිත්වා, පවිවෙකෙ සම්මසිත්වාන ධීරා අථ වක්ඛන්ති ජනින්ද අත්ථමෙතං.
1747. උග්ගපුත්තරාජපුත්තියානං උරබ්භමංසං පියං මනාපං, න තෙ සුනඛස්ස අදෙන්ති මංසං අථ මෙණ්ඩස්ස සුණෙන සඛ්යමස්ස.
1748. චම්මං විහනන්ති එළකස්ස අස්සපිට්ඨත්ථරණසුඛස්ස හෙතු, නච තෙ සුනඛස්ස අත්ථරන්ති අථ මෙණ්ඩස්ස සුණෙන සඛ්යමස්ස.
1749. ආවෙල්ලිතසිඞ්ගිකො හි මෙණ්ඩො න ච සුනඛස්ස විසාණානි{3} අත්ථි, තිණභක්ඛො මංසභොජනො ච අථ මෙණ්ඩස්ස සුණෙන සඛ්යමස්ස.
1750. තිණමාසී පලාසමාසී මෙණ්ඩො න ච සුනඛො තිණමාසී නො පලාසං, ගණ්හෙය්ය සුණො සසං බිළාරං අථ මෙණ්ඩස්ස සුණෙන සඛ්යමස්ස.
1751. අඩ්ඪට්ඨපාදො චතුප්පදස්ස මෙණ්ඩො අට්ඨනඛො අදිස්සමානො, ඡාදියමාහරති අයං ඉමස්ස මංසං ආහරති අයං අමුස්ස.
1752. පාසාදගතො විදෙහසෙට්ඨො වීතිහාරං අඤ්ඤමඤ්ඤභොජනානං, අද්දක්ඛි කිර සක්ඛි තං ජනින්දො ඛොභුක්ඛස්ස ච පුණ්ණමුඛස්ස චෙතං.
1753. ලාභා වත මෙ අනප්පරූපා යස්ස මෙදිසා පණ්ඩිතා කුලම්භි, පඤ්චස්ස ගම්භීරගතං නිපුණමත්ථං පටිවිජ්ඣන්ති සුභාසිතෙන ධීරා.
1754. අස්සතරීරථඤ්ච එකමෙකං ඵීතං ගාමවරඤ්ච එකමෙකං, සබ්බෙසං වො දම්මි පණ්ඩිතානං. පරමපතීතමනො සුභාසිතෙනා’ති.
8. මෙණ්ඩකපඤ්හො.
1755. නාදිට්ඨා{1} පරතො දොසං අණුංථූලානි සබ්බසො, ඉස්සරො පණයෙ දණ්ඩං සාමං අප්පටිවෙක්ඛිය.
1756. යො ච අප්පටිවෙක්ඛිත්වා දණ්ඩං කුබ්බති ඛත්තියො, සකණ්ටකං සො ගිලති ජච්චන්ධොව සමක්ඛිකං.
1757. අදණ්ඩියං දණ්ඩයති දණ්ඩියඤ්ච අදණ්ඩියං අන්ධොව විසමං මග්ගං න ජානාති සමාසමං.
1758. යො ච එතානි ඨානානි අණුංථූලානි සබ්බසො, සුදිට්ඨං චානුසාසෙය්ය සචෙ වොහරිතුමරහති.{2}
1759. නෙකන්නමුදුනා සක්කා එකන්තතිඛිණෙන වා, අත්තං මහන්තෙ ඨාපෙතුං{3} තස්මා උභයමාචරෙ.
1760. පරිභූතො මුදූ හොති අතිතික්ඛො ච වෙරවා, එතඤ්ච උභයං ඤත්වා අනුමජ්ඣං සමාචරෙ.
1761. බහුම්පි රත්තො භාසෙය්ය දුට්ඨොපි බහුභාසති, න ඉත්ථිකාරණා රාජ පුත්තං ඝාතෙතුමරහසි.
1762. සබ්බො ච ලොකො එකන්තො{1} ඉත්ථි ච අයමෙකිකා, තෙනාහං පටිපජ්ජිස්සං ගච්ඡ පක්ඛිපථෙව නං.
1763. අනෙකතාලෙ නරකෙ ගමිභීරෙ ච සුදුත්තරෙ, පාතිතො ගිරිදුග්ගස්මිං කෙන ත්වං තත්ථ නාමරි.
1764. නාගො නාගබලො{2} තත්ථ ථාමවා ගිරිසානුජො, පච්චග්ගහී මං භොගෙහි තෙනාහං තත්ථ නාමරිං.
1765. එහි තං පටිනෙස්සාමි රාජපුත්ත සකං ඝරං, රජ්ජං කාරෙසි භද්දන්තෙ කිං අරඤ්ඤෙ කරිස්සසි.
1766. යථා ගිලිත්වා බළිසං උද්ධරෙය්ය සලොහිතං, උද්ධරිත්වා සුඛී අස්ස{3} එවං පස්සාමි අත්තනං.
1767. කින්නු ත්වං බළිසං බ්රූසි කිං ත්වං බ්රූසි සලොහිතං. කින්නු ත්වං උබ්භතං බ්රූසි තම්මෙ අක්ඛාහි පුච්ඡිතො.
1768. කාමාහං බළිසං බ්රූමි හත්ථිඅස්සං සලොහිතං, චත්තාහං උබ්භතං බ්රූමි එවං ජානාහි ඛත්තිය.
1769. චිඤ්චාමාණවිකා මාතා දෙවදත්තො ච මෙ පිතා, ආනන්දො පණ්ඩිතො නාගො සාරිපුත්තො ච දෙවතා. අහං තදා රාජපුත්තො{4} එවං ධාරෙථ ජාතකන්ති.
9. මහාපදුමජාතකං.
1770. කානි කම්මානි කුබ්බානං කථං විඤ්ඤූ පරක්කමෙ අමිත්තං ජානෙය්ය මෙධාවී දිස්වා සුත්වා පණ්ඩිතො.
1771. න තං උම්භයතෙ දිස්වා න ච නං පටිනන්දති, චක්ඛූනි චස්ස{1} න දදාති පටිලොමං ච වත්තති.
1772. අමිත්තෙ තස්ස භජති මිත්තෙ තස්ස න සෙවති, වණ්ණකාමෙ නිවාරෙති අක්කොසන්තෙ පසංසති.
1773. ගුය්හඤ්ච තස්ස නක්ඛාති තස්ස ගුය්හං න ගූහති, කම්මං තස්ස න වණ්ණෙති පඤ්ඤස්ස නප්පසංසති.
1774. අභවෙ නන්දති තස්ස භවෙ තස්ස න නන්දති, අච්ඡරියං භොජනං ලද්ධා තස්ස නුප්පජ්ජතෙ සති, තතො තං නානුකම්පති අහො සොපි ලභෙයයිතො{2}
1775. ඉච්චෙතෙ සොළසාකාරා අමිත්තස්මිං පතිට්ඨිතා, යෙහි අමිත්තං ජානෙය්ය දිස්වා සුත්වා ච පණ්ඩිතො.
1776. කානි කම්මානි කුබ්බානං කථං විඤ්ඤූ පරක්කමෙ, මිත්තං ජානෙය්ය මෙධාවී දිස්වා සුත්වා ච පණ්ඩිතො.
1777. පවුත්තං{3} චස්ස සරති ආගතං අභිනන්දති, තතො කෙලායිතො හොති වාචාය පටිනන්දති.
1778. මිත්තෙ තස්සෙව භජති අමිත්තෙ තස්ස න සෙවති, අකොසන්තෙ නිවාරෙති වණ්ණකාමෙ පසංසති.
1779. ගුහ්යඤ්ච තස්ස අක්ඛාති තස්ස ගුය්හඤ්ච ගූහති, කම්මඤ්ච තස්ස වණ්ණෙති පඤ්ඤං තස්ස{4} පසංසති.
1780. භවෙ ච නන්දති තස්ස අභවෙ තස්ස න නන්දති, අච්ඡරියං භොජනං ලද්ධා තස්ස උප්පජ්ජතෙ සති, තතො තං අනුකම්පති අහො සොපි{1} ලභෙයයිතො.
1781. ඉච්චෙතෙ සොළසාකාරා මිත්තස්මිං සුප්පතිට්ඨිතා, යෙහි මිත්තං ච ජානෙය්ය දිස්වා සුත්වා ච පණ්ඩිතොති.
10. මිත්තාමිත්තජාතකං.
ද්වාදසකනිපාතො නිට්ඨිතො
තස්සුද්දානං:
ලහුචිත්ත සාසාල කසන්ති පුන අථ කාම දසබලුට්ඨාන වරො, අථ කණ්හ සුකොසිය මෙණ්ඩවරො පදුමො පුන මිත්තවාරෙ දස.
13. තෙරසකනිපාතො
1782. අහාසි මෙ අම්බඵලානි පුබ්බෙ අණූනි ථූලානි ච බ්රහ්මචාරී, තෙහෙව මන්තෙහි නදානි තුය්හං දුමප්ඵලා පාතුභවන්ති බ්රහ්මෙ.
1783. නක්ඛත්තයොගං පටිමානයාමි{1} ඛණං මුහුත්තං න මං තොසයන්ති,{2} නක්ඛන්තයොගඤ්ච ඛණඤ්ච ලද්ධා අථා{3}හරිස්සම්බඵලං පහූතං.{4}
1784. නක්ඛත්තයොගං න පුරෙ අභාණි ඛණං මුහුත්තං න පුරෙ අසංසි, අථාහරී{5} අම්බඵලං පහූතං වණ්ණෙන ගන්ධෙන රසෙනුපෙතං.
1785. මන්තාභිජප්පෙන පුරස්ස{6} තුය්හං දුමප්ඵලා පාතුභවන්ති බ්රහ්මෙ, ස්වාජ්ජ න පාරෙසි ජපම්පි මන්තෙ{7} අයං සො කො නාම තවජ්ජ ධම්මො.
1786. චණ්ඩාලපුත්තො මම සම්පදාසි ධම්මෙන මන්තෙ පකතිඤ්ච සංසි, මා චස්සු මෙ පුච්ඡිතො නාමගොත්තං. ගුය්හිත්ථො මා තං විජහෙය්ය{8} මන්තො.
1787. සොහං ජනින්දෙන ජනම්හි පුට්ඨො මක්ඛාභිභූතො අලිකං අභාසිං, මන්තා ඉමෙ බ්රාහ්මණස්සාති මිච්ඡා පහීනමන්තො කපණො රුදාමි.
1788. ඵරණ්ඩා පුචිමන්දා වා අථවා පාළිභද්දකා, මධුං මධුත්ථිකො වින්දෙ සො තස්ස දුමුත්තමො.
1789. ඛත්තියා බ්රාහ්මණා වෙස්සා සුද්දා චණ්ඩාලපුක්කුසා, යස්මා{1} ධම්මා විජානෙය්ය සො හි තස්ස නරුත්තමො.
1790. ඉමස්ස දණ්ඩඤ්ච වධඤ්ච දත්වා ගලෙ ගහෙත්වා බලයාථ ජම්මං, යො උත්තමත්ථං කසිරෙන ලද්ධං මානාතිමානෙන විනාසයිත්ථ.
1791. යථා සමං මඤ්ඤමානො පතෙය්ය සොබ්භං ගුහං නරකං පූතිපාදං, රජ්ජූනි වා අක්කමෙ කණ්හසප්පං අන්ධො යථා ජොතිමධිට්ඨහෙය්ය{2} එවම්පි මං ත්වං ඛලිතං සපඤ්ඤ{3} පහීනමන්තස්ස පුනප්පසීද{4},
1792. ධම්මෙන මනෙත{5} තව සම්පදාසිං තුවම්පි ධම්මෙන පටිග්ගහෙසි පකතිම්පි තෙ අත්තමනො අසංසිං{6} ධම්මෙ ඨිතං තං න ජහෙය්ය මන්තො.
1793. සො බාල මන්තං කසිරෙන ලද්ධං යං දුල්ලභං අජ්ජ මනුස්සලොකෙ, කිච්ඡා ලද්ධා ජීවිකං අප්පපඤ්ඤො{7} විනාසයී අලිකං භාසමානො.
1794. බාලස්ස මූළ්හස්ස අඤ්ඤුකතනො ච මුසා භණන්තස්ස අසසඤ්ඤතස්ස, මන්තෙ මයං තාදිසකෙ න දෙම කුතො මන්තා ගච්ඡ න මය්හ රුච්චසී’ති.
1. අම්බජාතකං.
1795. කුඨාරිහත්ථො පුරිසො වනමොගය්හ තිට්ඨසි{1}, පුට්ඨො මෙ සම්ම අක්ඛාහි කිං දාරුං ඡෙතුමිච්ඡසි.
1796. ඉස්සො{2} වනානි චරසි සමානි විසමානි ච, පුට්ඨො මෙ සම්ම අක්ඛාහි කිං දාරුං නෙමියා දළ්හං.
1797. නෙව සාලො න ඛදිරො නාස්සකණ්ණොකුතො ධවො{3}, රුක්ඛොව ඵන්දනො නාම තං දාරුං නෙමියා දළහන්ති.
1798. කීදිසානිස්ස පත්තානි ඛන්ධො වා පන කීදිසො, පුට්ඨො මෙ සම්ම අක්ඛාහි යථා ජානෙමු ඵන්දනං.
1799. යස්ස සාඛා පලම්බන්ති නමන්ති න ච භඤ්ජරෙ, සො රුක්ඛො ඵන්දතො නාම යස්ස මූලෙ අහං{4} ඨිතො.
1800. අරානං චක්කනාභීනං ඊසානෙමි රථස්ස ච, සබ්බස්ස තෙ කම්මනියො අයං හෙස්සති ඵන්දනො.