1623. තස්මා හි ධීරස්ස බහුස්සුතස්ස සම්පස්සසතො ලොකමිමං පරඤ්ච, අඤ්ඤාය ධම්මං හදයං මනඤ්ච සොකා මහන්තාපි න තාපයන්ති.
1624. සොහං දස්සඤ්ච භොක්ඛඤ්ච{1} භරිස්සාමි ච ඤාතකෙ, සෙසං සම්පාලයිස්සාමි කිච්චමෙතං විජානතො.
1625. දස වස්සසහස්සානි සට්ඨිවස්සසතානි ච, කම්බුගීවො මහාබාහු රාමො රජ්ජමකාරයීති
7. දසරථජාතකං.
1626. ජානන්තො නො මහාරාජ තව සීලං ජනාධිපො, ඉමෙ කුමාරෙ පූජෙන්තො න තං කෙනචි මඤ්ඤථ.
1627. තිට්ඨන්තෙ නො මහාරාජෙ{2} ආදු දෙවෙ දිවංගතෙ, ඤාතී නං සමනුමඤ්ඤිංසු සම්පස්සං අත්ථමත්තනො.
1628. කෙන සංවරවත්තෙන සඤ්ජාතෙ අධිතිට්ඨසි,{3} කෙන තං නාතිවත්තන්ති ඤාතිසඞ්ඝා සමාගතා.
1629. න රාජපුත්ත උසුය්යාමි සමණානං මහෙසිනං, සක්කච්චං තෙ නමස්සාමි පාදෙ වන්දාමි තාදිනං.
1630. තෙ මං ධම්මගුණෙ යුත්තං සුස්සූසමනුසුය්යකං, සමණා සමනුසාසන්ති.{4} ඉසී ධම්මගුණෙ රතා.
1631. තෙසාහං වචනං සුත්වා සමණානං මහෙසිනං, න කිඤ්චි අතිමඤ්ඤාමි ධම්මෙ මෙ නිරතො මනො.
1632. හත්ථාරුහා{5} අනීකට්ඨා රථිකා පත්තිකාරිකා, තෙසං නප්පටිබන්ධාමි නිබද්ධං භත්තවෙතනං{6}.
1633. මහාමත්තා ච මෙ අත්ථි මන්තිනො පරිචාරකා{1}, බාරාණසිං වොහරන්ති බහුමංස{2} සුරොදකං.
1634. අථොපි වාණිජා ඵිතා නානා රට්ඨෙහි ආගතා, තෙසු මෙ විහිතා රක්ඛා එවං ජානාහුපොසථ.
1635. ධම්මෙන කිර ඤාතීනං රජ්ජං කාරෙහි සංවර, මෙධාවී පණ්ඩිතො චාපි{3} අථොපි ඤාතීනං හිතො
1636. තං තං ඤාති පරිබ්බූළ්හං නානාරතනමොචිතං, අමිත්තා නප්පසහන්ති ඉන්දංව අසුරාධිපොති.
8. සංවරජාතකං.
1637. උම්මුජ්ජන්ති නිමුජ්ජන්ති මනුස්සා ඛුරනාසිකා, සුප්පාරකං තං පුච්ඡාම සමුද්දො කතමො අයං.
1638. භරුකච්ඡා පයාතානං වාණිජානං ධනෙසිනං, නාවාය විප්පනට්ඨාය ඛුරමාලීති වුච්චති.
1639. යථා අග්ගිව සුරියො ව{4} සමුද්දො පති{5}දිස්සති{5}, සුප්පාරකං තං පුච්ඡාම සමුද්දො කතමො අයං.
1640. භරුකච්ඡා පයාතානං වාණිජානං ධනෙසිනං, නාවාය විප්පනට්ඨාය අග්ගිමාලීති වුච්චති.
1641. යථා දධිංව ඛීරංව සමුද්දො පති{5}දිස්සති, සුප්පාරකං තං පුච්ඡාම සමුද්දො කතමො අයං.
1642. භරුකච්ඡා පයාතානං වාණිජානං ධනෙසිනං, නාවාය විප්පනට්ඨාය දධිමාලීති වුච්චති.
1643. යථාකුසොව සස්සොව{6} සමුද්දො පතිදිස්සති, සුප්පාරකං තං පුච්ඡාම සමුද්දො කතමො අයං.
1644. භරුකච්ඡා පයාතානං වාණිජානං ධනෙසිනං, නාවාය විප්පනට්ඨාය දධිමාලීති වුච්චති.
1645. යථා නළොව වෙලූව සමුද්දො පතිදිස්සති, සුප්පාරකං තං පුච්ඡාම සමුද්දො කතමො අයං.
1646. භරුකච්ඡා පයාතානං වාණිජානං ධනෙසිනං, නාවාය විප්පනට්ඨාය නළිමාලීති වුච්චති.
1647. මහාභයො{1} භිංසනකො සමුද්දො{2} සුය්යතමානුසො{3}, යථා සොබ්භො පපාතොව සමුද්දො පතිදිස්සති සුප්පාරකං තං පුච්ඡාම සමුද්දො කතමො අයං.
1648. භරුකච්ඡා පයාතානං වාණිජානං ධනෙසිනං නාවාය විප්පනට්ඨාය වළවාමුඛීති වුච්චති.
1649. යතො සරාමි අත්තානං යතො පත්තොස්මි විඤ්ඤුතං. නාභිජානාමි සඤ්චිච්ච එකපාණම්පි හිංසිතං. එතෙන සච්චවජ්ජෙන සොත්ථිං නාවා නිවත්තතූති.
9. සුප්පාරකජාතකං.
එකාදසකනිපාතං නිට්ඨිතං.
තස්සුද්දානං:
සිරී මාතුසුපොසක නාගවරො පුන ජුණ්හ අධම්ම මුදයවරො, අථ පාණියුධඤ්ජයකො ච දස රථ සංවර පාරගතෙන නවාති.
12. ද්වාදසකනිපාතො
1650. ඛුද්දානං ලහුචිත්තානං අකතඤ්ඤූන දූභිනං{1}, නාදෙවසත්තො පුරිසො ථිනං සද්ධාතුමරහති.
1651. න තා පජානන්ති කතං න කිච්චං න මාතරං පිතරං භාතරං වා, අනරියා සමතික්කන්නධම්මා සස්සෙව චිත්තස්ස වසං වජන්ති.
1652. චිරානුවුත්තම්පි{2} පියං මනාපං අනුකම්පං පාණසමම්පි{3} සන්තං, ආවාසු කිච්චෙසු ච නං ජහන්ති තස්මාහමිත්ථිනං න විස්සසාමි.
1653. ථිනඤ්හි චිත්තං යථා වානරස්ස කන්නප්පකන්නං{4} යථා රුක්ඛඡායා, චලාචලං හදයං ඉත්ථියානං චක්කස්ස නෙමි විය පරිවත්තති.
1654. යදා තා පස්සන්ති සමෙක්ඛමානා ආදෙය්යරූපං පුරිසස්ස විත්තං, සණ්හාහි වාචාහි නයන්ති මෙනං කම්බොජකා ජලජෙනෙව අස්සං.
1655. යදා න පස්සන්ති සමෙක්ඛමානා ආදෙය්යරූපං පුරිසස්ස විත්තං, සමන්තතො නං පරිවජ්ජයන්ති තිණ්ණො නදීපාරගතොව කුල්ලං
1656. සිලෙසූපමා{5} සිඛිරිව සබ්බභක්ඛා තික්ඛමායා{6} නදීරිව සීඝසොතා{7}, සෙවන්ති හෙතා පියමප්පියඤ්ච නාගං යථා ඔරකුලං පරඤ්ච.
1657. න තා එකස්ස න ද්වින්නං ආපණොව පසාරිතො{8}, යො තා මය්හන්ති මඤ්ඤෙය්ය වාතං ජාලෙන බාධයෙ.
1658. යථා නදී ච පන්ථො ච පානාගාරං සභා පපා, එවං ලොකිත්ථියො නාම වෙලා තාසං න විජ්ජති.
1659. ඝතාසනසමාහෙතා කණ්හසප්ප සිරූපමා, ගාවො බහි තිණස්සෙව ඔමසන්ති වරං වරං.
1660. ඝතාසනං කුඤ්ජරිං කණ්හසප්පං මුද්ධාභිසිත්තං පමදා ච සබ්බා, එතෙ නරො නිච්චයත්තො{1} භජෙථ තෙසං භවෙ දුබ්බිදු සබ්බභාවො{2}
1661. නාච්චන්තවණ්ණා න බහූනං{3} කන්තා න දක්ඛිණා පමදා සෙවිතබ්බා, න පරස්ස භරියා න ධනස්ස හෙතු එතිත්ථියො පඤ්ච න සෙවිතබ්බාති.
1. චූළකුණාලජාතකං.
1662. කා ත්වං සුද්ධෙහි වත්ථෙහි අඝෙ වෙහාසයං ඨිතා, කෙන ත්යාස්සූනි වත්තන්ති කුතො තං භයමාගතං.
1663. තවෙව දෙව විජිතෙ භද්දසාලොති මං විදූ, සට්ඨිං වස්සසහස්සානි තිට්ඨතො පූජිතස්ස මෙ.
1664. කාරයන්තා නගරානි අගාරෙ ච දිසම්පති, විවිධෙ චාපි පාසාදෙ න මන්තෙ අව්වමඤ්ඤිසුං. යථෙව මං තෙ පූජෙසුං තථෙව ත්වම්පි පූජය.
1665. තව අහං න පස්සාමි ථුල්ලං කායෙන තෙ දුමං. ආරොහපරිණාහෙන අභිරූපොසි ජාතියා.
1666. පාසාදං කාරයිස්සාමි එකත්ථම්භං මනොරමං, තත්ථ තං උපනෙස්සාමි චිරං තෙ යක්ඛ ජීවිතං.
1667. එවං චිත්තං{4} උදපාදි සරීරෙන විනාභාවො, පුථුසො මං විකන්තෙත්වා ඛණ්ඩසො අවකන්තථ
1668. අග්ගෙ ච ඡෙත්වා මජ්ඣෙ ච පච්ඡා{1} මූලඤ්ච ඡින්දථ, එවං මෙ ඡිජ්ජමානස්ස න දුක්ඛං මරණං සියා.
1669. හත්ථපාදං{2} යථා ඡින්දෙ කණ්ණනාසඤ්ච ජීවිතෙ{3} තතො පච්ඡා සිරො ඡින්දෙ තං දුක්ඛං මරණං සියා.
1670. සුඛන්නු ඛණ්ඩසො ඡින්නං{4} භද්දසාල වනස්පති{5} කිං හෙතු කිං{6} උපාදාය ඛණ්ඩසො ඡින්නමිච්ඡසි.
1671. යඤ්ච හෙතුං උපාදාය හෙතු{7} ධම්මූපසංහිතං ඛණ්ඩසො ඡින්නමිච්ඡාමි මහාරාජ සුණොහි මෙ.
1672. ඤාතී{8} මෙ සුඛසංවද්ධා මම පස්සෙ නිවාතජා තෙ’පිහං උපහිංසෙය්යං පරෙසං අසුඛොචිතං{9},
1673. චෙතබ්බරූපං{10} චෙතෙසි{11} භද්දසාල වනස්පති, හිතකාමොසි ඤාතීනං අභයං සම්ම දදාමි තෙ’ති.
2. භද්දසාල ජාතකං.
1674. කසන්ති වපන්ති{12} තෙ ජනා මනුජා කම්මඵලූපජීවිනො, නයිමස්ස දීපකස්ස භාගිනො ජම්බුදීපා ඉදමෙව නො වරං.
1675. තිපඤ්චරත්තූපගමම්භි චන්දෙ වොගො මහා හොහිති සාගරස්ස,{13} උපලාපයං දීපමිමං උළාරං මා වො වධි ගච්ඡථ ලෙණමඤ්ඤං.
1676. න ජාතයං{14} සාගරවාරිවෙගො උප්පාටයෙ{15} දීපමිමං උළාරං; තං මෙ නිමිත්තෙහි බහූහි දිට්ඨං මා භෙථ කිං සොචථ මොදථව්හො{16}
1677. පහූතභක්ඛං{1} බහුඅන්නපානං පත්තත්ථ{2} ආවාසමිමං උළාරං: න වො භයං පටිපස්සාමි කිඤ්චි ආපුත්ත පුත්තෙහි පමොදථව්හො{3}.
1678. යො ත්වෙවයං දක්ඛිණස්සං දිසායං ඛෙමන්ති පක්කොසති තස්ස සච්චං; න උත්තරො වෙදි භයාහයස්ස මා භෙථ කිං සොචථ මොදථව්හො.
1679. යථා ඉමෙ විප්පවදන්ති යක්ඛා එකො භයං සංසති ඛෙමමෙකො තදිඞ්ඝ මය්හං වචනං සුණාථ; ඛිප්පං ලහුං මා විනස්සිම්හ{4} සබ්බෙ
1680. සබ්බෙ සමාගම්ම කරොම නාවං දොණිං දළ්හං සබ්බයන්තූපපන්නං: සචෙ අයං දක්ඛිණො සච්චමාහ මොඝං පටික්කොසති උත්තරො අයං.
1681. සචෙ වනො හොහිති{5} ආපදත්ථා ඉමඤ්ච දීපං න පරිච්චජෙම; සචෙ ච ඛො උත්තරො සච්චමාහ මොඝං පටික්කොසති දක්ඛිණො අයං{6}. තමෙව නාවං අභිරුය්හ සබ්බෙ එවං මයං සොත්ථි තාරෙමු පාරං,
1682. න චෙ සුගණ්හං පඨමෙන සෙට්ඨං කනිට්ඨ මාපාථගතං ගහෙත්වා යො චීධ මජ්ඣං{7} පටිචෙය්ය ගණ්හති: සචෙ නාරො සෙට්ඨමුපෙති ඨානං
1683. යථාපි තෙ සාගරවාරිමජ්ඣෙ සකම්මුනා{8} සොත්ථිං වහිංසු වාණිජා; අනාගතත්ථං පටිවිජ්ඣියාන අප්පම්පි නාච්චෙතිස භූරිපඤ්ඤො.{9}
1684. බාලා ච මොහෙන රසානුගිද්ධා අනාගතං අප්පටිවිජ්ඣියත්ථං; පච්චුප්පන්නෙ සීදන්ති අත්ථජාතෙ{1} සමුද්දමජ්ඣෙ යථා තෙ මනුස්සා.
1685. අනාගතං පටිකයිරාථ කිච්චං මාමං කිච්චං කිච්චකාලෙ ව්යධෙසි, තං තාදිසං පටිගත{2} කිච්චකාරිං න තං කිච්චං කිච්චකාලෙ ව්යධෙති.
3. සමුද්දවාණිජ ජාතකං.
1686. කාමං කාමයමානස්ස තස්ස චෙ තං සමිජ්ඣති, අද්ධා පීතිමනො හොති ලද්ධා මච්චො යදිච්ඡති.
1687. කාමං කාමයමානස්ස තස්ස වෙ තං සමිජ්ඣති, තතො නං අපරං කාමෙ ඝම්මෙ තණ්හංව වින්දති.
1688. ගවංව සිඞ්ගිනො සඞ්ගං වඩ්ඪමානස්ස වඩ්ඪති, එවං මන්දස්ස පොසස්ස බාලස්ස අවිජානතො, භිය්යො තණ්හා පිපාසා ච වඩ්ඪමානස්ස වඩ්ඪති.
1689. පථව්යා සාලියවකං ගවාස්සං{3} දාසපොරිසං, දත්වාපි{4} නාලමෙකස්ස ඉති විද්වා සමඤ්චරෙ.
1690. රාජා පසය්හ පඨවිං{5} විජෙත්වා{6} සසාගරන්තං මහිමාවසන්තො; ඔරං සමුද්දස්ස අතිත්තරූපො පාරං සමුද්දස්සපි පත්ථයෙථ.
1691. යාව අනුස්සරං{7} කාමෙ මනසා තිත්ති නාජ්ඣගා, තතො නිවත්තා{8} පටික්කම්ම{9} දිස්වා, තෙ වෙ තිත්තා යෙ පඤ්ඤාය තිත්තා.
1692. පඤ්ඤාය තිත්තිනං සෙට්ඨං න සො කාමෙහි තප්පති, පඤ්ඤාය තිත්තං{1} පුරිසං තණ්හා න කුරුතෙ වසං.
1693. අපචිනෙථෙව කාමානි{2} අප්පිච්ඡස්ස{3} අලොලුපො, සමුද්දමත්තො පුරිසො න සො කාමෙහි තප්පති.
1694. රථකාරොව චම්මස්ස පරීකත්තං උපාහනං, යං යං චජති{4} කාමානං තං තං සම්පජ්ජතෙ සුඛං, සබ්බෙඤ්ච සුඛමිච්ඡෙය්ය සබ්බෙ කාමෙ පරිච්චජෙ.
1695. අට්ඨ තෙ භාසිතා ගාථා සබ්බා හොන්ති සහස්සියො, පතිගණ්හ මහාබ්රහ්මෙ සාධෙතං තව භාසිතං.
1696. න මෙ අත්ථො සහස්සෙහි සතෙහි නහුතෙහි වා, පච්ඡිමං භාසතො ගාථං කාමෙ මෙ න රතො මනො.
1697. භද්දො{5} වතායං මාණවකො සබ්බලොකවිදූ මුනි, යො තණ්හං{6} දුක්ඛජනනිං පරිජානාති පණ්ඩිතොති.
4. කාමජාතකං.
1698. දස ඛලු ඉමානි{7} ඨානානි යානි පුබ්බෙ අකාරිත්වා, ස පච්ඡා මනුතප්පති ඉච්චාහ රාජා ජනසන්ධො.
1699. අලද්ධා චිත්තං තපති{8} පුබ්බෙ අසමුදානිතං න පුබ්බෙ ධනමෙසිස්සං ඉති පච්ඡානුතප්පති.
1700. සක්යරූපං පුරෙ සන්තං මයා සිප්පං න සික්ඛිතං, කිච්ඡා වුත්ති අසිප්පස්ස ඉති පච්ඡානුතප්පති.
1701. කූටවෙදී පුරෙ ආසිං පිසුනො පිට්ඨිමංසිකො, චණ්ඩො ච ඵරුසො චාසිං{9} ඉති පච්ඡානුතප්පති.
1702. පාණාතිපාතී පුරෙ ආසිං ලුද්දො චාසිං{10} අනාරියො, භූතානං නාවදායිස්සං ඉති පච්ඡානුතප්පති.
1703. බහූසු වත සන්තීසු අනපාදාසු ඉත්ථිසු, පරදාරං අසෙවිස්සං ඉති පච්ඡානුතප්පති.
1704. බහුම්හි වත සන්තම්හි අන්නපානෙ උපට්ඨිතෙ, න පුබ්බෙ අදදිං දානං ඉති පච්ඡානුතප්පති.
1705. මාතරං පිතරං වාපි ජිණ්ණකෙ ගතයොබ්බනෙ{1}, පහූ සන්තො න පොසිස්සං ඉති පච්ඡානුතප්පති.
1706. ආචරියමනුසත්ථාරං සබ්බකාමරසාහරං, පිතරං අතිමඤ්ඤිස්සං ඉති පච්ඡානුතප්පති.
1707. සමණෙ බ්රාහ්මණෙ චාපි සීලවන්තෙ බහුස්සුතෙ, න පුබ්බෙ පයිරුපාසිස්සං ඉති පච්ඡානුතප්පති,
1708. සාධු හොති තපො චිණ්ණො සන්තො ච පයිරුපාසිතො, න ච පුබ්බෙ තපො චිණෙණා ඉති පච්ඡානුතප්පති.
1709. යො ච එතානි ඨානානි යොනිසො පටිපජ්ජති, කරං පුරිසකිච්චානි ස පච්ඡා නානුතප්පතී’ති.
5. ජනසන්ධ ජාතකං.
1710. කණ්හො කණ්හො ච ඝොරො ච සුක්කදාඨො පතාපවා{2}, බද්ධො පඤ්චහි රජ්ජූහි කිං ධීර සුනඛො තව.