1178. රාජාහමස්මි නරපමදාන{8}මිස්සරො සචෙපි කුජ්ඣාමි ඨපෙමි අත්තනං{9}, නිසෙධයන්තො ජනතං තථාවිධං පණෙමි දණ්ඩං අනුකම්ප යොනිසො.
1179. සිරී ච ලක්ඛී ච{10} තමෙව ඛත්තිය ජනාධිප මා විජහි කුදාචනං, අක්කොධනො නිච්චපසන්නචිත්තො අනීඝො{11} තුවං වසස්සතානි පාලය.
1180. ගුණෙහි එතෙහි උපෙත ඛත්තිය ඨිතමරියවත්ති සුවචො අකොධනො, සුඛී අනුප්පීළ{12} පසාස මෙදිනිං ඉතො විමුත්තොපි ච යාහි සුග්ගතිං.
1181. එවං සුනීතෙන සුභාසිතෙන ධම්මෙන ඤායෙන උපායසො නයං, නිබ්බාපයෙ සංඛුහිතං මහාජනං. මහාව මෙඝො සලිලෙන මෙදිනින්ති.
4. සුමඞ්ගලජාතකං.
1182. අඞ්ගාරජාතා පඨවී කුක්කුලානුගතා මහී, අථ ගායසි වත්තානි න තං තපති ආතපො.
1183. උද්ධං තපති ආදිච්චො අධො තපති වාලුකා{1}, අථ ගායසි වත්තානි න තං තපති ආතපො.
1184. න මං තපති ආතපො ආතප්පා{2} තපයන්ති මං. අත්ථා හි විවිධා රාජ තෙ තපන්ති ආතපො.
1185. අද්දසං කාම තෙ මූලං සඞ්කප්පා කාම ජායසි, න තං සඞ්කප්පයිස්සාමි එවං කාම න හොහිසි{3}.
1186. අප්පාපි කාමා න අලං බහූහිපි න තප්පති, අහහා බාලලපනා{4} පටිවිජ්ඣෙථ ජග්ගතො.
1187. අප්පස්ස කම්මස්ස ඵලං මම යිදං උදයො අජ්ඣගමා{5} මහත්තපත්තං, සුලද්ධලාභා වත මාණවස්ස යො පබ්බජි කාමරාගං පහාය.
1188. තපසා පජහන්ති පාපකම්මං තපසා නහාපිතකුම්භකාරභාවං, තපසා අභිභුය්ය ගඞ්ගමාල නාමෙනාලපසජ්ජ බ්රහ්මදත්තං.
1189. සන්දිට්ඨිකමෙච{1} පස්සථ ඛන්ති සොරච්චස්ස අයං විපාකො, යො සබ්බජනස්ස වන්දිතො තං වන්දාම සරාජිකා සමච්චා.
1190. මා කිඤ්චි අවචුත්ථ{2} ගඞ්ගමාලං මුනිං{3} මොනපථෙසු සික්ඛමානං, එසො හි අතරි අණ්ණවං යං තරිත්වා විචරන්ති වීතසොකා’ති.
5. ගඞ්ගමාලජාතකං.
1191. ධම්මො හවෙ හතො හන්ති නාහතො හන්ති කිඤ්චනං, තස්මා හි ධම්මං න හනෙ මා{4} තං ධම්මො හතො භනි.
1192. අලිකං භාසමානස්ස අපක්කමන්ති දෙවතා, පූතිකඤ්ච මුඛං වාති සකට්ඨානා ච ධංසති. යො ජානං පුච්ඡිතො පඤ්හං අඤ්ඤථා නං වියාකරෙ.
1193. සචෙ හි සච්චං භණසි හොහි රාජ යථා පුරෙ, මුසා චෙ භාසසෙ රාජ භූමියං තිට්ඨ චෙතිය.
1194. අකාලෙ වස්සති තස්ස කාලෙ තස්ස න වස්සති, යො ජානං පුච්ඡිතො පඤ්චං අඤ්ඤථා නං වියාකරෙ.
1195. සචෙ හි සච්චං භණසි හොහි රාජ යථා පුරෙ, මුසා චෙ භාසසෙ රාජ භූමිං පවිස චෙතිය.
1196. ජිව්හා තස්ස ද්විධා හොති උරගස්සෙව දිසම්පති, යො ජානං පුච්ඡිතො පඤ්හං අඤ්ඤථා නං වියාකරෙ.
1197. සචෙ හි සච්චං භණසි හොහි රාජ යථා පුරෙ, මුසා චෙ භාසසෙ රාජ භිය්යො පවිස චෙතිය.
1198. ජිව්හා තස්ස න භවති මච්ඡස්සෙව දිසම්පති, යො ජානං පුච්ඡිතො පඤ්හං අඤ්ඤථා නං වියාකරෙ.
1199. සචෙ හි සච්චං භණසි හොහි රාජ යථාපුරෙ, මුසා චෙ භාසසෙ රාජ භිය්යො පවිස චෙතිය.
1200. ථියොව{1} තස්ස ජායන්ති න පුමා ජායරෙ කුලෙ, යො ජානං පුච්ඡිතො පඤ්හං අඤ්ඤථා නං වියාකරෙ.
1201. සචෙ හි සච්චං භණසි හොහි රාජ යථා පුරෙ, මුසා චෙ භාසසෙ රාජ භිය්යො පවිස චෙතිය.
1202. පුත්තා තස්ස න භවන්ති පක්කමන්ති දිසොදිසං, යො ජානං පුච්ඡිතො පඤ්හං අඤ්ඤථා නං වියාකරෙ.
1203. සචෙහි සච්චං භණසි හොහි රාජ යථා පුරෙ, මුසා චෙ භාසසෙ රාජ භිය්යො පවිස චෙතිය.
1204. සරාජා ඉසිනා සත්තො{2} අන්තලික්ඛෙ{3} චරො පුරෙ, පාවෙක්ඛී පඨවිං චෙච්චො{4} හීනත්තො අත්තපරියායං.
1205. තස්මාහි ඡන්දාගමනං නප්පසංසන්ති පණ්ඩිතා, අදුට්ඨචිත්තො භාසෙය්ය ගිරං සච්චුපසංහිත’න්ති.
6. චෙතියජාතකං.
1206. යො ඉන්ද්රියානං කාමෙන වසා නාරද ගච්ඡති, සො පරිච්චජ්ජුහො ලොකෙ ජීවන්තොව විසුසස්ති.
1207. සුඛස්සානන්තරං දුක්ඛං දුක්ඛස්සානන්තරං සුඛං, සොසි{5} පත්තො සුඛා දුක්ඛං පාටිකඞ්ඛ වරං සුඛං.
1208. කිච්ඡකාලෙ කිච්ඡිසහො යො කිච්ඡං නානුවත්තති. ස කිච්ඡන්තං සුඛං ධීරො යොගං සමධිගච්ඡති.
1209. නහෙව කාමාන කාමා නානත්ථා නත්ථකාරණා, න{6} කතඤ්ච නිරඞ්කත්වා ධම්මා චවිතුමරහසි.
1210. දුක්ඛං ගහපතිං සාධු{1} සංවිභජ්ජඤ්ච{2} භොජනං, අභාසො අත්ථලාභෙසු අත්ථබ්යාපත්ති අබ්යථො{3}.
1211. එත්තාව තෙසං{4} පණ්ඩිච්චං අසිතො දෙවලො බ්රවි, නයිතො{5} කිඤ්චි පාපියො ඉන්ද්රියානං වසං වජෙ.
1212. අමිත්තානංව හත්ථත්ථං සිව පප්පොති මාමිව, කම්මං විජ්ජඤ්ච දක්ඛෙය්යං විවාහං සීලමද්දවං.
1213. එතෙ ච යසෙ හාපෙත්වා නිබ්බත්තො{6} සෙහි කම්මෙහි, සොහං සහස්ස ජීනොව අබන්ධූ අපරායණො. අරියධම්මා අතික්කන්තො{7} යථා පෙතො තථෙවහං.
1214. සුඛකාමෙ දුක්ඛාපෙත්වා ආපන්නොස්මි පදං ඉමං, සො සුඛං නාධිගච්ඡාමි චිතො භානුමතාමිවා{8}ති.
7. ඉන්ද්රියජාතකං.
1215. ආදිත්තස්මිං අගාරස්මිං යං නීහරති භාජනං, තං තස්ස හොති අත්ථාය නො ච යං තත්ථ ඩය්හති.
1216. එවමාදිපිතො ලොකො ජරාය මරණෙන ච, නීහරෙථෙව දානෙන දින්නං හොති සුනීහතං
1217. යො ධම්මලද්ධස්ස දදාති දානං උට්ඨානවිරියාධිගතස්ස ජන්තුනො{9}, අතික්කම්ම සො වෙතරණිං යමස්ස දිබ්බානි ඨානානි උපෙති මච්චො.
1218. දානඤ්ච යුද්ධඤ්ච සමානමාහු අප්පාපි සන්තා බහුකෙ ජිනන්ති, අප්පම්පි චෙ සද්දහානො දදාති තෙනෙව සො හොති සුඛී පරත්ථ.
1219. විචෙය්යදානං සුගතප්පසත්ථං{1} යෙ දක්ඛිණෙය්යා ඉධ ජීවලොකෙ එතෙසු දින්නානි මහප්ඵලානි බීජානි වුත්තානි යථා සුඛෙත්තෙ.
1220. යො පාණභූතානි අහෙඨයං චරං පරූපවාදා න කරොති පාපං, භීරුං පසංසන්ති න හි තත්ථ සූරං භයා හි සන්තො න කරොන්ති{2} පාපං.
1221. හීනෙන බ්රහ්මචරියෙන ඛත්තියං උපපජ්ජති, මජ්ඣිමෙන ච දෙවත්තං උත්තමෙන විසුජ්ඣති
1222. අද්ධාහි දානං බහුධා පසත්ථං{3} දානා ච ඛො ධම්මපදං ච සෙය්යො, පුබ්බෙවහි පුබ්බතරෙ ච සන්තො නිබ්බානමෙවජ්ඣගමුං සපඤ්ඤාති.
8. ආදිත්තජාතකං.
1223. ගඞ්ගා කුමුදිනී සන්තා සඞ්ඛවණ්ණා ච කොකිලා, ජම්බු තාලඵලං දජ්ජා අථ නූන තදා සියා.
1224. යදා කච්ඡපලොමානං පාවාරො තිවිධො සියා, හෙමන්තිකං පාපුරණං අථ නූන තදා සියා.
1225. යදා මකසදාඨානං අට්ටාලො සුකතො සියා, දළ්හො ච අප්පකම්පි ච අථ නූන තදා සියා.
1226. යදා සසවිසාණානං නිස්සෙණී සුකතා සියා, සග්ගස්සා රොහණත්ථා අථ නූන තදා සියා.
1227. යදා සිස්සෙණිමාරුය්හ චන්දං ඛාදෙය්යුං මූසිකා, රාහුඤ්ච පරිපාතෙය්යුං අථ නූන තදා සියා.
1228. යදා සුරාඝටං පීත්වා මක්ඛිකා ගණචාරිනී, අඞ්ගාරෙ වාසං කප්පෙය්යුං අථ නූන තදා සියා.
1229. යදා බිම්බොට්ඨසම්පන්නො ගද්රභො සුමුඛො සියා, කුසලො නච්චගීතස්ස අථ නූන තදා සියා.
1230. යදා කාකා උලූකා{1} ච මන්තයෙය්යුං රහොගතා, අඤ්ඤමඤ්ඤං පිහයෙය්යුං{2} අථ නූන තදා සියා.
1231. යදා පුලස පත්තානං{3} ඡත්තං ථීරතරං සියා, වස්සස්ස පටිඝාතාය අථ නූන තදා සියා.
1232. යදා කුළුඞ්කො{4} සකුණො පබ්බතං ගන්ධමාදනං, තුණ්ඩෙනාදාය ගච්ඡෙය්ය අථ නූන තදා සියා.
1233. යදා සාමුද්දිකං නාවං සයන්තං සවටාකරං{5}, චෙටො ආදාය ගච්ඡෙය්ය අථ නූන තදා සියාති.
9. අට්ඨානජාතකං.
1234. ඛමනීයං යාපනීයං කච්චි මාතුල තෙ සුඛං, සුඛං තෙ අම්මා අවච සුඛකාමා හි තෙ මයං.
1235. නඞ්ගුට්ඨං මෙ අවක්කම්ම{6} හෙඨයිත්වාන{7} එළිකෙ, සාජ්ජ මාතුලවාදෙන මුඤ්චිතබ්බා නු මඤ්ඤසි.
1236. පුරත්ථාමුඛො නිසින්නොසි අහං තං{8} මුඛමාගතා, පච්ඡිතො තුය්හ නඞ්ගුට්ඨං කථං ඛොහං අවක්කමිං{9}.
1237. යාවතා චතුරො දීපා සසමුද්දා සපබ්බතා, තාවතා මය්හ නඞ්ගුට්ඨං කථං ඛො ත්වං විවජ්ජයි.
1238. පුබ්බෙවමෙතං අක්ඛංසු{1} මාතාපිතා ච භාතරො, දීඝං දුට්ඨස්ස නඞ්ගුට්ඨං සම්හි{2} වෙහාසයාගතා{3}.
1239. තඤ්ච දිස්වාන ආයන්තිං අන්තලික්ඛස්මිං ඵළිකෙ{4}, මිගසඞ්ඝො පලායිත්ථ භක්ඛො මෙ නාසිතො තයා.
1240. ඉච්චෙව විලපන්තියා එළිකියා රුහංඝසො, ගලකං අන්වාවමද්දි නත්ථි දුට්ඨෙ සුභාසිතං.
1241. නෙව දුට්ඨෙ නයො අත්ථි න ධම්මො න සුභාසිතං, නික්කමං දුට්ඨෙ යුජ්ජෙථ{5} සො ච සබ්භි න රජ්ජතීති.
10. දීපිජාතකං.
කච්චානිවග්ගො පඨමො.
තස්සුද්දානං:
පරිසුද්ධාමනාවිලාවත්ථධරා බකරාජස්ස කායුරං දණ්ඨාවරො, අථඅඞ්ගාරචෙතියදෙවිලින අථ ආදිත්තගඞ්කාදසෙළකිනාති.
අට්ඨකනිපාතං නිට්ඨිතං.
9. නවකනිපාතො
1242. පරිසඞ්කුපථො නාම ගිජ්ඣපන්ථො සනන්තනො, තත්රාසි මාතාපිතරො ගිජ්ඣො පොසෙසි ජිණ්ණකෙ.
1243. තෙසං අජගරං මෙදං අච්චහාසි පහූතසො{1}, පිතා ච පුත්තං අවච ජානං උච්චං{2}පපාතිනං සුපත්තං පක්ඛ{3}සම්පන්නං තෙජස්සිං{4} දූරගාමිනං.
1244. පරිප්ලවන්තං{5} පඨවිං යදා තාත විජානහි{6}, සාගරෙන පරික්ඛිත්තං චක්කංව පරිමණ්ඩලං. තතො තාත නිවත්තස්සු මාස්සු එත්තො පරං ගමී.
1245. උද්ධං පත්තොස{7} වෙගෙන බලී පක්ඛී දිජුත්තමො, ඔලොකයන්තො වක්කඞ්ගො පබ්බතානි වනානි ච.
1246. අද්දසා{8} පඨවිං ගිජ්ඣො යථා සාසි{9} පිතුස්සුතං,{10} සාගරෙන පරික්ඛිත්තං චක්කංව පරිමණ්ඩලං.
1247. තඤ්ච සො සමතික්කම්ම පරමෙව පවත්තථ, තඤ්ච වාතසිඛා තික්ඛා අච්චහාසි බලිං දිජං.
1248. නාසක්ඛාතිගතො පොසො පුනරෙව{11} නිවත්තිතුං, දිජො ව්යසනමාපාදි වෙරම්බානං වසං ගතො.
1249. තස්ස පුත්තා ච දාරා ච යෙ චඤ්ඤෙ අනුජීවිනො, සබ්බෙ ව්යසනමාපාදුං අනොවාදකරෙ දිජෙ.
1250. එවම්පි ඉධ වද්ධානං{12} යො වාක්යං නාවබුජ්ඣති, අතීසීමචරො දිත්තො ගිජ්ඣොවාතීතසාසනො ස චෙ{13} ව්යසනං පප්පොති{14} අකත්වා වුද්ධසාසනන්ති.
1. ගිජ්ඣජාතකං.
1251. පුථුසද්දො සමජනො න බාලො කොචි මඤ්ඤථ, සඞ්ඝස්මිං භිජ්ජමානස්මිං නාඤ්ඤං භිය්යො අමඤ්ඤරුං.
1252. පරිමුට්ඨා පණ්ඩිතාභාසා වාචා ගොචරභාණිනො, යාවිච්ඡන්ති මුඛායාමං යෙන නීතා න තං විදූ.
1253. අක්කොච්ඡි මං අවධි මං අජිනි මං අහාසි මෙ, යෙ තං උපනය්හන්ති වෙරං තෙසං න සම්මති.
1254. අක්කොච්ඡි මං අවධි මං අජිනි මං අහාසි මෙ, යෙ තං න උපනය්හන්ති{1} වෙරං තෙසූපසම්මති.
1255. නහි වෙරෙන වෙරානි සම්මන්තීධ කුදාචනං. අවෙරෙන ච සම්මන්ති එසධම්මො සනන්තනො.
1256. පරෙ ච න විජානන්ති මයමෙත්ථ යමාමසෙ, යෙ ච තත්ථ විජානන්ති තතො තතො සම්මන්ති මෙධගා.
1257. අට්ඨිච්ඡින්නා පාණහාරා ගවාස්ස ධනහාරිනො, රට්ඨං විලුම්පමානානං තෙසම්පි හොති සඞ්ගති කස්මා තුම්හාක නො සියා.
1258. සචෙ ලභෙථ නිපකං සහායං සද්ධිං චරං සාධු විහාරි ධීරං, අභිභුය්ය සබ්බානි පරිස්සයානි චරෙය්ය තෙනත්තමනො සතීමා.
1259. නො චෙ ලභෙථ නිපකං සහායං සද්ධිං චරං සාධු විහාරි ධීරං, රාජාව රට්ඨං විජිතං පහාය එකො චරෙ මාතඞ්ගරඤ්ඤෙව නාගො.
1260. එකස්ස චරිතං සෙය්යො නත්ථි බාලෙ සහායතා, එකො චරෙ නව පාපානි කයිරා අප්පොස්සුක්කො මාතඞ්ගරඤ්ඤෙව නාගොති.
2. කොසම්බජාතකං.
1261. දුමො යදා හොති ඵලූපපන්නො භුඤ්ජන්ති තං විහගා{1} සම්පතන්තා, ඛීණන්ති ඤත්වාන දුමං ඵලච්චයෙ දිසොදිසං යන්ති තතො විහඞ්ගමා.
1262. චර චාරිකං ලොහිතතුණ්ඩ මාචරි කිං ත්වං සුව සුක්ඛදුමම්හි ඣායසි, තදිඞ්ඝ මං බ්රූහි{2} වසන්තසන්නිභ කස්මා සුව සුක්ඛදුමං න රිඤ්චසි.
1263. යෙ වෙ සඛීනං සඛාරො භවන්ති පාණච්චයෙ{3} සුඛදුක්ඛෙසු හංස, ඛීණං අඛීණන්ති න තං ජහන්ති, සන්තො සතං ධම්මමනුස්සරන්තා.