1095. මතං මරිස්සං රොදන්ති යෙ රුදන්ති ලපන්ති ච, තස්මා ත්වං ඉසි මාරොදි රොදිතං මොඝමාසු සන්තො.
1096. කන්දිතෙන හවෙ බ්රහ්මෙ මතො පෙතො සමුට්ඨහෙ, සබ්බෙ සඞ්ගම්ම රොදාමි අඤ්ඤමඤ්ඤස්ස ඤාතකෙ.
1097. ආදිත්තං වත මං සන්තං ඝතසිත්තංව පාවකං, වාරිනා විය ඔසිඤ්චං සබ්බං නිබ්බාපයෙ දරං.
1098. අබ්බහී වත මෙ සල්ලං සොකං හදයනිස්සිතං, යො මෙ සොකපරෙතස්ස පුත්තසොකං අපානුදි.
1099. සොහං අබ්බූළ්හසල්ලොස්මි වීතසොකො අනාවිලො, න සොචාමි න රොදාමි තව සුත්වාන වාසවා’ති.
5. සොමදත්තජාතකං.
1100. කාළානි කෙසානි පුරෙ අහෙසුං ජාතානි සීසම්භි යථාපදෙසෙ, තානජ්ජ සෙතානි සුසීම දිස්වා ධම්මං චර බ්රහ්මචරියස්ස කාලො.
1101. මමෙව දෙව පලිතං න තුය්හං මමෙව සීසං මම උත්තමඞ්ගං, අත්ථං කරිස්සන්ති මුසා අභාණිං{1} එකාපරාධං ඛම රාජසෙට්ඨ.
1102. දහරො තුවං දස්සනීයොසි රාජ පඨමුග්ගතො හොහි යථා කළීරො, රජ්ජඤ්ච කාරෙහි මමං ච පස්ස මා කාලිකං අනුධාවී ජිනින්ද.
1103. පස්සාමි වොහං දහරිං කුමාරිං සාමට්ඨපස්සං සුතනුං සුමජ්ඣං, කාළාපවාළාව{2} පවෙල්ලමානා පලොභයන්තීව නරෙසු ගච්ඡති.
1104. තමෙන පස්සාමි පරෙන නාරිං අසීතිකං නාවුතිකංව ජච්චා, දණ්ඩං ගහෙත්වාන පවෙධමානං ගොපාණසීභොග්ගසමං චරන්තිං.
1105. සොහං තමෙවානුවිචින්තයන්තො එකො සයාමි සයනස්ස මජ්ඣෙ, අහම්පි එවං ඉති පෙක්ඛමානො න ගෙහෙ රමෙ බ්රහ්මචරියස්ස කාලො.
1106. රජ්ජුවාලම්බනී චෙසා යා ගෙහෙ වසතො රති, එතම්පි ඡෙත්වාන වජන්ති ධීරා අනපෙක්ඛිනො කාමසුඛං පහායා’ති.
6. සුසීමජාතකං.
1107. අහං දසසතං ව්යාමං උරගමාදාය මාගතො, තඤ්ච මඤ්ච මහාකායං ධාරයං නප්පවෙධසි.
1108. අථ ඉමං ඛුද්දකං පක්ඛිං අප්පමංසතරං මයා, ධාරයං ව්යාධසෙ හිතො කමත්ථං කොටිසිම්බලි.
1109. මංසභක්ඛො තුවං රාජ බලභක්ඛො අයං දිජො, අයං නිග්රොධ බීජානි පිලක්ඛදුම්බරානි ච අස්සත්ථානි ච භක්ඛෙත්වා ඛන්ධෙ මෙ ඔදහිස්සති.
1110. තෙ රුක්ඛා සංවිරූහන්ති මම පස්සෙ නිවාතජා, තෙ පරියොනනධිස්සන්ති අරුක්ඛං මං කරිස්සරෙ.
1111. සන්ති අඤ්ඤෙපි රුක්ඛාසෙ මූලිනො ඛන්ධිනො දුමා, ඉමිනා සකුණජාතෙන බීජමාහරිත්වා හතා.
1112. අජ්ඣාරූළ්හාභිවඩ්ඪන්ති{1} බ්රහන්නම්පි වනස්පතිං,{2} තස්මා රාජ පවෙධාමි සම්පස්සං නාගතං භයං.
1113. සඞ්කය්යෙ සඞ්කිතබ්බානි රක්ඛෙය්යානාගතං භයං. අනාගතභයා ධීරො උභො ලොකෙ අවෙක්ඛතීති.
7. කොටිසිම්බලිජාතකං.
1114. රාජා අපුච්ඡි{3} විධුරං ධම්මකාමො යුධිට්ඨිලො, අපි බ්රාහ්මණ ජානාසි කො එකො බහු සොචති.
1115. බ්රාහ්මණො අජයූථෙන බහූතෙධො{4} වනෙ වසං, ධූමං අකාසි වාසෙට්ඨො{5} රත්තින්දිවමතන්දිතො.
1116. තස්ස තං ධූමගන්ධෙන සරභා මකසද්දිතා,{6} වස්සාවාසං උපගඤ්ඡුං ධූමකාරිස්ස සන්තිකෙ.
1117. සරභෙසු මනං කත්වා අජායො නාවබුජ්ඣථ, ආගච්ඡන්තී වජන්තී වා තස්ස තා විනස්සුං අජා.
1118. සරභා ච සරදෙ කාලෙ පහීනමකසෙ වනෙ, පාවිසුං ගිරිදුග්ගානි නදීනං පභවානි ච.
1119. සරභෙ ච ගතෙ දිස්වා අජා ච විභවං ගතා, කිසො ච විවණ්ණො ආසි පණ්ඩුරොගී ච බ්රාහ්මණො.
1120. එවං යො සංනිරංකත්වා ආගන්තුං කුරුතෙ පියං, සො එකො බහු සොචති ධූමකාරීව බ්රාහ්මණොති.
8. ධූමකාරිජාතකං.
1121. කොධ ජාගරතං සුත්තො කොධො සුත්තෙසු ජාගරො, කො මමෙතං{1} විජානාති කො තං පටිභණාති මෙ.
1122. අහං ජාගරතං සුත්තො අහං සුත්තෙසු ජාගරො, අහමෙතං විජානාමි අහං පටිභණාමි තෙ.
1123. කථං ජාගරතං සුත්තො කථං සුත්තෙසු ජාගරො, කථං එතං විජානාසි කථං පටිභණාසි මෙ.
1124. යෙ ධම්මං නප්පජානන්ති සංයමොති දමොති ච, තෙසු සුප්පමානෙසු අහං ජග්ගාමි දෙවතෙ.
1125. යෙසං රාගො ච දොසො ච අවිජ්ජා ච විරාජිතා, තෙසු ජාගරමානෙසු අහං සුත්තොස්මි දෙවතෙ.
1126. එවං ජාගරතං සුත්තො එවං සුත්තෙසු ජාගරො, එවමෙතං විජානාසි එවං පටිභණාමි තෙ.
1127. සාධු ජාගරතං සුත්තො සාධු සුත්තෙසු ජාගරො, සාධු මෙතං විජානාසි සාධු පටිභණාසි මෙති.
9. ජාගරජාතකං.
1128. න කිරත්ථි අනොමදස්සිසු පාරිචරියා බුද්ධෙසු අප්පිකා{1}, සුක්ඛාය අලොණිකාය ච පස්ස ඵලං කුම්මාසපිණ්ඩියා.
1129. හත්ථිගවාස්සා ච මෙ{2} බහූ ධනධඤ්ඤං පඨවී ච කෙවලා, නාරියො චිමා අච්ඡරූපමා පස්ස ඵලං කුම්මාසපිණ්ඩියා.
1130. අභික්ඛණං රාජකුඤ්ජර ගාථා භාසසී කොසලාධිප, පුච්ඡාමි තං රට්ඨවඩ්ඪන බාළ්හං පීතිමනො පභාසසි.
1131. ඉමස්මිං යෙව නගරෙ කුලෙ අඤ්ඤතරෙ අහුං, පරකම්මකාරො ආසිං භතකො සීලසංවුතො.
1132. කම්මාය නික්ඛමන්තාහං චතුරො සමණෙ අද්දසං. ආචාරසීලසම්පන්නෙ සීතීභූතෙ අනාසවෙ.
1133. තෙසු චිත්තං පසාදෙත්වා නිසීදෙත්වා පණ්ණසන්ථතෙ, අදාසිං බුද්ධානං කුම්මාසං පසන්නො සෙහි පාණිහි.
1134. තස්ස කම්මස්ස කුසලස්ස ඉදං මෙ එදිසං{3} ඵලං, අනුභොමි ඉදං රජ්ජං ඵීතං ධරණිමුත්තමං.
1135. දද භුඤ්ජ ච මා ච පමාදො{4} චක්කං වත්තය කොසලාධිප, මා රාජ අධම්මිකො අහූ ධම්මං පාලය කොසලාධිප.
1136. සොහං තදෙව පුනප්පුනං වටුමං ආචරිස්සාමි සොභනෙ, අරියාචරිතං සුකොසලෙ අරහන්තො මෙ මනාපා පස්සිතුං.
1137. දෙවී වියච්ඡරූපමා මජ්ඣෙ නාරිගණස්ස සොභසි, කිං කම්මමකාසි භද්දකං තෙනාසි වණ්ණවතී සුකොසලෙ.
1138. අම්බට්ඨකුලස්ස ඛත්තිය දාස්යාහං පරපෙස්සියා අහුං, සඤ්ඤතා ධම්මජිවිනී සීලවතී ච අපාපදස්සනා.
1139. උද්ධටභත්තං අහං තදා චරමානස්ස අදාසිං භික්ඛුනො, විත්තා සුමනා සයං අහං තස්ස කම්මස්ස ඵලං මමෙදිස’න්ති.
10. කුම්මාසපිණ්ඩජාතකං.
1140. ආගගමිස්සති මෙ පාපං ආගමිස්සති මෙ භයං, තදා හි චලිතා සාඛා මනුස්සෙන මිගෙන වා.
1141. භීරුයා නූන මෙ කාමෙ අවිදූරෙ වසන්තියා, කරිස්සති කිසං පණ්ඩුං සාව සාඛා පරන්තපං.
1142. සොචයිස්සති මං කන්තා ගාමෙ වසමනින්දිතා, කරිස්සති කිසං පණ්ඩුං සාව සාඛා පරන්තපං.
1143. තයා මං හසිතාපඞ්ගි{1} මිහිතානි{2} භණිතානි ච, කිසං පණ්ඩුං කරිස්සන්ති සාව සාඛා පරන්තපං.
1144. ආගමා නූන සො සද්දො අසංසි නූන සො තව, අක්ඛාතං නූන තං තෙන යොතං සාඛමකම්පයී.
1145. ඉදං ඛො ත්වං සමාගම්ම මම බාලස්ස චින්තිතං, තදාහි චලිතා සාඛා මනුස්සෙන මිගෙන වා.
1146. තථෙව ත්වං අවෙදෙසි අවඤ්චි පිතරං මම, හන්ත්වා සාඛාහි ඡාදෙන්තො ආගමිස්සති මෙ භය’න්ති.
11. පරන්තපජාතකං.
ගන්ධාරවග්ගො දුතියො
තස්සුද්දානං:
වරගාම මහාකපි භග්ගව ච දළ්හධම්ම සකුඤ්ජර කෙසවරො, උරගො විධුරො පුන ජාගරතා අථ කොසලාධිප පරන්තපෙන ච.
සත්තකනිපාතං නිට්ඨිතං.
තත්ර වග්ගුද්දානං:
අථ සන්ත නිපාතම්හි වග්ගං මෙ භණතො සුණ, කුක්කු ච පුන ගන්ධාරො ද්වෙ ව මුත්තා මහෙසිනා.
8. අට්ඨකනිපාතො
1147. ඔදාතවත්ථා සුචි අල්ලකෙසා කච්චානි කිං කුම්භිමධිස්සයිත්වා, පිට්ඨා තිලා ධොවසි තණ්ඩුලානි තිලොදනො හොහිති{1} කිස්ස හෙතු.
1148. න ඛො අයං බ්රාහ්මණ භොජනත්ථා තිලොදනො හොහිති සාධුපඤ්ඤා, ධම්මො මතො තස්ස බහූතමජ්ජ{2} අහං කරිස්සාමි සුසානමජ්ඣෙ.
1149. අනුවිච්ච කච්චානි කරොහි කිච්චං ධම්මො මතො කොනු තවෙතසංසී, සහස්සනෙත්තො අතුලානුභාවො න මීයති{3} ධම්මවරො කදාචි.
1150. දළ්හප්පමාණං{4} මම එත්ථ බ්රහ්මෙ ධම්මො මතො නත්ථි මමෙත්ථ කඞ්ඛා, යෙ යෙවදානි පාපා භවන්ති තෙ තෙවදානි සුඛිතා භවන්ති.
1151. සුණිසා හි මය්හං වඤ්ඣා අහොසි සා මං වධිත්වාන විජායි පුත්තං, සාදානි සබ්බස්ස කුලස්ස ඉස්සරා අහං පනම්භී අපවිද්ධා එකිකා.
1152. ජීවාමි වොහං නාහං මතොස්මි{5} තවෙව අත්ථාය ඉධාගතොස්මි, යා තං වධිත්වාන විජායි පුත්තං සහාව පුත්තෙන කරොමි භස්මං.
1153. එතඤ්ච{6} තෙ රුච්චති දෙවරාජ මමෙව අත්ථාය ඉධාගතොසි, අහඤ්ච පුත්තො සුණිසා ච නත්තා සම්මොදමානා ඝරමාවසෙම.
1154. එතඤ්ච තෙ රුච්චති කාතියානි හතාපි සන්තා න ජහාසි ධම්මං, තුවඤ්ච පුත්තො සුණිසා ච නත්තා සම්මොදමානා ඝරමාවසෙථ.
1155. සා කාතියානී සුණිසාය සද්ධිං සම්මොදමානා ඝරමාවසිත්වා, සුත්තො ච නත්තා ච උපට්ඨහිංසු දෙවානමින්දෙන අධිග්ගහීතා’ති.
1. කච්චානිජාතකං.
1156. ඉදං පුරෙ නින්නමාහු බහුමච්ඡං මහොදිකං{1}, ආවාසො බකරාජස්ස පෙත්තිකං භවනං මම ත්යජ්ජ භෙකෙන{2} යාපෙම ඔකං{3} න විජභාමසෙ.
1157. කො දුතියං අසීඅලස්ස{4} බන්ධුරස්සක්ඛි{5} භෙජ්ජති, කො මෙ පුත්තෙ කුලාවකං මඤ්ච සොත්ථිං කරිස්සති.
1158. සබ්බා පරික්ඛතා ඵෙග්ගු යාව තස්සා ගතී අහු, ඛීණභක්ඛො මහාරාජ සාරෙ න රමතී ඝුණො.
1159. සා නූනාහං ඉතො ගන්ත්වා රඤ්ඤො මුත්තා නිවෙසනා, අත්තානං රමයිස්සාමි දූමසාඛානිකෙතිනී.
1160. සො නූනාහං ඉතො ගන්ත්වා රඤ්ඤො මුත්තො නිවෙසනා, අග්ගො දකානි පිවිස්සාමි{6} යූථස්ස පුරතො වජං.
1161. තං මං කාමෙහි සම්පන්නං රත්තං කාමෙසු මුච්ඡිතං ආනයී හරතො{7} ලුද්දො බාහිකො භද්දමත්ථු තෙ
1162. අන්ධකාරතිමිසායං තුඞ්ගෙ උපරිපබ්බතෙ, සා මං සණ්හෙන මුදුනා මා පාදං ඛණියස්මනි.
1163. අසංසයං ජාතිඛයන්තදස්සී න ගබ්භසෙය්යං පුනරාවජිස්සං, අයං හි මෙ අන්තිමා ගබ්භසෙය්යා ඛීණො මෙ සංසාරො පුනබ්භවායා’ති.
2. අට්ඨසද්දජාතකං.
1164. ඉදං සුවණ්ණකායූරං මුත්තා වෙළුරියා බහූ, සබ්බං හරස්සු භද්දන්තෙ මඤ්ච දාසීති සාවය.
1165. ඔරොපයස්සු කල්යාණි මා{1} බහුං පරිදෙවසි, න චාහං අභිජානාමි අහන්ත්වා{2} ධනමාභතං.
1166. යතො සරාමි අත්තානං යතො පත්තොස්මි විඤ්ඤුතං, න චාහං{3} අභිජානාමි අඤ්ඤං පියතරං තයා.
1167. එහි තං උපගූහිස්සං{4} කරිස්සඤ්ච පදක්ඛිණං, න හි දානි පුනා අත්ථි මම තුය්හඤ්ච සඞ්ගමො.
1168. න හි සබ්බෙසු ඨානෙසු පුරිසො හොති පණ්ඩිතො, ඉත්ථිපි පණ්ඩිතා හොති තත්ථ තත්ථ විචක්ඛණා.
1169. න හි සබ්බෙසු ඨානෙසු පුරිසො හොති පණ්ඩිතො, ඉත්ථිපි පණ්ඩිතා හොති ලහුමත්ථවිචින්තිකා.
1170. ලහුඤ්ච වත ඛිප්පඤ්ච නිකට්ඨෙ සමචෙතයි, මිගං පුණ්ණාය තෙනෙවං සුලසා සත්තුකං වධි.
1171. යොධ උප්පතිතං අත්ථං න ඛිප්පමනුබුජ්ඣති, සො හඤ්ඤති මන්දමතී චොරොව ගිරිගබ්භරෙ.
1172. යො ච උප්පතිතං අත්ථං ඛිප්පමෙව නිබොධති, මුච්චතෙ{5} සත්තු සම්බාධා සුලසා සත්තුකාමිවාති.
3. සුලසාජාතකං.
1173. භුස හි{6} කුද්ධොති අවෙක්ඛියාන න තාවදණ්ඩං පණයෙය්ය ඉස්සරො, අට්ඨානසො අප්පතිරූපමත්තනො{7} පරස්ස දුක්ඛානි භුසං උදීරයෙ.
1174. යතොච ජානෙය්ය පසාදමත්තනො අත්ථං නියුඤ්ජෙය්ය පරස්ස දුක්කතං,{1} තදායමත්ථොති සයං අවෙක්ඛිය අථස්ස දණ්ඩං සදිසං නිවෙසයෙ.
1175. න චාපි ඣාපෙති පරං න අත්තනං{2} අමුච්ඡිතො යො නයතෙ නයානයං, යො දණ්ඩධාරො භවතීධ ඉස්සරො සවණ්ණගුත්තො සිරියා න ධංසති.
1176. යො ඛත්තියා සෙ{3} අනිසම්මකාරිනො පණෙන්ති දණ්ඩං සහසා පමුච්ඡිතා{4}, අවණ්ණසංයුත්තා{5} ජහන්ති ජීවිතං ඉතො විමුත්තාපි ච යන්ති දුග්ගතිං
1177. ධම්මෙ ච යෙ අරියපවෙදිතෙ{6} රතා අනුත්තරා තෙ වචසා මනසා කම්මනා ච{7}, තෙ සන්තිසොරච්චසමාධිසණ්ඨිතා වජන්ති ලොකං දුභයං තථාවිධා.