1010. කිං ගිජ්ඣ පරිදෙවසි{7} කානු තෙ පරිදෙවනා, න මෙ සුතො වා දිට්ඨො{8} වා භාසන්තො මානුසිං දිජො.
1011. භරාමි මාතාපිතරො මුද්ධෙ{9} ගිරිදරීසයෙ, තෙ කථන්නු කරිස්සන්ති අහං වසං ගතො තව.
1012. යන්නු ගිජ්ඣො යොජනසතං කුණපානි අවෙක්ඛති, කස්මා ජාලඤ්ච පාසඤ්ච ආසජ්ජාපි න බුජ්ඣසි.
1013. යදා පරාභවො හොති පොසො ජීවිතසඞ්ඛයෙ, අථ ජාලඤ්ච පාසඤ්ච ආසජ්ජාපි න බුජ්ඣති.
1014. භරස්සු මාතාපිතරො වුද්ධෙ ගිරිදරීසයෙ, මයා ත්වං සමනුඤ්ඤාතො සොත්ථිං පස්සාහි ඤාතකෙ.
1015. එවං ලුද්දක නන්දස්සු සහසබ්බෙහි ඤාතිභි, භරිස්සං මාතාපිතරො වුද්ධෙ ගිරිදරීසයෙති.
4. ගිජ්ඣජාතකං.
1016. අනුතීරචාරි භද්දන්තෙ සහායමනුධාව මං, මහා මෙ ගහිතො{1} මච්ඡො සො මං හරති වෙගසා.
1017. ගම්භීරචාරි භද්දන්තෙ දළ්හං ගණ්හාහි ථාමසා, අහං තං උද්ධරිස්සාමි සුපණ්ණො උරගම්මිව.
1018. විවාදො නො සමුප්පන්නො දබ්භපුප්ඵ සුණොහි මෙ, සමෙහි මෙධගං{2} සම්ම විවාදො වූපසම්මතං.{3}
1019. ධම්මට්ඨොහං පුරෙ ආසිං බහු අට්ටං{4} මෙ තීරිතං, සමෙමි මෙධගං සම්මා{5} විවාදො උපසම්මතු.
1020. අනුතීරචාරි නඞ්ගුට්ඨං සීසං ගම්භීරචාරිනො, අථායං{6} මජ්ඣිමො ඛණ්ඩො ධම්මට්ඨස්ස භවිස්සති.
1021. චිරම්පි භක්ඛො අභවිස්ස සචෙ න විවදෙමසෙ, අසීසකං අනඞ්ගුට්ඨං සිගාලො හරති රොහති.
1022. යථාපි රාජා නන්දෙය්ය රජ්ජං ලද්ධාන ඛත්තියො, එවාහමජ්ජ නන්දාමි දිස්වා පුණ්ණමුඛං පතිං.
1023. කථන්නු ථලජො සන්තො උදකෙ මච්ඡං පරාමසි, පුට්ඨො මෙ සම්ම අක්ඛාහි කථං අධිගතං තයා.
1024. විවාදෙන කිසා හොන්ති විවාදෙන ධනක්ඛයා, ජීනා උද්දා විවාදෙන භුඤ්ජ මායාවි රොහිතං.
1025. එවමෙවං මනුස්සෙසු විවාදො යත්ථ ජායති, ධම්මට්ඨං පටිධාවන්ති සො හි නෙසං විනායකො ධනාපි තත්ථ ජීයන්ති රාජකොසො පවඩ්ඪතී’ති.
5. දබ්හපුප්ඵජාතකං.
1026. දසණ්ණකං තිඛිණධාරං අසිං සම්පන්නපායිනං, පරිසායං පුරිසො ගලති කිං දුක්කරතං තතො යදඤ්ඤං දුක්කරං ඨානං තං මෙ අක්ඛාහි පුච්ඡිතො.
1027. ගිලෙය්ය පුරිසො ලොභා අසිං සම්පන්නපායිනං, යො ච වජ්ජා දදාමිති තං දුක්කරතරං තතො සබ්බඤ්ඤං සුකරං ඨානං එවං ජානාහි මාගධ{1}.
1028. ව්යාකාසි ආයුරො පඤ්හං අත්ථධම්මස්ස කොවිදො, පුක්කුසං දානි පුච්ඡාමි කිං දුක්කරතරං තතො; යදඤ්ඤං දුක්කරං ඨානං තං මෙ අක්ඛාහි පුච්ඡිතො.
1029. න වාචමුපජීවන්ති අඵලං ගිරමුදීරිතං, යො ච දත්වා අවාකයිරා තං දුක්කරතරං තතො; සබ්බඤ්ඤං සුකරං ඨානං එවං ජානාහි මාගධ.
1030. ව්යාකාසි පුක්කුසො පඤ්හං අත්ථං ධම්මස්ස කොවිදො, සෙනකන්දානි පුච්ඡාමි කිං දුක්කරතරං තතො; යදඤ්ඤං දුක්කරං ඨානං තං මෙ අක්ඛාහි පුච්ඡිතො.
1031. දදෙය්ය පුරිසො දානං අප්පං වා යදි වා බහුං, යො ච දත්වා නානුතපෙ තං දුක්කරතරං තතො; සබ්බඤ්ඤං සුකරං ඨානං එවං ජානාහි මාගධ.
1032. ව්යාකාසි ආයුරො පඤ්හං අථො පුක්කුසපොරිසො, සබ්බෙ පඤ්හෙ අභිභොති{2} යථා භාසති සෙනකො’ති.
6. දසණ්ණකජාතකං.{*}
1033. විබ්භන්තචිත්තො කුපිතින්ද්රියොසි නෙත්තෙහි තෙ වාරිගණා සවන්ති, කිං තෙ නට්ඨං කිං පන පත්ථයානො ඉධාගමා බ්රාහ්මණ ඉඞ්ඝ බ්රූහි{3}.
1034. මීයෙථ භරියා වජතො මමජ්ජ අගච්ඡතො මරණං ආහ යක්ඛො, එතෙන දුක්ඛෙන පවෙධිතොස්මි අක්ඛාහි මෙ සෙනක එතමත්ථං.
1035. බහූනි ඨානානි විචින්තයිත්වා යමෙත්ථ වක්ඛාමි තදෙව සච්චං, මඤ්ඤාමි තෙ බ්රාහ්මණ සත්තුභස්තං අජානතො කණ්හසප්පො පවිට්ඨො.
1036. ආදාය දණ්ඩං පරිසුම්භ භස්තං පස්සෙළමූගං උරගං ද්විජිව්හං, ඡින්දජ්ජ කඞ්ඛං විචිකිච්ඡිතානි භුජඞ්ගමං පස්ස පමුඤ්ච භස්තං.
1037. සංවිග්ගරූපො පරිසාය මජ්ඣෙ සො බ්රාහ්මණො සත්තුභස්තං පමුඤ්චි, අථ නික්ඛමි උරගො උග්ගතෙජො ආසීවිසො සප්පො ඵණං කරිත්වා සුලද්ධ ලාභා ජනකස්ස රඤ්ඤො යො පස්සති සෙනකං සාධුපඤ්ඤං.
1038. විවත්තච්ඡද්දො{1} නුසි සබ්බදස්සී ඤාණං නු තෙ බ්රාහ්මණ භිංසරූපං ඉමානි මෙ සත්තු සතානි අත්ථි ගණ්හාහි සබ්බානි දදාමි තුය්හං, තයා හි මෙ ජීවිතමජ්ජ ලද්ධං අථොපි භරියායමකාසි සොත්ථිං.
1039. න පණ්ඩිතා වෙත්තනමාදියන්ති චිත්රාහි ගාථාහි සුභාසිතාහි, ඉතොපි තෙ බ්රහ්මෙ දදන්තු විත්තං ආදාය තං ගච්ඡ සකං නිකෙතන්ති.
7. සත්තුභස්තජාතකං.
1040. යෙ මෙ අහං න ජානාමි අට්ඨසෙන වණිබ්බකෙ, තෙ මං සඞ්ගම්ම යාචන්ති කස්මා මං ත්වං න යාචසි.
1041. යාචකො අප්පියො හොති යාචං අදදමප්පියො, තස්මාහන්තං න යාචාමි මා මෙ විද්දෙසනා{2} අහූ.
1042. යො චෙ යාවනජීවානො කාලෙ යාවං න යාචති, පරඤ්ච පුඤ්ඤා ධංසෙති අත්තනාපි න ජීවති.
1043. යො චෙ යාචනජිවානො කාලෙ යාවං න යාචති, පරඤ්ච පුඤ්ඤං ලබ්භෙති අත්තනාපි න ජීවති.
1044. න වෙ දිස්සන්ති සප්පඤ්ඤා දිස්වා යාචකමාගතෙ, බ්රහ්මචාරි පියො මෙසි වරතං භඤ්ඤමිච්ඡසි.
1045. න වෙ යාචන්ති සප්පඤ්ඤා ධීරො වෙදිතුමරහති{1}, උද්දිස්ස අරියා තිට්ඨන්ති එසා අරියානයාචනා.
1046. දදාමි තෙ බ්රාහ්මණ රොහිණීනං ගවං සහස්සං සහ පුඞ්ගවෙන, අරියො හි අරියස්ස කථං න දජ්ජා සුත්වාන ගාථා තව ධම්මයුත්තාති.
8. අට්ඨිසෙනජාතකං.
1047. යත්ථ වෙරී නිවසති{2} න වසෙ තත්ථ පණ්ඩිතො, එකරත්තං දිරත්තං වා දුක්ඛං වසති වෙරිසු.
1048. දිසො චෙ{3} ලහුචිත්තස්ස පොසස්ස අනුවිධිය්යතො, එකස්ස කපිනො හෙතු යූථස්ස අනයො කතො.
1049. බාලො ච පණ්ඩිතමානී යූථස්ස පරිහාරකො. සචිත්තස්ස වසං ගන්ත්වා සයෙථායං{4} යථා කපි.
1050. න සාධු බලවා බාලො යූථස්ස පරිහාරකො, අහිතො භවති ඤාතීනං සකුණානංව චෙතකො{5}.
1051. ධීරො ච බලවා සාධු යූථස්ස පරිහාරකො, හිතො භවති ඤාතීනං තිදසානං ච වාසවො,
1052. යො ච සීලඤ්ච පඤ්ඤඤ්ච සුතඤ්චත්තනි පස්සති, උභින්නමත්ථං චරති අත්තනො ච පරස්ස ච.
1053. තස්මා තුලෙය්යමත්තානං සීලපඤ්ඤාසුතාමිව, ගණං වා පරිභරෙ ධීරො එකොවාපි පරිබ්බජෙති.
9. කපිජාතකං.
1054. ද්වාසත්තති ගොතම{1} පුඤ්ඤකම්මා වසවත්තිනො ජාතිජරං අතීතා, අයමන්තිමා වෙදගූ බ්රහ්මපත්ති{2} අස්මාභිජප්පන්ති ජනා අනෙකා.
1055. අප්පං හි එතං න හි දීඝමායු යං ත්වං බක මඤ්ඤසි දීඝමායු, සතං සහස්සානං නිරබ්බුදානං, ආයුං පජානාමි තවාහං බ්රහ්මෙ.
1056. අනන්තදස්සී භගවාහමස්මිං ජාතිජරං සොකමුපාතිවත්තො, කිම්මෙ පුරාණං වතසීලවත්තං ආචික්ඛ මෙ තං යමහං විජඤ්ඤං.
1057. යං ත්වං අපායෙසි බහූ මනුස්සෙ පිපාසිතෙ ඝම්මනි සම්පරෙතෙ, තං තෙ පුරාණං වතසීලවත්තං සුත්තප්පබුද්ධොව අනුස්සරාමි.
1058. යං ඵණිකූලස්මිං ජනං ගහීතං අමොවයී ගය්හකනීයමානං, තං තෙ පුරාණං වතසීලවත්තං සුත්තප්පබුද්ධොව අනුස්සරාමි.
1059. ගඞ්ගාය සොතස්මිං ගහීතනාවං ලුද්දෙන නාගෙන මනුස්සකප්පා, අමොචයි ත්වං බලසා පසය්හ තං තෙ පුරාණං වතසීලවත්තං සුත්තප්පබුද්ධොව අනුස්සරාමි.
1060. කප්පො ච තෙ බද්ධචරො අහොසිං සම්බුද්ධිමන්තං වතිනං අමඤ්ඤං{1}, තං තෙ පුරාණං වතසීලවත්තං, සුත්තප්පබුද්ධොව අනුස්සරාමි.
1061. අද්ධා පජානාසි මමෙතමායුං අඤ්ඤම්පි ජානාසි තථාහි බුද්ධො, තථාහි තායං ජලිතානුභාවො ඔභාසයං තිට්ඨති බ්රහ්මලොකන්ති.
10. බකබ්රහ්මජාතකං
කුක්කුවග්ගො පඨමො.
තස්සුද්දානං:
වරකණ්ණික චාපවරො සුතනො අථගිජ්ඣ සරොහිත මච්ඡවරො, පුන පණ්ණකසෙනකයාචනකො අථවෙරී සබ්රහ්ම බකෙන දස.
2. ගන්ධාරවග්ගො
1062. හිත්වා ගාමසහස්සානි පරිපුණ්ණානි සොළස, කොට්ඨාගාරානි ඵීතානි සන්නිධිංදානි කුබ්බසි.
1063. හිත්වා ගන්ධාරවිසයං පහූතධනධානියං, පසාසනිතො{1} නික්ඛන්තො ඉධදානි පසාසසි.
1064. ධම්මං භණාමි වෙදෙහ අධම්මො මෙ න රුච්චති, ධම්මං මෙ භණමානස්ස න පාපමුපලිප්පති{2}.
1065. යෙ කෙනචි වණ්ණෙන පාරො ලභති රුප්පනං, මහත්ථියම්පි චෙ වාචං න තං භාසෙය්ය පණ්ඩිතො.
1066. කාමං රුප්පතු වා මා වා භුසං වා විකිරීයතු, ධම්ම මෙ භණමානස්ස න පාපමුපලිප්පති.
1067. නො චෙ අස්ස සකා බුද්ධි විනයො වා සුසික්ඛිතො, වනෙ අන්ධමහිසොව{3} චරෙය්ය බහුකො ජනො.
1068. යස්මා ච පනිධෙකච්චෙ ආචාරම්භි{4} සුසික්ඛිතා, තස්මා විනීතවිනයා චරන්ති සුසමාහිතා’ති. .
1. ගන්ධාරජාතකං.
1069. අත්තානං සඞ්කමං කත්වා යො සොත්ථිං සමතාරයි, කිං ත්වං තෙසං කිමො{5} තුය්හං හොන්ති එතෙ{6} මහාකපි.
1070. රාජාහං ඉස්සරො තෙසං යූථස්ස පරිහාරකො, තෙසං සොකපරෙතානං භීතානං තෙ අරින්දම.
1071. උල්ලඞ්ඝයිත්වා{7} අත්තානං විස්සට්ඨ{8}ධනුනො සතං, තතො අපරපාදෙසු දළ්හං බද්ධං ලතාගුණං.
1072. ඡින්නබ්භමිව වාතෙන නුන්නො රුක්ඛං උපාගමිං, සොහං අප්පභවං තස්ස සාඛං හත්ථෙහි අග්ගහිං.
1073. තං මං වියායතං සන්තං සාඛාය ච ලතාය ච, සමනුක්කමන්තා පාදෙහි සොත්ථිං සාඛාමිගා{1} ගතා.
1074. තං මං න තපතෙ බද්ධො වධො මෙ න තපෙස්සති, සුඛමාහරිතං තෙසං යෙසං රජ්ජමකාරයිං.
1075. එසා තෙ උපමා රාජ අත්ථසන්දස්සනී කතා, රඤ්ඤා රට්ඨස්ස යොග්ගස්ස බලස්ස නිගමස්ස ච. සබ්බෙසං{2} සුඛමෙත්ථබ්බං ඛත්තියෙන පජානතා’ති.
2. මහාකපිජාතකං.
1076. අම්බාහමද්දං{3} වනමන්තරස්මිං නීලොභාසං එලිනං සංවිරූළ්හං, සමද්දසං ඵලහෙතූ විභග්ගං තං දිස්වා භික්ඛාචරියං චරාමි.
1077. සෙලං සුමට්ටං නරවීර{4} නිට්ඨිතං නාරී යුගන්ධාරයි අප්පසද්දං, දුතියඤ්ච ආගම්ම අහොසි සද්දො තං දිස්වා භික්ඛාචරියං චරාමි.
1078. දිජා{5} දිජං කුණපමාහරන්තං එකං සමානං බහුකා සමෙච්ච, ආහාරහෙතු පරිපාතයිංසු තං දිස්වා භික්ඛාචරියං චරාමි.
1079. උසභාහමද්දං යූථස්ස මජ්ඣෙ චලක්කකුං වණ්ණබලූප්පන්නං, තමද්දසං කාමහෙතු විතුන්නං තං දිස්වා භික්ඛාචරියං චරාමි.
1080. කරණ්ඩු{6} නාම කලිඞ්ගානං ලන්ධාරානඤ්ච නග්ගජි, නිමිරාජා විදෙහානං පඤ්චාලානඤ්ච දුම්මුඛො. එතෙ රට්ඨානි හිත්වාන පබ්බජිංසු අකිඤ්චනා.
1081. සබ්බෙව මෙ දෙවසමා සමාගතා අග්ගි යථා පජ්ජලිතො තථෙවිමෙ, අහම්පි එකොව චරිස්සාමි භග්ගවි හිත්වාන කාමානි යථොධිකානි.
1082. අයමෙව කාලො නහි අඤ්ඤො අත්ථි අනුසාසිතා මෙ න භවෙය්ය පච්ඡා, අහම්පි එකාව චරිස්සාමි භග්ගව සකුණීව මුත්තා පුරිසස්ස හත්ථා.
1083. ආමං පක්කඤ්ච ජානන්ති අථො ලොණං අලොණිකං, තමහං දිස්වා පබ්බජිං චරෙව ත්වං චරාමහත්ති
3. කුම්භකාරජාතකං.
1084. අහඤ්චෙ දළ්හධම්මාය{1} වහන්ති නාභිරාධයිං, නුදන්ති උරසි සල්ලං යුද්ධෙ වික්කන්තචාරිනී.
1085. නහ නූන රාජා ජානාති{2} මම වික්කමපොරිසං, සඞ්ගාමෙ සුකතං තානි දූතවිප්පහිතානි ච.
1086. සානූනාහං මරිස්සාමි අබන්ධූ අපරායිනී,{3} තදාහි කුම්භකාරස්ස දින්නා ඡකණහාරිකා.
1087. යාවතාසිංසති{4} පොසො තාවදෙව පවීණති, අත්ථාපායෙ ජහන්ති නං ඔට්ඨිව්යාධිංව ඛත්තියො.
1088. යො පුබ්බෙ කතකල්යාණො කතත්ථො නාවබුජ්ඣති, අත්ථා තස්ස පලුජ්ජන්ති යෙ හොන්ති අභිපත්ථිතා.
1089. යො පුබ්බෙ කතකල්යාණො කතත්ථො මනුබුජ්ඣති, අත්ථා තස්ස පලුවඩ්ඪන්ති යෙ හොන්ති අභිපත්ථිතා.
1090. තං වො වදාමි භද්දං{1} වො යාවනෙතත්ථ සමාගතා, සබ්බෙ කතඤ්ඤුනො හොථ චිරං සග්ගම්හි ඨස්සථාති{2}.
4. දළ්හධම්මජාතකං
1091. යො මං පුරෙ පච්චුදෙති අරඤ්ඤෙ දූරමායති{3}, සො න දිස්සති මාතඞ්ගො සොමදත්තො කුහිං ගතො.
1092. අයං වා සො මතො සෙති අල්ලපිඞ්කංව ඡිජ්ජිතො, භුම්යා නිපතිතො සෙති අමරා වත{*} කුඤ්ජරො.
1093. අනගාරියුපෙතස්ස විප්පමුත්තස්ස චෙතසො, සමණස්ස න තං සාධු යං පෙතමනුසොචසි.
1094. සංවාසෙන භවෙ සක්ක මනුස්සස්ස මිගස්ස වා, හදයෙ ජායති පෙමං තං න සක්කා අසොවිතුං.