770. යො පරෙසං වචනානි සද්දහෙථ{3} යථාතථං, ඛිප්පං භිජ්ජෙථ මිත්තස්මිං වෙරඤ්ච පසවෙ බහුං.
771. න සො මිත්තො යො සදා අප්පමත්තො භෙදාසඞ්කි රන්ධමෙවානුපස්සී, යස්මිඤ්ච සෙති උරසීව පුත්තො ස චෙ මිත්තො යො අභෙජ්ජො පරෙහීති.
1. වණ්ණාරොහජාතකං.
772. සීලං සෙය්යො සුතං සෙය්යො ඉති මෙ සංසයො අහූ, සීලමෙව සුතා සෙය්යො ඉති මෙ නත්ථි සංසයො.
773. මොඝා ජාති ච වණ්ණො ච සීලමෙව කිරුත්තමං, සීලෙන අනුපෙතස්ස සුතෙනත්ථො න විජ්ජති.
774. ඛත්තියො ච අධම්මට්ඨො වෙස්සො චාධම්මනිස්සිතො, තෙ පරිච්චජ්ජජුභො ලොකෙ උපපජ්ජන්ති දුග්ගතිං.
775. ඛත්තියා බ්රාහ්මණා වෙස්සා සුද්දා චණ්ඩාලපුක්කුසා, ඉධ ධම්මං චරිත්වාන භවන්ති තිදිවෙ සමා.
776. න දො සංපරායාය න ජාති නොපි බන්ධවා, සකඤ්ච සීලං සංසුද්ධං සම්පරායසුඛාවහන්ති.
2. සීලවීමංස ජාතකං.
777. හිරිං තරන්තං විජිගුච්ඡමානං තවාහමස්මිං ඉති භාසමානං, සෙය්යානි කම්මානි අනාදියන්තං. නෙසො මමන්ති ඉති තං විජඤ්ඤා.
778. යං හි කයිරා තං හි වදෙ යං න කයිරා න තං වදෙ, අකරොන්තං භාසමානං පරිජානන්ති පණ්ඩිතා.
779. න සො මිත්තො යො සදා අප්පමත්තො භෙදාසඞ්කි රන්ධමෙවානුපස්සී, යස්මිඤ්ච සෙති උරසීව පුත්තො ස වෙ මිත්තො යො අභෙජ්ජො පරෙහි.
780. පාමොජ්ජකරණං ඨානං පසංසාවහනං සුඛං. ඵලානිසංසො භාවෙති වහන්තො පොරිසං ධුරං.
781. පවිවෙකරසං පීත්වා රසං උපසමස්ස ච, නිද්දරො හොති නිප්පාපො ධම්මපීතිරසං පිව’න්ති.
3. හිරිජාතකං.
782. කො නු සන්තම්හි පජ්ජොතෙ අග්ගිපරියෙසනං චරං, අද්දක්ඛි රත්තිං ඛජ්ජොතං ජාතවෙදං අමඤ්ඤථ.
783. ස්වාස්ස ගොමයචුණ්ණානි අභිමත්ථං තිණානි ච, විපරීතාය සඤ්ඤාය නාසක්ඛි පජ්ජලෙතවෙ.
784. එවම්පි අනුපායෙන අත්ථං න ලභතෙ මගො, විසාණතො ගවං දොහං යත්ථ ඛීරං න වින්දති.
785. විවිධෙහි උපායෙහි අත්ථං පප්පොන්ති මාණවා, නිග්ගහෙන අමිත්තානං මිත්තානං පග්ගහෙන ච.
786. සෙණිමොක්ඛො පලාභෙන වල්ලභානං නයෙන ච, ජගතිං ජගතීපාලා ආවසන්ති වසුන්ධරන්ති.
4. ඛජ්ජොපණකපඤ්හො.
787. ධුත්තොම්භි{1} සම්ම සුමුඛ ජූතෙ අක්ඛපරාජිතො, හරෙහි{2} අම්බපක්කානි විරියන්තෙ භක්ඛයාමසෙ.
788. අලිකං වත මං සම්ම අභූතෙන පසංසසි, කො තෙ සුතො වා දිට්ඨො වා සුමුඛො නාම මක්කටො.
789. අජ්ජාපි මෙ ත්වං මනසි යං මං ත්වං අහිතුණ්ඩික, ධඤ්ඤාපණං පවිසිත්වා මත්තො ඡාතං හනාසි මං.
790. තාහං සරං දුක්ඛසෙය්යං අපි රජ්ජම්පි කාරයෙ, නෙවාහං යාචිතො දජ්ජං තථා හි භයතජ්ජිතො.
791. යඤ්ච ජඤ්ඤා කුලෙජාතං ගබ්භෙ තිත්තං අමච්ඡරිං, තෙන සඛිඤ්ච මිත්තඤ්ච ධීරො සන්ධාතුමරහතී’ති.
5. අහිතුණ්ඩිකජාතකං.
792. මධුවණ්ණං මධුරසං මධුගන්ධං විසං අහූ, ගුම්බියො ඝාසමෙසානො අරඤ්ඤෙ ඔදහී විසං.
793. මධු ඉති මඤ්ඤමානා යෙ තං විසමසායිසුං{3}, තෙසං තං කටුකං ආසි මරණං තෙනුපාගමුං.
794. යෙ ච ඛො පටිසඞ්ඛාය විසං තං පරිවජ්ජයුං, තෙ ආතුරෙසු සුඛිතා ඩය්හමානෙසු නිබ්බුතා.
795. එවමෙව මනුස්සෙසු විසං කාමා සමොහිතා, ආමිසං බන්ධනං චෙතං මච්චුවසො ගුහාසයො.
796. එවමෙව ඉමෙ කාමෙ ආතුරා පරිචාරකෙ, යෙ සදා පරිවජ්ජෙන්ති සඞ්ගං ලොකෙ උපච්චගුන්ති.
6. ගුම්බියජාතකං.
797. ය්වායං සාළියඡාපොති කණ්හසප්පං අගාහයි, තෙන සප්පෙනයං දට්ඨො හතො පාපානුසාසකො.
798. අහනන්තමහන්තාරං{1} යො නරො හන්තුමිච්ඡිති, එවං සො නිහතො සෙති යථායං පුරිසො හතො.
799. අහනන්තමඝාතෙන්තං{2} යො නරො හන්තුමිච්ඡති, එවං සො නිහතො සෙති යථායං පුරිසො හතො.
800. යථා පංසුමුට්ඨිං පුරිසො පටිවාතං පටික්ඛිපෙ, තමෙව සො රජො හන්ති තථායං පුරිසො හතො.
801. යො අප්පදුට්ඨස්ස නරස්ස දුස්සති සුද්ධස්ස පොසස්ස අනඞ්ගණස්ස, තමෙව බාලං පච්චෙති පාපං සුඛුමො රජො පටිවාතංව ඛිත්තොති.
7. සාළියජාතකං.
802. අමිත්තහත්ථත්ථගතා තචසාරසමප්පිතා, පසන්නමුඛවණ්ණත්ථ කස්මා තුම්හෙ න සොචථ.
803. න සොචනාය පරිදෙවනාය අත්ථො ච ලබ්භා{3} අපි අප්පකොපි, සොචන්තමෙනං දුඛිතං විදිත්වා පච්චත්ථිකා අත්තමනා භවන්ති.
804. යතො ච ඛො පණ්ඩිතො ආපදාසු න වෙධති අත්ථවිනිච්ඡයඤ්ඤු, පච්චත්ථිකාස්ස දුඛිතා භවන්ති දිස්වා මුඛං අවිකාරං පුරාණං.
805. ජප්පෙන මන්තෙන සුභාසිතෙන අනුප්පදානෙන පවෙණියා වා යථා යථා යත්ථ ලභෙථ අත්ථං තථා තථා තත්ථ පරක්කමෙය්ය.
806. යතො ච ජානෙය්ය අලබ්භනෙය්යො{*} මයාව{4} අඤ්ඤෙන වා එස අත්ථො, අසොචමානො අධිවාසයෙය්ය කම්මං දළ්හං කින්ති කාරොමිදානීති.
8. තචසාරජාතකං.
807. ක්යාහං දෙවානමකරං කිං පාපං පකතං මයා, යම්මෙ සිරස්මිං ඔභච්ච{1} චක්කං භමති මත්ථකෙ.
808. අතික්කම්ම රමණකං සදාමත්තඤ්ච දූභකං{2}, බ්රහ්මතරඤ්ච{3} පාසාදං කෙනට්ඨෙන ඉධාගතො.
809. ඉතො බහුතරා භොගා අත්ර මඤ්ඤෙ භවිස්සරෙ, ඉති එතාය සඤ්ඤාය පස්ස මං ව්යසනං ගතං.
810. චතුබ්භි අට්ඨජ්ඣගමා අට්ඨකාහි ච සොළස{4}, සොළසාහි ච බත්තිංස අත්රිච්ඡං චක්කමාසදො. ඉච්ඡාහතස්ස පොසස්ස චක්කං භමති මත්ථකෙ.
811. උපරි විසාලා{5} දුප්පූරා ඉච්ඡා විසදගාමිනී{6}, යො තං අනුගිජ්ඣන්ති තෙ හොන්ති චක්කධාරිනො’ති.
9. මිත්තවින්දකජාතකං.
812. හංසො පලාසමවච නිග්රොධො සම්ම ජායති{7}, අඞ්කස්මිං{8} තෙ නිසින්නොව සො තෙ මම්මානි ඡෙච්ඡති.
813. වඩ්ඪතුමෙව{9} නිග්රොධො පතිට්ඨස්ස භවාමහං, යථා පිතා ච මාතා ච{10} එවමෙසො භවිස්සති.
814. යං ත්වං අඞ්කස්මි වඩ්ඪෙසි{11} ඛීරරුක්ඛං භයානකං, ආමන්ත ඛො තං ගච්ඡාම වුඩ්ඪිමස්ස න රුච්චති.
815. ඉදානි ඛො මං භායති මහානෙරු නිදස්සනං, හංසස්ස අනභිඤ්ඤාය මහා මෙ භයමාගතං.
816. න තස්ස වුඩ්ඪි කුසලප්පසත්ථා යො වඩ්ඪමානො ඝසතෙ පතිට්ඨං, තස්සූපරොධං පරිසඞ්කමානො පතාරයී මූලවධාය ධීරොති.
10. පලාසජාතකං
වණ්ණාරොහවග්ගො දුතියො.
3. අඩ්ඪවග්ගො
817. එවම්භූතස්ස තෙ රාජ ආගතස්ස වසෙ මමං, අත්ථි නු කොචි පරියායො යො තං දුක්ඛා පමොචයෙ.
818. එවම්භූතස්ස මෙ තාත ආගතස්ස වසෙ තව, නත්ථි නො කොචි පරියායො යො මං දුක්ඛා පමොචයෙ.
819. නාඤ්ඤං සුචරිතං රාජ නාඤ්ඤං රාජ සුභාසිතං, තායතෙ මරණ කාලෙ එවමෙවිතරං ධනං.
820. අක්කොච්ඡි මං අවධි මං අජිනි මං අහාසි මෙ, යෙ තං උපනය්හන්ති වෙරං තෙසං න සම්මති.
821. අක්කොච්ඡි මං අවධි මං අජිනි මං අහාසි මෙ, යෙ තං න උපනය්හන්ති වෙරං තෙසූපසම්මති.
822. නහි වෙරෙන වෙරානි සම්මන්තීධ කුදාචනං, අවෙරෙන ච සම්මන්ති එස ධම්මො සනන්තනොති.
1. දීඝිතිකොසලජාතකං.
823. අගාරා පච්චුපෙතස්ස අනාගාරස්ස{1} තෙ සතො, සමණස්ස න තං සාධු යං පෙතමනුසොචසි.
824. සංවාසෙන හවෙ සක්ක මනුස්සස්ස මිගස්ස වා, හදයෙ ජායතෙ පෙමං තං න සක්කා අසොචිතුං.
825. මතං මරිස්සං රොදන්ති යෙ රුදන්ති ලපන්ති ච, තස්මා ත්වං ඉසි මා රොදි රොදිතං මොඝමාහු සන්තො.
826. රොදිතෙන හවෙ බ්රහ්මෙ මතො පෙතො සමුට්ඨහෙ, සබ්බෙ සඞ්ගම්ම රොදාම අඤ්ඤමඤ්ඤස්ස ඤාතකෙ.
827. ආදිත්තං වත මං සන්තං ඝතසිත්තංව පාවකං, වාරිනා විය ඔසිඤ්චං සබ්බං නිබ්බාපයෙ දරං.
828. අබ්බහී වත මෙ සල්ලං යමාසි හදයනිස්සිතං, යො මෙ සොකපරෙතස්ස පුත්තසොකං අපානුදි.
829. සොහං අබ්බූළ්හසල්ලොස්මි වීතසොකො අනාවිලො, න සොචාමි න රොදාමි තව සුත්වාන වාසවාති.
2. මිගපොතජාතකං.
830. තුහිං ගතා කත්ථ ගතා ඉති ලාලප්පතී ජනො, අහමෙව එකො ජානාමි උදපානෙ මූසිකා හතා
831. යථෙතං{1} ඉති චිති ච ගද්රභොව නිවත්තසි, උදපානෙ මූසිකං හන්ත්වා යවං භක්ඛිතුමිච්ඡසි.
832. දහරො චාසි දුම්මෙධ පඨමුප්පත්තිකො{2} සුසු, දීඝමෙතං සමාසජ්ජ{3} න තෙ දස්සාමි ජීවිතං.
833. නාන්තලික්ඛහවනෙනාහං{4} නාඞ්ගපුත්තසිරෙන වා{5}, පුත්තෙන සිපත්ථයිතො සිලොකෙහි පමොචිතො.
834. සබ්බං සුතමධීයෙථ හීනමුක්කට්ඨමජ්ඣිමං, සබ්බස්ස අත්ථං ජානෙය්ය න ච සබ්බං පයොජයෙ හොති තාදිසකො කාලො තත්ථ අත්ථාවහං සුත’න්ති.
3. මූසිකජාතකං.
835. සබ්බං භණ්ඩං සමාදාය පාරං තිණ්ණොසි බ්රාහ්මණ, පච්චාගච්ඡ ලහුං ඛිප්පං මම්පි තාරෙහිදානිතො.
836. අසන්ථුතං මං චිරසන්ථුතෙන{6} නිමින්නි භොතී අධුවං ධුවෙන, මයාපි භොතී නිමිනෙය්ය අඤ්ඤං ඉතො අහං දූරතරං ගමිස්සං.
837. කායං ඵළගලාගුම්බෙ{7} කාරොති අහුහාසියං, නයිධ නච්චං වා ගීතං වා තාලං වා සුසමාහිතං අනම්හි කාලෙ සුස්සොණි කින්නු ජග්ඝසි සොභනෙ.
838. සිගාල බාල දුම්මෙධ අප්පපඤ්ඤොසි ජම්බුක, ජිනො මච්ඡඤ්ච පෙසිඤ්ච කපණො විය ඣායසි.
839. සුදස්සං වජ්ජං අඤ්ඤෙසං අත්තනො පන දුද්දසං, ජිනා පතිඤ්ච ජාරඤ්ච මම්පි ත්වඤ්ඤෙව ඣායසි.
840. එවමෙතං මිගරාජ යථා භාසසි ජම්බුක, සා නූනාහං ඉතො ගන්ත්වා භත්තු හෙස්සං වසානුගා.
841. යො හරෙ මත්තිකං ථාලං කංසථාලම්පි සො හරෙ, කතංයෙව තයා පාපං පුනපෙවං කරිස්සසීති.
4. චුල්ලධනුග්ගහජාතකං.
842. ඉදානි ඛොම්හි සුඛිතො අරොගො. නික්කණ්ටකො නිප්පතිතො කපොතො, කාහාමිදානි හදයස්ස තුට්ඨිං තථාහි මං මංසසාකං බලෙති.
843. කායං බලාකා සිඛිනී චොරී ලඞ්ඝිපිතාමහා, ඔරං බලාකෙ ආගච්ඡ චණ්ඩො මෙ වායසො සඛා.
844. අලං හි තෙ ජග්ඝිතායෙ මමං දිස්වාන එදිසං, විලූනං සූදපුත්තෙන පිට්ඨිමද්දෙන මක්ඛිතං.
845. සුනහාතො සුචිලිත්තොසි අන්නපානෙන තප්පිතො, කණ්ඨො ච තෙ වෙළුරියො අගමා නු කජඞ්ගලං.
846. මා තෙ මිත්තො අමිත්තො වා අගමාසි කජඞ්ගලං. පිඤ්ඡානි තත්ථ ලායිත්වා කාණ්ඨෙ බන්ධන්ති වට්ටනං.
847. පුනපාපජ්ජසි සම්ම සීලං හි තව තාදිසං න හි මානුසකා භොගා සුභුඤ්ජා හොන්ති පක්ඛිනා’ති.
5. කපොතජාතකං.
අඩ්ඪවග්ගො තතියො.
තස්සුද්දානං:
අථ වණ්ණා සසීල හිරි ලභතෙ සුමුඛාමිසසාලිය මිත්තවරො, අථ චක්ක පලාස සරාජ සතො යවබාලකපොකතං පණ්ණ රසාති.
පඤ්චකනිපාතො නිට්ඨිතො.
තත්ර වග්ගුද්දානං: