7. අයකූටජාතකං.
696. අරඤ්ඤා{1} ගාමමාගම්ම කිං සීලං කිං වතං අහං, පුරිසං තාත සෙවෙය්යං තං මෙ අක්ඛාහි පුච්ඡිතො.
697. යො තං විස්සාසයෙ තාත විස්සාසඤ්ච ඛමෙය්ය තෙ, සුස්සූසී ච තිතික්ඛී ච තං භජෙහි ඉතො ගතො.
698. යස්ස කායෙන වාචාය මනසා නත්ථි දුක්කටං, ඔරසිව පතිට්ඨාය තං භජෙහි ඉතො{2} ගතො.
699. හළිද්දරාගං කපිචිත්තං පුරිසං රාගවිරාගිනං, තාදිසං තාත මා සෙවි නිම්මනුස්සම්පි චෙ සියා’ති.
8. ආරඤ්ඤජාතකං.
700. නෙව ඉත්ථිසු සාමඤ්ඤං නපි භක්ඛෙසු සාරථි, අථස්ස සන්ධිභෙදස්ස පස්ස යාව සුචින්තිතං.
701. අසි තික්ඛොව මංසම්හි පෙසුඤ්ඤං පරිවත්තති, යත්ථුසභඤ්ච සීහඤ්ච භක්ඛයන්ති මිගාධමා.
702. ඉමං සො සයනං සෙති යයිමං පස්සසි සාරථි, යො වාචං සන්ධිභෙදස්ස පිසුනස්ස නිබොධති.
703. තෙ ජනා සුඛමෙධන්ති නරා සග්ගගතාරිව, යො වාචං සන්ධිභෙදස්ස නාවබොධෙන්ති{1} සාරථි’ති.
9. සන්ධිභෙදජාතකං.
704. හන්ති හත්ථෙහි පාදෙහි මුඛඤ්ච පරිසුම්භති, ස වෙ රාජ පියො හොති කං තෙනමභිපස්සසි.
705. අක්කොසති යථාකාමං ආගමඤ්චස්ස න ඉච්ඡති, ස චෙ රාජ පියො හොති කං තෙනම්භිපස්සසි.
706. අබ්භක්ඛාති අභූතෙන අලිකෙනමභිසාරයෙ, ස වෙ රාජ පියො හොති කං තෙනමභිපස්සසි.
707. හරං අන්නඤ්ච පානඤ්ච වත්ථසෙනාසනානි ච, අඤ්ඤදත්ථු හරා සන්තා තෙ වෙ රාජ පියා හොන්ති, කං තෙන මභිපස්සසීති.
10. දෙවතාපඤ්හො
චූළකුණාලවග්ගො පඤ්චමො.
තස්සුද්දානං:
නරානං අසක්ඛිවසිම්භවරො නීලියමග්ගිවරඤ්ච පුන, පුන රසායසකූටවරො තථාරඤ්ඤසාරථි හන්ති දස.
චතුක්කනිපාතො නිට්ඨිතො.
තත්ර වග්ගුද්දානං:
විවරං පුචිමන්දඤ්ච කුටිදූසං බහුහාණකං, චූළකුණාලවග්ගො සො පඤ්චමො සුප්පකාසිතොති.
5. පඤ්චකනිපාතො
1. මණිකුණ්ඩලවග්ගො
708. ජිනො{1} රථස්ස{2}මණිකුණ්ඩලෙ ච පුත්තෙ ච දාරෙ ච තථෙව ජීනො, සබ්බෙසු භොගෙසු අසෙසිතෙසු කස්මා න සන්තප්පසි සොකකාලෙ.
709. පුබ්බෙ ව මච්චං විජහන්ති භොගා මච්චො වා තෙ{3} පුබ්බතරං ජහාති, අසස්සතා භොගිනො කාමකාමී තස්මා න සොචාමහං සොකකාලෙ.
710. උදෙති ආපූරති{4} වෙති චන්දො අත්ථං තපෙත්වාන{5} පලෙති සූරියො, විදිතා මයා සත්තුක ලොකධම්මා තස්මා න සොචාමහං සොකකාලෙ.
711. අලසො ගිහී කාමභොගී න සාධු අසඤ්ඤතො පබ්බජිතො න සාධු, රාජා න සාධු අනිසම්මකාරි යො පණ්ඩිතො කොධනො තං න සාධු.
712. නිසම්ම ඛත්තියො කයිරා නානිසම්ම දිසම්පති, නිසම්ම කාරිනො රඤ්ඤො යසො කින්ති ච වඩ්ඪතීති.
1. මණිකුණ්ඩලජාතකං.
713. කින්නු සන්තරමානොව ලායිත්වා හරිතං තිණං, ඛාද ඛාදාති විලපි ගතසත්තං ජරග්ගව.
714. න හි අන්නෙන පානෙන මතො ගොණො සමුට්ඨහෙ, ත්වඤ්ච තුච්ඡං විලපසි යථා තං දුම්මතී තථා.
715. තථෙව තිට්ඨති සීසං හත්ථපාදා ච වාළධි, සොතා තථෙව තිට්ඨන්ති මඤ්ඤෙ ගොණො සමුට්ඨහෙ.
716. නෙවය්යකස්ස සීසං වා හත්ථපාදා න දිස්සරෙ, රුදං මත්තිකථූපස්මිං නනු ත්වඤ්ඤෙව දුම්මති.
717. ආදිත්තං වත මං සන්තං ඝතසිත්තංව පාවකං, වාරිනා විය ඔසිඤ්චං සබ්බං නිබ්බාපයෙ දරං.
718. අබ්බූළ්හං වත මෙ සල්ලං සොකං හදයනිස්සිතං, යො මෙ සොකපරෙතස්ස පිතුසොකං අපානුදි.
719. සොහං අබ්බූළ්හසල්ලොස්මි වීතසොකො අනාවිලො, න සොචාමි න රොදාමි තව සුත්වාන මාණව.
720. එවං කරොන්ති සප්පඤ්ඤා යෙ හොන්ති අනුකම්පකා, විනිවත්තයන්ති{1} සොකම්හා සුජාතො පිතරං යථාති.
2. සුජාතජාතකං.
721. නයිදං නිච්චං භවිතබ්බං බ්රහ්මදත්ත ඛෙමං සුභික්ඛං සුඛතා ච කායෙ, අත්ථච්චයෙ වා අහු සම්පමූළ්හො භින්තප්ලවො සාගරස්සෙව මජ්ඣෙ.
722. යානි කරොති පුරිසො තානි අත්තනි පස්සති, කල්යාණකාරී කල්යාණං පාපකාරී ච පාපකං, යාදිසං වපතෙ බීජං තාදිසං හරතෙ ඵලං.
723. ඉදං තදාචරියවචො පාරාසරියො{2} යදබ්රවි, මාස්සු ත්වං අකරා පාපං යංතං පච්ඡා කතං තපෙ.
724. අයමෙව සො පිඞ්ගිය ධොනසාඛො{3} යම්හි{4} ඝාතයිං ඛත්තියානං සහස්සං, අලඞ්කතෙ චන්දනසාරලිත්තෙ තමෙව දුක්ඛං පච්චාගතං මමං.
725. සාමාපි ඛො චන්දන ලිත්තගත්තා{5} සිඞ්ගුව සොහඤ්ජනකස්ස උග්ගතා, අදිස්වාව කාලං කරිස්සාමි උබ්බරිං තං මෙ තතො{6} දුක්ඛතරං භවිස්සතීති.
3. ධොනසාඛ ජාතකං.{7}
726. උරගොව තවං ජිණ්ණං හිත්වා ගච්ඡති සං තනුං, එවං සරීරෙ නිබ්භොගෙ පෙතෙ කාලකතෙ සති,
727. ඩය්හමානො න ජානාති ඤාතිනං පරිදෙවිතං, තස්මා එතං න සොචාමි ගතො සො තස්ස යා ගති.
728. අනබ්භිතො තතො ආග{1} අනනුඤ්ඤාතො{2} ඉතො ගතො, යථා ගතො තථා ගතො තත්ථ කා පරිදෙවනා.
729. ඩය්හමානො න ජානාති ඤාතිනං පරිදෙවිතං, තස්මා එතං න සොචාමි ගතො සො තස්ස යා ගති.
730. සචෙ රොදෙ කිසා අස්සං තස්සා මෙ කිං ඵලං සියා, ඤාතිමිත්තසුහජ්ජානං භිය්යො නො අරතී සියා.
731. ඩය්හමානො න ජානාති ඤාතිනං පරිදෙවිතං, තස්මා එතං න සොචාමි ගතො සො තස්ස යා ගති.
732. යථාපි දාරකො චන්දං ගච්ඡන්තමනුරොදති, එවං සම්පදමෙවෙතං යො පෙතමනුසොචති.
733. ඩය්හමානො න ජානාති ඤාතිනං පරිදෙවිතං, තස්මා එතං න සොචාමි ගතො සො තස්ස යා ගති.
734. යථාපි උදකකුම්භො භින්නො අප්පටිසන්ධියො, එවං සම්පදමෙවෙතං යො පෙතමනුසොචති.
735. ඩය්හමානො න ජානාති ඤාතිනං පරිදෙවිතං, තස්මා එතං න සොචාමි ගතො සො තස්ස යා ගතීති.
4. උරගජාතකං.
736. අඤ්ඤෙ සොචන්ති රොදන්ති අඤ්ඤෙ අස්සුමුඛා ජනා,{3} පසන්නමුඛවණ්ණොසි කස්මා ඝත න සොචසි.
737. නාබ්හතීතහරො සොකො නානාගතසුඛාවභො, තස්මා ධංක{1} න සොචාමි නත්ථි සොකො දුතීයතා.
738. සොචං පණ්ඩු කිසො හොති භත්තඤ්චස්ස න රුච්චති, අමිත්තා සුමනා හොන්ති සල්ලවිද්ධස්ස න රුප්පතො.
739. ගාමෙ වා යදි වා රඤ්ඤෙ නින්නෙ වා යදි වා ථලෙ, ඨිතං මං නාගමිස්සති{2} එවං දිට්ඨපදො අහං
740. යස්සත්තා නාලමෙකොව සබ්බකාමරසාරහො, සබ්බාපි යඨවී තස්ස න සුඛං ආවහිස්සතීති.
5. ඝතජාතකං.{3}
741. එකො අරඤ්ඤෙ ගිරිකන්දරායං පග්ගය්හ පග්ගය්හ සිලං පවෙච්ඡසි,{4} පුනප්පුනං සන්තරමානරූපො කාරණ්ඩිය කො නු තව යිධත්ථො.
742. අහං හිමං සාගරසෙවිතන්තං සමං කරිස්සාමි යථාපි පාණිං, විකිරිය සානූනි ච පබ්බතානි ච තස්මා සිලං දරියා පක්ඛිපාමි.
743. නයිමං මහිං අරහති පාණිකප්පං. සමං මනුස්සො කරණායමෙකො, මඤ්ඤාමිමඤ්ඤෙව දරිං ජිගිංසං කාරණ්ඩිය හායසි ජිවලොකං.
744. සචෙ අයං භූතධරං න සක්කො සමං මනුස්සො කරණායමෙකො, එවමෙව ත්වං බ්රහ්මෙ ඉමෙ මනුස්සෙ නානාදිට්ඨිකෙ නානයිස්සසි තෙ.
745. සඞ්ඛිත්තරූපෙන භවං මමත්ථං අක්ඛාසි කාරණ්ඩිය එවමෙතං යථා න සක්කා පඨවී සමායං කාතුං මනුස්සෙන තථා මනුස්සාති.
6. කාරණ්ඩියජාතකං.
746. වන්දාමි තං කුඤ්ජර සට්ඨිහායනං ආරඤ්ඤකං යූථපතිං යසස්සිං, පක්ඛෙහි තං පඤ්ජලිකං කරොමි මා මෙ වධී පුත්තකෙ දුබ්බලාය.
747. වන්දාමි තං කුඤ්ජර එකචාරිං ආරඤ්ඤකං පබ්බතසානුගොචරං, පක්ඛෙහි තං පඤ්ජලිකං කරොමි මා මෙ වධී පුත්තකෙ දුබ්බලායං.
748. වධිස්සාමි තෙ ලටුකිකෙ පුත්තකානි කිං මෙ තුවං කාහසි දුබ්බලාසි, සතං සහස්සානිපි තාදිසීනං වාමෙන පාදෙන පපොථයෙය්ය.
749. නහෙව සබ්බත්ථ බලෙන කිච්චං බලං හි බාලස්ස වධාය හොති, කරිස්සාමි තෙ නාගරාජා අනත්ථං යො මෙ වධී පුත්තකෙ දුබ්බලාය.
750. කාකඤ්ච පස්ස ලටුකිකං මණ්ඩූකං නීලමක්ඛිකං, එතෙ නාගං අඝාතෙසුං පස්ස වෙරස්ස වෙරිනං. තස්මා වෙරං න කයිරාථ අප්පියෙන ච කෙනචි’ති.
7. ලටුකිකජාතකං.
751. අහමෙව දූසියා භූනහතා රඤ්ඤො මහාපතාපස්ස, එතං මුඤ්චතු ධම්මපාලං හත්ථෙ මෙ දෙව ඡෙදෙහි.
752. අහමෙව දූසියා භූනහතා රඤ්ඤො මහාපතාපස්ස, එතං මුඤ්චතු ධම්මපාලං පාදෙ මෙ දෙව ඡෙදෙහි.
753. අහමෙව දූසියා භූනහතා රඤ්ඤො මහාපතාපස්ස, එතං මුඤ්චතු ධම්මපාලං සීසං මෙ දෙව ඡෙදෙහි.
754. නහනූනිමස්ස රඤ්ඤො මිත්තාමච්චා ච විජ්ජරෙ සුහදා, යෙ න වදන්ති රාජානං මා ඝාතයි ඔරසං පුත්තං.
755. නහනූනිමස්ස රඤ්ඤො මිත්තා ඤාතී ච විජ්ජරෙ සුහදා, යෙ න වදන්ති රාජානං මා ඝාතයි අත්රජං පුත්තං.
756. චන්දනරසානුලිත්තා බාහා ඡිජ්ජන්ති ධම්මපාලස්ස, දායාදස්ස පථව්යා පාණා මෙ දෙව රුජ්ඣන්තීති.
8. චුල්ලධම්මපාලජාතකං
757. වික්කම රෙ මහාමිග වික්කම රෙ හරීපද,{1} ඡින්ද වාරත්තිකං පාසං නාහං එකා වනෙ රමෙ.
758. වික්කමාමි න පාරෙමි භූමිං සුම්භාමි වෙගසා, දළ්හො වාරත්තිකො පාසො පාදං මෙ පරිකන්තති.
759. අත්ථරස්සු පලාසානි අසිං නිබ්බාහ ලුද්දක, පඨමං මං හනිත්වාන{2} හන පච්ඡා මහාමිගං.
760. න මෙ සුතං වා දිට්ඨං වා භාසන්තිං මානුසිං මිගිං, ත්වඤ්ච භද්දෙ සුඛී හොහි එසො චාපි මහාමිගො.
761. එවං ලුද්දක නන්දස්සු සහ සබ්බෙහි ඤාතිභි, යථාහමජ්ජ නන්දාමි මුත්තං දිස්වා මහාමිගන්ති.
9. සුවණ්ණමිගජාතකං.
762. වාති ගන්ධො තිමිරානං කුසමුද්දො ච ඝොසවා, දූරෙ ඉතො හි සුසන්ධි තම්බකාමා{3} තුදන්ති මං
763. කථං සමුද්දමතරි කථං අද්දක්ඛි සෙරුමං{4}, කථං තස්සා ච තුය්හඤ්ච අහු සග්ගසමාගමො{5}.
764. භරුකච්ඡා පයාතානං වාණිජාන ධනෙසිනං{6}, මකරෙහම්භිදා{7} නාවා ඵලකෙනාහමප්ලවිං.
765. සා මං සණ්හෙන මුදුනා නිච්චං චන්දනගන්ධිනී, අඞ්කෙන{8} උද්ධරී භද්දා මාතා පුත්තංව ඔරසං.
766. සාමං අන්නෙන පාණෙන වත්ථෙන සයනෙන ච, අත්තනාපි ච මද්දක්ඛි{9} එවං තම්බි විජානහීති.
10. සුසන්ධිජාතකං{10}.
මණිකුණ්ඩලවග්ගො පඨමො.
තස්සුද්දානං:
අථජිනවරොහරිතං තිණකො අථභින්නපලවො උරගොවඝතො, දරියා පුන කුඤ්ජර භූනහතා මිගපුත්තමසග්ගවරෙන දස.
2. වණ්ණාරොහවග්ගො
767. වණ්ණරොහෙන ජාතියා බලනික්කමණෙන ච{1}, සුබාහු න මයා සෙය්යො සුදාඨ{2} ඉති භාසසි.
768. වණ්ණරොහෙන ජාතියා බලනික්කමණෙන ච, සුදාඨො න මයා සෙය්යො සුබාහු ඉති භාසති.
769. එවඤ්චෙ මං විහරන්තං සුබාහු සම්ම දුබ්භසි, නදානාහං තයා සද්ධිං සංවාසමභිරොචයෙ.