දුමකංසවරුත්තම බ්යග්ඝමිගා මණියො මණි සාලුකමව්හයනො, අනුසාසනියොපි ච මච්ඡවරො මණිකුණ්ඩලකෙන කිරෙන දසාති
5. කුම්භවග්ගො
478. සබ්බකාමද්දං කුම්භං කුටං{1} ලද්ධාන ධුත්තකො, යාව සො{2} අනුපාලෙති තාව සො සුඛමෙධති.
479. යදා මත්තො ච දිත්තො ච පමාදා කුම්භමබ්භිදා, තතො නග්ගො ච පොත්ථො ච පච්ඡා බාලො විහඤ්ඤති
480. එවමෙව යො ධනං ලද්ධා අමත්තා පරිභුඤ්ජති, පච්ඡා තපති දුම්මෙධො කූටං භින්නොව ධුත්තකො’ති.
1. භද්රඝටජාතකං{3}.
481. බාරාණස්සං{4} මහාරාජ කාකරාජා නිවාසිකො{5}, අසීතියා සහස්සෙහි සුපත්තො පරිවාරිතො.
482. තස්ස දොහළිනී භරියා සුඵස්සා මච්ඡමිච්ඡති,{6} රඤ්ඤො මහානසෙ පක්කං පච්චගඝං රාජභොජනං.
483. තෙසාහං පහිතො දූතො රඤ්ඤො චම්හි ඉධාගතො, භත්තු අපචිතිං කුම්මි නාසායමකරං වණන්ති.
2. සුපත්තජාතකං.
484. ඵුට්ඨස්ස මෙ අඤ්ඤතරෙන ව්යාධිනා රොගෙන බාළ්හං දුඛිතස්ස රුප්පතො, පරිසුස්සති ඛිප්පමිදං කළෙබරං පුප්ඵං යථා සංසුනි ආතපෙ කතං.
485. අජඤ්ඤං ජඤ්ඤසඞ්ඛාතං අසුචිං සුචිසම්මතං, නානාකුණපපරිපූරං ජඤ්ඤරූපං අපස්සතො
486. ධිරත්ථු තං ආතුරං පූතිකායං ජෙගුච්ඡියං අසුචිං බ්යාධිධම්මං, යත්ථප්පමන්තා අධිමුච්ඡිතා පජා හාපෙන්ති මග්ගං සුගතූපපත්තියා’ති
3. කායවිච්ඡන්දජාතකං.
487. කොයං බින්දුස්සරො වග්ගු පවදන්තානමුත්තමො, අච්චුතො ජම්බුසාඛාය මොජච්ඡාපොව කූජති.
488. කුලපුත්තොව ජානාති කුලපුත්තෙ පසංසිතුං, ව්යග්ඝච්ඡාපසරීවණ්ණො{1} භුඤ්ජ සම්ම දදාමි තෙ.
489. චිරස්සං වත පස්සාමි මුසාවාදී සමාගතෙ, වන්තාදං කුණපාදඤ්ච අඤ්ඤමඤ්ඤං පසංසකෙ’ති.
4. ජම්බුඛාදකජාතකං.
490. උසභස්සෙව තෙ ඛන්ධො සීහස්සෙව විජම්හිතං, මිගරාජ නමොත්යුත්ථු අපි කිඤ්චි ලභාමසෙ.
491. කුලපුත්තොව{2} ජානාති කුලපුත්තෙ පසංසිතුං, මයූරගීවසඞ්කාස ඉතො පරියාහි වායස.
492. මිගානං කොත්ථුකො{3} අන්තො පක්ඛීනං පන වායසො, එරණ්ඩො අන්තො රුක්ඛානං තයො අන්තා සමාගතා’ති.
5. අන්තජාතකං.
493. කොනායං{4} ලොණතොයස්මිං සමන්තා පරිධාවති, මච්ඡෙ මකරෙ ච වාරෙති ඌමීසු{5} ච විහඤ්ඤති.
494. අනන්තපායී සකුණො අතිත්තොති දිසාසුතො, සමුද්දං පාතුමිච්ඡාමි සාගරං සරිතං පතිං.
495. ස්වායං හායති චෙව පුරතෙ ච මහොදධි, නාස්ස නායති පීතන්තො{6} අපෙය්යො කිර සාගරො’ති.
6. සමුද්දජාතකං.
496. උච්චෙ සකුණ ඩෙමාන{1} පත්තයාන විහඞ්ගම, වජ්ජාසි ඛො ත්වං වාමූරුං චිරං ඛො සා කරිස්සති.
497. ඉදං ඛො සා න ජානාති අසිං සත්තිඤ්ච ඔඩ්ඩිතං, සා චණ්ඩී කාහති කොධං තං මෙ තපති නො ඉධ{2}.
498. එස උප්පලසන්නාහො නික්ඛමුස්සිසකෙ{3} කතං, කාසිකඤ්ච මුදුං වත්ථං තප්පතු{4} ධනකාමිකා’ති{5}.
7. කාමවිලාපජාතකං.
499. උදුම්බරා චිමෙ පක්කා නිග්රොධා ච කපිත්ථනා, එහි නික්ඛම{6} භුඤ්ජස්සු කිං ජිඝච්ඡාය මීයසි.
500. එවං සො සුහිතො හොති යො වද්දමපචායති,{7} යථාහමජ්ජ සුහිතො දූමපක්කානිමාසිතො.
501. යං වනෙජො වනෙජස්ස වඤ්චෙය්ය කපිනො කපි, දහරොපි{8} තං න සද්ධෙය්ය න හි ජිණ්ණො ජරාකපි’ති.
8. උදුම්බරජාතකං.
502. පුරෙ තුවං සීලවතං සකාසෙ ඔක්කන්දිකං{9} කීළසි අස්සමම්හි, කරොහරෙ මක්කටියානි මක්කට න තං මයං සීලවතං රමාම.
503. සුතා හි මය්හං පරමා විසුද්ධි කොමායපුත්තස්ස{10} බහුස්සුතස්ස, මාදානි මං මඤ්ඤි තුවං යථා පුරෙ ඣානානුයුත්තා{11} විහරාම ආවුසො.
504. සචෙපි සෙලස්මිං වපෙය්ය බීජං දෙවො ච වස්සෙ නෙව හි තං රුහෙය්ය, සුතා හි තෙ සා පරමා විසුද්ධි ආරා තුවං මක්කට ඣානභූමියාති.
9. කොමායපුත්තජාතකං{1}.
505. පරපාණරොධා{2} ජීවන්තො මංස ලොහිතභොජනො{3}, වකො වතං සමාදාය{4} උපපජ්ජි උපොසථං.
506. තස්ස සක්කො වතඤ්ඤාය අජරූපෙනුපාගමි, වීතතපො{5} අජ්ඣප්පත්තො{6} භඤ්ජි ලොහිතපො තපං.
507. එවමෙවං ඉධෙකච්චෙ සමාදානස්මිං දුබ්බලා, ලහුං කරොන්ති අත්තානං වකොව අජකාරණා’ති.
10. වකජාතකං.
කුම්භවග්ගො පඤ්චමො.
තස්සුද්දානං:
වරකුම්භසුපත්තසිරිව්හයනො සුචිසම්මතබින්දුවරො චූසභො, සරිතංපතිචණ්ඩිජරාකපිනා අථ මක්කටියා වකකෙන දසාති.
තිකනිපාතො නිට්ඨිතො.
වග්ගුද්දානං:
සඞ්කප්පො පදුමො චෙව උදපානෙන තතියං, අබ්භන්තරං ඝටභෙදං තිකනිපාතම්බි ලඞ්කතන්ති.
4. චතුක්කනිපාතො
1. විවරවග්ගො
508. විවරථ{1} ඉමාසං ද්වාරං නගරං පවිසිතුං මයා, අරුණරාජස්ස සීහෙන සුසිට්ඨෙන සුරක්ඛිතං නන්දිසෙනෙන{2}.
509. ජයො කලිඞ්ගානං අසය්හසාහිනං පරාජයො අනයො අස්සකානං, ඉච්චෙව තෙ භාසිතං බ්රහ්මචාරී න උජජුභූතා විතථං භණන්ති
510. දෙවා මුසාවාදමුපාතිවත්තා සච්චං{3} ධනං පරමං තෙසු සක්ක, තං තෙ මුසාභාසිතං දෙවරාජ කිං වා පටිච්ච මඝවා මහින්ද.
511. නනු තෙ සුතං බ්රාහ්මණ භඤ්ඤමානෙ ද්වො න ඉස්සන්ති පුරිසපරක්කමස්ස, දමො සමාධි මනසො අදෙජ්ඣො{4} අව්යග්ගතා නික්ඛමනඤ්ච කාලෙ, දළ්හඤ්ච විරියං පුරිසපරක්කමො ච තෙනෙව ආසි විජයො අස්සකානන්ති.
1. චුල්ලකාලිඞ්ගජාතකං.
512. අදෙය්යෙසු දදං දානං දෙය්යෙසු නප්පවෙච්ඡති{5}. ආපාසු{6} ව්යසනං පත්තො සහායං නාධිගච්ඡති.
513. නාදෙය්යෙසු දදං දානං දෙය්යෙසු යො පවෙච්ඡති, ආපාසු ව්යසනං පත්තො සහායමධිගච්ඡති.
514. සඤ්ඤොගසම්භොගවිසෙසදස්සනං. අනරියධම්මෙසු සඨෙසු නස්සති, කතඤ්ච අරියෙසු ච අඤ්ජසෙසු ච මහප්ඵලං හොති අණුම්පි{1} තාදිසු.
515. යො පුබ්බෙ කතකල්යාණො අකා ලොකෙ සුදුක්කරං, පච්ඡා කයිරා න වා කයාරා අච්චන්තං පූජනාරහො’ති.
2. මහාඅස්සාරොහජාතකං.
516. අනුත්තරෙ{2} කාමගුණෙ සමිද්ධෙ භුත්වාන පුබ්බෙ වසි{3} එකරාජා, සොදානි දුග්ගෙ නරකම්භි ඛිත්තො නප්පජහෙ වණ්ණබලං පුරාණං.
517. පුබ්බෙව ඛන්ති ච තපො ච මය්හං සම්පත්ථිතා දබබසෙනා{4} අහොසි, තංදානි ලද්ධාන කථන්නු රාජ ජහෙ අහං වණ්ණබලං පුරාණං.
518. සබ්බං කිරෙව{5} පරිනිට්ඨිතානි යසස්සිනං පඤ්ඤවන්තං{6} විසය්හ, යසො ච ලද්ධා පුරිමං{7} උළාරං නප්පජහෙ වණ්ණබලං පුරාණං.
519. පනුජ්ජ දුක්ඛෙන සුඛං ජනින්ද සුඛෙන චා දුක්ඛමසය්හසාහි, උභයත්ථ සන්තො{8} අභිනිබ්බුතත්තා සුඛෙ ච දුක්ඛෙ ච භවන්ති තුල්යා’ති
3. එකරාජජාතකං.
520. ඉමානි මං දද්දර තාපයන්ති වාචාදුරුත්තානි නුස්සලොකෙ, මණ්ඩූකභක්ඛා උදකන්තසෙවි ආසීවිසං{9} මං අවිසා සපන්ති.
521. සකා රට්ඨා පබ්බාජිතො{1} අඤ්ඤං ජනපදං ගතො, මහන්තං කොට්ඨං කයිරාථ දුරුත්තානං නිධෙතවෙ.
522. යත්ථ පොසං න ජානන්ති ජාතියා විනයෙන වා, න තත්ථ මානං කයිරාථ වසමඤ්ඤාතකෙ ජනෙ.
523. විදෙසවාසං වසතො ජාතවෙදසමෙනපි, ඛමිතබ්බං සපඤ්ඤෙන අපි දාසස්ස තජ්ජිතන්ති.
4. දද්දරජාතකං.
524. නත්ථි ලොකෙ රහො නාම පාපකම්මං පකුබ්බතො, පස්සන්ති වනභූතානි තං බාලො මඤ්ඤතී{2} රහො.
525. අහං රහො න පස්සාමි සුඤ්ඤං වාපි න විජ්ජති, යත්ථ අඤ්ඤං න පස්සාමි අසුඤ්ඤං හොති තං මයා.
526. දුජ්ජච්චො ච{3} සුජච්චො ච නන්දො ච සුඛවචඡකො, වෙජ්ජො අද්ධුවසීලො ච තෙ ධම්මං ජහුමත්ථිකා.
527. බ්රාහ්මණෙ ච කථං ජහෙ සබ්බධම්මානපාරගූ, යො ධම්මමනුපාලෙති ධිතිමා සච්චනික්කමොති.
5. සීලවීමංසජාතකං.
528. තිං අණ්ඩකා ඉමෙ දෙව නික්ඛිත්තා කංසමල්ලකෙ, උපලොහිතකා වග්ගු තං{4} මෙ අක්ඛාහි පුච්ඡිතො.
529. යානි පුරෙ ත්වං දෙවි භණ්ඩු නන්තකවාසිනී, උච්ඡඞ්ගහත්ථා පචිනාසි තස්සා තෙ කොලියං ඵලං.
530. උඩ්ඩය්හතෙ{5} න රමති භොගා විප්පජහන්ති තං, තත්ථෙවිමං පටිනෙථ යත්ථ කොලං පචිස්සති.
531. හොන්ති හෙතෙ මහාරාජ ඉද්ධිප්පත්තාය{1} නාරියා, ඛම දෙව සුජාතාය මාස්සා{2} කුජ්ඣි{3} රථෙසභාති.
6. සුජාතාජාතකං.
532. අචෙතනං බ්රාහ්මණ අස්සුණන්තං ජානො අජානන්තමිමං පලාසං, ආරද්ධවිරියො ධුවං අප්පමත්තො සුඛසෙය්යං පුච්ඡසි කිස්ස හෙතු.
533. දූරෙ සුතො චෙව බ්රහා ච රුක්ඛො දෙසෙ ඨිතො භූතනිවාසරූපො, තස්මා නමස්සාමි ඉමං පලාසං යෙ චෙත්ථා භූතා තෙ ච ධනස්ස හෙතු.
534. සො තෙ කරිස්සාමි යථානුභාවං. කතඤ්ඤුතං බ්රාහ්මණ පෙක්ඛමානො, කථං හි ආගම්ම සතං සකාසෙ මොඝානි{4} තෙ අස්සු පරිඵන්දිතානි.
535. යො තින්දුරුක්ඛස්ස පරො{5} පිලක්ඛූ පරිවාරිතො පුබ්බයඤ්ඤො උළාරො, තස්සෙව මූලස්මිං නිධී නිඛාතො ආදායාදො ගච්ඡ තං උද්ධාරාහී’ති.
7. පලාසජාතකං.
536. අකරම්හසතෙ කිච්චං යං බලං අහුවම්භසෙ, මිගරාජ නාමො ත්යුත්ථු අපි කිඤ්චි ලභාමසෙ.
537. මම ලොහිතභක්ඛස්ස නිච්චං ළුද්දානි කුබ්බතො, දන්තන්තරගතො සන්තො තං බහුං යම්පි{6} ජීවසි.
538. අකතඤ්ඤුමකත්තාරං කතස්ස අප්පතිකාරකං{7}, යස්මිං කතඤ්ඤුතා නත්ථි නිරත්ථා තස්ස සෙවනා.
539. යස්ස{8} සම්මුඛචිණ්ණෙන{9} මිත්තධම්මො න ලබ්භති, අනුසුය්ය{10}මනක්කොසං සණිකං තම්හා අපක්කමෙ’ති.
8. ජවසකුණජාතකං.
540. සබ්බමිදං{1} චරිමවතං උභො ධම්මං න පස්සරෙ, උභො සකතියා චුතා යොචායං සජ්ඣාපයති{2}. යො ච ධම්මං අධීයති.
541. සාලීන භොජනං{3} භුඤෙජ සුචිං මංසූපසෙචනං, තස්මා එතං න සෙවාමි ධම්මං ඉසීහි සෙවිතං.
542. පරිබ්බජ මහා ලොකො{4} පචන්තඤ්ඤෙපි පාණිනො, මා{5} තං අධම්මො ආචරිතො අස්මා කුම්භමිවාභිදා.
543. ධිරත්ථු තං යසලාභං ධනලාභඤ්ච බ්රාහ්මණ, යා වුත්ති විනිපාතෙන අධම්මචරණෙන වා’ති.
9. ඡවකජාතකං{6}.
544. සසමුද්දපරියායං මහිං සාගරකුණ්ඩලං න ඉච්ඡෙ සහනින්දාය එවං සය්හ විජානහි.
545. ධිරත්ථු තං යසලාභං ධනලාභඤ්ච බ්රාහ්මණ, යා වුත්ති විනිපාතෙන අධම්මචරණෙන වා.
546. අපි චෙ පත්තමාදාය අනාගාරො{7} පරිබ්බජෙ, සායෙව{8} ජිවිකා සෙය්යො යා චාධම්මෙන එසනා.
547. අපි චෙ පත්තමාදාය අනාගාරො පරිබ්බජෙ, අඤ්ඤං අහිංසයං ලොකෙ අපි රජ්ජෙන තං වරන්ති.
10. සය්හජාතකං.