1442. යා තෙ සා භරියා අනරියරූපා. මාතා මමෙසා සකියා{1} ජනෙත්ති නිද්ධාපයෙතං සකා අගාරා අඤ්ඤම්පි තෙ සා දුඛ{2}මාවහෙය්ය.
1443. යා තෙ සා භරියා අනරියරූපා. මාතා මමෙසා සකියා ජනෙත්ති දන්තා කරෙණුව වසූපනීතා සා පාපධම්මා පුනරාවජාතූති.
8. තක්කලජාතකං.
1444. කින්තෙ වතං කිම්පන බ්රහ්මචරියං කිස්ස සුචිණ්ණස්ස අයං විපාකො, අක්ඛාහි මෙ බ්රාහ්මණ එතමත්ථං කස්මා හි තුම්හං දහරා න මීයරෙ.
1445. ධම්මං චරාම න මුසා භණාම පාපානි කම්මානි විවජ්ජයාම, අනරියං පරිවජ්ජෙමු සබ්බං තස්මා හි අම්හං දහරා න මීයරෙ.
1446. සුණොම ධම්මං අසතං සතං ච න චාපි ධම්මං අසතං රොචයාම හිත්වා අසන්තෙ න ජහාම සන්තෙ තස්මා හි අම්හං දහරා න මීයරෙ.
1447. පුබ්බෙව දානා සුමනා භවාම දදම්පි චෙ අත්තමනා භවාම, දත්වාපි චෙ නානුතප්පාම{3} පච්ඡා තස්මා හි අම්හං දහරා න මීයරෙ.
1448. සමණෙ මයං බ්රාහ්මණෙ අද්ධිකෙ ච වණිබ්බකෙ යාචනකෙ දළිද්දෙ, අන්නෙන පානෙන අභිතප්පයාම{4} තස්මා හි අම්හං දහරා න මීයරෙ.
1449. මයඤ්ච භරියා නාතික්කමාම අම්හෙ ච භරියා නාතික්කමන්ති, අඤ්ඤත්ර තාහි බ්රහ්මචරියං චරාම තස්මා හි අම්හං දහරා න මීයරෙ.
1450. පාණාතිපාතා විරමාම සබ්බෙ ලොකෙ අදිදන්නං පරිවජ්ජයාම, අමජ්ජපා නො ච මුසා භණාම තස්මා හි අම්හං දහරා න මීයරෙ.
1451. එතාසු චෙ ජායරෙ සුත්තමාසු මෙධාවිනො හොන්ති පහූතපඤ්ඤා{1} බහුස්සුතා වෙදගුනො ච{2} හොන්ති තස්මා හි අම්හං දහරා න මීයරෙ.
1452. මාතාපිතා ච භගිනී භාතරො ච පුත්තා ච දාරා ච මයඤ්ච සබ්බෙ, ධම්මං චරාම පරලොකහෙතු. තස්මා හි අම්හං දහරා න මීයරෙ.
1453. දාසා ච දස්සො{3} අනුජීවිනො ච පරිචාරකා කම්මකරා ච සබ්බෙ, ධම්මං චරන්ති පරලොකහෙතු තස්මා හි අම්හං දහරා න මීයරෙ.
1454. ධම්මො හවෙ රක්ඛති ධම්මචාරිං ධම්මො සුචිණ්ණො සුඛමාවහාති එසානිසංසො ධම්මො සුචිණ්ණෙ න දුග්ගතිං ගච්ඡති ධම්මචාරී.
1455. ධම්මො හවෙ රක්ඛති ධම්මචාරිං ඡත්තං මහන්තං විය වස්සකාලෙ, ධම්මෙන ගුත්තො මම ධම්මපාලො අඤ්ඤස්ස අට්ඨීනි සුඛී කුමාරොති.
9. මහාධම්මපාලජාතකං.
1456. නාස්මසෙ කතපාපම්හි නාස්මසෙ අලිකවාදිනෙ, නාස්මසත්තට්ඨපඤ්ඤම්හි{1} අතිසන්තෙපි{2} නාස්මසෙ.
1457. භවන්ති හෙකෙ පුරිසා ගොපිපාසකජාතිකා, ඝසන්ති මඤ්ඤෙ මිත්තානි වාචාය න ච කම්මුනා
1458. සුක්ඛඤ්ජලී පග්ගහිතා වාචාය පළිගුණ්ඨිතා මනුස්සඵෙග්ගු නාසීදෙ යස්මිං නත්ථි කතඤ්ඤුතා.
1459. න හි අඤ්ඤඤ්ඤ{3} චිත්තානං ඉත්ථීනං පුරීසාන{4} වා, නානාව කත්වා සංසග්ගං තාදිසම්පි නාස්මසෙ.
1460. අනරියකම්මං ඔක්කන්තං{5} අත්ථෙතං{6} සබ්බ ඝාතිනං,{7} නිසිතංව පටිච්ඡන්නං තාදිසම්පි නාස්මසෙ.
1461. මිත්තරූපෙනිධෙකච්චෙ සාඛල්ලෙන{8} අචෙතසා, විවිධෙහි උපායෙහි{9} තාදිසම්පි නාස්මසෙ.
1462. ආමිසං වා ධනං වාපි යත්ථ පස්සති තාදිසො, දූභිං{10} කරොති දුම්මෙධො තඤ්ච ඣත්වාන{11} ගච්ඡති.
1463. මිත්තරූපෙන බහවො ඡන්නා සෙවන්ති සත්තවො, ජහෙ කාපුරිසෙහෙතෙ කුක්කුටො විය සෙනකං.
1464. යො ච උප්පතිතං අත්ථං න ඛිප්පමනුබුජ්ඣති, අමිත්තවසමන්වෙති පච්ඡා ච මනුතප්පති.
1465. යො ච උප්පතිතං අත්ථං ඛිප්පමෙව නිබොධති, මුච්චතෙ සත්තුසම්බාධා කුක්කුටො විය සෙනකා.
1466. තං තාදිසං කුටමිවොඩ්ඩිතං{12} වනෙ අධම්මිකං නිච්චවිධංසකාරිනං, ආරා විවජ්ජෙය්ය නාරො විචක්ඛණො සෙනං යථා කුක්කුටො වංසකානනෙ’ති.
10. කුක්කුටජාතකං.
1467. අලඞ්කතො මට්ටකුණ්ඩලී මාලාභාරි හරිචන්දනුස්සදො, බාහා පග්ගය්හ කන්දසි වනමජ්ඣෙ කිං දුක්ඛිතො තුවං.
1468. සොවණ්ණමයො පභස්සරො උප්පන්නො අථපඤ්ජරො මම තස්ස චක්කයුගං න වින්දාමි තෙන දුක්ඛෙන ජහාමි ජිතිතං.
1469. සොවණ්ණමයං මණිමයං ලොහමයං අථ රූපියාමයං, පාවද රථං කාරයාමි තෙ චක්කයුගං පටිපාදයාමි තං.
1470. සො මාණවො තස්ස පාවදි චන්දසුරියා උභයෙත්ථ භාතරො, සොවණ්ණමයො රථො මම තෙන චක්කයුගෙන සොභති.
1471. බාලො ඛො ත්වමසි මාණව යො ත්වං පත්ථයසෙ අපත්ථියං,{1} මඤ්ඤාමි තුවං මරිස්සසි න හි ත්වං{2} ලච්ඡසි චන්දසූරියෙ.
1472. ගමනාගමනම්පි දිස්සති වණ්ණධාතු උභයෙත්ථ වීථියො. පෙතො පන නෙව දිස්සති කො නු ඛො කන්දතං බාල්යතරො.
1473. සච්චං ඛො වදෙසි මාණව අහමෙව කන්දතං බාල්යතරො, චන්දං විය දාරකො රුදං පෙතං කාලකතාභිපත්ථයෙ.
1474. ආදිත්තං වත මං සන්තං ඝතසිත්තං ව පාවකං, වාරිනා විය ඔසිඤ්චං සබ්බං නිබ්බාපයෙ දරං.
1475. අබ්බහී{3} වත මෙ සල්ලං යමාසි හදයනිස්සිතං,{4} යො මෙ සොකපරෙතස්ස පුත්තසොකං අපානුදි.
1476. සොහං අබ්බූළ්හසල්ලොස්මි වීතසොකො අනාවිලො, න සොචාමි න රොදාමි තව සුත්වාන මාණවාති.
11. මට්ටකුණ්ඩලීජාතකං.
1477. අපචන්තාපි{1} දිච්ඡන්ති සන්නො ලද්ධාන භොජනං, කිමෙව ත්වං පචමානො යං න දජ්ජා න තං සමං.
1478. මච්ඡෙරා ච පමාදා ච එවං දානං න දීයති, පුඤ්ඤං ආකඞ්ඛමානෙන දෙය්යං හොති විජානතා.
1479. යස්සෙව භීතො න දදාති මච්ඡරී තදෙව අදදතො භයං, ජිඝච්ඡා ච පිපාසා ච යස්ස භායති මච්ඡරී. තමෙව බාලං ඵුසති{2} අස්මිං ලොකෙ පරම්හි ච.
1480. තස්මා විනෙය්ය මච්ඡෙරං දජ්ජා දානං මලාභිභූ, පුඤ්ඤානි පරලොකස්මිං පතිට්ඨා හොන්ති පාණිනං.
1481. දුද්දදං දදමානානං දුක්කරං කම්ම කුබ්බතං, අසන්තො නානුකුබ්බන්ති සතං ධම්මො දුරන්නයො.
1482. තස්මා සතඤ්ච අසතඤ්ච නානා හොති ඉතො ගති, අසන්තො නිරයං යන්ති සන්තො සග්ගපරායනා.
1483. අප්පස්මෙකෙ පවෙච්ඡින්ති{3} බහුනෙකෙ{4} න දිච්ඡරෙ, අප්පස්මා දක්ඛිණා දින්නා සහස්සෙන සමං මිතා.
1484. ධම්මං චරෙ යොපි සමුඤ්ජකං{5} චරෙ දාරඤ්ච{6} පොසං දදං අප්පකස්මිං, සතං සහස්සානං සහස්සයාගිනං කලම්පි නාග්ඝන්ති තථාවිධස්ස තෙ.
1485. කෙනෙස යඤ්ඤො විපුලො මහග්ඝනො සමෙන දින්නස්ස න අග්ඝමෙති, කථං සහස්සානං සහස්ස යාගිනං කලම්පි නාග්ඝන්ති තථාවිධස්ස තෙ.
1486. දදන්ති හෙකෙ විසමෙ නිවිට්ඨා ඣත්වා{7} වධිත්වා අථ සොචයිත්වා, සා දක්ඛිණා අස්සුමුඛා සදණ්ඩා සමෙන දින්නස්ස න අග්ඝමෙති එවං සහස්සානං සහස්සයාගිනං කලම්පි නාග්ඝන්ති තථාවිධස්ස තෙ’ති.
12. ඛිළාරකොසියජාතකං.
1487. වණ්ණවා අභිරූපොසි ඝනො සඤ්ජාතරොහිතො, චක්කවාක සුරූපොසි විප්පසන්නමුඛින්ද්රියො.
1488. පාඨිනං{1} පාවුසං මච්ඡං වලජං මුඤ්ජරොහිතං. ගඞ්ගාය තීරෙ නිසින්නො{2} එවං භුඤ්ජසි භොජනං.
1489. න චාහමෙතං භුඤ්ජාමි ජඞ්ගලා නොදකානි වා, අඤ්ඤත්ර සෙවාලපණකා එතං මෙ සම්ම භොජනං.
1490. න චාහමෙතං සද්දහාමි චක්කවාකස්ස භොජනං, අභං හි{3} සම්ම භුඤ්ජාමි ගාමෙ ලොණියතෙලියං.
1491. මනුස්සෙසු කතං භත්තං සුචිමංසූපසෙචනං, න ච මෙ තාදිසො වණ්ණො චක්කවාක යථා තවං.
1492. සම්පස්සං අත්තනි වෙරං හිංසයං{4} මානුසිං පජං, උත්රස්තො ඝසසී භීතො තෙන වණ්ණො තවෙදිසො.
1493. සබ්බලොක විරද්ධොසි{5} ධඞ්ක පාපෙන කම්මුනා, ලද්ධො පිණ්ඩො න පීණෙති තෙන වණ්ණො තවෙදිසො.
1494. අහම්පි සම්ම භුඤ්ජාමි අහිංසා{6} සබ්බපාණිනං. අප්පොස්සුක්කො නිරාසඞ්කී අසොකො අකුතො භයො.
1495. සො කරස්සු අනුභාවං වීතිවත්තස්සු සීලියං, අහිංසාය වරං ලොකෙ පියො හොහිසි මම්මිව.
1496. යො න හන්ති න ඝාතෙති න ජිනාති න පාපයෙ, මෙත්තංසො සබ්බභූතෙසු වෙරං තස්ස න කෙනචීති.
13. චක්කවාකජාතකං.
1497. සච්චං කිර ත්වම්පි භූරිපඤ්ඤො{1} යා තාදිසී සිරි ධිතී මුතී{2} ච, න තායතෙ භාවවසූපනීතං යො යාවකං භුඤ්ජසි අප්පසූපං.
1498. සුඛං දුක්ඛෙන පරිපාචයන්තො කාලාකාලං විචිනං ඡන්දඡන්තො,{3} අත්ථස්ස ද්වාරානි අවාපුරන්තො තෙනාහං{4} තුස්සාමි යවොදනෙන.
1499. කාලඤ්ච ඤත්වා අභිජීහනාය මන්තෙහි අත්ථං පරිපාචයිත්වා, විජම්හිස්සං{5} සීහවිජම්හිතානි තායිද්ධියා දක්ඛසි මං පුනාපි.
1500. සුඛීහි එකෙ{6} න කාරොන්ති පාපං. අවණණසංසග්ගහයා පුනෙකෙ, පහූ සමානො විපුලත්ථචින්ති කිං කාරණා මෙ න කරොසි දුක්ඛං.
1501. න පණ්ඩිතා අත්තසුඛස්ස හෙතු පාපානි කම්මානි සමාචරන්ති, දුක්ඛෙන ඵුට්ඨා ඛලිතත්තාපි සන්තා ඡන්දා ච දොසා න ජහන්ති ධම්මං.
1502. යෙන කෙනචි වණ්ණෙන මුදුනා දාරුණෙන වා, උද්ධරෙ දීනමන්තානං පච්ඡා ධම්මං සමාචරෙ.
1503. යස්ස රුක්ඛස්ස ඡායාය නිසීදෙය්ය සයෙය්ය වා, න තස්ස සාඛං භඤ්ජෙය්ය මිත්තදුබ්භො හි පාපකො.
1504. යස්සාහි ධම්මං{7} මනුජො විජඤ්ඤා යෙචස්ස කඞ්ඛං විනයන්ති සන්තො, තං හිස්ස දීපඤ්ච පරායණඤ්ච න තෙන මිත්තං ජරයෙථ{8} පඤ්ඤො.
1505. අලසො ගිහී කාමභොගී න සාධු අසඤ්ඤතො පබ්බජිතො න සාධූ, රාජා න සාධූ අනිසම්මකාරි යො පණ්ඩිතො කොධනො තං න සාධු.
1506. නිසම්ම ඛත්තියො කයිරා නානිසම්ම දිසම්පති, නිසම්මකාරිනො රාජ යසො කින්ති ච වඩ්ඪතීති.
14. භූරිපඤ්ඤජාතකං.
1507. කිං සු නරො ජප්පමධිච්චකාලෙ කං වා විජ්ජං කතමං වා සුතානං, සො මච්චො අස්මිඤ්ච පරම්හි ලොකෙ කථං කරො සොත්ථානෙන ගුත්තො.
1508. යස්ස දෙවා පිතරො ච සබ්බ සිරිංසපා{1} සබ්බභූතානි චාපි, මෙත්තාය නිච්චං අපචිතානි හොන්ති භූතෙසු චෙ සොත්ථානං තදාහු.
1509. යො පබ්බලොකස්ස නිවාතවුත්ති ඉත්ථි පුමානං සහ දාරකානං, ඛන්තා දුරුත්තානං අපටික්කූලවාදී අධිවාසනං සොත්ථානං තදාහු.
1510. යො නාවජානාති සහායමත්තෙ සිප්පෙන කුල්යාහි ධනෙන ජච්චා, රුචිපඤ්ඤො අත්ථකාලෙ මුතීමා සහායෙසු වෙ සොත්ථානං තදාහු.
1511. මිත්තානි වෙ යස්ස භවන්ති සන්තො සංවිස්සත්ථා{2} අවිසංවාදකස්ස, න මිත්තදූභි{3} සංවිහාගි ධනෙන මිත්තෙසු වෙ සොත්ථානං තදාහු
1512. යස්ස භරියා තුල්යවයා සමග්ගා අනුබ්බතා ධම්මකාමා පජාතා,{4} කොලීනියා සීලවතී පතිබ්බතා දාරෙසු වෙ සොත්ථානං තදාහු.
1513. යස්ස රාජා භූතපතී යසස්සි ජානාති සොචෙය්යං{1} පරක්කමඤ්ච, අද්වෙජ්ඣතාසු{2} හදයං මමන්ති රාජුසු වෙ සොත්ථානං තදාහු.
1514. අන්නඤ්ච පානඤ්ච දදාති සද්ධො මාලඤ්ච ගන්ධඤ්ච විලෙපනඤ්ච,{3} පසන්නචිත්තො අනුමොදමානො සග්ගෙසු වෙ සොත්ථානං තදාහු.
1515. යමරියධම්මෙන පුනන්ති වද්ධා{4} ආරාධිතා සමචරියාය සන්තො, බහුස්සුතා ඉසයො{5} සීලවන්තං අරහන්තමජ්ඣෙ සොත්ථානං තදාහු.
1516. එතානි ඛො සොත්ථානාති ලොකෙ විඤ්ඤුප්පසත්ථානි{6} සුඛුද්රයානි, තානීධ සෙවෙථ නාරො සපඤ්ඤො න හි මඞ්ගලෙ කිඤ්චනමත්ථි{7} සච්චන්ති.
15. මහාමඞ්ගලජාතකං.
1517. උට්ඨෙහි කණ්හ කිං සෙසි කො අත්ථො සුපිනෙ තෙන යොපි තුය්හ සකො භාතා හදයං චක්ඛුඤ්ච{8} දක්ඛිණං තස්ස වාතා බලීයන්ති ඝතො ජප්පති කෙසව.
1518. තස්සස තං වචනං සුත්වා රොහිණෙය්යස්ස කෙසවො, තරමානරූපො වුට්ඨාසි භාතුසොකෙන අට්ටිතො.
1519. කින්නු උම්මත්තරූපොව කෙවලං ද්වාරකං ඉමං, සසො සසොති ලපසි කො නු තෙ සසමාහරි.
1520. සොවණ්ණමයං මණිමයං ලොහමයං අථ රූපියාමයං, සඞ්ඛසිලාපවාළමයං කාරයිස්සාමි තෙ සසං.
1521. සන්ති අඤ්ඤෙපි සසකා අරඤ්ඤෙ වනගොචරා, තෙපි තෙ ආනයිස්සාමි කීදිසං සසමිච්ඡසි.
1522. නචාහමෙතං ඉච්ඡාමි යෙ සසා පඨවිං සිතා, චන්දතො සසමිච්ඡාමි තම්මෙ ඔහර කෙසව.
1523. සො නූන මධුරං ඤාති ජීවිතං විජහිස්සසි, අපත්ථියං යො පත්ථයසි චන්දතො සසමිච්ඡසි.
1524. එවඤ්චෙ කණ්හ ජානාසි යදඤ්ඤමනුසාස්සි. කස්මා පුරෙ මතං පුත්තං අජ්ජාපිමනුසොචසි.
1525. යං න ලබ්භා මනුස්සෙන අමනුස්සෙන වා පුන,{1} ජාතො මෙ මාමරි පුත්තො කුතො ලබ්භා අලබ්භියං.
1526. න මන්තා මූලභෙසජ්ජා ඔසධෙහි ධනෙන වා, සක්කා ආනයිතුං කණ්හා යම්පෙතමනුසොචසි.
1527. යස්ස එතාදිසා අස්සු අමච්චා පුරිසපණ්ඩිතා, යථා නිජ්ඣාපයෙ අජ්ජ ඝතො පුරිසපණ්ඩිතො.
1528. ආදිත්තං වත මං සන්තං ඝතසිත්තං ව පාවකං, වාරිනා විය ඔසිඤ්චං සබ්බං නිබ්බාපයෙ දරං.
1529. අබ්බහී වත මෙ සල්ලං යමාසි හදයනිස්සිතං, යො මෙ සොකපරෙතස්ස පුත්තසොකං අපානුදි.
1530. සොහං අබ්බූළ්හසල්ලොස්මි වීතසොකො අනාවිලො, න සොචාමි න රොදාමි තව සුත්වාන මාණව.
1531. එවං කරොන්ති සප්පඤ්ඤා යෙ හොන්ති අනුකම්පකා, නිවත්තයන්ති සොකම්හා ඝතො ජෙට්ඨංව භාතරන්ති:
16. ඝතපණ්ඩිතජාතකං.
දසකනිපාතං නිට්ඨිතං.