1264. සොහං සතං අඤ්ඤතරොස්මි හංස ඤාතී ච මෙ හොති සඛා ච රුක්ඛො, තං නුස්සහෙ ජීවිකත්ථො පහාතුං ඛීණන්ති ඤත්වාන නහෙසධම්මො.
1265. සාධු සක්ඛිකතං හොති මෙත්ති{4} සංසති සන්ථවො, සචෙ තං ධම්මං රොචෙසි පාසංසොසි විජානතං.
1266. සො තෙ සුව වරං දම්මී පත්තවාන විහඞ්ගම, වරං වරස්සු වක්කඞ්ග යං කිඤ්චි මනසිච්ඡසි.
1267. වරඤ්ච මෙ හංස භවං දදෙය්ය අයං{5} හි රුක්ඛො පුනරායුං ලභෙථ, සො සාඛවා ඵලිමා සංවිරූළ්හො මධුත්ථිකො තිට්ඨතු සොභමානො.
1268. තං පස්ස සම්ම එලිමං උළාරං සහාව තෙ හොතු උදුම්බරෙන, සො සාඛවා එලිමා සංවිරූළ්හො මධුත්ථිකො තිට්ඨතු සොභමානො.
1269. එවං සක්ක සුඛී හොහි සහ සබ්බෙහි ඤාතිභි, යථාහමජ්ජ සුඛිතො දිස්වාන එලිතං දුමං.
1270. සුවස්ස ච වරං දත්වා කත්වාන සඵලං දුමං, පක්කාමි සහභරියාය දෙවානං නන්දනං වන’න්ති.
3. මහාසුකජාතකං.
1271. සන්ති රුක්ඛා හරිතපත්තා දුමා නෙකඵලා බහු, කස්මා නු සුක්ඛෙ කොළාපෙ සුකස්ස නිරතො මනො.
1272. ඵලස්ස උපභුඤ්ජිම්හා නෙකවස්සගණෙ බහු, අඵලම්පි විදිත්වාන සාව මෙත්ති යථාපුරෙ.
1273. සුක්ඛඤ්ච රුක්ඛං කොළාපං ඔපත්තමඵලං දුමං, ඔහාය සකුණා යන්ති කිං දොසං පස්සයෙ දිජ{1}
1274. යෙ ඵලත්ථා සම්භජන්ති අඵලොති ජහන්ති නං, අත්තට්ඨ{2}පඤ්ඤා දුම්මෙධා තෙ හොන්ති පක්ඛපාතිනො.
1275. සාධු සක්ඛි කතං හොති මෙත්ති සංසති සන්ථවො, සචෙ තං ධම්මං රොචෙසි පාසංසොසි විජානතං.
1276. සොතෙ සුව වරං දම්මි පත්තයාන විහඞ්ගම, වරං වරස්සු වක්කඞ්ග යංකිඤ්චි මනසිච්ඡසි.
1277. අපි නාම නං පුන පස්සෙ{3} සපත්තං සඵලං දුමං, දළිද්දොව නිධි ලද්ධා නන්දෙය්යාහං පුනප්පුනං.
1278. තතො අමතමාදාය අභිසිඤ්චි මහීරුහං, තස්ස සාඛා විරූහිංසු{4} සීතච්ඡායා මනොරමා.
1279. එවං සක්ක සුඛී හොහි සහ සබ්බෙහි ඤාතිභි, යථාහමජ්ජ සුඛිතො දිස්වාන සඵලං දුමං.
1280. සුවස්ස ච චරං දත්වා කත්වාන සඵලං දුමං, පක්කාමි සහ භරියාය දෙවානං නන්දනං වන’න්ති.
4. චුල්ලසුකජාතකං.
1281. සුතං මෙතං මහාබ්රහ්මෙ කාමෙ භුඤ්ජති හාරිතො{1}, කච්චෙතං වචනං තුච්ඡං කච්චි සුද්ධො ඉරිය්යසි.
1282. එවමෙතං මහාරාජ යථා තෙ වචනං සුතං, කුම්මග්ගෙ{2} පටිපන්නොස්මි මොහනෙය්යෙසු මුච්ඡිතො.
1283. ආදු{3} පඤ්ඤා කිමත්ථියා නිපුණා සාධු චින්තනී{4}, යාය උප්පතිතං රාගං කිං මනො න විනොදයෙ.
1284. චත්තාරො මෙ මහාරාජ ලොකෙ අතිබලා භුසා, රාගො දොසො මදො මොහො යත්ථ පඤ්ඤා න ගාධතී.
1285. අරහං{5} සීලසම්පන්නො සුද්ධො චරති හාරිතො, මෙධාවී පණ්ඩිතො චෙව ඉති නො සම්මතො භවං
1286. මෙධාවිනම්පි හිංසන්ති ඉසිං ධම්මගුණෙ රතං, විතක්කා පාපකා රාජ සුභා රාගූපසංහිතා.
1287. උප්පන්නායං සරීරජො රාගො වණ්ණවිදුසනො තවං, තං පජහ{6} භද්දමත්ථු{7} තෙ බහුන්නාසි{8} මෙධාවීසම්මතො.
1288. තෙ අන්ධකරණෙ කාමෙ බහුදුක්ඛෙ මහාවිසෙ, තෙසං මූලං ගවෙසිස්සං ඡෙච්ඡං රාගං සබන්ධනං.
1289. ඉදං වත්වාන හාරිතො ඉසි සච්චපරක්කමො, කාමරාගං විරාජෙත්වා බ්රහ්මලොකූපගො අහූති.
5. හාරිතජාතකං.
1290. බහුස්සුතං චිත්තකථිං{1} ගඞ්ගා වහති පාටලං{2}, වුය්හමානක{3} භද්දන්තෙ එකං මෙ දෙහි{4} ගාථකං.
1291. යෙන සිඤ්චන්ති දුක්ඛිතං යෙන සිඤ්චන්ති ආතුරං, තස්ස මජ්ඣෙ මරිස්සාමි ජාතං සරණතො භයං.
1292. යත්ථ බීජානි රූහන්ති සත්තා යත්ථ පතිට්ඨිතා, සා මෙ සීසං නිපීළෙති ජාතං සරණතො භයං.
1293. යෙන භත්තානි පච්චන්ති සීතං යෙන විහඤ්ඤති, සො මං ඩහති{5} ගත්තානි ජාතං සරණතො භයං.
1294. යෙන භුත්තෙන යාපෙන්ති පුථු බ්රාහ්මණඛත්තියා, සො මං භුත්තො වියාපාදි{6} ජාතං සරණතො භයං.
1295. ගිම්හානං පච්ඡිමෙ මාසෙ වාතමිච්ඡන්ති පණ්ඩිතා, සො මෙ භඤ්ජති ගත්තානි ජාතං සරණතො භයං.
1296. යං නිස්සිතා ජහති රුහං විහඞ්ගමා සොයං{7} අග්ගිං පමුඤ්චති, දිසා භජථ වක්කඞ්ගා ජාතං සරණතො භයං.
1297. යමානයිං{8} සොමනස්සං මාලිනිං වන්දනුස්සදං, සා මං ඝරා නීහරති{9} ජාතං සරණතො භයං.
1298. යෙන ජාතෙන නන්දිස්සං යස්ස ච භවමිච්ඡිසං, සො මං ඝරා නිච්ඡුහති ජාතං සරණතො භයං.
1299. සුණන්තු මෙ ජානපදා{10} නෙගමා ච සමාගතා, යතොදකං{11} තදාදිත්තං යතො ඛෙමං තතො භයං.
1300. රාජා විලුම්පතෙ රට්ඨං බ්රාහ්මණො ච පුරොහිතො, අත්තගුත්තා විහරථ ජාතං සරණතො භයන්ති.
6. පදමාණවකජාතකං.
1301. අස්ස ඉන්ද සමො රාජ අච්චන්තං අජරාමරො, සචෙ තං යඤ්ඤං යාජෙය්ය{1} ඉසිං ලොමසකස්සපං.
1302. සසමුද්දපරියායං මහිං සාගරකුණ්ඩලං, න ඉච්ඡෙ සහ නින්දාය එවං සය්හ විජානහි.
1303. ධිරත්ථු තං යසලාභං ධනලාභං ච බ්රාහ්මණ, යා වුත්ති විනිපාතෙන අධම්මචරණෙන වා.
1304. අපි චෙ පත්තමාදාය අනාගාරො පරිබ්බජෙ, සා එව ජිවිකා සෙය්යො යා චාධම්මෙන එසනා.
1305. අපි චෙ පත්තමාදාය අනාගාරො පරිබ්බජෙ, අඤ්ඤං අභිංසයං ලොකෙ අපි රජ්ජෙන තං වරං
1306. බලං{2} චන්දො බලං සුරියො බලං සමණබ්රාහ්මණා, බලං වෙලා සමුද්දස්ස බලාතිබලමිත්ථියො.
1307. යථා උග්ගතපං සන්තං ඉසිං ලොමසකස්සපං, පිතු අත්ථා චන්දවතී වාජපෙය්යං අයාජයි{3}.
1308. තං ලොභා පකතං කම්මං කටුකං කාමහෙතුකං, තස්ස මූලං ගවෙසිස්සං ඡෙච්ඡං රාගං සබන්ධනං.
1309. ධිරත්ථු කාමෙ සුඛහූපි ලොකෙ තපොව සෙය්යො කාමගුණෙහි රාජ, තපො කරිස්සාමි පහාය කාමෙ තවෙව රට්ඨං චන්දවතී ච හොතූති.
7. ලොමසකස්සපජාතකං.
1310. කාසායවත්ථෙ සකුණෙ වදාමි දුවෙ දුවෙ නන්දිමනෙ{4} චරන්තෙ, කං අණ්ඩජං අණ්ඩජා{5} මානුසෙසු ජාතිං පසජසන්ති තදිඞ්ඝ බ්රූථ.
1311. අම්හෙ මනුස්සෙසු මනුස්සහිංස අනුබ්බකෙ චක්කවාකෙ වදන්ති, කල්යාණභාවම්භ දිජෙසු සම්මතා අභීතරූපා විචරාම අණ්ණවෙ.
1312. කිං අණ්ණවෙ කානි ඵලානි භුඤ්ජෙ මංසං කුතො ඛාදථ චක්කවාකා, කිං භොජනං භුඤ්ජථ වො අනොමා බලඤ්ච වණ්ණො ච අනප්පරූපො.
1313. න අණ්ණවෙ සන්ති ඵලානි ධඞ්ක මංසං කුතො ඛාදිතුං චක්කවාකෙ, සෙවාලභක්ඛම්භ අවාක{1} භොජනා න ඝාසහෙතු පකරොම පාපං.{*}
1314. න මෙ ඉදං රුච්චති චක්කවාකෙ අස්මිං භවෙ භොජනසන්තිකාසො, අහොසි මෙ පුබ්බෙ තතො මෙ අඤ්ඤථා ඉච්චෙව මෙ විමතී එත්ථ ජාතා.
1315. අහම්පි මංසානි ඵලානි භුඤ්ජෙ අන්නානි ච ලොණියතෙලියානි, රසං මනුස්සෙසු ලභාමි හොත්තුං සූරොව සඞ්ගාම මුඛම්භි ජෙත්වා{2}. න ච මෙ තාදිසො වණ්ණො චක්කවාක යථා තව.
1316. අසුද්ධභක්ඛොසි ඛණානුපාතී කිච්ඡෙන තෙ ලබ්භති අන්නපානං, න තුස්සසි රුක්ඛඵලෙහි ධඞ්ක මංසානි වා යානි සුසානමජ්ඣෙ.
1317. යො සාහසෙන අධිගම්ම භොගෙ පරිභුඤ්ජති ධඞ්ක ඛණානුපාතී, තතො උපක්කොසති නං සභාවො උපක්කුට්ඨො වණ්ණබලං ජහාති.
1318. අප්පම්පි චෙ නිබ්බුතිං භුඤ්ජති යදි අසාහසෙන අපරූපඝාතී බලඤ්ච වණ්ණො ච තදස්ස හොති න හි සබ්බො ආහාරමයෙන වණ්ණොති.
8. චක්කවාකජාතකං.
1319. සුතිකික්ඛං අරඤ්ඤම්හි පන්තම්හි{1} සයනාසනෙ, යෙ ච ගාමෙ තිතික්ඛන්ති තෙ උළාරතරා තයා.
1320. අරඤ්ඤා ගාමමාගම්ම කිං සීලං කිං වතං අහං, පුරිසං තාත සෙවෙය්යං තම්මෙ අක්ඛාහි පුච්ඡිතො.
1321. යො තෙ{2} විසස්සතෙ{3} තාත විස්සාසඤ්ච ඛමෙය්ය තෙ, සුස්සූසී ච තිතික්ඛී ච තං භජෙහි ඉතො ගතො.
1322. යස්ස කායෙන වාචාය මනසා නත්ථි දුක්කතං, උරසීව පතිට්ඨාය තං භජෙහි ඉතො ගතො.
1323. යො ච ධම්මෙන චරති චරන්තොපි න මඤ්ඤති, විසුද්ධකාරිං සප්පඤ්ඤං තං භජෙහි ඉතො ගතො.
1324. හළිද්දිරාගං{4} කපිචිත්තං පුරිසං රාගවිරාගිනං, තාදිසං තාත මා සෙවි නිම්මනුස්සම්පි චෙ සියා.
1325. ආසී{5}විසංව කුපිතං{6} මීළ්හිලිත්තං මහාපථං, ආරකා පරිවජ්ජෙහි යානීව විසමං පථං.
1326. අනත්ථා තාත වඩ්ඪන්ති බාලං අච්චුපසෙවතො, මාස්සු බාලෙන සඞ්ගඤ්ඡි{7} අමිත්තෙනෙව සබ්බදා.
1327. තං තාහං තාත යාචාමි කරස්සු වචනං මම, මාස්සු බාලෙන සඞ්ගඤ්ඡි දුක්ඛො බාලෙහි සඞ්ගමොති.
9. හළිද්දිරාගජාතකං.
1328. කුතො නු ආගච්ඡථ භො තයො ජනා ස්වාගතං එත්ථ{1} නිසීදථාසනෙ, කච්චිත්ථ භොන්තො කුසලං අනාමයං චිරස්සමබ්භාගමනං හි වො ඉධ
1329. අහමෙව එකො ඉධ මජ්ඣපත්තො න චාපි මෙ දුතියො කොචි විජ්ජති, කිමෙව සන්ධාය තෙ භාසිතං ඉසෙ කුතො නු ආගච්ඡථ භො තයො ජනා.
1330. තුවඤ්ච එකො භරියා ච තෙ පියා සමුග්ගපක්ඛිත්තනිකිණ්ණමන්තරෙ, සා රක්ඛිතා කුච්ඡිගතාව තෙ සදා වායුස්ස පුත්තෙන සභා තහිං රතා.
1331. සංවිග්ගරූපො ඉසිනා වියාකතො{2} සො දානවො තත්ථ සමුග්ගමුග්ගිලි. අද්දක්ඛි භරියං සුචි මාලධාරිනිං{3} වායුස්ස{4} පුත්තෙන සභා තහිං රතං.
1332. සුදිට්ඨරූපුග්ගතපානුවත්තිනා. හීනා නරා යෙ පමදාවසංගතා යථා හවෙ පාණරිවෙත්ථ රක්ඛිතා දුට්ඨා මයි අඤ්ඤමභිප්පමොදති.
1333. දිවා ච රත්තො ච මයා උපට්ඨිතා තපස්සිනා ජොතිරිවා වනෙ වසං, සා ධම්මමොක්කම්ම අධම්මමාචරි අකිරියරූපො{5} පමදාහි{6} සන්ථවො.
1334. සරීරමජ්ඣම්භි ඨිතානි මඤ්ඤිහං{7} මය්හං අයන්ති අසතිං අසඤ්ඤතං, සා ධම්මමොක්කම්ම අධම්මමාචරි අකිරියරූපො පමදාහි සන්ථවො.
1335. සුරක්ඛිතං මෙති කථන්නු විස්සසෙ අනෙකචිත්තාසු නහෙත්ථ රක්ඛණා, එතා හි පාතාලපපාතසන්තිභා එත්ථප්පමත්තො ව්යසනං නිගච්ඡති.
1336. තස්මා හි තෙ සුඛිනො වීතසොකා යෙ මාතුගාමෙහි චරන්ති නිස්සටා, එතං සිවං උත්තම මාභිපත්ථයං{1} න මාතුගාමෙහි කරෙය්ය සන්ථවන්ති.
10. සමුග්ගජාතකං.
1337. න ඛො මෙ රුච්චති ආළි පූතිමංසස්ස පෙක්ඛණා, එතාදිසා සඞ්ඛාරස්මා ආරකා පරිවජ්ජයෙ.
1338. උම්මත්තිකා අයං වෙණී වණ්ණෙති පතිනො සඛිං, පජ්ඣාති පටිගච්ඡන්තිං ආගතං මෙළමාතරං{2}.
1339. ත්වං ඛොසි සම්ම උම්මත්තො දුම්මෙධො අවිචක්ඛණො යො ත්වං මතාලයං කත්වා අකාලෙන විපෙක්ඛසි.
1340. න අකාලෙ විපෙක්ඛෙය්ය කාලෙ පෙක්ඛෙය්ය පණ්ඩිතො, පූතිමංසොව පජ්ඣාති යො අකාලෙ විපෙක්ඛති.
1341. පියං ඛො ආළි මෙ හොතු පුණ්ණපත්තං දදාහි මෙ, පති සංජීවිතො මය්හං එය්යාසි පියපුච්ඡිකා.
1342. සියං ඛො ආළි තෙ හොතු පුණ්ණපත්තං දදාමි තෙ, මහතා පරිවාරෙන ඵස්සං{3} කයිරාහි{4} භොජනං.
1343. කීදිසො{5} තුය්හං පරිවාරො යෙසං කාහාමි භොජනං, කිංනාමකා ච තෙ සබ්බෙ තං මෙ{6} අක්ඛාහි පුච්ඡිතා.
1344. මාලියො චතුරක්ඛො ච පිඞ්ගලො අථ ජම්බුකො, එදිසො මය්හං පරිවාරො තෙසං කයිරාහි{7} භොජනං.
1345. නික්ඛන්තාය අගාරස්මා භණ්ඩකම්පි විනස්සති, ආරොග්යං ආළිනො වජ්ජං ඉධෙව වස මාගමාති.
11. පූතිමංසජාතකං.
1346. යො තෙ පුත්තකෙ අඛාදි{8} දින්නභත්තො අදූසකෙ තස්මිං දාඨං නිපාතෙහි මා තෙ මුඤ්චිත්ථ{9} ජීවතො{10}
1347. ආකිණ්ණලුද්දො පුරිසො ධාතිචෙලංව මක්ඛිතො, පදෙසං තං න පස්සාමි යත්ථ දාඨං{11} නිපාතයෙ.
1348. අකතඤ්ඤස්ස පොසස්ස නිච්චං විවරදස්සිනො, සබ්බං චෙ පඨවිං දජ්ජා නෙව නං අභිරාධයෙ.
1349. කින්නු සුබාහු තරමානරූපො පච්ඡාගතොසි සහ මාණවෙන, කිං කිච්චමත්ථං ඉධමත්ථි තුය්හං අක්ඛාහි මෙ පුච්ඡිතො එතමත්ථං
1350. යො තෙ සඛා ද්දදරො සාධුරූපො තස්ස වධං පරිසඞ්කාමි අජ්ජ, පුරිසස්ස කම්මායතනානි සුත්වා නාහං සුඛිං දද්දරං අජ්ජ මඤ්ඤෙ
1351. කානිස්ස කම්මායතනානි අස්සු පුරිසස්ස වුත්තිසමොධානතාය කං වා පටිඤ්ඤං පුරිසස්ස සුත්වා පරිසඞ්කසි දද්දරං මාණවෙන.
1352. චිණ්ණා කලිඞ්ගා චරිතා වණිජ්ජා{1} වෙත්තාචරො සඞ්කුපථොපි චිණ්ණො, නටෙහි චිණ්ණං සහ වාකුරෙහි{2} දණ්ඩෙන යුද්ධම්පි සමජ්ජමජ්ඣෙ.
1353. බද්ධාකුලිකා මිතමාළ්හකෙන අක්ඛා ජිතා{3} සංයමො අබ්භතීතො, අප්පහිතං පුප්ඵකං අඩ්ඪරත්තං හත්ථා දඩ්ඪා පිණ්ඩපටිග්ගහෙන.
1354. තානිස්ස කම්මායතනානි අස්සුං පුරිස්සස වුත්තිසමොධානතාය, යථා අයං දිස්සති ලොමපිණ්ඩො ගාවො හතා කිං පන දද්දරස්සාති.