930. අකක්කසං අඵරුසං ඛරධොතං සුපාසියං, සුඛුමං තිඛිණග්ගඤ්ච කො සූචිං කෙතුමිච්ඡති.
931. සුමජ්ජඤ්ච සුපාසඤ්ච අනුපුබ්බං සුවත්තිතං{7}, ඝනඝාතිමං පටිත්ථද්ධං{8} කො සූචිං කෙතුමිච්ඡති.
932. ඉතොදානි පතායන්ති සූචියො ඛළිසානි ච, කොයං කම්මාරගාමස්මිං සූචිං වික්කෙතුමිච්ඡති.
933. ඉතො සත්ථානි ගච්ඡන්ති කම්මන්තා විවිධා පුථු, කොයං කම්මාරගාමස්මිං සූචිං වික්කෙතුමරහති.
934. සූචිං කම්මාරගාමස්මිං වික්කෙතබ්බා පජානතා ආචරියාව ජානන්ති{1} කම්මං සුකතදුක්කතං.
935. ඉමඤ්ච තෙ පිතා භද්දෙ සූචිං ජඤ්ඤා මයා කතං, තයා ච මං නිමන්තෙය්ය යඤ්චත්ථඤ්ඤං ඝරෙ ධනන්ති.
2. සූචිජාතකං.
936. නවඡන්දකෙදානි දීයති{2} පුණ්ණායං දොණි සුවාමිනී ඨිතා, බහුකෙ ජනෙ පාසපාණිකෙ නො ච ඛො මෙ පටිභාති භුඤ්ජිතුං.
937. තසසි භමසි ගෙණමිච්ඡසි අත්තාණොසි{3} තුහිං ගමිස්සසි, අප්පොස්සුක්කො භුඤ්ජ තුණ්ඩිල මංසත්ථාය හි පොසියාමසෙ.
938. ඔගහ රහදං අකද්දමං සබ්බං සෙදමලං පවාහය, ගණ්හාහි නවං විලෙපනං යස්ස ගන්ධො{4} න කදාචි ඡිජ්ජති.
939. කතමො රහදො අකද්දමො කිංසු සෙදමලන්ති වුච්චති, කතමඤ්ච නවං විලෙපනං තස්ස ගන්ධො න කදාචි ඡිජ්ජති.
940. ධම්මො රහදො අකද්දමො පාපං සෙදමලන්ති වුච්චති, සීලඤ්ච නවං විලෙපනං තස්ස ගන්ධො න කදාචි ඡිජ්ජති.
941. නන්දන්ති සරීරඝාතිනො න ච නන්දන්ති සරිරධාරිනො, පුණ්ණාය ච පුණ්ණමාසියා රමමානාව ජහන්ති ජීවිතන්ති.
3. තුණ්ඩිලජාතකං.
942. සිඞ්ගී මිගො ආයත චක්ඛුනෙත්තො අට්ඨිත්තචො වාරිසයො අලොමො, තෙනාභිභූතො කපණං{1} රුදාමි හරෙ සඛා කිස්ස නු මං ජහාසි.
943. සො පස්සසන්තො මහතා ඵණෙන. භුජඞ්ගමො කක්කටමජ්ඣපත්තො,{2} සඛා සඛාරං{*} පරිතායමානො භුජඞ්ගමං කක්කටකො ගහෙසි.
944. න වායසං නො පන සප්පරාජං{3} ඝාසත්ථිකො කක්කටකො අදෙය්ය, පුච්ඡාමි තං ආයතචක්ඛුනෙත්ත අථ කිස්ස හෙතුම්හ{4} උභො ගහීතා.
945. අයං පුරිසො මම අත්ථාකාමො යො{5} මං ගහෙත්වාන දකාය නෙති, තස්මිං මතෙ දුක්ඛමනප්පකං මෙ අහඤ්ච එසො ච උභො න හොම.
946. මමඤ්ච දිස්වාන පවඩ්ඪකායං සබ්බො ජනො හිංසිතුමෙව මිච්ඡෙ සාදුඤ්ච ථුල්ලඤ්ච මුදුඤ්ච මංසං කාකාපි මං දිස්වා විභෙඨයෙය්යුං.
947. සවෙ තස්ස හෙතුම්හ{4} උභො ගහීතා උට්ඨාතු පොසො විසමාචමාමි, මමඤ්ච කාකඤ්ච පමුඤ්ච ඛිප්පං පුරෙ විසං ගාළහමුපෙති මච්චං.
948. සප්පං පමොක්ඛාමි න තාව කාකං පටිබද්ධකො හොහිති තාව කාකො, පුරිසඤ්ච දිස්වාන සුඛිං අරොගං කාකං පමොක්ඛාමි යථෙව සප්පං.
949. කාකො තදා දෙවදත්තො අහොසි මාරො පන කණ්හසප්පො අහොසි, ආනන්දභද්දො කක්කටකො අහොසි අහං තදා බ්රාහ්මණො හොමි සත්ථාති.
4. සුවණ්ණකක්කටක ජාතකං.
950. සකුණො මය්හකො නාම ගිරිසානාදරීචරො පක්කං පිපඵලිමාරුය්හ මය්හං මය්හන්ති{1} කන්දති.
951. තස්සෙවං{2} විලපන්තස්ස දිජසඞ්ඝා සමාගතා භුත්වාන පිප්ඵලිං යන්ති විලපිත්වෙව සො දිජො.
952. එවමෙව ඉධෙකච්චො සඞ්ඝරිත්වා බහුං ධනං, නෙවත්තනො න ඤාතීනං යථොධිං පටිපජ්ජති.
953. න සො අච්ඡාදනං භත්තං න මාලං න විලෙපනං, අනුභොති සකිං කිඤ්චි න සඞ්ගණ්හාති ඤාතකෙ.
954. තස්සෙවං විලපන්තස්ස මය්හං මය්හන්ති{1} රක්ඛතො, රාජානො අථවා චොරා දායාදායෙව අප්පියා ධනමාදාය ගච්ඡන්ති විලපිත්වෙව සො නරො.
955. ධීරො ච භොගෙ අධිගම්ම සඞ්ගණ්හාති ච ඤාතකෙ, තෙන සො කිත්තිං පප්පොති පෙච්ච සග්ගෙ ච මොදතීති.
5. මය්හකජාතකං.
956. දුබ්බණ්ණරූපං තුවමරියවණ්ණි පුරක්ඛත්වා{3} පඤ්ජලිකො නමස්සසි, සෙය්යො නු තෙ සො උදවා{4} සරික්ඛො නාමං පරස්සත්තතො චාපි බ්රූහි.
957. න නාමගොත්තං ගණ්හන්ති රාජ සම්මග්ගතානුජ්ජුගතානදෙවා, අහඤ්ච තෙ නාමධෙය්යං වදාමි සක්කොහස්මි තිදසානමින්දො.
958. යො දිස්වා භික්ඛුං චරණූපපන්නං පුරක්ඛත්වා{3} පඤ්ජලිකො නමස්සති, පුච්ඡාමි තං දෙවරාජෙතමත්ථං ඉතො චුතො කිං ලභතෙ සුඛං සො.
959. යො දිස්වා භික්ඛුං චරණූපපන්නං පුරක්ඛත්වා පඤ්ජලිකො නමස්සති, දිට්ඨෙව ධම්මෙ ලභතෙ පසංසං සග්ගඤ්ච සො යාති සරීරභෙදා.
960. ලක්ඛී වත මෙ උදපාදි අජ්ජ යං වාසවං භූතපතද්දසාම, භික්ඛුඤ්ච දිස්වාන තවජ්ජ සක්ක කාහාමි පුඤ්ඤානි අනප්පකානි.
961. අද්ධා හවෙ සෙවිතබ්බා සපඤ්ඤා බහුස්සුතා යෙ බහුඨානචින්තිනො, භික්ඛුඤ්ච දිස්වාන මමඤ්ච රාජ කරොහි පුඤ්ඤානි අනප්පකානි.
962. අක්කොධනො නිච්චපසන්නචිත්තො සබ්බාතිථියාචයොගො භවිත්වා, නිහච්චමානං අභිවාදයිස්සං සුත්වාන දෙවින්ද සුභාසිතානී’ති.
6. ධජවිහෙඨජාතකං.
963. යමෙතං වාරිජං පුප්ඵං අදින්නං උපසිඞ්ඝසි, එකඞ්ගමෙතං ථෙය්යානං ගන්ධත්ථෙනොසි{1} මාරිස.
964. න හරාමි න භඤ්ජාමි ආරා සඞ්ඝාමි වාරිජං, අථ කෙන නු වණ්ණෙන ගන්ධත්ථෙනොති වුච්චති.
965. යොයං භිසානි ඛණති පුණ්ඩරීකානි භඤ්ජති, එවං ආකිණ්ණකම්මන්තො කස්මා එසො න වුච්චති.
966. ආකිණ්ණලුද්දො පුරිසො ධාතිවෙළංව මක්ඛිතො, තස්මිං මෙ වචනං නත්ථි තඤ්ච අරහාමි වත්තවෙ.
967. අනඞ්ගණස්ස පොසස්ස නිච්චං සුචිගවෙසිනො, වාළග්ගමත්තං පාපස්ස අබ්භාමත්තංව ඛායති.
968. අද්ධා මං යක්ඛ ජානාසි අථො මං අනුකම්පසි, පුනපි යක්ඛ වජ්ජාසි යදා පසස්සි එදිසං.
969. නෙව තං උපජීවාම නපි තෙ හතකම්හසෙ, ත්වමෙව භික්ඛු ජානෙය්ය යෙන ගච්ඡෙය්ය සුග්ගති’න්ති.
7. භිසපුප්ඵජාතකං
970. සුසුඛං වත ජීවන්ති යෙ ජනා විඝාසාදිනො, දිට්ඨෙව ධම්මෙ පාසංසා සම්පරායෙ ච සුග්ගති.
971. සුකස්ස භාසමානස්ස න නිසාමෙථ පණ්ඩිතා, ඉදං සුණාථ සොදරියා අම්හෙ වායං පසංසති.
972. නාහං තුම්හෙ පසංසාමි කුණපාදා සුණාථ මෙ, උච්ඡිට්ඨභොජිනො තුම්හෙ න තුම්හෙ විඝාසාදිනො.
973. සත්තවස්සා පබ්බජිතා මෙජ්ඣාරඤ්ඤෙ සිඛණ්ඩිනො, විඝාසෙනෙව යාපෙන්තො මයඤ්චෙ භොතො ගාරය්හා, කෙනු භොතො පසංසියා.
974. තුම්හෙ සීහානං ව්යග්ඝානං වාළානඤ්චාවසිට්ඨකං, උච්ඡිට්ඨෙනෙව යාපෙන්තා මඤ්ඤිව්හා විඝාසාදිනො.
975. යෙ බ්රාහ්මණස්ස සමණස්ස අඤ්ඤස්ස ච වණිබ්බිනො, දත්වාන සෙසං භුඤ්ජන්ති තෙ ජනා විඝාසාදිනො’ති.
8. විඝාසජාතකං.
976. පණීතං භුඤ්ජසෙ භත්තං සප්පිතෙලඤ්ච මාතුල, අථ කෙන නු වණ්ණෙන කිසො ත්වමසි වායස.
977. අමිත්තමජ්ඣෙ වසතො තෙසු ආමිසමෙසතො, නිච්චං උබ්බිග්ගහදයස්ස කුතො කාකස්ස දළ්හියං.
978. නිච්චං උබ්බෙධිනො කාකා ධඞ්කා පාපෙන කම්මුනා, ලද්ධො පිණ්ඩො න පීණෙති කිසො තෙනස්මි වට්ටක.
979. ලූඛානි තිණබීජානි අප්පසෙන්හානි භුඤ්ජසි, අථ කෙන නු වණ්ණෙන ථුලො ත්වමසි වට්ටක.
980. අප්පිච්ඡා අප්පචින්තාය අවිදූරගමනෙන ච, ලද්ධා ලද්ධෙන යාපෙන්තො ථූලො තෙනස්මි වායස.
981. අප්පිච්ඡස්ස හි පොසස්ස අප්පචින්තිසුඛස්ස ච, සුසඞ්ගහිතමානස්ස වුත්තී සුසමුදානියා’ති.
9. වට්ටකජාතකං.
982. චිරස්සං වත පස්සාම සහායං මණිධාරිනං, සුකතාය මස්සුකුත්තියා සොභතෙ වත මෙ සඛා.
983. පරූළ්හකච්ඡනඛලොමො අහං කම්මෙසු ව්යාවටො, චිරස්සං නහාපිතං ලද්ධා ලොමන්තං අපහාරයිං.
984. යං නු ලොමං අහාරෙසි දුල්ලභං ලද්ධකප්පකං, අථ කිඤ්චරහි තෙ සම්ම කණ්ඨෙ කිණකිණායති.
985. මනුස්සසුඛුමාලානං මණි{1} කණ්ඨෙසු ලම්බති, තෙසාහමනුසික්ඛාමි මා ත්වං මඤ්ඤි දවා කතං.
986. සචෙපි මං පිහයසි මස්සුකුත්තිං සුකාරිතං, කාරයිස්මාමි තෙ සම්ම මණිඤ්චාපි දදාමි තෙ.
987. ත්වඤ්ඤෙව මණිනා ඡන්නො සුකතාය ච මස්සුයා, ආමන්ත ඛො තං ගච්ඡාමි පියං මෙ තව දසස්නන්ති.
10. කාකජාතකං
සෙනකවග්ගො දුතියො
තස්සුද්දානං:
අථ පස්ස සසූවි ච තුණ්ඩිලකො මිගමය්හක පඤ්චම සක්කවරො, අථ පඤ්ජලිවාරිජ මෙජ්ඣ පුන අථ වට්ටක කපොතවරෙන දස.
ඡක්කනිපාතං නිට්ඨිතං.
තත්ර වග්ගුද්දානං භවති:
අථ වග්ගං පකිත්තිස්සං ඡනිපාතවරුත්තමෙ, අවාරියො සෙනකො ද්වෙව වුත්තා සුබ්යඤ්ජනාති.
7. සත්තකනිපාතං
1. කුක්කුවග්ගො
988. දියඩ්ඪකුක්කු උදයෙන කණ්ණිකා විදත්ථියො අට්ඨ පරික්ඛිපන්ති නං, සසිංසපා සාරමය{1} අඵෙග්ගුකා කුහිං ඨිතා උපරිතො න ධංසති.
989. යා තිංසති සාරමයා අනුජ්ජුකා පරිකිරිය{2} ගොපාණසියො සමට්ඨිතා, තා සඞ්ගහිතා{3} බලසා ච පීළිතා සමට්ඨිතා උපරිතො න ධංසති.
990. එවං මිත්තෙහි දළ්හෙහි පණ්ඩිතො අභෙජ්ජරූපෙහි සුචීහි මන්තිහි, සුසඞ්ගහීතො සිරියා න ධංසති ගොපාණසී භාරවහාව කණ්ණිකා.
991. ඛරත්තවං මෙල්ලං{*} යථාපි සත්ථවා අනාමසන්තොපි කරොති තිත්තකං, සමාහරං සාදුං කාරොති පත්ථිවා අසාදු{4} කයිරා තනුවට්ට මුද්ධරං{5}.
992. එවම්පි ගාමනිගමෙසු පණ්ඩිතො අසාහසං රාජධනානි සංහරං, ධම්මානුවත්ති පටිපජ්ජමානො සඵානි කයිරා අවිහෙඨයං පරං.
993. ඔදාතමූලං සුචිවාරිසම්භවං ජාතං යථා පොක්ඛරණීසු අම්බුජං, පදුමං යථා අග්ගිනිකාසඵාලිමං න කද්දමො න රජො න වාරි ලිම්පති.
994. එවම්පි වොහාරසුචිං අසාහසං විසුද්ධකම්මන්තමපෙතපාපකං, න ලිම්පති කම්මකිලෙසතාදිසො ජාතං යථා පොක්ඛරණීසු අම්බුජ’න්ති
1. කුක්කුජාතකං.
995. යථා චාපො නින්නමති ජියා චාපි නිකූජති, හඤ්ඤතෙ නූන මනොජො මිගරාජා සඛා මම.
996. හන්දදානි වනං තාණං{1} පක්කමාමි යථාසුඛං, නෙතාදිසා සඛා හොන්ති ලබ්භා මෙ ජීවතො සඛා.
997. න පාපජනසංසෙවී අච්චන්තං සුඛමෙධති, මනොජං පස්ස සෙමානං ගිරියස්සානුසාසනී.
998. න පාපසම්පවඞ්කෙන මාතා පුත්තෙන නන්දති, මනොජං{2} පස්ස සෙමානං අච්ඡන්නං සම්හි ලොහිතෙ.
999. එවමාපජ්ජති{3} පොසො පාපියඤ්ච නිගච්ඡති, යො වෙ හිතානං වචනං න කාරොති අත්ථදස්සිනං.
1000. එවඤ්ච සො හොති තතො ච පාපියො යො උත්තමො අධමනුජපසෙවී පසසුත්තමං අධමජනූපසෙවිතං{4} මිගාධිපං සරවරවෙධනිබ්බුතං,
1001. නිහීයති පුරිසො නිහීනසෙවී න ච හායෙථ කදාචි තුල්යසෙවී, සෙට්ඨමුපනමං{5} උදෙති ඛිප්පං තස්මා අත්තනො උත්තරිං භජෙථාති.
2. මනොජජාතකං.
1002. රාජා තෙ භත්තං පාහෙසි සුචිමංසූපසෙචනං, මඛාදෙවස්මිං{6} අධිවත්ථෙ{7} එහි නික්ඛම භුඤ්ජස්සු.
1003. එහි මාණව ඔරෙන{8} භික්ඛමාදාය සුපිතං{9}, ත්වඤ්ච මාණව භික්ඛා{10} ච උභො භක්ඛා භවිස්සථ.
1004. අප්පකෙන තුවං යක්ඛ ථුල්ලමත්ථං ජහිස්සසි, භික්ඛං තෙ නාහරිස්සන්ති ජනා මරණසඤ්ඤිනො.
1005. ලද්ධාය යක්ඛ{1} තව නිච්චභික්ඛං සුචිං පණීතං රසසා උපෙතං, භික්ඛඤ්ච තෙ ආහරියො නරො ඉධ සුදුල්ලභො හොහිති{2} ඛාදිතෙ මයි.
1006. මමෙසං{3} සුතනො අත්ථො යථා භාසසි මාණව, මයා ත්වං සමනුඤ්ඤාතො සොත්ථිං පස්සසි මාතරං.
1007. ඛග්ගං ඡත්තඤ්ච පාතිඤ්ච{4} ගච්ඡෙවාදාය{5} මාණව, සොත්ථිං පස්සතු තෙ මාතා ත්වඤ්ච පස්සාහි මාතරං.
1008. එවං යක්ඛ සුඛී හොහි සහ සබ්බෙහි ඤාතිභි, ධනඤ්ච මෙ අධිගතං රඤ්ඤො ච වචනං කතන්ති.
3. සුතනුජාතකං.
1009. තෙ කථන්නු කරිස්සන්ති වුද්ධා ගිරිදරීසයා, අහං බද්ධොස්මි{6} පාසෙන නීලියස්ස වසං ගතො.