5222. සබ්බඤ්චෙ මච්චා සධනා{3} සභොගා{4} ආදීපිතං දාරුතිණෙන මිස්සං, දහං න තප්පෙ අසමත්ථ{5} තෙජො කො තං සුභික්ඛං දිරසඤ්ඤ කුරියා.{6}
5223. යථාපි ඛීරං විපරිනාමධම්මං දධී භවිත්වා නවනීතම්පි හොති, එවම්පි අග්ගි විපරිනාමධම්මො තෙජො සමොරොහති යොගයුත්තො.
5224. න දිස්සතෙ අග්ගිමනුප්පවිට්ඨො සුක්ඛෙසු කට්ඨෙසු නවෙසු චාපි, නාමන්ථමානො අරණීනරෙන නාකම්මනා ජායති ජාතවෙදො.
5225. සචෙ හි අග්ගි අන්තරතො වසෙය්ය සුක්ඛෙසු කට්ඨෙසු නවෙසු චාපි, සබ්බානි සුස්සෙය්යුං වනානි ලොකෙ සුක්ඛානි කට්ඨානි ච පජ්ජලෙය්යුං.
5226. කරොති චෙ{1} දාරුතිණෙන පුඤ්ඤං භොජං{2} නරො ධූමසිඛිං පතාපවං, අඞ්ගාරිකා ලොණකරා ච සූදා සරිරදාහාපි කරෙය්යුං පුඤ්ඤං.
5227. අථ වෙ හි එතෙ න කරොන්ති පුඤ්ඤං. අජ්ඣෙනමග්ගිං ඉධ තප්පයිත්වා, න කොචි ලොකස්මිං කරොති පුඤ්ඤං භොජං නරො ධූමසිඛිං පතාපවං.
5228. කථං හි ලොකාපචිතො සමානො අමනුඤ්ඤගන්ධං බහුන්නං අකන්තං, යදෙව මච්චා පරිවජ්ජයන්ති තදප්පසත්ථං දිරසඤ්ඤ භුඤ්ජෙ.
5229. සිඛිං හි දෙවෙසු වදන්ති හෙකෙ ආපං මිලක්ඛා පන දෙවමාහු, සබ්බෙව එතෙ විතථං භණන්ති{3} අග්ගී න දෙවඤ්ඤතරො න චාපො.
5230. නිරින්ද්රියං සන්තං අසඤ්ඤකායං{4} වෙස්සානරං කම්මකරං පජානං, පරිචරිය{5} මග්ගිං සුගතිං කථං වජෙ{6} පාපානි කම්මානි පකුබ්බමානො.
5231. සබ්බාභිභූතාහුධ ජීවිකත්ථා අග්ගිස්ස බ්රහ්මා පරිචාරකොති, සබ්බානුභාවී ච වසී කිමත්ථං අනිම්මිතො නිම්මිතං වන්දිතස්ස.
5232. හස්සං අනිජ්ඣානඛමං අතච්ඡං සක්කාරහෙතු පකිරිංසු{7} පුබ්බෙ, තෙ ලාභසක්කාරෙ අපාතුභොන්තෙ සන්ථම්භිතා{8} ජන්තුහි සන්තිධම්මං.
5233. අජ්ඣෙනමරියා පඨවිං ජනින්දා වෙස්සා කසිං පරිචරියඤ්ච සුද්දා, උපාගු පච්චෙකං යථා{9} පදෙසං කතාහු එතෙ වසිනාති ආහු.
5234. එතඤ්ච සච්චං වචනං භවෙය්ය යථා ඉදං භාසිතං බ්රාහ්මණෙහි, නාඛත්තියො ජාතු ලභෙථ රජ්ජං නාබ්රාහ්මණො මන්තපදානි සික්ඛෙ නාඤ්ඤත්ර වෙස්සෙහි කසිං කරෙය්ය සුද්දො න මුඤ්චෙ පරපෙස්සිතාය.{1}
5235. යස්වා ච එතං වචනං අභූතං මුසා චිමෙ ඔදරියා භණන්ති, තදප්පපඤ්ඤා අභිසද්දහන්ති පස්සන්ති තං පණ්ඩිතා අත්තනාව.
5236. ඛත්ත්යා න වෙස්සා න බලිං හරන්ති ආදාය සත්ථානි චරන්ති බ්රාහ්මණා, තං තාදිසං සංඛුභිතං විහින්නං{2} කස්මා බ්රහ්මා නුජ්ජුකරොති ලොකං.
5237. සචෙ හි සො ඉස්සරො සබ්බලොකෙ බ්රහ්මා බහූ භූතපතී පජානං, කිං සබ්බලොකං විදහී අලක්ඛිං කිං සබ්බලොකං න සුඛී අකාසි.
5238. සචෙ හි සො ඉස්සරො සබ්බලොකෙ බ්රහ්මා බහූ භූතපතී පජානං, මායා මුසාවජ්ජමදෙන චාපි ලොකං අධම්මෙන කිමත්ථකාසි.
5239. සචෙ හි සො ඉස්සරො සබ්බලොකෙ බ්රහ්මා බහූ භූතපති පජානං, අධම්මියො{3} භූතපතී අරිට්ඨ ධම්මෙ සති සො විදහී අධම්මං.
5240. කීටා පටංගා උරගා ච භෙකා{4} හන්ත්වා කිමිං සුජ්ඣති මක්ඛිකා ච, එතෙ හි ධම්මා අනරියරූපා කම්බොජකානං විතථා බහුන්නං.
5241. සචෙ හි සො සුජ්ඣති යො හනාති හතොපි සො සග්ගමුපෙති ඨානං, භොවාදි භොවාදිනං මාරයෙය්යුං{5} යෙ චාපි තෙසං අභිසද්දහෙය්යුං.
5242. නෙව මිගා නප්පසුනොපි ගාවො ආයාචන්ති අත්තවධාය{1} කෙචි, විප්ඵන්දමානං ඉධජීවිකත්ථා යඤ්ඤෙසු පාණෙ පසුමාහරන්ති.
5243. යූපස්ස{2} තෙ පසුබන්ධෙ ච බාලා චිත්තෙහි වණ්ණෙහි මුඛං නයන්ති, අයං තෙ යූපො කාමදුහො පරත්ථ භවිස්සති සස්සතො සම්පරායං.
5244. සචෙ ච යූපෙ මණිසඞ්ඛමුත්තං ධඤ්ඤං ධනං රජතං ජාතරූපං, සුක්ඛෙසු කිට්ඨෙසු නවෙසු චාපි සචෙ දුහෙ තිදිවෙ සබ්බකාමෙ තෙවිජ්ජසඞ්ඝා ච පුථූ යජෙය්යුං න බ්රාහ්මණා කඤ්චි තං{3} යාජයෙය්යුං.
5245. කුතො ච යූපෙ මණිසඞ්ඛමුත්තං ධඤ්ඤං ධනං රජතං ජාතරූපං සුක්ඛෙසු කට්ඨෙසු නවෙසු චාපි කුතො දුහෙ තිදිවෙ සබ්බකාමෙ.
5246. සඨා ච ලුද්දා උපලද්ධබාලා{4} චිත්තෙහි වණ්ණෙහි මුඛං නයන්ති, ආදාය අග්ගිං මම දෙහි විත්තං තතො සුඛී හොහිසි සබ්බකාමෙ.
5247. තමග්ගිහුත්තං සරණං පවිස්ස චිත්තෙහි වණ්ණෙහි මුඛං නයන්ති, ඔරොපයිත්වා කෙසමස්සුං නඛඤ්ච වෙදෙහි චිත්තං අතිගාළයන්ති.
5248. කාකා උලූකංච රහො ලභිත්වා එකං සමානං බහුකා සමෙච්ච, අන්නානි භුත්වා කුහකා කුහිත්වා මුණ්ඩං කරිත්වා යඤ්ඤපථොස්සජන්ති.
5249. එවං හි සො වඤ්චිතො බ්රාහ්මණෙහි එකො සමානො බහූහි{5} සමෙච්ච, තෙ යොගයොගෙන විලුම්පමානා දිට්ඨං අදිට්ඨෙන ධනං හරන්ති.
5250. අකාසියා රාජූහි චානු{1}සිට්ඨා තදස්ස ආදාය ධනං හරන්ති, තෙ තාදිසා චොරසමා අසන්තා වජ්ඣා න හඤ්ඤන්ති අරිට්ඨ ලොකෙ.
5251. ඉන්දස්ස බාහාරසි දක්ඛිණාති යඤ්ඤෙසු ඡින්දන්ති පලාසයට්ඨිං, තං චෙපි සච්චං මඝවා ඡින්නබාහු කෙනස්ස ඉන්දො අසුරෙ ජිනාති.
5252. තඤ්චෙව තුච්ඡං මඝවා සමඞ්ගී හන්තා අවජ්ඣො පරමො ස දෙවො, මන්තා{2} ඉමෙ බ්රාහ්මණා තුච්ඡරූපා සන්දිට්ඨිකා වඤ්චනා එස ලොකෙ.
5253. මාලාගිරි හිමවා යො ච ගිජ්ඣො සුදස්සනො නිසභො කාකනෙරු,{3} එතෙ ච අඤ්ඤෙ ච නගා මහන්තා චිත්යා කතා යඤ්ඤකරෙහි මාහු{4}.
5254. යථාප්පකාරානි හි ඉට්ඨකානි චිත්යා කතා යඤ්ඤකරෙහි මාහු, න පබ්බතා හොන්ති තථප්පකාරා අඤ්ඤාදිසා අචලා තිට්ඨසෙලා.
5255. න ඉට්ඨකා හොන්ති සිලා චිරෙනපි න තත්ථ සඤ්ජායති අයො න ලොහං, යඤ්චෙ ච එතං පරිවණ්ණයන්තා චිත්යා කතා යඤ්ඤකරෙහි මාහු.
5256. අජ්ඣායකං මන්තගුණූපපන්නං තපස්සිනං යාචයොගොති මාහු, තීරෙ සමුද්දස්සුදකං සජන්තං තං සාගරජ්ඣොහරි තෙන, පෙය්යො.
5257. පරො සහස්සම්පි සමන්තවෙදෙ මනතුප්පන්නෙ නදියො වහන්ති, න තෙන ව්යාපන්තරසූදකානං{5} කස්මා සමුද්දො අතුලො අපෙය්යො.
5258. යෙ කෙචි කූපා ඉධ ජීවලොකෙ ලොණූදකා කූපඛණෙහි ඛාතා, න බ්රාහ්මණජ්ඣොහරණෙන තෙසු ආපො අපෙය්යො දිරසඤ්ඤරාහු.
5259. පුරෙ පුරත්ථා කා කස්ස භරියා මනො මනුස්සං අජනෙසි පුබ්බෙ, තෙනාපි ධම්මෙන න කොචි හීනො එවම්පි වොස්සග්ගවිභාගමාහු.
5260. චණ්ඩාලපුත්තොපි අධිච්ච වෙදෙ භාසෙය්ය මන්තෙ කුසලො මුතීමා, න තස්ස මුද්ධා විඵලෙය්ය සත්තධා මන්තා ඉමෙ අත්තවධාය කත්තා.{1}
5261. වාචාකතා ගිද්ධිකතා{2} ගහීතා දුම්මොචයා කව්යපථානුපන්නා, බාලානචිත්තං විසමෙ නිවිට්ඨං තදප්පපඤ්ඤා අභිසද්දහන්ති.
5262. සීහස්ස ව්යග්ඝස්ස ච දීපිනො ච න විජ්ජති පොරිසියං බලෙන, මනුස්සභාවො ච ගවංව පෙක්ඛො ජාතී හි තෙසං අස්මා සමානා.{3}
5263. සචෙ ච රාජා පඨවිං විජිත්ථා සජීවවා අස්සවො පාරිසජ්ජො, සයමෙව සො සත්තුසඞ්ඝං{4} විජෙය්ය තස්ස පජා නිච්චසුඛී භවෙය්ය.
5264. ඛත්තියමන්තා ච තයො ච වෙදා අත්ථෙන එතෙ සමකා භවන්තී, තෙසඤ්ච අත්ථං අවිනිච්ඡිනිත්වා න බුජ්ඣති ඔඝපථංව ඡන්නං.
5265. ඛත්තියමන්තා ච තයො ච වෙදා අත්ථෙන එතෙ සමකා භවන්ති, ලාභො අලාභො අයසො යසො ච සබ්බෙ තෙ සබ්බෙසං චතුන්නධම්මා.
5266. යථාපි ඉබ්භා ධනධඤ්ඤ හෙතු කම්මානි කාරෙන්ති{1} පුථූ පථව්යා, තෙවිජ්ජසඞ්ඝාපි{2} තථෙව අජ්ජ කම්මානි කාරෙන්ති පුථූ පථව්යා.
5267. ඉබ්බෙහි එතෙ සමකා භවන්ති. නිච්චුස්සකා{3} කාමගුණෙසු යුත්තා, කම්මානි කාරෙන්ති පුථූ පථව්යා තදපප්පඤ්ඤා දිරසඤ්ඤරා තෙ.
යඤ්ඤභෙදවාදකණ්ඩො.
5268. කස්ස භෙරී මුතිංගා ච සඞ්ඛාපණවදෙණ්ඩිමා,{4} පුරතො පටිපන්නානි හාසයන්තා රථෙසභං.
5269. කස්ස කඤ්චනපට්ටෙන පුථුනා විජ්ජුවණ්ණිනා, යුවා කලාපසන්නද්ධො කො එති සිරියා ජලං.
5270. උක්කාමුඛෙ{5} සහට්ඨංව ඛදිරඞ්ගාරසන්නිභං, මුඛං චාරුරිවාභාති{6} කො එති සිරියා ජලං.
5271. කස්ස ජම්බොනදං ඡත්තං සසලාකං මනොරමං, ආදිච්චරංසාවරණං කො එති සිරියා ජලං.
5272. කස්ස අඞ්කං{7} පරිග්ගය්හ වාළවීජනිමුත්තමං, චරතෙ{8} වරපඤ්ඤස්ස මුද්ධනි උපරූපරි.
5273. කස්ස පෙඛුණහත්ථානි විචිත්රානි මුදූනි ච, තපඤ්ඤමණිදණ්ඩානි{9} චරන්ති උභතො මුඛං.
5274. ඛදිරඞ්ගාරවණ්ණභා ඔක්කාමුඛෙ පහංසිතා, කස්සෙතෙ කුණ්ඩලා වග්ගු සොභන්ති උභතො මුඛං.
5275. කස්ස වාතෙන ඡුපිතා නිද්ධන්තා මුදුකාලකං,{10} සොභයන්ති නලාටන්තං නභා විජ්ජුරිවුග්ගතා.
5276. කස්ස එතානි අක්ඛීනි ආයතානි පුථුනි ච, කො සොභති විසාලක්ඛො කස්සෙතං උණ්ණජං මුඛං.
5277. කස්සෙතෙ ලපනජා{1} සුද්ධා සුද්ධසඞ්ඛවරූපමා, භාසමානස්ස සොභන්ති දන්තා කුප්පීලසාදිසා.
5278. කස්ස ලාඛාරස්සමා හත්ථපාදා සුඛෙධිතා, කො සො බිම්බොට්ඨ සම්පන්නො දිවා සුරියොව භාසති.
5279. හිමච්චයෙ හෙමවතො{2} බ්රහාසාලොව{3} පුප්ඵිතො, කො සො ඔදාතපාවාරො ජයං ඉන්දොව සොභති.
5280. සුවණ්ණපිළකාකිණ්ණං මණිදණ්ඩවිචිත්තිකං,{4} කො සො පරිසමොගය්හ ඊසො{5} ඛග්ගංව මුච්චති.
5281. සුවණ්ණ විකතා චිත්රා{6} සුකතා චිත්ර{7} සිබ්බනා,{8} කො සො ඔමුඤ්චතෙ පදා නමො කත්වා මහෙසිනො.
5282. ධතරට්ඨා හි{9} තෙ නාගා ඉද්ධිමන්තො යසස්සිනො, සමුද්දජාය උප්පන්නා එතෙ නාගා මහිද්ධිකාති.
භූරිදත්තජාතකං ඡට්ඨමං.
7. මහානාරදකස්සපජාතකං
5283. අහු රාජා විදෙහානං අඞ්ගාති{10} නාම ඛත්තියො, පහූතයොග්ගො ධනිමා අනන්තබලපොරිසො.
5284. සො ච පණ්ණරසිං{11} රත්තිං පුරිමෙ යාමෙ අනාගතෙ, චාතුමස්ස{12} කොමුදියා අමච්චෙ සන්නිපාතයි.
5285. පණ්ඩිතෙ සුතසම්පන්නෙ මිහිතපුබ්බෙ{13} විවක්ඛණෙ, විජයඤ්ච සුනාමඤ්ච සෙනාපතිමලාතකං.
5286. තමනුපුච්ඡි වෙදෙහො පච්චෙකං බ්රූථ සංරුචිං, චාතුමස්ස{14} කොමුදජ්ජ ජුණ්හං ව්යපගතං තමං කායජ්ජ රතියා රත්තිං විහරෙමු ඉමං උතුං.
5287. තතො සෙනාපතී රඤ්ඤො අලාතො එතදබ්රවි, හට්ඨං{1} යොග්ගං බලං සබ්බං සෙනං සන්තාහයාමසෙ.
5288. නිය්යාම දෙව යුද්ධාය අනන්තබලපොරිසා,{2} යෙ තෙ වසං න ආයන්ති වසං උපනයාමසෙ,{3} එසා මය්හං සකාදිට්ඨි අජිතං ඔජිනාමසෙ.{4}
5289. අලාතස්ස වචො සුත්වා සුනාමො එතදබ්රවි, සබ්බෙ තුය්හං මහාරාජ අමිත්තා වසමාගතා.
5290. නික්ඛිත්තසත්ථා පච්චත්ථා නිවාතමනුවතතරෙ, උත්තමො උස්සවො අජ්ජ න යුද්ධං මම රුච්චති.
5291. අන්නං පානඤ්ච ඛජ්ජඤ්ච ඛිප්පං අභිහරන්තු තෙ, රමස්සු දෙව කාමෙහි නච්චගීතෙ සුවාදිතෙ.
5292. සුනාමස්ස වචො සුත්වා විජයො එතදබ්රවි, සබ්බෙ කාමා මහාරාජ නිච්චං තව අපට්ඨිතා.
5293. න හෙතෙ දුල්ලභා දෙව තව කාමෙහි මොදිතුං, සදාපි කාමා ලබ්භන්ති{5} නෙතං චිත්තමතං මම,
5294. සමණං බ්රාහ්මණං වාපි උපාසෙමු බහුස්සුතං, යො නජ්ජ විනයෙ කඞ්ඛං අත්ථධම්මවිදූ ඉසෙ.
5295. විජයස්ස වචො සුත්වා රාජා අඞ්ගාතිමබ්රවි, යථා විජයො භණති මය්හම්පෙතෙව රුච්චති.
5296. සමණං බ්රාහ්මණං වාපි උපාසෙමු බහුස්සුතං, යො නජ්ජ විනයෙ කඞ්ඛං අත්ථධම්මවිදූ ඉසෙ.
5297. සබ්බෙව සන්තා කරොථ මතිං කං උපාසෙමු පණ්ඩිතං, කො නජ්ජ විනයෙ කඞ්ඛං අත්ථධම්මවිදූ ඉසෙ.
5298. වෙදෙහස්ස වචො සුත්වා අලාතො එතදබ්රවි, අත්ථාය මිගදායස්මිං අචෙලො ධීරසම්මතො.
5299. ගුණො කස්සපගොත්තායං සුතො චිත්රකථි ගණී, තං දෙව පයිරුපාසය{1} සො නො කඞ්ඛං විනෙස්සති.
5300. අලාතස්ස වචො සුත්වා රාජා චොදෙසි සාරථිං, මිගදායං ගමිස්සාම යුත්තං යානං ඉධානය.
5301. තස්ස යානං අයොජෙසුං දන්තං රූපියපක්ඛරං, සුක්කමට්ඨපරිවාරං පණ්ඩරං දොසිනාමුඛං.
5302. තත්රාසුං කුමුදා යුත්තා චත්තාරො සින්ධවා හයා, අනිලූපමසමුප්පාතා{2} සුදන්තා සොණ්ණමාලිනො.
5303. සෙතං ඡත්තං සෙතරථො සෙතස්සා සෙතවීජනී, වෙදෙහො සහමච්චෙහි නීය්යං චන්දොව සොභථ.{3}
5304. තමන්නුයායුං{4} බහාවො ඉන්දඛග්ගධරා ඛලී, අස්සපිට්ඨිගතා ධීරා{5} නරා නරවරාධිපං.
5305. සො මුහුත්තං ව යායිත්වා යානා ඔරුය්හ ඛත්තියො, වෙදෙහො සහමච්චෙහි පත්ති ගුණමුපාගමි.
5306. යොපි තත්ථ තදා ආසුං බ්රාහ්මණිබ්භා සමාගතා, න තෙ අපනයී රාජා අකටං භූමිමාගතෙ.
5307. තතො සො මුදුකාභිසියා මුදුචිත්තකලන්දකෙ{6}, මුදුපච්චත්ථතෙ රාජා එකමන්තං උපාවිසි.
5308. නිසජ්ජ රාජා සම්මොදී කථං සාරාණීයං තතො, කච්චි යාපනීයං භන්තෙ වාතානමවිසග්ගතා.{7}
5309. කච්චි අකසිරා වුත්ති ලබ්භති පිණ්ඩයාපනං, අප්පාබාධොවසී{8} කච්චි චක්ඛුං නං පරිහායති.
5310. තං ගුණොපටිසම්මොදි වෙදෙහං විනයෙ රතං, යාපනීයං මහාරාජ සබ්බමෙතං තදූභයං.
5311. කච්චි තුය්හම්පි වෙදෙහ පච්චන්තා න බලීයරෙ, කච්චි අරොගං යොග්ගන්තෙ කච්චි වහති{1} වාහනං කච්චි තෙ ව්යාධයො නත්ථි සරීරස්සුපතාපිකා.{2}
5312. පටිසම්මොදිතො රාජා තතො පුච්ඡි අනන්තරා, අත්ථං ධම්මඤ්ච ඤායඤ්ච ධම්මකාමො රථෙසභො.
5313. කථං ධම්මං චරෙ මච්චො මාතාපිතුසු කස්සප, කථං චරෙ ආචරියෙ පුත්තදාරෙ කථං චරෙ.
5314. කථං චරෙය්ය වුද්ධෙසු කථං සමණබ්රාහ්මණෙ, කථඤ්ච බලකායස්මිං කථං ජානපදෙ චරෙ.
5315. කථං ධම්මං චරිත්වාන පෙච්ච ගච්ඡති{3} සුග්ගතිං, කථඤ්චෙකෙ අධම්මට්ඨා පතන්ති නිරයං අධො.
5316. වෙදෙහස්ස වචො සුත්වා කස්සපො එකදබ්රවි, සුණොහි මෙ මහාරාජ සච්චං අවිතථං පදං.
5317. නත්ථි ධම්මස්ස චිණ්ණස්ස{4} ඵලං කල්යාණපාපකං, නත්ථි දෙව පරො ලොකො කො තතො හි ඉධාගතො.
5318. නත්ථි දෙව පිතරො වා කුතො මාතා කුතො පිතා, නත්ථි ආචරියො නාම අදන්තං කො දමෙස්සති.