227. සීහඞ්ගුලි සීහනඛො සීහපාදපතිට්ඨිතො, සො සීහො සීහසඞ්ඝම්භි එකො නදති අඤ්ඤථා.
228. මා ත්වං නදී රාජපුත්ත අප්පසද්දො වනෙ වස, සරෙන{1} ඛො තං ජානෙය්යුං න හි තෙ පෙත්තිකො සරො’ති
8. සීහකොත්ථුකජාතකං.
229. නෙතං සීහස්ස නදිතං න ව්යග්ඝස්ස{2} න දීපිනො, පාරුතො සීහචම්මෙන ජම්මො නදති ගද්රභො.
230. චිරම්පි ඛො තං ඛාදෙය්ය ගද්රභො හරිතං යවං, පාරුතො සීහචම්මෙන රවමානොව දූසයී’ති.
9. සීහචම්මජාතකං.
231. පස්ස සද්ධාය සීලස්ස චාගස්ස ච අයං ඵලං, නාගො නාවාය වණ්ණෙන සද්ධං වහති උපාසකං{3}.
232. සබ්භිරෙව සමාසෙථ සබ්භි කුබ්බෙථ සන්ථවං, සතං හි සන්නිවාසෙන සොත්ථිං ගච්ඡති {*}නහාපිතො’ති.
10. සීලානිසංසජාතකං.
අසදිසවග්ගො චතුත්ථො.
තස්සුද්දානං:
ධනුග්ගහකුඤ්ජරඅප්පරසො ගිරිදත්තමනාවිලචිත්තවරං, දධිවාහනජම්බුකසීහනඛො හරිතයවනාගවරෙන දස.
5. රුහකවග්ගො
233. අම්භො රුහක{1} ඡින්නාපි ජියා සන්ධීයතෙ පුන, සන්ධීයස්සු පුරාණියා මා කොධස්ස වසං ගමි.
234. විජ්ජමානාසු{2} මරුවාසු විජ්ජමානෙසු කාරුසු, අඤ්ඤං ජියං කරිස්සාම අලඤ්ඤෙව පුරාණියා’ති.
1. රුහකජාතකං.
235. ඉත්ථි සියා රූපවතී සා ච සීලවතී සියා, පුරිසො තං න ඉච්ඡෙය්ය සද්දහාසි මහොසධ.
236. සද්දහාමි මහාරාජ පුරිසො දුබ්භගො සියා, සිරී ච කාලකණ්ණි ච න සමෙන්ති කුදාචනන්ති.
2. සිරිකාලකණ්ණි ජාතකං.{3}
237. අයමෙව සා අහම්පි සො අනඤ්ඤො අයමෙව සො හත්ථච්ඡින්නො අනඤ්ඤො යමාහ කොමාරපතී{4} මමන්ති වජ්ඣිත්ථියො නත්ථි ඉත්ථිසු සච්චං.
238. ඉමඤ්ච ජම්මං මුසලෙන හන්ත්වා ලුද්දං ඡවං පරදාරූපසෙවිං, ඉමිස්සා ච නං පාපපතිබ්බතාය ජීවන්තියා ඡින්දථ කණ්ණනාසන්ති.
3. චුල්ලපදුමජාතකං.
239. න සන්ති දෙවා පවසන්ති නූන නහ නූන{5} සන්ති ඉධ ලොකපාලා, සහසා කාරොන්තානං අසඤ්ඤතානං. නහ නූන සන්ති පටිසෙධිතාරො{6}.
240. අකාලෙ වස්සති තස්ස කාලෙ තස්ස න වස්සති, සග්ගා ච චවතිට්ඨානා නනු සො තාවතා හතො’ති
4. මණිචොරජාතකං.
241. පබ්බතූපත්ථරෙ{1} රම්මෙ ජාතා පොක්ඛරණී සිවා, තං සිගාලො{2} අපාපායි ජානං සීහෙන රක්ඛිතං.
242. පිවන්ති වෙ{3} මහාරාජ සාපදානි මහානදිං න තෙන අනදී හොති ඛමස්සු යදි තෙ පියා’ති.
5. පබ්බතූපත්ථරජාතකං.{4}
243. යෙ න කාහන්ති ඔවාදං නරා බුද්ධෙන දෙසිතං, ව්යසනං තෙ ගමිස්සන්ති රක්ඛසීහීව වාණිජා.
244. යෙ ච කාහන්ති ඔවාදං නරා බුද්ධෙන දෙසිතං, සොත්ථිං පාරං ගමිස්සන්ති වලාහෙනෙව වාණිජා’ති.
6. වලාහස්සජාතකං.
245. න නං උම්භයතෙ{5} දිස්වා න ච නං පටිනන්දති, චක්ඛූනි චස්ස න දදාති පටිලොමඤ්ච වත්තති.
246. එතෙ{6} භවන්ති{7} ආකාරා අමිත්තස්සමිං පතිට්ඨිතා, යෙහි අමිත්තං ජානෙය්ය දිස්වා සුත්වා ච පණ්ඩිතො’ති.
7. මිත්තාමිත්තජාතකං.
247. පවාසා ආගතො තාත ඉදානි න චිරාගතො, නච්චින්නු තාත තෙ මාතා න අඤ්ඤමුපසෙවති.
248. න ඛො පනෙතං සුභණං ගිරං සච්චූපසංහිතං, සයෙථ පොට්ඨපාදොව මුම්මුරෙ{1} උපකූසිතො’ති.{*}
8. රාධජාතකං.
249. උභයං මෙ න ඛමති උභයං මෙ න රුච්චති, යා චායං කොට්ඨමොතිණ්ණා න දස්සං{2} ඉති භාසති,
250. තං තං ගාමපති බ්රූමි කදරෙ අප්පස්මිං ජීවිතෙ, ද්වෙ මාසෙ කාරං කත්වාන{3} මංසං ජරග්ගගවං කිසං, අප්පත්තකාලෙ චොදෙසි තම්පි මය්හං න රුච්චති.
9. ගහපතිජාතකං.
251. සරීරදව්යං වද්ධව්යං{4} සොජච්චං සාධුසීලියං{†}, බ්රාහ්මණන්ත්වෙව පුච්ඡාම කං{5} නු තෙසං වණිම්භසෙ.
252. අත්ථො අත්ථි සරීරස්මිං වද්ධව්යස්ස{6} නමො කරෙ, අත්ථො අත්ථි සුජාතස්මිං සීලං අස්මාක රුච්චතීති.
10. සාධුසීලජාතකං.
රුහකවග්ගො පඤ්චමො.
තස්සුද්දානං:
අම්භොරුහකරූපවතීමුසලො පවසන්ති සපඤ්චමපොක්ඛරණි, අථ මුත්තිමවාණිජ උම්භයතෙ චිරආගත කොට්ඨ සරීර දස.
6. නතංදළ්හවග්ගො
253. න තං දළ්හං බන්ධනමාහු ධීරා යදායසං දාරුජං බබ්බජඤ්ච,{1} සාරත්තරත්තා මණිකුණ්ඩලෙසු පුත්තෙසු දාරෙසු ච යා අපෙඛා.
254. එතං දළ්හං බන්ධනමාහු ධීරා ඔහාරිනං සිථිලං දුප්පමුඤ්චං, එතම්පි ඡෙත්වාන වජන්ති ධීරා අනපෙක්ඛිනො කාමසුඛං පහායාති.
1. බන්ධනාගාරජාතකං.
255. හංසා කොඤ්චා මයූරා ච හත්ථියො{2} පසදා{3} මිගා, සබ්බෙ සීහස්ස භායන්ති නත්ථි කායස්මිං තුල්යතා.
256. එවමෙව මනුස්සෙසු දහරො චෙපි පඤ්ඤවා සො හි තත්ථ මහා භොති නෙව බාලො සරීරවා’ති.
2. කෙළිසීලජාතකං.
257. විරූපක්ඛෙහි මෙ මෙත්තං මෙත්තං එරාපථෙහි මෙ, ඡබ්බ්යාපුත්තෙහි මෙ මෙත්තං මෙත්තං කණ්හාගොතමකෙහි ච.
258. අපාදකෙහි මෙ මෙත්තං මෙත්තං දිපාදකෙහි මෙ, චතුප්පදෙහි මෙ මෙත්තං මෙත්තං බහුප්පදෙහි මෙ.
259. මා මං අපාදකො හිංසි මා මං හිංසි දිපාදකො, මා මං චතුප්පදො මෙ හිංසි මා මං හිංසි බහුප්පදො
260. සබ්බෙ සත්තා සබ්බෙ පාණා සබ්බෙ භූතා ච කෙවලා, සබ්බෙ භද්රානි පස්සන්තු මා කඤ්චි{4} පාපමාගමා.
261. අප්පමාණො බුද්ධො අප්පමාණො ධම්මො අප්පමාණො සඞ්ඝො, පමාණවන්තානි සිරිංසපානි{1} අභි විච්ඡිකා සතපදී උණ්ණානාභි සරබූ{2} මූසිකා.
262. කතා මෙ රක්ඛා කතා මෙ පරිත්තා පටික්කමන්තු භූතානි, සොහං නමො භගවතො නමො සත්තන්නං සම්මාසම්බුද්ධානන්ති.
3. ඛන්ධවත්තජාතකං{3}.
263. අපි වීරක පස්සෙසි සකුණං මඤ්ජුභාණකං{4}, මයූරගීවසඞ්කාසං පතිං මය්හං{5} සවිට්ඨකං.
264. උදකථලචරස්ස පක්ඛිනො නිච්චං ආමකමච්ඡභොජිනො, තස්සානුකරං සවිට්ඨකො සෙවාලෙ{6} පළිගුණ්ඨිතො{7} මතො’ති.
4. වීරකජාතකං.
265. සොභති{8} මච්ඡො ගඞ්ගෙය්යො අථො සොභතී යාමුනො, චතුප්පදායං{9} පුරිසො නිග්රොධපරිමණ්ඩලො, ඊසකායනගීවො ච සබ්බෙව අතිරොචති.
266. යං පුච්ඡිතො නං තං අක්ඛා අඤ්ඤං අක්ඛාති{10} පුච්ඡිතො, අත්තප්පසංසකො පොසො නායං අස්මාක රුච්චතී’ති.
5. ගඞ්ගෙය්යජාතකං.
267. ඉඞ්ඝ වද්ධමයං{11} පාසං ඡින්ද දන්තෙහි කච්ඡප, අහං තථා කරිස්සාමි යථා නෙහිති ලුද්දකො.
268. කච්ඡපො පාවිසී වාරිං කුරුඞ්ගො පාවිසී වනං. සතපත්තො දුමග්ගම්භා දූරෙ පුත්තෙ අපානයීති.
6. කුරුඞ්ගමිගජාතකං.
269. අයමස්සකරාජෙන දෙසො විචරිතො මයා, අනුකාමයානුකාමෙන{1} පියෙන පතිනා සහ.
270. නවෙන සුඛදුක්ඛෙන පොරාණං අපිථීයති{2}, තස්මා අස්සකරඤ්ඤාව කීටො පියතරො මමන්ති.
7. අස්සකජාතකං.
271. අලමෙතෙහි අම්බෙහි ජම්බූහි පනසෙහි ච, යානි පාරං සමුද්දස්ස වරං මය්හං උදුම්බරො.
272. මහතී වත තෙ බොන්දි න ච පඤ්ඤා තදූපිකා, සුංසුමාර වඤ්චිතො මෙසි ගච්ඡදානි යථා සුඛන්ති.
8. සුංසුමාරජාතකං.
273. දිට්ඨා මයා වනෙ රුක්ඛා අස්සකණ්ණවිභීටකා{3}, න තානි එවං සක්කන්ති යථා ත්වං රුක්ඛ සක්කසි.
274. පුරාණකක්කරො{4} අයං භෙත්වා පඤ්ජරමාගතො, කුසලො වාළපාසානං අපක්කමති භාසතී’ති.
9. කක්කරජාතකං.
275. අම්භො කො නාමයං රුක්ඛො සීනපත්තො සකණ්ටකො{5}, යත්ථ එකප්පහාරෙන උත්තමඞ්ගං විඝාටිතං.
276. ආචරිතායං{6} විතුදං වනානි කට්ඨඞ්ගරුක්ඛෙසු අසාරකෙසු, අථාසදා ඛදිරං ජාතසාරං යත්ථබ්හිදා ගරුළො උත්තමඞ්ගන්ති.
10 කන්දගළකජාතකං.
නතංදළ්හවග්ගො ඡට්ඨො
තස්සුද්දානං:
දළ්හබන්ධනහංසවරො ච පුන විරූපක්ඛ සවිට්ඨකමච්ඡවරො සකුරුඞ්ගසඅස්සකඅම්බවරො පුන කක්කරකො ගරුළෙන දස.
7. බීරණත්ථම්භක වග්ගො
277. අකාසි යොග්ගං{1} ධුවමප්පමත්තො සංවච්ඡරං බීරණත්ථම්භකස්මිං, ව්යාකාසි සඤ්ඤං{2} පරිසං විගය්හ න නිය්යමො{3} තායති අප්පපඤ්ඤං.
278. ද්වයං{4} යාචනකො තාත සොමදත්ත නිගච්ඡති, අලාභං ධනලාභං වා එවං ධම්මා හි යාචනා’ති.
1. සොමදත්ත ජාතකං.
279. අඤ්ඤො උපරිමො වණ්ණො අඤ්ඤො වණ්ණොව හෙට්ඨිමො බ්රාහ්මණිං ත්වෙව පුච්ඡාමි කිං හෙට්ඨා කිච්ච උප්පරි.
280. අහං නටොස්මි භද්දන්තෙ භික්ඛකොස්මි ඉධාගතො, අයං හි කොට්ඨමොතිණ්ණො අයං සො යං ගවෙසසීති.
2. උච්ඡිට්ඨභත්තජාතකං.
281. ඉසීනමන්තරං කත්වා භරුරාජාති{5} මෙ සුතං, උච්ඡින්නො සහ රට්ඨෙන{6} ස රාජා විභවං ගතො
282. තස්මා හි ඡන්දා ගමනං නප්පසංසන්ති පණ්ඩිතා, අදුට්ඨචිත්තො භාසෙය්ය ගිරං සච්චූපසංහිතන්ති.
3. භරුජාතකං{7}.
283. පුණ්ණං නදිං යෙන ච පෙය්යමාහු ජාතං යවං යෙන ච ගුය්හමාහු, දූරං ගතං යෙන ච අව්හයන්ති සොත්යාගතො හන්ද ච භුඤ්ජ බ්රාහ්මණ
284. යතො මං සරති රාජා වායසම්පි පහෙතවෙ: හංසා{8} කොඤ්චා මයූරා ච අසතියෙව පාපියාති.
4. පුණ්ණනදීජාතකං.
285. අවධි වත අත්තානං කච්ඡපො ව්යාහරං{1} ගිරං, සුග්ගහිතස්මිං කට්ඨස්මිං වාචාය සකියාවධි.
286. එතම්පි දිස්වා නරවිරියසෙට්ඨ{2} වාචං පමුඤ්චෙ කුසලං නාතිවෙලං පස්සසි බහුභාණෙන කච්ඡපං ව්යසනං ගතන්ති.
5. කච්ඡපජාතකං