9. අපායිම්හවග්ගො
81. අපායිම්හ අනවචිම්හ අගායිම්හ රුදිම්හ ච, විසඤ්ඤකරණිං{1} පීත්වා{2} දිට්ඨා නාහුම්හ වානරා’ති.
1. සුරාපානජාතකං.
82. අතික්කම්ම රමණකං සදාමන්තඤ්ච දූභකං{3}, ස්වාසි පාසාණමාසීනො යස්මා ජීවං න මොක්ඛසී’ති.
2. මිත්තවින්දජාතකං.
83. මිත්තො හවෙ සත්තපදෙන{4} හොති සහායො පන ද්වාදසකෙන හොති, මාසද්ධමාසෙන ච ඤාති හොති තතුත්තරිං අන්තසමොපි හොති. සොහං කථං අන්තසුඛස්ස හෙතු{5} චිරසන්ථුතං{6} කාලකණ්ණිං ජහෙය්යන්ති.
3. කාලකණ්ණිජාතකං.
84. ආරොග්යමිච්ඡෙ පරමඤ්ච ලාභං සීලඤ්ච වුද්ධානුමතං සුතඤ්ච, ධම්මානුවත්තී ච අලීනතා ච{7} අත්ථස්ස ද්වාරා පමුඛා ඡළෙතෙ’ති.
4. අත්ථස්සද්වාරජාතකං.
85. ආයතිදොසං නාඤ්ඤාය යො කාමෙ පතිසෙවති, විපාකන්තෙ හනන්ති නං කිංපක්කමිව භක්ඛිතන්ති.
5. කිම්පක්කජාතකං.
86. සීලං කිරෙව කල්යාණං සීලං ලොකෙ අනුත්තරං, පස්ස ඝොරවිසො නාගො සීලවාති න හඤ්ඤතී’ති.
6. සීලවීමංසජාතකං.
87. යස්ස මඞ්ගලා සමූහතා උප්පාතා සුපිනා ච ලක්ඛණා ච, සමඞ්ගලදොසවීතිවත්තො{1} යුගයොගාධිගතො න ජාතුමෙතීති.
7. මඞ්ගලජාතකං.
88. කල්යාණිමෙව මුඤ්චෙය්ය නහි මුඤ්චෙය්ය පාපිකං, මොක්ඛො කල්යාණියා සාධු මුත්වා තපති{2} පාපිකන්ති.
8. සාරම්හජාතකං.
89. වාචාව කිර තෙ ආසි සණ්හා සඛිලභාණිනො, තිණමත්තෙ අසජ්ජිත්ථො නො ච නික්ඛසතං හරන්ති.
9. කුහකජාතකං
90. යො පුබ්බෙ කතකල්යාණො කතත්ථො නාවබුජ්ඣති, පච්ඡා කිච්චෙ සමුප්පන්නෙ කත්තාරං නාධිගච්ඡති.
10. අකතඤ්ඤුජාතකං.
අපායිම්හවග්ගො නවමො.
තස්සුද්දානං:
අපායිම්හ ච දූභකසත්තපදං ඡළද්වාර ච ආයතිනා ච පුන, අහිසීලවමඞ්ගලිපාපිකස්සා සතනික්ඛකතත්ථවරෙන දස.
10. ලිත්තවග්ගො
91. ලිත්තං පරමෙන තෙජසා ගිලමක්ඛං පුරිසො න බුජ්ඣති, ගිල රෙ ගිල පාපධූත්තක පච්ඡා තෙ කටුකං භවිස්සතීති.
1. ලිත්තජාතකං
92. උක්කට්ඨෙ සූරමිච්ඡන්ති මන්තීසු අකුතූහලං, පියඤ්ච අන්නපානම්හි අත්ථෙ ජාතෙ ච පණ්ඩිතන්ති.
2. මහාසාරජාතකං.
93. න විස්සසෙ අවිසසත්ථෙ විස්සත්ථෙපි න විස්සසෙ, විස්සාසා භයමන්වෙති සීහංව මිගමාතුකා’ති.
3. විස්සාසභොජනජාතකං.
94. සො තත්තො සොසීනො එකො භිංසනකෙ වනෙ නග්ගො න චග්ගිමාසීනො එසනා පසුතො මුනී’ති.
4. ලොමහංසජාතකං.
95. අනිච්චා වත සඞ්ඛාරා උප්පාදවයධම්මිනො, උප්පජ්ජිත්වා නිරුජ්ඣන්ති තෙසං වූපසමො සුඛොති.
5. මහාසුදස්සනජාතකං.
96. සමතිත්තිකං අනවසෙසකං{1} තෙලපත්තං යථා පරිහරෙය්ය, එවං සචිත්තමනුරක්ඛෙ පත්ථයානො දිසං අගතපුබ්බන්ති.
6. තෙලපත්තජාතකං
97. ජිවකඤ්ච මතං දිස්වා ධනපාලිඤ්ච දුග්ගතං{2}, පන්ථකඤ්ච වනෙ මූළ්හං පාපකො පුනරාගතො’ති.
7. නාමසිද්ධිජාතකං.
98. සාධු ඛො පණ්ඩිතො නාම නත්වෙව අතිපණ්ඩිතො. අතිපණ්ඩිතෙන පුත්තෙන මනම්හි{3} උපකූලිතො’ති,
8. කූටවාණිජජාතකං.
99. පරොසභස්සම්පි සමාගතානං කන්දෙය්යුං{4} තෙ වස්සසතං අපඤ්ඤා, එකොව සෙය්යො පුරිසො සපඤ්ඤො යො භාසිතස්ස විජානාති අත්ථ’න්ති.
9. පරොසහස්සජාතකං.
100. අසාතං සාතරූපෙන පියරූපෙන අප්පියං දුක්ඛං සුඛස්ස රූපෙන පමත්තමතිවත්තතී’ති.
10. අසාතරූපජාතකං.
ලිත්තවග්ගො දසමො.
තස්සුද්දානං:
ගිලමක්ඛකුතූහලමාතුකස්සා මුනිනා ච අනිච්චතපත්ථවරං, ධනපාලිවරො අතිපණ්ඩිතකො සපරොසහස්සඅසාත දස.
මජ්ඣිමපණ්ණාසකො.
11. පරොසතවග්ගො
101. පරොසතඤ්චෙපි සමාගතානං ඣායෙය්යුං තෙ වස්සසතං අපඤ්ඤා, එකොව සෙය්යො පුරිසො සපඤ්ඤො යො භාසිතස්ස විජානාති අත්ථ’න්ති.
1. පරොසතජාතකං.
102. යො දුක්ඛඵුට්ඨාය භවෙය්ය තාණං සො මෙ පිතා දූභි{1} වනෙ කරොති, සා කස්ස කන්දාමි වනස්ස මජ්ඣෙ යො තායිතා සො සහසා කරොතීති.
2. පණ්ණිකජාතකං.
103. යත්ථ වෙරී නිවසති න වසෙ තත්ථ වසෙ තත්ථ පණ්ඩිතො, එකරත්තං දිරත්තං වා දුක්ඛං වසති වෙරිසූති.
3. වෙරීජාතකං.
104. චතුබ්භිඅට්ඨජ්ඣගමා අට්ඨාහි-පි ච සොළස, සොළසාහි ච බත්තිංස අත්රිච්ඡං චක්කමාසදො. ඉච්ඡාහතස්ස පොසස්ස චක්කං භමති මත්ථකෙති.
4. මිත්තවින්දජාතකං.
105. බහුං පෙතං වනෙ කට්ඨං වාතො භඤ්ජති දුබ්බලං; තස්ස චෙ භායසී නාග කිසො නූන භවිස්සසීති.
5. දුබ්බලකට්ඨජාතකං.
106. සුසුඛං වත මං ජීවන්තං{1} පචමානා උදඤ්චනී චොරී ජායප්පවාදෙන තෙලං ලොණඤ්ච යාචතීති.
6. උදඤ්චනීජාතකං.
107. සාධු ඛො සිප්පකං නාම අපි යාදිසකීදිසං, පස්ස ඛඤ්ජප්පහාරෙන{2} ලද්ධා ගාමා චතුද්දිසාති.
7. සාලිත්තකජාතකං.
108. සික්ඛෙය්ය සික්ඛිතබ්බානි සන්ති සච්ඡන්දිනො ජනා, බාහියා හි සුභන්තෙන{3} රජානමභිරාධයීති{4}.
8. බාහියජාතකං{5}.
109. යථන්නො පුරිසො හොති තථන්නා තස්ස දෙවතා, ආහරෙතං කණං පූවං{6} මා මෙ භාගං විනාසයාති
9. කුණ්ඩපූවජාතකං.
110. සබ්බසංහාරකො නත්ථි සුද්ධං කඞ්ගු පවායති. අලිකං භාසති යං ධුත්තී සච්චමාහ මහල්ලිකාති.
10. සබ්බසංහාරකපඤ්හො.
පරොසතවග්ගො එකාදසමො.
තස්සුද්දානං:
සපරොසතතායිතවෙරී පුන භමචක්කථ නාගසිරිව්හයවනො, සුඛකඤ්චවතසිප්පකබාහියා කුණ්ඩපූවමහල්ලිකකා ච දස.
12. හංසිවග්ගො
111. හංසි ත්වං{1} එවමංඤ්ඤසි සෙය්යො පුත්තෙන පිතාති රාජසෙට්ඨ, හන්දස්සතරස්ස තෙ අයං අස්සතරස්ස හි ගද්රභො පිතා’ති.
1. ගද්රභපඤ්හො.
112. යෙන සත්තුඛිලඞ්ගා ච දිගුණ පලාසො ච පුප්ඵිතො, යෙනාදාමි තෙන වදාමි යෙන නාදාමි න තෙන වදාමි එස මග්ගො යව මජ්ඣකසස එතං ඡන්නපථං විජානාහිති.
2. අමරාදෙවිපඤ්හො.
113. සද්දහාසි සිගාලස්ස{2} සුරාපීතස්ස බ්රාහ්මණ, සිප්පිකානං සතං නත්ථි කුතො කංසසතා දුවෙති.
3. සිගාලජාතකං{3}.
114. බහුචින්තී අප්පචින්තී ච උභො ජාලෙ අබජ්ඣරෙ, මිතචින්ති අමොචෙසි{4} උභො තත්ථ සමාගතා’ති.
4. මිතචින්තීජාතකං.
115. යායඤ්ඤමනුසාසති{5} ලොලුප්පචාරිණි, සායං විපක්ඛිකා සෙති හතා චක්කෙන සාළිකාති{6}.
5. අනුසාසිකජාතකං{7}.
116. අතිකරමකරාචරීය මය්හම්පෙතං න රුච්චති, චතුත්ථෙ ලඞ්ඝයිත්වාන පඤ්චමියස්මිං{1} ආවුතොති.{2}
6. දුබ්බචජාතකං.
117. අච්චුග්ගතා{3} අතිබලතා අතිවෙලං පහාසිතා, වාචා හන්ති දුම්මෙධං තිත්තිරංවාතිවස්සිත’න්ති.
7. තිත්තිරජාතකං.
118. නාචින්තයන්තො පුරිසො විසෙසමධිගච්ඡති, චින්තිතස්ස ඵලං පස්ස මුත්තොස්මි වධබන්ධනා’ති.
8. වට්ටකජාතකං.
119. අමාතාපිතරි{4} සංවද්ධො අනාචරියකුලෙ{5} වසං, නායං කාලං{6} අකාලං වා අභිජානාති කුක්කුටො’ති.
9. අකාලරාවීජාතකං.
120. අබද්ධා{7} තත්ථ බජ්ඣන්ති යත්ථ බාලා පභාසරෙ, බද්ධාපි තත්ථ මුච්චන්ති යත්ථ ධීරා පහාසරෙ’ති.
10. බන්ධනමොක්ඛජාතකං.
භංසවග්ගො ද්වාදසමො.
තස්සුද්දානං:
අථගද්රභසත්තු චකංසසතං බහුචින්තිසාසිකායාතිකර, අතිවෙලවිසෙසමනාචරියො ච ධීරාපභාසරතෙන දස.
13. කුසනාළිවග්ගො
121. කරෙ සරික්ඛො අථවාපි සෙට්ඨො නිහීනකො චා’පි කරෙය්ය එකො, කරෙය්යුං{1} තෙ ව්යසනෙ උත්තමත්ථං යථා අහං කුසනාළී රුචාය’න්ති.
1. කුසනාළිජාතකං.