තස්සුද්දානං:
සිරිමාතලිධීතරපක්ඛිවරො රතිරාගතොමාතාපිතා ච පුන, ජගතීරුහවුද්ධසුකක්කටකො තථා නන්දකපිණ්ඩවරෙන දස.
5. අත්ථකාමවග්ගො
41. යො අත්ථකාමස්ස හිතානුකම්පිනො ඔවජ්ජමානො න කාරොති සාසනං. අජියා පාදමොලුබ්භ{1} මිත්තකො විය සොචතීති.
1. ලොසකජාතකං.
42. යො අත්ථකාමස්ස හිතානුකම්පිනො ඔවජ්ජමානො න කාරොති සාසනං, කපොතකස්ස වචනං අකත්වා අමිත්තහත්ථත්ථගතොව සෙතී’ති.
2. කපොතකජාතකං.
43. යො අත්ථකාමස්ස හිතානුකම්පිනො ඔවජ්ජමානො න කාරොති සාසනං, එවං සො නිහතො සෙති වෙළුකස්ස යථා පිතා’ති.
3. වෙළුකජාතකං.
44. සෙය්යො අමිත්තො මතියා උපෙතො නත්ථෙව මිත්තො මතිවිප්පහීනො, මකසං වධිස්සන්ති හි එළමූගො පුත්තො පිතු අබ්භිදා උත්තමඞ්ගන්ති.
4. මකසජාතකං.
45. සෙය්යො අමිත්තො මෙධාවී යඤ්චෙ බාලානුකම්පකො, පස්ස රොහිණිකං ජම්මිං මාතරං හන්ත්වාන සොචති’ති.
5. රොහිණීජාතකං.
46. න වෙ අනත්ථකුසලෙන අත්ථචරියා සුඛාවහා, හාපෙති අත්ථං දුම්මෙධො කපි ආරාමිකො යථා’ති.
6. ආරාමදූසකජාතකං.
47. න චෙ අනත්ථකුසලෙන අත්ථචරියා සුඛාවහා, හාපෙති අත්ථං දුම්මෙධො කොණ්ඩඤ්ඤො වාරුණිං යථාති.
7. වාරුණීදූසකජාතකං
48. අනුපායෙන යො අත්ථං ඉච්ඡති සො විහඤ්ඤති, චෙතා හනිංසු වෙදබ්භං{1} සබ්බෙ තෙ ව්යසනමජ්ඣගූති
8. වෙදබ්භජාතකං{2}.
49. නක්ඛත්තං පතිමානෙන්තං අත්ථො බාලං උපච්චගා, අත්ථො අත්ථස්ස නක්ඛත්තං කිං කරිස්සන්ති තාරකා’ති
9. නක්ඛත්තජාතකං.
50. දුම්මෙධානං සහස්සෙන යඤ්ඤො මෙ උපයාචිතො, ඉදානි ඛොහං යජිස්සාමි බහූ අධම්මිකො ජනො’ති.
10. දුම්මෙධජාතකං.
අත්ථකාමවග්ගො පඤ්චමො.
පඨමො පණ්ණාසකො.
තස්සුද්දානං:
අථමිත්තකමාතුකපොතවරො තථාවෙළුකඑළමූගොරොහිණී, කපිවාරුණිචෙතචරා ච පුන තථා තාරකයඤ්ඤචරෙන දස
6. ආසිංසවග්ගො
51. ආසිංසෙථෙව{1} පුරිසො න නිබ්බින්දෙය්ය පණ්ඩිතො, පස්සාමි වොහං අත්තානං යථා ඉච්ඡිං තථා අහූති
1. මහාසීලවජාතකං.
52. වායමෙථෙව පුරිසො න නිබ්බින්දෙය්ය පණ්ඩිතො, පස්සාමි වොහං අත්තානං උදකා ථලමුබ්භත’න්ති
2. චූළජනකජාතකං.
53. තථෙව පුණ්ණා පාතියො අඤ්ඤායං වත්තතෙ කථා, ආකාරකෙන ජානාමි න චායං භද්දිකා{2} සුරාති.
3. පුණ්ණපාතිජාතකං.
54. නායං රුක්ඛො දුරාරූහො නපි ගාමතො ආරකා, ආකාරකෙන ජානාමි නායං සාදුඵලො දුමොති.
4. කිංඵලජාතකං.{3}
55. යො අලීනෙන චිත්තෙන අලීනමනසො නරො, භාවෙති කුසලං ධම්මං යොගක්ඛෙමස්ස පත්තියා පාපුණෙ අනුපුබ්බෙන සබ්බසඤ්ඤොජනක්ඛයන්ති.
5. පඤ්චාවුධජාතකං.
56. යො පහට්ඨෙන චිත්තෙන පහට්ඨමනසො නරො භාවෙති කුසලං ධම්මං යොගක්ඛෙමස්ස පත්තියා පාපුණෙ අනුපුබ්බෙන සබ්බසංයොජනක්ඛයන්ති.
6. කඤ්චනක්ඛන්ධජාතකං.
57. යස්සෙතෙ චතුරො ධම්මා වානරින්ද යථා තව, සච්චං ධම්මො ධිතී චාගො දිට්ඨං සො අතිවත්තතී’ති.
7. වානරින්ද ජාතකං.
58. යස්ස එතෙ තයො{1} ධම්මා වානරින්ද යථා තව. දක්ඛියං සූරියං පඤ්ඤා දිට්ඨං සො අතිවත්තතී’ති.
8. තයොධම්මජාතකං.
59. ධමෙ ධමෙ නාතිධමෙ අතිධන්තං හි පාපකං, ධන්තෙන{2} හි සතං ලද්ධං අතිධන්තෙන නාසිත’න්ති.
9. භෙරිවාදජාතකං.
60. ධමෙ ධමෙ නාතිධමෙ අතිධන්තං පාපකං, ධන්තෙනාධිගතා භොගා තෙ තාතො විධමී ධමන්ති.
10. සඞ්ඛධමනජාතකං{3}.
ආසිංසවග්ගො ඡට්ඨො{4}.
තස්සුද්දානං:
යථාඉච්ඡිං තථාහුදකාථලා සුරසාදුඵලොවඅලීනමනො, සම්පහට්ඨමනො චතුරො ච තයො සතලද්ධකභොගධනෙනදස.
7. ඉත්ථිවග්ගො
61. අසා{1} ලොකිත්ථියො නාම වෙලා තාසං න විජ්ජති, සාරත්තා ච පගබ්භා{2} ච සිඛී සබ්බඝසො යථා; තා හිත්වා පබ්බජිස්සාමි විවෙකමනුබ්රූහයන්ති.
1. අසාතමන්තජාතකං.
62. යං බ්රාහ්මණො අවාදෙසි වීණං සම්මුඛවෙඨිතො, අන්ධභූතා හතා භරියා තාසු කො ජාතු විස්සසෙ’ති.
2. අන්ධභූතජාතකං{3}.
63. කොධනා අකතඤ්ඤූ ච පිසුනා ච විභෙදිකා{4}, බ්රහ්මචරියං චර භික්ඛු සො සුඛං න හොහිසීති.{*}
3. තක්කජාතකං{5}.
64. මා සු නන්දි ඉච්ඡති මං මාසු සොචි න ඉච්ඡති{6}, ථීනං භාවො දුරාජානො මච්ඡස්සෙවොදකෙ ගතන්ති.
4. දුරාජානජාතකං.
65. යථා නදී ච පන්ථො ච පානාගාරං සභා පපා, එවං ලොකිත්ථියො නාම තාසං කුජ්ඣන්ති පණ්ඩිතාති.
5. අනභිරතිජාතකං.
66. එකා ඉච්ඡා පුරෙ ආසි අලද්ධා මුදුලක්ඛණං, යතො ලද්ධා අළාරක්ඛී ඉච්ඡා ඉච්ඡං විජායථාති.
6. මුදුලක්ඛණජාතකං.
67. උච්ඡඞ්ගෙ දෙව මෙ පුත්තො පථෙ ධාවන්තියා පති, තඤ්ච දෙසං න පස්සාමි යතො සොදරියමානයෙති{1}.
7. උච්ඡඞ්ගජාතකං.
68. යස්මිං මනො නිවිසති චිත්තං වාපි{2} පසීදති, අදිට්ඨපුබ්බකෙ පොසෙ කාමං තස්මිම්පි විස්සසෙ’ති
8. සාකෙතජාතකං.
69. ධිරත්ථු තං විසං වන්තං යමහං ජීවිතකාරණා, වන්තං පච්චාවමිස්සාමි{3} මතං මෙ ජීවිතා වරන්ති.
9. විසවන්තජාතකං.
70. න තං ජිතං සාධු ජිතං යං ජිතං අවජීයති, තං ඛො ජිතං සාධු ජිතං යං ජිතං නාවජීයතීති.
10. කුද්දාලජාතකං.
ඉත්ථිවග්ගො සත්තමො.
තස්සුද්දානං:
සිඛී සබ්බඝසොපි ච වීණවරො පිසුනමිත්තභෙදිකානන්දිනදී, මුදුලක්ඛණසොදරියාචමනො විසසාධුජිතෙන භවන්ති දස.
8. වරණවග්ගො
71. යො පුබ්බෙ කරණීයානි පච්ඡා සො කාතුමිච්ඡති, වරණ{1} කට්ඨභඤ්ජොව ස පච්ඡාමනුතප්පතීති.
1. වරණජාතකං{2}.
72. අකතඤ්ඤුස්ස පොසස්ස නිච්චං විවරදස්සිනො, සබ්බඤ්චෙ පඨවිං දජ්ජා නෙව නං අභිරාධයෙති.
2. සීලවනාගරාජ{3}ජාතකං.
73. සච්චං කිරෙවමාහංසු නරා එකච්චියා ඉධ, කට්ඨං විප්ලාවිතං{4} සෙය්යො නත්වෙවෙකච්චියො නරොති.
3. සච්චංකිරජාතකං.
74. සාධු සම්බහුලා ඤාතී අපි රුක්ඛා අරඤ්ඤජා, වාතො වහති එකට්ඨං බ්රහන්තම්පි වනස්පතින්ති{5}.
4. රුක්ඛධම්මජාතකං.
75. අභිත්ථනය පජ්ජුන්න නිධිං කාකස්ස නාසය, කාකං සොකාය රන්ධෙහි මඤ්ච සොකා පමොචයා’ති.
5. මච්ඡජාතකං.
76. අසඞ්කියොම්භි ගාමම්භි අරඤ්ඤෙ නත්ථි මෙ භයං, උජුමග්ගං සමාරූළ්හො මෙත්තාය කරුණාය චාති.
6. අසඞ්කියජාතකං.
77. උසභා රුක්ඛා ගාමියො ගාවා ච, අස්සො කංසො සිගාලී ච තුම්භො, පොක්ඛරණී ච අපාකචන්දනං
ලාපූනි සීදන්ති සිලා ප්ලවන්ති. මණ්ඩුකියො කණ්හසප්පෙ ගිලන්ති. කාකං සුවණ්ණා පරිවාරයන්ති. තසාවකා ඵළකානං භයා හි විපරියාසො{1} වත්තති න ඉධමත්ථීති.
7. මහාසුපිනජාතකං.
78. උභො ඛඤ්ජා උභො කුණී උභො විසමචක්ඛුකා, උභින්නං පිළකා ජාතා නාහං පස්සාමි ඉල්ලිසන්ති.
8. ඉල්ලීසජාතකං.
79. යතො විලුත්තා ච හතා ච ගාවො දඩ්ඪානි ගෙහානි ජනො ච නීතො, අථාගමා පුත්තහතාය පුත්තො ඛරස්සරං දෙණ්ඩිමං{2} වාදයන්තොති.
9. ඛරස්සරජාතකං.
80. යන්තෙ පවිකත්ථිතං{3} පුරෙ අථ තෙ පූතිඝරා සරන්ති පච්ඡා. උභයං න සමෙති භීමසෙන{4} යුද්ධකථා ච ඉදං ච තෙ විහඤ්ඤන්ති.
10. භීමසෙනජාතකං{5}.
වරණ{6}වග්ගො අට්ඨමො.
තස්සුද්දානං:
වරණා අකතඤ්ඤූවරෙසුසච්චවරං සවනප්පතිනා ච අභිත්ථනය, කරුණායසිලාප්ලවඉත්ථිසතො පුන දෙණ්ඩිමපූතිසරෙන දස.