168. යෙ බ්රාහ්මණා වෙදගූ සබ්බධම්මෙ තෙ මෙ නමො තෙ ච මං පාලයන්තු, නමත්ථු බුද්ධානං නමත්ථු බොධියා නමො විමුත්තානං නමො විමුත්තියා. ඉමං සො පරිත්තං කත්වා මොරො චරති එසනා.
169. අපෙතයං චක්ඛුමා එකරාජා හරිස්සවණ්ණො පඨවිප්පභාසො, තං තං නමස්සාමි හරිස්සවණ්ණං පඨවිප්පභාසං තයජ්ජ ගුත්තා විහරෙමු රත්තිං.
170. යෙ බ්රාහ්මණා වෙදගූ සබ්බධම්මෙ තෙ මෙ නමො තෙ ච මං පාලයන්තු, නමත්ථු බුද්ධානං නමත්ථු බොධියා නමො විමුත්තානං නමො විමුත්තියා. ඉමං සො පරිත්තං කත්වා මොරො වාසමකප්පයී’ති.
9. මොරජාතකං.
171. එවමෙව නූන{1} රාජානං වෙදෙහං මිථිලග්ගහං, අස්සා වහන්ති ආජඤ්ඤා යථා හංසා විනීලකං.
172. විනීල දුග්ගං භජසි අභූමිං තාත සෙවසි, ගාමන්තිකානි{2} සෙවස්සු එතං මාතාලයං තවා’ති.
10. විනීලකජාතකං.
දළ්හවග්ගො පඨමො.
තස්සුද්දානං:
වරමල්ලිකදද්දරසුකරකො උරගුත්තම පඤ්චම ගග්ගවරො, මහතී චමූ යා ච සිගාලවරො සුහනුත්තමමොරවිනීල දස.
2. සන්ථවවග්ගො
173. න සන්ථවං කාපුරිසෙන කයිරා අරියො හි අරියෙන පජානමත්ථං විරානුවුත්ථොපි කරොති පාපං ගජො යථා ඉන්දසමානගොත්තං.
174. යංත්වෙව{1} ජඤ්ඤා සදිසො මමන්ති සීලෙන පඤ්ඤාය සුතෙන චාපි. තෙනෙව මෙත්තිං කයිරාථ සද්ධිං, සුඛාවහො{2} සප්පුරිසෙන සඞ්ගමොති.
1. ඉන්දසමානගොත්තජාතකං.
175. න සත්ථවස්මා පරමත්ථි පාපියො යො සන්ථවො කාපුරිසෙන හොති, සන්තප්පිතො සප්පිනා පායසෙන{3} කිච්ඡා කතං පණ්ණකුටිං අදඩ්ඪහි.
176. න සන්ථවස්මා පරමත්ථි සෙය්යො යො සන්ථවො සප්පුරිසෙන හොති, සීහස්ස ව්යග්ඝස්ස ච දීපිනො ච සාමා මුඛං ලෙහති සන්ථවෙනා’ති.
2. සන්ථවජාතකං.
177. කාළා මිගා සෙතදන්තා තව ඉමෙ{4} පරොසතං හෙමජාලාහිසඤ්ඡන්නා{5}, තෙ තෙ දදාමීති සුසීම බ්රූසි අනුස්සරං පෙත්තිපිතාමහානං.
178. කාළා මිගා සෙතදන්තා මම ඉමෙ{6} පරොසතං හෙමජාලාභිසඤ්ජන්නා, තෙ තෙ දදාමීති වදාමි මාණව අනුස්සරං පෙත්තිපිතාමහානත්ති.
3. සුසීමජාතකං.
179. යන්නු ගිජ්ඣො යොජනසතං කුණපානි අවෙක්ඛති, කස්මා ජාලඤ්ච පාසඤ්ච ආසජ්ජාපි න බුජ්ඣසි.
180. යදා පරාභවො හොති පොසො ජීවිතසඞ්ඛයෙ, අථ ජාලඤ්ච පාසඤ්ච ආසජ්ජාපි න බුජ්ඣතී’ති.
4. ගිජ්ඣජාතකං.
181. සන්ධිං කත්වා අමිත්තෙන අණ්ඩජෙන ජලාබුජ, විවරිය දාඨං සෙසි කුතො තං{1} භයමාගතං.
182. සඞ්කෙථෙව අමිත්තස්මිං මිත්තස්මිම්පි න විස්සසෙ, අභයා භයමුප්පන්නං අපි මූලානි කන්තතී’ති.
5. නකුලජාතකං.
183. උපසාළ්හකනාමානං සහස්සානි චතුද්දස්ස, අස්මිං පදෙසෙ දඩ්ඪානි නත්ථි ලොකෙ අනාමතං.
184. යම්හි සච්චඤ්ච ධම්මො ච අහිංසා සංයමො දමො, එතදරියා සෙවන්ති එතං ලොකෙ අනාමතන්ති.
6. උපසාළ්හජාතකං.
185. අභුත්වා භික්ඛසි භික්ඛු න හි භුත්වාන භික්ඛසි, භුත්වාන භික්ඛු භික්ඛස්සු මා තං කාලො උපච්චගා.
186. කාලං වොහං න ජානාමි ඡන්නො කාලො න දිසස්ති, තස්මා අභුත්වා භික්ඛාමි මා මං කාලො උපච්චගාති.
7. සමිද්ධිජාතකං.
187. සෙනො බලසා පතමානො ලාප ගොචරඨායිනං, සහසා අජ්ඣප්පත්තො මරණං තෙනුපාගමි.
188. සොහං නයෙන සම්පන්නො පෙත්තිකෙ ගොචරෙ රතො, අපෙතසත්තු මොදාමි සම්පස්සංමි අත්ථමත්තනොති.
8. සකුණග්ඝිජාතකං.
189. යො චෙ මෙත්තෙන චිත්තෙන සබ්බලොකානුකම්පති, උද්ධං අධො ච තිරියඤ්ච අප්පමාණෙන සබ්බසො.
190. අප්පමාණං හිතං චිත්තං පරිපුණ්ණං සුභාවිතං, යං පමාණකතං කම්මං න තං තත්රාවසිස්සතී’ති.
9. අරකජාතකං.
191. නායං පුරෙ උන්නමති{1} තොරණග්ගෙ කකණ්ටකො, මහොසධ විජානාහි කෙන ථද්ධො කකණ්ටකො.
192. අලද්ධපුබ්බං ලද්ධානං අද්ධමාසං කකණ්ටකො, අතිමඤ්ඤති රාජානං වෙදෙහං මිථිලග්ගහන්ති.
10. කකණ්ටක ජාතකං{*}.
සන්ථවවග්ගො දුතියො
තස්සුද්දානං:
අථ ඉන්දසමානසපණ්ණකුටි සුසිමුත්තමගිජ්ඣජලාබුජකා, උපසාළ්හකභික්ඛු සලාපවරො අථ මෙන්තවරො දස උන්නමතීති.
3. කල්යාණධම්මවග්ගො
193. කල්යාණධම්මොති යදා ජනින්ද ලොකෙ සමඤ්ඤා අනුපාපුණාති, තස්මා න හීයෙථ නරො සපඤ්ඤො හිරියාපි සන්තො ධුරමාදියන්ති.
194. සායං සමඤ්ඤා ඉධ ම’ජ්ජපත්තා කල්යාණධම්මොති ජනින්ද ලොකෙ, තා’හං සමෙක්ඛං ඉධ පබ්බජිස්සං. න හි ම’ත්ථි ඡන්දො ඉධ කාමභොගෙ’ති.
1. කල්යාණධම්මජාතකං.
195. කො නු සද්දෙන මහතා අභිනාදෙති දද්දරං, කිං සීහා නප්පටිනන්දන්ති{1} කො නාමෙසො මිගාධිභූ
196. අධමො මිගජාතානං සිගාලො තාත වස්සති, ජාතිමස්ස ජිගුච්ඡන්තා තුණ්හී සීහා සමච්ඡරෙති.
2. දද්දරජාතකං.
197. තාත මාණවකො ඵසො තාලමූලං අපස්සිතො, අගාරකඤ්චිදං අත්ථි හන්ද දෙමස්ස’ගාරකං.
198. මා ඛො තං තාත පක්කොසි දූසෙය්ය නො අගාරකං, නෙතාදිසං මුඛං හොති බ්රාහ්මණස්ස සුසීලිනො’ති.
3. මක්කටජාතකං.
199. අදම්හ තෙ වාරි පහූතරූපං{2} ඝම්මාභිතත්තස්ස පිපාසිතස්ස, සොදානි පීත්වාන කිකිං කිරොසි අසංගමො{3} පාපජනෙන සෙය්යො.
200. කො තෙ සුතො වා දිට්ඨො වා සීලවා නාම මක්කටො, ඉදානි කො තං ඌහච්ච{4} ඵසා අස්මාක ධම්මතා’ති.
4. දුතියමක්කටජාතකං.
201. සබ්බෙසු කිර භූතෙසු සන්ති සීලසමාහිතා, පස්ස සාඛා මිගං ජම්මං ආදිච්චමුපතිට්ඨති.
202. නාස්ස සීලං විජානාථ අනඤ්ඤාය පසංසථ අග්ගිහුත්තඤ්ච ඌහන්තං{1} ද්වෙ ච භින්නා කමණ්ඩලූ’ති.
5. ආදිච්චුපට්ඨානජාතකං.
203. බාලො වතායං දුමසාඛගොචරො පඤ්ඤා ජනින්ද නයිමස්ස විජ්ජති, කළායමුට්ඨං අවකිරිය කෙවලං එකං කළායං පතිතං ගවෙසති.
204. එවමෙව මයං රාජ යෙ චඤ්ඤෙ අතිලොභිනො, අප්පෙන බහු ජිය්යාම{2} කළායෙනෙව වානරොති.
6. කළායමුට්ඨිජාතකං.
205. ධනුහත්ථ කලාපෙහි නෙත්තිංසවරධාරිහි, සමන්තා පරිකිණ්ණම්හා කථං මොක්ඛො භවිස්සති.
206. අප්පෙව බහුකිච්චානං අත්ථො ජායෙථ කොචි නං, අත්ථි රුක්ඛස්ස අච්ඡින්නං ඛජ්ජතඤ්ඤෙව තින්දුකන්තී.
7. තින්දුකජාතකං.
207. ජනිත්තම්මෙ භවිත්තම්මෙ{3} ඉති පඞ්කෙ අවස්සයිං, තං මං පඞ්කො අජ්ඣභවි යථා දුබ්බලකං තථා තං තං වදාමි භග්ගව සුණොහි වචනං මම.
208. ගාමෙ වා යදි රඤ්ඤෙ සුඛං යත්රාධිගච්ඡති, තං ජනිත්තං භවිත්තඤ්ච{1} පුරිසස්ස පජානතො, යම්හි ජීවෙ තම්හි{2} ගච්ඡෙ න නිකෙතහතො සියාති.
8. කච්ඡපජාතකං.
209. තඤ්ච අප්පඤ්ච උච්ඡිට්ඨං තඤ්ච කිච්ඡෙන නො අදා, සොහං බ්රාහ්මණජාතිකො මං භුත්තං තම්පි උග්ගතං.
210. එවං ධම්මං නිරං කත්වා යො අධම්මෙන ජීවති, සතධම්මොව ලාභෙන ලද්ධෙනපි න නන්දතී’ති.
9. සතධම්මජාතකං.
211. දුද්දදං දදමානානං දුක්කරං කම්මකුබ්බතං, අසන්තො නානුකුබ්බන්ති සතං ධම්මො දුරන්නයො.
212. තස්මා සතඤ්ච අසතඤ්ච නානා හොති ඉතො ගති, අසන්තො නිරයං යන්ති සන්තො සග්ගපරායණා’ති.
10. දුද්දදජාතකං.
කල්යාණධම්මවග්ගො තතියො.
තස්සුද්දානං:
සුසමඤ්ඤමිගාධිභූ මාණවකො වාරිපහුතරූපාදිච්චුපට්ඨානා, සකළායසතින්දුකපඞ්ක පුන සතධම්ම සුදුද්දදකෙන දස.
4. අසදිසවග්ගො
213. ධනුග්ගහො අසදිසො රාජපුත්තො මහබ්බලො, දූරෙපාතී{1} අක්ඛණවෙධී මහාකායප්පදාලනො.
214. සබ්බාමිත්තෙ රණං කත්වා න ච කිඤ්චි විහෙඨයි{2}, භාතරං සොත්ථිං කත්වාන සඤ්ඤ මං අජ්ඣුපාගමී’ති.
1. අසදිසජාතකං.
215. සඞ්ගාමාවචරො සූරො බලවා ඉති විස්සුතො, කින්නු තොරණමාසජ්ජ පටික්කමසි තුඤ්ජර.
216. ඔමද්ද ඛිප්පං පළිඝං ඵසිකානි ච අබ්බ{3}, තොරණානි{4} පමද්දිත්වා ඛිප්පං පවිස කුඤ්ජරාති.
2. සඞ්ගාමාවචරජාතකං.
217. {*}වාළොදකං අප්පරසං නිහීනං පීත්වා මදො ජායති ගද්රභානං, ඉමඤ්ච පීත්වාන රසං පණීතං මදො න සඤ්ජායති සින්ධවානං.
218. අප්පං පිවිත්වාන නිභිනජච්චො සො මජ්ජති{5} තෙන ජනින්ද ඵුට්ඨො, ධොරය්හසීලො ච කුලම්භි ජාතො න මජ්ජති අග්ගරසං පිවිත්වා’ති.
3. වාළොදකජාතකං.
219. දූසිතො ගිරිත්තෙන හයො සාමස්ස පණ්ඩවො, පොරාණං ව පකතිං හිත්වා තස්සෙව අනුවිඨියති.
220. සචෙ ව{6} තනුජො පොසො සිඛරාකාරකප්පිතො,{7} ආනනෙ තං ගහෙත්වාන මණ්ඩලෙ පරිවත්තයෙ ඛිප්පමෙව පහත්වාන තස්සෙව අනුවිධීයතීති.
4. ගිරිදත්තජාතකං.
221. යථොදකෙ ආවිලෙ අප්පසන්නෙ න පසස්ති සිප්පිසම්බුකං මච්ඡගුම්බං එවං ආවිලෙ හි චිත්තෙ න පස්සති අත්තදත්ථං පරත්ථං.
222. යථොදකෙ අච්ඡෙ විප්පසන්නෙ සො පස්සති සිප්පිසම්බුකං මච්ඡගුම්බං එවං අනාවිලෙ හි චිත්තෙ සො පස්සති අත්තදත්ථං පරත්ථන්ති.
5. අනභිරතිජාතකං.
223. වණ්ණගන්ධරසූපෙතො අම්බායං{1} අහුවා පුරෙ, තමෙව පූජං ලභමානො කෙනම්බො කටුකප්ඵලො.
224. පුචිමන්දපරිවාරො අම්බො තෙ දධිවාහන, මූලං මූලෙන සංසට්ඨං සාඛා සාඛා නිසෙවරෙ{2} අසතං සන්නිවාසෙන තෙනම්බො කටුකප්ඵලො’ති.
6. දධිවාහනජාතකං.
225. උච්චෙවිටහි{3} මාරුය්හ මන්තයව්හො රහොගතා, නීචෙ ඔරුය්හ මන්තව්හො මිගරාජාපි සොස්සති{4}.
226. යං සුපණ්ණො සුපණ්ණෙන{5} දෙවො දෙවෙන මන්තයෙ, කිං තෙත්ථ{6} චතුමට්ටස්ස ඛිලං{7} පවිස ජම්බුකාති.
7. චතුමට්ඨජාතකං.