තස්සුද්දානං:
දළ්හකණ්හධනඤ්චයසඞ්ඛවරො රාජා සත්තාහ සසඛ තක්කළිනා, ධම්මං කුක්කුටකුණ්ඩලිභොජනදා චක්කවාක සුභූරිසසොත්ථි ඝතො.
11. එකාදසකනිපාතො
1532. තස්ස නාගස්ස විප්පවාසෙන විරූළ්හා සල්ලකී{1} ච කුටජා ච, කුරුවින්දකරවරා භිසසාමා{2} නිවාතෙ පුප්ඵිතා ච කණිකාරා.{3}
1533. කොචිදෙව සුවණ්ණකායූරා, නාගරාජං භරන්ති පිණ්ඩෙන, යත්ථ රාජා රාජකුමාරො වා කවචම්භිහෙස්සති අසම්භීතො.
1534. ගණ්හාහි නාග කබළං මා නාග කිසකො භව, බහූනි රාජකිච්චානි යානි{4} නාග කරිස්සසි.
1535. සා නූන සා කපණිකා අන්ධා අපරිනායිකා, ඛාණුං පාදෙන ඝට්ටෙති ගිරිං චණ්ඩොරණංපති.
1536. කා නු තෙ සා මහානාග අන්ධා අපරිනායිකා, ඛාණුං පාදෙන ඝට්ටෙති ගිරිං චණ්ඩොරණංපති.
1537. මාතා මෙ සා මහාරාජ අන්ධා අපරිනායිකා, ඛාණුං පාදෙන ඝට්ටෙති ගිරිං චණ්ඩොරණංපති.
1538. මුඤ්චථෙතං මහානාගං යො යං භරති මාතරං, සමෙතු මාතරා නාගො සහ සබ්බෙහි ඤාතිහි.
1539. මුත්තොච බන්ධනා නාගො කාසිරාජෙන පෙසිතො, මුහුත්තං විස්සමිත්වාන{5} අගමා යෙන පබ්බතො.
1540. තතො සො නලිනිං{6} ගන්ත්වා සීතං තුඤ්ජරසෙවිතං, සොණ්ඩාය උදකමාහත්වා{7} මාතරං අභිසිඤ්චථ.
1541. කොයං අනරියො දෙවො අකාලෙන{8} පි වස්සති, ගතො මෙ අත්රජො පුත්තො යො මය්හං පරිචාරකො.
1542. උට්ඨෙහි අම්ම කිං සෙසි ආගතො ත්යාභමත්රජො, මුත්තොම්හි කාසිරාජෙන වෙදෙහෙන යසස්සිනා.
1543. චිරං ජීවතු සො රාජා කාසීනං රට්ඨවද්ධනො,{9} යො මෙ පුත්තං අමොචෙසි සදා වුද්ධාපචායිකන්ති.{10}
1. මාතුපොසකජාතකං.
1544. සුණොහි මය්හං වචනං ජනින්ද අත්ථෙන ජුණ්හම්භි ඉධානුපත්තො, න බ්රාහ්මණෙ අද්ධිකෙ තිට්ඨමානෙ ගන්තබ්බමාහු දිපදාන{1} සෙට්ඨ,
1545. සුණොමි තිට්ඨාමි වදෙහි බ්රහ්මෙ යෙනාසි{2} අත්ථෙන ඉධානුපත්තො, කං වා ත්වමත්ථං මයි පත්ථයානො ඉධාගමා බ්රහෙම තදිඞ්ඝ බ්රූහි.
1546. දදාහි මෙ ගාමවරානි පඤ්ච දාසීසතං සත්තගවං සතානි, පරොසභස්සඤ්ච සුවණ්ණනික්ඛෙ භරියා ච මෙ සාදිසී ද්වෙ දදාහි.
1547. තපො නු තෙ බ්රාහ්මණ භිංසරූපො මන්තා නු තෙ බ්රාහ්මණ චිත්තරූපා, යක්ඛාච තෙ අස්සවා සන්ති කෙචි අත්ථං වා මෙ අභිජානාසි කත්තං.
1548. න මෙ තපො අත්ථි න චාපි මන්තා යක්ඛාපි{3} මෙ අස්සවා නත්ථි කෙචි අත්ථම්පි තෙ නාභිජානාමි කත්තං පුබ්බෙ ච ඛො සඞ්ගතිමත්තමාසි.
1549. පඨමං ඉමං දස්සනං ජානතො මෙ න නාභිජානාමි ඉතො පුරත්ථා, අක්ඛාහි මෙ පුච්ඡිතො එතමත්ථං කදා කුහිං වා අහු සඞ්ගමො නො.
1550. ගන්ධාරරාජස්ස පුරම්භි රම්මෙ අවසිම්හසෙ තක්කසිලාය දෙව, තත්ථන්ධකාරම්භි තිමිස්සිකායං{4} අංසෙන අංසං සමඝට්ටයිම්හ.
1551. තෙ තත්ථ ඨත්වාන උභො ජනින්ද සාරාණීයං වීතිසාරිම්භ{5} තත්ථ, සායෙව නො සඞ්ගතිමත්තමාසි තතො න පච්ඡා න පුරෙ අහොසි.
1552. යදා කදාචි මනුජෙසු බ්රහ්මෙ සමාගමො සප්පුරිසෙන හොති, න පණ්ඩිතා සඞ්ගතිසන්ථවානි පුබ්බෙ කතං වාපි විනාසයන්ති.
1553. බාලා ච ඛො සඞ්ගතිසන්ථවානි. පුබ්බෙ කතං වාපි විනාසයන්ති, බහුම්පි බාලෙසු කතං විනස්සති තථා හි බාලා අකතඤ්ඤුරූපා.
1554. ධීරා ච ඛො සඞ්ගතිසන්ථවානි පුබ්බෙ කතං වාපි න නාසයන්ති, අප්පම්පි ධීරෙසු කතං න නස්සති කථා හි ධීරා සුකතඤ්ඤුරූපා.
1555. දදාමි තෙ ගාමවරානි පඤ්ච දාසීසතං සත්තගවං සතානි, පරොසහස්සඤ්ච සුවණ්ණනික්ඛෙ භරියා ච තෙ සාදිසී ද්වෙ දදාමි.
1556. එවං සතං භොති සමෙච්ච රාජ නක්ඛත්තරාජාරිව තාරකානං, ආපූරතී කාසිපතී යථා අහං තයා හි මෙ සඞ්ගමො අජ්ජ ලද්ධොති.
2. ජුණ්හජාතකං.
1557. යසොකරො පුඤ්ඤකරොහමස්මි සදත්ථුතො සමණබ්රාහ්මණානං මග්ගාරහො දෙවමනුස්සපුජිතො ධම්මො අහං දෙහි අධම්ම මග්ගං
1558. අධම්මයානං දළ්හමාරුහිත්වා අසන්තසන්තො බලවාහමස්මි, ස කිස්ස හෙතුම්භි තවජ්ජ දජ්ජං මග්ගං අහං ධම්ම අදින්නපුබ්බං.
1559. ධම්මො හවෙ පාතුරහොසි පුබ්බෙ පච්ඡා අධම්මො උදපාදි ලොකෙ, ජෙට්ඨො ච සෙට්ඨො ච සනන්තනො ච උය්යාහි ජෙට්ඨස්ස කනිට්ඨ මග්ගා.
1560. න යාචනාය නපි පාටිරූපා න අරහති{1} තෙහං දදෙය්ය{2} මග්ගං යුද්ධඤ්ච නො හොතු උභින්නමජ්ජ යුද්ධස්මි යො ජෙස්සති තස්ස මග්ගො.
1561. සබ්බා දිසා අනුවිසටොහමස්මි{3} මහබ්බලො අමිතයසො අතුල්ලො,{4} ගුණෙහි සබ්බෙහි උපෙතරූපො ධම්මො අධම්ම ත්වං කථං විජෙස්සසි.
1562. ලොහෙන වෙ හඤ්ඤති ජාතරූපං න ජාතරූපෙන හනන්ති ලොභං, සචෙ අධම්මො හඤ්ඤති ධම්මමජ්ජ අයො සුවණ්ණං විය දස්සනෙය්යං.
1563. සචෙ තුවං යුද්ධබලො අධම්ම න තුය්හ වද්ධා{5} ච ගරූ ච අත්ථි, මග්ගං ච තෙ දම්මි පියාප්පියෙන වාචා දුරුත්තානිපි තෙ ඛමාමි.
1564. ඉදඤ්ච සුත්වා වචනං අධම්මො අවංසිරො පතිතො උද්ධපාදො, යුද්ධත්ථිකො චෙ න ලභාමි යුද්ධං එත්තාවතා හොති හතො අධම්මො.
1565. ඛන්තිබලො යුද්ධබලං විජෙත්වා හන්ත්වා අධම්මං නිහනිත්ව භුම්මා, පායාසි විත්තො අභිරුය්හ සන්දනං මග්ගෙනෙව අතිබලො සච්චනික්කමො.
1566. මාතාපිතා සමණබ්රාහ්මණා ච අසම්මානිතා යස්ස සකෙ අගාරෙ, ඉධෙව නික්ඛිප්ප සරීරදෙහං කායස්ස භෙදා නිරයං වජන්ති,{6} යථා අධම්මො පතිතො අවංසිරො.
1567. මාතාපිතා සමණබ්රාහ්මණා ච, සුසම්මානිතා යස්ස සකෙ අගාරෙ, ඉධෙව නික්ඛිප්ප සරීරදෙහං කායස්ස භෙදා සුගතිං වජන්ති යථාපි ධම්මො අභිරුය්හ සන්දනන්ති.
3. ධම්මජාතකං.{*}
1568. එකා නිසින්නා සුචිසඤ්ඤතූරු පාසාදමාරුය්හ අනින්දිතඞ්ගි, යාචාමි තං කින්තරනෙත්තචක්ඛු ඉමෙකරත්තිං උභයො වසෙම.
1569. උක්කිණ්ණන්තරපරිඛං දළ්හමට්ටාලකොට්ඨකං, රක්ඛිතං බග්ගහත්ථෙහි දුප්පවෙසමිදං පුරං.
1570. දහරස්ස යුධිනො{1} චාපි ආගමො ච න විජ්ජති, අථ කෙන නු වණ්ණෙන සඞ්ගමං ඉච්ඡසෙ මයා.
1571. යක්ඛොහමස්මි කල්යාණි ආගතොස්මි තවන්තිකං{2} ත්වං මං නන්දය භද්දන්තෙ පුණ්ණකංසං දදාමි තෙ.
1572. දෙවඤ්ච යක්ඛං අථ වා මනුස්සං න පත්ථයෙ උදයමතිච්චමඤ්ඤං, ගච්ඡෙව ත්වං යක්ඛ මහානුභාව මාචස්සු ගන්ත්වා පුනරාවජිත්ථ.
1573. යා සා රතී උත්තමා කාමභොගිනං. රතීසු සත්තා{3} විසමං චරන්ති, මා තං රතිං ජීයි තුවං සුවිම්භිතෙ දදාමි තෙ රූපියං කංසපූරං.
1574. නාරිං නරො නිජ්ඣපයං ධනෙන උක්කංසති යත්ථ කරොති ඡන්දං, විපච්චණීකො තව දෙව ධම්මො පච්චක්ඛතො ථොකතරෙන එසි,
1575. ආයුඤ්ච වණ්ණඤ්ච මනුස්සලොකෙ නිහීයති{4} මනුජානං සුගත්තෙ, තෙනෙව වණ්ණෙන ධනම්පි තුය්හං නිහීයති ජිණ්ණතරාසි අජ්ජ.
1576. එවං මෙ පෙක්ඛමානස්ස රාජපුත්ති යසස්සිනි, හායතෙ වත තෙ වණ්ණො අහොරත්තානමච්චයෙ.
1577. ඉමිනා ච ත්වං වයසා රාජපුත්ති සුමෙධසෙ, බ්රහ්මචරියං චරෙය්යාසි භිය්යො වණ්ණවතී සියා.
1578. දෙවා න ජීරන්ති යථා මනුස්සා ගත්තෙසු තෙසං වලියො න හොන්ති. පුච්ඡාමි තං යක්ඛ මහානුභාව කථන්නු දෙවාන සරීරදෙහො.
1579. ද්වො න ජීරන්ති යථා මනුස්සා ගත්තෙසු තෙසං වලියො න හොන්ති, සුවෙ සුවෙ භිය්යතරොව තෙසං දිබ්බො ච වණ්ණො විපුලා ච භොගා.
1580. කිංසූධ භීතා ජනතා අනෙකා මග්ගො ච නෙකායතනං පවුත්තො, පුච්ඡාමි තං යක්ඛ මහානුභාව කත්ථ ඨිතො පරලොකං න භායෙ.
1581. වාචං මනඤ්ච පණිධාය සම්මා කායෙන පාපානි අකුබ්බමානො බව්හන්නපානං{1} ඝරමාවසන්තො, සද්ධො මුදූ සංවිභාගී වදඤ්ඤූ සඞ්ගාහකො සඛිලො සණ්හවාචො එත්ථඨිතො පරලොකං න භායෙ.
1582. අනුසාසසි මං යක්ඛ යථා මාතා යථා පිතා, උළාරවණණ පුච්ඡාමි කොනු ත්වමසි සුබ්රහා.
1583. උදයොහමස්මි කල්යාණි සඞ්ගරත්ථා ඉධාගතො, ආමන්ත ඛො තංගච්ඡාමි මුත්තොස්මි තව සඞ්ගරා.
1584. සචෙ ඛො ත්වං උදයොසි සඞ්ගරත්ථා ඉධාගතො, අනුසාස මං රාජපුත්ත යථාස්සු පුන සඞ්ගමො.
1585. අධිපතති වයො ඛණො තථෙව ඨානං නත්ථි ධුවං{2} චවන්ති සත්තා, පරිජීයති අද්ධුවං සරීරං උදයෙ මා පමාදං චරස්සු ධම්මං
1586. කසිණා පඨිවී ධනස්ස පූරා එකස්සෙව සියා අනඤ්ඤවෙය්යා, තඤ්චාපි ජහාති අවීතරාගො උදයෙ මා පමාදං{3} චරස්සු ධම්මං.
1587. මාතා ච පිතා ච භාතරො ච{4} භරියා යාපි ධනෙන හොති කීතා, තෙචාපි ජහන්ති අඤ්ඤමඤ්ඤං උදයෙ මා පමාදං චරස්සු ධම්මං.
1588. කායො පරභොජනන්ති ඤත්වා{1} සංසාරෙ සුගතී ච දුග්ගතී ච, ඉත්තරවාසොති ජානියා උදයෙ මා පමාදං චරස්සු ධම්මං.
1589. සාධු භාසතයං{2} යක්ඛො අප්පං මච්චාන ජීවිතං, කසිරඤ්ච පරිත්තඤ්ච තඤ්ච දුක්ඛෙන සංයුතං සාහං එකා පබ්බජිස්සාමි හිත්වා කාසිං සුරුන්ධන’න්ති.
4. උදයජාතකං.
1590. මිත්තො මිත්තස්ස පානීයං අදින්නං පරිභුඤ්ජිසං,{3} තෙන පච්ඡා විජිගුච්ඡිං තං පාපං පකතං මයා මා පුන අකරං පාපං කස්මා පබ්බජිතො අහං.
1591. පරදාරඤ්ච දිස්වාන ඡන්දො මෙ උදපජ්ජථ, තෙන පච්ඡා විජිගුච්ඡිං තං පාපං පකතං මයා මා පුන අකරං පාපං තස්මා පබ්බජිතො අහං.
1592. පිතරම්මෙ මහාරාජ චොරා අගණ්හුං කානනෙ, තෙසාහං පුච්ඡිතො ජානං අඤ්ඤථා නං වියාකරිං.
1593. තෙන පච්ඡා විජිගුච්ඡිං තං පාපං පකතං මයා මා පුන අකරං පාපං තස්මා පබ්බජිතො අහං.
1594. පාණාතිපාතමකරුං සොමයාගෙ උපට්ඨිතෙ, තෙසාහං සමනුඤ්ඤාසිං, තෙන පච්ඡා විජිගුච්ඡිං තං පාපං පකතං මයා මා පුන අකරං පාපං තස්මා පබ්බජිතො අහං.
1595. සුරාමෙරයමධුකා යෙජනා පඨමාසු නො බහුන්නතෙ අනත්ථාය මජ්ජපානමකප්පයුං. තෙසාහං සමනුඤ්ඤාසිං, තෙන පච්ඡා විජිගුච්ඡිං තං පාපං පකතං මයා මා පුන අකරං පාපං තස්මා පබ්බජිතො අහං.
1596. ධීරත්ථු සුබහූ කාමෙ දුග්ගන්ධෙ බහුකණ්ටකෙ, යෙ අහං පතිසෙවන්තො න ලභිං තාදිසං සුඛං,
1597. මහස්සාදා සුඛා කාමා නත්ථි කාමපරං සුඛං, යෙ කාමෙ පතිසෙවන්ති සග්ගං තෙ උපපජ්ජරෙ,
1598. අප්පස්සාදා දුඛා කාමා නත්ථි කාමාපරං{1} දුඛං, යෙ කාමෙ පතිසෙවන්ති නිරයං තෙ උපපජ්ජරෙ.
1599. අසී යථා සුනිසිතො නෙත්තිංසොව{2} සුපායිකො,{3} සත්තීව උරසී ඛිත්තො{4} කාමා දුක්ඛතරා තතො.
1600. අඞ්ගාරානංව ජලිතං කාසුං සාධිකපොරිසං, ඵාලංව දිවසං තත්තං කාමා දුක්ඛතරා තතො.
1601. විසං යථ හලාහලං තෙලමුක්කට්ඨිතං{5} යථා, තම්බලොහ විලීනංව කාමා දුක්ඛතරා තතො’ති.
5. පානීයජාතකං.
1602. මිත්තාමච්චපරිබ්බූළ්හං අහං වන්දෙ රථෙසභං,{6} පබ්බජිස්සං{7} මහාරාජ තං දෙවො අනුමඤ්ඤතු.
1603. සචෙ තෙ ඌනං කාමෙහි අහං පරිපූරයාමි තෙ, යො තං හිංසති වාරෙමි මා පබ්බජි{8} යුධඤ්ජය.
1604. න චත්ථි ඌනං කාමෙහි හිංසිතා මෙ න විජ්ජති, දීපඤ්ච කාතු{9}මිච්ඡාමි යං ජරා නාභිකීරති.
1605. පුත්තො වා පිතරං යාචෙ පිතා වා පුත්තමොරසං, නෙගමො යාචතෙ තාත මා පබ්බජි යුධඤ්ජය.
1606. මා මං තාත{10} නිවාරෙසි පබ්බජන්තං රථෙසභ, මාහං කාමෙහි සම්මත්තො ජරාය වසමන්වගු.{11}
1607. අහං තං තාත යාචාමි අහං පුත්ත නිවාරයෙ, චිරන්තං දට්ඨුමිච්ඡාමි මා පබ්බජි යුධඤ්ජය.
1608. උස්සාවොව තිණග්ගම්හි සුරියස්සුග්ගමනං පති, එවමායු මනුස්සානං මා මං අම්ම නිවාරයෙ.
1609. තරමානො ඉමං යානං ආරොපෙතු රථෙසභ, මා මෙ මාතා තරන්තස්ස අන්තරායකරා අහු.
1610. අභිධාවථ භද්දන්තෙ සුඤ්ඤං හෙස්සති රම්මකං, යුධඤ්ජයො අනුඤ්ඤාතො සබ්බදත්තෙන රාජිනා.
1611. යොහු සෙට්ඨො සහස්සස්ස{1} යුවා කඤ්චනසන්නිභො, සොයං කුමාරො පබ්බජිතො කාසායවසනො බලී.
1612. උභො කුමාරා පබ්බජිතා යුධඤ්ජයො යුධිට්ඨිලො, පහාය මාතාපිතරො සඞ්කං{2} ඡෙත්වාන මච්චුනො’ති.
6. යුධඤ්ජය ජාතකං.
1613. එථ ලක්ඛණ සීතා ච උභො ඔතරථොදකං, එවායං භරතො ආහ රාජා දසරථො මතො.
1614. කෙන රාමප්පභාවෙන{3} සොචිතබ්බං න සොචසි, පිතරං කාලකතං සුත්වා න තං පසහතෙ දුඛං.
1615. යං න සක්කා පාලෙතුං{4} පොසෙන ලපතා{5} බහු, ස කිස්ස විඤ්ඤූ මෙධාවී අන්තානමුපතාපයෙ.
1616. දහරා ච හි යෙ වුද්ධා යෙ බාලා යෙ ච පණ්ඩිතා, අඩ්ඪා චෙව දළිද්දා ච සබ්බෙ මච්චුපරායණා.
1617. ඵලානමිව පක්කානං නිච්චං පපතනා භයං, එවං ජාතාන මච්චානං නිච්චං මරණතො භයං.
1618. සායමෙකෙ න දිස්සන්ති පාතො දිට්ඨා බහුජ්ජනා, පාතො එකෙ න දිස්සන්ති සායං දිට්ඨා බහුජ්ජනා
1619. පරිදෙවයමානො චෙ කඤ්චි{6}දත්ථං උදබ්බහෙ, සම්මූළ්හො හිංසමත්තානං කයිරා චෙතං විචක්ඛණො.
1620. කිසො විවණ්ණො භවති හිංසමත්තානමත්තනා, න තෙන පෙතා පාලෙන්ති නිරත්ථා පරිදෙවනා.
1621. යථාසරණමාදිත්තං වාරිනා පරිනිබ්බයෙ, එවම්පි ධීරො සුතවා මෙධාවී පණ්ඩිතො නරො ඛිප්පමුප්පතිතං සොකං වාතො තූලංව ධංසයෙ.
1622. එකොව මච්චො අච්චෙති එකොව ජායතෙ කුලෙ, සඤ්ඤොගපරමාත්වෙව සම්භොගා සබ්බපාණිනං.