122. යසං ලද්ධාන දුම්මෙධො අනත්ථං චරති අත්තනො, අත්තනො ච පරෙසඤ්ච හිංසාය පටිපජ්ජතී’ති.
2. දුම්මෙධ ජාතකං.
123. අසබ්බත්ථගාමිනං වාචං බාලො සබ්බත්ථ භාසති, නායං දධිං වෙදි න නඞ්ගලීසං දධිම්පයං{2} මඤ්ඤති නඞ්ගලීසන්ති.
3. නඞ්ගලීසජාතකං.
124. වායමෙථෙව පුරිසො න නිබ්බින්දෙය්ය පණ්ඩිතො, වායාමස්ස ඵලං පස්ස භුත්තා අම්බා අනීතිහන්ති.
4. අම්බජාතකං.
125. බහුම්පි සො විකත්ථෙය්ය අඤ්ඤං ජනපදං ගතො, අන්වාගන්ත්වාන දූසෙය්ය භුඤ්ජ භොගෙ කටාහකාති.
5. කටාහකජාතකං.
126. තථෙවෙකස්ස{1} කල්යාණං තථෙවෙකස්ස පාපකං, තස්මා සබ්බං න කල්යාණං සබ්බං වාපි න පාපකන්ති.
6. අසිලක්ඛණජාතකං
127. තෙ දෙසා තානි වත්ථූනි අහඤ්ච වනගොචරො, අනුවිච්ච ඛො තං ගණ්හෙය්යුං පිඛ{2} ඛීරං කලණ්ඩුකාති.
7. කලණ්ඩුකජාතකං.
128. යො චෙ ධම්මං ධජං කත්වා නිගූළ්හො පාපමාචරෙ, විස්සාසයිත්වා භූතානි බිළාරං නාම තං වතන්ති.
8. බිළාරවතජාතකං{3}.
129. නායං සිඛා පුඤ්ඤහෙතු ඝාසහෙතු අයං සිඛා, න’ඞ්ගුට්ඨගණනං යාති අලන්තෙ හොතු අග්ගිකාති.
9. අග්ගික{4}ජාතකං.
130. යථා වාචා ච භුඤ්ජස්සු යථාභුත්තඤ්ච ව්යාහර, උභයං තෙ න සමෙති වාචාභුත්තඤ්ච කොසියෙති.
10. කොසියජාතකං.
කුසනාළිවග්ගො{5} තෙරසමො.
තස්සුද්දානං:
කුසනාළිසිරිවහයනො ච යසං දධිමම්බකටාහකපඤ්චමකො, අථ පාපක ඛීරබිළාරවතං සිඛිකොසියසව්භයනෙන දස.
14. අසම්පදානවග්ගො.
131. අසම්පදානෙනිතරීතරස්ස බාලස්ස මිත්තානි කලීභවන්ති, තස්මා හරාමි භුසං අඩ්ඪමානං මා මෙ මිත්ති ජීයිත්ථ{1} යස්සතායන්ති.
1. අසම්පදානජාතකං.
132. කුසලූපදෙසෙ ධිතිසා දළ්හාය ච අවත්ථිතතත්තා{2} භයහීරුතාය ච, න රක්ඛසීනං වසමාගමිම්හ{3} ස සොත්ථිභාවො මහතා භයෙන මෙති,
2. පඤ්චගරුකජාතකං{4}.
133. ඛෙමං යහිං තත්ථ අරී උදීරිතො උදකස්ස{5} මජ්ඣෙ ජලතෙ ඝතාසනො, න අජ්ජ වාසො මහියා මහීරුහෙ දිසා භජව්හො සරණජ්ජ නො භයන්ති.
3. ඝතාසනජාතකං.
134. යෙ සඤ්ඤිනො තෙපි දුග්ගතා යෙපි අසඤ්ඤිනො තෙපි දුග්ගතා, එතං උභයං විවජ්ජය තං සමාපත්තිසුඛං අනඞ්ගණ’න්ති.
4. ඣානසොධනජාතකං.
135. චන්දාභං සුරියාහඤ්ච යො’ධ පඤ්ඤාය ගාධති, අවිතක්කෙන ඣානෙන හොති ආහස්සරූපගොති.
5. චන්දාභජාතකං.
136. යං ලද්ධං තුට්ඨබ්බං අතිලොභො හි පාපකො, හංසරාජං ගහෙත්වාන සුවණ්ණා පරිහායථාති.
6. සුවණ්ණහංසජාතකං.
137. යත්ථෙකො ලභතෙ බබ්බු දුතියො තත්ථ ජායති, තතියො ච චතුත්ථො ච ඉදං බබ්බුකා බිලන්ති.
7. බබ්බුකජාතකං.
138. කින්තෙ ජටාහි දුම්මෙධ කින්තෙ අජිනසාටියා, අබ්භන්තරං තෙ ගහනං බාහිරං පරිමජ්ජසීති
8. ගොධජාතකං.
139. අක්ඛි භින්නා පටො නට්ඨො සඛී ගෙහෙ ච භණ්ඩනං, උභතො පදුට්ඨකම්මන්තො උදකම්හි ථලම්භි චාති.
9. උභතොභට්ඨජාතකං.
140. නිච්චං උබ්බිග්ගහදයා සබ්බලොකවිහෙසකා, තස්මා තෙසං වසා නත්ථි කාකානස්මාක ඤාතීන’න්ති.
10. කාකජාතකං.
අසම්පදානවග්ගො චුද්දසමො.
තස්සුද්දානං:
ඉතරීතරරක්ඛසිඛෙමියො ච පරොසතපඤ්හෙන ආහස්සරො පුන, අථ හංසවරුත්තමබබ්බුජටං පටනට්ඨකකාකවරෙන දස.
15. කකණ්ටකවග්ගො.
141. න පාපජනසංසෙවී අච්චන්තසුඛමෙධති, ගොධාකුලං කකණ්ටො’ව {*}කලිං පාපෙති අත්තානන්ති.
1. ගොධජාතකං.
142. එතං හි තෙ දුරාජානං යං සෙසි මතසායිකං, යස්ස තෙ කඩ්ඪමානස්ස හත්ථා දණ්ඩො න මුච්චතී’ති.
2. සිගාලජාතකං.
143. ලසී ච තෙ නිප්ඵලිතා මත්ථකො ච විදාළිතො, සබ්බා තෙ ඵාසුකා භග්ගා අජ්ජ ඛො ත්වං විරොචසී’ති.
3. විරොචනජාතකං.
144. බහුම්පෙතං අසඞ්ගි ජාතවෙද යං තං වාලධිනා හි පූජයාම, මංසාරහස්ස නත්ථජ්ජ මංසං නඞ්ගුට්ඨම්පි භවං පටිග්ගහාතූ’ති.
4. නඞ්ගුට්ඨජාතකං.
145. න ත්වං රාධ විජානාසි අඩ්ඪරත්තෙ අනාගතෙ, අව්යායතං විලපසි විරත්තා කොසියායනෙ’ති.
5. රාධජාතකං.
146. අපි නු හනුකා සන්තා මුඛඤ්ච පරිසුස්සති, ධරමාම න පාරෙම පූරතෙව මහොදධී’ති.
6. කාකජාතකං.{1}
147. න ඉදං දුක්ඛං අදුං දුක්ඛං යං මං තුදති වායසො යං සාමා පුප්ඵරත්තෙන කත්තිකං නානුභොස්සතීති.
7. පුප්ඵරතජාතකං.
148. නාහං පුනං න ච පුනං න චාපි අපුනප්පුනං. හත්ථිඛොන්දිං පවෙක්ඛාමි. තථා හි භයතජ්ජිතො’ති.
8. සිගාලජාතකං.
149. එකපණ්ණො අයං රුක්ඛො න භූම්යා චතුරඞ්ගුලො, ඵලෙන විසකප්පෙන මහායං කිං භවිස්සතීති.
9. එකපණ්ණජාතකං.
150. අසන්තං යො පගණ්හාති අසන්තඤ්චුපසෙවති, තමෙව ඝාසං කුරුතෙ ව්යග්ඝො සඤ්ජීවකො යථාති.
10. සඤ්ජිවජාතකං.
කකණ්ටකවග්ගො{1} පණ්ණරසමො.
තස්සුද්දානං:
සුඛමෙධතිදණ්ඩවරො ච පුන ලසිවාලධීපඤ්චමරාධවරො, සමභොදධිකත්තිකඛොන්දි පුන චතුරඞ්ගුලබ්යග්ඝවරෙන දස.
උපරිමපණ්ණාසකො.
එකකනිපාතො නිට්ඨිතො.
තත්ර වග්ගුද්දානං:
අපණ්ණකං සීලවග්ගකුරුඞ්ග කුලාවකං අත්ථකාමෙනපඤ්චමං, ආසිංසොඉත්ථිවරුණං අපායි. ලිත්තවග්ගෙන තෙරස, පරොසතං හංසිසරික්ඛං අසම්පදංකකණ්ටවග්ගො.
2. දුකනිපාතො
1. දළ්හවග්ගො
151. දළ්හං දළ්හස්ස ඛිපති මල්ලිකො{1} මුදුනා මුදුං සාධුම්පි සාධුනා ජෙති අසාධුම්පි අසාධුනා, එතාදිසො අයං රාජා මග්ගා උය්යාහි සාරථි.
152. අක්කොධෙන ජිනෙ කොධං අසාධුං සාධුනා ජිනෙ, ජිනෙ කදරියං දානෙන සච්චෙන අලිකවාදිනං{2} එතාදිසො අයං රාජා මග්ගා උය්යාහි සාරථීති.
1. රාජොවාදජාතකං.
153. අසමෙක්ඛිතකම්මන්තං තුරිතාභිනිපාතිනං, සානි කම්මානි තප්පෙත්ති උණ්හං වජ්ඣොහිතං මුඛෙ.
154. සීහො ච සීහනාදෙන දද්දරං අභිනාදයි, සුත්වා සීහස්ස නිග්ඝොසං සිගාලො දද්දරෙ වසං භීතො සන්තාසමාපාදි හදයඤ්චස්ස අප්ඵලීති.
2. සිගාලජාතකං.
155. චතුප්පදො අහං සම්ම ත්වම්පි සම්ම චතුප්පදො,{3} එහි සීහ නිවත්තස්සු කින්නු භීතො පලායසී.
156. අසුචි පූතිලොමොසි දුග්ගන්ධො වාසි සූකර, සචෙ යුජ්ඣිතුකාමොසි ජයං සම්ම දදාමි තෙති.
3. සූකරජාතකං.
157. ඉධූරගානං පවරො{4} පවිට්ඨො සෙලස්ස වණ්ණෙන පමොක්ඛමිච්ඡං, බ්රහ්මඤ්ච වණ්ණං අපචායමානො බුභුක්ඛිතො නො විසහාමි. භොත්තුං.
158. සො බ්රහ්මගුත්තො චිරමෙව ජීව දිබ්බා{1} ච තෙ පාතුභවන්තු භක්ඛා, යො බ්රහ්මවණ්ණං{2} අපචායමානො බුභුක්ඛිතො නො විසහාසි භොත්තුන්ති.
4. උරගජාතකං.
159. ජීව වසස්සතං ගග්ග{3} අපරානි ච වීසතිං{4} මා මං පිසාචා ඛාදන්තු ජීව ත්වං සරදොසතං.
160. ත්වම්පි වස්සසතං ජීව අපරානි ච වීසතිං, විසං පිසාචා ඛාදන්තු ජීව ත්වං සරදොසතන්ති.
5. ගග්ගජාතකං.{5}
161. අලීනචිත්තං නිස්සාය පහට්ඨා මහතී චමූ, කොසලං සෙනාසන්තුට්ඨං ජීවගාහං{6} අගාහයි.
162. එවං නිස්සයසම්පන්නො භික්ඛු ආරද්ධවිරියො, භාවයං කුසලං ධම්මං යොගක්ඛෙමස්ස පත්තියා. පාපුණෙ අනුපුබ්බෙන සබ්බසංයොජනක්ඛයන්ති.
6. අලීනචිත්තජාතකං.
163. යෙන කාමං පණාමෙති ධම්මො බලවතං මිගී, {*}උන්නදන්තී විජානාහි ජාතං සරණතො භයං.
164. අපි චෙපි දුබ්බලො මිත්තො මිත්තධම්මෙසු තිට්ඨති, සො ඤාතකො ච බන්ධූ ච සො මිත්තො සො ච මෙ සඛා දාඨීනි මාතිමඤ්ඤිත්ථො{7} සිගාලො මම පාණදොති.
7. ගුණජාතකං.
165. න ඉදං විසමසීලෙන සොණෙන සුහනුස්සහ, සුහනූපි තාදිසොයෙව යො සොණස්ස ස ගොචරො.
166. පක්ඛන්දිනා පගබ්භෙන{1} නිච්චං සන්දනඛාදිනා සමෙති පාපං පාපෙන සමෙති අසතා අසන්ති{2}.
8. සුහනුජාතකං.
167. උදෙතයං චක්ඛුමා එකරාජා හරිස්සවණ්ණො පඨවිප්පභාසො, තං තං නමස්සාමි හරිස්සවණ්ණං පඨවිප්පභාසං තයජ්ජ ගුත්තා විහරෙමු දිවසං.