622. අද්ධා තුවං පණ්ඩිතකොසි රාධ ජානාසි අත්ථානි අනාගතානි, කථන්නු සාඛාමිගං දක්ඛිසාම නිද්ධාපිතං රාජකුලතොව ජම්මං.
623. චාලෙති කණ්ණං භටිකුං කරොති මුහුජ මුහුං භායයතෙ කුමාරෙ, සයමෙව තං කාහති කාළබාහු යෙනාරකා ඨස්සති අන්නපානාති.
9. කාළබාහුජාතකං.
624. සීලං කිරෙව කල්යාණං සීලං ලොකෙ අනුත්තරං, පස්ස ඝොරවිසො නාගො සීලවාති න හඤ්ඤති.
625. යාවදෙවස්සහු කිඤ්චි තාවදෙව අඛාදිසුං, සඞ්ගම්ම කුලලා ලොකෙ න හිංසන්ති අකිඤ්චනං.
626. සුඛං නිරාසා සුපති ආසා ඵලවතී සුඛා, ආසං නිරාසං කත්වාන සුඛං සුපති පිඞ්ගලා.
627. න සමාධිපරො අත්ථි අස්මිං ලොකෙ පරම්හි ච, න පරං නාපි අත්තානං විහිංසති සමාහිතො’ති.
10. සීලවීමංසජාතකං.
කුටිදූසකවග්ගො තතියො.
තස්සුද්දානං:
සමනුස්ස සද්දදභ යාචනකො අථ මෙණ්ඩවරුත්තම ගොධවරො, අථ කාය සකෙබුක භොතිවරො අථ රාධ සුසීලවරෙන දස.
4. කොකාලික වග්ගො
628. යො වෙ කාලෙ අසම්පත්තෙ අතිවෙලං පභාසති, එවං සො නිහතො සෙති කොකිලායිව අත්රජො.
629. න හි සත්ථං සුනිසිතං විසං හලාහලං ඉව, එවං නිකට්ඨෙ{1} පාතෙති වාචා දුබ්භාසිතා යථා.
630. තස්මා කාලෙ අකාලෙ ච වාචං රක්ඛෙය්ය පණ්ඩිතො, නාතිවෙලං පභාසෙය්ය අපි අත්තසමම්හි වා
631. යො ච කාලෙ මිතං භාසෙ මතිපුබ්බො විචක්ඛණො. සබ්බෙ අමිත්තෙ ආදෙති සුපණ්ණො උරගං ඉවා’ති.
1. කොකාලිකජාතකං.
632. අපි හන්ත්වා භතො බ්රූති ජෙත්වා ජිතොති භාසති, පුබ්බමක්ඛායිනො රාජ එකදත්ථුං{2} න සද්දහෙ.
633. තස්මා පණ්ඩිතජාතියො සුණෙය්ය ඉතරස්ස පි, උභින්නං වචනං සුත්වා යථා ධම්මො තථා කරෙ.
634. අලසො ගිහී කාමභොගී න සාධු අසඤ්ඤතො පබ්බජිතො න සාධු, රාජා න සාධු අනිසම්මකාරි යො පණ්ඩිතො කොධනො තං න සාධු.
635. නිසම්ම ඛත්තියො කයිරා නානිසම්ම දිසම්පති, නිසම්ම කාරිනො {3}රාජ යසො කිත්ති ච වඩ්ඪතී’ති.
2. රථලට්ඨිජාතකං.
636. තදෙව මෙ ත්වං විදිකො වනමජ්ඣෙ රථෙසභ, යස්ස තෙ ඛග්ගබද්ධස්ස{4} සන්නද්ධස්ස තිරීටිනො අස්සත්ථදුමසාඛාය පක්කා{5} ගොධා පලායථ.
637. නමෙ නමන්තස්ස භජෙ භජන්තං කිච්චානුකුබ්බස්ස කරෙය්ය කිච්චං, නානත්ථකාමස්ස කරෙය්ය අත්ථං අසම්භජන්තම්පි න සම්භජෙය්ය.
638. චජෙ චජන්තං වනථං න කයිරා අපෙතචිත්තෙන න සම්භජෙය්ය, ද්විජො දුමං ඛීණඵලන්ති{1} ඤාත්වා අඤ්ඤං සමෙක්ඛෙය්ය මහා හි ලොකො.
639. සො තෙ කරිස්සාමි යථානුභාවං. කතඤ්ඤුතං ඛත්තියෙ පෙක්ඛමානො, සබ්බඤ්ච තෙ ඉස්සරියං දදාමි යස්සිච්ඡිසි තස්ස තුවං දදාමිති.
3. පක්කගොධජාතකං.
640. ගවඤ්චෙ තරමානානං ජිම්හං ගච්ඡති පුඞ්ගවො, සබ්බා තා ජිම්හං ගච්ඡන්ති නෙත්තෙ ජිම්හං ගතෙ සති.
641. එවමෙව මනුස්සෙසු යො හොති සෙට්ඨසම්මතො, සො දෙ අධම්මං චරති පගෙව ඉතරා පජා සබ්බං රට්ඨං දුඛං සෙති රාජා චෙ හොති අධම්මිකො.
642. ගවඤ්චෙ තරමානානං උජුං ගච්ඡති පුඞ්ගවො, සබ්බා තා උජුං ගච්ඡන්ති නෙත්තෙ උජුගතෙ සති.
643. එවමෙව මනුස්සෙසු යො හොති සෙට්ඨසම්මතො, සො චෙපි ධම්මං චරති පගෙව ඉතරා පජා සබ්බං රට්ඨං සුඛං සෙති රාජා චෙ හොති ධම්මිකො’ති.
4. රාජොවාදජාතකං.
644. බ්රහා පවඩ්ඪකායො{2} සො දිඝදාඨො ච ජම්බුක, න ත්වං තම්හි කුලෙ ජාතො යත්ථ ගණ්හන්ති කුඤ්ජරං.
645. අසීහො සීහමානෙන යො අත්තානං විකුබ්බති, කොත්ථුව{3} ගජමාසජ්ජ සෙති භූම්යා අනුත්ථුනං.
646. යසස්සිනො උත්තමපුග්ගලස්ස සඤ්ජාතඛන්ධස්ස මහබ්බලස්ස, අසමෙක්ඛිය ථාමබලූපපත්තිං ස සෙති නාගෙන හතොව{4} ජම්බුකො.
647. යො චිධ කම්මං කුරුතෙ පමාය ථාමබලං අත්තනි සංවිදිත්වා, ජප්පෙන මන්තෙන සුභාසිතෙන පරික්ඛවා සො විපුලං ජිනාතී’ති.
5. ජම්බුකජාතකං.
648. තිණං තිණන්ති ලපසි කො නු තෙ තිණමාහරි, කින්නු තෙ තිණකිච්චත්ථි තිණමෙව පභාසසි.
649. ඉධාගමා බ්රහ්මාචාරී බ්රහා ඡත්තො බහුස්සුතො, සො මෙ සබ්බං සමාදාය තිණං නික්ඛිප්ප ගච්ඡති.
650. එවෙතං හොති කත්තබ්බ. අප්පෙන බහුමිච්ඡතා, සබ්බං සකස්ස ආදානං අනාදානං තිණස්ස ච චාටීසු පක්ඛිපිත්වාන{1} තත්ථ කා පරිදෙවනා.
651. සීලවන්තො න කුබ්බන්ති බාලො සීලානි කුබ්බති, අනිච්චසීලං දුස්සීල්යං{2} කිං පණ්ඩිච්චං කරිස්සතී’ති.
6. බ්රහාඡත්තජාතකං.
652. න තෙ පීඨමදායිම්හා න පානං නපි භොජනං, බ්රහ්මචාරි ඛමස්සු මෙ එතං පස්සාම අච්චයං.
653. නෙවාභිසජ්ජාමි න චාපි කුප්පෙ න චාපි මෙ අප්පියමාසි කිඤ්චි, අථොපි මෙ ආසි මනොවිතක්කො එතාදිසො නූන කුලස්ස ධම්මො.
654. එසස්මාකං කුලෙ ධම්මො පිතුපිතාමහො සදා, ආසනං උදකං පජ්ජං සබ්බෙතං නිපදාමසෙ.
655. එසස්මාකං කුලෙ ධම්මො පිතුපිතාමහො සදා, සක්කච්චං උපතිට්ඨාම උත්තමං විය ඤාතකන්ති.
7. පීඨජාතකං.
656. විදිතං ථුසං උන්දුරානං විදිතං පන තණ්ඩුලං ථුසං ථූලං විවජ්ජෙත්වා තණ්ඩුලං පන ඛාදරෙ.
657. යා මන්තනා අරඤ්ඤස්මිං යා ච ගාමෙ නිකණ්ණිකා, යඤ්චෙතං ඉතිචිතිච එතම්පි විදිතං මයා.
658. ධම්මෙන කිර ජාතස්ස පිතා පුත්තස්ස මක්කටො, දහරස්සෙව සන්තස්ස දන්තෙහි ඵලමච්ඡිදා.
659. යමෙතං පරිසප්පසි{3} අජකාණොව සාසපෙ, යොපායං හෙට්ඨතො සෙසි{4} එතම්පි විදිතං මයා’ති.
8. ථුසජාතකං.
660. අදස්සනෙන මොරස්ස සිඛිනො මඤ්ජුභාණිනො, කාකං තත්ථ අපූජෙසුං මංසෙන ච ඵලෙන ච.
661. යදා ච සරසම්පන්නො මොරො බවෙරුමාගමා, අථ ලාභො ච සක්කාරො වායසස්ස අහායථ.
662. යාව නුපජ්ජති බුද්ධො ධම්මරාජා පභඞ්කරො, තාව අඤ්ඤෙ අපූජෙසුං පුථු සමණබ්රාහ්මණෙ.
663. යදා ච සරසම්පන්නො බුද්ධො ධම්මමදෙසයි, අථ ලාභො ච සක්කාරො තිත්ථියානං අහායථා’ති.
9. බාවෙරුජාතකං.
664. අදාසි දානානි පුරෙ විසය්හ දදතො ච තෙ ඛයධම්මො අහොසි, ඉතො පරඤ්චෙ න දදෙය්ය දානං තිට්ඨෙය්යුං තෙ සඤ්ඤමන්තස්ස භොගො.
665. අනරියමරියෙන සහස්සනෙත්ත සුදුග්ගතෙනාපි අකිච්චමාහු, මා වො ධනං තං ජනින්ද අහුවා{1} යම්භොගහෙතු විජහෙම සද්ධං.
666. යෙන එකො රථො යාති යාති තෙන පරො රථො, පොරාණං නිහිතං වත්තං වත්තතඤ්ඤෙව වාසව.
667. යදි හෙස්සති දස්සාම අසන්තෙ කිං දදාමසෙ, එවං භූතාපි දස්සාම මා දානං පමදාම්හසෙ’ති.
10. විසය්හජාතකං.
කොකාලිවග්ගො චතුත්ථො.
තස්සුද්දානං:
අතිවෙලං පභාසති ජිනවරො වනමජ්ඣෙරථෙසභජිම්භගමො, අථ ජම්බුතිණාසනපීඨවරං අථ තණ්ඩුල මොර විසය්හ දස.
5. චූළකුණාලවග්ගො
668. නරානමාරාමකරාසු නාරිසු අනෙකචිත්තාසු අනිග්ගහාසු ච, සබ්බන්තනාපීතිකරාපි චෙ සියා න විස්සසෙ තිත්ථසමා හි නාරියො.
669. යං චෙ දිස්වා කණ්ඩරි කින්නරානං{1} සබ්බිත්ථියො න රමන්ති අගාරෙ, තං තාදිසං මච්චං චජිත්වා භරියා අඤ්ඤං දිස්වා පුරිසං පීඨසප්පිං{2}
670. බකස්ස ච පාවාරිකස්ස රඤ්ඤො අච්චන්තකාමානුගතස්ස භරියා, අවාචරී බද්ධවසානුගස්ස කං වා ඉත්ථි නාතිචරෙ තදඤ්ඤං.
671. පිඞ්ගියානී සබ්බලොකිස්සරස්ස රඤ්ඤො පියා බ්රහ්මදත්තස්ස භරියා අවාචරී බද්ධවසානුගස්ස තං වාපි සා නාජ්ඣගා කාමකාමිනී’ති.
1. කින්නරීජාතකං{3}.
672. අසක්ඛිං වත අත්තානං උද්ධාතුං උදකා ථලං, න දානාහං පුන තුය්හං වසං ගච්ඡාමි වාරිජ.
673. අලමෙතෙහි අම්බෙහි ජම්බූහි පනසෙහි ච, යානි පාරං සමුද්දස්ස වරං මය්හං උදුම්බරො.
674. යො ච උප්පතිතං අත්ථං න ඛිප්පමනුබුජ්ඣති, අමිත්තවසමන්වෙති පච්ඡා ච අනුතප්පති.
675. යො ච උප්පතිතං අත්ථං න ඛිප්පමෙව නිබොධති, මුච්චතෙ සත්තුසම්බාධා න ච පච්ඡාතප්පතී’ති.
2. වානරජාතකං.
676. අවසිම්භා තවාගාරෙ නිච්චං සක්කතපූජිතා, ත්වමෙව දානි ච’කරි{1}. හන්ද රාජ වජාමහං.
677. යො වෙ කතෙ පටිකතෙ කිබ්බිසෙ පටිකිබ්බිසෙ, එවං තං සම්මති වෙරං මස කුන්තිනි මාගමා.
678. න කතස්ස ච කත්තා ච මෙත්ති සන්ධීයතෙ පුන, හදයං නානුජානාති ගච්ඡඤ්ඤෙව රථෙසභ.
679. කතස්ස චෙව කත්තා ච මෙත්ති සන්ධීයතෙ පුන, ධීරානං නො ච බාලානං වස කුන්තිනි මාගමා’ති.
3. කුන්තිනීජාතකං.
680. යො නීලියං මණ්ඩයති සණ්ඩාසෙන විහඤ්ඤති, තස්ස සා වසමන්වෙතු යා තෙ අම්බෙ අවාහරි.
681. වීසං වා පඤ්චවීසං{2} වා ඌනතිංසංව ජාතියා, තාදිසා පතිමාලද්ධා යා තෙ අම්බෙ අවාහරි.
682. දීඝං ගච්ඡතු අද්ධානං එකිකා {3}අභිසාරියා, සඞ්කෙතෙ පති මාද්දස යා තෙ අම්බෙ අවාහරි.
683. අලඞ්කතා සුවසනා මාලිනී චන්දනුස්සදා, එකිකා සයනෙ සෙතු යා තෙ අම්බෙ අවාහරීති.
4. අම්බචොරජාතකං.
684. වනං යදග්ගි දහති පාවකො කණ්හවත්තනී, කථං කරොසි පචලක එවං දන්ධපරක්කමො.
685. බහූනි රුක්ඛජිද්දානි පථව්යා{1} විවරානි ච, තානි චෙ නාභිසම්භොම හොති නො කාලපරියායො.
686. යො දන්ධකාලෙ තරති තරණීයෙ ච දන්ධති, සුක්ඛපණ්ණංව අක්කම්ම අත්ථං භඤ්ජති අත්තනො.
687. යො දන්ධකාලෙ දන්ධෙති තරණීයෙ ච තාරයි, සසීව රත්තිං විභජං තස්සත්ථො පරිපූරතී’ති.
5. ගජකුම්භජාතකං.{2}
688. මනුස්සින්දං ජහිත්වාන සබ්බකාමසමිද්ධිනං, කථං නු භගවා කෙසි කප්පස්ස රමති අස්සමෙ.
689. සාධුනි රමණීයානි සන්ති වක්ඛා මනොරමා, සුභාසිතානි කප්පස්ස නාරද රමයන්ති මං.
690. සාලීනං ඔදනං භුඤ්ජෙ සුචිමංසූපසෙචනං, කථං සාමාකනීවාරං අලොණං ඡාදයන්ති තං.
691. අසාදුං යදි වා සාදුං{3} අප්පං වායදි වා බහුං, විස්සත්ථො යත්ථ භුඤ්ජෙය්ය විස්සාසපරමා රසාති.
6. කෙසවජාතකං.{4}
692. සබ්බායසං කූටමතිප්පමාණං පග්ගය්හ සො තිට්ඨති අන්තලික්ඛෙ, රක්ඛාය මෙ ත්වං විහිතො නුසජ්ජ උදාහු මෙ වායමසෙ වධාය.
693. දූතො අහං රාජිධ රක්ඛසානං. වධාය තුය්හං පහිතොහමස්මි, ඉන්දො ච තං රක්ඛති දෙවරාජා තෙනුත්තමඞ්ගං න තෙ ඵාලයාමි.{5}
694. සචෙ ච මං රක්ඛති දෙවරාජා දෙවානමින්දො මඝවා සුජම්පති, කාමං පිසාචා කන්දන්තු සබ්බෙ න සන්තසෙ රක්ඛසියා පජාය.
695. කාමං නන්දන්තු කුම්භණ්ඩා සබ්බෙපංසුපිසාචකා, නාලං පිසාචා යුද්ධාය මහතී සා විභිංසිකාති.