346. කාලො ඝසති භූතානි සබ්බානෙව සහත්තනා, යො ච කාලඝසො භූතො ස භූතපවනිං පචී.
347. බහූනි නරසීසානි ලොමසානි බ්රහානි ච, ගීවාසු පටිමුක්කානි කොවිදෙවෙත්ථ කණ්ණවාති.
5. මූලපරියායජාතකං.
348. හන්ත්වා ඣත්වා වධිත්වා ච දෙති දානං අසඤ්ඤතො, එදිසං භත්තං භුඤ්ජමානො ස පාපෙන උපලිප්පති.
349. පුත්තදාරම්පි චෙ හන්ත්වා දෙති දානං අසඤ්ඤතො, භුඤ්ජමානොපි සප්පඤ්ඤො න පාපෙන උපලිප්පතී’ති.
6. තෙලොවාදජාතකං{2}.
350. අද්ධා පාදඤ්ජලී සබ්බෙ පඤ්ඤාය අතිරොචති, තථා හි ඔට්ඨං භඤ්ජෙති උත්තරිං නූන පස්සති.
351. නායං ධම්මං අධම්මං වා අත්ථානත්ථංව බුජ්ඣති, අඤ්ඤත්ර ඔට්ඨනිබ්භොගා නායං ජානාති කිඤ්චනන්ති.
7. පාදඤ්ජලිජාතකං.
352. සබ්බෙහි කිංසුකො දිට්ඨො කින්ත්වෙත්ථ{3} විචිකිච්ඡථ, න හි සබ්බෙසු ඨානෙසු සාරථි පරිපුච්ඡිතො.
353. එවං සබ්බෙහි ඤාණෙහි යෙසං ධම්මා අජානිතා, තෙ වෙ ධම්මෙසු කඞ්ඛන්ති කිංසුකස්මිංව භාතරො’ති
8. කිංසුකොපමජාතකං.
354. එකපුත්තකො භවිස්සසි ත්වං ච නො හෙසස්සි ඉස්සරො කුලෙ, ඔරොහ දුමස්මා සාලක එහි දානි ඝරකං වජෙමසෙ
355. නනු මං හදයෙති මඤ්ඤසි යඤ්චි මං හනසි වෙළුයට්ඨියා, පක්කම්බවනෙ රමාමසෙ ගච්ඡ ත්වං ඝරකං යථාසුඛන්ති.
9. සාලකජාතකං.
356. අයං ඉසී උපසමසංයමෙ රතො සන්තිට්ඨති සිසිරභයෙන අට්ටිතො, හන්ද අයං පවිසතුමං අගාරකං විනෙතු සීතං දරථඤ්ච කෙවලං.
357. නායං ඉසී උපසමසංයමෙ රතො, කපී අයං දුමවරසාඛගොචරො, සො දූසකො රොසකො චාපි ජම්මො සචෙ වජෙ ඉමම්පි දූසයෙ ඝරන්ති.
10. කපිජාතකං
සිගාලවග්ගො දසමො.
තස්සුද්දානං:
අථ රාජාසිගාලවරො සුනඛො තථා කොසිය ඉච්ඡති කාලඝසො, අථ දානවරොට්ඨපි සාරථිනා පුනප්පවනඤ්ච සිසිරකපි දස.
දුකනිපාතො නිට්ඨිතො.
වග්ගුද්දානං:
දළ්හඤ්ච{1} වග්ගං අපරෙන සන්ථවං කල්යාණවග්ගං සදිසො ච රුහකං, නතංදළ්හං{2} බීරනත්ථම්භකං පුන කාසාවුපාහනසිගාලකෙන දසා’ති.
3. තිකනිපාතො
1. සඞ්කප්පවග්ගො
358. සඞ්කප්පරාගධොතෙන විතක්කනිසිතෙන ච, නාලඞ්කතෙන භද්දෙන න උසුකාරකතෙන ච.
359. න කණ්ණායතමුත්තෙන නපි මොරූපසෙවිනා, තෙනම්හි හදයෙ විද්ධො සබ්බඞ්ගපරිදාහිනා.
360. ආවෙධඤ්ච න පස්සාමි යතො රුහිරමස්සවෙ, යාව අයොනිසො චිත්තං සයං දුක්ඛමාභත’න්ති.
1. සඞ්කප්පජාතකං.
361. අජ්ජාපි මෙ තං මනසි{1} යං මං ත්වං තිලමුට්ඨියා, බාහාය මං ගහෙත්වාන ලට්ඨියා අනුතාළයි.
362. නනු ජීවිතෙ න රමසි යෙනාසි බ්රාහ්මණාගතො. යං මං බාහං ගහෙත්වාන තික්ඛත්තුං අනුතාළයී.
363. අරියො අනරියං කුබ්බානං යො දණ්ඩෙන නිසෙධති, සාසනත්ථං{2} න තං වෙරං ඉති නං පණ්ඩිතා විදූති.
2. තිලමුට්ඨිජාතකං.
364. මමන්නපානං විපුලං උළාරං උප්පජ්ජතීමස්ස මණිස්ස හෙතු, තං තෙ න දස්සං අතියාචකොසි න චාපි තෙ අස්සමං ආගමිස්සං.
365. සුසූ යථා සක්ඛරධොතපාණී තාසෙසි මං සෙලං යාචමානො, තං තෙ න දස්සං අතියාචකොසි න චාපි තෙ අස්සමං ආගමිස්සං.
366. න තං යාචෙ යස්ස පියං ජිගිංසෙ දෙස්සො හොති අතියාචනාය, නාගො මණිං යාචිතො බ්රාහ්මණෙන අදස්සනංයෙව තදජ්ඣගමා’ති.
3. මණිකණ්ඨජාතකං.
367. භුත්වා තිණපරිඝාසං භුත්වා ආවාමකුණ්ඩකං, එතං තෙ භොජනං ආසි කස්මාදානි න භුඤ්ජසී.
368. යත්ථ පොසං න ජානන්ති ජාතියා විනයෙන වා, පහූ තත්ථ මහාබ්රහ්මෙ අපි ආචාමකුණ්ඩකං.
369. ත්වඤ්ච ඛො මං පජානාසි යාදිසායං හයුත්තමො, ජානන්තො ජානමාගම්ම න තෙ භක්ඛාමි කුණ්ඩකන්තී.
4. කුණ්ඩකකුච්ඡිසින්ධවජාතකං.
370. යාව සො මත්තමඤ්ඤාසි භොජනස්මිං විහඞ්ගමො, තාව අද්ධානමාපාදි මාතරඤ්ච අපොසයි.
371. යතො ච ඛො බහුතරං භොජනං අජ්ඣුපාහරි තතො තත්ථෙව සංසීදි අමත්තඤ්ඤූ හි සො අහූ.
372. තස්මා මත්තඤ්ඤුතා සාධු භොජනස්මිං අගිද්ධතා{1}. අමත්තඤ්ඤූ හි සීදන්ති මත්තඤ්ඤූ ව න සීදරෙති.
5. සුකජාතකං.
373. ජරූදපානං ඛණමානා වාණිජා උදකත්ථිකා, අජ්ඣගංසු අයො ලොහං තිපුසීසඤ්ච වාණිජා: රජතං ජාතරූපඤ්ච මුත්තා වෙළුරියා බහු.
374. තෙ ච තෙන අසන්තුට්ඨා භිය්යො භිය්යො අඛාණිසුං, තෙ තත්ථාසිවිසො ඝොරො තෙජස්සී{2} තෙජසා හනි.
375. තස්මා ඛණෙ නාතිඛණෙ අතිඛාතං හි පාපකං, ඛාතෙන ව ධනං ලද්ධං අතිඛාතෙන නාසිතන්ති.
6. ජරූදපානජාතකං.
376. නායං ඝරානං කුසලො ලොලො අයං වලීමුඛො, කතං කතං ඛො දූසෙය්ය එවං ධම්මමිදං කුලං.
377. නයිදං චිත්තවතො ලොමං නායං අස්සාසිකො මිගො, සත්ථං මෙ ජනසන්ධෙන නායං කිඤ්චි විජානාති.
378. න මාතරං වා පිතරං භාතරං භගිණං සඛං, භරෙය්ය තාදිසො පොසො සිට්ඨං දසරථෙන මෙති.
7. ගාමණීචණ්ඩජාතකං{1}.
379. යාවතා චන්දිමසූරියා පරිහරන්ති දිසාභන්ති විරොචනා, සබ්බෙව දාසා මන්ධාතු යෙ පාණා පඨවිනිස්සිතා.
380. න කහාපණවස්සෙන තිත්ති කාමෙසු විජ්ජති, අප්පස්සාදා දුඛා කාමා ඉති විඤ්ඤාය පණ්ඩිතො.
381. අපි දිබ්බෙසු කාමෙසු රතිං සො නාධිගච්ඡති, තණ්හක්ඛයරතො හොති සම්මාසම්බුද්ධසාවකො’ති.
8. මන්ධාතුජාතකං.
382. නයිමස්ස විජ්ජාමයමත්ථි කිඤ්චි න බන්ධවො නො පන තෙ සහායො, අථ කෙන වණ්ණෙන තිරීටවච්ඡො තෙදණ්ඩිකො භුඤ්ජති අග්ගපිණ්ඩං.
383. ආපාසු මෙ යුද්ධපරාජිතස්ස එකස්ස කත්වා විවනස්මි ඝොරෙ, පසාරයී කිච්ඡගතස්ස පාණිං තෙනූදතාරිං දුඛසම්පරෙතො.
384. එතස්ස කිච්චෙන ඉධානුපත්තො වෙසායිනො විසයා ජීවලොකෙ, ලාභාරහො තාත තිරීටවච්ඡො{1} දෙථස්ස භොගං යජතඤ්ච යඤ්ඤන්ති.
9. තිරීටවච්ඡජාතකං.
385. යස්සත්ථා දූරමායන්ති අමිත්තමපි යාචිතුං, තස්සූදරස්සහං දූතො මා මෙ කුජ්ඣි රථෙසභ.
386. යස්ස දිවා ච රත්තො ච වසමායන්ති මාණවා තස්සූදරස්සහං දූතො මා මෙ කුජ්ඣි රථෙසභ.
387. දදාමි තෙ බ්රාහ්මණ රොහිණීනං. ගවං සහස්සං සහ පුඞ්ගවෙන, දූතො හි දූතස්ස කථං න දජ්ජං මයම්පි තස්සෙව භවාම දූතා’ති.
10. දූතජාතකං.
සඞ්කප්පවග්ගො පඨමො.
තස්සුද්දානං:
උසුකාරවරො තිලමුට්ඨිමණි හයරාජවිහඞ්ගමආසිවිසො, ජනසන්ධකහාපණවස්ස පුන තිරීට පුන දූතවරෙන දස
2. පදුමවග්ගො
388. යථා කෙසා ච මස්සු ච ඡින්නං ඡින්නං විරූහති. එවං රුහතු තෙ නාසා පදුමං දෙහි යාචිතො.
389. යථා සාරදිකං බීජං ඛෙත්තෙ වුත්තං විරූහති, එවං රුහතු තෙ නාසා පදුමං දෙහි යාචිතො.
390. උභොපි පලපන්තෙතෙ අපි පදුමානි දස්සති, වජ්ජ්රං වා තෙ න වා වජ්ජුං නත්ථි නාසාය රූහනා, දෙහි සම්ම පදුමානි අහං යාචාමි යාචිතො.
1. පදුමජාතකං.
391. පාණි චෙ මුදකො චස්ස නාගො චස්ස සුකාරිතො, අන්ධකාරො ච වස්සෙය්ය අථ නූන තදා සියා.
392. අනලා මුදුසම්භාසා දුප්පූරා තා{1} නදීසමා, සීදන්ති නං විදිත්වාන ආරකා පරිවජ්ජයෙ.
393. යං එතා උපසෙවන්ති ඡන්දසා වා ධනෙන වා, ජාතවෙදොව සණ්ඨානං ඛිප්පං අනුදහන්ති නන්ති.
2. මුදුපාණීජාතකං.
394. අභිජ්ජමානෙ වාරිස්මිං සයං ආගම්ම ඉද්ධියා, මිස්සීභාවිත්ථියා ගන්ත්වා සංසීදසි මහණ්ණවෙ.
395. ආවට්ටනී මහාමායා බුහ්මචරියවිකොපනා, සීදන්ති නං විදිත්වාන ආරකා පරිවජ්ජයෙ.
396. යං එතා උපසෙවන්ති ඡන්දසා වා ධනෙන වා, ජාතවෙදොව සණ්ඨානං ඛිප්පං අනුදහන්තිනන්ති.
3. චුල්ලපලොභනජාතකං.
397. පණාදො නාම සො රාජා යස්ස යූපො සුවණ්ණයො, තිරියං සොළස පබ්බෙධො උච්චමානු සහස්සධා.
398. සහස්සකණ්ඩං සතභෙණ්ඩුං ධජාලු{1} හරිතාමයො, අනච්චුං තත්ථ ගන්ධබ්බා ඡසහස්සානි සත්තධා.
399. එවමෙතං තදා ආසි යථා භාසසි භද්දජි, සක්කො අහං තදා ආසිං වෙය්යාවච්චකාරො තවන්ති.
4. මහාපණාදජාතකං.
400. දිස්වා ඛුරප්පෙ ධනුවෙගනුන්නෙ ඛග්ගෙ ගහීතෙ තිඛිණෙ තෙලධොතෙ, තස්මිං භයස්මිං මරණෙ වියූළ්හෙ කස්මා නු තෙ නාහු ඡම්භිතත්තන්ති.
401. දිස්වා ඛුරප්පෙ ධනුවෙගනුන්නෙ ඛග්ගෙ ගහීතෙ තිඛණෙ තෙලධොතෙ, තස්මිං භයස්මිං මරණෙ වියූළ්හෙ වෙදං අලත්ථං විපුලං උළාරං.
402. සො වෙදජාතො අජ්ඣභවිං අමිත්තෙ පුබ්බෙව මෙ ජීවිතමාසි චත්තං. න හි ජීවිතෙ ආලයං කුබ්බමානො සූරො කයිරා සුරකිච්චං කදාචීති.
5. ඛුරප්පජාතකං.
403. යෙනාසි කිසියා පණ්ඩු යෙන භත්තං න රුච්චති, අයං සො ආගතො තාතො{2} කස්මාදානි පලායසි.
404. සචෙ පනාදිකෙනෙව සන්ථවො නාම ජායති, යසො හායති ඉත්ථීනං තස්මා තාත පලායහං.
405. යසස්සීනං කුලෙ ජාතං ආගතං යා න ඉච්ඡති, සොචති චිරරත්තාය වාතග්ගමිව කුන්දලීති.
6. වාතග්ගජාතකං.
406. සිඞ්ගී මිගො ආයතචක්ඛුනෙත්තො අට්ඨිත්තචො වාරිසයො අලොමො, තෙනාභිභූතො කපණං රුදාමි මාහෙව මං පාණසමං ජහෙය්ය.
407. අය්ය{3} තං න ජහිස්සාමි කුඤ්ජර සට්ඨිහායන{4}, පථව්යා චාතුරන්නාය සුප්පියො හොසි මෙ තුවං,
408. යෙ කුළිරා සමුද්දස්මිං ගඞ්ගාය නම්මදාය ච, තෙසං ත්වං වාරිජො සෙට්ඨො මුඤ්ච රොදන්තියා පතින්ති.
7. කක්කටකජාතකං{5}.
409. යො චෙ සබ්බසමෙතානං අහුවා සෙට්ඨසම්මතො තස්සායං එදිසී පඤ්ඤා කිමෙව ඉතරා පජා.
410. එවමෙව තුවං බ්රහ්මෙ අනඤ්ඤාය විනින්දසි කථං මූලං අදිස්වාන රුක්ඛං ජඤ්ඤා පතිට්ඨිතං.