287. න චායමග්ගි තපති න සූලො සාදු තච්ඡිතො, යඤ්ච මං මඤ්ඤති මච්ඡි අඤ්ඤං සො රතියා ගතො.
288. සො මං දහති රාගග්ගි චිත්තං චුපතපෙති මං, ජාලිනො මුඤ්චථයිරා මං න කාමෙ හඤ්ඤතෙ කච්චීති.
6. මච්ඡජාතකං.
289. සබ්බො ලොකො අත්තමනො අහොසි අකොවිදා ගාමධම්මස්ස සෙග්ගු, කොමාරිකො නාම තවජ්ජධම්මො යං ත්වං ගහිතා පවනෙ පරොදසි.
290. යො දුක්ඛඵුට්ඨාය භවෙය්ය තාණං සො මෙ පිතා දූභි වනෙ කරොති, සා කස්ස කන්දාමි වනස්ස මජ්ඣෙ යො තායිතා සො සහසා කරොතී’ති.
7. සෙග්ගුජාතකං.
291. සඨස්ස සාඨෙය්යමිදං සුචින්තිතං පච්චොඩ්ඩිතං පතිකූටස්ස කූටං, ඵාලඤ්චෙ අදෙය්යුං{3} මූසිකා කස්මා කුමාරං කුලලා නො හරෙය්යුං{4}
292. කූටස්ස හි සන්ති කූටකූටා භවති චාපි{1} නිකතිනො නිකත්යා, දෙහි පුත්තනට්ඨ ඵාලනට්ඨස්ස ඵාලං මා තෙ පුත්තමහාසි ඵාලනට්ඨො’ති.
8. කූටවාණිජජාතකං.
293. හිරඤ්ඤං මෙ සුවණ්ණං මෙ එසා රත්තිං දිවා කථා, දුම්මෙධානං මනුස්සානං අරියධම්මං අපස්සතං.
294. ද්වෙ ද්වෙ ගහපතයො ගෙහෙ එකො තත්ථ අමස්සුකො, ලම්බත්ථනො වෙණිකතො අථො අඞ්කීතකණ්ණකො කීතො ධනෙන බහුනා සො තං විතුදතෙ ජනන්ති.
9. ගරහිතජාතකං.
295. සුඛං ජීවිතරූපොසි රට්ඨා විවනමාගතො, සො එකකො අරඤ්ඤස්මිං රුක්ඛමූලෙ කපණො විය ඣායසි
296. සුඛං ජිවිතරූපොස්මි රට්ඨා විවනමාගතො, සො එකකො අරඤ්ඤස්මිං රුක්ඛමූලෙ කපණො විය ඣායාමි සතං ධම්මං අනුස්සරන්ති
10. ධම්මද්ධජජාතකං.
බීරණත්ථම්භකවග්ගො සත්තමො.
තස්සුද්දානං:
අථ බීරණත්ථම්භවරො ච නටො භරුරාජවරුත්තමපුණ්ණනදී, බහුභාණී අග්ගි පවනෙ මූසිකා සහලම්බත්ථනො කපණෙන දස.
8. කාසාවවග්ගො
297. අනික්කසාවො කාසාවං යො වත්ථං පරිදහෙස්සති, අපෙතො දමසච්චෙන න සො කාසාවමරහති.
298. යො ච වන්තකසාවස්ස සීලෙසු සුසමාහිතො, උපෙතො දමසච්චෙන ස වෙ කාසාවමරහතී’ති.
1. කාසාවජාතකං.
299. ඉදං තදාචරියවචො පාරාසරියො යදබ්රවි{1}, මා සු ත්වං අකරා{2} පාපං යං ත්වං පච්ඡා කතං තපෙ
300. යානි කාරොති පුරිසො තානි අත්තනි පස්සති, කල්යාණකාරී කල්යාණං පාපකාරී ච පාපකං, යාදිසං වපතෙ{3} ඛිජං තාදිසං හරතෙ ඵලන්ති.
2. චූළනන්දියජාතකං.
301. නමෙ නමන්තස්ස භජෙ භජන්තං කිච්චානුකුබ්බස්ස කරෙය්ය කිච්චං, නානත්ථකාමස්ස කාරෙය්ය අත්ථං අසම්භජන්තම්පි න සම්භජෙය්ය
302. චජෙ චජන්තං වනථං න කයිරා{4} අපෙතචිත්තෙන න සම්භජෙය්ය, දිජො දුමං ඛීණඵලන්ති{5} ඤත්වා අඤ්ඤං සමෙක්ඛෙය්ය මහා හි ලොකොති.
3. පුටභත්තජාතකං.
303. යස්සෙතෙ චතුරො ධම්මා වානරින්ද යථා තව, සච්චං ධම්මො ධිතී චාගො දිට්ඨං සො අතිවත්තති.
304. යස්ස චෙතෙ න විජ්ජන්ති ගුණා පරමභද්දකා, සච්චං ධම්මො ධිතී චාගො දිට්ඨිං සො නාතිවත්තතී’ති.
4. කුම්භීලජාතකං.
305. අත්ථි මෙ පුරිසො දෙව සබ්බකිච්චෙසු ව්යාවටො, තස්ස චෙකො පරාධත්ථි තත්ථ ත්වං කින්ති මඤ්ඤසි.
306. අම්හාකම්පත්ථි{1} පුරිසො එදිසො ඉධ විජ්ජති, දුල්ලභො අඞ්ගසම්පන්නො ඛන්තිරස්මාක රුච්චතීති.
5. ඛන්තිවණ්ණනජාතකං.
307. කාලෙ නික්ඛමනා සාධු නාකාලෙ සාධු නික්ඛමො, අකාලෙන හි නික්ඛම්ම එකකම්පි බහුජනො, න කිඤ්චි අත්ථං ජොතෙති ධංකසෙනාව කොසියං.
308. ධීරො ච විධිවිධානඤ්ඤූ පරෙසං විවරන්තගු, සබ්බාමිත්තෙ වසීකත්වා කොසියොව සුඛී සියා’ති.
6. කොසියජාතකං.
309. සූරො සූරෙන සඞ්ගම්ම වික්කන්තෙන පහාරිනා, එහි නාග නිවත්තස්සු කින්නු භීතො පලායසි? පස්සන්තු අඞ්ගමගධා මම තුය්හඤ්ච වික්කමං.
310. න තං පාදා වධිස්සාමි න දන්තෙහි න සොණ්ඩියා, මීළ්හෙන තං වධිස්සාමි පූති හඤ්ඤතු පූතිනා’ති.
7. ගූථපාණකජාතකං.
311. තයො ගිරිං අන්තරං කාමයාමි පඤ්චාලා කුරුයො කෙකකෙ ච, තතුත්තරිං{1} බ්රාහ්මණ කාමයාමි තිකිච්ඡ මං බ්රාහ්මණ කාමනීතං.
312. කණ්හාහි දට්ඨස්ස කරොන්ති හෙකෙ අමනුස්සවද්ධස්ස කරොන්ති පණ්ඩිතා, න කාමනීතස්ස කාරොති කොචි ඔක්කන්තසුක්කස්ස හි කා තිකිච්ඡා’ති.
8. කාමනීතජාතකං
313. ගජග්ගමෙඝෙහි හයග්ගමාලිහි රථූමිජාතෙහි සරාහිවස්සහි, ථරුග්ගහාවට්ටදළ්හප්පහාරිහි පරිවාරිතා තක්කසිලා සමන්තතො.
314. අභිධාවථා ච පතථා ව විවිධවිනදිතා ච දන්තිහි, වත්තතජ්ජ තුමුලො ඝොසො යථා විජ්ජුතා ජලධරස්ස ගජ්ජතොති.
9. පලාසිජාතකං{2}.
315. ධජමපරිමිතං අනන්තපාරං. දුප්පසහං ධඞ්කෙහි සාගරමිව{3}, ගිරිමිව අනිලෙන දුප්පසහො දුප්පසහො අහමජ්ජ තාදිසෙන
316. මා බාලියං විප්පලපි න හිස්ස තාදිසං විළය්හසෙ න හි ලභසෙ නිසෙධකං, ආසජ්ජසි ගජමිව එකචාරිනං යො තං පාදා නළමිව පොථයිස්සතී’ති,
10. දුතියපලාසිජාතකං{4}.
කාසාවවග්ගො අට්ඨමො.
තස්සුද්දානං:
වරවත්ථචොදුමඛීණාඵලං චතුරො ධම්මවරංපුරිසුත්තම, ධඞ්කමගධා ච තයො ගිරිනාම ගජග්ගවරොධජවරෙන දස.
9. උපාහනවග්ගො
317. යථාපි කීතා පුරිසස්සුපාහනා සුඛස්ස අත්ථාය දුඛං උදබ්බහෙ, ඝම්මාභිතත්තා තලසා පපීළිතා තස්සෙව පාදෙ පුරිසස්ස ඛාදරෙ.
318. එවමෙව දුක්කුලීනො අනරියො තම්හාකවිජ්ජඤ්ච සුතඤ්චමාදිය, තමෙව සො තත්ථ සුතෙන ඛාදති අනරියො වුච්චති පානදුපමොති{1}.
1. උපාහනජාතකං.
319. එකචින්තිතොව අයමත්ථො බාලො අපරිනායකො, න හි ඛුජ්ජෙන වාමෙන භොති සඞ්ගනතුමරහසි.
320. පුරිසූසභං මඤ්ඤමානා අහං ඛුජ්ජමකාමයිං සොයං සඞ්කුචිතො සෙති ඡින්නතන්ති යථා ථුණාති.
2. වීණාථූණජාතකං
321. කාමං යහිං ඉච්ඡසි තෙන ගච්ඡ විද්ධොසි මම්මම්හි විකණ්ණකෙන, හතොසි භත්තෙන සවාදිතෙන ලොලො ච මච්ඡෙ අනුබන්ධමානො
322. එවම්පි ලොකාමිසං ඔපතන්තො, විහඤ්ඤති චිත්තවසානුවත්තී, සො හඤ්ඤති ඤාතිසඛානමජ්ඣෙ මච්ඡානුගො සොරිව සුංසුමාරොති.
3. විකණ්ණකජාතකං
323. ත්වමෙව දානි මකර යං කාමො ව්යගමා තයි, සොයං අප්පටිසන්ධිකො ඛරාඡින්නංව {1}රෙරුකං.
324. අත්රිච්ඡා අතිලොභෙන අතිලොහමදෙන ච, එවං හායති අත්ථම්හා අහංව අසිතාභූයා’ති.
4. අසිතාභූජාතකං.
325. සුඛා ඝරා වච්ඡනඛ සහිරඤ්ඤා සභොජනා, යත්ථ භුත්වා ච පීත්වා ච{2} සයෙය්යාථ{3} අනුස්සුකො.
326. ඝරා නානීහමානස්ස ඝරා නාභණතො මුසා, ඝරා නාදින්නදණ්ඩස්ස පරෙසං අනිකුබ්බතො එවං ඡිද්දං දුරභිභවං කො ඝරං පටිපජ්ජතී’ති.
5. වච්ඡනඛජාතකං.
327. භද්දකො වත යං පක්ඛි ද්විජො කුමුදසන්නිභො වූපසන්තෙහි පක්ඛෙහි මන්දමන්දොව ඣායති.
328. නාස්ස සීලං විජානාථ අනඤ්ඤාය පසංසථ, අම්හෙ දිජො න පාලෙති තෙන පක්ඛී{4} න ඵන්දතී’ති.
6. බකජාතකං.
329. කො නු ඛො භගවා හෙතු එකච්චෙ ඉධ පුග්ගලෙ, අතීව හදයං නිබ්බාති චිත්තඤ්චාපි පසීදති.
330. පුබ්බෙව සන්නිවාසෙන පච්චුප්පන්නහිතෙන වා, එවං තං ජායතෙ පෙමං උප්පලංව යථොදකෙ’ති.
7. සාකෙතජාතකං.
331. ඉඞ්ඝ එකපදං තාත අනෙකත්ථපදනිස්සිතං, කිඤ්චි සඞ්ගාහිකං බ්රූහි යෙනත්ථෙ සාවයාමසෙ.
332. දක්ඛෙය්යෙකපදං තාත අනෙකත්ථ පදස්සිතං,{1} තඤ්ච සීලෙන සංයුත්තං ඛන්තියා උපපාදිතං. අලං මිත්තෙ සුඛාපෙතුං අමිත්තානං දුඛාය චාති.
8. එකපදජාතකං.
333. ආසීවිසං මමං සන්තං පවිට්ඨං කුමිනාමුඛං, රුච්චතෙ හරිතා මාතා යං මං ඛාදන්ති මච්ඡකා
334. විලුම්පතෙව පුරිසො යාවස්ස උපකප්පති. යදා චඤ්ඤෙ විලුම්පන්ති සො විලුත්තො විලුප්පතී’ති{2}.
9. හරිතමාතුජාතකං.
335. සබ්බො ජනො හිංසිතො පිඞ්ගලෙන තස්මිං මතෙ පච්චයං{3} වෙදයන්ති, පියො නු තෙ ආසි අකණ්හනෙත්තො {4}කස්මා නු ත්වං රොදසි ද්වාරපාල.
336. න මෙ පියො ආසි අකණ්හනෙත්තො භායාමි පච්චාගමනාය තස්ස ඉතො ගතො හිංසෙය්ය මච්චුරාජං සො හිංසිතො ආනෙය්ය පුන ඉධ.
337. දඩ්ඪො වාහසහස්සෙහි සිත්තො ඝටසතෙහි සො, පරික්ඛතා ච සා භූමි මා භායි නාගමිස්සතී’ති.
10. මහාපිඞ්ගලජාතකං.
උපාහනවග්ගො නවමො.
තස්සුද්දානං:
වරුපාහනඛුජ්ජවිකණ්ණකකො අසිතාභූයා පඤ්චම වච්ඡනඛො, දිප්පෙමවරුත්තම එකපදං. කුමිනාමුඛපිඞ්ගලකෙන දසාති.
10. සිගාලවග්ගො
338. සිගාලො මානත්ථද්ධොව පරිවාරෙන අත්ථිකො පාපුණී මහතිං භූමිං රාජාසි සබ්බදාඨිනං
339. එවමෙවං මනුස්සෙසු යො හොති පරිවාරවා{1}, සො හි තත්ථ මහා හොති සිගාලො විය දාඨින’න්ති
1. සබ්බදාඨ{2}ජාතකං.
340. බාලො වතායං සුනඛො යො වරත්තං න ඛාදති, බන්ධනා ච පමුඤ්චෙය්ය{3} අසිතො ච ඝරං වජෙ.
341. අට්ඨිතං මෙ මනස්මිං මෙ අථො මෙ හදයෙ කතං, කාලඤ්ච පතිකඞ්ඛාමි යාව පස්සුපතූ ජනොති.
2. සුනඛජාතකං.
342. සත්තතන්තිං සුමධුරං රාමණෙය්යං අවාචයිං, සො මං රඞ්ගම්භි අව්හෙති සරණං මෙ හොහි කොසිය.
343. අහං තං සරණං සම්ම අහමාචරිය පූජකො, න තං ජයිසස්ති සිස්සො සිස්සමාචරිය ජෙස්සසී’ති.
3. ගුත්තිලජාතකං.
344. යං පස්සති න තං ඉච්ඡති යඤ්ච න පස්සති තං කිර ඉච්ඡති, මඤ්ඤාමි චිරං චරිස්සති න හි තං ලච්ඡති යං සො ඉච්ඡති.
345. යං ලභති න තෙන තුස්සති යං පත්ථෙති ලද්ධං හීළෙති, ඉච්ඡා හි අනන්තගොචරා වීතිච්ඡානං{1} නමො කාරොමසෙති.
4. වීතිච්ඡජාතකං.