සුත්තන්තපිටකෙ
ඛුද්දකනිකායෙ
ජාතකපාළි
(පඨමො භාගො)
නමො තස්ස භගවතො අරහතො සම්මා සම්බුද්ධස්ස.
1. එකකනිපාතො
1. අපණ්ණකවග්ගො
1. අපණ්ණකං ඨානමෙකෙ දුතියං ආහු තක්කිකා. එතදඤ්ඤාය මෙධාවී තං ගණ්හෙ යදපණ්ණකන්ති.{1}
1. අපණ්ණකජාතකං.
2. අකිලාසුනො වණ්ණුපථෙ{2} ඛණන්තා උදඞ්ගණෙ තත්ථ පපං අවින්දුං, එවං මුනී විරියබලූපපන්නො{3} අකිලාසු වින්දෙ හදයස්ස සන්තින්ති.
2. වණ්ණුපථජාතකං.{4}
3. ඉධ චෙ හි නං{5} විරාධෙසි සද්ධම්මස්ස නියාමතං{6}, චිරං ත්වං අනුතපෙස්සසි{7} සෙරිවායංව වාණිජොති.
3. සෙරිවාවාණිජජාතකං{8}.
4. අප්පකෙනපි මෙධාවී පාභතෙන විචක්ඛණො, සමුට්ඨාපෙති අත්තානං අණුං අග්ගිංව සන්ධමන්ති.
4. චුල්ලසෙට්ඨිජාතකං{9}
5. කිමග්ඝති{1} තණ්ඩුලනාළිකාය අස්සාන මූලාය වදෙහි රාජ{2}, බාරාණසිං සන්තරබාහිරන්තං{3} අයමග්ඝති තණ්ඩුලනාළිකාති.{*}
5. තණ්ඩුලනාළිජාතකං.
6. හිරිඔත්තප්පසම්පන්නා සුක්කධම්මසමාහිතා, සන්තො සප්පුරිසා ලොකෙ දෙවධම්මාති වුච්චරෙති.
6. දෙවධම්මජාතකං.
7. පුත්තො ත්යාහං මහාරාජ ත්වං මං පොස ජනාධිප, අඤ්ඤෙපි දෙවො පොසෙති කිඤ්ච දෙවො සකං පජන්ති.
7. කට්ඨහාරි{4}ජාතකං.
8. අපි අතරමානානං ඵලාසාව සමිජ්ඣති, විපක්කබ්රහ්මචරියොස්මි එවං ජානාහි ගාමණීති.
8. ගාමණීජාතකං.
9. උත්තමඞ්ගරුහා මය්හං ඉමෙ ජාතා වයොහරා, පාතුභූතා දෙවදූතා පබ්බජ්ජාසමයො මමාති.
9. මඛාදෙව{5}ජාතකං.
10. යඤ්ච අඤ්ඤෙනුරක්ඛන්ති යො ච අඤ්ඤෙ න රක්ඛති, ස චෙ රාජ සුඛං සෙති කාමෙසු අනපෙඛවාති.
10. සුඛවිහාරිජාතකං.
අපණ්ණකවග්ගො පඨමො.
තස්සුද්දානං:
වරාපණ්ණකවණ්ණුපථසෙරිවරො සුචිචක්ඛණතණ්ඩුලනාළිකස්සං, හිරීපුත්තවරුත්තගාමණිනා යො ච න රක්ඛති තෙන දස.
2. සීලවග්ගො
11. හොති සීලවතං අත්ථො පටිසන්ථාර{1}වුත්තිනං, ලක්ඛණං පස්ස ආයන්තං ඤාතිසඞ්ඝපුරක්ඛතං අථ පස්සසිමං කාළං සුවිහීනංව ඤාතිහීති.
1. ලක්ඛණමිගජාතකං{2}.
12. නිග්රොධමෙව සෙවෙය්ය න සාඛමුපසංවසෙ{3}, නිග්රොධස්මිං මතං සෙය්යො යඤ්චෙ සාඛස්මිං ජීවිතන්ති.
2. නිග්රොධමිගජාතකං{4}.
13. ධිරත්ථු කණ්ඩිනං සල්ලං පුරිසං ගාළ්හවෙධිනං, ධිරත්ථු තං ජනපදං යත්ථිත්ථි පරිනායිකා, තෙ චාපි{5} ධික්කිතා සත්තා යෙ ඉත්ථීනං වසං ගතාති.
3. කණ්ඩිනජාතකං{6}.
14. න කිරත්ථි රසෙහි පාපියො ආවසෙහි වා සන්ථවෙහි වා, වාතමිගං ගෙහනිස්සිතං{7} වසමානෙසි රසෙහි සඤ්ජයොති.
4. වාතමිගජාතකං.
15. අට්ඨඛුරං{8} ඛරාදියෙ මිගං වඞ්කාතිවඞ්කිතං, සත්තහි කලාහතික්කන්තං{9} න තං ඔවදිතුස්සහෙති.
5. ඛරාදියජාතකං.
16. මිගන්ති පල්ලත්ථමනෙකමායං අට්ඨඛුරං අඩ්ඪරත්තාවපායිං{10}, එකෙන සොතෙන ඡමාස්සසන්තො ඡහි කලාහතිභොති භාගිනෙය්යොති.
6. තිපල්ලත්ථමිගජාතකං{11}.
17. කාළෙ{1} වා යදි වා ජුණ්හෙ යදා වායති මාලුතො, වාතජානි හි සීතානි උභොත්ථමපරාජිතාති.
7. මාලුතජාතකං.
18. එවඤ්ච සත්තා ජානෙය්යුං දුක්ඛායං ජාතිසම්භවො. න පාණො පාණිනං හඤ්ඤෙ පාණඝාතී හි සොචතීති.
8. මතකභත්තජාතකං.
19. සචෙ මුඤ්චෙ පෙච්ච මුඤ්චෙ{2} මුච්චමානො හි බජ්ඣති, නාහෙවං ධීරා මුච්චන්තී මුත්ති බාලස්ස බන්ධන’න්ති.
9. ආයාචිතභත්තජාතකං.
20. දිස්වා පදමනුත්තිණ්ණං දිස්වා නොතරිතං පදං, නළෙන වාරිං පිවිස්සාම{3} නෙව මං ත්වං{4} වධිස්සසී’ති.
10. නළපානජාතකං.
සීලවග්ගො දුතියො.
තස්සුද්දානං:
අථලක්ඛණසාඛධිරත්ථුපුන නකිරත්ථිරසෙහිඛරාදියා, අතිභොතිරසමාලුතපාණ මුච්චෙනනළඅව්හයන්තෙ භවන්ති දස.
3. කුරුඞ්ගවග්ගො
21. ඤාතමෙතං කුරුඞ්ගස්ස යං ත්වං සෙපණ්ණි සෙය්යසි, අඤ්ඤං සෙපණ්ණිං{1} ගච්ඡාමි න මෙ තෙ රුච්චතෙ ඵලන්ති.
1. කුරුඞ්ගමිගජාතකං.
22. යෙ කුක්කුරා රාජකුලම්හි වද්ධා{2} කොලෙය්යකා වණ්ණඛලූපපන්නා, තෙ’මෙ න වජ්ඣා මයමස්ම වජ්ඣා නායං සඝච්චා{3} දුබ්බලඝාතිකායන්ති.
2. කුක්කුරජාතකං.
23. අපි පස්සෙන සෙමානො සල්ලෙහි සල්ලීකතො, සෙය්යො ව වළවා භොජ්ජො{4} යුඤ්ජ මඤ්ඤෙව සාරථි’ති.
3. භොජාජානීයජාතකං{5}.
24. යදා යදා යත්ථ යදා යත්ථ යත්ථ යදා යදා, ආජඤ්ඤො කුරුතෙ වෙගං හායන්ති තත්ථ වාළවා’ති.
4. ආජඤ්ඤජාතකං.
25. අඤ්ඤමඤ්ඤෙහි තිත්ථෙහි අස්සං පායෙහි සාරථි, අච්චාසනස්ස පුරිසො{6} පායාසස්සපි තප්පතී’ති.
5. තිත්ථජාතකං.
26. පුරාණචොරාන වචො නිසම්ම මභිලාමුඛො පොථයමානුචාරි{7}{*} සුසඤ්ඤතානං හි වචො නිසම්ම. ගජුත්තමො සබ්බගුණෙසු අට්ඨාති.
6. මහිලාමුඛජාතකං.
27. නාලං කබළං{1} පදාතවෙ න ච පිණ්ඩං න කුසෙ න ඝංසිතුං, මඤ්ඤාමි අභිණ්හදස්සනා නාගො සිනෙහමකාසි{2} කුක්කුරෙති.
7. අභිණ්හජාතකං.
28. මනුඤ්ඤමෙව භාසෙය්ය නාමනුඤ්ඤං කුදාචනං මනුඤ්ඤං භාසමානස්ස ගරුභාරං උද්දධරි, ධනඤ්ච නං අලබ්භෙසි තෙනචත්තමනො අහූ’ති.
8. නන්දිවිසාලජාතකං.
29. යතො යතො ගරුධුරං යතො ගම්භිරවත්තනි, තදස්සු{3} කණ්හං යුඤ්ජන්ති ස්වාස්සු තං වහතෙ ධුරන්ති.
9. කණ්හජාතකං.
30. මා මුනිකස්ස පිහයි ආතුරන්තානි භුඤ්ජති, අප්පොස්සුක්කො භුසං ඛාද එතං දීඝායුලක්ඛණන්ති.
10. මුනිකජාතකං.
කුරඞ්ගවග්ගො තතියො.
තස්සුද්දානං:
කුරුඞ්ගස්සකුක්කුරභොජවරො පුන වාළවස්සසිරිවයතො, මහිළාමුඛනාමනුඤ්ඤවරො වහතෙධුරමුනිකෙන දස.
4. කුලාවකවග්ගො
31. කුලාවකා මාතලි සිම්බලිස්මිං ඊසාමුඛෙන පරිවජ්ජයස්සු, කාමං චජාම අසුරෙසු පාණං මායිමෙ දිජා විකුලාවා අහෙසු’න්ති{1}.
1. කුලාවකජාතකං.
32. රුදං මනුඤ්ඤං රුචියා{2} ච පිට්ඨි වෙළුරියණ්ණුපනිභා ච{3} ගීවා, ව්යාමමත්තානි ච පෙඛුණානි{4} නච්චෙන තෙ ධීතරං නො දදාමී’ති.
2. නච්චජාතකං.
33. සම්මොදමානා ගච්ඡන්ති ජාලමාදාය පක්ඛිනො, යදා තෙ විවදිස්සන්ති තදා එහින්ති මෙ වස’න්ති.
3. සම්මොදමානජාතකං.
34. න මං සීතං න මං උණ්හං න මං ජාලස්මිං බාධනං, යඤ්ච මං මඤ්ඤතෙ මච්ඡි අඤ්ඤං සො රතියා ගතො’ති.
4. මච්ඡජාතකං.
35. සන්ති පක්ඛා අපතනා සන්ති පාදා අවඤ්චනා, මාතා පිතා ච නික්ඛන්තා ජාතවෙද පටික්කමා’ති.
5. වට්ටකජාතකං.
36. යං නිස්සිතා ජගතිරුහං විහඞ්ගමා ස්වායං අග්ගිං පමුඤ්චති, දිසා භජථ වක්කඞ්ගා{1} ජාතං සරණතො භයන්ති.
6. සකුණජාතකං
37. යෙ වද්ධමපචායන්ති නරා ධම්මස්ස කොවිදා, දිට්ඨෙව ධම්මෙ{2} පාසංසා සම්පරායෙ ච සුග්ගති’ති.
7. තිත්තිරජාතකං.
38. නාච්චන්තං නිකතිප්පඤ්ඤො නිකත්යා සුඛමෙධති, ආරාධෙති නිකතිප්පඤ්ඤො ඛකො කක්කටකාමිවා’ති.
8. බකජාතකං.
39. මඤ්ඤෙ සොවණ්ණයො රාසි සොවණ්ණමාලා ච නන්දකො, යත්ථ දාසො ආමජාතො ඨිතො ථුල්ලානි ගජ්ජතී’ති.
9. නන්දජාතකං.
40. කාමං පතාමි නිරයං උද්ධපාදො අවංසිරො, නානරියං කරිස්සාමි හන්ද පිණ්ඩං පටිග්ගහා’ති.
10. ඛදිරඞ්ගාරජාතකං.
කුලාවකවග්ගො චතුත්ථො.