තං වෙය්යඤ්ජනිකා සමාගතා බහවො බ්යාකංසු නිපුණසම්මතා මනුජා සුචිජනපරිවාරගණො භවති දිජසමසුක්කසුචිසොභනදන්තො.
රඤ්ඤො හොති බහුජනො සුචිපරිවාරො මහතිං මහිං අනුසාසකො, පසය්හ න ච ජනපදතුදනං හිතමපි ච බහුජනසුඛඤ්ච චරන්ති.
අථ චෙ පබ්බජති භවති විපාපො සමණො සමිතරජො විවත්තඡද්දො, විගතදරථකිලමථො ඉමම්පි ච පරමපි ච{1} පස්සති ලොකං.
තස්සොවාදකරා බහූ ගිහී ච පබ්බජිතා ච අසුචිගරහිතං{2} ධුනන්ති පාපං, ස හි සුචිභි පරිවුතො භවති මලඛීලකලිකිලෙසෙ පනුදෙතී ති{3}
ලක්ඛණසුත්තං නිට්ඨිතං සත්තමං.
8.
සිගාලසුත්තං
1. එවං මෙ සුතං:
එකං සමයං භගවා රාජගහෙ විහරති වෙළුවනෙ කලන්දකනිවාපෙ. තෙන ඛො පන සමයෙන සිගාලකො{1} ගහපතිපුත්තො කාලස්සෙව වුට්ඨාය රාජගහා නික්ඛමිත්වා අල්ලවත්ථො අල්ලකෙසො පඤ්ජලිකො පුථුද්දිසා{2} නමස්සති, පුරත්ථිමං දිසං දක්ඛිණං දිසං පච්ඡිමං දිසං උත්තරං දිසං හෙට්ඨිමං දිසං උපරිමං දිසං.
2. අථ ඛො භගවා පුබ්බණ්හසමයං නිවාසෙත්වා පත්තචීවරමාදාය රාජගහං පිණ්ඩාය පාවිසි. අද්දසා ඛො භගවා සිගාලකං ගහපතිපුත්තං කාලස්සෙව වුට්ඨාය රාජගහා නික්ඛමිත්වා අල්ලවත්ථං අල්ලකෙසං පඤ්ජලිකං පුථුද්දිසා නමස්සන්තං, පුරත්ථිමං දිසං දක්ඛිණං දිසං පච්ඡිමං දිසං උත්තරං දිසං හෙට්ඨිමං දිසං උපරිමං දිසං. දිස්වාන සිගාලකං ගහපතිපුත්තං එතදවොච: කින්නු ඛො ත්වං ගහපතිපුත්ත කාලස්සෙව උට්ඨාය රාජගහා නික්ඛමිත්වා අල්ලවත්ථො අල්ලකෙසො පඤ්ජලිකො පුථුද්දිසා නමස්සසි, පුරත්ථිමං දිසං දක්ඛිණං දිසං පච්ඡිමං දිසං උත්තරං දිසං හෙට්ඨිමං දිසං උපරිමං දිසන්ති?”
“පිතා මං භන්තෙ, කාලං කරොන්තො එවං අවච: ‘දිසා තාත නමස්සෙය්යාසී’ති. සො ඛො අහං භන්තෙ පිතු වචනං සක්කරොන්තො ගරුකරොන්තො මානෙන්තො පූජෙන්තො කාලස්සෙව වුට්ඨාය රාජගහා නික්ඛමිත්වා අල්ලවත්ථො අල්ලකෙසො පඤ්ජලිකො පුථුද්දිසා නමස්සාමි, පුරත්ථිමං දිසං -පෙ- උපරිමං දිසන්ති”.
“න ඛො ගහපතිපුත්ත, අරියස්ස විනයෙ එවං ඡද්දිසා නමස්සිතබ්බා”ති.
“යථා කථං පන භන්තෙ, අරියස්ස විනයෙ ඡද්දිසා නමස්සිතබ්බා? සාධු මෙ භන්තෙ භගවා තථා ධම්මං දෙසෙතු යථා අරියස්ස විනයෙ ඡදිදිසා නමස්සිතබ්බා”ති.
ඡද්දිසා
3. තෙන හි ගහපතිපුත්ත, සුණාහි, සාධුකං මනසි කරොහි, භාසිස්සාමී’ති.
‘එවං භන්තෙ’ති ඛො සිගාලො ගහපතිපුත්තො භගවතො පච්චස්සොසි.
භගවා එතදවොච:
“යතො ඛො ගහපතිපුත්ත, අරියසාවකස්ස චත්තාරො කම්මකිලෙසා පහීණා හොන්ති, චතූහි ඨානෙහි පාපකම්මං න කරොති, ඡ ච භොගානං අපායමුඛානි න සෙවති, සො එවං චුද්දසපාපකාපගතො, ඡද්දිසාපටිච්ඡාදී,{1} උභයලොකවිජයාය පටිපන්නො හොති, තස්ස අයං චෙව ලොකො ආරද්ධො හොති පරො ච ලොකො. සො කායස්ස භෙදා පරම්මරණා සුගතිං සග්ගං ලොකං උපපජ්ජති.
කම්මකිලෙසා
4. කතමස්ස චත්තාරො කම්මකිලෙසා පහීණා හොන්ති? පාණාතිපාතො ඛො ගහපතිපුත්ත කම්මකිලෙසො, අදින්නාදානං කම්මකිලෙසො, කාමෙසු මිච්ඡාචාරො කම්මකිලෙසො, මුසාවාදො කම්මකිලෙසො. ඉමස්ස චත්තාරො කම්මකිලෙසා පහීණා හොන්තී”ති. ඉදමවොච භගවා. ඉදං වත්වා{2} සුගතො, අථාපරං එතදවොච සත්ථා:
පාණාතිපාතං අදින්නාදානං මුසාවාදො ච වුච්චති පරදාරගමනඤ්චෙව නප්පසංසන්ති පණ්ඩිතා’ති.
අගතිගමනානි
5. කතමෙහි චතූහි ඨානෙහි පාපකම්මං කරොති? ඡන්දාගතිං ගච්ඡන්තො පාපකම්මං කරොති, දොසාගතිං ගච්ඡන්තො පාපකම්මං කරොති, මොහාගතිං ගච්ඡන්තො පාපකම්මං කරොති, භයාගතිං ගච්ඡන්තො පාපකම්මං කරොති. යතො ඛො ගහපතිපුත්ත අරියසාවකො නෙව ඡන්දාගතිං ගච්ඡති, න දොසාගතිං ගච්ඡති, න මොහාගතිං ගච්ඡති, න භයාගතිං ගච්ඡති, ඉමෙහි චතූහි ඨානෙහි පාපකම්මං න කරොතී’ති. ඉදමවොච භගවා ඉදං වත්වා සුගතො අථාපරං එතදවොච සත්ථා:
ඡන්දා දොසා භයා මොහා යො ධම්මං අතිවත්තති, නිහීයති තස්ස යසො{3}කාළපක්ඛෙ’ව චන්දිමා.
ඡන්දා දොසා භයා මොහා යො ධම්මං නාතිවත්තති, ආපූරති තස්ස යසො{1} සුක්කපක්ඛෙ ව{2} චන්දිමා’ති.
ඡ අපායමුඛානි
6. කතමානි ඡ භොගානං අපායමුඛානි න සෙවති? සුරාමෙරයමජ්ජපමාදට්ඨානානුයොගො ඛො ගහපතිපුත්ත භොගානං අපායමුඛං. විකාලවිසිඛාචරියානුයොගො භොගානං අපායමුඛං. සමජ්ජාභිචරණං භොගානං අපායමුඛං. ජූතප්පමාදට්ඨානානුයොගො භොගානං අපායමුඛං. පාපමිත්තානුයොගො භොගානං අපායමුඛං. ආලස්සානුයොගො භොගානං අපායමුඛං.
මජ්ජපානාදීනවා
ඡ ඛො’මෙ ගහපතිපුත්ත, ආදීනවා සුරාමෙරයමජ්ජපමාදට්ඨානානුයොගෙ: සන්දිට්ඨිකා ධනජානි, කලහප්පවඩ්ඪනී, රොගානං ආයතනං, අකිත්තිසඤ්ජනනී, කොපීනනිදංසනී පඤ්ඤාය දුබ්බලීකරණීත්වෙව ඡට්ඨං පදං භවති. ඉමෙ ඛො ගහපතිපුත්ත, ඡ ආදීනවා සුරාමෙරයමජ්ජපමාදට්ඨානානුයොගෙ.
විකාලචරියාදීනවා
ඡ ඛො’මෙ ගහපතිපුත්ත, ආදීනවා විකාලවිසිඛාචරියානුයොගෙ: අත්තාපි’ස්ස අගුත්තො අරක්ඛිතො හොති පුත්තදාරොපි’ස්ස අගුත්තො අරක්ඛිතො හොති, සාපතෙය්යම්පි’ස්ස අගුත්තං අරක්ඛිතං හොති, සඞ්කියො ච හොති පාපකෙසු ඨානෙසු, අභූතවචනං ච තස්මිං රූහති, බහූනඤ්ච දුක්ඛධම්මානං පුරක්ඛතො හොති. ඉමෙ ඛො ගහපතිපුත්ත, ඡ ආදීනවා විකාලවිසිඛාචරියානුයොගෙ.
සමජ්ජාභිචරණාදීනවා
ඡ ඛො’මෙ ගහපතිපුත්ත, ආදීනවා සමජ්ජාභිචරණෙ: ක්ව{3} නච්චං, ක්ව ගීතං, ක්ව වාදිතං, ක්ව අක්ඛානං, ක්ව පාණිස්සරං, ක්ව කුම්භථූණන්ති? ඉමෙ ඛො ගහපතිපුත්ත, ඡ ආදීනවා සමජ්ජාභිචරණෙ.
ජූතප්පමාදාදීනවා
ඡ ඛො’මෙ ගහපතිපුත්ත, ආදීනවා ජූතප්පමාදට්ඨානානුයොගෙ: ජයං වෙරං පසවති, ජිතො විත්තමනුසොචති, සන්දිට්ඨිකා ධනජානි, සභාගතස්ස{1} වචනං න රූහති, මිත්තාමච්චානං පරිභූතො හොති, ආවාහවිවාහකානං අපත්ථිතො හොති, අක්ඛධුත්තො අයං පුරිසපුග්ගලො නාලං දාරභරණායා’ති. ඉමෙ ඛො ගහපතිපුත්ත, ඡ ආදීනවා ජූතප්පමාදට්ඨානානුයොගෙ.
පාපමිත්තානුයොගාදීනවා
ඡ ඛො’මෙ ගහපතිපුත්ත, ආදීනවා පාපමිත්තානුයොගෙ: යෙ ධුත්තා, යෙ සොණ්ඩා, යෙ පිපාසා, යෙ නෙකතිකා, යෙ වඤ්චනිකා, යෙ සාහසිකා. ත්යාස්ස මිත්තා හොන්ති, තෙ සහායා. ඉමෙ ඛො ගහපතිපුත්ත, ඡ ආදීනවා පාපමිත්තානුයොගෙ.
ආලස්සාදීනවා
ඡ ඛො’මෙ ගහපතිපුත්ත, ආදීනවා ආලස්සානුයොගෙ: අතිසීතන්ති කම්මං න කරොති, අතිඋණ්හන්ති කම්මං න කරොති, අතිසායන්ති කම්මං න කරොති, අතිපාතො’ති කම්මං න කරොති, අතිජාතො’ස්මීති කම්මං න කරොති, අතිධාතො’ස්මීති කම්මං න කරොති. තස්ස එවං කිච්චාපදෙසබහුලස්ස විහරතො අනුප්පන්නා චෙව භොගා නුප්පජ්ජන්ති, උප්පන්නා ච භොගා පරික්ඛයං ගච්ඡන්ති. ඉමෙ ඛො ගහපතිපුත්ත, ඡ ආදීනවා ආලස්සානුයොගෙ”ති.
ඉදමවොච භගවා, ඉදං වත්වා සුගතො අථාපරං එතදවොච සත්ථා:
7. “හොති පානසඛා නාම හොති සම්මියසම්මියො යො ච අත්ථෙසු ජාතෙසු සහායො හොති සො සඛා. (1)
උස්සූරසෙය්යා පරදාරසෙවනා වෙරප්පසඞ්ගො{1} ච අනත්ථතා ච පාපා ච මිත්තා සුකදරියතා ච එතෙ ඡ ඨානා පුරිසං ධංසයන්ති. (2)
පාපමිත්තො පාපසඛො පාපආචාරගොචරො අස්මා ලොකා පරම්හා ච උභයා ධංසතෙ නරො. (3)
අක්ඛිත්ථියො වාරුණී නච්චගීතං දිවාසොප්පං පාරිචරියා අකාලෙ පාපා ච මිත්තා සුකදරියතා ච එතෙ ඡ ඨානා පුරිසං ධංසයන්ති. (4)
අක්ඛෙහි දිබ්බන්ති සුරං පිවන්ති යන්තිත්ථියො පාණසමා පරෙසං නිහීනසෙවී න ච වුද්ධසෙවි{2} නිහීයරෙ කාළපක්ඛෙ’ව චන්දො. (5)
යො වාරුණී අධනො අකිඤ්චනො පිපාසො පිවං පාපං ගතො{3} උදකමිව ඉණං විගාහති අකුලං{4} කාහිති ඛිප්පමත්තනො. (6)
න දිවාසොප්පසීලෙන රත්තිමුට්ඨානදෙස්සිනා{5}, නිච්චං මත්තෙන සොණ්ඩෙන සක්කා ආවසිතුං ඝරං. (7)
අතිසීතං අතිඋණ්හං අතිසායමිදං අහු, ඉති විස්සට්ඨකම්මන්තෙ අත්ථා අච්චෙන්ති මාණවෙ. (8)
යො’ධ සීතඤ්ච උණ්හඤ්ච තිණා භිය්යො න මඤ්ඤති කරං පුරිසකිච්චානි සො සුඛා{6} න විහායතී”ති. (9)
මිත්තපතිරූපකා
8. චත්තාරො’ මෙ ගහපතිපුත්ත, අමිත්තා මිත්තපතිරූපකා{1} වෙදිතබ්බා. අඤ්ඤදත්ථුහරො අමිත්තො මිත්තපතිරූපකො වෙදිතබ්බො, වචීපරමො අමිත්තො මිත්තපතිරූපකො වෙදිතබ්බො, අනුප්පියභාණී අමිත්තො මිත්තපතිරූපකො වෙදිතබ්බො, අපායසහායො අමිත්තො මිත්තපතිරූපකො වෙදිතබ්බො.
චතූහි ඛො ගහපතිපුත්ත, ඨානෙහි අඤ්ඤදත්ථුහරො අමිත්තො මිත්තපතිරූපකො වෙදිතබ්බො.
අඤ්ඤදත්ථුහරො හොති අප්පෙන බහුමිච්ඡති, භයස්ස කිච්චං කරොති සෙවති අත්ථකාරණා.
ඉමෙහි ඛො ගහපතිපුත්ත, චතූහි ඨානෙහි අඤ්ඤදත්ථුහරො අමිත්තො මිත්තපතිරූපකො වෙදිතබ්බො.
චතූහි ඛො ගහපතිපුත්ත, ඨානෙහි වචීපරමො අමිත්තො මිත්තපතිරූපකො වෙදිතබ්බො. අතීතෙන පටිසන්ථරති{2} අනාගතෙන පටිසන්ථරතිං, නිරත්ථකෙන සඞ්ගණ්හාති, පච්චුප්පන්නෙසු කිච්චෙසු බ්යසනං දස්සෙති. ඉමෙහි ඛො ගහපතිපුත්ත, චතූහි ඨානෙහි වචීපරමො අමිත්තො මිත්තපතිරූපකො වෙදිතබ්බො.
චතූහි ඛො ගහපතිපුත්ත, ඨානෙහි අනුප්පියභාණී අමිත්තො මිත්තපතිරූපකො වෙදිතබ්බො. පාපකම්පි’ස්ස{3} අනුජානාති, කල්යාණම්පි’ස්ස අනුජානාති, සම්මුඛා’ස්ස වණ්ණං භාසති, පරම්මුඛා’ස්ස අවණ්ණං භාසති. ඉමෙහි ඛො ගහපතිපුත්ත, චතූහි ඨානෙහි අනුප්පියභාණී අමිත්තො මිත්තපතිරූපකො වෙදිතබ්බො.
චතූහි ඛො ගහපතිපුත්ත, ඨානෙහි අපායසහායො අමිත්තො මිත්තපතිරූපකො වෙදිතබ්බො: සුරාමෙරයමජ්ජපමාදට්ඨානානුයොගෙ සහායො හොති, විකාලවිසිඛාචරියානුයොගෙ සහායො හොති, සමජ්ජාභිචරණෙ සහායො හොති, ජූතප්පමාදට්ඨානානුයොගෙ සහායො හොති. ඉමෙහි ඛො ගහපතිපුත්ත, චතූහි ඨානෙහි අපායසහායො අමිත්තො මිත්තපතිරූපකො වෙදිතබ්බො’ති.
ඉදමවොච භගවා, ඉදං වත්වා සුගතො අථාපරං එතදවොච සත්ථා:
“අඤ්ඤදත්ථුහරො මිත්තො යො ච මිත්තො වචීපරො,{1} අනුප්පියඤ්ච යො ආහ අපායෙසු ච යො සඛා. එතෙ අමිත්තෙ චත්තාරො ඉති විඤ්ඤාය පණ්ඩිතො, ආරකා පරිවජ්ජෙය්ය මග්ගං පටිභයං යථා”ති.
සුහදමිත්තා
9. චත්තාරො’ මෙ ගහපතිපුත්ත, මිත්තා සුහදා වෙදිතබ්බා: උපකාරො{2} මිත්තො සුහදො වෙදිතබ්බො, සමානසුඛදුක්ඛො මිත්තො සුහදො වෙදිතබ්බො, අත්ථක්ඛායී මිත්තො සුහදො වෙදිතබ්බො, ආනුකම්පකො මිත්තො සුහදො වෙදිතබ්බො.
චතූහි ඛො ගහපතිපුත්ත, ඨානෙහි උපකාරො මිත්තො සුහදො වෙදිතබ්බො. පමත්තං රක්ඛති, පමත්තස්ස සාපතෙය්යං රක්ඛති, භීතස්ස සරණං හොති, උප්පන්නෙ කිච්චකරණීයෙ තද්දිගුණං භොගං අනුප්පදෙති. ඉමෙහි ඛො ගහපතිපුත්ත, චතූහි ඨානෙහි උපකාරො මිත්තො සුහදො වෙදිතබ්බො.
චතූහි ඛො ගහපතිපුත්ත, ඨානෙහි සමානසුඛදුක්ඛො මිත්තො සුහදො වෙදිතබ්බො: ගුය්හමස්ස ආචික්ඛති, ගුය්හමස්ස පරිගූහති, ආපදාසු න විජහති, ජීවිතම්පි’ස්ස අත්ථාය පරිච්චත්තං හොති. ඉමෙහි ඛො ගහපතිපුත්ත, චතූහි ඨානෙහි සමානසුඛදුක්ඛො මිත්තො සුහදො වෙදිතබ්බො.
චතූහි ඛො පන ගහපතිපුත්ත, ඨානෙහි අත්ථක්ඛායී මිත්තො සුහදො වෙදිතබ්බො: පාපා නිවාරෙති, කල්යාණෙ නිවෙසෙති, අස්සුතං සාවෙති, සග්ගස්ස මග්ගං ආචික්ඛති. ඉමෙහි ඛො ගහපතිපුත්ත, චතූහි ඨානෙහි අත්ථක්ඛායී මිත්තො සුහදො වෙදිතබ්බො.
චතූහි ඛො පන ගහපතිපුත්ත, ඨානෙහි අනුකම්පකො මිත්තො සුහදො වෙදිතබ්බො: අභවෙනස්ස න නන්දති, භවෙනස්ස නන්දති, අවණ්ණං භණමානං නිවාරෙති, වණ්ණං භණමානං පසංසති. ඉමෙහි ඛො ගහපතිපුත්ත, චතූහි ඨානෙහි අනුකම්පකො මිත්තො සුහදො වෙදිතබ්බො”ති.
ඉදමවොච භගවා, ඉදං වත්වා සුගතො, අථාපරං එතදවොච සත්ථා:
10. “උපකාරො ච යො මිත්තො යො ච මිත්තො සුඛෙ දුඛෙ{1} අත්ථක්ඛායී ච යො මිත්තො යො ච මිත්තො’නුකම්පකො.
එතෙ පි මිත්තෙ චත්තාරො ඉති විඤ්ඤාය පණ්ඩිතො සක්කච්චං පයිරුපාසෙය්ය මාතා පුත්තං’ව ඔරසං.
පණ්ඩිතො සීලසම්පන්නො ජලං අග්ගී ව භාසති භොගෙ සංහරමානස්ස භමරස්සෙව ඉරීයතො භොගා සන්නිචයං යන්ති වම්මිකො’වුපචීයති.
එවං භොගෙ සමාහත්වා{2} අලමත්තො කුලෙ ගිහී චතුධා විභජෙ භොගෙ ස වෙ මිත්තානි ගන්ථති.
එකෙන භොගෙ භුඤ්ජෙය්ය ද්වීහි කම්මං පයොජයෙ චතුත්ථඤ්ච නිධාපෙය්ය ආපදාසු භවිස්සතී”ති.
ඡද්දිසාපටිච්ඡාදනං
11. කථඤ්ච ගහපතිපුත්ත, අරියසාවකො ඡද්දිසාපටිච්ඡාදී හොති? ඡයිමා ගහපතිපුත්ත, දිසා වෙදිතබ්බා: පුරත්ථිමා දිසා මාතාපිතරො වෙදිතබ්බා දක්ඛිණා දිසා ආචරියා වෙදිතබ්බා. පච්ඡිමා දිසා පුත්තදාරා වෙදිතබ්බා. උත්තරා දිසා මිත්තාමච්චා වෙදිතබ්බා. හෙට්ඨිමා දිසා දාසකම්මකරා වෙදිතබ්බා. උපරිමා දිසා සමණබ්රාහ්මණා වෙදිතබ්බා.
පඤ්චහි ඛො ගහපතිපුත්ත, ඨානෙහි පුත්තෙන පුරත්ථිමා දිසා මාතාපිතරො පච්චුපට්ඨාතබ්බා: භතො නෙ සම්භරිස්සාමි{1}, කිච්චං නෙසං කරිස්සාමි, කුලවංසං ඨපෙස්සාමි, දායජ්ජං පටිපච්ඡාමි{2}, අථ වා පන පෙතානං කාලකතානං දක්ඛිණං අනුප්පදස්සාමී”ති. ඉමෙහි ඛො ගහපතිපුත්ත, පඤ්චහි ඨානෙහි පුත්තෙන පුරත්ථිමා දිසා මාතාපිතරො පච්චුපට්ඨිතා පඤ්චහි ඨානෙහි පුත්තං අනුකම්පන්ති: පාපා නිවාරෙන්ති, කල්යාණෙ නිවෙසෙන්ති, සිප්පං සික්ඛාපෙන්ති, පතිරූපෙන දාරෙන සංයොජෙන්ති, සමයෙ දායජ්ජං නිය්යාතෙන්ති{3}. ඉමෙහි ඛො ගහපතිපුත්ත, පඤ්චහි ඨානෙහි පුත්තෙන පුරත්ථිමා දිසා මාතාපිතරො පච්චුපට්ඨිතා ඉමෙහි පඤ්චහි ඨානෙහි පුත්තං අනුකම්පන්ති. එවමස්ස එසා පුරත්ථිමා දිසා පටිච්ඡන්නා හොති ඛෙමා අප්පටිභයා.
12. පඤ්චහි ඛො ගහපතිපුත්ත, ඨානෙහි අන්තෙවාසිනා දක්ඛිණා දිසා ආචරියා පච්චුපට්ඨාතබ්බා: උට්ඨානෙන, උපට්ඨානෙන, සුස්සුසාය, පාරිචරියාය, සක්කච්චං සිප්පපටිග්ගහණෙන{4}.
ඉමෙහි ඛො ගහපතිපුත්ත, පඤ්චහි ඨානෙහි අන්තෙවාසිනා දක්ඛිණා දිසා ආචරියා පච්චුපට්ඨිතා, පඤ්චහි ඨානෙහි අන්තෙවාසිං අනුකම්පන්ති: සුවිනීතං විනෙන්ති, සුග්ගහිතං ගාහාපෙන්ති, සබ්බසිප්පසුතං සමක්ඛායිනො භවන්ති, මිත්තාමච්චෙසු පටියාදෙන්ති{5}, දිසාසු පරිත්තානං කරොන්ති. ඉමෙහි ඛො ගහපතිපුත්ත, පඤ්චහි ඨානෙහි අන්තෙවාසිනා දක්ඛිණා දිසා ආචරියා පච්චුපට්ඨිතා, ඉමෙහි පඤ්චහි ඨානෙහි අන්තෙවාසිං අනුකම්පන්ති. එවමස්ස එසා දක්ඛිණා දිසා පටිච්ඡන්නා හොති ඛෙමා අප්පටිභයා.
13. පඤ්චහි ඛො ගහපතිපුත්ත, ඨානෙහි සාමිකෙන පච්ඡිමා දිසා භරියා පච්චුපට්ඨාතබ්බා: සම්මානනාය, අනවමානනාය,{1} අනතිචරියාය, ඉස්සරියවොස්සග්ගෙන, අලඞ්කාරානුප්පදානෙන. ඉමෙහි ඛො ගහපතිපුත්ත, පඤ්චහි ඨානෙහි සාමිකෙන පච්ඡිමා දිසා භරියා පච්චුපට්ඨිතා, පඤ්චහි ඨානෙහි සාමිකං අනුකම්පති: සුසංවිහිතකම්මන්තා ච හොති, සුසංගහිතපරිජනා ච{2}, අනතිචාරිනී ච, සම්භතං අනුරක්ඛති, දක්ඛා ච හොති, අනලසා සබ්බකිච්චෙසු. ඉමෙහි ඛො ගහපතිපුත්ත, පඤ්චහි ඨානෙහි සාමිකෙන පච්ඡිමා දිසා භරියා පච්චුපට්ඨිතා ඉමෙහි පඤ්චහි ඨානෙහි සාමිකං අනුකම්පති. එවමස්ස එසා පච්ඡිමා දිසා පටිච්ඡන්නා හොති ඛෙමා අප්පටිභයා.
14. පඤ්චහි ඛො ගහපතිපුත්ත, ඨානෙහි කුලපුත්තෙන උත්තරා දිසා මිත්තාමච්චා පච්චුපට්ඨාතබ්බා: දානෙන, පෙය්යවජ්ජෙන{3}, අත්ථචරියාය සමානත්තතාය, අවිසංවාදනතාය. ඉමෙහි ඛො ගහපතිපුත්ත, පඤ්චහි ඨානෙහි කුලපුත්තෙන උත්තරා දිසා මිත්තාමච්චා පච්චුපට්ඨිතා පඤ්චහි ඨානෙහි කුලපුත්තං අනුකම්පන්ති: පමත්තං රක්ඛන්ති, පමත්තස්ස සාපතෙය්යං රක්ඛන්ති, භීතස්ස සරණං හොන්ති, ආපදාසු න විජහන්ති, අපරපජා චස්ස පටිපූජෙන්ති. ඉමෙහි ඛො ගහපතිපුත්ත, පඤ්චහි ඨානෙහි කුලපුත්තෙන උත්තරා දිසා මිත්තාමච්චා පච්චුපට්ඨිතා ඉමෙහි පඤ්චහි ඨානෙහි කුලපුත්තං අනුකම්පන්ති. එවමස්ස එසා උත්තරා දිසා පටිච්ඡන්නා හොති ඛෙමා අප්පටිභයා.
15. පඤ්චහි ඛො ගහපතිපුත්ත, ඨානෙහි අයිරකෙන{1} හෙට්ඨිමා දිසා දාසකම්මකරා පච්චුපට්ඨාතබ්බා: යථාබලං කම්මන්තසංවිධානෙන, භත්තවෙතනානුප්පදානෙන, ගිලානුපට්ඨානෙන, අච්ඡරියානං රසානං සංවිභාගෙන, සමයෙ වොස්සග්ගෙන. ඉමෙහි ඛො ගහපතිපුත්ත, පඤ්චහි ඨානෙහි අයිරකෙන හෙට්ඨිමා දිසා දාසකම්මකරා පච්චුපට්ඨිතා පඤ්චහි ඨානෙහි අයිරකං අනුකම්පන්ති. පුබ්බුට්ඨායිනො ච හොන්ති, පච්ඡානිපාතිනො ච දින්නාදායිනො ච, සුකතකම්මකරා ච, කිත්තිවණ්ණහරා ච. ඉමෙහි ඛො ගහපතිපුත්ත, පඤ්චහි ඨානෙහි අයිරකෙන හෙට්ඨිමා දිසා දාසකම්මකරා පච්චුපට්ඨිතා ඉමෙහි පඤ්චහි ඨානෙහි අයිරකං අනුකම්පන්ති. එවමස්ස එසා හෙට්ඨිමා දිසා පටිච්ඡන්නා හොති ඛෙමා අප්පටිභයා.
16. පඤ්චහි ඛො ගහපතිපුත්ත, ඨානෙහි කුලපුත්තෙන උපරිමා දිසා සමණබ්රාහ්මණා පච්චුපට්ඨාතබ්බා: මෙත්තෙන කායකම්මෙන මෙත්තෙන වචීකම්මෙන, මෙත්තෙන මනොකම්මෙන, අනාවටද්වාරතාය, ආමිසානුප්පදානෙන. ඉමෙහි ඛො ගහපතිපුත්ත, පඤ්චහි ඨානෙහි කුලපුත්තෙන උපරිමා දිසා සමණබ්රාහ්මණා පච්චුපට්ඨිතා ඡහි ඨානෙහි කුලපුත්තං අනුකම්පන්ති. පාපා නිවාරෙන්ති, කල්යාණෙ නිවෙසෙන්ති, කල්යාණෙන මනසා අනුකම්පන්ති, අස්සුතං සාවෙන්ති, සුතං පරියොදපෙන්ති, සග්ගස්ස මග්ගං ආචික්ඛන්ති. ඉමෙහි ඛො ගහපතිපුත්ත, ඡහි ඨානෙහි කුලපුත්තෙන උපරිමා දිසා සමණබ්රාහ්මණා පච්චුපට්ඨිතා ඉමෙහි ඡහි ඨානෙහි කුලපුත්තං අනුකම්පන්ති. එවමස්ස එසා උපරිමා දිසා පටිච්ඡන්නා හොති ඛෙමා අප්පටිභයා”ති.
ඉදමවොච භගවා. ඉදං වත්වා සුගතො අථාපරං එතදවොච සත්ථා:
17. “මාතාපිතා දිසා පුබ්බා ආචරියා දක්ඛිණා දිසා පුත්තදාරා දිසා පච්ඡා මිත්තාමච්චා ච උත්තරා.
දාසකම්මකරා හෙට්ඨා උද්ධං සමණබ්රාහ්මණා එතා දිසා නමස්සෙය්ය අලමත්තො කුලෙ ගිහී.
පණ්ඩිතො සීලසම්පන්නො සණ්හො ච පටිභානවා, නිවාතවුත්ති අත්ථද්ධො තාදිසො ලභතෙ යසං.
උට්ඨානකො අනලසො ආපදාසු න වෙධති, අච්ඡින්නවුත්ති මෙධාවී තාදිසො ලභතෙ යසං.
සඞ්ගාහකො මිත්තකරො වදඤ්ඤූ වීතමච්ඡරො, නෙතා විනෙතා අනුනෙතා තාදිසො ලභතෙ යසං.
දානඤ්ච පෙය්යවජ්ජඤ්ච අත්ථචරියා ච යා ඉධ, සමානත්තතා ච ධම්මෙසු තත්ථ තත්ථ යථාරහං,
එතෙ ඛො සඞ්ගහා ලොකෙ රථස්සාණී’ව යායතො, එතෙ ච සඞ්ගහා නාස්සු න මාතා පුත්තකාරණා, ලභෙථ මානං පූජං වා පිතා වා පුත්තකාරණා.
යස්මා ච සඞ්ගහෙ එතෙ සමවෙක්ඛන්ති{1} පණ්ඩිතා, තස්මා මහත්තං පප්පොන්ති පාසංසා ච භවන්ති තෙ”ති.
18. එවං වුත්තෙ සිගාලකො{2} ගහපතිපුත්තො භගවන්තං එතදවොච: අභික්කන්තං භන්තෙ, අභික්කන්තං භන්තෙ. සෙය්යථාපි භන්තෙ නික්කුජ්ජිතං වා උක්කුජ්ජෙය්ය, පටිච්ඡන්නං වා විවරෙය්ය, මූළ්හස්ස වා මග්ගං ආචික්ඛෙය්ය, අන්ධකාරෙ වා තෙලපජ්ජොතං ධාරෙය්ය චක්ඛුමන්තො රූපානි දක්ඛන්තීති. එවමෙව භගවතා අනෙකපරියායෙන ධම්මො පකාසිතො. එසාහං භන්තෙ භගවන්තං සරණං ගච්ඡාමි, ධම්මඤ්ච භික්ඛුසංඝඤ්ච. උපාසකං මං භගවා ධාරෙතු අජ්ජතග්ගෙ පාණුපෙතං සරණං ගතන්ති.
සිගාලසුත්තං නිට්ඨිතං අට්ඨමං.
9.
ආටානාටියසුත්තං
1. එවං මෙ සුතං:
එකං සමයං භගවා රාජගහෙ විහරති ගිජ්ඣකූටෙ පබ්බතෙ. අථ ඛො චත්තාරො මහාරාජා මහතියා ච යක්ඛසෙනාය මහතියා ච ගන්ධබ්බසෙනාය මහතියා ච කුම්භණ්ඩසෙනාය මහතියා ච නාගසෙනාය, චතුද්දිසං රක්ඛං ඨපෙත්වා, චතුද්දිසං ගුම්බං ඨපෙත්වා, චතුද්දිසං ඔවරණං ඨපෙත්වා, අභික්කන්තාය රත්තියා අභික්කන්තවණ්ණා කෙවලකප්පං ගිජ්ඣකූටං{1} ඔභාසෙත්වා, යෙන භගවා තෙනුපසඞ්කමිංසු. උපසඞ්කමිත්වා භගවන්තං අභිවාදෙත්වා එකමන්තං නිසීදිංසු. තෙ පි ඛො යක්ඛා අප්පෙකච්චෙ භගවන්තං අභිවාදෙත්වා එකමන්තං නිසීදිංසු. අප්පෙකච්චෙ භගවතා සද්ධිං සම්මොදිංසු, සම්මොදනීයං කථං සාරාණීයං වීතිසාරෙත්වා එකමන්තං නිසීදිංසු. අප්පෙකච්චෙ යෙන භගවා තෙනඤ්ජලිං පණාමෙත්වා එකමන්තං නිසීදිංසු. අප්පෙකච්චෙ නාමගොත්තං සාවෙත්වා එකමන්තං නිසීදිංසු. අප්පෙකච්චෙ තුණ්හීභූතා එකමන්තං නිසීදිංසු.
2. එකමන්තං නිසින්නො ඛො වෙස්සවණො මහාරාජා භගවන්තං එතදවොච:
“සන්ති හි භන්තෙ, උළාරා යක්ඛා භගවතො අප්පසන්නා. සන්ති හි භන්තෙ, උළාරා යක්ඛා භගවතො පසන්නා. සන්ති හි භන්තෙ, මජ්ඣිමා යක්ඛා භගවතො අප්පසන්නා. සන්ති හි භන්තෙ, මජ්ඣිමා යක්ඛා භගවතො පසන්නා. සන්ති හි භන්තෙ, නීචා යක්ඛා භගවතො අප්පසන්නා. සන්ති හි භන්තෙ, නීචා යක්ඛා භගවතො පසන්නා.
යෙභුය්යෙන ඛො පන භන්තෙ, යක්ඛා අප්පසන්නා යෙව භගවතො. තං කිස්ස හෙතු: භගවා හි භන්තෙ, පාණාතිපාතා වෙරමණියා ධම්මං දෙසෙති, අදින්නාදානා වෙරමණියා ධම්මං දෙසෙති, කාමෙසු මිච්ඡාචාරා වෙරමණියා ධම්මං දෙසෙති, මුසාවාදා වෙරමණියා ධම්මං දෙසෙති, සුරාමෙරයමජ්ජප්පමාදට්ඨානා වෙරමණියා ධම්මං දෙසෙති. යෙභුය්යෙන ඛො පන භන්තෙ, යක්ඛා අප්පටිවිරතා යෙව පාණාතිපාතා, අප්පටිවිරතා අදින්නාදානා, අප්පටිවිරතා කාමෙසු මිච්ඡාචාරා, අප්පටිවිරතා මුසාවාදා, අප්පටිවිරතා සුරාමෙරයමජ්ජප්පමාදට්ඨානා. තෙසන්තං හොති අප්පියං අමනාපං. සන්ති හි භන්තෙ භගවතො සාවකා, අරඤ්ඤෙ වනපත්ථානි{1} පන්තානි සෙනාසනානි පටිසෙවන්ති අප්පසද්දානි අප්පනිග්ඝොසානි විජනවාතානි මනුස්සරාහසෙය්යකානි{2} පටිසල්ලානසාරුප්පානි. තත්ථ සන්ති උළාරා යක්ඛා නිවාසිනො යෙ ඉමස්මිං භගවතො පාවචනෙ අප්පසන්නා. තෙසං පසාදාය උග්ගණ්හාතු භන්තෙ භගවා ආටානාටියං රක්ඛං භික්ඛූනං භික්ඛුනීනං උපාසකානං උපාසිකානං ගුත්තියා රක්ඛාය අවිහිංසාය ඵාසුවිහාරායා”ති.
3. අධිවාසෙසි භගවා තුණ්හීභාවෙන. අථ ඛො වෙස්සවණො මහාරාජා භගවතො අධිවාසනං විදිත්වා තායං වෙලායං ඉමං ආටානාටියං රක්ඛං අභාසි:
4. “විපස්සිස්ස{3} නමත්ථු චක්ඛුමන්තස්ස සිරීමතො. සිඛිස්ස පි{4} නමත්ථු සබ්බභූතානුකම්පිනො.