පුථූ සීහා’ව සල්ලීනා ලොමහංසාභිසම්භුනො, ඔදාතමනසා සුද්ධා විප්පසන්නා මනාවිලා.{5}
භිය්යො පඤ්චසතෙ ඤත්වා වනෙ කාපිලවත්ථවෙ, තතො ආමන්තයී සත්ථා සාවකෙ සාසනෙ රතෙ.
දෙවකායා අභික්කන්තා තෙ විජානාථ භික්ඛවො. තෙ ච ආතප්පමකරුං සුත්වා බුද්ධස්ස සාසනං.
තෙසං පාතුරහු ඤාණං අමනුස්සානදස්සනං, අප්පෙකෙ සතමද්දක්ඛුං සහස්සං අථ සත්තරිං.
සතං එකෙ සහස්සානං අමනුස්සානමද්දසුං, අප්පෙකෙ’නන්තමද්දක්ඛුං දිසා සබ්බා ඵුටා අහු.{1}
5. තඤ්ච සබ්බං අභිඤ්ඤාය වවත්ථිත්වාන{2} චක්ඛුමා, තතො ආමන්තයී සත්ථා සාවකෙ සාසනෙ රතෙ.
“දෙවකායා අභික්කන්තා තෙ විජානාථ භික්ඛවො, යෙ වො’හං කිත්තයිස්සාමි ගිරාහි අනුපුබ්බසො.
සත්තසහස්සා තෙ යක්ඛා භුම්මා කාපිලවත්ථවා, ඉද්ධිමන්තො ජුතිමන්තො වණ්ණවන්තො යසස්සිනො. මොදමානා අභික්කාමුං භික්ඛූනං සමිතිං වනං,
ඡ සහස්සා හෙමවතා යක්ඛා නානත්තවණ්ණිනො. ඉද්ධිමන්තො ජුතිමන්තො වණ්ණවන්තො යසස්සිනො, මොදමානා අභික්කාමුං භික්ඛූනං සමිතිං වනං.
6. සාතාගිරා තිසහස්සා යක්ඛා නානත්තවණ්ණිනො ඉද්ධිමන්තො ජුතිමන්තො වණ්ණවන්තො යසස්සිනො, මොදමානා අභික්කාමුං භික්ඛූනං සමිතිං වනං
ඉච්චෙතෙ සොළසසහස්සා යක්ඛා නානත්තවණ්ණිනො ඉද්ධිමන්තො ජුතිමන්තො වණ්ණවන්තො යසස්සිනො, මොදමානා අභික්කාමුං භික්ඛූනං සමිතිං වනං.
වෙස්සාමිත්තා පඤ්චසතා යක්ඛා නානත්තවණ්ණිනො, ඉද්ධිමන්තො ජුතිමන්තො වණ්ණවන්තො යසස්සිනො, මොදමානා අභික්කාමුං භික්ඛූනං සමිතිං වනං
කුම්භීරො රාජගහිකො වෙපුල්ලස්ස නිවෙසනං{a} භිය්යො නං සතසහස්සං යක්ඛානං පයිරුපාසති කුම්භීරො රාජගහිකො සොපාග සමිතිං වනං.
7. පුරිමඤ්ච දිසං රාජා ධතරට්ඨො පසාසති.{b} ගන්ධබ්බානං ආධිපති මහාරාජා යසස්සි සො.
පුත්තාපි තස්ස බහවො ඉන්දනාමා මහබ්බලා ඉද්ධිමන්තො ජුතිමන්තො වණ්ණවන්තො යසස්සිනො, මොදමානා අභික්කාමුං භික්ඛූනං සමිතිං වනං.
දක්ඛිණඤ්ච දිසං රාජා විරූළ්හො තං පසාසති කුම්භණ්ඩානං අධිපති මහාරාජා යසස්සි සො.
පුත්තාපි තස්ස බහවො ඉන්දනාමා මහබ්බලා ඉද්ධිමන්තො ජුතිමන්තො වණ්ණවන්තො යසස්සිනො, මොදමානා අභික්කාමුං භික්ඛූනං සමිතිං වනං.
පච්ඡිමඤ්ච දිසං රාජා විරූපක්ඛො පසාසති නාගාණඤ්ච අධිපති මහාරාජා යසස්සි සො.
පුත්තාපි තස්ස බහවො ඉන්දනාමා මහබ්බලා ඉද්ධිමන්තො ජුතිමන්තො වණ්ණවන්තො යසස්සිනො, මොදමානා අභික්කාමුං භික්ඛූනං සමිතිං වනං.
උත්තරඤ්ච දිසං රාජා කුවෙරො තං පසාසති යක්ඛානඤ්ච අධිපති මහාරාජා යසස්සිසො.
පුත්තාපි තස්ස බහවො ඉන්දනාමා මහබ්බලා ඉද්ධිමන්තො ජුතිමන්තො වණ්ණවන්තො යසස්සිනො, මොදමානා අභික්කාමුං භික්ඛූනං සමිතිං වනං.
8. පුරිමං දිසං ධතරට්ඨො දක්ඛිණෙන විරූළ්හකො පච්ඡිමෙන විරූපක්ඛො කුවෙරො උත්තරං දිසං. චත්තාරො තෙ මහාරාජා සමන්තා චතුරො දිසා දදල්ලමානා අට්ඨංසු වනෙ කාපිලවත්ථවෙ.
9. තෙසං මායාවිනො දාසා ආගුං වඤ්චනිකා සඨා මායා කුටෙණ්ඩු වෙටෙණ්ඩු විටුච්ච විටුඩො සහ
චන්දනො කාමසෙට්ඨා ච කින්නිඝණ්ඩු නිඝණ්ඩු ච, පනාදො ඔපමඤ්ඤො ච දෙවසූතො ච මාතලි. චිත්තසෙනො ච ගන්ධබ්බො නළො රාජා ජනෙසභො{1}
ආගුං පඤ්චසිඛො චෙව තිම්බරු සුරියවච්චසා එතෙ චඤ්ඤෙ ච රාජානො ගන්ධබ්බා සහ රාජූහි, මොදමානා අභික්කාමුං භික්ඛූනං සමිතිං වනං.
අථාගුං{1} නාභසා නාගා වෙසාලා සහ තච්ඡකා කම්බලස්සතරා ආගුං{2} පායාගා සහ ඤාතිහි.
යාමුනා ධතරට්ඨො ච ආගුං{3} නාගා යසස්සිනො එරාවණො මහානාගො සොපාග සමිතිං වනං
10. යෙ නාගරාජෙ සහසා හරන්ති දිබ්බා දිජා පක්ඛි විසුද්ධචක්ඛූ, වෙහාසයා{4} තෙ වනමජ්ඣපත්තා චිත්රා සුපණ්ණා ඉති තෙසං නාමානි{5}.
අභයං තදා නාගරාජානමාසි සුපණ්ණතො ඛෙමමකාසි බුද්ධො, සණ්හාහි වාචාහි උපව්හයන්තා නාගා සුපණ්ණා සරණමගංසු{6} බුද්ධං.
11. ජිතා වජිරහත්ථෙන සමුද්දං අසුරා සිතා භාතරො වාසවස්සෙතෙ ඉද්ධිමන්තො යසස්සිනො.
කාලකඤ්ඡා මහාභිස්මා{7} අසුරා දානවෙඝසා වෙපචිත්ති සුචිත්තී ච පහාරාදො නමුචි සහ.
සතඤ්ච බලිපුත්තානං සබ්බෙ වෙරොචනාමකා සන්නය්හිත්වා බලිං සෙනං{8} රාහුභද්දමුපාගමුං, ‘සමයො’ දානි භද්දන්තෙ භික්ඛූනං සමිතිං වනං’.
12. ආපො ච දෙවා පඨවී ච තෙජො වායො තදාගමුං වරුණා වාරුණා{9} දෙවා සොමො ච යසසා සහ. මෙත්තාකරුණාකායිකා ආගුං දෙවා යසස්සිනො
දසෙතෙ දසධා කායා සබ්බෙ නානත්තවණ්ණිනො. ඉද්ධිමන්තො ජුතිමන්තො වණ්ණවන්තො යසස්සිනො මොදමානා අභික්කාමුං භික්ඛූනං සමිතිං වනං.
13. වෙණ්හූ ව දෙවා{10} සහලී ච අස්මා ච දුවෙ යමා චන්දස්සූපනිසා දෙවා චන්දමාගුං පුරක්ඛත්වා.
සුරියස්සූපනිසා{1} දෙවා සුරියමාගුං{2} පුරක්ඛිත්වා නක්ඛත්තානි පුරක්ඛත්වා ආගුං මන්දවලාහකා වසූනං වාසවො සෙට්ඨො සක්කොපාග{3} පුරින්දදො
දසෙතෙ දසධා කායා සබ්බෙ නානත්තවණ්ණිනො ඉද්ධිමන්තො ජුතිමන්තො වණ්ණවන්තො යසස්සිනො මොදමානා අභික්කාමුං භික්ඛූනං සමිතිං වනං.
14. අථාගුං සහභූ දෙවා ජලමග්ගි සිඛාරිව අරිට්ඨකා ච රොජො ච උම්මාපුප්ඵනිභාසිනො.
වරුණා සහ ධම්මා ච අච්චුතා ච අනෙජකා සූලෙය්ය රුචිරා ආගුං ආගුං වාසවනෙසිනො,
දසෙතෙ දසධා කායා සබ්බෙ නානත්තවණ්ණිනො ඉද්ධිමන්තො ජුතිමන්තො වණ්ණවන්තො යසස්සිනො, මොදමානා අභික්කාමුං භික්ඛූනං සමිතිං වනං.
15. සමානා මහාසමානා{4} මානුසා මානුසුත්තමා ඛිඩ්ඩාපදූසිකා ආගුං ආගුං මනොපදූසිකා.
අථාගුං හරයො දෙවා යෙ ච ලොහිතවාසිනො පාරගා මහාපාරගා ආගුං දෙවා යසස්සිනො.
දසෙතෙ දසධා කායා සබ්බෙ නානත්තවණ්ණිනො. ඉද්ධිමන්තො ජුතිමන්තො වණ්ණවන්තො යසස්සිනො මොදමානා අභික්කාමුං භික්ඛූනං සමිතිං වනං.
16. සුක්කා කරම්හා{5} අරුණා ආගුං වෙඛනසා{6} සහ ඔදාතගය්හා පාමොක්ඛා ආගුං දෙවා විචක්ඛණා.
සදාමත්තා හාරගජා මිස්සකා ච යසස්සිනො ථනයං ආග පජ්ජන්නො{7} යො දිසා අභිවස්සති.
දසෙතෙ දසධා කායා සබ්බෙ නානත්තවණ්ණිනො ඉද්ධිමන්තො ජුතිමන්තො වණ්ණවන්තො යසස්සිනො මොදමානා අභික්කාමුං භික්ඛූනං සමිතිං වනං.
17. ඛෙමියා තුසිතා යාමා කට්ඨකා ච යසස්සිනො ලම්බීතකා ලාමසෙට්ඨා ජොතිනාමා ච ආසවා, නිම්මාණරතිනො ආගුං අථාගුං පරනිම්මිතා.
දසෙතෙ දසධා කායා සබ්බෙ නානත්තවණ්ණිනො ඉද්ධිමන්තො ජුතිමන්තො වණ්ණවන්තො යසස්සිනො මොදමානා අභික්කාමුං භික්ඛූනං සමිතිං වනං.
18. සට්ඨෙතෙ දෙවනිකායා සබ්බෙ නානත්තවණ්ණිනො, නාමන්වයෙන ආගඤ්ඡුං{1} යෙ චඤ්ඤෙ සදිසා සහ.
පවුත්ථජාතිමඛිලං{2} ඔඝතිණ්ණමනාසවං, දක්ඛෙමොඝතරං නාගං චන්දංව අසිතාතිගං
සුබ්රහ්මා පරමත්තො{3} ච පුත්තා ඉද්ධිමතො සහ, සනඞ්කුමාරො තිස්සො ච සොපාග සමිතිං වනං.
සහස්සං බ්රහ්මලොකානං මහාබ්රහ්මාභිතිට්ඨති, උපපන්නො ජුතිමන්තො භිස්මාකායො යසස්සි සො.
දසෙත්ථ ඉස්සරා ආගුං පච්චෙකවසවත්තිනො, තෙසඤ්ච මජ්ඣතො ආග හාරිතො පරිවාරිතො.
19. තෙ ච සබ්බෙ අභික්කන්තෙ සඉන්දෙ{4} දෙවෙ සබ්රහ්මකෙ, මාරසෙනා අභික්කාමුං{5} පස්ස කණ්හස්ස මන්දියං
‘එථ ගණ්හථ බන්ධථ රාගෙන බන්ධමත්ථු වො, සමන්තා පරිවාරෙථ මා වො මුඤ්චිත්ථ කොචි නං’.
ඉති තත්ථ මහාසෙනො කණ්හසෙනං අපෙසයි, පාණිනා ථලමාහච්ච සරං කත්වාන භෙරවං.
20. යථා පාවුස්සකො මෙඝො ථනයන්තො සවිජ්ජුකො. තදා සො පච්චුදාවත්ති සඞ්කුද්ධො අසයංවසී.
තඤ්ච සබ්බං අභිඤ්ඤාය වවත්ථිත්වාන චක්ඛුමා තතො ආමන්තයී සත්ථා සාවකෙ සාසනෙ රතෙ මාරසෙනා අභික්කන්තා තෙ විජානාථ භික්ඛවො.
තෙච ආතප්පමකරුං සුත්වා බුද්ධස්ස සාසනං වීතරාගෙහපක්කාමුං නෙසං ලොමම්පි ඉඤ්ජයුං
සබ්බෙ විජිතසඞ්ගාමා භයාතීතා යසස්සිනො මොදන්ති සහ භූතෙහි සාවකා තෙ ජනෙසුතා”ති.
මහාසමයසුත්තං සමත්තං.
8.
සක්කපඤ්හසුත්තං
එවං මෙ සුතං එකං සමයං භගවා මගධෙසු විහරති, පාචීනතො රාජගහස්ස අම්බසණ්ඩා නාම බ්රාහ්මණගාමො, තස්සුත්තරතො වෙදියකෙ පබ්බතෙ ඉන්දසාලගුහායං. තෙන ඛො පන සමයෙන සක්කස්ස දෙවානමින්දස්ස උස්සුක්කං උදපාදි භගවන්තං දස්සනාය. අථ ඛො සක්කස්ස දෙවානමින්දස්ස එතදහොසි: කහං නු ඛො භගවා එතරහි විහරති අරහං සම්මාසම්බුද්ධොති. අද්දසා ඛො සක්කො දෙවානමින්දො භගවන්තං මගධෙසු විහරන්තං, පාචීනතො රාජගහස්ස අම්බසණ්ඩා නාම බ්රාහ්මණගාමො, තස්සුත්තරතො වෙදියකෙ පබ්බතෙ ඉන්දසාලගුහායං. දිස්වාන දෙවෙ තාවතිංසෙ ආමන්තෙසි: අයං මාරිසා භගවා මගධෙසු විහරති පාචීනතො රාජගහස්ස අම්බසණ්ඩා නාම බ්රාහ්මණගාමො තස්සුත්තරතො වෙදියකෙ පබ්බතෙ ඉන්දසාලගුහායං. යදි පන මාරිසා මයං තං භගවන්තං දස්සනාය උපසඞ්කමෙය්යාම අරහන්තං සම්මාසම්බුද්ධන්ති. එවං භද්දන්තවාති ඛො දෙවා තාවතිංසා සක්කස්ස දෙවානමින්දස්ස පච්චස්සොසුං.
2. අථ ඛො සක්කො දෙවානමින්දො පඤ්චසිඛං ගන්ධබ්බදෙවපුත්තං{1} ආමන්තෙසි: අයංතාත පඤ්චසිඛ භගවා මගධෙසු විහරති, පාචීනතො රාජගහස්ස අම්බසණ්ඩා නාම බ්රාහ්මණගාමො, තස්සුත්තරතො වෙදියකෙ පබ්බතෙ ඉන්දසාලගුහායං. යදි පන තාත පඤ්චසිඛ මයං තං භගවන්තං දස්සනාය උපසඞ්කමෙය්යාම අරහන්තං සම්මාසම්බුද්ධන්ති”. “එවං භද්දන්තවා’ති ඛො පඤ්චසිඛො ගන්ධබ්බදෙවපුත්තො සක්කස්ස දෙවානමින්දස්ස පටිස්සුත්වා බෙලුවපණ්ඩුං වීණං ආදාය සක්කස්ස දෙවානමින්දස්ස දනුචරියං උපාගමි. අථ ඛො සක්කො දෙවානමින්දො දෙවෙහි තාවතිංසෙහි පරිවුතො පඤ්චසිඛෙන ගන්ධබ්බදෙවපුත්තෙන පුරක්ඛතො. සෙය්යථාපි නාම බලවා පුරිසො සමිඤ්ජිතං වා බාහං පසාරෙය්ය පසාරිතං වා බාහං සමිඤ්ජෙය්ය, එවමෙව දෙවෙසු තාවතිංසෙසු අන්තරහිතො මගධෙසු පාචීනතො රාජගහස්ස අම්බසණ්ඩා නාම බ්රාහ්මණගාමො, තස්සුත්තරතො වෙදියකෙ පබ්බතෙ පච්චුට්ඨාසි.
3. තෙන ඛො පන සමයෙන වෙදියකො පබ්බතො අතිරිව ඔභාසජාතො හොති අම්බසණ්ඩා ච බ්රාහ්මණගාමො, යථා තං දෙවානං දෙවානුභාවෙන. අපිස්සුදං පරිතො ගාමෙසු මනුස්සා එවමාහංසු: ආදිත්තස්සු නාමජ්ජ වෙදියකො පබ්බතො ඣායතිස්සු{1} නාමජ්ජ වෙදියකො පබ්බතො, ජලතිස්සු{2} නාමජ්ජ වෙදියකො පබ්බතො, කිංසු නාමජ්ජ වෙදියකො පබ්බතො අතිරිව ඔභාසජාතො අම්බසණ්ඩා ච බ්රාහ්මණගාමො”ති සංවිග්ගා ලොමහට්ඨජාතා අහෙසුං.
අථ ඛො සක්කො දෙවානමින්දො පඤ්චසිඛං ගන්ධබ්බදෙවපුත්තං ආමන්තෙසි: දුරුපසඞ්කමා ඛො තාත පඤ්චසිඛ තථාගතා මාදිසෙන, ඣායී ඣානරතා, තදන්තරපටිසල්ලීනා{3}. යදි පන ත්වං තාත පඤ්චසිඛ භගවන්තං පඨමං පසාදෙය්යාසි, තයා තාත පඨමං පසාදිතං පච්ඡා මයං තං භගවන්තං දස්සනාය උපසඞ්කමෙය්යාම අරහන්තං සම්මාසම්බුද්ධන්ති.” “එවං භද්දන්තවා”ති ඛො පඤ්චසිඛො ගන්ධබ්බදෙවපුත්තො සක්කස්ස දෙවානමින්දස්ස පටිස්සුත්වා බෙලුවපණ්ඩුවීණං{4} ආදාය යෙන ඉන්දසාලගුහා තෙනුපසඞ්කමි. උපසඞ්කමිත්වා එත්තාවතා මෙ භගවා නෙව අතිදූරෙ භවිස්සති න අච්චාසනෙන සද්දඤ්ච මෙ සොස්සතී’ති එකමන්තං අට්ඨාසි එකමන්තං ඨිතො ඛො පඤ්චසිඛො ගන්ධබ්බදෙව පුත්තො බෙලුවපණ්ඩුවීණං අස්සාවෙසි. ඉමා ච ගාථා අභාසි බුද්ධුපසංහිතා ධම්මුපසංහිතා සඞ්ඝුපසංහිතා අරහන්තුපසංහිතා කාමූපසංහිතා:
4. වන්දෙ තෙ පිතරං භද්දෙ තිම්බරුං සුරියවච්චසෙ, යෙන ජාතා’සි කල්යාණී ආනන්දජනනී මම.
වාතො’ව සෙදතං{5} කන්තො පානීයං’ව පිපාසතො, අඞ්ගීරසී පියාමෙ’සි ධම්මො අරහතාමිව.
ආතුරස්සෙව භෙසජ්ජං, භොජනං’ව ජිඝච්ඡතො, පරිනිබ්බාපය මං භද්දෙ ජලන්තමිව වාරිනා.
සීතොදකං{1} පොක්ඛරණිං යුත්ත{2} කිඤ්ජක්ඛරෙණුනා, නාගො ඝම්මාභිතත්තොව ඔගාහෙ තෙ ථනූදරං.
අච්චඞ්කුසොව නාගො’ව ජිතම්මෙ තුත්තතොමරං, කාරණං නප්පජානාමි සම්මත්තො ලක්ඛණූරුයා.
තයි ගෙධිතචිත්තො’ස්මි චිත්තං විපරිණාමිතං, පටිගන්තුං න සක්කොමි වඞ්කඝස්තො’ව අම්බුජො.
වාමූරු සජ මං භද්දෙ සජ මං මන්දලොචනෙ, පලිස්සජ මං කල්යාණි එතම්මෙ අභිපත්ථිතං.
අප්පකො වත මෙ සන්තො කාමො වෙල්ලිතකෙසියා, අනෙකභාවො{3} සමපාදි{4} අරහන්තෙ’ව දක්ඛිණා.
යම්මෙ අත්ථි කතං පුඤ්ඤං අරහන්තෙසු තාදිසු, තම්මෙ සබ්බඞ්ගකල්යාණි තයා සද්ධිං විපච්චතං.
යම්මෙ අත්ථි කතං පුඤ්ඤං අස්මිං පඨවිමණ්ඩලෙ; තම්මෙ සබ්බඞ්ගකල්යාණි තයා සද්ධිං විපච්චතං.
සක්යපුත්තො’ව ඣානෙන එකොදි නිපකො සතො, අමතං මුනි ජිගිංසානො තමහං සුරියවච්චසෙ.
යථාපි මුනි නන්දෙය්ය පත්වා සම්බොධිමුත්තමං එවං නන්දෙය්යං කල්යාණි මිස්සීභාවඞ්ගතො තයා.
සක්කො චෙ මෙ වරං දජ්ජා තාවතිංසානමිස්සරො,{a} තාහං භද්දෙ වරෙය්යාහෙ එවං කාමො දළ්හො මම.
සාලං’ව න චිරං ඵුල්ලං පිතරං තෙ සුමෙධසෙ, වන්දමානො නමස්සා’මි, යස්සාසෙතාදිසී පජා ති.
5. එවං වුත්තෙ භගවා පඤ්චසිඛං ගන්ධබ්බදෙවපුත්තං එතදවොච: ‘සංසන්දති ඛො තෙ පඤ්චසිඛ තන්තිස්සරො ගීතස්සරෙන ගීතස්සරො ච තන්තිස්සරෙන. න ච පන තෙ පඤ්චසිඛ, තන්තිස්සරො ගීතස්සරං අතිවත්තති. ගීතස්සරො ච තන්තිස්සරං. කදා සංයූළ්හා පන තෙ පඤ්චසිඛ, ඉමා ගාථා බුද්ධුපසංහිතා ධම්මුපසංහිතා සඞ්ඝුපසංහිතා අර්හන්තුපසංහිතා කාමූපසංහිතා’ති.
එකමිදාහං භන්තෙ, සමයං භගවා උරුවෙලායං විහරති නජ්ජා නෙරඤ්ජරාය තීරෙ අජපාලනිග්රොධමූලෙ පඨමාභිසම්බුද්ධො. තෙන ඛො පනාහං භන්තෙ, සමයෙන භද්දානාම සුරියවච්චසා තිම්බරුනො ගන්ධබ්බරඤ්ඤො ධීතා තමභිකඞ්ඛාමි, සා ඛො පන භන්තෙ, භගිනී පරකාමිනී හොති. සිඛණ්ඩී නාම මාතලිස්ස සඞ්ගාහකස්ස පුත්තො තමභිකඞ්ඛති. යතො ඛො අහං භන්තෙ, තං භගිනිං නාලත්ථං කෙනචි පරියායෙන, අථාහං බෙලුවපණ්ඩුවීණං ආදාය යෙන තිම්බරුනො ගන්ධබ්බරඤ්ඤො නිවෙසනං තෙනුපසඞ්කමිං. උපසඞ්කමිත්වා බෙලුවපණ්ඩුවීණං අස්සාවෙසිං, ඉමා ච ගාථායො අභාසිං බුද්ධුපසංහිතා ධම්මුපසංහිතා සඞ්ඝුපසංහිතා අරහන්තුපසංහිතා කාමූපසංහිතා.
වන්දෙ තෙ පිතරං භද්දෙ තිම්බරුං සුරියවට්ටසෙ, යෙන ජාතාසි කල්යාණී ආනන්දජනනී මම. -පෙ-
සාලංව න චිරං ඵුල්ලං පිතරං තෙ සුමෙධසෙ, වන්දමානො නමස්සාමි යස්සා සෙතාදිසී පජාති.
6. එවං වුත්තෙ භන්තෙ, භද්දා සුරියවච්චසා මං එතදවොච: න ඛො මෙ මාරිස සො භගවා සම්මුඛා දිට්ඨො. අපි ච සුතො යෙව මෙ සො භගවා දෙවානං තාවතිංසානං සුධම්මායං සභායං උපනච්චන්තියා, යතො ඛො ත්වං මාරිස තං භගවන්තං කිත්තෙසි හොතු නො අජ්ජ සමාගමොති. ‘සො යෙව නො භන්තෙ, තස්සා භගිනියා සද්ධිං සමාගමො අහොසි, න ච දානි තතො පච්ඡා”ති.
අථ ඛො සක්කස්ස දෙවානමින්දස්ස එතදහොසි: පටිසම්මොදති ඛො පඤ්චසිඛො ගන්ධබ්බදෙවපුත්තො භගවතා, භගවා ච පඤ්චසිඛෙනා”ති.
7. අථ ඛො සක්කො දෙවානමින්දො පඤ්චසිඛං ගන්ධබ්බදෙවපුත්තං ආමන්තෙසි: අභිවාදෙහි මෙත්ථං තාත පඤ්චසිඛ භගවන්තං: සක්කො භන්තෙ දෙවානමින්දො සාමච්චො සපරිජනො භගවතො පාදෙ සිරසා වන්දතී’ති:
‘එවං භද්දන්තවා’ති ඛො පඤ්චසිඛො ගන්ධබ්බදෙවපුත්තො සක්කස්ස දෙවානමින්දස්ස පටිස්සුත්වා භගවන්තං අභිවාදෙසි: ‘සක්කො භන්තෙ, දෙවානමින්දො සාමච්චො සපරිජනො භගවතො පාදෙ සිරසා වන්දතී’ති.
‘එවං සුඛී හොතු පඤ්චසිඛ සක්කො දෙවානමින්දො සාමච්චො සපරිජනො, සුඛකාමා හි දෙවා මනුස්සා අසුරා නාගා ගන්ධබ්බා, යෙ චඤ්ඤෙ සන්ති පුථුකායා’ති.
එවඤ්ච පන තථාගතා එවරූපෙ මහෙසක්ඛෙ යක්ඛෙ අභිවදන්ති.
8. අභිවදිතො සක්කො දෙවානමින්දො භගවතො ඉන්දසාලගුහං පවිසිත්වා භගවන්තං අභිවාදෙත්වා එකමන්තං අට්ඨාසි. දෙවා පි තාවතිංසා ඉන්දසාලගුහං පවිසිත්වා භගවන්තං අභිවාදෙත්වා එකමන්තං අට්ඨංසු. පඤ්චසිඛොපි ගන්ධබ්බදෙවපුත්තො ඉන්දසාලගුහං පවිසිත්වා භගවන්තං අභිවාදෙත්වා එකමන්තං අට්ඨාසි.
තෙන ඛො පන සමයෙන ඉන්දසාලගුහා විසමා සන්තී සමා සමපාදි, සම්බාධා සන්තී උරුන්දා සමපාදි. අන්ධකාරො ගුහායං අන්තරධායි, ආලොකො උදපාදි යථා තං දෙවානං දෙවානුභාවෙන.
අථ ඛො භගවා සක්කං දෙවානමින්දං එතදවොච: ‘අච්ඡරියමිදං ආයස්මතො කොසියස්ස අබ්භුතමිදආයස්මතො කොසියස්ස තාව බහුකිච්චස්ස බහුකරණීයස්ස යදිදං ඉධාං ගමනන්ති.’
චිරප්පතිකාහං භන්තෙ භගවන්තං දස්සනාය උපසඞ්කමිතුකාමො. අපි ච දෙවානං තාවතිංසානං කෙහිචි කෙහිචි කිච්චකරණීයෙහි බ්යාවටො එවාහං නාසක්ඛිං භගවන්තං දස්සනාය උපසඞ්කමිතුං. එකමිදං භන්තෙ සමයං භගවා සාවත්ථියං විහරති සළලාගාරකෙ. අථඛ්වාහං භන්තෙ සාවත්ථිං අගමාසිං භගවන්තං දස්සනාය. තෙන ඛො පන භන්තෙ සමයෙන භගවා අඤ්ඤතරෙන සමාධිනා නිසින්නො හොති.
භුඤ්ජතී නාම වෙස්සවණස්ස මහාරාජස්ස පරිචාරිකා භගවන්තං පච්චුපට්ඨිතා හොති පඤ්ජලිකා නමස්සමානා අථඛ්වාහං භන්තෙ භුඤ්ජතිං එතදවොචං: “අභිවාදෙහි මෙ ත්වං භගිනි භගවන්තං, සක්කො භන්තෙ දෙවානමින්දො සාමච්චො සපරිජනො භගවතො පාදෙ සිරසා වන්දතී”ති. එවං වුත්තෙ භන්තෙ සා භුඤ්ජති මං එතදවොච: ‘අකාලො ඛො මාරිස භගවන්තං දස්සනාය, පටිසල්ලීනො භගවා’ති. “තෙන හි භගිනි යදා භගවා තම්හා සමාධිම්හා වුට්ඨිතො හොති අථ මම වචනෙන භගවන්තං අභිවාදෙහි. සක්කො භන්තෙ දෙවානමින්දො සාමච්චො සපරිජනො භගවතො පාදෙ සිරසා වන්දතී”ති.
“කච්චි මෙ සා භන්තෙ භගිනී භගවන්තං අභිවාදෙසි, සරති භගවා තස්සා භගිනියා වචනන්තී?” “අභිවාදෙසි මං සා දෙවානමින්ද භගිනී, සරාමහං තස්සා භගිනියා වචනං. අපි චාහං ආයස්මතො ච නෙමිසද්දෙන තම්හා සමාධිම්හා වුට්ඨිතො”ති.
“යෙ තෙ භන්තෙ, දෙවා අම්හෙහි පඨමතරං තාවතිංසකායං උපපන්නා, තෙසං මෙ සම්මුඛා සුතං සම්මුඛා පටිග්ගහිතං: “යදා තථාගතා ලොකෙ උප්පජ්ජන්ති අරහන්තො සම්මාසම්බුද්ධා, දිබ්බා කායා පරිපූරන්ති හායන්ති අසුරකායා’ති, තං මෙ ඉදං භන්තෙ, සක්ඛිදිට්ඨං යතො තථාගතො ලොකෙ උප්පන්නො අරහං සම්මාසම්බුද්ධො, දිබ්බා කායා පරිපූරන්ති, හායන්ති අසුරකායා ති. ඉධෙව භන්තෙ, කපිලවත්ථුස්මිං ගොපිකා නාම සක්යධීතා අහොසි බුද්ධෙ පසන්නා ධම්මෙ පසන්නා සඞ්ඝෙ පසන්නා සීලෙසු පරිපූරකාරිනී. සා ඉත්ථිත්තං විරාජෙත්වා පුරිසත්තං භාවෙත්වා කායස්ස භෙදා පරම්මරණා සුගතිං සග්ගං ලොකං උපපන්නා දෙවානං තාවතිංසානං සහබ්යතං අම්හාකං පුත්තත්තං අජ්ඣුපගතා. තත්රපි නං එවං ජානන්ති ‘ගොපකො දෙවපුත්තො ගොපකො දෙවපුත්තො’ති.
9. අඤ්ඤෙ පි භන්තෙ, තයො භික්ඛූ භගවති බ්රහ්මචරියං චරිත්වා හීනං ගන්ධබ්බකායං උපපන්නා. තෙ පඤ්චහි කාමගුණෙහි සමප්පිතා සමඞ්ගිභූතා පරිචාරයමානා අම්හාකං උපට්ඨානමාගච්ඡන්ති අම්හාකං පාරිචරියං. තෙ අම්හාකං උපට්ඨානමාගතෙ අම්හාකං පාරිචරියං ගොපකො නාම දෙවපුත්තො පටිචොදෙසි: “කුතොමුඛා නාම තුම්හෙ මාරිසා තස්ස භගවතො ධම්මං අස්සුත්ථා අහං හි නාම ඉත්ථිකා සමාන බුද්ධෙ පසන්නා ධම්මෙ පසන්නා සඞ්ඝෙ පසන්නා සීලෙසු පරිපූරකාරිනී ඉත්ථිත්තං විරාජෙත්වා පුරිසත්තං භාවෙත්වා කායස්ස භෙදා පරම්මරණා සුගතිං සග්ගං ලොකං උපපන්නා දෙවානං තාවතිංසානං සහබ්යතං සක්කස්ස දෙවානමින්දස්ස පුත්තත්තං අජ්ඣුපගතා.
ඉධාපි මං එවං ජානන්ති ගොපකො දෙවපුත්තො ගොපකො දෙවපුත්තොති. තුම්හෙ පන මාරිසා භගවති බ්රහ්මචරියං චරිත්වා හීනං ගන්ධබ්බකායං උපපන්නා. දුද්දිට්ඨරූපං වත භො අද්දසාම යෙ මයං අද්දසාම සහධම්මිකෙ හීනං ගන්ධබ්බකායං උපපන්නෙ’ති”. තෙසං භන්තෙ ගොපකෙන දෙවපුත්තෙන පටිචොදිතානං ද්වෙ දෙවා දිට්ඨෙව ධම්මෙ සතිං පටිලභිංසු කායං බ්රහ්මපුරොහිතං, එකො පන දෙවො කාමෙ අජ්ඣාවසි.