331. එවරූපං සච්චවරං කත්වා විරියමුත්තමං වස්සාපෙසිං මහා මෙඝං{5} සච්චතෙජ බලස්සිතො සච්චෙන මෙ සමො නත්ථි එසා මෙ සච්චපාරමීති.
මච්ඡරාජ චරියං දසමං.
11. කණ්හදීපායන චරියං
332. පුනාපරං යදා හොමි කණ්හදීපායනො ඉසී පරො පඤ්ඤාසවස්සානි අනභිරතො චරිං{6} අහං.
333. න කොචි එතං ජානාති අනභිරතිමනං මම අහං{7} කස්සචි නාචික්ඛිං අරති මෙ චරති{8} මානසෙ.
334. සබ්රහ්මචාරී මණ්ඩබ්යො{9} සහායො මෙ මහාඉසී පුබ්බකම්මසමායුත්තො සූලමාරොපණං ලභී.
335. තමහං උපට්ඨහිත්වාන ආරොග්ය මනුපාපයිං{1} ආපුච්ඡිත්වාන ආගඤ්ජිං{2} යං මය්හං සකමස්සමං.
336. සහායො බ්රාහ්මණො මය්හං භරියං{3} ආදාය පුත්තකං තයො ජනා සමාගන්ත්වා{4} ආගඤ්ඡුං පාහුනාගතං.
337. සම්මොදමානො තෙහි{5} සහ නිසින්නො සකමස්සමෙ දාරකො වට්ටමනුක්ඛිපං ආසිවිසමකොපයී.
338. තතො සො වට්ටගතං මග්ගං අන්වෙ{6} සන්තො කුමාරකො ආසිවිසස්ස හත්ථෙන උත්තමඞ්ගං පරාමසී.
339. තස්ස ආමසනෙ කුද්ධො සප්පො විස බලස්සිතො කුපිතො පරමකොපෙන අඩංසි{7} දාරකං ඛණෙ.
340. සහ දට්ඨො ආසිවිසෙන{8} දාරකො පපති භූමියං තෙනාහං දුක්ඛිතො ආසිං මම වාහසි තං දුක්ඛං.
341. ත්යාහං අස්සාස යිත්වාන දුක්ඛිතෙ සොකසල්ලිතෙ පඨමං ආකාසිං{9} තිරියං අග්ගං සච්චං වරුත්තමං.
342. සත්තාහමෙවාහං පසන්නචිත්තො පුඤ්ඤත්ථිකො අචරිං බ්රහ්මචරියං අථාපරං යඤ්චරිතං මමයිදං වස්සානි පඤ්ඤාස සමාධිකානි.{10}
343. අකාමකො වාහි{11} අහං චරාමි එතෙන සච්චෙන සුවත්ථි හොති හතං විසං ජීවතු යඤ්ඤදත්තො.
344. සහසච්චෙ කතෙ මය්හං විසවෙගෙන වෙධිතො අබුජ්ඣිත්වාන වුට්ඨාසි ආරොගො චාසි මාණවො සච්චෙන මෙ සමො නත්ථි එසා මෙ සච්චපාරමීති.
කණ්හදීපායන චරියං එකාදසමං.
12. සුතසොම චරියං
345. පුනාපරං යදා හොමි සුතසොමො මහීපතී ගහිතො පොරිසාදෙන බ්රාහ්මණො සඞ්ගරං{1} සරිං.
346. ඛත්තියානං එකසතං ආවුණිත්වා කරතලෙ{2} එතෙ සම්පමිලාපෙත්වා යඤ්ඤත්ථෙ උපනයී{3} මමං.
347. අපුච්ඡි{4} මං පොරිසාදො කින්ත්වං ඉච්ඡසි නිස්සජං{5} යථාමති තෙ කාහාමි යදි මෙ ත්වං පුනෙහිසි.
348. තස්ස පටිස්සුණිත්වාන{6} පණ්හෙ ආගමනං මම උපාගන්ත්වා පුරං රම්මං රජ්ජං නීයාදයිං තදා
349. අනුස්සරිත්වා සද්ධම්මං{7} පුබ්බකං ජිනසෙවිතං බ්රාහ්මණස්ස ධනං දත්වා පොරිසාදං උපාගමිං.
350. නත්ථි මෙ සංසයො තත්ථ ඝාතයිස්සති{8} වා නවා සච්චවාචානුරක්ඛන්තො ජීවිතං චජිතු මුපාගමිං සච්චෙන මෙ සමො නත්ථි එසා මෙ සච්ච පාරමීති.
සුතසොම චරියං ද්වාදසමං.
සච්ච පාරමිතා නිට්ඨිතා.
6. මෙත්තා පාරමිතා
13. සුවණ්ණසාම චරියං
351. සාමො යදා වනෙ ආසිං සක්කෙන අභිනිම්මිතො පවනෙ සීහබ්යග්ඝෙහිච මෙත්තාය මුපනාමයිං.
352. සීහබ්යග්ඝෙහි දීපීහි අච්ඡෙහි මහි{1}සෙහි ච පසදමිගවරාහෙහි පරිවාරෙත්වා වනෙ වසිං.
353. න මං කොචි උත්තසති, නපිහං භායාමි කස්සචි, මෙත්තාබලෙනුපතත්ථ’ද්ධො රමාමි පවනෙ තදාති.
සුවණ්ණ සාම චරියං තෙරසමං.
14. එකරාජ චරියං
354. පුනාපරං යදා හොමි එකරාජාති විස්සුතො පරමං සීලං අධිට්ඨාය{2} පසාසාමි මහාමහිං.
355. දසකුසලකම්මපථෙ වත්තාමි අනවසෙසතො චතූහි සඞ්ගහවත්ථූහි සඞ්ගණ්හාමි{3} මහාජනං.
356. එවං මෙ අප්පමත්තස්ස ඉධලොකෙ පරත්ථ ච දබ්බසෙනො උපාගන්ත්වා අච්ඡින්දන්තො පුරං මමං.{4}
357. රාජූපජීවෙ නිගමෙ සබලට්ඨෙ සරට්ඨකෙ{5} සබ්බං හත්ථගතං කත්වා කාසුයං නිඛණී මමං.
358. අමච්චමණ්ඩලං රජ්ජං ඵීතං අන්තෙපුරං මම අච්ඡින්දිත්වාන ගහිතං පියං පුත්තංව පස්සහං මෙත්තාය මෙ සමො නත්ථි එසා මෙ මෙත්තාපාරමීති.
එකරාජචරියං චුද්දසමං.
මෙත්තා පාරමිතා නිට්ඨිතා.
7. උපෙක්ඛා පාරමිතා
15. මහාලොමහංස චරියං
359. සුසානෙ සෙය්යං කප්පෙමි ජවට්ඨිකං උපනිධාය හං{1} ගොමණ්ඩලා{2} උපාගන්ත්වා{3} රූපං දස්සෙන්ති නප්පකං{4}
360. අපරෙ ගන්ධඤ්ච මාලඤ්ච{5} භොජනං විවිධං බහුං උපායනාන්යුපනෙන්ති හට්ඨා සංවිග්ගමානසා.
361. යෙ මෙ දුක්ඛං උපදහන්ති යෙ ච දෙන්ති සුඛං මම සබ්බෙසං සමකො හොමි දයාකොපො{6} නවිජ්ජති.
362. සුඛදුක්ඛතුලා භූතො යසෙසු අයසෙසුච සබ්බත්ථ සමකො හොමි එසා මෙ උපෙක්ඛා පාරමීති.
මහාලොමහංස චරියං පණ්ණරසමං.
උපෙක්ඛා පාරමිතා නිට්ඨිතා.
උද්දාන ගාථා:
363. යුධඤ්ජයො සොමනස්සො අයොඝර භිසෙනච සොණනන්දො{7} මූගපක්ඛො කපිරාජා{8} සච්චසව්හයො.
364. වට්ටකො මච්ඡරාජාච කණ්හදීපායනො ඉසි සුතසොමො පුන ආසිං සාමොච එකරාජහු උපෙක්ඛා පාරමී ආසි ඉති වුත්තං මහෙසිනා.
365. එවං බහුවිධං දුක්ඛං සම්පත්ති ච{9} බහුවිධා{10} භවා භවෙ අනුභවිත්වා පත්තො සම්බොධිමුත්තමං.
366. දත්වා දාතබ්බකං දානං සීලං පූරෙත්වා අසෙසතො නෙක්ඛම්මෙ{11} පාරමිං ගන්ත්වා පත්තො සම්බොධිමුත්තමං.
367. පණ්ඩිතෙ පරිපුච්ඡිත්වා විරියං කත්වාන මුත්තමං{1} ඛන්තියා පාරමිං ගන්ත්වා පත්තො සම්බොධි මුත්තමං.
368. කත්වා දළ්හමධිට්ඨානං සච්චවාචානුරක්ඛිය{2} මෙත්තාය පාරමිං ගන්ත්වා පත්තො සම්බොධිමුත්තමං.
369. ලාභාලාභෙ යස යසෙ සම්මානනාවමානනෙ සබ්බත්ථ සමකො හුත්වා පත්තො සම්බාධි මුත්තමං.
370. කොසජ්ජං භයතො දිස්වා විරියාරම්භඤ්ච ඛෙමතො ආරද්ධවිරියා හොථ එසා බුද්ධානුසාසනී{3}
371. විවාදං භයතො දිස්වා අවිවාදඤ්ච ඛෙමතො සමග්ගා සඛිලා හොථ එසා බුද්ධානුසාසනී{4}
යුධඤ්ජයවග්ගො තතියො.
ඉත්ථං සුදං භගවා අත්තනො පුබ්බචරියං සම්භාවයමානො බුද්ධාපදානියං නාම ධම්මපරියායං අභාසිත්ථාති.
චරියාපිටකපාළි සමත්තා{5}