171. යදි චිත්තවසී හෙස්සං පරිහායිස්සාමි සීලතො සීලෙන පරිහීණස්ස උත්තමත්ථො න සිජ්ඣති.
172. කාමං භිජ්ජතු යං කායො ඉධෙව විකිරීයතු නෙව සීලං පභින්දෙය්යං විකිරන්තෙ භුසං වියාති.
චම්පෙය්ය නාගචරියං තතියං.
4. චුල්ලබොධි චරියං
173. පුනාපරං යදා හොමි චුල්ලබොධි{6} සුසීලවා භවං දිස්වාන භයතො නෙක්ඛම්මං අභිනික්ඛමිං{7}
174. යාමෙ දුතියිකා ආසි බ්රාහ්මණී කනකසන්තිභා සාපි වට්ටෙ අනපෙක්ඛා නෙක්ඛම්මං අභිනික්ඛමී.
175. නිරාලයා ජින්න බන්ධු අනපෙක්ඛා කුලෙ ගණෙ චරන්තාගාමනිගමං බාරාණසි මුපාගමුං.
176. තත්ථ වසාම නිපකා අසංසට්ඨා කුලෙ ගණෙ නිරාකුලෙ අප්පසද්දෙ රාජුය්යානෙ වසාමුභො.
177. උය්යාන දස්සනං ගන්ත්වා රාජා අද්දස බ්රාහ්මණිං උපගම්ම මමං පුච්ඡි තුය්හෙසා කස්ස භාරියා{1}.
178. එවං වුත්තෙ අහං තස්ස ඉදං වචනමබ්රවිං න මය්හං භරියා එසා සහධම්මා{2} එකසාසනී
179. තස්සා{3}සාරත්තාධිගතො{4} ගාහාපෙත්වාන චෙටකෙ{5} නිප්පීළයන්තො බලසා අන්තෙපුරං පවෙසයී.
180. ඔදපත්තකියා{6} මය්හං සහජා එකසාසනී ආකඩ්ඪිත්වා නයන්තියා{7} කොපො මෙ උප්පජ්ජථ.
181. සහ කොපෙ සමුප්පන්නෙ සීලබ්බතමනුස්සරිං තත්ථෙව කොපං නිග්ගණ්හිං නාදාසිං වඩ්ඪිතූපරි{8}
182. යදිහං{9} බ්රාහ්මණිං කොචි කොට්ටෙය්ය තිණ්හසත්තියා නෙව සීලං පභින්දෙය්යං බොධියායෙව කාරණා
183. නමෙ සා බ්රාහ්මණී දෙස්සා න පි මෙ බලං න විජ්ජති සබ්බඤ්ඤුතං පියං මය්හං තස්මා සීලානුරක්ඛිස්සන්ති.
චුල්ලබොධිචරියං චතුත්ථං.
5. මහිසරාජ චරියං
184. පුනාපරං යදා හොමි මහිසො{10} පවනචාරිකො{11} පවඩ්ඪකායො බලවා මහන්තො භීම දස්සනො.
185. පබ්භාරෙ ගිරි දුග්ගෙ ච රුක්ඛමූලෙ දකාසයෙ හොතෙත්ථ ඨානං මහිසානං{12} කොචි කොචි තහිං තහිං.
186. විචරන්තො බ්රහාරඤ්ඤෙ ඨානං අද්දස භද්දකං තං ඨානං උපගන්ත්වාන තිට්ඨාමි ච සයාමි ච.
187. අථෙත්ථ කපිමාගන්ත්වා පාපො අනරියො ලහු ඛන්ධෙ නලාටෙ භමුකෙ මුත්තෙති ඔහණෙති මං.
188. සකිම්පි දිවසං දුතියං තතියං චතුත්ථම්පි ච දූසෙති මං සබ්බකාලං තෙන හොමි උපද්දුතො.
189. මමං උපද්දුතං දිස්වා යක්ඛො මං ඉදමබ්රවි නාසෙහෙතං{1} ඡවං පාපං සිඞ්ගෙහි ච ඛුරෙහි ච.
190. එවං වුත්තෙ තදා යක්ඛෙ අහං තං ඉදමබ්රවිං කිංත්වං මක්ඛෙසි කුණපෙන පාපෙන අනරියෙන මං{2}.
191. යදිහං තස්ස කුප්පෙය්යං තතො හීනතරො භවෙ සීලඤ්ච මෙ පභිජ්ජෙය්ය විඤ්ඤූ ච ගරහෙය්යු මං.
192. හීළිතා ජීවිතා චාපි පරිසුද්ධෙන මතං වරං ක්යාහං ජීවිතහෙතුපි කාහාමි පරහෙඨනං.
193. මමෙ වාය{3} මඤ්ඤමානො අඤ්ඤෙපෙවං කරිස්සති තෙව තත්ථ වධිස්සන්ති සා මෙ මුත්ති භවිස්සති.
194. හීනමජ්ඣිමඋක්කට්ඨෙ සහන්තො අවමානිතං එවං ලභති සප්පඤ්ඤො මනසා යථාපත්ථිතන්ති.
මහිස{4} රාජචරියං පඤ්චමං.
6. රුරුමිගරාජ චරියං
195. පුනාපරං යදා හොමි සුතත්ත කනකසන්නීභො මිගරාජා රූරුනාම පරමසීල සමාහිතො.
196. රම්මෙ පදෙසෙ රමණීයෙ විවිත්තෙ අමනුස්සකෙ තත්ථ වාසං උපගඤ්ඡිං ගංගාකූලෙ මනොරමෙ.
197. අථො උපරිගංගාය ධනිකෙහි පරිපීළිතො පුරිසො ගංගාය පපති{1} ජීවාමි වා මරාමි වා.
198. රත්තින්දිවං සො ගඞ්ගාය වුය්හමානො මහොදකෙ රවන්තො කරුණං රාවං{2} මජ්ඣෙ ගඞ්ගාය ගච්ඡති.
199. තස්සාහං සද්දං සුත්වාන කරුණං පරිදෙවතො ගඞ්ගාය තීරෙ ඨත්වාන අපුච්ඡිං කොසි ත්වං නරො.
200. සො මෙ පුට්ඨො ච ව්යාකාසි අත්තනො කාරණං තදා ධනිකෙහි භීතො තසිතො පක්ඛන්නොහං මහානදිං.
201. තස්ස කත්වාන කාරුඤ්ඤං චජිත්වා මම ජීවිතං පවිසිත්වා නීහරිං තස්ස අන්ධකාරම්හි රත්තියා.
202. අස්සත්ථ{3} කාලමඤ්ඤාය තස්සාහං ඉදමබ්රුවිං එකං තං වරං යාචාමි මා මං කස්සචි පාවද.
203. නගරං ගන්ත්වාන ආචික්ඛි පුච්ඡිතො ධන හෙතුකො රාජානං සො ගහෙත්වාන උපගඤ්ඡි මමන්තිකං.
204. යාවතා කාරණං සබ්බං රඤ්ඤො ආරොචිතං මයා රාජා සුත්වාන වචනං උසුං{4} තස්ස පකප්පයී ඉධෙව ඝාතයිස්සාමි මිත්ත දුබ්භිං{5} අනාරියං.
205. තමහං අනුරක්ඛන්තො නිම්මිනිං මම අත්තනො තිට්ඨතෙ සො මහාරාජ කාමඞ්කාරො{6} භවාමි තෙ.
206. අනුරක්ඛිං මම සීලං නාරක්ඛිං මම ජීවිතං සීලවා හි තදා ආසිං බොධියා එව කාරණාති.
රුරුරාජ චරියං ඡට්ඨමං.
7. මාතඞ්ග චරියං
207. පුනාපරං යදා හොමි ජටිලො උග්ගතාපනො මාතඞ්ගො නාම නාමෙන සීලවා සුපමාහිතො.
208. අහඤ්ච බ්රාහ්මණො එකො ගඞ්ගාකූලෙ වසාමුභො අහං වසාමි උපරි හෙට්ඨා වසති බ්රාහ්මණො.
209. විචරන්තො අනුකූලම්හි උද්ධං මෙ අස්සමද්දස තත්ථ මං පරිභාසෙත්වා{1} අභිසපි මුද්ධඵාලනං.
210. යදිහං තස්ස පකුප්පෙය්යං යදි සීලං න ගොපයෙ ඔලොකෙත්වාන ‘හං තස්ස කරෙය්යං ඡාරිකං විය.
211. යං සො තදා මං අභිසපි කුපිතො දුට්ඨමානසො තස්සෙව මත්ථකෙ නිපති යොගෙන තං පමොචයිං.
212. අනුරක්ඛිං මම සීලං නාරක්ඛිං මම ජීවිතං සීලවා හි තදා ආසිං බොධියා යෙව කාරණාති.
මාතඞ්ගචරියං සත්තමං.
8. ධම්මදෙවපුත්ත චරියං
213. පුනාපරං යදා හොමි මහෙසක්ඛො{2} මහිද්ධිකො ධම්මො නාම මහායක්ඛො සබ්බලොකානුකම්පකො.
214. දස කුසලකම්මපථෙ සමාදපෙන්තො මහාජනං චරාමි ගාමනිගමං සමිත්තො සපරිජ්ජනො.
215. පාපො කදරියො යක්ඛො දීපෙන්තො දස පාපකෙ සොපෙත්ථ{3} මහියා චරති සමිත්තො සපරිජ්ජනො.
216. ධම්මවාදී අධම්මො ච උභො පච්චනිකා මයං ධුරෙ ධුරං ඝට්ටයන්තා සමිම්හා පටිපථෙ උභො.
217. කලහො වත්තතී භෙස්මා කල්යාණපාපකස්ස ච මග්ගා ඔක්කමනත්ථාය{1} මහායුද්ධො උපට්ඨිතො.
218. යදිහං තස්ස පකුප්පෙය්යං යදි භින්දෙ තපොගුණං සහ පරිජනං තස්ස රජභූතං කරෙය්යහං.
219. අපිචා’හං සීලරක්ඛාය නිබ්බාපෙත්වාන මානසං සහ ජනෙනොක්කමිත්වා පථං පාපස්ස ‘දාසහං.
220. සහ පථතො ඔක්කන්තෙ කත්වා චිත්තස්ස නිබ්බුතිං විවරං අදාසි පඨවී පාපයක්ඛස්ස තාවදෙති.
ධම්ම{2}දෙවපුත්ත චරියං අට්ඨමං.
9. අලීනසත්ත චරියං
221. පඤ්චාලරට්ඨෙ නගරවරෙ{3} කම්පිල්ලායං{4} පුරුත්තමෙ රාජා ජයද්දිසො නාම සීලගුණමුපාගතො.
222. තස්ස රඤ්ඤො අහං පුත්තො සුතධම්මො සුසීලවා අලීනසත්තො ගුණවා අනුරත්තපරිජනො{5} සදා.
223. පිතා මෙ මිගවං ගන්ත්වා පොරිසාදං උපාගමි සො මෙ පිතුමග්ගහෙසි භක්ඛොසි මම මා චලි.
224. තස්ස තං වචනං සුත්වා භීතො තසිතවෙධිතො ඌරුක්ඛම්භො අහූ තස්ස දිස්වාන පොරිසාදකං.
225. මිගවං ගහෙත්වා මුඤ්චස්සු කත්වා ආගමනං පුන බ්රාහ්මණස්ස ධනං දත්වා පිතා ආමන්තයී මමං.
226. රජ්ජං පුත්ත, පටිපජ්ජ මා පමජ්ජී පුරං ඉදං කතං මෙ පොරිසාදෙන මම ආගමනං පුන.
227. මාතු පිතු ච වන්දිත්වා නිස්සජිත්වාන අත්තානං{1} නික්ඛිපිත්වා ධනුං{2} ඛග්ගං පොරිසාද මුපාගමිං.
228. සසත්ථහත්ථූපගතං කදාචි සො තසිස්සතී තෙන භිජ්ජිස්සතී සීලං පරිත්තාසං කතෙ{3} මයි.
229. සීල ඛණ්ඩභයා, මය්හං තස්ස දෙස්සං න බ්යාහරීං මෙත්තචිත්තො හිතවාදී ඉදං වචනමබ්රවිං.
230. උජ්ජාලෙහි මහාඅග්ගිං පපතිස්සාමි රුක්ඛතො සම්පක්ක කාලමඤ්ඤාය භක්ඛය ත්වං{4} පිතාමහ,
231. ඉති සීලවතං හෙතු නාරක්ඛිං මම ජීවිතං පබ්බාජෙසිං චහං{5} තස්ස සදා පාණාතිපාතිකන්ති.
අලීනසත්ත චරියං නවමං.
10. සඞ්ඛපාල චරියං
232. පුනාපරං යදා හොමි සඞ්ඛපාලො මහිද්ධිකො දාඨාවුධො ඝොරවිසො ද්විජිව්හො උරගාධිභූ{6}.
233. චතුප්පථෙ මහාමග්ගෙ නානා ජනසමාකුලෙ චතුරො අඞ්ගෙ අධිට්ඨාය තත්ථ වාසමකප්පයිං.
234. ඡවියා චම්මෙන මංසෙන නහාරු අට්ඨිකෙහි වා යස්ස එතෙන කරණීයං දින්නං යෙව හරාතු සො.
235. අද්දසංසු භොජපුත්තා ඛරා ලුද්දා අකාරුණා උපගඤ්ඡුං මමං තත්ථ දණ්ඩමුග්ගරපාණිනො.
236. නාසාය විනිවිජ්ඣිත්වා නඞ්ගුට්ඨෙ පිට්ඨිකණ්ටකෙ කාජෙ ආරොපයිත්වාන භොජපුත්තා හරිංසු මං.
237. සපාගරන්තං පඨවිං සකානනං සපබ්බතං ඉච්ඡමානො චහං{1} තත්ථ නාසාවාතෙන{2} ඣාපයෙ.
238. සූලෙහි විජ්ඣියන්තෙපි කොට්ටයන්තෙපි සත්තිහි භොජපූත්තෙ න කුප්පාමි එසා මෙ සීලපාරමීති.
සඞ්ඛපාල චරියං දසමං.
හත්ථි නාගො භූරිදත්තො චම්පෙය්යො බොධි මාහිසො රුරාමාතඞ්ගො ධම්මො ච අත්රජො ච ජයද්දිසො.
එතෙ සබ්බෙ සීලබලා පරික්ඛාරා පදෙසිකා ජීවිතං පරිරක්ඛීත්වා සීලානි අනුරක්ඛිස්සං.
සඞ්ඛපාලස්ස මෙ සතො සබ්බකාලම්පි ජීවිතං යස්ස කස්සචි නීයන්තං තස්මා සා සීලපාරමීති.
සීල පාරමීනිද්දෙසො නිට්ඨිතො.
3. නෙක්ඛම්ම පාරමිතා
1. යුධඤ්ජය චරියං
239. යදා අහං අමිතයසො රාජපුත්තො යුධඤ්ජයො උස්සාවබින්දුං සුරියාතපෙ පතිතං දිස්වාන සංවිජිං{1}.
240. තඤ්ඤෙවාධිපතිං කත්වා සංවෙගමනුබ්රූහයිං මාතාපිතු{2} ච වන්දිත්වා පබ්බජ්ජමනුයාචහං.
241. යාචන්තිමං පඤ්ජලිකා සනෙගමා සරට්ඨකා අජ්ජෙව පුත්ත පටිපජ්ජ ඉද්ධං ඵීතං මහාමහිං.
242. සරාජකෙ සහොරොධෙ සනෙගමෙ සරට්ඨකෙ කරුණං පරිදෙවන්තෙ අනෙපෙක්ඛො හි පබ්බජිං{3}.
243. කෙවලං පඨවිං රජ්ජං ඤාති පරිජන{4} යසං චජමානො න චින්තෙසිං බොධියායෙව කාරණා.
244. මාතා පිතා න මෙ දෙස්සා නපි{5} දෙස්සං මහායසං සබ්බඤ්ඤුතං පියං මය්හං තස්මා රජ්ජං පරිච්චජින්ති.
යුධඤ්ජය චරියං පඨමං.
2. සොමනස්ස චරියං
245. පුනාපරං යදා හොමි ඉන්දපත්තෙ පුරුත්තමෙ කාමිතො දයිතො පුත්තො සොමනස්සොති විස්සුතො.
246. සීලවා ගුණ සම්පන්නො කල්යාණපටිභාණවා වුද්ධාපචායී හිරිමා සඞ්ගහෙසු ච කොවිදො.
247. තස්ස රඤ්ඤො පතිකරො අහොසි කුහකතාපසො ආරාමං මාලාවච්ඡඤ්ච රොපයිත්වාන ජීවති