248. තමහං දිස්වාන කුහකං ථුසරාසිංව අතණ්ඩුලං{1} දුමං අන්තො ව සුසිරං කදලිංව අසාරකං.
249. නත්ථි’මස්ස සතං ධම්මො සාමඤ්ඤාපගතො අයං හිරි සුක්කධම්මජහිතො ජීවිතවුත්තිකාරණා.
250. කුපිතො අහොසි පච්චන්තො අටවීහි පරන්තිහි තං නිසෙධෙතුං ගච්ඡන්තො අනුසාසි පිතා මමං.
251. මා පමජ්ජි තුවං තාත ජටිලං උග්ගතාපනං යදිච්ඡකං පවත්තෙහි සබ්බකාමදදො හි සො.
252. තමහං ගන්ත්වානු’ පට්ඨානං ඉදං වචනමබ්රවිං කච්චිතෙ ගහපති කුසලං කිං වා තෙ ආහරීයතු.
253. තෙන සො කුපිතො ආසි කුහකො මානනිස්සිතො ඝාතාපෙමි තුවං අජ්ජ රට්ඨා පබ්බාජයාමි වා.
254. නිසෙධයිත්වා පච්චන්තං රාජා කුහකමබ්රවි කච්චි තෙ භන්තෙ ඛමනීයං සම්මානො තෙ පවත්තිතො තස්ස ආචික්ඛති පාපො කුමාරො යථා නාසියො.
255. තස්ස තං වචනං සුත්වා ආණාපෙසි මහීපති සීසං තත්ථෙව ඡින්දිත්වා කත්වාන චතුඛණ්ඩිකං රථියා රථියං දස්සෙථ සා ගතී ජටිලහීළිතො.{2}
256. තත්ථ කාරණිකා ගන්ත්වා චණ්ඩා ලුද්දා අකාරුණා මාතු අඞ්කෙ නිසින්නස්ස ආකඩ්ඪිත්වා නයන්ති මං.
257. තෙසාහං එවමවචං බන්ධතං ගාළ්හබන්ධනං “රඤ්ඤො දස්සෙථ මං ඛිප්පං රාජකිරියානි අත්ථිමෙ”.
258. තෙ මං රඤ්ඤො දස්සයිංසු පාපස්ස පාපසෙවිනො දිස්වාන තං සඤ්ඤපෙසිං{1} මමඤ්ච වසමානයිං.
259. සො මං තත්ථ ඛමාපෙසි මහාරජ්ජමදාසි මෙ සොහං තමං දාළයිත්වා පබ්බජිං අනගාරියං.
260. නමෙ දෙස්සං මහාරජ්ජං කාමභොගො න දෙස්සියො සබ්බඤ්ඤුතං පියං මය්හං තස්මා රජ්ජං පරිච්චජින්ති.
සොමනස්ස චරියං දුතියං.
3. අයොඝර චරියං
261. පුනාපරං යදා හොමි කාසිරාජස්ස අත්රජො අයොඝරම්හි සංවඩ්ඪො නාමෙනාසි අයොඝරො.
262. දුක්ඛෙන ජීවිතො ලද්ධො සම්පීළෙ පතිපොසිතො අජ්ජෙව පුත්ත පටිපජ්ජ කෙවලං වසුධං ඉමං.
263. සරට්ඨකං සනිගමං සජනං වන්දිත්වා ඛත්තියං අඤ්ජලිම්පග්ගහෙත්වාන ඉදං වචනමබ්රවිං.
264. යෙ කෙචි මහියා සත්තා හීනමුක්කට්ඨමජ්ඣිමා නිරාරක්ඛා සකෙ ගෙහෙ වඩ්ඪන්ති සහ ඤාතිහි.{2}
265. ඉදං ලොකෙ උත්තරියං සම්පීළෙ මම පොසනං අයොඝරම්හි සංවඩ්ඪො අප්පභෙ’චන්දසූරියෙ.
266. පූතිකුණපසම්පුණ්ණා{3} මුච්චිත්වා මාතු කුච්ඡිතො තතො ඝොරතරෙ දුක්ඛෙ පුන පක්ඛිත්තො අයොඝරෙ
267. යදිහං තාදිසං පත්වා දුක්ඛං පරමදාරුණං රජ්ජෙසු යදි රඤ්ජාමි{4} පාපානං උත්තමො සියා{5}
271. උක්කණ්ඨිතොම්හි කායෙන රජ්ජෙනම්හි අනත්ථිකො නිබ්බුතිං පරියෙසිස්සං යත්ථ මච්චු න මද්දියෙ
272. එවාහං චින්තයිත්වාන විරවන්තං මහාජනං නාගොව බන්ධනං ඡෙත්වා පාවිසිං{1} කානනං වනං.
273. මාතා පිතා න මෙ දෙස්සා නපි මෙ දෙස්සං මහායසං සබ්බඤ්ඤුතං පියං මය්හං තස්මා රජ්ජං පරිච්චජින්ති.
අයොඝර චරියං තතියං.
4. භිස චරියං
274. පුනා පරං යදා හොමි කාසීනං පුරවරුත්තමෙ භගිනී භාතරො සත්ත නිබ්බත්තා සොත්ථියෙ කුලෙ.
275. එතෙසං පුබ්බජො ආසිං ගිරි සුක්කමුපාගතො භවං දිස්වාන භයතො නෙක්ඛම්මාභිරතො අහං.
276. මාතා පිතූහි පහිතා{2} සහායා එකමානසා කාමෙහි මං නිමන්තෙන්ති කුලවංසං ධාරෙහීති.
277. යං තෙසං වචනං වුත්තං ගිහී ධම්මෙ සුඛාවහං තම්මෙ අහොසි කඨිනං තත්තඵාලසමං{3} විය.
278. තෙ මං තදා උක්ඛීපන්තං පුච්ඡිංසු පත්ථිතං මම කිං ත්වං පත්ථයසී? සම්ම! යදිකාමෙ න භුඤ්ජසී.
279. තෙසාහං එවමවචං අත්ථකාමො{4} හිතෙසිනං නාහං පත්ථෙමි ගිහීභාවං නෙක්ඛම්මාභිරතො අහං.
280. තෙ මය්හං වචනං සුත්වා පිතු මාතු ච සාවයුං{5} මාතා පිතා එවමාහු සබ්බෙපි{6} පබ්බජාම භො
281. උභො මාතා පිතා මය්හං භගිනී ච{7} සත්ත භාතරො අමිතං ධනං ඡඩ්ඪයිත්වා පාවිසිම්හා{8} මහාවනන්ති
භිස චරියං චතුත්ථං.
5. සොණපණ්ඩිත චරියං
282. පුනාපරං යදා හොමි නගරෙ බ්රහ්මවඩ්ඪනෙ තත්ථ කුලවරෙ සෙට්ඨෙ මහාසාළෙ අජායහං{1}
283. තදාපි ලොකං දිස්වාන අන්ධභූතං{2} තමොත්ථතං{3} චිත්තං භවතො පතිකුටති තුත්තවෙගහතං විය
284. දිස්වාන විවිධං පාපං එවං චින්තෙසහං තදා කදාහං ගෙහා නික්ඛම්ම පවිසිස්සාමි කානනං.
285. තදාපි මං නිමන්තිංසු{4} කාමභොගෙහි ඤාතයො තෙසම්පි ඡන්දමාචික්ඛිං මානිමන්තෙථ තෙහි මං{5}
286. යොමෙ කණිට්ඨකො භාතා නන්දොනාමාසි පණ්ඩිතො සොපි මං අනුසික්ඛන්තො පබ්බජ්ජං සමරොචයී.
287. අහං සොණො ච නන්දො ච උභො මාතා පිතා මම තදාපි භොගෙ ඡඩ්ඩෙත්වා පාවිසිම්හා{6} මහාවනන්ති.
සොණපණ්ඩිත චරියං පඤ්චමං.
නෙක්ඛම්මපාරමිතා නිට්ඨිතා.
4. අධිට්ඨාන පාරමිතා
6. තෙමිය පණ්ඩිත චරියං
288. පුනා පරං යදා හොමි කාසිරාජස්ස අත්රජො මූගපක්ඛොති නාමෙන තෙමියොති වදන්ති මං.
289. සොළසිත්ථි සහස්සානං න විජ්ජති පුමො තදා{1} අහොරත්තානං අච්චයෙන නිබ්බත්තො අහමෙකකො.
290. කිච්ඡා ලද්ධං පියං පුත්තං අභිජාතං ජුතින්ධරං සෙතච්ඡත්තං ධාරයිත්වාන සයනෙ පොසෙති මං පිතා.
291. නිද්දායමානො සයනවරෙ පබුජ්ඣිත්වානහං තදා අද්දසං පණ්ඩරං ඡත්තං යෙනාහං නිරයං ගතො.
292. සහදිට්ඨස්ස මෙ ඡත්තං තාසො උප්පජ්ජි භෙරවො විනිච්ඡයං සමාපන්නො කදාහං{2} ඉමං මුඤ්චිස්සං{3}.
293. පුබ්බසාලොහිතා මය්හං දෙවතා අත්ථකාමිනී සාමං දිස්වාන දුක්ඛිතං තීසු ඨානෙසු යොජයී.
294. මාපණ්ඩිච්චං{4} විහාය බාලමතො භව සබ්බපාණිනං{5} සබ්බො ජනො ඔචිනායතු{6} එවං තව අත්ථො{7} භවිස්සති.
295. එවං වුත්තාය හං තස්සා ඉදං වචනමබ්රවිං{8} කරොමි තෙ නං වචනං යං ත්වං{9} භණසි දෙවතෙ අත්ථකාමාසි මෙ අම්ම! හිතකාමාසි දෙවතෙ!.
296. තස්සාහං වචනං සුත්වා සාගරෙව ථලං ලභිං හට්ඨො සංවිග්ගමානසො තයො අඞ්ගෙ අධිට්ඨහිං.
297. මූගො අහොසිං බධිරො පක්ඛො ගති විවජ්ජිතො එතෙ අඞ්ගෙ අධිට්ඨාය වස්සානං සොළසං{1} වසිං.
298. තතො මෙ හත්ථපාදෙ ච ජිව්හං{2} සොතඤ්ච මද්දිය අනූනතං මෙ පස්සිත්වා කාලකංණීති නින්දිසුං{3}
299. තතො ජානපදා{4} සබ්බෙ සෙනාපති පුරොහිතා සබ්බෙ එකමනා හුත්වා ඡඩ්ඩනං අනුමොදිසුං{5}.
300. සොහං තෙසං මතිං සුත්වා හට්ඨො සංවිග්ගමානසො යස්සත්ථාය තපො චිණ්ණො සොමෙ අත්ථො සමිජ්ඣථ.
301. නහාපෙත්වා{6} අනුලිම්පිත්වා වෙඨෙත්වා රාජවෙඨනං ඡත්තෙන අභිසිඤ්චීත්වා{7} කාරෙසුං පුර{8} පදක්ඛිණං.
302. සත්ත හං ධාරයිත්වාන උග්ගතෙ රවිමණ්ඩලෙ රථෙන මං නීහරිත්වා සාරථී වනමුපාගමී.
303. එකොකාසෙ රථං කත්වා සජ්ජස්සං{9} හත්ථමුඤ්චිතො{10} සාරථී ඛණතී කාසුං නිඛාතුං පඨවියා{11} මමං{12}
304. අධිට්ඨිතමධිට්ඨානං තජ්ජෙන්තො{13} විවිධකරණා නාභින්දිං{14} වතමධිට්ඨානං බොධියා යෙව කාරණා.
305. මාතා පිතා න මෙ දෙස්සා අත්තා මෙ න ච{15} දෙස්සියො සබ්බඤ්ඤුතං පියං මය්හං තස්මා වතමධිට්ඨහිං.
306. එතෙ අඞ්ගෙ අධිට්ඨාය වස්සානි සොළසිං{16} වසිං{17} අධිට්ඨානෙන සමො නත්ථි එසා මෙ අධිට්ඨානපාරමීති.
තෙමිය{18} චරියං ඡට්ඨමං.
අධිට්ඨානපාරමිතා නිට්ඨිතා.
5. සච්ච පාරමිතා
7. කපිරාජ චරියං
307. යදා අහං කපි ආසිං නදී කූලෙ දරීසයෙ පීළිතො සුංසුමාරෙන{1} ගමනං නලභාමිහං{2}
308. යම්හොකාසෙ අහං ඨත්වා ඔර{3} පාරං පතාමහං තත්ථච්ඡි සත්තු{4} වධකො කුම්හීලො ලුද්ද{5} දස්සනො.
309. සොමං අසංසි{6} එහීති අහමෙමීති{7} තං වදිං{8} තස්ස මත්ථකමක්කම්ම පරකුලෙ පතිට්ඨහිං.
310. න තස්ස අලිකං භණිතං යථා වාචං අකාසහං සච්චෙන මෙ සමො නත්ථි එසා මෙ සච්ච පාරමීති.
කපිරාජ චරියං සත්තමං.
8. සච්ච තාපස චරියං
311. පුනා පරං යදා හොමි තාපසො සච්චසව්හයො සච්චෙන ලොකං පාලෙසිං{9} සමග්ගං ජනමකාසහන්ති.
සච්ච පණ්ඩිත චරියං අට්ඨමං.
9. වට්ටපොතක චරියං.
312. පුනාපරං යදා හොමි මගධෙ වට්ට පොතකො අජාතපක්ඛො තරුණො මංසපෙසී කුලාවකෙ.
313. මුඛතුණ්ඩකෙ{10} නාහරිත්වා මාතා පොසයතී මමං තස්සා ඵස්සෙන ජීවාමි නත්ථි මෙ කායිකං බලං.
314. සංවච්ඡරෙ ගිම්හසමයෙ දවඩාහො{1} පදිප්පති උපගච්ඡති අම්හාකං පාවකො කණ්හවත්තනී.
315. ධූමං ධූමං ජනිත්වෙවං{2} සද්දායන්තො මහාසිඛී අනුපුබ්බෙන ඣාපෙන්තො අග්ගී මම මුපාගමි.
316. අග්ගිවෙගභයා භීතා තසිතා මාතා පිතා මම කුලාවකෙ මං ඡඩ්ඩෙත්වා අත්තානං පරිමොචයුං.
317. පාදෙ පක්ඛෙ පජහාමි නත්ථි මෙ කායිකං බලං සො, හං අගතිකො තත්ථ එවං චින්තෙසහං තදා.
318. යෙසාහං උපධාවෙය්යං භීතො තසිතවෙධිතො තෙමං ඔහාය පක්ඛන්තා කථං මෙ අජ්ජ කාතවෙ.
319. අත්ථි ලොකෙ සීලගුණො සච්චං සොචෙය්ය නුද්දයා තෙන සච්චෙන කාහාමි සච්චකිරියමුත්තමං.
320. ආවජ්ජෙත්වා ධම්ම බලං සරිත්වා පුබ්බකො ජිනෙ සච්චබලමවස්සාය සච්ච කිරියමකාසහං.
321. සන්ති පක්ඛා අපතනා සන්ති පාදා අවඤ්චනා{3} මාතා පිතා ච නික්ඛන්තා ජාතවෙද පටික්කම.
322. සහ සච්චෙ කතං මය්හං මහා පජ්ජලිතො සිඛී වජ්ජෙසි සොළස කරීසානි උදකම්පත්වා{4} යථා සිඛී සච්චෙන මෙ සමො නත්ථි එසා මෙ සච්චපාරමීති.
වට්ටපොතක{5} චරියං නවමං.
10. මච්ඡරාජ චරියං
323. පුනාපරං යදා හොමි මච්ඡරාජා මහාසරෙ උණ්හෙ සුරියසන්තාපෙ සරෙ උදකං ඛීයථ{6}.
324. තතො කාකා ච ගිජ්ඣා ච බකා{7} කුළල සෙනකා භක්ඛයන්තී දිවා රත්තිං මච්ඡෙ උපනිසීදිය.
325. එවං චින්තෙසහං තත්ථ සහ ඤාතීහි පීළිතො කෙන නුඛො උපායෙන ඤාති දුක්ඛා පමොචයෙ.
326. විචින්තයිත්වා ධම්මත්ථං සච්චං අද්දස පස්සයං සච්චෙ ඨත්වා පමොචෙසිං ඤාතීනං තං අතික්ඛයං.
327. අනුස්සරිත්වා සද්ධම්මං{1} පරමත්ථං විචින්තයං අකාසිං සච්චකිරියං යං ලොකෙ ධුවසස්සතං.
328. යතො සරාමි අත්තානං යතො පත්තොස්මි විඤ්ඤුතං නාභිජානාමි සඤ්චිච්ච එකපාණං විහිංසිතං{2} එතෙන සච්චවජ්ජෙන පජ්ජුන්නො අභිවස්සතු.
329. අභිත්ථනය පජ්ජුන්න නිධිං කාකස්ස නාසය කාකං සොකාය රුන්ධෙහි{3} මච්ඡෙ සොකා පමොචය.
330. සහකතෙ සච්චවරෙ පජ්ජුන්නො{4} චාභිගජ්ජිය ථලං නින්නඤ්ච පූරෙන්තො ඛණෙන අභිවස්සථ.