11. දෙවලොකෙ වසිත්වාන යදා ඔරොහතී ජිනො තදා අසීතිකොටීනං තතියො ආසි සමාගමො.
12. අහං තෙන සමයෙන සුජාතො නාම බ්රාහ්මණො තදා සසාවකං බුද්ධං අන්නපානෙන තප්පයිං.
13. සො’පි මං බුද්ධො ව්යාකාසි{1} සොභිතො ලොකනායකො අපරිමෙය්යෙ ඉතො කප්පෙ අයං බුද්ධො භවිස්සති.
14. අහු කපිලව්හයා රම්මා නික්ඛමිත්වා තථාගතො පධානං පදහිත්වාන කත්වා දුක්කරකාරිකං.
15. අජපාරුක්ඛමූලස්මිං නිසීදිත්වා තථාගතො තත්ථ පායාසමග්ගය්හ නෙරඤ්ජරමුපෙහිති.
16. නෙරඤ්ජරාය තීරම්හි පායාසං ආදාය සො ජිනො පටියත්තවරමග්ගෙන බොධිමූලම්හි එහිති.
17. තතො පදක්ඛිණං කත්වා බොධිමණ්ඩං අනුත්තරො අස්සත්ථරුක්ඛමූලම්හි බුජ්ඣිස්සති මහායසො.
18. ඉමස්ස ජනිකා මාතා මායා නාම භවිස්සති, පිතා සුද්ධොදනො නාම, අයං හෙස්සති ගොතමො.
19. කොලිතො උපතිස්සො ච, අග්ගා හෙස්සන්ති සාවකා, ආනන්දො නාමු’ පට්ඨාකො, උපට්ඨිස්සති තං ජිනං.
20. ඛෙමා උප්පලවණ්ණා ච, අග්ගා හෙස්සන්ති සාවිකා, බොධි තස්ස භගවතො, අස්සත්ථො’ති පවුච්චති.
21. චිත්තො ච හත්ථාළවකො, අග්ගා හෙස්සන්තු’ පට්ඨකා, උත්තරා නන්දමාතා ච, අග්ගා හෙස්සන්තු’ පට්ඨිකා, ආයු වස්ස සතං තස්ස, ගොතමස්ස යසස්සිනො.
22. ඉදං සුත්වාන වචනං අසමස්ස මහෙසිනො ආමොදිතා නරමරූ බුද්ධබීජඞ්කුරො අයං.
23. උක්කුට්ඨිසද්දං වත්තෙන්ති අප්ඵොටෙන්ති හසන්ති ච කතඤ්ජලී නමස්සන්ති දස සහස්සී සදෙවකා.
24. යදි’මස්ස ලොකනාථස්ස විරජ්ඣිස්සාම සාසනං අනාගතම්හි අද්ධානෙ හෙස්සාම සම්මුඛා ඉමං.
25. යථා මනුස්සා නදිං තරන්තා පටිතිත්ථං විරජ්ඣිය හෙට්ඨා තිත්ථෙ ගහෙත්වාන උත්තරන්ති මහානදිං.
26. එව’මෙව මයං සබ්බෙ යදිමුඤ්චාමි’මං ජිනං අනාගතම්හි අද්ධානෙ හෙස්සාම සම්මුඛා ඉමං.
27. තස්සා’පි වචනං සුත්වා හට්ඨො සංවිග්ගමානසො තමෙවත්ථමනුප්පත්තියා උග්ගං ධිතිමකාසහං.
28. සුධම්මං නාම නගරං සුධම්මො නාම ඛත්තියො සුධම්මා නාම ජනිකා සොභිතස්ස මහෙසිනො.
29. නවවස්සසහස්සානි අගාරමජ්ඣසො වසී කුමුදො කලීරො{1} පදුමො තයො පාසාදමුත්තමා.
30. සත්තති සහස්සානි{2} නාරියො සමලඞ්කතා මඛීලා{3} නාම සා නාරී සීහො නාමා’සි අත්රජො.
31. නිමිත්තෙ චතුරො දිස්වා පාසාදෙනා’භි නික්ඛමි සත්තා’හං පධානාචාරං චරිත්වා පුරිසුත්තමො බුජ්ඣමානො ච සො බුද්ධො නාගමූලෙ අබුජ්ඣථ.
32. බ්රහ්මුනා යාචිතො සන්තො සොභිතො ලොකනායකො වත්ති චක්කං මහාවීරො සුධමමුය්යානමුත්තමෙ.
33. අසමො ච සුනෙත්තො ච අහෙසුං අග්ගසාවකා අනොමො{4} නාමු පට්ඨාකො සොභිතස්ස මහෙසිනො නකුලා ච සුජාතා ච අහෙසුං අග්ගසාවිකා.
34. රම්මො චෙව සුදත්තො ච අහෙසුං අග්ගුපට්ඨකා නකුලා චෙව චිත්තා ච අහෙසුං අග්ගුපට්ඨිකා.
35. අට්ඨපඤ්ඤාස රතනං අච්චුග්ගතො මහාමුනි ඔභාසෙති දිසා සබ්බා සතරංසී’ව උග්ගතො.
36. යථා සුඵුල්ලං පවනං නානා ගන්ධෙහි ධූපිතං තථෙව තස්ස පාවචනං සීලගන්ධෙහි ධූපිතං.
37. යථාපි සාගරො නාම දස්සනෙන අතප්පියො තථෙ’ව තස්ස පාවචනං සවණෙන අතප්පියං.
38. නවුතිවස්සසහස්සානි ආයු විජ්ජති තාවදෙ තාවතා තිට්ඨමානො සො තාරෙසි ජනතං බහුං.
39. ඔවාදං අනුසිට්ඨිඤ්ච දත්වාන සෙසකෙ ජනෙ හූතාසනොව තාපෙත්වා නිබ්බුතො සො ස සාවකො.
40. සො ච බුද්ධො අසමසමො තෙ’ච{1} සාවකා බලප්පත්තා සබ්බං සමන්තරහිතං නනු රිත්තා සබ්බසඞ්ඛාරා.
41. සොභිතො වරසම්බුද්ධො සීහාරාමම්හි නිබ්බුතො ධාතු විත්ථාරිකං ආසි තෙසු තෙසු පදෙසතො’ති.
සොභිත බුද්ධවංසො ඡට්ඨො.
7. අනොමදස්සී බුද්ධවංසො
1. සොභිතස්ස අපරෙන සම්බුද්ධො දිපදුත්තමො අනොමදස්සී අමිතයසො තෙජස්සී{1} දුරතික්කමො.
2. සො ඡෙත්වා බන්ධනං සබ්බං විද්ධංසෙත්වා තයො භවෙ අනිවත්ති ගමනං මග්ගං දෙසෙසි දෙවමානුසෙ.
3. සාගරො’ව අසඞ්ඛොභො{2} පබ්බතො’ව දුරාසදො ආකාසො’ව අනන්තො සො සාලරාජාව ඵුල්ලිතො.
4. දස්සනෙන’පි තං බුද්ධං තොසිතා හොන්ති පාණිනො ව්යාහරන්තං ගිරං සුත්වා අමතං පාපුණන්ති තෙ.
5. ධම්මාභිසමයො තස්ස ඉද්ධො ඵීතො තදා අහු කොටිසතානි අභිසමිංසු පඨමෙ ධම්මදෙසනෙ.
6. තතො පරම්හි සමයෙ{3} වස්සන්තෙ ධම්මවුට්ඨියො අසීතිකොටියො අභිසමිංසු දුතියෙ ධම්මදෙසනෙ.
7. තතො පරම්පි වස්සන්තෙ තප්පයන්තෙ ච පාණිනං අට්ඨසත්තතිකොටීනං තතියා’භිසමයො අහු.
8. සන්නිපාතා තයො ආසුං තස්සාපි ච මහෙසිනො අභිඤ්ඤා බලප්පත්තානං පුප්ඵිතානං විමුත්තියා.
9. අට්ඨසතසහස්සානං සන්නිපාතො තදා අහු පහීනමදමොහානං සන්තචිත්තාන{4} තාදිනං.
10. සත්තසතසහස්සානං දුතියො ආසි සමාගමො අනඞ්ගණානං විරජානං උපසන්තාන තාදිනං.
11. ඡන්නං සතසහස්සානං තතියො ආසි සමාගමො අභිඤ්ඤාබලප්පත්තානං{1} නිබ්බුතානං තපස්සිනං.
12. අහං තෙන සමයෙන යක්ඛො ආසිං මහිද්ධිකො නෙකානං යක්ඛකොටීනං වසවතතීමහිස්සරො.{2}
13. තදා’පි තං බුද්ධවරං උපගන්ත්වා මහෙසිනං අන්නපානෙන තප්පෙසිං සසඞ්ඝං ලොකනායකං.
14. සො’පි මං තදා ව්යාකාසි{3} විසුද්ධනයනො මුනි අපරිමෙය්යෙ ඉතො කප්පෙ අයං බුද්ධො{4} භවිස්සති.
15. අහු කපිලව්හයා රම්මා නික්ඛමිත්වා තථාගතො පධානං පදහිත්වාන කත්වා දුක්කරකාරිකං.
16. අජපාලරුක්ඛමූලස්මිං නිසීදිත්වා තථාගතො තත්ථ පායාසමග්ගය්හ නෙරඤ්ජරමුපෙහිති.
17. නෙරඤ්ජරාය තීරම්හි පායාසං ආදාය සො ජිනො පටියත්තවරමග්ගෙන බොධිමූලම්හි එහිති.
18. තතො පදක්ඛිණං කත්වා බොධිමණ්ඩං අනුත්තරො අස්සත්ථරුක්ඛමූලම්හි බුජ්ඣිස්සති මහායසො.
19. ඉමස්ස ජනිකා මාතා මායා නාම භවිස්සති පිතා සුද්ධොදනො නාම අයං හෙස්සති ගොතමො.
20. කොලිතො උපතිස්සො ච අග්ගා හෙස්සන්ති සාවකා ආනන්දො නාමු’පට්ඨාකො උපට්ඨිස්සති තං ජිනං.
21. ඛෙමා උප්පලවණ්ණා ච අග්ගා හෙස්සන්ති සාවිකා බොධි තස්ස භගවතො අස්සත්ථො’ති පවුච්චති.
22. චිත්තො ච හත්ථාළවකො අග්ගා හෙස්සන්තු’පට්ඨකා උත්තරා නන්දමාතා ච අග්ගා හෙස්සන්තු’පට්ඨිකා. ආයු වස්සසතං තස්ස ගොතමස්ස යසස්සිනො.
23. ඉදං සුත්වාන වචනං අසමස්ස මහෙසිනො ආමොදිතා නරමරූ බුද්ධබීජඞ්කුරො අයං.
24. උක්කුට්ඨිසද්දං වත්තෙන්ති අප්ඵොටෙන්ති හසන්ති ච කතඤ්ජලී නමස්සන්ති දසසහස්සී සදෙවකා.
25. යදි’මස්ස ලොකනාථස්ස විරජ්ඣිස්සාම සාසනං අනාගතම්හි අද්ධානෙ හෙස්සාම සම්මුඛා ඉමං.
26. යථා මනුස්සා නදිං තරන්තා පටිතිත්ථං විරජ්ඣිය හෙට්ඨා තිත්ථෙ ගහෙත්වාන උත්තරන්ති මහානදිං.
27. එව’මෙව මයං සබ්බෙ යදි මුඤ්චාමි’මං ජිනං අනාගතම්හි අද්ධානෙ හෙස්සාම සම්මුඛා ඉමං.
28. තස්සා’පි වචනං සුත්වා හට්ඨො සංවිග්ගමානසො උත්තරිං වත මධිට්ඨාසිං දස පාරමිපූරියා.
29. නගරං චන්දවතී{1} නාම යසවා නාම ඛත්තියො මාතා යසොධරා නාම අනොමදස්සිස්ස සත්ථුනො.
30. දස වස්සසහස්සානි අගාරමජ්ඣසො වසී සිරි උපසිරිසිරිවඩ්ඪො තයො පාසාද මුත්තමා.
31. තෙවීසතිසහස්සානි නාරියො සමලඞ්කතා සිරිමා නාම නාරී ච උපවානො{2} නාම අත්රජො.
32. නිමිත්තෙ චතුරො දිස්වා සිවිකායා’භිනික්ඛමි අනූනදසමාසානි පධානං පදහී ජිනො.
33. බ්රහ්මුනා යාචිතො සන්තො අනොමදස්සී මහාමුනි වත්තිවක්කං මහාවීරො උය්යානෙ සො සුදස්සනෙ.
34. නිසභො ච{1} අනොමො{2} ච අහෙසුං අග්ගසාවකා වරුණො නාමු’පට්ඨාකො අනොමදස්සිස්ස සත්ථුනො.
35. සුන්දරී{3} ච සුමනා ච අහෙසුං අග්ගසාවිකා බොධි තස්ස භගවතො අජ්ජුනො’ති පවුච්චති.
36. නන්දිවඩ්ඪො සිරිවඩ්ඪො අහෙසුං අග්ගු’පට්ඨකා උප්පලා චෙව පදුමා ච අහෙසුං අග්ගු’පට්ඨිකා.
37. අට්ඨපඤ්ඤාස රතනං අච්චුග්ගතො මහාමුනි පභා නිද්ධාවති තස්ස සතරංසී’ව උග්ගතො.
38. වස්සසතසහස්සානි ආයු විජ්ජති තාවදෙ තාවතා තිට්ඨමානො සො තාරෙසි ජනතං බහුං.
39. සුපුප්ඵිතං පාවචනං අරහන්තෙහි තාදිහි වීතරාගෙහි විමලෙහි සොභිත්ථ ජිනසාසනං.
40. සො ච සත්ථා අමිතයසො යුගානි තානි{4} අතුලියානි සබ්බං සමන්තරහිතං නනු රිත්තා සබ්බසඞ්ඛාරා.
41. අනොමදස්සී ජිනො සත්ථා ධම්මාරාමම්හි නිබ්බුතො තත්ථෙ’ව තස්ස ජිනථූපො උබ්බෙධො පඤ්චවීසතී’ති.
අනොමදස්සී බුද්ධවංසො සත්තමො.
8. පදුම බුද්ධවංසො
1. අනොම දස්සිස්ස අපරෙන සම්බුද්ධො දිපදුත්තමො පදුමො නාම නාමෙන අසමො අප්පටිපුග්ගලො.
2. තස්සා’පි අසමං සීලං සමාධි’පි අනන්තකො අසඞ්ඛෙය්යං ඤාණවරං විමුත්ති ච අනූපමා.
3. තස්සා’පි අතුලතෙජස්ස ධම්මචක්කප්පවත්තනෙ අභිසමයා තයො ආසුං මහාතමපවාහනා.
4. පඨමාභිසමයෙ බුද්ධො කොටිසතමබොධයී දුතියාභිසමයෙ ධීරො නවුතිකොටිමබොධයී.
5. යදා ච පදුමො බුද්ධො ඔවදී සකම’ත්රජං තදා අසීතිකොටීනං තතියා’භිසමයො අහු.
6. සන්නිපාතා තයො ආසුං පදුමස්ස මහෙසිනො, කොටිසතසහස්සානං පඨමො ආසි සමාගමො.
7. කඨින{1}ත්ථාරසමයෙ උප්පන්නෙ කඨින{1}චීවරෙ ධම්මසෙනාපත’ත්ථාය{2} භික්ඛු සිබ්බිංසු චීවරං.{3}
8. තදා තෙ විමලා භික්ඛු ඡළභිඤ්ඤා මහිද්ධිකා තීණි සතසහස්සානි සමිංසු අපරාජිතා.
9. පුනාපරං සො නරාසභො{4} පවනෙ වාසං උපාගතො{5} තදා සමාගමො ආසා ද්වින්නං සතසහස්සානං{6}.
10. අහං තෙන සමයෙන සීහො ආසිං මිගාධිභූ{7} පවිවෙකමනුබ්රූහන්තං පවනෙ අද්දසං ජිනං{8}.
11. වන්දිත්වා සිරසා පාදෙ කත්වාන තං පදක්ඛිණං තික්ඛත්තුං අභිනාදිත්වා. සත්තාහං ජිනමුපට්ඨහිං{9}.
12. සත්තාහං වරසමාපත්තියා උට්ඨහිත්වා තථාගතො මනසා චින්තයිත්වාන කොටිභික්ඛු සමානයී.
13. තදාපි සො මහාවීරො තෙසං මජ්ඣෙ වියාකරී අපරිමෙය්යෙ ඉතො කප්පෙ අයං බුද්ධො භවිස්සති.
14. අහු කපිලම්හයා රම්මා නික්ඛමිත්වා තථාගතො පධානං පදහිත්වාන කත්වා දුක්කරකාරිකං.
15. අජපාලරුක්ඛමූලස්මිං නිසීදිත්වා තථාගතො තත්ථ පායාසමග්ගය්හ නෙරඤ්ජරමුපෙහිති.
16. නෙරඤ්ජරාය තීරම්හි පායාසං ආදාය සො ජිනො පටියත්තවරමග්ගෙන බොධිමූලම්හි එහිති.
17. තතො පදක්ඛිණං කත්වා බොධිමණ්ඩං අනුත්තරො අස්සත්ථරුක්ඛමූලම්හි බුජ්ඣිස්සති මහායසො.
18. ඉමස්ස ජනිකා මාතා මායා නාම භවිස්සති පිතා සුද්ධොදනො නාම අයං හෙස්සති ගොතමො.
19. කොලිතො උපතිස්සො ච අග්ගා හෙස්සන්ති සාවකා ආනන්දො නාමුපට්ඨාකො උපට්ඨිස්සති තං ජිනං.
20. ඛෙමා උප්පලවණ්ණා ච අග්ගා හෙස්සන්ති සාවිකා බොධි තස්ස භගවතො අස්සත්ථො’ති පවුච්චති.
21. චිත්තො ච හත්ථාළවකො අග්ගා හෙස්සන්තු’පට්ඨකා උත්තරා නන්දමාතා ච අග්ගා හෙස්සන්තු’පට්ඨිකා ආයු වස්ස සතං තස්ස ගොතමස්ස යසස්සිනො.
22. ඉදං සුත්වාන වචනං අසමස්ස මහෙසිනො ආමොදිතා නරමරූ බුද්ධබීජඞ්කුරො අයං.
23. උක්කුට්ඨිසද්දං වත්තෙන්ති අප්ඵොඨෙන්ති හසන්ති ච කතඤ්ජලී නමස්සන්ති දසසහස්සී සදෙවකා.
24. යදි’මස්ස ලොකනාථස්ස විරජ්ඣිස්සාම සාසනං අනාගතම්හි අද්ධානෙ හෙස්සාම සම්මුඛා ඉමං.